7-06-2024, 16:24
Bakının bəzi ərazilərində yollar təmirə bağlanır
Sabah saat 10:00-dan Bakının Atatürk prospektində (Səttar Bəhlulzadə küçəsindən Fətəli xan Xoyski küçəsinə qədər), iyunun 10-da isə saat 10:00-dan Bakının Suraxanı rayonunun Səttar Bəhlulzadə küçəsində (Heydər Əliyev prospektindən “Atəşgah məbədi” Dövlət Tarix-Memarlıq Qoruğuna qədər) təmir işlərinə başlanılacaq.
Məlumata görə, təmir müddətində sözügedən hissələrdə işlərin aparıldığı zolaqlar üzrə hərəkət qismən məhdudlaşdırılaraq digər zolaqlara yönləndiriləcək, amma yollar bağlanmayacaq.
"Sürücülərdən aparılan işlərə anlayışla yanaşmaları, təmir müddətində sözügedən hissələrdə hərəkətdə olarkən diqqətli olmaları, təmir ərazilərində qoyulacaq müvəqqəti yol nişanlarının tələblərinə və yol hərəkəti qaydalarına riayət etmələri xahiş olunur", - deyə agentlik bəyan edib.
7-06-2024, 16:22
Azərbaycanla Belarus arasında üç saziş imzalandı
Minskdə keçirilən Belarus-Azərbaycan biznes forumu çərçivəsində turizm, xarici sərgilərin birgə təşkili və “Azərbaycan Ticarət Evi”ndə satış üçün ayrı-ayrı məhsul növlərinin tədarükü sahələrində üç saziş imzalanıb.
Bunu Belarus Ticarət-Sənaye Palatasının sədr müavini Denis Meleşkin bildirib.
“Biz milli sərgi operatoruyuq və hər il xarici ölkələrdə, o cümlədən Azərbaycanda 30-dan çox sərgi tədbiri təşkil edirik. Müxtəlif sahələrdə böyük sərgilər keçiririk. Söhbət yeyinti sənayesi, neft-kimya və digər sahələrlə bağlı sərgilərdən gedir. Bu gün Azərbaycan Sərgi Təşkilatçıları Assosiasiyası ilə imzalanmış əməkdaşlıq memorandumu sərgi tədbirlərinin, o cümlədən birgə tədbirlərin təşkili və keçirilməsi sahələrində əlaqələrimizin inkişafına kömək edəcək”, - o vurğulayıb.
7-06-2024, 15:23
Rüşvət aldığı deyilən bağça müdirinə şiddətli töhmət verildi
Abşeron-Xızı Regional Təhsil İdarəsi Xırdalan şəhəri 17 nömrəli körpələr evi-uşaq bağçasının müdirinin sosial şəbəkələrdə yayılmış səs yazısı ilə bağlı məlumat yayıb.
İdarədən verilən məlumatına görə, Xırdalan şəhəri 17 nömrəli körpələr evi-uşaq bağçasının keçmiş müdiri Fəranə Məhərrəmovanın sosial şəbəkələrdə yayılmış məlum səs yazısı ilə əlaqədar “Təhsilverənlərin etik davranış Qaydaları”nın tələblərini pozduğu üçün adıçəkilən şəxsə Əmək Məcəlləsinə əsasən, “sonuncu xəbərdarlıqla şiddətli töhmət” verilib.
"Eləcə də, Xırdalan 17 nömrəli körpələr evi-uşaq bağçasının fəaliyyəti Abşeron-Xızı Regional Təhsil İdarəsi tərəfindən nəzarətə götürülüb” , - məlumatda bildirilib.
Qeyd edək ki, bağçanın müdiri hazırda əmək qabiliyyətini itirdiyinə görə bağçanın müdir səlahiyyətləri Abşeron-Xızı Regional Təhsil İdarəsinin metodisti Sevinc Abbas qızı Qurbanovaya həvalə edilmişdi.
Xatırladaq ki, bağça müdiri Fəranə Məhərrəmovanın sosial şəbəkələrdə yayılmış səs yazısında müəllimlərdən pul tələb etdiyi iddia olunur.
7-06-2024, 14:35
Qəbul imtahanının 2-ci cəhdi daha çətin olacaq - XƏBƏRDARLIQ
“Qəbul imtahanlarının 2-ci cəhdi daha çətin ola bilər”.
Bu fikri açıqlamasında təhsil eksperti Kamran Əsədov qeyd edib
Ekspertin sözlərinə görə, iyunun 2-də I və IV qruplar üçün keçirilən imtahanların ilkin təhlilləri göstərir ki, IV ixtisas qrupu üzrə kimya və biologiyadan təqdim edilmiş suallar kifayət qədər çətin idi:
“Düzdür, aparılan ilkin tədqiqatlar əsasında deyə bilərik ki, sualların faiz nisbəti əslində 30% asan suallar, eyni zamanda 40 % orta və 30 % çətin suallar olmalı idi. Amma burada balans məsələsində çətin sualların sayı ümumi test tapşırıqlarının 40%-ə qədər olduğu, asan sualların isə ümumi sualların cəmi 25% -ni təşkil etdiyini gördük. Xüsusən I ixitsas qrupunda riyaziyyatdan çətin suallar say çoxluğu təşkil edirdi. Orada müxtəlif tənliklərin həlli vaxt aparırdı”.
O, abituriyentlərə 2-ci şans imtahanında iştirak etməyi tövsiyə edib:
“Hesab edirəm ki, imtahan ciddi bir prosesdir və bütün abituriyentlərə tövsiyə edirəm ki, 2-ci şans imtahanında mütləq iştirak etsinlər və yaxşı hazırlaşsınlar. Əlbəttə, əvvəlki illərələ müqayisədə xüsusilə IV ixtisas qrupundakı sualları biz bir az çətin adlandıra bilərik. Bu da öz növbəsində qəbul imtahanlarının nəticələrinə təsir göstərə bilər.
Lakin nəzərə alsaq ki, 2-ci şans imtahanıda var və bu imtahandan gözləyirik ki, iyunun 2-də keçirilən imtahandan daha çətin olacaq”.
7-06-2024, 14:31
10-cu sinif şagirdi vəfat etdi
Xırdalan şəhər 1 nömrəli tam orta məktəbin 10-cu sinif şagirdi vəfat edib.
Bu barədə məktəbin sosial şəbəkə hesabında məlumat paylaşılıb.
Bildirilib ki, məktəbin fəal və nümunəvi şagirdi olan Nurməmmədova Leyla Anar qızı xəstəlik səbəbilə dünyasını dəyişib.
6-06-2024, 22:53
Bakıda kafe yanır
Bakının Binəqədi rayonunda, Məhəmməd Əmin Rəsulzadə qəsəbəsində fəaliyyət göstərən kafelərin birində güclü yanğın başlayıb.
Bu barədə görüntülər sosial şəbəkələrdə yayılıb.
Qeyd olunub ki, yanğın güclü olduğu üçün ətrafa yayılıb. Hələlik yanğının qarşısını almaq mümkün olmayıb.
6-06-2024, 21:50
Avropanın üç ölkəsi Azərbaycana soyuq müharibə elan edib
Bizim Avropa İttifaqı ilə münasibətlərimiz müsbət xarakterizə oluna bilər, ancaq İkinci Qarabağ müharibəsindən və xüsusilə keçən ilin antiterror əməliyyatından sonra bəzi Avropa ölkələri bizə qarşı əsassız və vicdansız hücumlara başlayıb.
Bu fikri Prezident İlham Əliyev TÜRKPA-ya üzv ölkələrin parlament sədrləri ilə keçirilən görüşdə səsləndirib.
"Azərbaycanı ləkələmək, bizim işimizə kölgə salmaq, ağa qara, qaraya ağ demək, işğalçını dəstəkləmək, işğala məruz qalanları isə ləkələmək Avropa İttifaqının bəzi üzv ölkələri üçün həyat tərzinə çevrilib. Bunun təməlində heç də beynəlxalq hüququn normaları deyil, şəxsi xəstə ambisiyalar dayanır. Əfsuslar olsun ki, Avropada xüsusi yerə malik olmaq üçün can atan bəzi ölkələr anti-Azərbaycan qruplaşmanı da yarada bilmişlər. Avropa İttifaqına üzv olan ən azı üç ölkə bu gün Azərbaycana qarşı soyuq müharibə elan edib. Onların adları bəllidir", - Prezident qeyd edib.
6-06-2024, 21:21
Şabranda sürücü yeniyetməni vurub öldürdü
Şabranda ölümlə nəticələnən yol-nəqliyyat hadisəsi baş verib.
DİN Mətbuat Xidmətinin Quba regional qrupundan verilən məlumata görə, bu gün saat 19:30 radələrində Şabran rayonu ərazisində rayon sakini Məmmədəli Quliyev idarə etdiyi "Opel" markalı avtomobil yolu keçən piyada 2008-ci il təvəllüdlü rayon sakini L.Osmanovanı vurub.
Müxtəlif dərəcəli bədən xəsarətləri ilə Şabran RMX-çatdırılan şəxs orada ölüb.
Faktla bağlı cinayət işi başlanılıb, araşdırmalar davam etdirilir.
6-06-2024, 20:55
Moskva və Bakı konsulluq məsələsini müzakirə edir
“Moskva və Bakı Rusiyanın Azərbaycanda Baş konsulluqlarının yaradılmasını müzakirə edir”.
Bunu Peterburq beynəlxalq forumu çərçivəsində keçirilən Rusiya-Azərbaycan sessiyasında Rusiya xarici işlər nazirinin müavini Mixail Qaluzin bildirib.
O qeyd edib ki, Rusiya bu işdə uğurlu yekuna ümidlidir.
Qeyd edək ki, Rusiya Federasiya Şurasının Beynəlxalq əlaqələr komitəsinin sədri Qriqori Karasin daha əvvəl ölkəsinin Azərbaycanın Xankəndi şəhərində konsulluq açmaq niyyətində olduğunu açıqlayıb.
6-06-2024, 20:29
İlham Əliyevdən Ermənistana sərt mesaj
Ermənistanın hazırkı konstitusiyası dəyişməz qaldığı halda sülh sazişinin bağlanması mümkün deyil.
Bu fikirləri Prezident İlham Əliyev TÜRKPA-ya üzv ölkələrin parlament sədrləri ilə keçirilən görüşdə söyləyib.
"Məhz onların ideologiyasında, siyasətində və ictimai diskursunda Türkiyəyə qarşı ərazi iddiaları davamlı olaraq eşidilir. Azərbaycanlılar və türklər məhz onların cəmiyyətində kiçik yaşlarından düşmən obrazında təqdim edilirlər. Millətçilər və hərbi cinayətkarlar tərəfindən zəhərlənən onların cəmiyyətidir. Ona görə də onlar bu məsələlərlə məşğul olmalıdırlar", - dövlət başçısı qeyd edib.
Prezident vurğulayıb ki, iki ölkənin hərbi potensialını, demoqrafik potensialını, iqtisadi potensialını müqayisə edib sonra Türkiyəyə qarşı ərazi iddiası irəli sürmək intihar etmək deməkdir: "2020-ci və 2023-cü illərin hadisələrindən sonra Azərbaycana qarşı ərazi iddiaları irəli sürmək də, ümumiyyətlə, intihara yaxındır. Ona görə də onlar öz ideologiyalarını, cəmiyyətdəki əhvali-ruhiyyəni dəyişməlidirlər. Bu, zaman tələb edir. Onlar revanşizm ideyalarından tamamilə imtina etməlidirlər və biz görürük ki, belə ideyalar təkcə müxalifətdə deyil, iqtidarda da var. Bütün bu məsələlər, təbii ki, aydınlaşdırılmalı və tənzimlənməlidir. Ancaq yenə də demək istəyirəm ki, biz sülh sazişinin bütün bəndlərinin BMT Nizamnaməsinə və beynəlxalq hüquqa uyğun olaraq razılaşdırılması istiqamətində konstruktiv işə sadiqik".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!