27-03-2024, 13:21
Xocalı soyqırımı zamanı itkin düşən şəhidin qalıqları torpağa tapşırıldı
Martın 27-də Ceyranbatan qəsəbəsindəki qəbiristanlıqda Xocalı rayonu ərazində aşkarlanmış məzarlıqdan qalıqları tapılmış, Xocalı soyqırımı zamanı itkin düşmüş şəxslərdən Akif Seydulla oğlu Mahmudovun dəfn mərasimi keçirilib.
Dəfn mərasimində Xocalı Rayon İcra hakimiyyətinin başçısı Şahmar Usubov, Səfərbərlik və Hərbi Xidmətə çağırış üzrə Dövlət Xidmətinin Xocalı rayon bölməsinin rəisi Rahim Mustafayev, mərhumun yaxınları, qazilər, ictimaiyyət nümayəndələri iştirak ediblər.
Mərasimdə mərhumun ruhuna dualar oxunub, fatihə verilib.
27-03-2024, 13:11
Xocalı rayonuna ilk köçün tarixi açıqlandı
Erməni işğalından azad olunan Xocalı rayonuna ilk köç bu ilin may ayında olacaq.
Xocalı Rayon İcra Hakimiyyətinin başçısı Şahmar Usubov deyib.
O bildirib ki, Xocalıda tikinti və abadlıq işləri həyata keçirilir:
“Hazırda 500-ə qədər evdə bərpa işləri aparılır. May ayında ilkin olaraq 50 ailənin Xocalıya köçürülməsi nəzərdə tutulur”.
Qeyd edək ki, Xocalı rayonu 1992-ci il fevralın 25-dən 26-na keçən gecə işğal olunmuşdu. Həmin gecə erməni quldurları Xocalıda azərbaycanlılara qarşı soyqırımı törədiblər.
Azərbaycan Ordusunun 2023-cü ilin sentyabr ayının 19-20-də keçirdiyi antiterror əməliyyatları nəticəsində Xocalı işğaldan azad olunub.
27-03-2024, 13:00
Türkiyə şəhərləri merlərini seçir: A-dan Z-yə seçki prosesi
Türkiyədə martın 31-də keçiriləcək yerli özünüidarəetmə orqanlarına seçkilərə hazırlıqlar davam edir. Seçkilərdə 81 vilayət (il), 973 rayon (ilçe), 390 mahal (belde) bələdiyyələrinə sədrlər və 50 336 kənd və məhəlləyə yerli başçılar (muhtar) seçiləcək, habelə bələdiyyə məclisi üzvləri və vilayət ümumi məclisi (il genel meclisi) üzvləri üçün də seçkilər keçiriləcək.
Seçicilər harada və hansı qutuda səs verəcəklərini Ali Seçki Komissiyasının (YSK) rəsmi internet saytından, elektron hökumət portalından, YSK-nın seçici sorğuları üzrə mobil tətbiqindən və ya 444 9 975 nömrəli YSK çağrı mərkəzindən yoxlaya biləcəklər. Seçicinin harada səs verəcəyini göstərən seçici məlumat vərəqəsinin seçki günü məntəqəyə gətirilməsi məcburi olmayacaq.
Seçki məntəqəsində səsvermə kabinəsinə videoregistrator və ya mobil telefon, fotoaparat və kamera kimi vasitələrlə daxil olmaq qadağandır və cəriməsi var. Bu cür cihazlar səs verilərkən seçki komissiyasına verilməlidir. Yerli seçkilərdə 34 siyasi partiya iştirak edəcək. Seçki bülletenində partiyaların sırası belədir:
Ədalət və İnkişaf Partiyası 1, İYİ Partiya 2, Sol Partiya 3, Böyük Birlik Partiyası 4, Vətən Partiyası 5, Ana Vətən Partiyası 6, Demokratik Sol Partiya 7, Yenidən Rifah Partiyası 8, Xalqların Bərabərlik və Demokratiya Partiyası (DEM Partiya) 9, Türkiyə Kommunist Partiyası 10 , Anadolu Birliyi Partiyası 11, Zəfər Partiyası 12, Xalq Qurtuluş Partiyası 13, Türkiyə Kommunist Hərəkatı 14, Müstəqil Türkiyə Partiyası 15, Gələcək Partiyası 16, Yeni Türkiyə Partiyası 17, Cümhuriyyət Xalq Partiyası 18, Əmək Partiyası 19, HÜDAPAR 20, Hüquqlar və Azadlıqlar Partiyası 21, Ocaq Partiyası 22, Ədalət Birlik Partiyası 23, Demokrat Partiyası 24, Güc Birliyi Partiyası 25, Millət Partiyası 26, Milli Yol Partiyası 27, Ədalət Partiyası 28, Aydınlıq Demokratiya Partiyası 29, Milliyyətçi Hərəkat Partiyası 30, Türkiyə Fəhlə Partiyası 31, Demokratiya və Təşəbbüskarlıq Partiyası (DEVA) 32 , Səadət Partiyası 33, Vətən Partiyası 34.
Hər bir seçici qanunda göstərilən istisna hallardan başqa, yalnız seçici siyahısında qeydiyyatda olduğu seçki məntəqəsində səs verə biləcək. Seçici yalnız həmin seçki dairəsində keçirilən seçkilər üzrə səs verə bilər. Böyükşəhər sistemi üzrə idarə olunan vilayətlərdə - Adana, Ankara, Antalya, Aydın, Balıkəsir, Bursa, Denizli, Diyarbakır, Ərzurum, Eskişehir, Qaziantep, Hatay, İstanbul, İzmir, Kahramanmaraş, Kayseri, Kocaeli, Konya, Malatya, Manisa, Mardin, Mersin, Muğla, Ordu, Sakarya, Samsun, Şanlıurfa, Tekirdağ, Trabzon və Vanda seçicilər böyükşəhər bələdiyyəsinin sədri, rayon bələdiyyəsinin sədri, bələdiyyə məclisi üzvləri və kənd və məhəllənin yerli başçılarını seçəcəklər.
Böyükşəhər sistemi ilə idarə olunmayan vilayətlərdə - yerdə qalan vilayətlərdə isə səslər vilayət ümumi məclisi üzvləri, bələdiyyə sədri, bələdiyyə məclisinin üzvləri və kənd və məhəllənin yerli başçıları üçün veriləcək. Böyükşəhər bələdiyyəsinin sədri üçün seçki bülleteni ağ, vilayət ümumi məclisi üzvlüyünə seçki bülleteni narıncı, bələdiyyə sədrliyinə seçki bülleteni mavi və bələdiyyə məclisi üzvlüyünə seçki bülleteni sarı rəngdə olacaq. Seçicilər bütün seçki bülletenlərini bir zərfə qoyacaqlar.
Seçki mart ayında keçirildiyi üçün YSK 32 şərq vilayətində mövsümi şərtləri və günəşin qürub vaxtını nəzərə alaraq səsvermə vaxtını bir saat əvvələ çəkib. Bu səbəbdən Adıyaman, Ağrı, Artvin, Bingöl, Bitlis, Diyarbakır, Elazığ, Ərzincan, Ərzurum, Qaziantep, Giresun, Gümüşhane, Hakkari, Qars, Malatya, Kahramanmaraş, Mardin, Muş, Ordu, Rize, Siirt, Sivas, Trabzon, Tunceli Şanlıurfa, Van, Bayburt, Batman, Şırnak, Ardahan, İğdır, Kilis vilayətlərində səsvermənin başlama və bitmə saatları müvafiq olaraq 07:00 və 16:00 kimi müəyyən edilib. Yerdə qalan vilayətlərdə səsvermə saatları 08:00-17:00 arasında olacaq.
Səslərin sayılması prosesinə gəlincə, əvvəlcə böyükşəhər bələdiyyələrində böyükşəhər bələdiyyəsinin sədri, sonra rayon bələdiyyəsinin sədri, daha sonra bələdiyyə məclis üzvü və yekunda kənd və məhəllələrin yerli başçıları seçkiləri üçün bülletenlər sayılacaq. Digər vilayətlərdə isə sıra ilə bələdiyyə sədri, bələdiyyə məclis üzvü, vilayət ümumi məclis üzvü və kənd və məhəllələrin yerli başçıları seçkiləri üçün bülletenlər sayılacaq və hesablanacaq.
Ölkə xaricindəki seçicilər reyestrində qeydiyyata alınmış hər bir seçicinin parlament seçkilərində, prezident seçkilərində və referendumlarda, diplomatik nümayəndəliklərdə və gömrük-keçid məntəqələrində yaradılacaq seçki qutularında səs vermək hüququ olsa da, yerli seçkilərdə xaricdəki vətəndaşlar səs verə bilməzlər. Qeydə alınmış ümumi seçici sayı 61 441 882 nəfərdir. Bunlardan 1 032 610 nəfəri bu seçkidə ilk dəfə səs verəcək 18 yaş+ gənclərdir. Seçicilərin 50,59 faizini qadınlar, 49,41 faizini isə kişilər təşkil edir.
Ən uzun seçki bülleteni İstanbul Böyükşəhər Bələdiyyəsi (İBB) sədrliyinə seçkilərdə istifadə olunacaq. Burada 22 siyasi partiya namizədi və 27 müstəqil namizədin iştirak edir ki, onların hamısının bülletendə müvafiq yeri var. Bu bülletenin uzunluğu 97 santimetrdir. Ən qısa seçki bülleteni Şırnak vilayətinin Uludere rayonundakı Hilal qəsəbəsi üçün çap edilmiş 4,5 santimetr uzunluğunda seçki bülleteni olub, çünki burada yalnız bir siyasi partiya namizəd irəli sürüb.
27-03-2024, 12:18
Sabahın hava proqnozu
Bakıda və Abşeron yarımadasında martın 28-də hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Milli Hidrometeorologiya Xidmətindən verilən məlumata görə, şimal küləyi əsəcək.
Havanın temperaturu gecə 5-8° isti, gündüz 13-18° isti olacaq. Atmosfer təzyiqi 764 mm civə sütunundan 767 mm civə sütununa yüksələcək. Nisbi rütubət gecə 60-70 %, gündüz 45-55 % olacaq.
Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi dağlıq ərazilərdə qısamüddətli yağıntılı olacağı, şimşək çaxacağı ehtimalı var. Gecə və səhər arabir duman olacaq. Şərq küləyi əsəcək.
Havanın temperaturu gecə 4-8° isti, gündüz 16-21° isti, dağlarda gecə 2-7° şaxta, gündüz 2° şaxtadan 3°-dək isti olacaq.
27-03-2024, 12:15
Avropa Oyunları 2027-ci ildə İstanbulda keçiriləcək
Avropa Oyunları 2027-ci ildə Türkiyənin İstanbul şəhərində keçiriləcək.
Bu barədə İstanbul meri Əkrəm İmamoğlu mətbuat konfransında bildirib.
O, Avropa Olimpiya Komitəsinin yarışı məhz bu şəhərə verdiyini açıqlayıb.
Qeyd edək ki, Avropa Oyunları ilk dəfə 2015-ci ildə Bakıda təşkil olunub. Turnir 2019-cu ildə Belarusun paytaxtı Minskdə, ötən il isə Polşanın Krakov şəhərində gerçəkləşib.
27-03-2024, 11:59
Xankəndidə təhlükəsizlik tədbirləri görülür - VİDEO
Müzəffər Ali Baş Komandan İlham Əliyevin rəhbərliyi ilə Vətən müharibəsi və antiterror əməliyyatlarından sonra Böyük Qayıdış prosesinin sürətləndirilməsi və təhlükəsizliyin etibarlı təmin edilməsi məqsədilə Daxili İşlər Nazirliyinin əməkdaşları qarşıya qoyulan tapşırıqları peşəkarlıqla icra edirlər.
Bu barədə DİN-dən bildirilib. Qeyd olunub ki, bölgənin silah-sursatlardan, partlayıcı maddələrdən təmizlənməsi işi xidmətə cəlb edilən daxili işlər orqanları əməkdaşlarının əsas fəaliyyət istiqamətlərindən biridir. Müharibə qalıqları, təhlükə mənbələrinin aşkarlanıb zərərsizləşdirilməsi prosesi fasiləsiz davam etdirilir. Tədbirlərlə 16-26 mart tarixlərində polis əməkdaşları tərəfindən təkcə Xankəndi şəhəri ərazisindən 64 ədəd müxtəlif markalı avtomat silahı, 7 pulemyot, 21 tüfəng, 8 tapança, 78 qumbara, 1 saatlı bomba, 1 qumbaraatan, 46 alışdırıcı, 361 patron darağı, 33.742 ədəd müxtəlif çaplı patron, 6160 ədəd mərmi, 9 ədəd süngü-bıçaq və digər sursatlar aşkarlanıb.
Bundan başqa, Novruz bayramı günlərində işğaldan azad olunmuş ərazilərə icazəsi olan şəxslərin sərbəst keçidi təmin edilib. Bölgədə hərəkətinə icazə verilən şəxslərlə bağlı hər hansı hüquqazidd hal baş verməyib.
27-03-2024, 11:53
Qala qəsəbəsində sənədsiz tikililər söküldü - VİDEO
Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi tərəfindən səlahiyyətlərinə uyğun olaraq respublika ərazisində qanunsuz tikintilərlə bağlı müvafiq tədbirlərin həyata keçirilməsi davam etdirilir.
Bu çərçivədə, Bakı şəhərinin Xəzər rayonunun Qala qəsəbəsi ərazisində qanunsuz tikinti işlərinin aparılması faktları aşkar edilib. FHN-in Tikintidə Təhlükəsizliyə Nəzarət Dövlət Agentliyi tərəfindən Xəzər Rayon İcra Hakimiyyətinin nümayəndələrinin iştirakı ilə həyata keçirilən tədbirlər nəticəsində qanunsuz tikililər sökülüb.
27-03-2024, 11:07
Yaxın gələcəkdə Serbiya çətin çağırışlarla üzləşəcək
Yaxın gələcəkdə Serbiya həyati əhəmiyyətə malik milli maraqlarını təhdid edən çətin çağırışlarla üzləşəcək.
Serbiya Prezidenti Aleksandar Vuçiç bu barədə özünün sosial media hesabında yazıb.
“Serbiyanı çətin günlər gözləyir. Son 48 saat ərzində hansı xəbərləri aldığımızı söyləmək mənim üçün çətindir... Bunlar Serbiyanın həyati vacib milli maraqlarını birbaşa təhdid edir. Yaxın günlərdə mən serb xalqını qarşıda duran bütün çağırışlarla tanış edəcəyəm. Bu, həmişə olduğu kimi çətin olacaq. Biz mübarizə aparacağıq, Serbiya qalib gələcək”, - deyə Vuçiç bildirib.
Bundan öncə NATO-nun Yuqoslaviya hərbi müdaxiləsinin ildönümündə çıxış edən Serbiyanın dövlət başçısı ölkəsinin artıq azad olduğunu və alyansın 1999-cu ildəki hərəkətlərinə baxmayaraq, yaşamağa davam etdiyini vurğulamışdı.
27-03-2024, 10:36
İşğaldakı 4 kənd nə vaxt qaytarılır? - Erməni deputatdan açıqlama
Ermənistanın baş naziri Nikol Paşinyan bu yaxınlarda Tavuş bölgəsində yerli sakinlərlə görüşərkən Azərbaycanın tələb etdiyi 4 kəndin qısa zamanda geri qaytarılması zərurətindən danışıb. Nikol Paşinyan daha sonra - martın 20-də parlamentdə keçirilən “hökumət saatı”nda delimitasiya nəticəsində Azərbaycana qaytarılacaq ərazilərdən bəhs edərkən müharibə təhlükəsini nəzərə almağa çağırıb.
O, deyib ki, kəndlər tez bir zamanda qaytarılmasa, müharibə başlaya bilər.
Bəs ermənilərin 1990-92-ci illərdə qanunsuz olaraq Ermənistanın Tavuş rayonunun ərazisinə daxil etdikləri Azərbaycan kəndləri nə vaxt təhvil verilə bilər?
Ermənistan parlamentinin hakim “Mülki müqavilə” fraksiyasının deputatı Lilit Minasyan “Azatutyun”a bildirib ki, sərhəd delimitasiyası komissiyaları Tavuş bölməsində ərazilərin köçürülməsi prosesinin necə baş verməsini anlamaq üçün sənədlər mübadiləsi aparır.
Nikol Paşinyanın deputatlarla qapalı görüşündə konkret tarixlər barədə danışıb-danışmadığını soruşduqda, Minasyan cavab verib ki, heç bir tarix qeyd olunmayıb.
“Paşinyan fraksiya ilə görüşdə vaxtın az olduğunu deyibmi” sualına deputat belə cavab verib:
“Mən bu ifadəni həqiqətən xatırlamıram, amma mən özüm bu sahəni araşdırıram və regionda hansı tektonik hərəkətlərin baş verdiyinə baxıram. Mən də hesab edirəm ki, bizim illərimiz yoxdur ki, bu problemi həll edə bilək”.
Ermənistanın 3-cü Ordu Korpusunun həmin ərazilərdən çıxarılmasının müzakirə edilib-edilmədiyi ilə bağlı suala Lilit Minasyan cavab verib ki, bu məsələ hələ də müzakirə olunur.
“Hər hansı hərəkətlərin olacağını dəqiq deyə bilmərik. Bütün bunlar hələ danışıqlar mərhələsindədir”, - deyə deputat vurğulayıb.
Qeyd edək ki, hazırda Qazax rayonunun erməni işğalı altında 7 kəndi var: Bağanis Ayrım, Aşağı Əskipara, Xeyrimli, Qızılhacılı, Yuxarı Əskipara, Sofulu, Barxudarlı.
Ermənilər 1990-92-ci illərdə işğal etdikləri bu kəndləri qanunsuz olaraq Ermənistanın Tavuş rayonu ərazisinə daxil ediblər.
Azərbaycan Baş nazirinin müavini Şahin Mustafayevin Ermənistan Baş nazirinin müavini Mher Qriqoryanla bu ilin martında keçirdiyi görüşdən sonra rəsmi Bakı işğal edilmiş 4 eksklav olmayan kəndin (Bağanis Ayrım, Aşağı Əskipara, Xeyrimli və Qızılhacılı) mübahisəsiz və dərhal azad edilməsini istəyib.
“Delimitasiya prosesi çərçivəsində Azərbaycanın Ermənistanın işğalı altında olan 4 eksklav kəndinin (Yuxarı Əskipara, Sofulu, Barxudarlı və Kərki) azad edilməsi məsələsi də həll olunacaq", - deyə rəsmi Bakının bəyanatında vurğulanıb.
Ötən həftə Tavuş rayonunda məskunlaşmış ermənilərlə görüşən Ermənistanın baş naziri Nikol Paşinyan Qazaxın işğal altında olan 4 kəndinin (Bağanis Ayrım, Aşağı Əskipara, Xeyrimli və Qızılhacılı) Azərbaycana qaytarmağa məcbur olacaqlarını bildirib. Əks halda, o, müharibə olacağını istisna etməyib.
27-03-2024, 10:00
Bu rayonlara qar yağıb - FAKTİKİ HAVA
Martın 27-si saat 10:00-a olan əsasən ölkə daxilində hava şəraiti arabir yağıntılı olub, dağlıq rayonlarda qar yağıb.
Bu barədə Milli Hidrometeorologiya Xidmətindən məlumat verilib.
Bildirilib ki, Bakıda və Abşeron yarımadasında da gecə saatlarında qısamüddətli yağış yağıb.
Martın 26-sı gün ərzində güclü şimal-qərb küləyi səhər saatlarında mülayimləşib.
Qar örtüyünün hündürlüyü Şahdağda 52 sm, Daşkəsəndə 11 sm, Lerikdə 6 sm, Gədəbəydə 3 sm olub.
Daşkəsən, Gədəbəy, Göygöl, Qax, Şahdağda qar, Şahbuz, Astara, Tovuz, Ağstafa, Yardımlı, Ordubad, Lənkəran, Gəncə, Sədərək, Şəmkir, Qusar, Beyləqan, Naxçıvan, Naftalan, Ceyrançöl, Zaqatala, Şəki, Quba, Bərdə, Zərdab , İmişli, Kürdəmir, Sabirabad, Neftçala, Şabran, Altıağac, Quba, Biləsuvar, Culfa, Bakıda və Abşeron yarımadasında yağış yağıb.
Qrız, Şahdağ, Lerik, Yardımlı, Daşkəsən, Göygöl, Qax, Quba, Sumqayıtda duman müşahidə olunub.
Məlumatda qeyd olunub ki, havanın minimal temperaturu Bakıda və Abşeron yarımadasında 6 dərəcəyə qədər isti, Naxçıvan MR-da 0-5 dərəcə isti (dağlarda 4 dərəcəyə qədər isti), Aran rayonlarında 5-9 dərəcə isti, dağlıq rayonlarda 5-dən yuxarı şaxta, yüksək dağlıq ərazilərdə 12 sıraya qədər şaxta olub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!