30-08-2022, 15:43
İran Zəngəzur dəhlizinə qarşıdır - Səfirin “ikibaşlı” mesajı
İranın Azərbaycandakı səfiri Seyid Abbas Musəvi rəsmi Tehranın Zəngəzur dəhlizi ilə bağlı mövqeyinə aydınlıq gətirib. Ötən həftə yerli KİV-ə açıqlama verən diplomat ölkəsinin Zəngəzur dəhlizinin əleyhinə olmadığını söyləyib. Səfir ardınca tviter hesabında paylaşım edərək, İranın Azərbaycan və Ermənistan arasında sülh danışıqlarını dəstəklədiyini vurğulayıb. "Amma müxtəlif ölkələr ikitərəfli və regional müzakirələrdə öz maraqlarını başqa ölkələrin maraqlarına zidd irəli sürməməlidir. 30 ildir ki, İran torpağı Azərbaycanı Naxçıvanla birləşdirən əsas yol olub və indi də belədir",- səfir qeyd edib. İranlı diplomatin sonuncu tviti ətrafında gedən müzakirələrdən məlum olur ki, Tehran Zəngəzur dəhlizinin açılmasına o qədər də can yandırmır, əksində hazırki vəziyyətin belə davam etməsində maraqlıdır. Mövzu ilə bağlı Modern.az-a danışan siyasi ekspert, Orta Doğu Araşdırma Mərkəzinin rəhbəri Sədrəddin Soltan bildirib ki, İran sülh danışıqlarını dəstəklədiyinə görə, Azərbaycana minnət qoya bilməz: “Biz də İranla İraq arasında sülh sazişinin imzalanmasını istəyirik. Çünki 1988-ci ildə baş verən İraq-İran müharibəsində sülh sazişi imzalanmamış, sadəcə atəşkəs elan olunmuşdu. Bununla onu demək istəyirəm ki, dünyada sülhü dəstəkləməyən ölkə yoxdur. Odur ki, İranın Ermənistan-Azərbaycan sülh danışıqlarını dəstəkləməsi normaldır. Buna görə, Azərbaycanın boynuna minnət qoyulmamalıdır”. S.Soltan hesab edir ki, İran tərəfi Zəngəzur dəhlizinin açılmasına qarşıdır: "İran birmənalı şəkildə Zəngəzur dəhlizinin açılmasına, bunun üçün Ermənistana təzyiq göstərilməsinə, dolğun məsləhət verilməsinə qarşıdır. Qonşuluq xatirinə, Azərbaycanla əlaqələri korlamamaq xatirinə deyirlər ki, Zəngəzur dəhlizinin açılmasına narazı deyilik. Əslində, İranın Ermənistanla apardığı danışıqlar, iki ölkə arasındakı əlaqələr göstərir ki, İran Zəngəzur dəhlizinin açılmasına qarşı çıxır. İran İnqilab Keşikçiləri Korpusunun sosial şəbəkə hesablarında yazılan şərhlər bunu təsdiqləyir. Eyni zamanda, İranın ali lideri Ayətullah Seyid Əli Xamnəyinin Ermənistan və Azərbaycanla bağlı düşüncələri bunu deməyə əsas verir. Düzdür, 30 il Bakı ilə Naxçıvan arasında əlaqə üçün İran ərazisindən istifadə olunub. Bu məsələdə İran tərəfi Azərbaycanın boynuna minnət qoya bilməz. Çünki bunun müqabilində Azərbaycan da İrana müəyyən güzəştlər etməkdədir. İranın bir sıra ərazilərinin qazla təmin olunması, İran yüklərinin Azərbaycan ərazisindən tranziti kimi məsələləri nümunə göstərmək olar. Azərbaycan dayanıqlı dəhliz istəyir. 2020-ci il 10 noyabr tarixində imzalanmış bəyannamədə qeyd olunan Zəngəzur dəhlizi bu mənada çox əlverişlidir”.
Ekspertin sözlərinə görə, Azərbaycanı maraqlandıran əsas məsələ Zəngəzur dəhlizinin açılmasıdır: “İranın Azərbaycandakı səfiri Seyid Abbas Musəvinin İranın guya Zəngəzur dəhlizini dəstəklədiyini deməsi Ermənistan tərəfindən rəsmən təkzib edilir. Belə ki, Ermənistan hökumətinin rəsmi teleqram səhifəsi olan "Baqramyan" bildirir ki, İran tərəfi heç vaxt Zəngəzur dəhlizinin açılmasını dəstəkləyən mövqe bildirməyib. Yəni Ermənistan Abbas Musəvinin sözlərini təkzib edib. İş burasındadır ki, İran da Ermənistan hökumətinin rəsmi teleqram səhifəsi olan "Baqramyan"ın məlumatını təkzib etməyib. Deməli, bu məsələdə qeyri-dəqiqlik var. Yəni İran Zəngəzur dəhlizi ilə bağlı birmənalı fikir bildirməyib. Əgər birmənalı fikir bildirsəydi, “3+3” formatında danışıqlar çoxdan başlamışdı. Yaxud Ermənistan tərəfi dəhlizin tikilməsi və istifadəyə verilməsi ilə bağlı işlərə başlayardı. Ermənistan hələ də İrana və Rusiyaya arxayın olduğu üçün Laçın dəhlizi ilə bağlı heç bir iş görməyib”.
30-08-2022, 15:26
Trampdan təcili seçki çağırışı
ABŞ-ın keçmiş prezidenti Donald Tramp ölkədə dərhal yeni prezident seçkilərinin keçirilməsinə çağırıb. Bu barədə Tramp özünün "Truth Social" sosial şəbəkəsində yazıb. "İndi aydın oldu ki, FTB seçkidən əvvəl Hanter Baydenin noutbuku ilə bağlı məsələni unutdu, çünki onlar bilirdilər ki, əgər belə etməsələr, Tramp 2020-ci il prezident seçkilərində asanlıqla qalib gələcəkdi. Bu, ölkəmizdə indiyədək heç vaxt görünməmiş səviyyədə seçkilərə böyük saxtakarlıq və müdaxilədir. Həll yolu əsl qalibi elan etmək və ya ən azı 2020-ci il seçkilərini baş tutmamış saymaq və yeni seçkilər keçirməkdir", - deyə Tramp vurğulayıb.
30-08-2022, 15:24
İraq çalxalanır
Avqustun 29-da İraqdakı Sədr hərəkatının lideri Müqtəda əs-Sədrin siyasətdən getdiyini açıqlaması ilə axşam saatlarından başlayan gərginlik davam edir. Yaşıl Zonada təhlükəsizlik qüvvələri ilə Sədrin silahlı dəstələri arasında qanlı toqquşmalar gedir. Milis RPG-7 tipli silahlarla Yaşıl Zonaya hücum edir. Butov.az xəbər verir ki, komendat saatı tətbiq edilən Bağdadda tətildə olan dövlət qurumları işləmir. Şiələrin ali dini qurumu olan Ayətullah Əli əs-Sistani baş verənlərlə bağlı hələlik heç bir açıqlama verməyib. Qeyd edək ki, İraqdakı Sədr hərəkatının lideri Müqtəda əs-Sədr siyasətdən getdiyini açıqlayıb. Sədrə dəstək verən qəzəbli qruplar isə Yaşıl Bölgədə Hökumətə və Prezident Sarayına basqın ediblər. Fəallar təhlükəsizlik qüvvələri tərəfindən silah gücünə bu yerlərdən uzaqlaşdırılıb. Sədrə bağlı Seraya es-Selam milisləri isə yüzlərlə silah dolu maşınla Yaşıl Bölgənin ətrafına yerləşdirilərək içəridəki əsgərlərlə toqquşmalara başlayıb. Birləşmiş Millətlər Təşkilatının (BMT) İraqdakı Missiya Nümayəndəliyi tərəfləri silahlı münaqişə və zorakılıqdan uzaq durmağa çağırıb.
30-08-2022, 15:17
Masallıdakı yanğın söndürüldü
Fövqəladə Hallar Nazirliyi (FHN) tərəfindən görülümüş zəruri və təxirəsalınmaz tədbirlər sayəsində Masallı rayonunun Məmmədoba kəndi yaxınlığında mürəkkəb relyefli dağlıq ərazidə baş vermiş yanğın geniş sahəyə yayılmasına imkan verilmədən söndürülüb. Bu barədə FHN-dən bildirilib. Yanğın nəticəsində təxminən 5 hektar sahədə ağaclıq və kol-kos yanıb. Sıx meşəlik ərazi yanğından mühafizə olunub. Yanğının söndürülməsi əməliyyatında ümumilikdə FHN-in Dövlət Yanğından Mühafizə Xidməti, Mülki müdafiə qoşunları, Xüsusi Riskli Xilasetmə Xidməti, Cənub Regional Mərkəzinin müvafiq qüvvələri və Aviasiya dəstəsinin iki ədəd helikopteri, eləcə də Ekologiya və Təbii Sərvətlər Nazirliyi Meşə Təsərrüfatı Mərkəzi və yerli icra hakimiyyətinin əməkdaşları, bir qrup kənd sakini iştirak edib.
30-08-2022, 15:13
Erməni deputatlar Türkiyəyə gedir
Ermənistan parlamentinin deputatları Türkiyəyə səfər edəcək. Bu barədə Ermənistan mətbuatı məlumat yayıb. Erməni deputatlar Eduard Ağacanyan və Armen Gevorkyan Avropa Şurası Parlament Assambleyasının (AŞPA) iclasında iştirak etmək üçün Türkiyəyə gedəcək. Onlar İzmirdə AŞPA-nın sosial məsələlər, səhiyyə və davamlı inkişaf komitəsinin iclasına qatılacaqlar. Qeyd edək ki, AŞPA-nın İzmirdəki iclası sentyabrın 21-dən 24-nə qədər baş tutacaq.
30-08-2022, 07:28
Təbrizdə divarlara posterlər yapışdırılıb
Milli-mədəni fəallar şəhərdə minlərlə posterlər yayıblar.Təbrizli milli-mədəni fəallar şəhərin bir çox bölgələrində divarlara posterlər yapışdırıb, hökumətə xəbərdarlıq ediblər. Urmu gölünün təsvirləri, Azərbaycan milli hərəkatı fəallarının həbsdə olması, yoxsulluq, mədənlərin talan edilməsi və ana dili kimi mövzuların yer aldığı posterlərdə türk və fars dillərində “Azərbaycan xaliqinin böyük qiyami yoldadır”dır məzmunlu şüarlar yazılıb.
30-08-2022, 07:01
Türkiyənin Zəfər Bayramı GÜNÜDÜR
Bu gün Türkiyədə Zəfər Bayramı qeyd edilir.
1922-ci ilin 26 avqustunda Mustafa Kamal Atatürkün baş komandanlığı ilə başlayan müharibənin 30 avqustda Dumlupınarda qələbə ilə nəticələnməsi bayram kimi qeyd olunur.
Birinci Dünya Müharibəsindən məğlub çıxmış Osmanlı dövlətinin düşmən ölkələr tərəfindən parçalanmasının qarşısı bu qələbə ilə alınıb. 1919-1922-ci illərdə davam edən Qurtuluş Savaşının ən həlledici mərhələsi hesab edilir.
İlk dəfə 1923-cü ildə qeyd edilən qələbə günü 1926-cı ildən rəsmi olaraq Zəfər Bayramı elan olunub. Avqustun 30-u həmçinin Türkiyə Silahlı Qüvvələri Günü kimi əlamətdardır.
29-08-2022, 22:34
Şahmatçımız erməniyə qalib gəldi
Azərbaycan şahmatçısı Günay Məmmədzadə Çexiyanın paytaxtı Praqada qadın şahmatçılar arasında keçirilən Avropa çempionatında növbəti qələbəsini qazanıb. Butov.az xəbər verir ki, Məmmədzadə IX turda Ermənistan təmsilçisi Mariya Gevorqyanı məğlub edib. Azərbaycanın digər şahmatçılarından Gülnar Məmmədova İnna Qaponenko (Ukrayna), Xanım Balacayeva Anna Uşenina (Ukrayna) və Gövhər Beydullayeva Nurgül Səlimova (Bolqarıstan) ilə heç-heçə edib. Ləman Hacıyeva isə Anna Sarqsyana (Ermənistan) uduzub. Hazırda Ülviyyə Fətəliyevanın Monika Soçko (Polşa) və Səbinə İbrahimovanın Noqa Orian (İsrail) ilə görüşü davam edir.
29-08-2022, 22:32
Xarici vətəndaşların Xankəndiyə girişi qadağan edildi
Rusiya sülhməramlılarının müvəqqəti yerləşdiyi Azərbaycan ərazilərinə xarici ölkə vətəndaşlarının girişi qadağan edilib. Bu barədə isveçli jurnalist Rasmus Kanbök "Twitter" hesabında yazıb. O, Xankəndiyə səfər etmək üçün Qarabağdakı separatçılara müraciət edib. Jurnalistə bildirilib ki, giriş icazələrinin verilməsi qeyri-müəyyən müddətə dayandırılıb.
29-08-2022, 22:29
İran XİN başçısı Moskvaya gedir
İranın xarici işlər naziri Hüseyn Əmir Abdullahian Moskvaya səfər edəcək. Bu barədə Rusiya Xarici İşlər Nazirliyi məlumat yayıb. Səfər avqustun 31-i baş tutacaq. İranlı nazir rusiyalı həmkarı Serqey Lavrovla danışıqlar aparacaq. Görüş zamanı Ukrayna, Suriya, Əfqanıstan, Cənubi Qafqaz və Xəzər dənizi ətrafındakı vəziyyət müzakirə olunacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!