15-09-2025, 18:53
Ərdoğan Azərbaycanı təbrik etdi
Türkiyə Prezidenti Rəcəb Tayyib Ərdoğan Azərbaycanı təbrik edib.
Bu barədə Türkiyə Prezidenti Rəcəb Tayyib Ərdoğan "X" paylaşımında bildirib.
O bildirib ki, Azərbaycanın paytaxtı Bakının düşmən işğalından azad olunmasının ildönümünü ürəkdən təbrik edir:
"Qafqaz İslam Ordusunun komandanı Nuri Killigil Paşanın və bütün qəhrəmanlarımızın xatirəsini ehtiramla yad edir, qardaş Azərbaycan xalqına salam və sevgilərimi çatdırıram".
15-09-2025, 18:14
Şuşada külli miqdarda silah-sursat aşkarlanıb - BİRGƏ MƏLUMAT
Şuşa rayonunun Kiçik Qaladərəsi kəndi ərazisində külli miqdarda silah-sursat aşkar edilib.
Bu barədə Dövlət Təhlükəsizliyi Xidmətinin, Daxili İşlər Nazirliyinin və Azərbaycan Minatəmizləmə Agentliyinin yaydığı birgə məlumatda bildirilib.
Məlumata görə, Dövlət Təhlükəsizliyi Xidməti tərəfindən Daxili İşlər Nazirliyi və Minatəmizləmə Agentliyi ilə birgə Azərbaycan Respublikasının Qarabağ ərazisində qanunsuz odlu silah və partlayıcı maddələrin saxlanıldığı gizli saxlanc yerlərinin axtarışı ilə bağlı görülmüş tədbirlər nəticəsində Şuşa rayonunun Kiçik Qaladərəsi kəndi ərazisində xeyli sayda silah-sursat aşkar edilərək götürülüb.
Göstərilən istiqamətdə əməliyyat-axtarış tədbirləri davam etdirilir.
15-09-2025, 17:46
Bakıda və rayonlarda leysan yağacaq - XƏBƏRDARLIQ
Bakıda və Abşeron yarımadasında sentyabrın 16-dan 17-nə keçən gecədən başlayaraq 17-si axşamadək arabir yağış yağacağı gözlənilir.
Bu barədə Milli Hidrometeorologiya Xidməti məlumat yayıb.
Yarımadanın bəzi yerlərində yağışın leysan xarakterli olacağı , şimşək çaxacağı ehtimalı var.
Azərbaycanın rayonlarında isə sentyabrın 16-sı axşamdan 21-dək fasilələrlə yağış yağacağı, şimşək çaxacağı, ayrı-ayrı yerlərdə yağıntıların leysan xarakterli intensiv və güclü olacağı, dolu düşəcəyi, yüksək dağlıq ərazilərdə yağışın sulu qara keçəcəyi gözlənilir.
15-09-2025, 17:38
Prezident Şuşada Selçuk Bayraktaroğlunu qəbul etdi - FOTO
Azərbaycan Respublikasının Prezidenti İlham Əliyev sentyabrın 15-də Şuşada Türkiyə Respublikası Silahlı Qüvvələrinin Baş Qərargah rəisi Selçuk Bayraktaroğlunu qəbul edib.
Qəbula görə minnətdarlığını bildirən Selçuk Bayraktaroğlu Türkiyə Respublikasının Prezidenti Rəcəb Tayyib Ərdoğanın salamlarını dövlətimizin başçısına çatdırıb.
Prezident İlham Əliyev salamlara görə minnətdarlığını bildirib, onun da salamlarını Türkiyə Prezidentinə çatdırmağı xahiş edib.
Görüşdə ölkələrimiz arasında qardaşlıq və strateji müttəfiqlik münasibətlərinin bütün istiqamətlərdə, o cümlədən hərbi sahədə uğurla inkişaf etdiyi vurğulanıb.
Azərbaycan və Türkiyə qədər bir-birinə yaxın ölkələrin olmadığını deyən dövlətimizin başçısı qeyd edib ki, birliyimiz dünya miqyasında önəmli amildir. Prezident İlham Əliyev bölgədə artıq sülh dövrünün başladığı vurğulayıb.
Söhbət zamanı Azərbaycanla Türkiyə arasında müttəfiqlik münasibətləri haqqında Bəyannamənin 2021-ci ildə məhz Şuşa şəhərində imzalanmasının önəminə toxunulub.
Bugünkü görüşün 15 sentyabr - Qafqaz İslam Ordusu tərəfindən Bakının daşnak-bolşevik işğalından azad olunmasının 107-ci ildönümünə təsadüf etməsi məmnunluqla vurğulanıb.
Söhbət zamanı Azərbaycanın və Türkiyənin hərbi qurumları arasında qardaşlığa, strateji müttəfiqliyə əsaslanan əməkdaşlığın daha da inkişaf etdirilməsi ilə bağlı fikir mübadiləsi aparılıb.
15-09-2025, 17:31
Kəlbəcərə köçən 32 ailəyə mənzillərin açarları təqdim edildi - FOTO
İşğaldan azad olunmuş torpaqlara keçmiş məcburi köçkünlərin qayıdışı davam edir. Bu gün köç karvanı ilə yenidən qurulan Kəlbəcər şəhərinə çatan ailələrə mənzillərin açarları təqdim olunub.
Bu mərhələdə Kəlbəcər şəhərinə 32 ailə - 139 nəfər köçürülüb. Kəlbəcərə köç karvanı ilə qayıdanlar respublikanın müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələrdən ibarət olub.
Ailələrə evlərinin açarlarının təqdimatı mərasimində Azərbaycan Respublikası Prezidentinin Kəlbəcər rayonunda xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin rəsmiləri iştirak ediblər.
Kəlbəcər şəhərində daimi yaşayış üçün köçürülən ailələrə yeni tikilmiş binalarda mənzillər verilib.
15-09-2025, 17:22
Məktəb direktoru seçimində nələr dəyişir? - AÇIQLAMA
Direktorların seçimində müəllimlərin sertifikasiya imtahanında topladığı bal əsas götürüləcək. Bu barədə ötən həftə elm və təhsil naziri Emin Əmrullayevin media nümayəndələri ilə keçirdiyi brifinqdə məlumat verib.
“Vakant direktor vəzifələri təhsil müəssisələrinin şagird sayına uyğun olaraq 500-dək və 500-dən çox olmaqla iki kateqoriyada qruplaşdırılacaq. Şagird sayı 500-dək olan müəssisələrdə əvvəlcə həmin məktəbdə çalışan direktor müavinləri və müəllimlər dəyərləndiriləcək”, - deyə nazir bildirib.
Qeyd edək ki, bəzi ekspertlər direktor seçimində sertifikasiya balının əsas götürülməsinin müsbət nəticə verməyəcəyini düşünür, digərləri isə bu qaydanın məktəb idarəçiliyini təkmilləşdirəcəyini deyir.
Mövzu ilə bağlı Elm və Təhsil Nazirliyi yanında İctimai Şuranın sədri Hikmət Əlizadə açıqlamasında qeyd edib ki, məktəbin idarəedilməsində direktorun böyük rolu vardır:
“Yaşadığımız əsrin ikinci onilliyinə qədər qabaqcıl müəllimlər məktəb direktoru seçilirdi. Bu məktəbin fəaliyyətinə müsbət təsir göstərirdi. Belə ki, məktəbin idarəedilməsində birinci yerdə metodiki rəhbərlik durur. Qabaqcıl müəllim öz pedaqoji yanaşması ilə müəllimlər arasında böyük nüfuza malik idi. Ona görə də onun idarəçiliyi böyük pedaqoji səmərəsi ilə fərqlənirdi”.
Onun sözlərinə görə, XXI əsrin əvvəllərində idarəetmədə menecerlik qabiliyyəti daha da aktuallaşıb:
“Bu zamanın tələbi idi. Müxtəlif müəssisələrdə rəhbər menecerlik qabiliyyəti əsasında təyin edildi. Bu yanaşma məktəb həyatına da şamil edildi. Menecerlik qabiliyyətinə üstünlük verilməsi o demək deyildi ki, məktəb direktoru yalnız menecerlik qabiliyyətinə görə seçilsin. Təəssüf ki, ölkəmizdə artıq bir müddətdir ki, məktəb direktoru menecerlik qabiliyyəti əsasında seçilir. Biz məktəb direktorunun menecer qabiliyyətinə malik olmasını təqdir edirik. Lakin fikrimizcə, qabaqcıl müəllimlərin arasından menecer qabiliyyətinə malik müəllimlərin direktor seçilməsi daha məqsədəuyğun olardı. Hesab edirəm ki, direktorun bu iki meyar əsasında seçilməsi məktəbin pedaqoji uğurlarının artmasına kömək edərdi”.
O həmçinin bildirib ki, məktəbin idarəedilməsi özünəməxsus xüsusiyyətə malikdir:
“Burada idarəetmənin ilkin şərti kimi, məktəb direktorunun pedaqoji bilik və bacarıqlarıdır. Daha dəqiq ifadə etsək, məktəb direktorunun idarəetmə strategiyasında birinci yeri onun pedaqoji səriştəsi tutmalıdır. Belə ki, məktəb direktoru, ilk növbədə, qabaqcıl müəllim olmalıdır ki, məktəbin pedaqoji kollektivinə rəhbərlik etsin. Pedaqoji səriştəyə malik olmayan müəllim məktəbə rəhbərlik etməkdə çoxlu çətinliklərlə üz-üzə qala bilər. Buna görə də direktorların seçimində sertifikatlaşdırma balının əsas götürülməsi məqsədəuyğun hesab edirəm”.
H.Əlizadə eyni zamanda vurğulayıb ki, sertifikatlaşma dünyanın əksər ölkələrinin təcrübəsində önəmli yer tutur:
“Müəllimin peşəkarlıq səviyyəsinin müəyyən edilməsi iki mərhələdə (test və müsahibə) həyata keçirilir. Sertifikatlaşma prosesinə hazırlaşan müəllimlər müxtəlif ədəbiyyatlarla tanış olarlar. İnternet resursları müəllimin özünütəhsil imkanlarını artırıb. Öyrəndikləri məsələlərlə bağlı müəllimlər bir-biri ilə fikir mübadiləsinə daxil olurlar. Bunu sertifikatlaşma prosesinə hazırlığın daha mühüm tərkib hissəsi kimi dəyərləndirmək lazımdır. Fikir mübadiləsi həmçinin müxtəlif təcrübələrin öyrənilməsi deməkdir. Bu yollarla müəllimlərin öz bilik və bacarıqlarını təkmilləşdirməsi onların daha səriştəli fəaliyyət göstərməsi üçün böyük imkanlar açır. Sertifikatlaşmanın iki mərhələdə aparılması isə bilasitə müəllilərin bilik və bacarıqlarının yoxlanmasına xidmət edir”.
İctimai Şura sədri onu da əlavə edib ki, bütün qabaqcıl müəllimlərdə menecerlik qabiliyyəti yetərincə olmaya bilər:
“Buna görə də sertifikatlaşmadan yüksək bal toplayan müəllimlər arasından menecerlik qabiliyyətinin yoxlanaraq, məktəb direktorunun seçilməsi doğru addımdır. Biz bunu təqdir edirik. Hesab edirik ki, bu yolla yüksək idarəetmə bacarığına malik müəllimlərin məktəb direktoru kimi fəaliyyət göstərməsi üçün yeni üfüqlər açılacaqdır”,- deyə o bildirib.
15-09-2025, 17:15
2026-cı ildə Xocalı hava limanı istifadəyə verilə bilər - Deputat
Xocalı hava limanında yenidənqurma işləri aparılır.
Bu barədə 118 saylı Ağdam-Xocalı seçki dairəsinin deputatı Elman Məmmədov məlumat verib.
O qeyd edib ki, Xocalı hava limanı həqiqətən də strateji əhəmiyyətə malik bir məkandır.
“Hazırda burada hava limanın bərpası istiqamətində müəyyən addımlar atılır. Cənab Prezidentin ötən il verdiyi tapşırığa əsasən, hava limanında yenidənqurma işləri aparılır. Uçuş zolağı həm uzununa, həm də eninə genişləndirilir. Hava limanında yerləşən müvafiq xidməti binaların da yenidənqurma işləri görülür. Yəqin ki növbəti il Xocalı hava limanının istifadəyə verilməsi ilə bağlı şad xəbəri alacağıq",- deyə millət vəkili əlavə edib:
Deputat bildirib ki, Xocalı aeroportu Qarabağ bölgəsinin mərkəzində, Xocalı şəhərinin ərazisində yerləşir:
"Hava limanı Xankəndi şəhərindən 8-9 km, Şuşa şəhərindən 15-16 km, Ağdam şəhərinin mərkəzindən isə 16-17 km məsafədə yerləşir. Bu da onun strateji mövqeyini bir daha təsdiqləyir".
Xatırladaq ki, Xocalı Hava Limanı 1974-cü ildə istismara verilib. 2020-ci ildə Birləşmiş Millətlər Təşkilatının ixtisaslaşmış təşkilatı - Beynəlxalq Mülki Aviasiya Təşkilatı (ICAO) Xocalı Hava Limanına UBES indeksi verməklə onun Azərbaycana məxsus olduğunu təsdiqləyib.
Dəniz səviyyəsindən 575 metr hündürlükdə yerləşən Xocalı aeroportunun ərazisi 188,5 hektardır. Hazırda hava limanında 2170 metr uzunluğunda və 45 metr enində bir uçuş-enmə zolağı, iki sürmə yolu, bir perron və bir terminal mövcuddur. Perron ərazisində hava gəmiləri üçün ümumilikdə üç dayanacaq mövcuddur.
Xocalı Hava Limanının infrastrukturunun inkişaf etdirilməsi məqsədilə bir sıra təkmilləşdirmə işlərinin aparılması nəzərdə tutulub. Belə ki, mövcud uçuş-enmə zolağının uzunluğu 3000 metrədək, eni isə 60 metrədək genişləndiriləcək. Hava limanının ərazisinin optimallaşdırılması işləri həyata keçiriləcək və burada ümumi sahənin 177,27 hektar, perron ərazisinin isə 47 min kvadratmetr olması planlaşdırılır. Görüləcək bütün işlər beynəlxalq norma və standartlara uyğun şəkildə həyata keçiriləcək, hava limanı ən müasir səviyyəyə çatdırılacaq.
15-09-2025, 17:10
Azərbaycan bu Şəbəkəyə tamhüquqlu üzv oldu
Azərbaycan Mərkəzi Bankı (AMB) İqtisadi Əməkdaşlıq və İnkişaf Təşkilatının (OECD) Beynəlxalq Maliyyə Savadlılığı Şəbəkəsinə (INFE) tamhüquqlu üzv qismində qoşulub.
Məlumata görə, bu üzvlük çərçivəsində qurum şəbəkənin "Maliyyə savadlılığı standartları: tətbiqi və qiymətləndirilməsi", "Rəqəmsal maliyyə savadlılığı" və "Maliyyə savadlılığı və davamlı maliyyə" üzrə işçi qruplarında iştirak etmək, beynəlxalq səviyyədə hazırlanan siyasət sənədlərinin işlənməsi prosesinə birbaşa cəlb olunmaq, həmçinin mövcud siyasət sənədləri bazasına çıxış əldə etmək hüququ qazanıb. Bununla da, AMB qabaqcıl təcrübələr və yanaşmalarla mütəmadi tanış olmaq imkanından yararlanacaq.
Bütün bunlar quruma maliyyə savadlılığı proqramlarını beynəlxalq standartlara uyğun şəkildə tətbiq etməyə, məlumat əlçatanlığının təmin olunmasına və ümumilikdə maliyyə inklüzivliyinin genişləndirilməsinə töhfə verəcək.
AMB maliyyə inklüzivliyinin genişləndirilməsini dəstəkləmək məqsədilə maliyyə savadlılığının artırılması istiqamətində beynəlxalq əməkdaşlıq əlaqələrinin genişləndirilməsini davam etdirir.
15-09-2025, 17:06
Kəlbəcərdə ilk təhsil zəngi çalındı - FOTO
İşğaldan azad olunan Kəlbəcərdə tikilən ilk ümumi təhsil müəssisəsi olan Bəhmən Cəfərov adına 1 nömrəli tam orta məktəbin şagirdləri üçün ilk təhsil zəngi çalınıb.
Şərqi Zəngəzur Regional Təhsil İdarəsindən bildirilib ki, Bilik Günündə Azərbaycan Respublikası Prezidentinin Kəlbəcər rayonunda xüsusi nümayəndəsi Bəşir Hacıyev, Şərqi Zəngəzur Regional Təhsil İdarəsinin müdiri Fuad Bədəlov, idarə və sektor əməkdaşları, məktəb kollektivi, şagirdlər, valideynlər və qonaqlar iştirak ediblər.
İlk dərs günü Dövlət Himninin səsləndirilməsi ilə başlayıb, daha sonra şəhidlərin xatirəsi bir dəqiqəlik sükutla yad edilib.
Tədbirdə Şərqi Zəngəzur Regional Təhsil İdarəsinin müdiri Fuad Bədəlov Kəlbəcərdə ilk təhsil müəssisəsinin fəaliyyətə başlaması, həmçinin yeni tədris ili münasibətilə şagirdləri və müəllimləri təbrik edib, onlara uğurlar arzulayıb, 2025-2026-cı tədris ilində qarşıda duran məsələlərdən danışıb.
Sonra Prezidentin Zəngilan rayonu üzrə xüsusi nümayəndəsi Bəşir Hacıyev çıxış edərək bu əlamətdar gün münasibətilə hər kəsi təbrik edib.
Tədbir bədii hissə ilə davam edib.
Daha sonra tədbir iştirakçıları yeni tikilmiş məktəbdə tədris prosesi ilə yaxından tanış olublar.
Qeyd edək ki, 2025-2026-cı tədris ilində Kəlbəcər rayonu 1 nömrəli tam orta ümumtəhsil məktəbində 43 şagirddən ibarət 11 sinif təşkil edilib və 14 müəllim burada tədris aparacaq.
15-09-2025, 16:42
QHT layihə həyata keçirir
QHT milli-mənəvi dəyərlərin qorunması istiqamətində layihə həyata keçirir.
“Uşaqların Gələcəyi Naminə” İctimai Birliyinin sədri Könül Quliyeva açıqlamasında bildirib ki, vətəndaş cəmiyyəti institutları milli-mənəvi dəyərlərimizin qorunub saxlanmasında mühüm rol oynayır. Onun sözlərinə görə, QHT-lər bu sahədə gələcək nəsillərin milli ruhda tərbiyəsi və yad təsirlərdən qorunması məqsədilə ictimaiyyət arasında maarifləndirici tədbirlər həyata keçirirlər:
"Azərbaycan Respublikasının Qeyri -Hökümət Təşkilatlarına Dövlət Dəstəyi Agentliyinin bu il elan etdiyi qrant müsabiqəsində milli-mənəvi dəyərlərin qorunması və təbliği mövzusuna geniş yer ayrılıb və müsabiqədə qaliblərdən biri də “Uşaqların Gələcəyi Naminə” İctimai Birliyidir. Sədər layihənin əsas məqsədini uşaqlar, yeniyetmələr və gənclərin milli-mənəvi dəyərlər əsasında tərbiyə olunması, məktəbli-müəllim-valideyn münasibətlərinin müasir tələblər baxımından tənzimlənməsi və məktəb-ailə əməkdaşlığının gücləndirilməsi olaraq göstərib.
Layihə çərçivəsində Tərtər və Bərdə rayonlarında hər birində 2 tədbirin keçirilməsi və yerli internet TV-də 3 maarifləndirici verilişin hazırlanması nəzərdə tutulub".
Könül Quliyeva əlavə edib ki, Azərbaycan əsrlərdən bəri multikulturalizm və tolerantlıq ənənələri ilə seçilən, milli-mənəvi və bəşəri dəyərlərə hörmət göstərən ölkədir. O, bildirib ki, hər bir şəxsiyyətin yetişməsində ailə önəmli rol oynayır, əsas dəyərlər ailədə formalaşır. Təhsil müəssisələri və cəmiyyət isə bu tərbiyəni daha da inkişaf etdirir.
"Prezident İlham Əliyevin Xankəndidə Qarabağ Universitetinin açılışında qeyd etdiyi kimi, “gənc nəslin milli ruhda böyüməsi üçün ailə və məktəb əsas mənbədir”. Milli-mənəvi dəyərlərin öyrədilməsi, ənənəvi dəyərlərə sadiqlik və yad təsirlərin qarşısının alınması həm ailə, həm cəmiyyət, həm də dövlət üçün prioritet məsələdir".
Pərvanə Fərhadqızı
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!