14-12-2025, 14:39
Rusiyaya kütləvi PUA hücumu
Gecə saatlarında Ukrayna Silahlı Qüvvələri Rusiyanın müxtəlif ərazilərinə pilotsuz uçuş aparatları (PUA) ilə kütləvi hücumlar təşkil edib.
Bu barədə Rusiya Müdafiə Nazirliyi məlumat yayıb.
Qeyd edilib ki, növbətçi hava hücumundan müdafiə sistemləri Rusiyanın müxtəlif bölgələri üzərində səmada 235 Ukrayna dronu vurub.
Nazirliyin açıqlamasına görə, Bryansk bölgəsi və Krasnodar diyarı daha çox hücuma məruz qalıb.
14-12-2025, 13:15
Ukrayna rus ordusunun müdafiəsini yardı - Kupyanskıda təmizləmə əməliyyatı
Ukraynanın Müdafiə Qüvvələri Xarkov vilayətinin Kupyansk istiqamətində və şəhərin kənarlarında hücumlarını davam etdirir.
Bu barədə ABŞ-nin Müharibənin Öyrənilməsi İnstitutunun (ISW) yeni hesabatında qeyd olunur.
Məlumatda qeyd edilir ki, xüsusilə, Ukrayna hərbçiləri Kupyanskın mərkəzində irəliləyib və burada təmizləmə əməliyyatları aparılır.
Bildirilir ki, jurnalist və Ukrayna Milli Qvardiyasının “Xartiya” adlı 13-cü operativ təyinatlı briqadasının döyüşçüsü Yuri Butusov Facebook səhifəsində yazıb ki, Ukrayna qoşunları Kupyanskın cənub-qərbində yerləşən Yubileynıy mikrorayonuna tam nəzarət edir. O əlavə edib ki, bu, rusların şəhərin cənubunda qalan istənilən mövqeləri saxlamaq imkanını aradan qaldıracaq.
Jurnalistin sözlərinə görə, Ukrayna qoşunları 24 sentyabra qədər Tişçenkovkanı, 9 oktyabra qədər Kondraşovkanı, 11 oktyabra qədər isə Radkovkanı azad edib. Onun bildirdiyinə görə, bu, Ukrayna hərbçilərinə həmin ərazidə Rusiya müdafiəsini yarmağa imkan verib.
Butusov həmçinin bildirib ki, Ukrayna hərbçiləri Oskol çayının sağ sahilinə çıxıb və 21 oktyabra qədər Rusiyanın şimaldan Kupyanska gedən yerüstü təchizat xətlərini kəsiblər. Eyni zamanda, ruslar Kupyansk istiqamətində pilotsuz uçuş aparatları üçün yüksək təhlükə zonası yaradıblar.
Bundan əlavə, ISW vurğulayıb ki, 12 və 13 dekabr tarixlərində dərc olunan geolokasiya görüntüləri rus diversiya qruplarının hələ də şəhərin şimal və qərb hissələrində mövcud olduğunu göstərir.
14-12-2025, 13:00
Honkonqda yanğın: 642 milyon dollar ziyan dəyib[/color]
Honkonqdakı yaşayış kompleksində baş verən güclü yanğın nəticəsində azı 160 nəfər həlak olub, dəymiş ziyanın məbləği isə 5 milyard Honkonq dollarından (642 milyon ABŞ dollarından) çox təşkil edib.
Bu barədə "South China Morning Post" (SCMP) qəzetinə faciədən sonra iqtisadi itkiləri qiymətləndirən ekspertlər bildiriblər.
Son məlumata görə, 26 noyabrda başlayan və 28 noyabrda söndürülən yanğın 1 736 mənzili içindəki bütün əşyalarla birlikdə tamamilə məhv edib. Təxminən 5 min nəfər evsiz qalıb.
Ekspertlərin sözlərinə görə, zərərə daxil edilməyən digər itkilər də var – şəhərdə matəm səbəbindən bir sıra tədbirlər ləğv olunub. Restoranlar və ictimai iaşə müəssisələri çoxsaylı tədbirlərin ləğv olunduğunu açıqlayıb. Honkonq Otel Sahibləri Federasiyası isə otel sektorunda da sifarişlərin ləğvi və təxirə salınması hallarının çoxaldığını bildirib.
Yanğın Honkonqun yeni ərazilərindəki Tay Po rayonunda yerləşən "Wang Fuk Court" kompleksinin səkkiz hündürmərtəbəli yaşayış binasından yeddisini əhatə edib. Alov binalarda kosmetik təmir üçün quraşdırılmış tikinti torları və bambuk konstruksiyaları vasitəsilə yayılıb.
Hazırkı yanğın şəhər tarixində yaşayış binasında baş verən ən faciəvi yanğın oldu. Bundan əvvəl meqapolisdə yaşayış binasında qurbanların sayına görə ən böyük yanğın 1996-cı ildə "Garley Building" kompleksində baş vermişdi. Nəticədə 41 nəfər ölmüş və 81 nəfər xəsarət almışdı. Bununla belə, Honkonq daha faciəvi yanğınlar da yaşayıb, lakin onlar yaşayış tikililərində olmayıb. Meqapolisin tarixində ən çox qurbanla nəticələnən yanğın 27 fevral 1918-ci ildə "Happy Valley" ippodromunda baş verib. Müvəqqəti tribunanın uçması və yanğının başlaması nəticəsində 600-dən çox insan həlak olub. 1948-ci ildə "Des Voeux Road West" küçəsində baş verən digər bir yanğın zamanı anbarda baş verən yanğın yaşayış binalarına keçmiş, nəticədə 176 nəfər ölmüş və 69 nəfər yaralanmışdı.
14-12-2025, 12:20
Türkiyədə fabrikdə güclü yanğın
Türkiyənin Denizli şəhərinin Çardak rayonu ərazisində filtr sistemləri istehsal edən bir fabrikin anbar hissəsində hələ müəyyənləşdirilməmiş səbəbdən yanğın baş verib.
Bu barədə "TRT Haber" məlumat yayıb.
Yanğın qısa müddət içərisində fabrikin böyük hissəsinə yayılıb. Yanğın zamanı fabrikin boş olduğu öyrənilib. Hadisə yerinə çox sayda yanğınsöndürən briqadalar göndərilib və alovların yayılmasını dayanmağa müvəffəq olublar. Yanğın nəticəsində fabrikin böyük hissəsi istifadə olunmaz vəziyyətə gəlib. Hazırda yanğını idarə altına almaq və söndürmək üçün işlər davam etdirilir.
14-12-2025, 11:53
İsrail HƏMAS liderini öldürdü - FOTO
İsrail Müdafiə Ordusu HƏMAS-ın ikinci ən nüfuzlu liderləri hesab olunan Raed Saadın Qəzza şəhərində keçirilən xüsusi əməliyyat zamanı zərərsizləşdirildiyini rəsmi şəkildə təsdiqləyib.
Bu barədə İsrail ordusunun mətbuat xidməti məlumat yayıb.
Məlumata görə, şənbə günü gündüz saatlarında Raed Saad mühafizəçiləri ilə birlikdə hərəkətdə olarkən “Şkoda” markalı avtomobili hədəfə alınıb.
Zərbə qüvvədə olan atəşkəs rejimi fonunda endirilib və bu addım faktiki olaraq atəşkəsin açıq şəkildə pozulması kimi qiymətləndirilir.
Əməliyyatın İsrailin baş naziri Benyamin Netanyahunun birbaşa icazəsi ilə, ölkənin ali hərbi rəhbərliyinin tövsiyəsi əsasında həyata keçirildiyi bildirilir. Qərarın ABŞ Prezidenti Donald Trampın mövqeyi ilə ziddiyyət təşkil etdiyi vurğulanır. Belə ki, Tramp son telefon danışığında Netanyahudan Qəzza üzrə diplomatik təşəbbüslərə və öz planına şans verilməsini istəmişdi.
İsrail tərəfinin məlumatına görə, Raed Saad 2023-cü il oktyabrın 7-də İsrailə qarşı həyata keçirilmiş hücumun əsas planlaşdırıcılarından biri olub. O, HƏMAS-ın hərbi akademiyasının qurucusu sayılır, şəhər müharibəsi və reyd əməliyyatları üzrə döyüş doktrinalarının hazırlanmasında iştirak edib. Onun zərərsizləşdirilməsi İsrail üçün həm simvolik, həm də strateji əhəmiyyət daşıyır və Netanyahunun seçki ilində sərt xətt yürüdən lider imicini gücləndirir.
14-12-2025, 11:49
Zelenski seçkilərin keçirilməsinə hazırdır, lakin...
Ukrayna prezidenti Vladimir Zelenski Avropadakı müttəfiqlərinin dəstəyi ilə ABŞ prezidenti Donald Trampın sülh planına cavab strategiyası hazırlayıb. Məqsəd bu planı Ukrayna üçün qəbulolunan etməkdir.
Bu barədə "The Wall Street Journal" məlumat yayıb.
Nəşr yazır ki, bu strategiya mahiyyət etibarilə sadə “bəli, amma...” yanaşmasına əsaslanır və xüsusilə ən mübahisəli məqamların icra mexanizmləri ilə bağlı tərəfdaşlara təzyiq göstərilməsini nəzərdə tutur.
Məlumata görə, Zelenski seçkilərin keçirilməsinə hazırdır, lakin bunun üçün atəşkəs tələb olunur. O bildirir ki, hazırda Rusiya tərəfindən işğal olunmuş Zaporojye Atom Elektrik Stansiyasında Rusiya tərəfinin iştirakı qala bilər, lakin vəziyyət Ukrayna və ABŞ tərəfindən nəzarətdə saxlanılmalıdır. Zelenski həmçinin Ukrayna ordusunun sayının məhdudlaşdırıla biləcəyini etiraf edir, lakin bu, mövcud səviyyələr çərçivəsində olmalıdır.
Nəşr qeyd edir ki, “bu yanaşma Zelenskiyə Trampın sülh baxışını dəstəkləməyə imkan verib, lakin ölkə daxilində siyasi nüfuzuna zərər vurmayıb”.
Onu da qeyd edək ki, ABŞ tərəfindən təklif olunan razılaşma Donetsk vilayətinin qalan hissəsinin “azad iqtisadi zona”ya və ya “demilitarizasiya olunmuş zona”ya çevrilməsini nəzərdə tutur. Bu zonadan Ukrayna qoşunları çıxarılmalı, Rusiya hərbçilərinin isə ora daxil olması qadağan edilməlidir.
14-12-2025, 11:13
Rusiya təhdidinə qarşı hazırlıq görülməlidir - NATO-dan XƏBƏRDARLIQ
NATO özünün strateji çərçivəsini yenidən gözdən keçirməli, "Atlantika uğrunda döyüş" və ya Avropadakı quru əməliyyatlarının hüdudlarından kənara çıxacaq Rusiya ilə qarşıdurmaya hazırlaşmalıdır.
Bu, NATO Hərbi Kollecinin son icmalında qeyd olunub.
Sənədin müəllifi, kollecin elmi əməkdaşı Endryu Monaqan iddia edib ki, dövlətin bütün dəniz qüvvələrinin inkişafı Moskvanın siyasətinin əsas xüsusiyyətidir. Ekspert qeyd edib ki, bu, Rusiyaya geoiqtisadi rəqabət dövründə özünü lider kimi göstərməyə imkan verir.
"Bu, NATO-nun oriyentirlərinin çərçivəsini bərpa olunmuş "Atlantika uğrunda döyüş"dən və ya Şimal-Şərqi Avropadakı quru əməliyyatları ssenarilərindən kənara, qlobal üfüqlərə malik, çoxcəbhəli, müxtəlif növlü Rusiya çağırışına doğru yönəldir", - icmalda bildirilib.
Alyans analitikləri onu da qeyd ediblər ki, böhran ssenariləri tez-tez Baltik dənizindən Kara dənizinə qədər vahid strateji istiqamətdə gərginliyin artmasına diqqət yetirir.
14-12-2025, 10:30
Tailand–Kamboca sərhədində toqquşmalar yenidən başladı
Tailand və Kamboca arasında yenidən başlayan sərhəd toqquşmaları ikinci həftəyə daxil olub.
Bu barədə "Aljazeera" məlumat yayıb.
Məlumata görə, bu Banqkokun ABŞ Prezidenti Donald Trampın atəşkəs razılaşması əldə edildiyi iddiasını rədd etməsindən sonra baş verir.
Qeyd edilir ki, Tailand ordusu “suveren ərazilərini geri qaytarmaq” adı ilə Kambocaya qarşı yeni hücuma başlayıb. Trampın atəşkəs razılaşması əldə edildiyi barədə iddiasına baxmayaraq, Banqkok tərəfi bu iddianı rədd edib. Döyüşlər sayca çoxaldıqca, Banqkok və Pnompenh arasında ciddi hərbi qarşıdurma davam edir.
14-12-2025, 10:17
ABŞ-də universitetdə atışma - 2 nəfər öldü
ABŞ-nin Rod-Aylend ştatının Providens şəhərində yerləşən Braun Universitetində baş verən atışma nəticəsində iki nəfər ölüb, xəsarət alanların sayı doqquza yüksəlib.
Bu barədə şəhərin meri Brett Smayli məlumat yayıb.
Məlumata əsasən, ölən və yaralananların hamısı Braun Universitetinin tələbələridir.
Hadisəni törətməkdə şübhəli bilinən şəxsin saxlanılması hələlik mümkün olmayıb. Araşdırmalar davam etdirilir.
14-12-2025, 09:41
Tramp iki ölkəni hədələdi
ABŞ prezidenti Donald Tramp Tailand və Kamboca hakimiyyətini iki ölkə arasında hərbi əməliyyatların dayanmayacağı təqdirdə məhsullarına yeni gömrük rüsumları tətbiq edəcəyi ilə hədələyib.
Amerika lideri bu barədə "The Wall Street Journal"a müsahibəsində bildirib.
"Mən indicə, 10 dəqiqə əvvəl, Tailand və Kamboca arasında yeni eskalasiyanı həll etmək üçün tariflərdən istifadə etdim. Mən dedim: "Əgər döyüşsəniz, nəinki ticarət razılaşmamızı ləğv edəcəyəm, həm də ölkələrinizə tariflər tətbiq edəcəm", - Tramp izah edib.
ABŞ prezidenti əmin olduğunu bildirib ki, tariflərin tətbiqi imkanları onun administrasiyası üçün mühüm xarici siyasət alətidir. Tramp vurğulayıb ki, əgər ABŞ Ali Məhkəməsi onun tətbiq etdiyi bəzi tarifləri qanunsuz hesab edərsə, Amerika tərəfi üçün "dəhşətli" olacaq.
Bununla belə, Amerika lideri əmin edib ki, hətta bu halda o, növbəti tariflərə hüquqi əsas tapacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!