30-01-2023, 15:57
ABŞ sözünün üstündə durmadı - Ərdoğan
Rəsmi Ankara Amerika qırıcılarının alınması üçün Vaşiqntona lazım olan qədər vəsait ödəyib, amma Ağ Ev nə təyyarələri verir, nə də pulumuzu geri qaytarır. Bunu Türrkiyə prezidenti Rəcəb Tayyib Ərdoğan gənclər təşkilatlarının nümayəndələri ilə görüşdə söyləyib. Ərdoğan sözügedən məsələylə bağlı “ABŞ sözünün üstündə durmadı” deyib. “Bizi heç nə təklif etmədən S-400 alacağımıza görə hədələyənlər var idi. F-16 qırıcılarının tədarükü ilə bağlı danışıqlar aparırıq, lakin bizə rədd cavabı verilir. Bizə F-35 təyyarələri vəd etdilər, lakin onlar sözlərinin üstündə durmadılar. Baxmayaraq ki, biz təxminən 1 milyard 400 milyon dollar ödəmişik. Təyyarə də yoxdur, pul da qaytarılmayıb. Biz hər zaman sözümüzün üstündə dururuq və bunu tərəfdaşlarımızdan da gözləyirik”, - deyə Ərdoğan vurğulayıb. Dövlət başçısı İsveç və Finlandiyanın NATO-ya üzv olmaq üçün müraciətinə baxılması ilə bağlı sualı da cavablandırıb. Onun fikrincə, Qərb Türkiyəni, onun prinsiplərini və ənənələrini heç tanımır. “İndiki Türkiyə 20, 30 və ya 40 il əvvəl şərtlərin diktə edildiyi Türkiyə deyil. İsveç öz ərazisində gizlənən 120 terrorçunu bizə təhvil verəcək. Biz bu öhdəliklərin yerinə yetirilməsini gözləyirik”, - deyə prezident vurğulayıb. O qeyd edib ki, Finlandiya ilə "vəziyyət fərqlidir". Ərdoğan bildirib ki, Ankara bu Skandinaviya ölkəsini Şimali Atlantika Alyansına qəbul etməyə hazırdır, lakin Helsinki İsveçin səhvlərini təkrarlamamalıdır. "Finlandiya ilə bağlı qərarı elan edəndə İsveç şokda olacaq", - Ərdoğan deyib. Ərdoğan həmçinin qeyd edib ki, Türkiyənin Rusiya ilə münasibətləri “qarşılıqlı hörmət üzərində qurulub”. “Mənim cənab Putinlə münasibətim dürüstlüyə əsaslanır. Biz Tatarıstandan Dağıstana qədər müraciətlərimizə cavab alırıq”.
30-01-2023, 15:54
Lavrov Azərbaycanla bağlı sualları cavablandırdı
Rusiyanın xarici işlər naziri Sergey Lavrov yanvarın əvvəlində keçirdiyi ötən ilin yekunlarına həsr olunmuş mətbuat konfransı ilə bağlı göndərilmiş sualları cavablandırıb. Butov.az Rusiya XİN-in rəsmi saytına istinadən Azərbaycan və regionla bağlı hissələri təqdim edir.
- 2022-ci il bir çox cəhətdən dünya və beynəlxalq proseslər üçün dönüş nöqtəsinə çevrilib. Rusiya üçün böyük Avrasiya tərəfdaşlığı ideyası daha da aktuallaşıb. Bütün bunların fonunda MDB-də tərəfdaşlarla əlaqələrin, xüsusən də Azərbaycanla əməkdaşlığın inkişafı və dərinləşdirilməsinin əhəmiyyəti nədən ibarətdir?
- 2015-ci ildə irəli sürülən təşəbbüs Rusiya Federasiyası üçün vaxt intervalı ilə bağlı layihə deyil. Bu, ikitərəfli və beynəlxalq formatlarda çoxvektorlu və çoxsəviyyəli transsərhəd əməkdaşlığı inkişaf etdirməyə dəvətdir. Biz həmişə bu barədə danışmışıq, onun mühüm komponenti dövlətlərarası birliklərin potensialının əlaqələndirilməsidir ki, onların arasında biz praktiki əməkdaşlığa yönəlmiş və ŞƏT, Aİİ, ASEAN kimi müsbət yönümlü təşkilatları görürük. Biz Azərbaycanın Avrasiya inteqrasiya proseslərində fəal iştirakını alqışlayırıq. 2021-2022-ci illərdə Bakıda Avrasiya mövzularına, xüsusilə də Azərbaycanla Aİİ arasında əlaqələrin möhkəmləndirilməsi məsələlərinə həsr olunmuş bir sıra ekspert tədbirləri uğurla keçirilib. Bununla bağlı əlamətdar hadisə 2022-ci ilin oktyabrında Azərbaycanda keçirilən XV Avrasiya İqtisadi Forumu oldu. Əminik ki, bu istiqamətdə gələcək addımlar Avrasiya qitəsinin mərkəzində yerləşən respublikanın maraqlarına tam uyğundur.
- Rusiyanın Cənubi Qafqaz üzrə strateji planını təsvir edə bilərsinizmi? Son bir ildə görülən işləri necə qiymətləndirirsiniz və Moskvanın bu regionda beşillik hədəfləri nədən ibarətdir? Yenidən fəallaşan Ermənistanla Türkiyə arasında münasibətlərin yaxşılaşması prosesində Rusiya tərəfi iştirak edirmi?
- Bizi Cənubi Qafqaz respublikaları ilə ümumi tarix, mənəvi və mədəni yaxınlıq, xalqlar arasında möhkəm dostluq telləri bağlayır. Cənubi Qafqazla bilavasitə həmsərhəd olan Rusiya bu regionun sabitliyində və rifahında, onun nəqliyyat, logistika, ticarət, investisiya, texnoloji imkanlarından qarşılıqlı faydalı istifadədə maraqlıdır. Diplomatiyamızın məqsədi də məhz budur. Biz regionda toplanmış konflikt potensialının aradan qaldırılması üçün intensiv işləyirik. Bu baxımdan prioritet vəzifələrdən biri Ermənistan-Azərbaycan münasibətlərinin normallaşdırılmasıdır. Bunun üçün əsası Rusiya, Azərbaycan və Ermənistan liderlərinin 9 noyabr 2020-ci il, 11 yanvar, 26 noyabr 2021-ci il və 31 oktyabr 2022-ci il tarixli bəyanatları təşkil edir. Əminik ki, prosesin uğuru tamamilə bu üçtərəfli qaydalara ciddi riayət olunmasından asılıdır. Daha geniş mənada, biz mövcud və formalaşmaqda olan çoxtərəfli danışıqlar formatlarına sadiq qalırıq. Biz Gürcüstan və Abxaziya və Cənubi Osetiya arasında birbaşa bərabərhüquqlu dialoqu təmin etməklə, Cənubi Qafqazda təhlükəsizlik və sabitliyə dair Beynəlxalq Cenevrə Müzakirələri çərçivəsində konstruktiv qarşılıqlı fəaliyyəti davam etdirməyə hazırıq. Biz 2021-ci ilin dekabrında fəaliyyətə başlayan 3+3 Məşvərətçi Regional Platformasının (Azərbaycan, Ermənistan, Gürcüstan, həmçinin Rusiya, İran və Türkiyə) işini təşviq etməyi hədəfləyirik. Biz regional oyunçuların maraqlarına uyğun olaraq əməkdaşlığın gücləndirilməsinin praktiki məsələlərinə diqqət yetirilməsi planlaşdırılan bu platformanı faydalı və vaxtında hesab edirik. Ankara ilə İrəvan arasında münasibətlərin normallaşmasına gəlincə, Rusiyanın himayəsi altında bu öhdəliyə 2022-ci ilin yanvarında Ermənistanın və Türkiyənin xüsusi nümayəndələri R.K.Rubinyan və S.Kılıç ilk dəfə Moskvada görüşdüyü vaxt başlayıb. Bu günə kimi onların hər ikisi ilə sıx əlaqə saxlayırıq. Biz regional vəziyyətin daha da yaxşılaşmasına töhfə verəcək Ermənistan-Türkiyə əlaqələrinin bərpası üçün perspektivlər açan son hadisələri alqışlayırıq.
30-01-2023, 15:49
Bir sıra ölkələr İrandakı səfirliklərini bağlamaq istəyir
Bir sıra ölkələrin səfirlikləri İrandakı fəaliyyətlərini dayandırmaq istəyir. Azərbaycan səfirliyi İranı tərk edən yeganə dipmissiya olmaya bilər. Belə ki, Azərbaycan səfirliyinə qarşı terror hücumu ardından da İranda baş verən hadisələr, müxtəlif vilayətlərdəki raket hücumları bir sıra ölkələrin səfirliklərini də ölkəni tərk etməyə vadar edə bilər. Artıq bəzi ölkələrin səfirlikləri əməkdaşlarının Azərbaycan üzərindən çıxarılması haqda düşünürlər. Qeyd edək ki, 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə terror hücumu olub. Hücum edən şəxs avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Hazırda hadisənin istintaqı aparılır.
30-01-2023, 15:43
İranın nüvə silahına sahib olmaması üçün bütün variantları sınayırıq - Blinken
ABŞ dövlət katibi Entoni Blinken bəyan edib ki, Vaşinqton İranın nüvə silahına sahib olmasının qarşısını almaq üçün bütün variantları nəzərdən keçirir. Blinkenin sözlərinə görə, İranla bağlı müxtəlif variantlar var. “İranın nüvə silahına sahib olmasının qarşısını almaq üçün masada bütün variantlar var”, - ABŞ dövlət katibi bəyan edib. Bundan əvvəl İsrailin müdafiə naziri Benni Qantz bəyan etmişdi ki, İran nüvə silahı yaratmağa yaxınlaşır. Onun sözlərinə görə, Tehranın müvafiq istəyi İsrail kəşfiyyatının məlumatları ilə təsdiqlənir. İsrailin müdafiə nazirinin qeyd etmişdi ki, İranın mümkün nüvə silahı əldə etməsi təkcə Yaxın Şərq üçün deyil, bütün dünya üçün ciddi nəticələrə səbəb olacaq. Bundan əvvəl Beynəlxalq Atom Enerjisi Agentliyi (MAQATE) İrandakı uran ehtiyatlarının nüvə bombası üçün kifayət edə biləcəyini açıqlamışdı.
30-01-2023, 15:39
ABŞ səfirliyindən Türkiyəyə xəbərdarlıq
ABŞ-ın Türkiyədəki səfirliyi terror təhlükəsi ilə bağlı vətəndaşlarına xəbərdarlıq edib. Səfirlik ABŞ vətəndaşlarına diqqətli olmağı tövsiyə edib. "ABŞ hökuməti vətəndaşlarına Qərb ölkələri vətəndaşlarının tez-tez baş çəkdiyi İstanbuldakı və ya digər yerlərdəki kilsələrə, sinaqoqlara, diplomatik missiyalara ehtimal olunan terror hücumları ilə bağlı xəbərdarlıq edir. Xüsusən, İstanbulun Beyoğlu, Qalata, Taksim və İstiklal bölgələrində", - deyə xəbərdarlıqda qeyd olunub
30-01-2023, 15:35
Türkiyənin təhsil naziri Azərbaycanda səfərdədir
Türkiyənin təhsil naziri Mahmut Özerin rəhbərlik etdiyi nümayəndə heyəti Azərbaycanda səfərdədir. Nümayəndə heyəti Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edərək məzarı önünə əklil qoyub. Daha sonra Şəhidlər xiyabanı və Türk şəhidliyi ziyarət olunub.
30-01-2023, 15:29
Nüvə silahı dünyanın təhlükəsizliyində böyük rol oynayır - Stoltenberq
NATO-nun baş katibi Yens Stoltenberq ABŞ-ın müttəfiqləri üçün oynadığı roldan danışıb. O, Vaşinqtonun müttəfiqlərinin maraqları baxımından vacib vəzifə yerinə yetirdiyini söyləyib. Baş katib Rusiya, Çin və Şimali Koreyanın hərəkətləri fonunda bunun böyük əhəmiyyət kəsb etdiyini vurğulayıb. "Nə qədər ki, nüvə silahı var, çəkindirmənin son dərəcə mühüm vəzifəsi var. Xüsusən də Rusiyadakı avtoritar qüvvələrin ona sahib olduğunu və fəal şəkildə sərmayə qoyduğunu, Çinin nələr etdiyini, silahların sayını artırdığını və Şimali Koreyanın hərəkətlərini gördükdə bunu anlayırıq", - deyə o bildirib. Stoltenberqin sözlərinə görə, ABŞ və Fransa kimi NATO ölkələri nüvə silahından əl çəksələr, dünya daha böyük təhlükə ilə üzləşəcək.
30-01-2023, 15:22
ABŞ Silahlı Qüvvələri İrana zərbələrdə iştirak etməyib - General
İrana dron hücumlarında ABŞ iştirak etməyib. Bunu Pentaqon rəsmisi, ABŞ ordusunun briqada generalı Patrik Rayder deyib. "ABŞ Silahlı Qüvvələri İrana zərbələrdə iştirak etməyib", - deyə general məlumat verib. Lakin o, hadisəni geniş şəkildə şərh etmək istəməyib. Qeyd edək ki, İranın İsfahan şəhərindəki hərbi zavod başda olmaqla, bir neçə regionunda hərbi obyektlərə PUA-larla zərbələr endirilib.
30-01-2023, 06:26
Səfirliyin bağlanması Təbrizdəki konsulluğun fəaliyyətinə şamil olunmur
“Əlbəttə, bizim Təbrizdə Baş Konsulluğumuz var. Tehrandakı səfirliyin diplomatik fəaliyyətini tam dayandırması Təbrizdəki Baş Konsulluğumuzun fəaliyyətinə şamil olunmur.” Bunu jurnalistlərə açıqlamasında xarici işlər nazirinin müavini Xələf Xələfov deyib. "Eyni zamanda nəzərə alaq ki, bizim bir çox vətəndaşlarımız İrandadır. Onların da yardıma ehtiyacı olarsa, Təbrizdəki Baş Konsulluğa müraciət edə bilərlər”, - nazir müavini bildirib.
29-01-2023, 23:06
Azərbaycanın İrandakı səfirliyi fəaliyyətini tamamilə dayandırdı
Azərbaycanın İrandakı səfirliyi fəaliyyətini tamamilə dayandırıb. Bunu jurnalistlərə açıqlamasında xarici işlər nazirinin müavini Xələf Xələfov deyib. "Səfirliyin inzibati binasının və əmlakının qorunması üçün əməkdaşlar səfirlikdə qalacaqlar, amma onlar diplomatik fəaliyyət göstərməyəcəklər", - deyə XİN başçısının müavini qeyd edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!