26-11-2025, 17:52
TDT-nin QHT Platforması hansı işləri görəcək? - Baş katibdən açıqlama
Türk Dövlətləri Təşkilatına (TDT) üzv ölkələrin QHT Platformasının təsis konfransında Azərbaycan Milli QHT Forumu İdarə Heyətinin üzvü, Milli Məclisin deputatı Azər Allahverənov platformanın Baş katibi seçilib.
Deputat Azər Allahverənov bildirib ki, TDT-yə üzv ölkələrin qeyri-hökumət təşkilatları arasında belə bir institusional yeniliyin baş verməsi günün tələbidir:
“Bu yeni strukturdur. Və ümumiyyətlə Türk dünyası üçün çox önəmli bir qərar verildi. Çünki sözün əsl mənasında Türk Dövlətləri Təşkilatına üzv ölkələrin QHT-ləri arasında belə bir institusional yeniliyin baş verməsi günün tələbidir. Biz TDT-nin müxtəlif formatlarına nəzər saldıqda təqribən 34 platforma üzərindən əməkdaşlığın geniş vüsət aldığını görə bilərik. TDT-nin institusional inkişafını, həm də onun siyasi, o cümlədən strateji əhəmiyyətini artıracaq fəaliyyətələr həmin platformalar üzərindən sərgilənməkdədir. Yalnız QHT-lər səviyyəsində əlaqələr bir qədər zəif idi. Amma ikitərəfli, üçtərəfli münasibətlər kifayət qədər çox idi. Azərbaycan-Özbəkistan, Azərbaycan-Türkiyə, Azərbaycan-Qazaxıstan QHT-ləri arasında çoxsaylı əməkdaşlıqlar var. Əməkdaşlıq forumları keçirilib. Hətta Özbəkistanla bizim iki əməkdaşlıq forumumuz baş tutub. Yaxın vaxtlarda Azərbaycan-Qazaxıstan, Azərbaycan-Türkiyə forumlarının keçirilməsi də nəzərdə tutulur”.
A.Allahverənov vurğulayıb ki, QHT-ləri özündə birləşdirəcək bir platormanın yaradılması və onun katibliyinin Bakıda yerləşməsi tarixi hadisədir:
“Qərarın Naxçıvanda elan edilməsi isə onun əhəmiyyətini ikiqat artırır. Çünki 2009-cu ildə məhz Naxçıvanda TDT-nin yaradılması barədə qərar qəbul edilmişdi. Nəticə etibarilə, bu, QHT-lər üzərindən bir başlanğıcdır. Və hələ strukturlar, əlaqələndirmə işləri, digər məsələlər üzərində işlər aparılır. Burada qərar qəbul edilib ki, katiblik Bakıda yerləşsin. Platformanın fəaliyyətinin qurulması və geniş səpkidə təşkil olunması məsələləri bundan sonra atılacaq addımlarla şərtlənəcək. Burada bütün türk dövlətlərini əhatə edəcək fəaliyyətlərin məhz vətəndaş cəmiyyətləri üzərindən inkişaf etdirilməsi, onların konseptual şəkildə təkmil qurulması, əlaqələr üzərindən təcrübə mübadilələrinin həyata keçirilməsi, təlimlərin, kifayət qədər geniş spektrdə fəaliyyətlərin koordinasiya olunması təşkil olunacaq. TDT-nin qəbul etdiyi qərarlarda ictimai diplomatiya ilə bağlı olan vacib komponentlər var ki, həmin komponentlərin icra olunması bilavasitə platforma üzrə həyata keçiriləcək. Nəticə etibarilə platformanın fəaliyyət planı TDT-nin qəbul etdiyi qərarlar əsasında müəyyən ediləcək. Katibliyin hər bir ölkə üzrə müəyyən edilən əlaqəli şəxsləri var. Həmin əlaqəli şəxslər üzərindən də katiblik öz fəaliyyətini təşkil edəcək. 1 ay ərzində bizə buna dair məlumat veriləcək. Bundan sonrakı mərhələdə fəaliyyət planının tərtib olunması və digər işlərlə bağlı zəruri addımlar atılacaq. Bir məsləni də deyim ki, Türk Dövlətləri Təşkilatında hazırda sədrlik Azərbaycana məxsusdur. Bu səbəbdən Baş katib məhz Azərbaycandan seçilib. Gələcəkdə Türk Dövlətləri Təşkilatına sədrlik rotasiya əsasında dəyişdikdə, eyni qaydada QHT platformasının Baş katibi də dəyişdiriləcək. Amma önəmli olan odur ki, Türk Dövlətləri Təşkiltına üzv dövlətlərin Qeyri-Hökumət Təşkilatlarının platformasının katibliyi Bakıda yerləşəcək. Düşünürəm ki, bu bizim QHT-lərimizin inkişafına böyük təsir edəcək prosesdir. Arzu edirik ki, dövlətimiz, Türk dünyası üçün xeyirli-uğurlu iş olsun”.
Qeyd edək ki, noyabrın 24-də Bakıda Türk Dövlətləri Təşkilatına (TDT) üzv ölkələrin qeyri-hökumət təşkilatlarının həmrəylik forumunun açılışı olub. Tədbir 26 noyabrda Naxçıvanda başa çatıb. Tədbirdə Azərbaycan, Türkiyə, Özbəkistan, Qazaxıstan, Qırğızıstan, Türkmənistan, Şimali Kipr Türk Respublikası və Macarıstandan olan QHT nümayəndələri iştirak ediblər.
25-11-2025, 22:53
Ceyhun Cəlilov özünə köməkçi təyin edib?
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi yanında köməkçi təyinatı ilə bağlı mətbuatda yayılan xəbər həqiqəti əks etdirmir.
Səlahiyyətli nümayəndəlik strukturunda "köməkçi" ştat vahidi mövcud deyil.
Qeyd edək ki, sabiq səlahiyyətli nümayəndənin köməkçisi qismində adı çəkilən Ramiz Məmmədov isə Naxçıvan Muxtar Respublikasının Ali Məclisinin deputatıdır və hazırda fəaliyyətini davam etdirir.
***
14:38
Naxçıvan Muxtar Respublikasında Azərbaycan Prezidentinin səlahiyyətli nümayəndəsi Ceyhun Cəlilov özünə yeni köməkçi təyin edib.
Ceyhun Cəlilov Ali Məclisin deputatı və səlahiyyətli nümayəndənin köməkçisi Ramiz Məmmədovu işdən çıxararaq bu vəzifəyə Səlahəddin Cəlilovu gətirib.
Qeyd edək ki, Ramiz Məmmədov Naxçıvan MR Ali Məclisinin sabiq sədri Vasif Talıbov və Fuad Nəcəflinin köməkçisi olub.
25-11-2025, 22:14
Tramp arıqlamaq istəyir
ABŞ Prezidenti Donald Tramp arıqlamaq istədiyini açıqlayıb.
Tramp jurnalistlərlə söhbətində zarafatla bildirib ki, yaxın vaxtlarda çəki azaltmağı planlaşdırır, lakin bu, Şükranlıq Günündən əvvəl baş verməyəcək:
“Bir neçə kilo arıqlamaq istərdim. Amma Şükranlıq Günündə yox. Çünki hinduşka yeyəcəyəm”, – deyə ABŞ prezidenti bildirib.
Rəsmi tibbi müayinələrin nəticələrinə görə, Trampın çəkisi 107 kiloqram, boyu isə 190 santimetrdir. ABŞ lideri heç vaxt fastfud sevər olduğunu gizlətməyib, o, xüsusilə burger, kartof fri və qazlı içkilərə üstünlük verir.
ABŞ-da Şükranlıq Günü 27 noyabr tarixində qeyd olunacaq.
25-11-2025, 22:06
Bütün Türkiyənin danışdığı ailə faciəsində YENİ DETALLAR
İstanbulda Böcek ailəsinin müəmmalı ölümü ilə bağlı ilkin tibbi rəy prokurorluğa təqdim edib.
Rəydə ailənin qaldığı otel otağından götürülən nümunələrdə fosfin qazı aşkarlandığı, lakin ailənin yediyi qidalarda heç bir zəhərin tapılmadığı vurğulanır.
Mütəxəssislər fosfinin (taxıl və zərərverici dərmanlamasında istifadə olunan, yüksək dərəcədə zəhərli qaz) ailənin ölümündə əsas şübhə kimi önə çıxdığını bildiriblər. Ailənin dəqiq ölüm yekun rəy ilə müəyyənləşəcək.
Xatırladaq ki, Almaniyadan İstanbula istirahət üçün gələn 4 nəfərlik Böcek ailəsi noyabrın 12-də səhhətlərində yaranan problemlərə görə xəstəxanaya getmiş, həmin gün otelə qayıtmışdılar. Gecə saatlarında vəziyyətləri yenidən ağırlaşmış və xəstəxanaya çatdırılsalar da, uşaqlar həmin gün, ana növbəti gün, ata isə bir neçə gün sonra həyatını itirmişdi.
Həmin oteldə eyni otaqda qalan iki turistdə də oxşar simptomlar müşahidə edildiyi üçün onlar da xəstəxanaya yerləşdirilmişdi. Polis araşdırmasından sonra otel müvəqqəti olaraq bağlanmışdı.
İstanbul Baş Prokurorluğunun apardığı istintaq çərçivəsində 11 nəfər saxlanılıb. Onlardan 8-i — dərmanlama şirkətinin rəhbəri və əməkdaşları, otel işçiləri, eləcə də yaxınlıqdakı qida satıcıları — məhkəmənin qərarı ilə tutulub. Otelin sahibinə isə “ölkədən çıxış qadağası” və “ev dustaqlığı” tədbirləri tətbiq edilib.
25-11-2025, 21:54
Terroru maliyyələşdirməkdə ittiham olunan şəxslərə ağır cəza verildi
Terroru maliyyələşdirməkdə təqsirləndirilən Xəqani Ömərov, Anar Salamzadə və Elçin Əzizovun barəsində Dövlət Təhlükəsizliyi Xidmətində (DTX) başlanılmış cinayət işi üzrə məhkəmə araşdırması yekunlaşıb.
Bakı Ağır Cinayətlər Məhkəməsində hakim Nigar İmanovanın sədrliyi ilə keçirilən prosesdə müdafiə çıxışlarından sonra təqsirləndirilənlərə son söz verilib.
Müşavirədən sonra hökm elan edilərək Xəqani Ömərov 10 il 6 ay, Anar Salamzadə 11 İl, Elçin Əzizov isə 10 il müddətinə azadlıqdan məhrum ediliblər.
Qeyd edək ki, adıçəkilən şəxslər DTX-nin keçirdiyi əməliyyat nəticəsində saxlanılıblar. İstintaq orqanı müəyyən edib ki, təqsirləndirilən şəxslər terrorçuluğa dəstək məqsədilə xarici ölkədə fəaliyyət göstərən müəyyən şəxslərə maliyyə vəsaitləri köçürüblər. Təqsirləndirilən şəxslərə qarşı Cinayət Məcəlləsinin 214-1-ci (terrorçuluğun maliyyələşdirilməsi) maddəsi ilə ittiham irəli sürülüb.
25-11-2025, 21:38
AFFA Hakimlər Komitəsində yeni sədr
Bu gün AFFA İcraiyyə Komitəsinin növbəti iclası keçirilib.
İclasda bir sıra qərarlar qəbul olunub.
Onlardan biri də Hakimlər Komitəsi ilə bağlı olub.
Belə ki, Hakimlər Komitəsinin sədri Frank De Bleker Beynəlxalq Hakimlik və hakimlərin təlim-tədrisi üzrə baş katibin müşaviri vəzifəsini icra edəcək.
İclasda Hakimlər Komitəsinin sədri vəzifəsinə Rəhim Həsənovun namizədliyi irəli sürülüb və İcraiyyə Komitəsinin üzvlərinin yekdil qərarı ilə təsdiqlənib.
25-11-2025, 21:17
Azər Allahverənov yeni vəzifəyə seçildi
Azər Allahverənov Türk Dövlətlərinə üzv ölkələrin QHT Platformasının Baş katibi olub.
Türk Dövlətləri Təşkilatına üzv ölkələrin QHT Platformasının təsis konfransında Azərbaycan Milli QHT Forumunun İdarə Heyətinin üzvü, Milli Məclisin deputatı Azər Allahverənovun Platformanın Baş katibi olması barədə qərar qəbul olunub.
25-11-2025, 21:12
Oğuzda ağır qəza - ölən var
Axşam saatlarında Oğuz rayonunun Böyük Söyüdlü kəndi ərazisində yol-nəqliyyat hadisəsi qeydə alınıb.
“BMW” markalı avtomobil idarəetmədən çıxaraq aşıb. Nəticədə 1 nəfər ölüb, 2 nəfər xəsarət alıb.
Qəza yerini polis əməkdaşları nəzarətə götürüb, hüquq-mühafizə orqanlarının nümayəndələri təhqiqat aparır.
Faktla bağlı cinayət işi başlanılıb, araşdırmalar aparılır.
25-11-2025, 20:41
Sülh danışıqlarında ciddi irəliləyiş var
“Ukrayna münaqişəsinin həlli üçün qalan məsələlərlə bağlı Moskva, Kiyev və Vaşinqton arasında danışıqlara ehtiyac var”.
Bu barədə Ağ Evin mətbuat katibi Kerolayn Livitt sosial şəbəkə hesabında yazıb.
O bildirib ki, son bir həftə ərzində ABŞ həm Ukraynanı, həm də Rusiyanı danışıqlar masasına gətirərək sülh istiqamətində ciddi irəliləyiş əldə edib:
“Bir neçə incə məsələ qalır. Onların həlli üçün Rusiya, Ukrayna və ABŞ arasında əlavə müzakirələr lazım olacaq”.
Qeyd edək ki, ABŞ daha əvvəl Ukrayna münaqişəsinin həlli üçün yeni plan üzərində çalışdığını açıqlamışdı.
Cenevrədə ABŞ və Ukrayna nümayəndə heyətləri bu planla bağlı məsləhətləşmələr aparıblar.
ABŞ dövlət katibi Marko Rubio həmin görüşü münaqişə tarixində “ən məhsuldar” görüş adlandırıb.
25-11-2025, 20:08
Ceyhun Bayramov Vatikanda
Bu gün xarici işlər naziri Ceyhun Bayramov Vatikana rəsmi səfəri çərçivəsində Müqəddəs Taxt-Tacın dövlət və beynəlxalq təşkilatlar üzrə katibi arxiyepiskop Riçard Qallager ilə görüşüb.
Bu barədə Xarici İşlər Nazirliyindən bildirilib.
Qeyd edilib ki, görüşdə Azərbaycan Respublikası ilə Müqəddəs Taxt arasında ikitərəfli münasibətlərin mövcud vəziyyəti və inkişaf perspektivləri, regional və beynəlxalq məsələlər, habelə beynəlxalq platformalar çərçivəsində əməkdaşlıq imkanları müzakirə olunub.
Azərbaycan və Müqəddəs Taxt-Tac arasında əməkdaşlıq əlaqələrinin daha da dərinləşdirilməsi naminə son zamanlar yüksək səviyyəli səfərlərin artan dinamikasının qorunub saxlanılmasının vacibliyi diqqətə çatdırılıb. Bu çərçivədə, Azərbaycan Respublikasının Prezidentinin Vatikana rəsmi səfərləri, Azərbaycan Respublikasının Birinci vitse-prezidenti Mehriban Əliyevanın cari ilin oktyabr ayında Müqəddəs Taxt-Taca baş tutmuş səfəri və səfər çərçivəsində həyata keçirilmiş görüşlərin və tədbirlərin əhəmiyyəti vurğulanıb.
Mehriban xanım Əliyevanın təşəbbüsü və Heydər Əliyev Fondunun dəstəyi ilə Müqəddəs Taxt-Tacda indiyədək həyata keçirilmiş və gələcəkdə icrası planlaşdırılan humanitar xarakterli mühafizə və bərpa layihələri məmnunluqla xatırlanıb. Mehriban xanım Əliyevanın Vatikana səfəri zamanı Avropanın ən böyük pediatrik xəstəxanası və tədqiqat mərkəzi olan "Bambino Gesu"nu ziyarəti və ölkəmizlə bu sahədə əməkdaşlıq əlaqələrinin əhəmiyyəti qeyd olunub.
Bununla yanaşı, Papa II İoann Pavelin 2002-ci ildə, Papa Fransisin 2016-cı ildə ölkəmizə səfərləri, Bakıda II İoann Pavelin şərəfinə tikiləcək katolik kilsəsinin yerləşəcəyi ərazinin təqdisetmə mərasimi və hal-hazırda kilsənin tikilməsi məmnunluqla xatırlanıb.
2027-ci ildə qeyd ediləcək diplomatik münasibətlərin təsis edilməsinin 35 illiyinin münasibətlərin inkişafına əlavə təkan verəcəyinə əminlik ifadə olunub.
Azərbaycanın dini tolerantlıq, mədəniyyətlərarası və etiqadlararası dialoq sahəsindəki uğurları, ölkəmizdə xristian məbədləri də daxil olmaqla, dini abidələrin bərpası və qorunması üzrə görülən işlər haqqında danışılıb.
Azərbaycanın müxtəlif din və mədəniyyətlərin bir arada yaşadığı ölkə kimi apardığı uğurlu siyasətin beynəlxalq sülhə və anlaşmaya töhfəsi qeyd edilib.
Bununla yanaşı, qlobal iqlim dəyişmələrindən narahatlıq ifadə olunub, ölkəmizin COP29 sədri olaraq gördüyü işlər və təşəbbüsləri barədə qarşı tərəfə məlumat verilib. Bununla yanaşı, ölkəmizin enerji təhlükəsizliyinə töhfəsi, nəqliyyat dəhlizlərinin inkişafında rolu, Orta Asiya ölkələri ilə əlaqələr barədə fikir mübadiləsi aparılıb.
Nazir Ceyhun Bayramov görüş zamanı qarşı tərəfə Azərbaycan-Ermənistan normallaşma prosesi, tarixi Vaşinqton Zirvəsi zamanı əldə edilmiş razılaşmalar və onların icrası istiqamətində həyata keçirilən əməli tədbirlər, münaqişədən sonra regionumuzdakı inkişaflar barədə ətraflı məlumat verib.
Görüşdə həmçinin qarşılıqlı maraq doğuran digər ikitərəfli və regional məsələlər ətrafında fikir mübadiləsi aparılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!