10-12-2025, 12:12
Azərbaycan-Slovakiya strateji
tərəfdaşlığı uğurla inkişaf edir
Son illərdə Azərbaycanın Avropa ölkələri ilə münasibətləri strateji əməkdaşlıq səviyyəsinə yüksəlib. 2024-cü ildə iki ölkə arasında Strateji Tərəfdaşlığın Qurulması
haqqında Birgə Bəyannamə imzalanıb. Bu da əlaqələri yeni səviyyəyə qaldırıb.
Azərbaycan-Slovakiya münasibətlərinin yüksək səviyyəyə çatmasında, hər iki ölkə liderlərinin əvəzsiz rolu var. Hər iki dövlət beynəlxalq təşkilatlar çərçivəsində bir-birini daim dəstəkləyir.
Slovakiya ilə Azərbaycan arasında diplomatik münasibətlər 1990-cı illərin əvvəllərindən davamlı və sistemli şəkildə inkişaf edir.
Slovakiya Azərbaycanın müstəqilliyini 1992-ci ilin yanvarında tanıyıb və iki ölkə arasında diplomatik münasibətlər rəsmi olaraq 1993-cü ildə qurulub.
Prezident İlham Əliyevin dekabr ayının 8-də Slovakiyaya ilk rəsmi səfəri də xüsusi əhəmiyyət daşıyır. Dövlət başçımızın bu səfəri demək olar ki, iki ölkə arasında strateji əməkdaşlığın gücləndirilməsinə yönəlmiş bir addımdır. Səfər, eyni zamanda, regionun sabitliyinə, investisiya imkanlarının inkişafına və qarşılıqlı faydalı layihələrin təşviqinə hədəflənib.
Bütün istiqamətlər üzrə Azərbaycandan və Slovakiyadan müştərək komandalar fəal işləyir. Birgə iqtisadi işçi qrupu öz fəaliyyətini genişləndirir. Ənənəvi əməkdaşlıq sahəsi olan energetika üzrə konkret layihələr icra edilir. Keçən il ilk dəfə olaraq Azərbaycan qazı Slovakiyaya təchiz edilmişdir və Slovakiyanın ehtiyacları olan səviyyədə, istənilən həcmdə Azərbaycan enerji resurslarını təmin edə bilər. Slovakiyanın Azərbaycandan qaz alması bu ölkənin enerji təhlükəsisliyinə töhfə verir. Bundan əlavə olaraq, eyni zamanda Bakı-Bratislava xəttinin strateji əhəmiyyətini artırır. Azərbaycanın zəngin qaz yataqları bu gün dünyanın bir çox ölkələrinə təbii qazın ixrac edilməsinə imkan verir.
Azərbaycan qazını almış ölkələrin sayı artıq 14-ə çatıb. Respublikamız boru kəmərləri ilə ixrac edilən qazın təchizatçı ölkəsi olaraq birinci yerdədir. Yeni qaz yataqlarının işlənməsi nəticəsində əlavə resurslar əldə edilməsi nəzərdə tutulub və təbii ki, həm Slovakiyaya, həm də onun qonşularına Azərbaycan qazının təchizatı daha da böyük həcmdə mümkün olacaqdır.
Azərbaycan Prezidenti mətbuata bəyanatında hazırda Azərbaycanın ümumi qaz ixracının 25 milyard kubmetr səviyyəsində olduğunu, bunun da yarısının Avropa ölkələrinə nəql edildiyini vurğulayıb. Qeyd edib ki, bu gün Avropa İttifaqına üzv 8 ölkə Azərbaycan qazını alaraq öz enerji təhlükəsizliyini təmin etmiş olur. Azərbaycanın qaz sənayesi inkişaf etdikcə ölkəmizin ixrac imkanları və beynəlxalq əməkdaşlığı daha da genişlənir. Bu proses Azərbaycanın regionda və Avropada həm də etibarlı enerji tərəfdaşı kimi mövqeyini möhkəmləndirir.
Azərbaycan xalqı sülhsevər xalqdır. Biz heç bir ölkə ilə müharibə aparmamışıq. 44 günlük müharibədə isə yalnız Ermənistan tərəfindən işğal edilmiş torpaqlarımızı azad etmişik.
Slovakiya da Azərbaycanın ərazi bütövlüyünə və suverenliyinə hörmətlə yanaşan ölkələrdəndir. 2025-ci ilin noyabr ayının 8-də Bakının Azadlıq meydanında Vətən müharibəsində Qələbənin beşinci ildönümünə həsr olunmuş Hərbi paradda Slovakiya Baş nazirinin müavini və müdafiə naziri Robert Kalinakın iştirakı bunun bariz nümunəsidir. Dövlət başçımız mətbuata bəyanatında paradda iştiraka görə Slovakiya dövlətinə minnətdarlığını bildirib. Qeyd edib ki, bu kimi jestlər bir daha onu göstərir ki, biz, sözün əsl mənasinda dost ölkələrik.
Respublikamızda müdafiə sənayesi sahəsində də bir sıra işlər görülür. Slovakiya ilə əməkdaşlıq sahələrindən biri də müdafiə sənayesi sahəsidir. Özüyeriyən artilleriya qurğuları, silah-sürsat və digər bu kimi məhsullar sahəsində böyük təcrübəyə malik olan Slovakiyadan Azərbaycan üçün texnologiya ötürülməsi, bu sahədə birgə işləmək və birlikdə istehsal edilən məhsulları üçüncü ölkəyə satmaq qarşıda duran əsas prioritetlərdən biridir.
Azərbaycan Prezidenti cənab İlham Əliyev: “Biz bu sahədə əməkdaşlığı sənayenin inkişafı nöqteyi-nəzərindən görürük. Biz müharibə aparmaq fikrində deyilik. Yəni, bizim üçün müharibələr artıq keçmişdə qalır və sadəcə olaraq, burada bir sinergiyanın yaradılması üçün Slovakiya texnologiyaları ilə Azərbaycan maliyyə imkanlarını birləşdirərək yeni məhsulların istehsalı dünya bazarları üçün də maraqlı ola bilər. Həm də ki, bu, texnoloji inkişafın da bir qolu olaraq bizə böyük faydalar verəcəkdir. Biz bu istiqamətdə konkret layihələr üzərində çalışırıq”.
Onu da qeyd edək ki, İşğaldan azad olunmuş ərazilərimizdə digər dost, qardaş ölkələrin şirkətləri arasında Slovakiya şirkətləri də var. Onlar da şəhər və kəndlərimizin yenidən canlanması üçün öz töhvələrini verirlər.
Dövlət başçımız Azərbaycanın eyni zamanda, bu gün Şərqlə Qərb arasında müəyyən bir körpü rolunu oynadığını və infrastruktura, bağlantılara, nəqliyyat sektoruna qoyduğumuz sərmayənin Azərbaycan Şərq-Qərb nəqliyyat dəhlizinin önəmli parçasına çevrilməsinə imkan verdiyini söyləyib. Orta Asiyanı Avropa ilə birləşdirən ən etibarlı və ən təhlükəsiz marşrutun Azərbaycan ərazisindən keçdiyini vurğulayıb.
Dövlət başçısı bəyanatında enerji sahəsinə də toxunub, qeyd edib ki, “Bu gün Azərbaycanda istifadə olunmayan enerji potensialı təxminən 2 giqavata bərabərdir və növbəti beş il ərzində bu, 8 giqavata çatdırılacaq. Təbii ki, süni intellekt və data mərkəzlərinin fəaliyyəti üçün enerji mənbəyi əsas amillərdən biridir. Əlbəttə ki, iqlim də burada önəmli amildir. Baxmayaraq, biz Cənub ölkəsiyik, amma bizim çox soyuq bölgələrimiz də var ki, orada ilin böyük hissəsində şaxtalı hava şəraiti mövcuddur. Ona görə beynəlxalq data mərkəzləri habı kimi biz öz rolumuzu görürük və Slovakiya şirkətləri ilə bu istiqamətdə çalışmaq fikrindəyik”.
Şəhla Ağbulud
“Abşeron” qəzetinin Baş redaktoru
10-12-2025, 09:48
Azərbaycan–Slovakiya strateji
tərəfdaşlığı möhkəmlənir
Prezident İlham Əliyevin 8 dekabr 2025-ci il tarixində Slovakiyaya səfəri çərçivəsində mətbuata verdiyi bəyanat Azərbaycan–Slovakiya münasibətlərinin yüksək səviyyədə inkişaf etdiyini bir daha nümayiş etdirdi. Dövlət başçısı çıxışında bildirdi ki, Slovakiya və Azərbaycan sözün əsl mənasında dost ölkələr və etibarlı strateji tərəfdaşlardır. Keçən il imzalanmış Strateji Tərəfdaşlıq haqqında Birgə Bəyannamə münasibətləri ən yüksək mərhələyə qaldırıb və bu sənəddən sonra bütün sahələr üzrə əməkdaşlıq daha da intensiv xarakter alıb. Hazırda hər iki ölkənin müştərək komandaları müxtəlif istiqamətlərdə fəal işləyir, birgə iqtisadi işçi qrupun fəaliyyəti genişlənir, energetika kimi ənənəvi əməkdaşlıq sahəsində isə konkret layihələr uğurla həyata keçirilir. Ötən il Azərbaycanın ilk dəfə Slovakiyaya təbii qaz tədarük etməsi bu əməkdaşlığın mühüm nəticələrindən biri olub və Azərbaycan Slovakiyanın tələb etdiyi miqdarda enerji resurslarını təmin etmək imkanına malikdir.
Prezident İlham Əliyev Azərbaycanın zəngin qaz yataqlarının ölkəyə geniş ixrac imkanı yaratdığını, hazırda Azərbaycan qazı alan ölkələrin sayının 14-ə çatdığını və ölkəmizin boru kəmərləri vasitəsilə ixrac olunan qazın təchizatçısı kimi birinci yerdə qərarlaşdığını qeyd edib. Yeni yataqların işlənməsi əlavə resursların dövriyyəyə daxil olmasına şərait yaradacaq ki, bu da Slovakiya və digər Avropa ölkələrinə daha böyük həcmdə qaz tədarükünü mümkün edəcək. Hazırda Azərbaycanın ümumi qaz ixracının 25 milyard kubmetr olduğunu bildirən dövlət başçısı bu həcmdən 50 faizinin Avropa ölkələrinə göndərildiyini, Avropa İttifaqının 8 üzvünün məhz Azərbaycan qazı hesabına öz enerji təhlükəsizliyini təmin etdiyini vurğulayıb.
Müdafiə sənayesi sahəsində əməkdaşlığın geniş imkanları barədə danışan Prezident qeyd edib ki, bu istiqamətdə əməkdaşlıq hərbi məqsədlərdən daha çox sənaye və texnoloji inkişaf baxımından nəzərdən keçirilir. Slovakiya texnologiyalarının Azərbaycan maliyyə imkanları ilə birləşdirilməsi yeni məhsulların istehsalını və dünya bazarlarına çıxışını təmin edə bilər. Dövlət başçısı vurğulayıb ki, Azərbaycan müharibə aparmaq niyyətində deyil və bu əməkdaşlıq yalnız sülh, sənaye və inkişaf məqsədlərinə xidmət edir. İlham Əliyev noyabrın 8-də qeyd olunan Zəfər Gününün beşinci ildönümündə Slovakiyanın yüksək səviyyəli rəsmi nümayəndələrinin Bakıda fəxri qonaq qismində iştirakını xüsusi məmnunluqla vurğulayıb və bunu iki ölkə arasındakı səmimi dostluğun bariz nümunəsi kimi qiymətləndirib.
Slovakiyanın uğurlu inkişafı, sabitliyi və güclü sənaye potensialı Azərbaycan tərəfindən yüksək dəyərləndirilir. Prezident İlham Əliyev bildirib ki, Slovakiyanın müstəqil xarici siyasət yürütməsi bəzən çətinliklər yaratsa da, bu mövqedə qətiyyət nümayiş olunması ona bölgədə böyük hörmət qazandırıb. Azərbaycan da öz xarici siyasət prioritetlərini çoxdan müəyyən edib və bu gün Şərqlə Qərb arasında etibarlı körpü rolunu oynayır. Son illərdə infrastruktur, nəqliyyat və logistika sahəsinə yatırılan sərmayələr nəticəsində Azərbaycan Şərq–Qərb nəqliyyat dəhlizinin aparıcı hissəsinə çevrilib və Orta Dəhliz layihəsində fəal iştirak edir. Asiyanı Avropa ilə birləşdirən ən təhlükəsiz və etibarlı marşrutlardan birinin Azərbaycan ərazisindən keçməsi ölkəmizin tranzit imkanlarının nə qədər geniş olduğunu göstərir.
Gələcək planlarla bağlı Prezident bildirib ki, Azərbaycan bağlantılar və nəqliyyat sektoruna əlavə investisiyalar yönləndirəcək, bu sahədə imkanlar daha da genişlənəcək. Bu istiqamət Slovakiya ilə əməkdaşlığın dərinləşməsi üçün böyük potensiala malikdir və qarşıdakı illərdə tərəflər bu imkanlardan daha geniş istifadə etməyi planlaşdırırlar.
Dövlət başçısı Azərbaycanın enerji və texnoloji potensialına da toxunaraq qeyd edib ki, ölkədə istifadə olunmayan enerji gücü hazırda təxminən 2 giqavata bərabərdir və yaxın beş ildə 8 giqavata çatdırılması planlaşdırılır. Bu, süni intellekt texnologiyaları və beynəlxalq data mərkəzləri üçün mühüm üstünlükdür. Azərbaycanın iqlim müxtəlifliyi – xüsusilə ilin böyük hissəsində soyuq olan bölgələrin mövcudluğu – data mərkəzlərinin yerləşdirilməsi üçün əlverişli şərait yaradır. Prezident bildirib ki, Azərbaycan beynəlxalq data mərkəzləri üçün regional hab rolunu oynamağa hazırdır və bu istiqamətdə Slovakiya şirkətləri ilə əməkdaşlıq perspektivləri genişdir.
Prezident İlham Əliyevin Slovakiyada mətbuata bəyanatı iki ölkə arasında strateji tərəfdaşlığın daha da dərinləşəcəyini, siyasi, iqtisadi, enerji və texnoloji sahələrdə əməkdaşlığın artan dinamika ilə davam etdiyini təsdiqlədi. Bu səfər Azərbaycan–Slovakiya münasibətlərinə yeni impuls verərək əməkdaşlığın gələcək mərhələsi üçün möhkəm zəmin yaratdı.
Gülnaz Kərimova,
Xırdalan şəhər 2 nömrəli tam orta məktəbin direktoru
9-12-2025, 23:55
Altı ay çalışan işçiyə il bitənədək məzuniyyət verilməsi məcburi olacaq
Əmək məzuniyyətinin verilməsi qaydasında dəyişiklik ediləcək.
Bu məsələ Milli Məclisin Regional məsələlər komitəsinin onlayn iclasında müzakirə olunan Əmək Məcəlləsində dəyişiklik edilməsi barədə qanun layihəsində öz əksini tapıb.
Mövcud qanunvericiliyə görə, işçiyə altı ay işlədikdən sonra birinci iş ili bitənədək əmək məzuniyyəti ərizəsi əsasında işəgötürənlə razılaşdırıldığı vaxtda verilə bilər.
İşçiyə işin ikinci və sonrakı illəri üçün məzuniyyət işəgötürənlə qarşılıqlı razılıqla müəyyən edilən vaxtda verilə bilər.
Layihəyə əsasən, işçiyə altı ay işlədikdən sonra birinci iş ili bitənədək əmək məzuniyyəti ərizəsi əsasında işəgötürənlə razılaşdırıldığı vaxtda veriləcək.
İşçiyə işin ikinci və sonrakı illəri üçün məzuniyyət işəgötürənlə qarşılıqlı razılıqla müəyyən edilən vaxtda veriləcək.
İşçinin təşəbbüsü ilə əmək məzuniyyətindən geriçağırılma yalnız işəgötürənin mülahizəsi ilə həyata keçiriləcək.
9-12-2025, 23:11
Hikmət Hacıyevlə Qriqoryan eyni studiyada müsahibə verdilər
Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Ermənistan Təhlükəsizlik Şurasının katibi Armen Qriqoryanla birlikdə ilk dəfə “Euronews” telekanalına müsahibə veriblər.
Azərbaycan və Ermənistan rəsmiləri Dohada “Euronews”a verdikləri ilk birgə eksklüziv müsahibədə sülh prosesinin necə başlandığını və iki ölkəni gözləyən birgə gələcək perspektivlərini açıqlayıblar.
Tərəflər onilliklər davam edən münaqişədən sonra Cənubi Qafqazın tamamilə yeni siyasi-iqtisadi mərhələyə qədəm qoyduğunu bildiriblər.
Azərbaycan Prezidentinin köməkçisi Hikmət Hacıyev və Ermənistan Təhlükəsizlik Şurasının katibi Armen Qriqoryan müsahibədə deyiblər ki, danışıqlar 2020-ci ildə – son hərbi toqquşmalardan dərhal sonra, Avropa İttifaqının dəstəyi ilə başlayıb və bu proses ABŞ Prezidenti Donald Trampın vasitəçiliyi ilə əldə edilən tarixi sülh razılaşması ilə nəticələnib.
Hikmət Hacıyev bildirib ki, Brüsseldə keçirilən görüşlərdən sonra tərəflər “mövcud fikir ayrılıqlarını kənara qoyaraq” sülhə doğru irəliləmək barədə qərar veriblər.
Armen Qriqoryan isə vurğulayıb ki, hər iki ölkənin rəhbərlikləri “regiona davamlı sülh və sabitlik gətirmək üçün institusional mexanizmlər hazırlamağa” çalışıblar.
Ermənistan rəsmisi bildirib ki, uzun illər davam edən münaqişə səbəbindən tərəflər arasında etimadın formalaşması çətin idi, lakin proses addım-addım irəliləyir:
“Bu, divara vurulan hər yeni etimad kərpici kimidir. Uğur böyükdür və biz bunu qeyd edirik”.
Azərbaycan rəsmisi də sülh prosesini “qlobal münaqişələr fonunda uğur hekayəsi” adlandırıb və qeyd edib ki, artıq tərəflər “real sülh şəraitində regionun iqtisadi genişlənməsi” üzərində işləyirlər.
Armen Qriqoryan əlavə edib ki, regional iqtisadi layihələrin həyata keçirilməsi qarşılıqlı asılılığı artıracaq və həm sülhü, həm də rifahı möhkəmləndirəcək:
“Biz məhz bu istiqamətdə irəliləyirik və bunun ən real sübutu Hacıyevlə Dohada eyni studiyada oturmağımızdır”.
Hər iki tərəf sülhün “geri dönməz” xarakter daşıdığını, bunun gələcək nəsillər üçün strateji hədəf olduğunu vurğulayıb. Razılaşmanın əsas elementlərindən biri “Vaşinqtonda əldə edilən böyük, tarixi razılaşma” kimi təqdim olunan “TRIPP – Trump Route for International Peace and Prosperity” layihəsidir.
Hikmət Hacıyev bildirib ki, bu layihə Avrasiyanın nəqliyyat xəritəsini tamamilə dəyişəcək. Qriqoryanın sözlərinə görə, Ermənistan və ABŞ hazırda layihənin texniki detallarını intensiv müzakirə edir.
Müsahibənin sonunda hər iki rəsmi vurğulayıb ki, müharibə artıq keçmişdə qalıb və region üçün əsas hədəf – Ermənistan ilə Azərbaycanın birgə, sülh dolu gələcəyidir. Tərəflər bildiriblər ki, qarşılıqlı etimadın möhkəmləndirilməsi və iqtisadi əməkdaşlıq Cənubi Qafqazda yeni dövrün başlanğıcını qoyur.
9-12-2025, 23:03
Azərbaycanda ZƏLZƏLƏ oldu
Quba stansiyasından 19 km şimalda, Quba rayonunda 3.3 bal gücündə zəlzələ qeydə alınıb.
Bu barədə Respublika Seysmoloji Xidmət Mərkəzi məlumat yayıb.
Yerli vaxtla 22:18-də baş verən zəlzələ yerin 9 km dərinliyində olub.
Zəlzələ hiss olunmayıb.
9-12-2025, 22:07
Prezidentin Slovakiyaya səfəri başa çatdı
Azərbaycan Respublikasının Prezidenti İlham Əliyevin Slovakiya Respublikasına rəsmi səfəri dekabrın 9-da başa çatıb.
Bratislava şəhərinin Milan Ştefanik adına Beynəlxalq Aeroportunda Prezident İlham Əliyevin şərəfinə fəxri qarovul dəstəsi düzülmüşdü.
Dövlətimizin başçısını Slovakiya Respublikası Prezidenti Aparatının rəhbəri Peter Vodraşka və digər rəsmi şəxslər yola saldılar.
9-12-2025, 21:48
Laçına qar yağır
Laçın rayonu Minkənd kəndinə qar yağıb.
Axşam saatlarında müşahidə olunan yağışlı hava sonradan qarla əvəzlənib.
Hazırda davam edən yağıntı kəndi ağ örpəyə bürüyüb. Qeyd edək ki, daha çox yağıntı yaylaq ərazilərə düşüb.
9-12-2025, 20:56
Bakı metrosunda daha bir yeni qatar
"Bakı Metropoliteni" QSC qatar parkını genişləndirməkdə davam edir.
QSC-dən bildirilib ki, sərnişin məmnuniyyəti və xidmət keyfiyyətini artırmaq məqsədilə daha bir yeni nəsil qatar istismara verilib.
Ən yeni texnologiyalar əsasında hazırlanmış müasir vaqonlar bu il istismar müddəti başa çatan əvvəlki nəsil qatarın əvəzinə xəttə buraxılıb.
Bununla hazırda xətlərdə olan yeni nəsil qatarların sayı 170 vaqona (34 qatar) çatdırılıb. Sazlama və komplektləşdirmə işləri aparılan daha 10 vaqon 2025-ci ilin sonunadək sərnişindaşımaya cəlb ediləcək.
Ümumilikdə ilin sonunda Bakı metropolitenində 180 yeni vaqon (36 qatar) istismarda olacaq. Dövlət Proqramına uyğun olaraq, 2030-cu ilədək daha 299 yeni nəsil vaqon alınması planlaşdırılır.
9-12-2025, 18:20
"QARABAĞ" azarkeşləri sevindirməyə çalışacaq - Qurban Qurbanov
Sabah keçiriləcək "Qarabağ" - "Ayaks" (Niderland) matçından əvvəl Azərbaycan təmsilçisinin baş məşqçisi Qurban Qurbanovun mətbuat konfransı keçirilib.
Təcrübəli mütəxəssis Bakıda Niderlandın "Ayaks" komandasına qarşı keçirəcəkləri UEFA Çempionlar Liqasının əsas mərhələsinin VI turunun oyunu ilə bağlı fikirlərini bölüşüb:
"Bizim üçün vacib qarşılaşmadır. Hazırlaşamaq üçün çox vaxtımız olmayıb. Meydanda diqqətli olmalıyıq. Rəqib də ilk qələbəsini qazanmaq istəyir. Matça ciddi hazırlaşıblar. Var gücləri ilə kökləniblər. İstəkli oynamaq istəyirik. Azarkeşləri sevindirməyə çalışacağıq".
Qeyd edək ki, "Qarabağ" - "Ayaks" matçı dekabrın 10-da, saat 21:45-də Tofiq Bəhramov adına Respublika stadionunda start götürəcək.
9-12-2025, 18:03
Yollarda görünüş məsafəsi məhdudlaşacaq
Sabah yağışlı və dumanlı hava şəraiti ilə əlaqədar olaraq avtomobil yollarında görünüş məsafəsi məhdudlaşacaq.
Bu barədə Milli Hidrometeorologiya Xidməti məlumat yayıb.
Bildirilib ki, dekabrın 10-da ölkə ərazisinin bəzi yerlərində yağıntılı və dumanlı hava şəraiti müşahidə olunacaq. Hava şəraiti ilə əlaqədar olaraq avtomobil magistral yollarında görünüş məsafəsinin 200-700 metrədək məhdudlaşacağı gözlənilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!