9-12-2024, 22:51
Suriyalılar Türkiyəni tərk etməyə başlayıblar
Suriyanın gələcəyini Suriya xalqı müəyyən etməlidir.
Bunu Türkiyə prezidenti Rəcəb Tayyib Ərdoğan bildirib.
O, Suriyanın ərazi bütövlüyünün qorunub saxlanılmasının vacibliyini vurğulayıb və bu ölkəyə dəstək verəcəyini vəd edib.
“Bir daha deyirəm: ərəb, türkmən, kürd, sünni, ələvi və ya xristian olmasından asılı olmayaraq, bütün suriyalıların sülh içində yaşadığı Suriya Türkiyənin ən böyük arzusu, arzusu və məqsədidir”, - deyə Ərdoğan Nazirlər Kabinetinin iclasından sonra qeyd edib.
Onun sözlərinə görə, Suriyada hakimiyyət dəyişikliyindən sonra suriyalı qaçqınlar Türkiyəni tərk edərək vətənlərinə qayıtmağa başlayıblar.
Ərdoğan əlavə edib ki, Türkiyə qaçqınların vətənlərinə gediş-gəlişini asanlaşdırmaq üçün Suriya ilə sərhəddə Yayladağı sərhəd-keçid məntəqəsini açıb.
Xatırladaq ki, noyabrın sonunda Suriyada hökumət əleyhinə qüvvələrin hücumu başlayıb. Dekabrın 8-nə keçən gecə onlar paytaxt Dəməşqə daxil olublar. Bəşər Əsəd prezident postunu tərk edib və Suriyadan qaçıb. Suriyanın baş naziri Məhəmməd Qazi Əl-Cəlali müxalifətlə əməkdaşlığa və hakimiyyəti sülh yolu ilə ötürməyə hazır olduğunu bəyan edib. Əsəd və ailəsi Rusiyaya sığınıb.
Qeyd edək ki, Türkiyədə 3.7 milyona yaxın suriyalı yaşayır.
9-12-2024, 22:31
Zelenskidən müharibənin dayandırılması ilə bağlı yeni təklif
Rusiya-Ukrayna müharibəsinin dayandırılması üzrə ortaq mövqe nümayiş etdirəcək bir neçə Avropa ölkəsindən ibarət yeni Təmas Qrupunun yaradılması təklif edilib.
Bu barədə Ukrayna Prezidenti Volodimir Zelenski və Almaniya kanslerliyinə namizəd Fridrix Merts Kiyevdə danışıqlardan əvvəl bildiriblər.
Merts Avropa ölkələrinin Ukraynada fərdi sülh təşəbbüslərinə qarşı çıxıb. Onun sözlərinə görə, Avropa ölkələri müharibənin dayandırılması məsələsində ortaq mövqeyə malik olmalıdırlar.
“Bu, təkcə Aİ-yə aid deyil. Mənim təklifim var ki, Almaniya, Fransa, Polşa, Böyük Britaniya - Avropanın dörd böyük ölkəsindən və NATO-dan ibarət Təmas Qrupu yaradılsın. Onlar fikir mübadiləsi aparsınlar və beləliklə, ABŞ ilə birgə proses inkişaf etsin”, - deyə Merts əlavə edib.
Volodimir Zelenski belə bir təşəbbüsü dəstəklədiyini vurğulayıb. Dövlət başçısı bu qrupa Danimarkanın da əlavə edilməsi təklifini səsləndirib.
Xatırladaq ki, Donald Tramp ABŞ prezidenti seçiləndən sonra Ukrayna ilə Rusiya arasında müharibəyə son qoymaq məsələsi daha çox müzakirə olunmağa başlayıb.
9-12-2024, 21:48
Putin 92 hərbçiyə general rütbəsi verdi
Rusiya prezidenti Vladimir Putin 92 hərbi qulluqçuya və xüsusi xidmət orqanlarının əməkdaşına general və admiral rütbələri verib.
Sənəd Rusiyanın hüquqi informasiya portalında dərc olunub.
Putin müdafiə nazirinin müavinləri Viktor Qoremikin və Yunus-Bek Yevkurova ordu generalı rütbəsi verib.
Həmçinin müdafiə nazirinin müavini Andrey Buliqa, Cənub qoşunlar qrupunun komandanı səlahiyyətlərini icra edən Aleksandr Sançik və Aerokosmik Qüvvələrin baş komandanının müavini Andrey Semenova general-polkovnik rütbəsi verilib.
Axmat xüsusi təyinatlılarının komandiri Aptı Alaudinova general-leytenant rütbəsi verilib. Rusiya Federasiyası müdafiə nazirinin digər müavini Pavel Fradkov isə general-mayor rütbəsinə layiq görülüb.
9-12-2024, 20:16
Bu ölkə suriyalı qaçqınlara sığınacaq verməyəcək
Belçika hökuməti suriyalılara sığınacaq verilməsi prosedurlarını dayandırıb.
Bu barədə Belçikanın "Belqa" agentliyi məlumat yayıb.
Məlumata örə, Belçikanın Qaçqınlar və Vətəndaşlığı olmayan Şəxslər üzrə Baş Komissarlığı “Suriyadan olan insanlara qaçqın statusu verilməsi üçün bütün prosedurları dayandırıb”.
Komissarlığın rəsmi nümayəndəsi Olivier Brasseur qeyd edib ki, Suriyadakı vəziyyət mümkün qayıdış risklərini qiymətləndirmək üçün çox qeyri-müəyyəndir.
Agentliyin məlumatına əsasən, 11 milyon əhalisi olan Belçikada son 10 ildə Suriyadan olan 35 min nəfər rəsmi qaçqın statusu alıb.
9-12-2024, 19:17
Kılıçdaroğlu və xanımı qəzaya düşdü
Türkiyənin Cümhuriyyət Xalq Partiyasının (CHP) sabiq sədri Kamal Kılıçdaroğlu və həyat yoldaşı Selvi Kılıçdaroğlu avtomobil qəzası keçirib.
Bildirilib ki, Kılıçdaroğlu qaynı Orxan Nadirin dəfnində iştirak etmək üçün Antalyaya gedərkən xidməti avtomobili ilə qəzaya düşüb.
Onların vəziyyətinin normal olduğu açıqlanıb.
9-12-2024, 18:10
Suriyada yeni hökumətə kim rəhbərlik edəcək?
Dəməşqdə hakimiyyətə gələn silahlı müxalifət keçid hökumətini formalaşdırmağı suriyalı siyasətçi Məhəmməd əl-Bəşirə həvalə edəcək.
Bu barədə Qətərin “Əl-Cəzirə” telekanalı məlumat yayıb.
Bundan əvvəl Fransanın “Le Figaro” qəzeti öz mənbələrinə istinadla xəbər vermişdi ki, Suriyanın sabiq Baş naziri Riyad Hicab keçid dövründə Suriya hökumətinin rəhbəri olacaq.
Xatırladaq ki, noyabrın sonunda Suriyada hökumət əleyhinə qüvvələrin hücumu başlayıb. Dekabrın 8-nə keçən gecə onlar paytaxt Dəməşqə daxil olublar. Bəşər Əsəd prezident postunu tərk edib və Suriyadan qaçıb. Suriyanın baş naziri Məhəmməd Qazi Əl-Cəlali müxalifətlə əməkdaşlığa və hakimiyyəti sülh yolu ilə ötürməyə hazır olduğunu bəyan edib. Əsəd və ailəsi Rusiyaya sığınıb.
9-12-2024, 12:26
Suriya səfirliyində müxalifətin bayrağı qaldırıldı
Suriyanın Rusiyadakı səfirliyinin binasında müxalifətin bayrağı qaldırılıb.
Bu barədə TASS məlumat yayıb.
Qeyd edək ki, dünən Suriyanın Moskvadakı səfirliyinin binasından bayraq və diplomatik missiyanın adı yazılmış lövhə götürülüb.
Suriyanın hazırkı bayrağından fərqli olaraq müxalifətin istifadə etdiyi bayraqda qırmızı zolaq əvəzinə yaşıl zolaqdan istifadə edilib. Həmçinin bayrağın ortasında 3 ədəd qırmızı ulduz var.
9-12-2024, 11:48
“Moskva dostlarına xəyanət etmir” - Rusiyadan Əsədlə bağlı açıqlama
Rusiyanın Vyanada beynəlxalq təşkilatlar yanındakı daimi nümayəndəsi Mixail Ulyanov Suriyanın devirilən prezidenti Bəşər Əsəd və ailəsinin Moskvaya gəlişini şərh edib.
M.Ulyanov bildirib ki, Rusiya çətin vəziyyətdə olan dostlarına xəyanət etmir və bununla da ABŞ-dan fərqlənir.
“Bəşər Əsəd və ailəsi Moskvadadır, Rusiya çətin vəziyyətdə olan dostlarına xəyanət etmir”, - deyə Ulyanov öz Telegram kanalında yazıb.
Rusiya Xarici İşlər Nazirliyi bildirib ki, Suriya prezidenti Bəşər Əsəd Suriya münaqişəsinin bir sıra iştirakçıları ilə danışıqlardan sonra vəzifəsindən istefa vermək qərarına gəlib və hakimiyyətin sülh yolu ilə ötürülməsi barədə göstərişlər verərək Suriyanı tərk edib, Rusiya isə danışıqlarda iştirak etməyib.
Bəşər Əsədlə birgə onun yüksək rütbəli heyəti də ölkədə qaçıb. Müdafiə naziri Əli Mahmud Abbas, daxili işlər naziri Məhəmməd Rəhmun, xarici işlər naziri Bessam Sabbağ və hakim Bəss partiyasının bir sıra yüksək rütbəli rəhbərlərinin də Rusiyaya sığındığı barə məlumatlar yayılıb.
9-12-2024, 10:16
ABŞ Suriyaya zərbələr endirdi
ABŞ Mərkəzi Komandanlığının (CENTCOM) döyüş təyyarələri Suriyada İŞİD terror təşkilatının mövqelərinə yüksək dəqiqlikli zərbələr endirib.
Bildirilib ki, hava zərbələri nəticəsində 75-ə yaxın hədəf vurulub.
Amerikanın “The New York Times” qəzeti isə yazıb ki, Suriyada hakimiyyətə gələn silahlı müxalifət Ağ Ev administrasiyasını İŞİD-in fəaliyyətlərinə icazə verməyəcəyinə inandırıb.
9-12-2024, 10:14
Cənubi Koreya Prezidentinin ölkədən çıxışına qadağa qoyuldu
Cənubi Koreyanın korrupsiya araşdırması agentliyi ölkə prezidenti Yoon Seok-yeola səyahət qadağası barədə göstəriş verib.
Bu barədə "Yonhap" agentliyi məlumat yayıb.
Dekabrın 3-də Cənubi Koreya prezidenti Yun Seok-yeol respublikada hərbi vəziyyətin tətbiq olunduğunu elan edib. O, qərarını “Şimali Koreyayönlü qüvvələrin kökünü kəsmək və azad konstitusiya quruluşunu qorumaq” zərurəti ilə izah edib. Eyni zamanda jurnalistlər dövlət başçısının hərəkətlərini onun siyasi rəqiblərinin ona qarşı impiçment proseduru həyata keçirmək cəhdləri ilə əlaqələndiriblər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!