23-01-2026, 14:57
Putin Ukrayna müharibəsini dayandırmaq istəmir
“Müharibəni davam etdiririk”.
Bu sözləri Putin Donald Trampın xüsusi nümayəndəsi Stiv Uitkoffla görüşdə deyib.
Rusiya Prezidenti Vladimir Putin qeyd edib ki, Ukrayna ilə bağlı danışmaq artıq mümkün deyil. Rusiya hərbi əməliyyatları davam etdirir.
Putinlə Uitkoffun danışıqları bir gün əvvəl Kremlin qapalı qapıları arxasında keçirilib və 3,5 saat davam edib.
Görüşdə Trampın Sülh Şurasının yaradılması təşəbbüsü, bir sıra regional məsələlər və Qrenlandiya ətrafındakı vəziyyət müzakirə olunub.
22-01-2026, 23:32
Qrenlandiya danışıqlara hazırdır
Qrenlandiyanın Baş naziri Yens-Frederik Nilsen adanın paytaxtı Nuukda keçirilən mətbuat konfransında hökumətinin ABŞ ilə danışıqlara hazır olduğunu bildirib. Bununla yanaşı, o vurğulayıb ki, Qrenlandiyanın suverenliyi “qırmızı xətt”dir.
Hökumət başçısı hazırda müzakirə olunan Qrenlandiya ilə bağlı saziş barədə ətraflı məlumata malik olmadığını da qeyd edib.
Çərşənbə günü Davosda NATO-nun baş katibi Mark Rütte ilə ABŞ Prezidenti Donald Tramp arasında görüş keçirilib. Görüşün yekunlarına görə, Ağ Evin rəhbəri Qrenlandiyanın gələcək statusu ilə bağlı saziş üzrə danışıqlar üçün çərçivə əsasının hazırlandığını, detalların isə daha sonra təqdim ediləcəyini bildirib.
22-01-2026, 21:22
Cənubi Qafqaz Rusiyadan uzaqlaşır
Rusiya iqtisadiyyatı faktiki olaraq iflas həddinə yaxınlaşıb və ölkədə inflyasiya səviyyəsi 30 faizə çatıb.
Bunu Finlandiya Prezidenti Aleksandr Stabb Davos çərçivəsində “Avropa özünü qoruya bilərmi?” mövzusunda panel müzakirəsində çıxışı zamanı bildirib.
Prezidentin sözlərinə görə, Ukraynaya qarşı başladılan müharibə Vladimir Putin üçün strateji uğursuzluqla nəticələnib.
O qeyd edib ki, Rusiya hərbi əməliyyatlar nəticəsində Ukrayna ərazisinin təxminən 20 faizinə nəzarət etsə də, bu prosesdə Rusiya Silahlı Qüvvələrinin sıralarında təxminən bir milyon nəfər ya həlak olub, ya da yaralanıb. Onun fikrincə, bu itkilər uzunmüddətli perspektivdə Rusiyanın həm hərbi, həm də sosial-iqtisadi dayanıqlığını ciddi şəkildə zəiflədir.
Finlandiya prezidenti çıxışında Rusiyanın beynəlxalq mövqelərinin də zəiflədiyini vurğulayıb. Stabb bildirib ki, “imperiya Rusiyası” öz təsir dairəsinin mühüm hissəsini itirib və Mərkəzi Asiya ölkələri ilə yanaşı, Cənubi Qafqaz dövlətləri də getdikcə Moskvadan uzaqlaşır. Onun sözlərinə görə, bu proses təkcə hərbi münaqişələrin nəticəsi deyil, eyni zamanda Rusiyanın daxili iqtisadi problemləri və beynəlxalq aləmdə etimad itkisi ilə birbaşa bağlıdır.
22-01-2026, 20:35
Rus diplomat bu ölkədən qovuldu
Almaniya hökuməti rusiyalı diplomatı casusluq ittihamı ilə “persona non grata” elan edib.
Almaniya Xarici İşlər Nazirliyi bu gün Rusiyanın Berlindəki səfirinin nazirliyə çağırıldığını və ona diplomatik nümayəndəliyin bir əməkdaşının ölkəni tərk etməli olması barədə məlumat verildiyini açıqlayıb. “Almaniyada casusluq, xüsusilə də diplomatik status pərdəsi altında casusluq Almaniya hökuməti tərəfindən qətiyyən qəbul edilmir”, - deyə nazirliyin açıqlamasında bildirilib.
Qeyd edək ki, Federal Kriminal Polis İdarəsi (BKA) tərəfindən Berlində saxlanılan və Rusiya casusu olduğu ehtimal edilən İlona V. adlı qadınla bağlı hadisə Almaniya siyasətində kəskin narazılığa səbəb olub.
“Spiegel” jurnalı “persona non grata” elan olunan şəxsin Rusiyanın Almaniyadakı səfirliyində hərbi attaşenin müavini olduğu və İlona V.-nin kuratoru kimi fəaliyyət göstərdiyini yazsa da, rəsmi qurumlar bu məlumatı hələlik təsdiqləməyiblər.
İlona V. Almaniyada pilotsuz uçuş aparatlarının sınaqları və tədarükü, eləcə də müdafiə sənayesi obyektlərinin yerləşdiyi ərazilər barədə məlumatlar toplayaraq Rusiyaya ötürməkdə ittiham olunur.
22-01-2026, 19:57
Növbəti üçtərəfli görüş bu ölkədə keçiriləcək
Ukrayna Prezidenti Volodimir Zelenski cümə günü ABŞ, Ukrayna və Rusiya arasında Birləşmiş Ərəb Əmirliklərində ikigünlük üçtərəfli görüşlərin keçiriləcəyini elan edib.
O, görüşün Amerika danışıqlar qrupunun Moskvaya səfərindən sonra baş tutacağını bildirib.
“Ruslar kompromislərə hazır olmalıdırlar, çünki təkcə Ukrayna deyil, hamı hazır olmalıdır və bu, bizim üçün vacibdir”, -deyə Zelenski Davosda çıxışı zamanı vurğulayıb.
22-01-2026, 19:44
Ərdoğan Pezeşkianla İrandakı vəziyyəti müzakirə etdi
Türkiyə Prezidenti Rəcəb Tayyib Ərdoğan İran Prezidenti Məsud Pezeşkianla telefon danışığı aparıb.
Bu barədə Türkiyə KİV məlumat yayıb.
Türkiyə və İran liderləri ikitərəfli və regional məsələləri müzakirə ediblər.
Ərdoğan Pezeşkiana İranda baş verənləri yaxından izlədiyini bildirib. O, "Türkiyənin İrana qarşı xarici müdaxilə ssenarilərinə heç vaxt müsbət yanaşmadığını" qeyd edib.
22-01-2026, 18:33
İranda etirazçılar qana boğuldular - Zelenski
Dünya İran xalqına lazımi köməyi göstərmədi.
Bunu Ukrayna Prezidenti Volodimir Zelesnki Davosda Dünya İqtisadi Forumunda çıxışında deyib.
“İranda etirazçılar qana boğuldular. Dünya İran xalqına kifayət qədər kömək etmədi, kənarda qaldı. Avropada Milad bayramı və Yeni il şənlikləri keçirilirdi. Avropalı siyasətçilər iş başına qayıdana və mövqe ortaya qoyana qədər ayətullah artıq minlərlə insanı öldürmüşdü. İrandakı rejim qalsa, bu dünyaya bir mesaj olacaq: çoxlu insan öldür və hakimiyyətdə qal”, - Zelenski qeyd edib.
Ukrayna lideri Avropanın hələ də İrana qarşı cavab tədbirləri görməməsindən şikayətlənib.
22-01-2026, 18:20
Acunun yaxın adamı saxlanıldı
Türkiyəli iş adamı Acun Ilıcalının rəhbəri olduğu “Acun Medya”nın baş koordinatoru Esat Yontunç saxlanılıb.
Bu haqda Türkiyə mediası məlumat yayıb. Bildirilib ki, o, bu gün xarici ölkədən qayıdarkən hava limanında saxlanılıb.
Yontunç fahişəliyə cəlbetmə və narkotik istifadəsini asanlaşdırma əməlləri üzrə ittiham olunur.
Qeyd edək ki, daha öncə narkotiklə bağlı Məhkəmə Tibbi Ekspertizası İnstitutuna saç və qan nümunələri təqdim edilən bir neçə şübhəli şəxs məhkəməyə göndərilib. Məlum olub ki, həmin şübhəlilərdən biri məhz A.Ilıcalının yaxın dostu və “Acun Medya”nın baş koordinatoru Esat Yontunçdur.
22-01-2026, 17:33
Kamçatkada güclü zəlzələ
Rusiyanın Kamçatka bölgəsində güclü zəlzələ baş verib.
Bu barədə Rusiyanın Elmlər Akademiyasının Vahid Geofizika Xidmətinin Kamçatka filialı məlumat yayıb.
6,4 bal gücündə zəlzələnin Kamçatka sahillərində qeydə alındığı bildirilir.
Bölgənin mərkəzi şəhəri sayılan Petrpavlovsk-Kamçatskda zəlzələ 4 bal gücündə hiss olunub.
Dağıntılar və zərərçəkənlər barədə məlumat yoxdur.
21-01-2026, 17:00
Ukrayna Azərbaycana təşəkkür etdi
Ukrayna Xarici İşlər Nazirliyi növbəti humanitar yardıma görə Azərbaycana təşəkkür edib.
Bu barədə Ukrayna Xarici İşlər Nazirliyinin məlumatında qeyd edilib.
Bildirilib ki, Rusiya qış aylarında mülki enerji infrastrukturunu hədəf almağa davam etdiyindən, enerji dəstəyi Ukrayna vətəndaşları üçün olduqca vacib olaraq qalır.
Rəsmi Kiyev Ukraynaya enerji infrastrukturu məsələsind yardım elan edən bütün ölkələrə, o cümlədən Azərbaycana təşəkkür edib.
"Azərbaycan Rusiya hücumlarından təsirlənən bölgələrdə elektrik təchizatının bərpasına kömək etmək üçün enerji avadanlığı - 12 aşağı gərginlikli panel, 11 generator, 5 transformator və 27 000 metr kabel göndərib”, - məlumatda deyilir.
Qeyd edilib ki, bundan əlavə, Niderland və Slovakiyadan da enerji və tibbi avadanlıqların Ukraynaya çatdırılması gözlənilir.
“Həm hərfi, həm də məcazi mənada istilik verən dəstəyə görə tərəfdaşlarımıza minnətdarıq. Bu dəstək tək olmadığımızı sübut edir”, - Ukraynanın xarici işlər naziri Andrey Sibiqa vurğulayıb.
Qeyd edək ki, yanvarın 20-də Azərbaycan Ukraynaya elektrik avadanlıqlarından ibarət növbəti humanitar yardım göndərib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!