23-11-2024, 11:08
Bu il 31 mindən çox şəxsə pensiya təyin edilib
2024-cü ilin yanvar-oktyabr ayları ərzində 31 min nəfərdən çox şəxsə proaktiv qaydada yaşa, əlilliyə və ailə başçısını itirməyə görə pensiya təyinatı aparılıb.
Bu barədə Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondundan xəbər verilib.
Bildirilib ki, onların 68,53%-ni kişilər, 31,47%-ni isə qadınlar təşkil edib.
19-11-2024, 11:39
Əmək pensiyalarının orta məbləği bu qədər artacaq
Əmək pensiyalarının orta aylıq məbləği növbəti ildə 531 manat və ya cari illə müqayisədə 8% çox olacağı proqnozlaşdırılır.
Bunu Milli Məclisin Təbii ehtiyatlar, energetika və ekologiya, Əmək və sosial siyasət, Səhiyyə, Beynəlxalq münasibətlər və parlamentlərarası əlaqələr komitələrinin bu gün keçirilən birgə iclasında əmək və əhalinin sosial müdafiəsi naziri Sahil Babayev deyib.
Nazir qeyd edib ki, yaşa görə pensiyanın orta aylıq məbləği də 8 faiz artacaq:
“Bu ilin sonuna gözləntimiz odur ki, əmək pensiyalarının orta aylıq məbləği 494 manata, yaşa görə əmək pensiyasının orta aylıq məbləği isə 527 manat olacaq. Növbəti ildə 8 %-lik artımla pensiyaçılara daha əhatəli dəstək tədbirləri təqdim edilə biləcək”.
19-11-2024, 09:25
Sosial yardım nə qədər artırılacaq?
Gələn ildən etibarən ehtiyac meyarı 270 manatdan 285 manata çatdırılacaq. Yeni ehtiyac meyarının müəyyənləşdirilməsi ünvanlı sosial yardımın aylıq məbləğinin artırılması və müraciətin genişləndirilməsi baxımdan vacibdir. Bu kontekstdən ehtiyac meyarının artırılması ünvanlı sosial yardım proqramı çərçivəsində vətəndaşların aldığı yardım məbləğinin gələn ildən artmasına səbəb olacaq. Bəs artımlar nə qədər təşkil edəcək?
Milli Məclisin iqtisadçı deputatı Vüqar Bayramov sosial yardımın nə qədər artacağına aydınlıq gətirib. O bildirib ki, ehtiyac meyarı artırıldığı üçün daha çox ailə ünvanlı sosial yardıma müraciət edə biləcək:
“Ailənin 5 üzvü var və həmin ailənin rəsmi aylıq gəliri 900 manatdır. Bu il həmin ailə üçün 1350 manat (5 nəfər X 270 manat) ehtiyac meyari, yəni xərc hesablanır. Bu zaman ailənin xərci ilə gəliri arasındakı fərq 450 manat (1350 manat- 900 manat) olur. Həmin ailənin ünvanlı sosial yardıma müraciət hüququ olduğu halda, o proqram çərçivəsində ayda dövlətdən 450 manat yardım ala bilir. Amma bu rəqəm gələn ildən artacaq. Belə ki, həmin ailə üçün ehtiyac meyarı gələn ildən 1425 manata yüksəlir (5 nəfər X 285 manat) və nəticədə həmin ailənin gəliri dəyişmədiyi halda, aldığı aylıq yardım 450 manat deyil, 525 manat (1425 manat- 900 manat) olur”.
Bununla yanaşı deputat təklif də irəli sürüb:
“2025-ci ildən etibarən ehtiyac meyarının ləğv edilməsi və yalnız yaşayış minimumdan istifadə olunması daha məqsədəuyğun olardı. Bu zaman ünvanlı sosial yardım proqamında da yaşayış minimumu meyarından istifadə etmək daha uyğundur”.
16-11-2024, 16:37
Gələn il pensiyalar bu qədər artacaq - AÇIQLANDI
2025-ci ildə orta pensiya məbləği 516 manat olacaq. Bu, əvvəlki ilə müqayisədə 50 manat artım deməkdir.
Bu sözləri Milli Məclisin deputatı Vüqar Bayramov yutub kanalında yerləşdirdiyi videoda bildirib.
O qeyd edib ki, parlamentdə gələn həftə büdcə müzakirəsi olacaq:
"Orada da artımlarla bağlı, eləcə də bir sıra məsələlər öz əksini tapacaq. Bildiyiniz kimi, bu həftə təqdim olunan məlumata əsasən, 2025-ci ildə orta pensiya məbləği 516 manat olacaq. Bu, əvvəlki ilə müqayisədə 50 manat artım deməkdir. Artım minumum pensiya məbləği ilə yox, ölkə üzrə orta aylıq pensiya məbləğindəki artımı xarakterizə edir. Ona görə də artım birbaşa ölkə üzrə orta aylıq pensiya məbləğinə şamil olunacaq. Əmək və Əhalinin Sosial Müdafiəsi Nazirliyi tərəfindən gözlənti orta aylıq pensiya məbləğinin 516 manata yüksəlməsi ilə bağlıdır”.
Deputat bütün növ əmək pensiyalarında artımların olacağını açıqlayıb:
“Minumum pensiya və minumum maaşın artırılması ilə bağlı cənab Prezident tərəfindən göstəriş verilib. Həmin göstərişə uyğun olaraq, artımla bağlı məsələlər yekunlaşmaq üzrədir. Bizim təklifimiz ondan ibarətdir ki, 2023-2024-cü illərdəki artım faizi, inflyasiya nəzərə alınmaqla pensiya və minimum maaşda artımlar həyata keçirilsin. Biz fiskal imkanlar çərçivəsində daha çox artımların həyata keçməsini məqsədəuyğun hesab edirik. Bununla bağlı gələn həftə başlanılacaq büdcə müzakirələrində də öz təkliflərimizi təklif edəcəyik. Hər iki istiqamətdə, pensiya və əmək haqqı artımları növbəti ildən reallaşmalıdır. Bu proses praktik olaraq yekunlaşmaq üzrədir. Artıq dekabrın sonuna doğru büdcə təsdiq olunacaq. Cənab Prezident tərəfindən növbəti ilin əvvəlində gözlənilən sərəncam imzalanacaq. Bütün növ əmək pensiyalarında artım olacaq. Bu, indeksləşdirmə əsasında artımdır. İndeksləşdirmə inflyasiyaya əsasən yox, orta aylıq artım faizinə əsasən həyata keçirilir. 2024-cü ildə orta aylıq əmək haqqı nə qədər artırılıbsa, pensiya da o qədər artırılacaq. Burada bütün növ əmək pensiyalarından söhbət gedir”.
7-11-2024, 17:17
Bakı və Abşeronun pensiyaçılarına şad xəbər
Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu bu gün Bakı, Sumqayıt şəhərləri və Abşeron rayonu üzrə noyabr ayının pensiyaları ödəyib.
Bu barədə nazirlikdən məlumat verilib.
Qeyd olunub ki, digər bölgələr üzrə, eləcə də güzəştli şərtlərlə pensiya hüququna malik şəxslərin pensiyaları da bu ay qrafik üzrə ödəniləcək.
21-10-2024, 17:47
Pensiyaların ödəniləcəyi tarix açıqlandı
Azərbaycanın rayonlarında oktyabrın 20-28-i aralığında pensiyaların ödənilməsi nəzərdə tutulur.
Bu barədə Dövlət Sosial Müdafiə Fondundan bildirilib.
Qeyd olunub ki, müvafiq qrafikə əsasən, Bakı və Sumqayıt şəhərləri, Abşeron rayonu üzrə pensiya ödənişləri hər ayın 8-15-i, digər bölgələri üzrə, habelə güzəştli şərtlərlə pensiya təyin edilmiş şəxslərin pensiya ödənişləri isə ayın 20-28-i aralığında nəzərdə tutulub. Sosial ödənişlərin bank kartlarına köçürüləcəyi günlər barədə vətəndaşlara əvvəlcədən məlumat verilir.
19-10-2024, 17:45
Qızların təhsildən yayındırılmasının səbəbləri
Qızların təhsildən yayındırılması problemi təhsil sisteminin keyfiyyətinin yaxşılaşdırılması üçün diqqət tələb edən mühüm bir məsələdir.
Bunu təhsil məsələləri üzrə ekspert Kamran Əsədov bildirib.
O qeyd edib ki, qızların təhsildən kənarlaşdırılması onların yalnız gələcəkdə şəxsi həyatlarını məhdudlaşdırmır, həm də ümumilikdə cəmiyyətin inkişafına mənfi təsir göstərir: "Ana kimi onların rolu gələcək nəsillərin formalaşmasında mühüm əhəmiyyət kəsb edir. Bu səbəbdən qızların təhsil alması cəmiyyətin hər bir sahəsində inkişafın əsasını təşkil edir".
Qızların təhsildən yayındırılmasının əsas səbəblərindən biri kimi patriarxal ənənələrin hələ də mövcud olmasını göstərən ekspert vurğulayıb ki, bəzi ailələr qızların təhsil almasını lazımsız hesab edir, onlara ev işlərinə və ailə həyatına hazırlıqla kifayətlənməyi məsləhət görürlər: "Bu düşüncə tərzini dəyişmək üçün öncə valideynlərin maarifləndirilməsi vacibdir. Ailələrə qızlarının təhsili sayəsində onların gələcəkdə öz hüquqlarını daha yaxşı müdafiə edə biləcəyi, daha çox iş imkanlarına sahib olacağı və müstəqil bir həyat quracağı barədə məlumatlar verilməlidir. Burada dövlət və qeyri-hökumət təşkilatlarının birgə səyləri mühüm rol oynaya bilər".
Kamran Əsədovun sözlərinə görə, effektiv nəticə almaq üçün bu sahədə dövlətin dəstəyi və strategiyaları vacibdir:
“Təhsil Nazirliyi və digər əlaqədar qurumlar regionlarda qızların təhsildən yayındırılmasının qarşısını almaq üçün xüsusi proqramlar həyata keçirə bilər. Bu, ailələrə təhsil haqqında məlumat verən maarifləndirici kampaniyaların genişləndirilməsi, qızlar üçün təqaüd və digər təşviq mexanizmlərinin tətbiqi ilə mümkündür. Bundan əlavə, regionlarda məktəb infrastrukturu və təhsil keyfiyyətinin yüksəldilməsi, müəllimlərin bölgələrdə daha keyfiyyətli təhsil verməsi üçün təlimlərin artırılması da vacibdir”.
Ekspert dünya təcrübəsində də söz açaraq vurğulayıb ki, qızların təhsili ölkələrin iqtisadi və sosial inkişafında böyük əhəmiyyətə malikdir. "Banqladeşdə kənd yerlərində qızların təhsil səviyyəsini artırmaq üçün xüsusi təqaüd proqramları tətbiq edilib. Bu proqramlar qızlara təhsil almağa təşviq yaratmış, onların evlilik yaşı artırılmış və iqtisadi baxımdan daha çox imkanlar əldə etmələrinə şərait yaratmışdır. Keniyada da oxşar proqramlar həyata keçirilmiş və qızların təhsil alması həm ailələr, həm də cəmiyyət tərəfindən dəstəklənmişdi.
Azərbaycanda belə təşəbbüslərin reallaşdırılması qızların təhsil səviyyəsinin yüksəlməsinə böyük təsir göstərə bilər. Qızların təhsilinə sərmayə qoymaq, uzun müddətli iqtisadi və sosial faydalar gətirən bir addımdır. Ölkənin özəl sektorlarla əməkdaşlıq edərək bu sahədə müxtəlif layihələr həyata keçirməsi həm təhsilin inkişafına, həm də regionların iqtisadiyyatına müsbət təsir göstərə bilər. Qızların təhsildən kənarlaşdırılmasının qarşısını almaq üçün isə valideynlərə və cəmiyyətə müsbət nümunələr göstərilməli, təhsilli qızların uğurları ön plana çəkilməlidir”- deyə o, sonda qeyd edib.
8-10-2024, 17:06
Azərbaycanda ailələr ən çox bu səbəblərdən dağılır
Cəmiyyətin əsas özəyi olan ailə, xüsusən də uşaqlar dövlət tərəfindən müdafiə edilir və dəstəklənir. Azərbaycan Respublikasının Konstitusiyasında cəmiyyətin əsas özəyi kimi ailənin dövlətin xüsusi himayəsində olması, ər ilə arvadın hüquqlarının bərabərliyi, uşaqların qayğısına qalmaq və onları tərbiyə etməyin valideynlərin borcu olması təsbit edilib.
Lakin son illərdə ölkəmizdə boşanan insanların sayında kəskin artım müşahidə olunur. Belə ki, 2020-ci ildə 14628 boşanma qeydə alınmışdırsa, bu rəqəm 2023-cü ildə 21688-ə qədər yüksəlib. Bu, müstəqillik tarixinin ən yüksək göstəricisidir. Boşanmaların sayının artması ilə yanaşı qurulan ailələrin sayı da azalır.
Ailə, Qadın və Uşaq Problemləri üzrə Dövlət Komitəsinin Ailə məsələləri şöbəsinin baş məsləhətçisi Rafiq Mahmudov boşanmaların səbəbi haqqında danışıb.
O qeyd edib ki, boşanmaların əsas səbəbləri arasında ailədaxili zorakılığı, kənar şəxslərin ailə daxili münasibətlərə müdaxiləsi, sosial şəbəkələrinin mənfi təsiri və ailədə yaşanan psixo-sosial gərginliyi qeyd edə bilərik.
“Boşanma prosesləri əsasən iki formaya bölmək olar. Azərbaycan Respublikasının Ailə Məcəlləsinə əsasən, ər-arvadın yetkinlik yaşına çatmayan ümumi uşaqları olmadıqda nikaha onların razılığı əsasında Ədliyyə Nazirliyinin Qeydiyyat Şöbələri tərəfindən xitam verilən ilkin forma. Bunun üçün hər iki tərəf ərizə ilə nikah bağlanan qeydiyyat şöbəsinə və ya onların birinin qeydiyyatda olduğu ünvan üzrə qeydiyyat şöbəsinə müraciət edə bilərlər.
Boşanmanın digər forması isə məhkəmə qaydasında baxılan prosesdir. Məhkəmə qaydasında boşanmalar uşaq olduğu və ya tərəflərdən biri nikahın pozulmasına razı olmadığı halda baxılır.
Boşanma prosesi həm ər, həm də arvad tərəfindən məhkəməyə boşanma ərizəsi verildikdə başlayır. Onu da əlavə etmək lazımdır ki, nikahın pozulmasını istəyən şəxslər məhkəməyə boşanma ərizəsi verməzdən öncə mediasiya təşkilatına müraciət etməlidirlər”.
Rafiq Mahmudov nikahın pozulmasını tələb etmək hüququnun məhdudlaşdıran və boşanma prosesinin ləngiməsi haqqında bəzi məqamlara da toxunub.
“Azərbaycan Respublikası Ailə Məcəlləsində nikahın pozulmasına dair məhdudlaşdırmalar mövcuddur. Belə ki, Ailə Məcəlləsinin 15-ci maddədə qeyd olunub ki, “Arvadın hamiləliyi dövründə və ya uşağın doğulmasından sonra 1 il müddətində arvadın razılığı olmadan ər nikaha xitam verilməsi barədə iddia qaldıra bilməz.
Ailə Məcəlləsinin 20-ci maddəsində ər (arvadın) razılığı olmadıqda nikahın məhkəmə qaydasında pozulması qaydaları müəyyən olunmuşdur. Belə ki, ər-arvadın birgə yaşamasının və ailənin saxlanmasının qeyri-mümkünlüyü məhkəmə tərəfindən müəyyən edildikdə, nikah məhkəmə qaydasında pozulur. Tərəflərdən birinin nikahın pozulması haqqında razılığı olmadıqda, məhkəmə ər-arvadın barışması üçün 3 ay müddət müəyyən etməklə işi təxirə sala bilər. Barışıq olmadıqda və ya onlar (onlardan biri) nikahın pozulmasında təkid etdikdə nikah pozulur”.
7-10-2024, 15:48
“T-Finans LTD” MMC-nin təsisçisi Minayə Şəfi qızı övladlığa uşaq götürəcək
Hər bir övladın arxasında isti ana nəfəsi dayanır
Dünyaya göz açan hər bir uşaq ata, ana himayəsində böyüyür, boya-başa çatır.
Uşaqlar cəmiyyətə yararlı bir vətəndaş kimi yetişmək hüququna malikdir. Lakin, çox zaman uşaqlarımızın digər qismi bu hüquqlardan yararlana bilmirlər. Təəssüflər olsun ki, valideyn himayəsindən müxtəlif formada məhrum olan uşaqlarımız da var. Bu gün onlar uşaq evlərində, uşaq sığınacaqlarında böyüməyə məcburdurlar. Dövlət Uşaq Evlərində böyüyən uşaqların gələcək inkişaflarında öz qayğısını əsirgəməsə də, belə uşaqların valideyn himayəsində yaşaması daha yaxşı olardı. Ona görə də hər hansı övladı olmayan valideynlərin uşaq götürmək arzusu olarsa, özlərini gələcəkdə valideyn olmağı tam hiss etməlidirlər. Hər kəs asanlıqla övladlığa uşaq götürə bilərmi? - Əsla yox. Bunun üçün qanunvericiliyin tələbləri yerinə yetirilməlidi. Bu proses Ailə Məcəlləsinin 118-ci maddəsi ilə tənzimlənir.
Bəzən olur ki, ana övladı dünyaya gətirməsinə baxmayaraq, övladına qarşı analıq hissi olmur. Dünyaya övlad gətirməklə valideyn olmursan. İnsanda uşağa qarşı hiss, xoş münasibət, qayğı, səxavət gərəkdi. Bu da insanın qanından, canından süzülüb gələn bir ali hissdir. Bu gün dövlətə dəstək olaraq uşaqlar evinə, uşaq sığınacaqların maddi və mənəvi dəstək olan xeyli sayda işgüzar insanlar, xanımlar var ki, bir tikə çörəklərin belə valideyn himayəsindən məhrum olan uşaqlarla bölür, yardım edir.
Bu baxımdan tanınmış iş adamı, xeyirxah xanım “T-Finans LTD” MMC-nin təsisçisi Həmidova Minayə Şəfi qızı yardım etdiyi uşaq evlərindəki uşaqları öz övladı kimi sevir, onlara yardım edir. Ona görə də Minayə xanım uşaqları çox sevir. Xatırladım ki, Minayə xanımın qızı İlahə xanım ailənin tək övladıdır. Ona görə də “T-Finans LTD” MMC-nin təsisçisi, İlhamə xanımın anası Həmidova Minayə Şəfi qızının bir övladı olduğuna görə, eyni zamanda İlahə xanımın övladı olmadığı üçün Ailə məcəlləsinin 118-ci maddəsinə əsaslanaraq aidiyyatı qurumlara müraciət etməklə uşaq evlərindən varis kimi uşaq götürmək arzusundadırlar. Qeyd etdiyim məsələ ilə bağlı yaxın zamanda şirkətin vəkilləri - Nail Abdullayev və Başar Yaltı tərəfindən dövlət qurumlarına müraciət olunacaq.
Məsələ ilə bağlı “T-Finans LTD” MMC şirkətinin mətbuat xidmətinin rəhbəri Məmmədova Sona Əhmədqızı da ailənin övladlığa uşaq götürmək arzusunun dəqiqliyini təsdiqlədi. Xatırladım ki, sözügedən şirkət Azərbaycan şirkəti olmaqla yanaşı eyni zamanda Türkiyə Respublikasında fəaliyyət göstərən bir holdinqdir.
26-09-2024, 15:15
Prezident bir daha bəyan etdi: "Əməkhaqqı və pensiya artırılacaq"
Bizim əsas hədəfimiz iqtisadiyyatımızı bundan sonra daha da şaxələndirmək və dayanıqlı inkişaf modelini təkmilləşdirməkdir.
Bu sözləri Prezident İlham Əliyev iqtisadi məsələlərə həsr olunmuş müşavirədə çıxışında deyib.
Dövlət başçısı qeyd edib ki, inflyasiya ilin əvvəlindən cəmi 1 faizdən bir qədər çox olub:
"Bu da çox müsbət göstəricidir. Mən artıq bəyan etdim ki, gələn il minimum əməkhaqqı və minimum pensiya artırılacaq, baxmayaraq ki, inflyasiya çox aşağı səviyyədədir, baxmayaraq ki, ölkə qarşısında duran vəzifələr böyük maliyyə vəsaiti tələb edir, ilk növbədə, hərbi, hərbi sənaye kompleksinin inkişafı, Qarabağın və Şərqi Zəngəzurun bərpası ilə bağlı. Bütün bunlara baxmayaraq, biz həssas təbəqə sayılan vətəndaşlarımızın da rifah halının yaxşılaşdırılması üçün əlimizdən gələni edirik. Bu yaxınlarda Azərbaycan Milli Məclisində etdiyim çıxışda bütün o rəqəmlər diqqətə çatdırılmışdır. Təkrar etmək istəmirəm, son beş il ərzində Azərbaycanda nə qədər böyük sosial islahatlar paketi reallaşdırıldı".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!