27-02-2026, 22:02
Qazaxıstan vətəndaşlarını İranı tərk etməyə çağırıb
İran ətrafında davam edən gərginlik səbəbindən Qazaxıstan Xarici İşlər Nazirliyi vətəndaşlarına vəziyyət sabitləşənədək bu ölkəyə səfər etməməyə çağırış edib.
Rəsmi açıqlamada hazırda İranda olan Qazaxıstan vətəndaşlarına mümkün olduqda ölkəni tərk etmək tövsiyə edildiyi qeyd edilib.
Onlara təhlükəsizlik qaydalarına ciddi əməl etmək, ayıq-sayıq olmaq, rəsmi məlumatları izləmək və yerli qurumların göstərişlərinə riayət etmək məsləhət görülüb.
Nazirlik həmçinin Yaxın Şərq ölkələrinə səfər planlaşdıran şəxslərə bölgədə vəziyyətin qəfil kəskinləşə biləcəyini nəzərə almağı tövsiyə edib.
Bildirilib ki, Qazaxıstanın İrandakı diplomatik nümayəndəlikləri fəaliyyətini normal rejimdə davam etdirir.
27-02-2026, 21:03
Pakistanla Əfqanıstan niyə döyüşür?
Pakistan və Əfqanıstan arasında münasibətlər son günlər kəskin şəkildə gərginləşib. Rəsmi İslamabad və Kabilin açıqlamasına görə, Pakistan ötən gecə Əfqanıstan ərazisində hava zərbələri endirib, Talibanın hərbi postları və sursat anbarları hədəfə alınıb.
Bu addımın Əfqanıstan tərəfinin Pakistan sərhəd qüvvələrinə hücumundan sonra atıldığı bildirilib. Pakistanın müdafiə naziri vəziyyəti “açıq müharibə” adlandırıb.
Pakistan uzun illər Talibanı dəstəkləsə də, 2021-ci ildə onların hakimiyyətə qayıdışından sonra münasibətlər gözlənildiyi kimi inkişaf etməyib. İslamabad iddia edir ki, “Təhrik-e-Taliban Pakistan” (TTP) qruplaşmasının rəhbərliyi və döyüşçüləri Əfqanıstan ərazisində sığınacaq tapır və Pakistana qarşı hücumlar həyata keçirirlər. Kabil isə bu ittihamları rədd edir və əksinə, Pakistanı İŞİD döyüşçülərinə sığınacaq verməkdə suçlayır.
Son aylarda sərhəddə toqquşmalar və keçid məntəqələrinin bağlanması ticarətə və hərəkətə ciddi təsir göstərib. Pakistan tərəfi 2024-cü ilin sonundan bəri ölkədə baş verən bir sıra terror aktlarının Əfqanıstanla əlaqəli olduğunu bildirir. Bajaur bölgəsində 11 təhlükəsizlik əməkdaşının və iki mülki şəxsin ölümü ilə nəticələnən son hücuma görə məsuliyyəti TTP üzərinə götürüb.
Analitiklər hesab edir ki, Pakistan hərbi əməliyyatları genişləndirə bilər. Talibanın canlı qüvvəsi təxminən 172 min nəfər olsa da, Pakistan ordusunun 600 mindən çox aktiv şəxsi heyəti və güclü hava qüvvələri var. Pakistan nüvə silahına malikdir.
27-02-2026, 20:50
Taliban qaydaları qadınları təhlükəyə atır – XƏBƏRDARLIQ
Talibanın tətbiq etdiyi qaydalar Əfqanıstanda qadınların və uşaqların həyatını təhlükə altına qoyur.
Bu barədə Əfqanıstan üzrə BMT-nin Xüsusi Məruzəçisi Riçard Bennet məlumat verib.
Onun sözlərinə görə, qadınlar xəstəxanaya müraciət edərkən kişi qəyyumun müşayiəti, geyim qaydalarına riayət və kişi həkim tərəfindən müayinə kimi tələblərlə üzləşir. Bəzi hallarda qadınlara kişi müşayiəti olmadığı üçün təcili yardım xidməti göstərilmir.
Bennetin BMT İnsan Hüquqları Şurasına təqdim etdiyi hesabatda bir qadının tək olduğu üçün xəstəxana qapısında doğuş etdiyi, başqa bir qadının isə övladını xəstəxanaya apara bilmədiyi üçün itirdiyi qeyd olunub.
Ekspert bildirib ki, qadınların tibbi təhsilinə qoyulan qadağa gələcəkdə qadın həkimlərin sayını azaldacaq və bu, səhiyyə sistemini daha da zəiflədəcək.
Əfqanıstanın sabiq səhiyyə naziri Suraya Dalil isə doğuş zamanı ana və uşaq ölümlərinin arta biləcəyi ilə bağlı narahatlığını ifadə edib.
27-02-2026, 19:30
İstanbulda terror hazırlığı edən dörd nəfər saxlanılıb
İstanbulda terror aktı hazırlığında olan 4 nəfər saxlanılıb.
Türkiyənin Milli Kəşfiyyat Təşkilatı və Baş Polis İdarəsinin birgə əməliyyatı nəticəsində terror təşkilatı DHKP-C-nin üzvü olduğu bildirilən şəxslər 25 fevral 2026-cı ildə keçirilən eyni vaxtlı reydlərlə yaxalanaraq saxlanılıblar.
Məlumata görə, şübhəlilər İstanbulda strateji hədəflərə qarşı silahlı və partlayış xarakterli hücum planlaşdırırmış. Qurumlar terror təşkilatlarına qarşı birgə əməliyyatların davam etdirildiyini açıqlayıblar.
27-02-2026, 18:26
İranın ABŞ ərazisini vuracaq raketi var?
ABŞ Prezidenti Donald Trampın İranın tezliklə ABŞ ərazisini vura biləcək raketə sahib olacağı barədə iddiası kəşfiyyat tərəfindən təsdiq edilməyib.
Bu barədə məsələ ilə tanış üç mənbə "Reuters" agentliyinə məlumat verib.
Tramp Konqresdəki çıxışı zamanı bildirib ki, Tehran “tezliklə ABŞ-a çata biləcək raketlər üzərində işləyir” və bu arqumenti mümkün hərbi zərbələrin əsaslandırılması üçün səsləndirib. Lakin mənbələrin sözlərinə görə, 2025-ci ildə ABŞ Müdafiə Kəşfiyyat Agentliyinin (DIA) açıqlanmış qiymətləndirməsində İranın mövcud kosmik daşıyıcı texnologiyaları əsasında hərbi baxımdan effektiv qitələrarası ballistik raket hazırlamasının ən tez 2035-ci ilə qədər mümkün ola biləcəyi göstərilib.
Ağ Evin sözçüsü Anna Kelli isə Trampın narahatlığının əsaslı olduğunu bildirib. Bununla belə, adlarının açıqlanmasını istəməyən mənbələr İranın yaxın vaxtlarda ABŞ ərazisinə çata biləcək raket hazırladığına dair yeni kəşfiyyat məlumatından xəbərsiz olduqlarını deyiblər.
ABŞ Dövlət katibi Marko Rubio İranın gələcəkdə belə silahlar hazırlaya biləcəyi desə də, daha ehtiyatlı ifadələr işlədib.
İran tərəfi isə nüvə silahı əldə etmək niyyətində olmadığını bəyan edir. Xarici işlər naziri Abbas Əraqçi bildirib ki, ölkəsi 2000 kilometrdən artıq mənzilli raketlər hazırlamır və proqram müdafiə xarakterlidir.
Beynəlxalq Atom Enerjisi Agentliyi (BAEA) və ABŞ kəşfiyyatı İranın nüvə silahı proqramını 2003-cü ildə dayandırdığını bildirir. Bununla yanaşı, agentlik son illərdə İranın yüksək səviyyədə uran zənginləşdirməni davam etdirdiyini qeyd edir.
Ekspertlərin fikrincə, İran kosmik daşıyıcı raketlərə malik olsa da, nüvə başlığını atmosferə yenidən daxil olarkən qoruyacaq texnologiyanın hazırlanması üçün hələ uzun müddət tələb olunur.
27-02-2026, 18:21
Pakistan–Əfqanıstan gərginliyi: “Açıq müharibə” bəyanatı
Pakistan ötən gecə Əfqanıstanda Taliban hökumət qüvvələrinə qarşı hava zərbələri endirib. Pakistanın müdafiə naziri Xavaca Məhəmməd Asif vəziyyəti “açıq müharibə” kimi qiymətləndirib.
Zərbələr paytaxt Kabil, həmçinin Taliban rəhbərliyinin yerləşdiyi Qəndəhar və Pəktiya vilayətini hədəf alıb. Pakistan tərəfi hücumların Talibanın hərbi obyektlərinə qarşı həyata keçirildiyini bildirib.
Taliban Pakistana qarşı cavab zərbələri endirdiyini açıqlasa da, danışıqlara hazır olduqlarını bəyan edib. Sərhəd boyunca toqquşmaların davam etdiyi və tərəflərin bir-birinə ağır itkilər verdiyini iddia etdiyi vurğulanır.
Gərginlik 2 600 kilometrlik sərhəd xətti boyunca uzunmüddətli münaqişə riskini artırır. Rusiya, Çin, Türkiyə və Səudiyyə Ərəbistanının vasitəçilik səyləri göstərdiyi bildirilir.
Əfqanıstanın xarici işlər naziri Əmir Xan Muttəqi türkiyəli həmkarı Hakan Fidan ilə danışığında problemin həlli üçün qarşı tərəfin də öhdəlik götürməsinin vacib olduğunu qeyd edib. İran da vasitəçilik təklif edib.
26-02-2026, 23:53
Körpə 10-cu mərtəbədən yıxıldı, sağ qaldı
Sankt-Peterburq şəhərində yaşayış binasının 10-cu mərtəbəsindən yıxılan 18 aylıq körpə ətrafdakı şəxslərin cəld reaksiyası sayəsində xilas edilib.
Hadisə zamanı pəncərəyə çıxan körpənin yıxılmaq üzrə olduğunu görən sakinlər binanın qarşısına toplaşıb. Onlardan biri montunu açaraq körpənin yerə sərt çırpılmasının qarşısını alıb. Körpə xəstəxanaya yerləşdirilib və nəzarət altındadır.
İlkin məlumata görə, hadisə baş verən vaxt ana hamamda olub, evdəki digər uşaq isə kompüterdə oyun oynayırmış. Faktla bağlı araşdırma başlanıb.
26-02-2026, 23:50
Epşteynin şəbəkəsinin İngiltərə bağlantıları
ABŞ-li milyarderin qurduğu və azyaşlı qızların cəlb olunduğu fahişəlik şəbəkəsi ilə əlaqəli qadınların, onun 2019-cu ildə həbsinədək Böyük Britaniya hava limanlarından istifadə edərək müxtəlif ölkələrə səfər etdikləri müəyyənləşib.
Bu barədə The Times uçuş qeydlərinə əsasən məlumat yayıb.
Məlumata görə, Epşteynin şəxsi təyyarəsi 60-dan çox Britaniya hava limanına eniş edib. O, pedofiliya ittihamı ilə saxlanılanadək şəbəkədə yer alan qadınların Böyük Britaniya üzərindən müntəzəm reyslərlə uçuşlarını təşkil edib.
Qeyd olunan məntəqələr arasında Londranın qərbində yerləşən RAF Northolt hərbi hava bazası da var. Faktlarla bağlı altı müxtəlif polis qurumu araşdırma aparıb.
Bildirilib ki, 2019-cu ilin iyulunda bir rus qadın London–Nyu-York marşrutu üzrə uçuş həyata keçirib və onun üçün Epsteinin köməkçisi Lesli Qeff tərəfindən ləğv edilə bilən otel rezervasiyası edilib.
Epşteynin şəxsi təyyarəsinin 2015-ci ilin mayında Northolt bazasına enərək yanacaq götürdüyü, onun Londona əsasən London Luton Airport vasitəsilə daxil olduğu qeyd olunur.
26-02-2026, 23:12
İsrail “Hizbullah” mövqelərini vurdu
İsrail ordusu Livan ərazisində “Hizbullah”ın Radvan Xüsusi Təyinatlı Qüvvələrinə aid olduğu bildirilən səkkiz hərbi düşərgəni hədəf alıb.
Bu barədə İsrail ordusunun Mətbuat Xidməti açıqlama yayıb.
Məlumata görə, zərbələr Baalbek bölgəsində endirilib. Bildirilir ki, hədəfə alınan düşərgələrdə “Hizbullah”a məxsus raketlər də daxil olmaqla xeyli sayda silah-sursat saxlanılıb. İsrail tərəfi iddia edir ki, Radvan qüvvələri həmin məntəqələrdən təlim, döyüş hazırlığı və həm hərbçilərə, həm də mülki şəxslərə qarşı hücumların planlaşdırılması məqsədilə istifadə edib.
26-02-2026, 22:53
Sərhəddə əməliyyat: 22 Taliban üzvü öldürüldü - YENİLƏNİB
Pakistan–Əfqanıstan sərhədində baş verən qarşıdurmalar nəticəsində azı 22 “Taliban” üzvü zərərsizləşdirilib.
Geo News hüquq-mühafizə orqanlarındakı mənbələrə istinadən bildirib ki, Pakistan təhlükəsizlik qüvvələri sərhəddə Talibanın başladığı əməliyyata cavab olaraq “Ghazab-lil-haqq” adlı əməliyyata start verib.
Mənbələrin sözlərinə görə, əməliyyat zamanı silahlılar arasında itkilər qeydə alınıb.
22:10
Pakistan və Əfqanıstan hərbçiləri arasında sərhəddə silahlı insidentlər baş verib.
Qarşıdurmalar Əfqanıstanın Pakistanla həmsərhəd olan Nanqarhar, Nuristan, Kunar, Xost, Paktia və Paktika əyalətlərində qeydə alınıb. Atışmaların əsasən Durand xətti ətrafında davam etdiyi bildirilir.
Hadisə ilə bağlı tərəflərdən mümkün itkilər barədə hələlik rəsmi açıqlama verilməyib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!