18-03-2024, 18:38
“Dərman vasitələrinin farmakonəzarət Qaydası”nda dəyişiklik edildi
“Dərman vasitələrinin farmakonəzarət Qaydası”nda dəyişiklik edilib.
Bununla bağlı Baş nazir Əli Əsədov qərar imzalayıb.
Qərara əsasən, Qaydaya bu anlayışlar əlavə edilir:
- dərman vasitəsinin qeydiyyat tarixi - eyni təsiredici maddə və ya eyni təsiredici maddə kombinasiyalı dərman vasitələrində, həmin təsiredici maddə və ya təsiredici maddə kombinasiyalı bir dərman vasitəsinin Avropa İttifaqında () ilk dəfə qeydiyyata alındığı tarix və ya bu tarixi müəyyən etmək mümkün olmadıqda, həmin təsiredici maddə və ya təsiredici maddə kombinasiyalı bir dərman vasitəsinin məlum olan ilk qeydiyyat tarixi;
- dərman vasitəsinin beynəlxalq qeydiyyat tarixi – yuxarıda nəzərdə tutulmuş dərman vasitələri istisna olmaqla hər hansı bir ölkədə dərman vasitəsinin ilk qeydiyyat tarixi;
- məlumat kilid tarixi - dövri olaraq yenilənən təhlükəsizlik hesabatında verilən məlumatların toplanmasının bitdiyi tarix.
Həmçinin, sözügedən qaydaya edilən dəyişikliklə farmakonəzarət üzrə məlumat və hesabat sənədləri (RİP, DYTH, FSƏD) artıq türk dilində də təqdim ediləcək.
18-03-2024, 17:55
Dövlət sərhədindən buraxılış məntəqələrinin sayı artdı
Azərbaycan Respublikasının dövlət sərhədindən buraxılış məntəqələrinin sayı artıb.
Bu barədə Nazirlər Kabineti qərar verib.
Bu siyahıya Cənub – Astara dövlət sərhədindən buraxılış məntəqəsi (Astara rayonu (Astara şəhəri), Azərbaycan Respublikası ilə İran İslam Respublikası arasında) daxil edilib.
18-03-2024, 17:47
Abşeronda Çanaqqala Zəfərinin 109–cu ildönümü qeyd olundu - FOTO
Türkiyənin istiqlal müharibəsi tarixində mühüm rol oynayan Çanaqqala Zəfərinin 109–cu ildönümü münasibətilə Türkiyə Cümhuriyyətinin Azərbaycandakı səfirliyinin təşəbbüsü ilə Abşeron rayonunda anım tədbiri keçirilib.
Əvvəlcə qonaqlar rayonun Digah kəndində Türk əsgərlərinin şərəfinə salınan Şəhidlər xiyabanını ziyarət edib, naməlum əsgərlərin məzarı önünə tər güllər düzüblər.
Xırdalandakı Mədəniyyət Mərkəzinin foyesində Bakı Türk Anadolu Liseyinin tələbələrinin və abşeronlu məktəblilərin çəkdiyi rəsm sərgisi açılıb. Gənclərin əl işlərinə baxış olub.
Mərkəzin akt zalında davam edən tədbirdə Atatürkün, Heydər Əliyevin və şəhidlərin əziz xatirəsi bir dəqiqəlik sükutla yad olunub. Azərbaycan Respublikasının və Türkiyə Cümhuriyyətinin Dövlət himnləri səsləndirilib.
Abşeron Rayon İcra Hakimiyyətinin başçısı Abdin Fərzəliyev, şəhid anası Xatirə İsmayılova, Türkiyənin səfiri Cahit Bağçı çıxış ediblər. Natiqlər martın 18-nin yalnız Türkiyənin deyil, dünya hərb tarixinə də ən böyük döyüşlərdən biri kimi daxil olan Çanaqqala savaşının türk tarixinin şərəf nöqtəsi, qürur, qəhrəmanlıq və Zəfər dastanı olduğunu qeyd ediblər.
Sonra Çanaqqala savaşlarını əks etdirən “Bir Vətəndir Canaqqala” filmi nümayış olunub.
Bakı Türk Anadolu Liseyinin şagirdlərinin hazırladığı “Bir dastandır Çanaqqala” adlı bədii proqram təqdim edilib. Şagirdlər səhnəciklərdə türklərin tarix boyu qəhrəman və mübariz xalq olduğunu, igid məhmətçiklərin şücaətini məharətlə göstəriblər.
18-03-2024, 17:41
Rusiya Mərkəzi Seçki Komissiyası açıqladı: “Vladimir Putin 87,28% səs toplayıb”
Rusiya Mərkəzi Seçki Komissiyası bülletenlərin 100 faizini emal edib.
Bülletenlərin 100%-nin hesablanmasının nəticələrinə əsasən prezident seçkilərində iştirak edən namizədlər üzrə rəsmi səslər belə paylanıb:
"Vladimir Putin 87,28%, Nikolay Xaritonov 4,31%, Vladislav Davankov 3,85%, Leonid Slutski 3,20% səs toplayıb".
Qeyd edək ki, Rusiyada 15-17 mart tarixlərində prezident seçkiləri keçirilib.
18-03-2024, 17:32
İşğaldan azad edilmiş bu şəhərlərdə sənaye zonaları yaradılacaq
Azərbaycanın işğaldan azad edilmiş Zəngilan, Cəbrayıl və Qubadlı şəhərlərinin girişində sənaye zonaları yaradılacaq.
Bu barədə Şərqi Zəngəzur İqtisadi Rayonunda 1 Saylı Bərpa, Tikinti və İdarəetmə Xidmətinə istinadən xəbər verir.
Məlumata görə, artıq bu istiqamətdə hazırlıq görülür, yaxın vaxtlarda sözügedən ərazilərdə layihələndirmə işləri aparılacaq.
Hazırda işğaldan azad edilmiş ərazilərdə 2 sənaye parkı fəaliyyət göstərir. Bunlar, Cəbrayıldakı "Araz Vadisi İqtisadi Zonası" və Ağdam Sənaye Parkıdır.
18-03-2024, 17:25
Paşinyan Qazaxla sərhəd olan Tavuş bölgəsinə səfər etdi
Xəbər verdiyimiz kimi, Ermənistanın Baş naziri Nikol Paşinyan martın 18-də Azərbaycanın Qazax rayonu ilə həmsərhəd olan Tavuş bölgəsinə səfər edib.
Nikol Paşinyan işğal altındakı Əskipara kəndinin Mədəniyyət Evində bir neçə yaşayış məntəqəsinin sakinlərilə görüşüb.
Erməni jurnalist Voskan Sarkisyan özünün Facebook səhifəsində bu görüş haqda yazıb. Onun sözlərinə görə, görüşdə baş nazirin müavini Mher Qriqoryan, Tavuş vilayətinin qubernatoru Hayk Qalumyan, Noyemberyandan olan icma sədri Arsen Ağababyan, bir sıra kənd administrasiyalarının rəhbərləri iştirak ediblər.
Jurnalistin bildirdiyinə görə, əgər əvvəllər burada keçirlən toplantılarda Nikol Paşinyan isti qarşılanırdısa, bu dəfə Baş nazir çox soyu qarşılanıb.
“Paşinyan zala daxil olanda oradakıların yarısı ayağa qalxmadı”, - Voskan Sarkisyan bildirib.
“Nikol Paşinyan bəyan edib ki, Tavuş vilayətinin əvvəllər azərbaycanlıların yaşadığı dörd sərhəd kəndinin əraziləri Azərbaycana təslim edilməlidir, əks halda Azərbaycan müharibəyə başlayacaq”, - Sarkisyan yazıb.
Xatırladaq ki, rəsmi Bakı Ermənistandan işğal edilmiş 4 eksklav olmayan kəndin (Bağanis Ayrım, Aşağı Əskipara, Xeyrimli və Qızılhacılı) mübahisəsiz və dərhal azad edilməsini istəyir.
Qeyd edək ki, hazırda Qazax rayonunun erməni işğalı altında 7 kəndi var: Bağanis Ayrım, Aşağı Əskipara, Xeyrimli, Qızılhacılı, Yuxarı Əskipara, Sofulu, Barxudarlı.
Həmin kəndlərdən 3-ü eksklav kəndlərdir (Yuxarı Əskipara, Sofulu, Barxudarlı) .
18-03-2024, 17:03
Naxçıvanda yeni institut yaradılır
Naxçıvan Muxtar Respublikası Ali Məclisi sədrinin müavini Anar İbrahimov martın 18-də Naxçıvan Muxtar Respublikası Qida Təhlükəsizliyi Agentliyinin fəaliyyətinin təmin edilməsi ilə bağlı əlavə tədbirlər haqqında fərman imzalayıb. Fərmanda deyilir:
"Naxçıvan Muxtar Respublikası Konstitusiyasının 30-cu maddəsini və 5-ci maddəsinin II hissəsinin 22-ci bəndini rəhbər tutaraq “Naxçıvan Muxtar Respublikasının Qida Təhlükəsizliyi Agentliyinin yaradılması haqqında” Naxçıvan Muxtar Respublikası Ali Məclisi sədrinin 2023-cü il 22 iyun tarixli 325-06/S nömrəli Sərəncamına uyğun olaraq, Naxçıvan Muxtar Respublikasının Qida Təhlükəsizliyi Agentliyinin fəaliyyətinin təşkili məqsədi ilə qərara alıram:
1. Naxçıvan Muxtar Respublikası Qida Təhlükəsizliyi Agentliyinin tabeliyində publik hüquqi şəxs statuslu “Naxçıvan Qida Təhlükəsizliyi İnstitutu” yaradılsın.
2. Müəyyən edilsin ki, Naxçıvan Qida Təhlükəsizliyi İnstitutu (bundan sonra – İnstitut) qida və yem məhsullarının, habelə qida məhsulları ilə təmasda olan material və məmulatların təhlükəsizliyi və qida məhsullarının minimum keyfiyyəti sahəsində elmi-praktiki araşdırmalar aparır, elmi prinsiplərə əsaslanan risk qiymətləndirilməsini həyata keçirir, qida təhlükəsizliyi sahəsində texniki normativ hüquqi aktların layihələrini hazırlayır və aidiyyəti üzrə təqdim edir, qida və yem məhsullarına dair digər beynəlxalq standartların onların istehsalçıları tərəfindən könüllü tətbiqi, qida və yem məhsullarının, habelə qida məhsulları ilə təmasda olan material və məmulatların təhlükəsizliyi və qida məhsullarının minimum keyfiyyəti göstəriciləri üzrə tədqiqat xidmətləri göstərir.
3. İnstitutda təsisçinin səlahiyyətlərinin həyata keçirilməsi aşağıdakılara həvalə edilsin:
3.1. Naxçıvan Muxtar Respublikası Ali Məclisinin sədrinə:
3.1.1. İnstitutun yenidən təşkil və ləğv edilməsi.
3.2. Naxçıvan Muxtar Respublikasının Nazirlər Kabinetinə:
3.2.1. nizamnamənin və strukturun təsdiqi;
3.2.2. nizamnamə fondunun miqdarının müəyyən edilməsi.
3.3. Naxçıvan Muxtar Respublikasının Qida Təhlükəsizliyi Agentliyinə:
3.3.1. bu Fərmanın 3.1-ci və 3.2-ci bəndlərində nəzərdə tutulanlar istisna olmaqla, “Publik hüquqi şəxslər haqqında” Azərbaycan Respublikası Qanununun 8.2-ci maddəsində publik hüquqi şəxsin təsisçisinin səlahiyyətlərinə aid edilmiş digər məsələlərin həlli.
4. “Naxçıvan Muxtar Respublikasının 2024-cü il büdcəsi haqqında” Naxçıvan Muxtar Respublikasının Qanunun tətbiqi barədə Naxçıvan Muxtar Respublikası Ali Məclisi sədrinin 2023-cü il 28 dekabr tarixli 223-VI FR nömrəli Fərmanının 1.10.2.1-ci yarımbəndində “Naxçıvan Qida təhlükəsizliyi laboratoriyası, elmi araşdırmalar və sahibkarlıq subyektlərinə xidmət mərkəzi publik hüquqi şəxs” sözləri “Naxçıvan Qida Təhlükəsizliyi İnstitutu publik hüquqi şəxs” sözləri ilə əvəz edilsin.
5. Naxçıvan Muxtar Respublikası Ali Məclisi sədrinin 2023-cü il 3 noyabr tarixli 210-VI FR nömrəli Fərmanı ilə təsdiq edilmiş “Naxçıvan Muxtar Respublikasının Qida Təhlükəsizliyi Agentliyi haqqında Əsasnamə”də aşağıdakı dəyişikliklər edilsin:
5.1. 3.0.22-ci yarımbəndə “qida məhsullarının” sözlərindən əvvəl “tabeliyindəki qurumun elmi əsaslandırılmış təklifləri əsasında” sözləri əlavə edilsin;
5.2. 3.0.23-cü yarımbəndə “qəbul etmək,” sözlərindən sonra “tabeliyindəki” sözü əlavə edilsin;
5.3. 3.0.64-cü yarımbəndə birinci halda “qida” sözündən əvvəl “tabeliyindəki qurum vasitəsilə” sözləri əlavə edilsin.
6. Naxçıvan Muxtar Respublikasının Nazirlər Kabineti:
6.1. İnstitutun nizamnaməsini və strukturunu təsdiq etsin, habelə nizamnamə fondunun formalaşdırılmasını təmin etsin və bu barədə bir ay müddətində Naxçıvan Muxtar Respublikası Ali Məclisinin sədrinə məlumat versin;
6.2. İnstitutun maddi-texniki təminatı ilə bağlı məsələləri iki ay müddətində həll etsin;
6.3. Naxçıvan Muxtar Respublikası Ali Məclisi sədrinin aktlarının bu Fərmana uyğunlaşdırılması ilə bağlı təkliflərini bir ay müddətində hazırlayıb Naxçıvan Muxtar Respublikası Ali Məclisinin sədrinə təqdim etsin;
6.4. Naxçıvan Muxtar Respublikası Nazirlər Kabinetinin normativ hüquqi aktlarının bu Fərmana uyğunlaşdırılmasını bir ay müddətində təmin edib Naxçıvan Muxtar Respublikası Ali Məclisinin sədrinə məlumat versin;
6.5. mərkəzi icra hakimiyyəti orqanlarının normativ hüquqi aktlarının bu Fərmana uyğunlaşdırılmasını nəzarətdə saxlasın və bunun icrası barədə üç ay müddətində Naxçıvan Muxtar Respublikası Ali Məclisinin sədrinə məlumat versin;
6.6. bu Fərmandan irəli gələn digər məsələləri həll etsin".
18-03-2024, 16:34
XİN başçısı Çanaqqala zəfərinin ildönümü münasibətilə Türkiyəni təbrik etdi
Azərbaycanın xarici işlər naziri Ceyhun Bayramov Çanaqqala zəfərinin 109-cu ildönümü münasibətilə Türkiyəni təbrik edib.
Bu barədə nazir "X"də paylaşım edib.
"Bu gün Türkiyə xalqının vətənpərvərlik və qəhrəmanlıq salnaməsi sayılan Çanaqqala zəfərindən 109 il ötür. Bu tarixi zəfərin ildönümündə qardaş Türkiyəyə səmimi təbriklərimizi çatdırır, müstəqillik və inkişafının əbədi olmasını arzu edirik", - o bildirib.
18-03-2024, 16:23
Prezident: “…hər kəs bizimlə hesablaşmalıdır, əks təqdirdə..”
Biz hamımız İkinci Qarabağ müharibəsindən sonra qürurla yaşayırıq.
Bu sözləri Prezident İlham Əliyev Novruz bayramı münasibətilə Azərbaycan xalqına təbrikində deyib.
Dövlətimizin başçısı, həmçinin vurğulayıb: “Biz hamımız fəxr edirik ki, biz özümüz ədaləti bərpa etdik, torpaqlarımızı işğalçılardan azad etdik, öz gücümüzü göstərdik və bundan sonra hər kəs bizimlə hesablaşmalıdır, əks təqdirdə, özü peşman olacaq”.
18-03-2024, 16:05
Xankəndinin mərkəzi meydanına “Zəfər meydanı” adı verildi
Xankəndinin mərkəzi meydanına “Zəfər meydanı” adı verilib.
Novruz bayramı münasibətilə Azərbaycan xalqına təbrikində bu barədə danışan Prezident İlham Əliyev deyib: “Uzun illər ərzində bu meydan və bu bina separatçıların yuvası idi. ...Məhz bu meydanda xalqımıza qarşı çirkin planlar hazırlanırdı. Məhz bu binada Xocalı soyqırımının törədilməsi üçün əmrlər verilmişdir. Bu gün isə biz bu meydanda dayanmışıq. Əziz xalqıma bildirmək istəyirəm ki, bu meydana mən “Zəfər meydanı” adı vermişəm, bundan sonra bura Zəfər meydanıdır”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!