12-03-2024, 16:57
Nazirlərin üçtərəfli görüşü keçiriləcək - XİN
15 mart 2024-cü il tarixində Azərbaycan Respublikası, Gürcüstan və Türkiyə Respublikasının xarici işlər nazirlərinin 9-cu üçtərəfli görüşü keçiriləcək.
Bu barədə XİN-dən bildirilib.
Qeyd edilib ki, üçtərəfli görüş çərçivəsində Azərbaycan Respublikasının xarici işlər naziri Ceyhun Bayramovun həmkarları ilə təkbətək görüşlərinin, habelə xarici işlər nazirlərinin birgə mətbuat konfransının keçirilməsi nəzərdə tutulub.
12-03-2024, 16:45
Azərbaycan Avropa çempionatına ev sahibliyi edəcək
Azərbaycan qadın voleybolçular arasında Avropa çempionatına (CEV EuroVolley Women) ev sahibliyi edəcək.
Ölkəmiz Gürcüstanla birgə keçirdiyi AVRO-2017-dən 9 il sonra yenidən bu hüquqa sahib çıxıb.
Azərbaycan 4 qrupdan birinə ev sahibliyi edəcək. Qarşılaşmalar 2017-ci ildə olduğu kimi yenə Milli Gimnastika Arenasında təşkil olunacaq.
Xatırladaq ki, Serbiyanın çempion olduğu həmin yarışda Azərbaycan Avropanın ən güclü dörd komandasından biri olub.
2026-cı il yayın sonuna planlaşdırılan turnirdə ümumilikdə Avropanın 24 ən yaxşı komandası iştirak edəcək. Bu komandalardan altısı məhz Bakıda mübarizə aparacaq. Azərbaycanla yanaşı, Çexiya və İsveçin AVRO-2026-ya birgə ev sahibliyi edəcəyi artıq təsdiqlənib.
12-03-2024, 16:30
AYNA “28 May” metrostansiyasının ətrafında görüləcək işləri açıqladı
Azərbaycan Yerüstü Nəqliyyat Agentliyi (AYNA) fərdi avtomobillərin hərəkətinin məhdudlaşdırıldığı “28 May” metrostansiyasının ətrafında görüləcək işləri açıqlayıb.
Bu barədə Agentlik məlumat yayıb.
Bildirilib ki, ərazidə aidiyyəti qurumlarla birgə abadlaşma işləri həyata keçiriləcək: “Bu işlər çərçivəsində asfalt örtüyünün dəyişdirilməsi, mikromobillik infrastrukturunun qurulması, o cümlədən velosiped zolaqlarının təşkil edilməsi və piyada zonalarının yaradılması nəzərdə tutulur. Həmçinin ərazinin şəhərin alternativ mərkəzinə çevrilməsi hədəflənir”.
O da qeyd olunur ki, Bakı Dəmiryol Vağzalına gəlib-gedənlər üçün qarşılama və yolasalma zonası da təşkil olunacaq.
12-03-2024, 15:58
Ramil Usubov Gürcüstanda səfərdədir
Azərbaycan Respublikasının Prezidenti yanında Təhlükəsizlik Şurasının katibi Ramil Usubov Gürcüstanda səfərdədir.
Məlumatı Gürcüstanın Daxili İşlər Nazirliyi (DİN) yayıb.
Bildirilib ki, Ramil Usubov Tbilisiyə səfəri çərçivəsində Gürcüstanın daxili işlər naziri Vaxtanq Qomelauri ilə görüşüb. Məlumata görə, tərəflər iki ölkənin aidiyyəti orqanları arasında təhlükəsizlk sahəsində əməkdaşlığın dərinləşdirilməsinin vacibliyini vurğulayıblar.
Söhbət zamanı həmçinin regionda cari hadisələr və təhlükəsizlik sahəsindəki məsələlərə də toxunulub.
12-03-2024, 15:42
Muxtar Babayev COP29-un əsas məqsədlərini açıqladı
BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) əsas məqsədi iqlim dəyişikliyi ilə mübarizə tədbirlərinin maliyyələşdirilməsinə mümkün qədər çox özəl sektoru cəlb etməkdir.
Bunu Azərbaycanın ekologiya və təbii sərvətlər naziri, COP29-un prezidenti Muxtar Babayev Böyük Britaniyanın “The Guardian” nəşrinə müsahibəsində deyib.
Onun sözlərinə görə, özəl sektor yeni təşəbbüs, format, maliyyələşdirmə mexanizmləri üçün çox yaxşı mənbədir.
M.Babayev COP çərçivəsində danışıqlarda 1,5°C hədəfinə nail olunmasının diqqət mərkəzində saxlanılmalı olduğunu da vurğulayıb:
“1,5°C hədəfinə nail olmaq üçün səylərimizi birləşdirməliyik. Bu məsələyə dair bədbin deyiləm. Biz qlobal səviyyədə emissiyaların azaldılması proqramın məqsədinə və həyata keçirilməsinə doğru irəliləməliyik. Əgər biz hərəkətə başlasaq, əvvəlki COP-larda əldə olunmuş razılaşmaları həyata keçirməyə başlasaq, bizim şansımız var. Biz mümkün olan hər şeyi edəcəyik”.
Xatırladaq ki, COP29 bu ilin noyabrında Azərbaycanda keçiriləcək.
12-03-2024, 15:19
Paşinyan Ermənistanın neçə kvadrat kilometr olduğunu açıqladı
“Azərbaycan tərəfi ilə danışıqlar masasında baş verənlərlə bağlı çox şeyi açıqlamayaq, çünki onsuz da danışıqlar otağında atmosfer çox müsbət deyil və şərhlər mövcud potensialı azalda bilər.
Bunu Ermənistanın Baş naziri Nikol Paşinyan martın 12-də keçirdiyi mətbuat konfransında deyib.
“Mən sizə 29.800 kvadrat kilometr ərazini əhatə edən bir epizod haqqında danışacağam. Danışıqlar bir-birinin ərazi bütövlüyünü tanımaq zərurətini gündəmə gətirəndə Azərbaycan Ermənistanın ərazi bütövlüyünü tanıdığını və heç bir ərazi iddiası olmadığını bəyan etdi. Niyə söhbət davam edir? Bir sadə səbəbə görə. Brüsseldəki danışıqlarda belə bir sual yarandı: Azərbaycan Ermənistanın ərazi bütövlüyü dedikdə nəyi nəzərdə tutur? Ermənistan Azərbaycanın ərazi bütövlüyündən danışanda nəyi nəzərdə tutur? Bu söhbət o dərəcədə inkişaf edib ki, yəqin ki, obyektiv məlumatlar var və bu məlumatlara istinad etmək lazımdır”, - Paşinyan bildirib.
Onun sözlərinə görə, məlumatlar Avropa İttifaqı Şurasının prezidenti Şarl Mişelə də ötürülüb və o bunu dərc edib.
“Sonra rəqəmlərin yuvarlaqlaşdırıldığı məlum oldu. O cümlədən, Azərbaycan tərəfi Ermənistanın dövlət orqanlarının internet saytlarında Ermənistanın ərazisinin 29 800 kvadrat kilometrdən az - 29743 kvadrat kilometr göstərilməsinə diqqətimizi çəkdi. Eyni şey Azərbaycana da aiddir, rəqəm yuvarlaqlaşdırılıb. Məhz bu rəqəmlər ətrafında aparılan müzakirələrə görə müəyyən gərginlik yaranıb”, - deyə Ermənistanın baş naziri bildirib.
Paşinyan deyib ki, Ermənistanın ərazisi 29800 kvadrat kilometr yox, 29743 kvadrat kilometrdir.
12-03-2024, 15:00
İlham Əliyev və Tokayev Şuşaya səfər etdilər - FOTO
Martın 12-də Azərbaycan Respublikasının Prezidenti İlham Əliyev və Qazaxıstan Respublikasının Prezidenti Kasım-Jomart Tokayev Şuşa şəhərinə səfər ediblər.
Dövlət başçıları Azərbaycanın tanınmış şəxsiyyətləri Natəvanın, Bülbülün və Üzeyir Hacıbəylinin işğal dövründə Şuşada ermənilər tərəfindən gülləbaran edilmiş heykəllərinə baxıblar. Prezidentlərə Şuşanın Baş planı barədə məlumat verilib.
Sonra dövlət başçıları Natəvan bulağında olub, Heydər Əliyev Fondu tərəfindən bərpa edilən Yaradıcılıq Mərkəzində “Heydər Əliyev və Qarabağ” sərgisinə baxıblar.
Daha sonra prezidentlər Saatlı məscidində, Bülbülün ev-muzeyində, Cıdır düzündə və XIX əsrin ortalarında Qarabağ memarlıq məktəbinə xas tərzdə inşa edilmiş üç yaşayış binasından ibarət “Yasəmən” otelində olublar.
12-03-2024, 14:52
Sovet Ermənistanının hüdudlarından kənara çıxan yollar yenidən tikiləcək - Paşinyan
"İrəvan Sovet Ermənistanının hüdudlarından kənara çıxan yol hissələrini yenidən tikməyi planlaşdırır".
Bunu ölkənin baş naziri Nikol Paşinyan mətbuat konfransında bildirib.
O deyib ki, belə yollar, xüsusən də Voskepar (Azərbaycanın Əskipara kəndinə bitişik kənd - red.) kəndi yaxınlığında Tavuşda mövcuddur.
Qeyd olunub ki, kiçik bir hissə de-yure sərhəd xəttini keçir və sonra yenidən Ermənistan ərazisinə daxil olur, əvvəllər Bakı ilə danışıqlar zamanı proporsional olanı başqa sahəyə köçürməklə bu hissənin Ermənistana buraxılmasının mümkünlüyü istisna edilmirdi.
Amma sonra Paşinyan belə qənaətə gəlib ki, bunu etməyə ehtiyac yoxdur, çünki bu, əlavə qeyri-müəyyənliklər yaradır, ona görə də yaxşı olar ki, yollar yenidən tikilsin.
12-03-2024, 14:29
Ermənistanda növbədənkənar seçkilərin keçirilməsinə ehtiyac yoxdur
Ermənistan sərhədçiləri avqustun 1-dən Zvarnots hava limanında xidmətə başlayacaq.
Bu barədə ölkənin baş naziri Nikol Paşinyan keçirdiyi mətbuat konfransında danışıb.
“Biz sadəcə olaraq belə bir qərar verdiyimizi bildirdik və səhv etmirəmsə, son tarix 1 avqust 2024-cü il idi”, - o qeyd edib.
Ermənistanın baş naziri məsələni siyasi və ya geosiyasi yox, işçi məsələ hesab etdiyini vurğulayıb.
Həmçinin seçkilər barədə məsələyə aydınlıq gətirən Paşinyan bəyan edib ki, Ermənistanda növbədənkənar seçkilərin keçirilməsinə ehtiyac görmür.
12-03-2024, 14:25
İlham Əliyev Tokayevlə Füzulidə tikiləcək xəstəxananın layihəsi ilə tanış oldu - FOTO
Martın 12-də Azərbaycan Respublikasının Prezidenti İlham Əliyev və Qazaxıstan Respublikasının Prezidenti Kasım-Jomart Tokayev Füzulidə inşa olunacaq Mərkəzi Rayon Xəstəxanasının layihəsi ilə tanış olublar.
Səhiyyə naziri Teymur Musayev dövlət başçılarına xəstəxanada yaradılacaq şərait barədə məlumat verib.
Bildirilib ki, Baş plan layihəsinə əsasən 180 çarpayılıq yeni xəstəxana 4,5 hektar ərazidə inşa olunacaq. Xəstəxananın inşasında Qazaxıstanın “BI Group” və bir sıra Azərbaycan şirkətləri iştirak edəcək. Bu tibb ocağında inzibati bina, qəbul, terapiya, kardiologiya, nevrologiya, cərrahiyyə, travmatologiya-ortopediya, oftalmologiya, otorinolorinqologiya, pediatriya, doğum, ginekologiya, yoluxucu xəstəliklər, anesteziologiya-reanimasiya, hemodializ şöbələri və əməliyyat bloku fəaliyyət göstərəcək.
Xəstəxananın ambulator xidmət hissəsi isə konsultativ poliklinika, uşaq poliklinikası, şüa-diaqnostika, funksional diaqnostika, fizioterapiya və tibbi bərpa şöbələrindən, klinik diaqnostika laboratoriyasından və aptekdən ibarət olacaq. Müalicə ocağı ən müasir tibbi avadanlıqlarla təchiz ediləcək.
Diqqətə çatdırılıb ki, xəstəxana ilə yanaşı, eyni ərazidə Gigiyena və Epidemiologiya Mərkəzi, Təcili Yardım Stansiyası və Məhkəmə-Tibbi Ekspertiza və Patoloji Anatomiya Mərkəzi də inşa ediləcək.
Burada rayon sakinlərinə yüksək səviyyədə tibbi xidmət göstərmək üçün hər cür şərait yaradılacaq. Beləliklə, öz doğma yurdlarına qayıdacaq rayon sakinləri bu tibb ocağının istifadəyə verilməsi ilə hərtərəfli tibbi xidmətlə əhatə olunacaqlar.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!