29-08-2022, 19:48
Türk Dövlətləri Təşkilatının 30 illiyi bu ölkədə qeyd olunacaq
Türk Dövlətləri Təşkilatının 30 illiyinin harada qeyd ediləcəyi məlum olub. Butov.az-ın əldə etdiyi məlumata görə, yubiley tədbiri Özbəkistanda keçiriləcək. 12 noyabr tarixinə planlaşdırılan toplantıda Türk dövlətləri üçün vacib sənədlərin imzalanacağı gözlənilir. Qeyd edək ki, Türk Dövlətləri Təşkilatının əsası 1992-ci ildə Türkdilli dövlətlərin liderlərinin zirvə toplantısında qoyulub. 3 oktyabr 2009-cu ildə isə beynəlxalq təşkilat kimi Azərbaycan, Qazaxıstan, Qırğızıstan və Türkiyənin iştirakı ilə rəsmən Naxçıvanda elan olunub. 2018-ci ildə Özbəkistan bu təşkilata üzv olub. Türk dünyasında əməkdaşlıq şurasının qurulması ideyası ilk dəfə 2006-cı ildə Qazaxıstanın o zamankı prezidenti Nursultan Nazarbayev tərəfindən irəli sürülüb. Təşkilatda müşahidəçi dövlətlər Macarıstan və Türkmənistandır. Türk Dövlətləri Təşkilatının üç mərkəzi var, bunlar İstanbul, Bakı və Nur-Sultandır. Üzv ölkələrin dövlət rəhbərləri ildə bir dəfə rəsmi, bir dəfə isə qeyri-rəsmi olaraq müxtəlif şəhərlərdə toplanırlar. Bundan əvvəl zirvə toplantısı ötən il Türkiyədə baş tutub. Xatırladaq ki, Türk Dövlətləri Təşkilatı 2021-ci ilədək Türkdilli Dövlətlərin Əməkdaşlıq Şurası adlandırılırdı. Belə ki, ötən ilin noyabrın 12-də İstanbulda keçirilən iclasda Şuranın adı dəyişdirilərək, Türk Dövlətləri Təşkilatı olub.
29-08-2022, 19:45
Toylar başlayır - Ət 15 manat olacaq
Bu ilin iyun ayında hökumət Azərbaycanda ətin qiymətinin ucuzlaşacağı anonsunu versə də, bunun tam əksi müşahidə edilir. Belə ki, bir neçə gün əvvəl ətin qiyməti 12 manata, hazırda isə 13 manata qədər bahalaşıb. Quzu ətinin qiyməti isə dəyişməyib - 15 manat. Bu barədə danışan satıcılar bahalaşmanı yem və otun qiymətinin qalxması ilə əlaqələndirirlər. Əslində qəssablar da bahalaşmadan narazıdılar. Onlar qiymət artımının əhalinin alıcılıq qabiliyyətinə mənfi təsir etdiyini bildirirlər. Bununla belə, ət satışı məntəqələri Məhərrəm və Səfər aylarından sonra ətin yenidən bahalaşacağını istisna etmirlər: “Hazırda toylar yoxdur, ətə tələbat da yoxdur. Amma sentyabrdan toylar başlayanda ətin 15 manata qədər bahalaşacağı gözlənilir. Qiymət artımı bizdən asılı olan məsələ deyil. Burada heç kəndli də günahkar deyil. Yem, ot bahadır. Kəndli də bir danaya çəkilən xərci çıxarmalıdır ki, qazancı olsun”. Xatırladaq ki, Hicri təqviminin ilk iki ayında (Məhərrəm və Səfər ayları) Azərbaycanın əksər bölgələrində toy mərasimləri təxirə salınır. Avqustun 28-i Məhərrəm ayı başa çatıb, ayın 29-dan isə Səfər ayı başlayır və sentyabrın 26-da başa çatacaq. Məhəmməd peyğəmbərin (s) nəvəsi imam Hüseyn (ə), onun ailə üzvləri və tərəfdarları Hicri-qəməri təqvimi ilə 61-ci ildə Kərbəlada şəhid ediliblər.
29-08-2022, 19:43
Qarabağda itkin düşənlərin yaxınlarından bioloji nümunə götürülüb
1990-cı illərdə baş vermiş döyüş əməliyyatlarında itkin düşmüş şəxslərin 303 ailə üzvündən 700 biloji istinad nümunəsi toplanılıb. Bu barədə Beynəlxalq Qızıl Xaç Komitəsinin (BQXK) 2022-ci ilin yanvar – iyun ayları ərzində həyata keçirdiyi fəaliyyətlərə dair hesbatında bildirilib. Qeyd edilib ki, bu nümunələr mümkün ekshumasiya zamanı identikifasiyaya dəstək üçün istifadə edilə bilər. Eyni zamanda, bildirilib ki, proses ərzində 47 ailə üzvünə psixo- sosioloji dəstək göstərilib.
29-08-2022, 19:42
Ukrayna bayrağı Azərbaycanın ən yüksək zirvəsində
“Ukrayna bayrağının sarı və mavi rəngləri Azərbaycanın ən yüksək zirvəsində dalğalandı!” Bu barədə Ukraynanın Azərbaycandakı səfiri Vladislav Kanevski feysbuk səhifəsində yazıb. “Ukraynanın Azərbaycandakı səfirinin köməkçisi Aleksandr Dorofeyev və Azərbaycanda akkreditə olunmuş diplomatik nümayəndəliklərin nümayəndələri, eləcə də Ukraynanın dostları Azərbaycanın ən hündür nöqtəsi Bazardüzü dağına (4466 m) qalxıblar”, - deyə paylaşımda qeyd olunub.
29-08-2022, 19:39
Rusiya yenə dinc sakinləri hədəf aldı - ölənlər var
Avqustun 28-də Rusiya hərbçiləri Donetsk vilayətində 8 dinc sakini öldürüb, daha 7 nəfəri yaralayıb. Bu barədə Donetsk Regional Hərbi Administrasiyasının rəhbəri Pavel Kirilenko Teleqramda məlumat yayıb. Kirilenko qeyd edib ki, Mariupol və Volnovaxada qurbanların dəqiq sayını müəyyən etmək mümkün deyil.
29-08-2022, 19:37
Zədələnən cüdoçumuza medal verildi
Bosniya və Herseqovinanın paytaxtı Sarayevoda yeniyetmələr arasında dünya çempionatında zədələnmiş Azərbaycan cüdoçusu Fidan Əlizadəyə gümüş medal təqdim olunub. Bu barədə Azərbaycan Cüdo Federasiyasının "Facebook" səhifəsində məlumat paylaşılıb. Ona gümüş medalı Azərbaycan Cüdo Federasiyasının vitse-prezidenti, Olimpiya çempionu Elnur Məmmədli təqdim edib. Xatırladaq ki, 63 kq çəkidə yarışan cüdoçumuz Fidan Əlizadə yarımfinal görüşündə zədələndiyinə görə finalda qızıl medal uğrunda mübarizə apara bilməyib. Bu səbəbdən Fidan xəstəxanaya aparılmış, təltifetmə mərasiminə də qatıla bilməmişdi.
29-08-2022, 19:33
Azad olunan ərazilərdə daha 309 mina aşkarlandı
Azərbaycan Respublikasının Minatəmizləmə Agentliyi (ANAMA) işğaldan azad edilmiş ərazilərdə minatəmizləmə əməliyyatları barədə həftəlik məlumat açıqlayıb. ANAMA-dan verilən məlumata görə, avqustun 22-dən 27-nə qədər Tərtər, Ağdam, Füzuli, Şuşa, Qubadlı, Cəbrayıl və Zəngilanda 240 piyada əleyhinə mina, 69 tank əleyhinə mina və 81 Partlamamış Hərbi Sursat (PHS) aşkarlanıb. Bildirilib ki, 731 hektar ərazi mina və PHS-lərdən təmizlənib.
29-08-2022, 19:30
Qəzada ölən hərbçiyə şəhid statusu veriləcək
Azərbaycan Ordusunun Goranboy rayonunda yol qəzasında həlak olan hərbi qulluqçusu Ərəblinski Vahid Maarif oğluna şəhid statusu veriləcək. Butov.az xəbər verir ki, qanunvericiliyə əsasən, V.Ərəblinski şəhid statusu alacaq. Qeyd edək ki, avqustun 26-sı saat 14 radələrində Goranboy rayonunun Buzluq kəndi ərazisində Zaqatala rayon sakini Vahid Ərəblinski idarə etdiyi “Ural” markalı avtomobili dərəyə aşırıb. Nəticədə sürücü hadisə yerində ölüb. O, Zaqatala rayonu Aşağı Tala kəndində dəfn edilib. Faktla bağlı Gəncə Hərbi Prokurorluğunda araşdırma aparılır.
29-08-2022, 19:28
XİN-in mətbuat katibi vəzifəsi ona həvalə olundu
Azərbaycan Xarici İşlər Nazirliyinin (XİN) Mətbuat xidməti idarəsində yeni təyinat olub. Butov.az-ın əldə etdiyi məlumata görə, XİN-in mətbuat katibi vəzifəsi Ayxan Hacızadəyə həvalə edilib. XİN-in yeni sözçüsü bundan öncə Azərbaycan Respublikasının ABŞ-dakı Səfirliyinin müşaviri vəzifəsində çalışıb. Qeyd edək ki, 2018-ci ildən XİN-nin mətbuat katibi olan Leyla Abdullayeva diplomatik fəaliyyətini Fransada davam etdirəcək.
29-08-2022, 19:23
Şəhid və qazi ailələri ilə görüş keçirilib
Kəlbəcər rayon İcra Hakimiyyətinin və YAP Kəlbəcər rayon təşkilatının birgə təşkilatçılığı ilə, yeni dərs ilinin başlanması ərəfəsində Vətən müharibəsi şəhidlərinin və qazilərinin övladlarına zəruri məktəbli ləvazimatları təqdim edilib. Tədbirdə Kəlbəcər rayon İcra Hakimiyyəti başçısı Azər Qocayev, YAP Kəlbəcər rayon təşkilatının sədri Həbib Misirov, Səfərbərlik və Hərbi Xidmətə Çağırış üzrə Dövlət Xidmətinin Kəlbəcər rayon şöbəsinin rəisi Polkovnik-leytenant Nazim Çələbiyev, rayon ictimaiyyətinin nümayəndələri, şəhid, qazi ailələri və övladları iştirak ediblər. Əvvəlcə tədbir iştirakçıları ölkəmizin suverenliyi, ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad ediblər. Daha sonra çıxış edən Kəlbəcər rayon İcra Hakimiyyəti başçısı Azər Qocayev şəhidlərimizin şərəfli döyüş yolundan söz açıb, onların qəhrəmanlığından bəhs edib.Eyni zamanda qazilərimizin 44 günlük Vətən müharibəsinə göstərdiyi, fədakarlıqdan, rəşadətdən söz açaraq bildirdi ki, onlar öz şəhid qardaşlarının və öz qanlarının qisasını düşməndən layiqincə alıblar. RİH başçısı onuda qeyd edib ki, Müzəffər Ali Baş Komandan cənab İlham Əliyev bütün təsirlərə qarşı qətiyyət və sarsılmaz iradə nümayiş etdirərək, xalqını bir amal uğrunda birləşdirmiş, rəşadətli əsgər və zabitlərimizin misilsiz qəhrəmanlığı, şücaəti hesabına düşmənin başına sarsılmaz dəmir yumruq endirilmiş və tarixi zəfər qazanılıb. Eyni zamanda bildirilib ki, qəhrəman oğullarımız əsl fədakarlıq və qəhrəmanlıq göstərərək öz həyatları bahasına torpaqlarımızı düşməndən təmizləyib, Azərbaycan xalqına qələbə sevinci bəxş etdiribdir. Məhz bunun nəticəsidir ki, Respublikamızın hər yerində olduğu kimi, işğaldan azad edilmiş torpaqlarımızda da əzəmətli Azərbaycan bayrağı dalğalanır.Necə ki, Azərbaycan var, üç rəngli şanlı bayrağımız səmalarda dalğalanır , şəhidlərimizdə hər zaman var olacaqdır və daima xatırlanacaqdır.Bu gün dövlətimizin başçısı cənab İlham Əliyev və Birinci vitse-prezident Mehriban xanım Əliyeva şəhidlərimizin əziz xatirəsini daima uca tutaraq, şəhid ailələrinə və qazilərimizə xüsusi diqqət və qayğı göstərir. YAP Kəlbəcər rayon təşkilatının sədri Həbib Misirov çıxış edərək Azərbaycan Respublikasının Prezidenti, Müzəffər Ali Baş Komandan cənab İlham Əliyev 44 günlük Vətən müharibəsində qazandığı zəfərlə hərb tarixinin yeni və şanlı salnaməsini yazdığını bildirdi. O, rəşadətli Ordumuzun şücaəti, Vətən torpaqları uğrunda apardığı ölüm-dirim savaşı sayəsində ərazi bütövlüyümüz bərpa olunduğunu, haqq, ədalətin yerini tapdığını vurğulayıb. Vətən üçün öz sağlamlıqlarını itirən qazilərimizə minnətdarlığını bildirib. Ulu Tanrıdan şəhidlərimizə rəhmət diləyib, qazilərimizə isə tezliklə sağlamlıqlarına qovuşmalarını arzulayıb.Eyni zamanda vurğulayıb ki şəhid ailələrinə və qazilərə göstərilən diqqət və qayğı dövlət siyasətinin prioritet məsələlərindən biridir. Yekunda Şəhid ailələri və qazilərin məktəbli övladlarına, məktəbli çantası və zəruri dərs ləvazimatları hədiyyə olunub, yeni tədris ilində onlara dərslərində uğurlar arzulanılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!