Birləşmiş Millətlər Təşkilatının (BMT) Baş Assambleyasının prezidenti Abdulla Şahid Azərbaycanın təşkilatdakı daimi nümayəndəsi Yaşar Əliyevə təşəkkür edib.

“Səfir Yaşar Əliyev, peyvənd bərabərliyinə verdiyiniz dəstəyə görə təşəkkür edirəm”, - deyə BMT Baş Assambleyası prezidentinin “Twitter” hesabında bildirilib.

Qeyd edək ki, Azərbaycan BMT Baş Assambleyasının peyvənd bərabərliyi ilə bağlı qətnaməsini dəstəkləyib.



Bütöv.az

Bu gün saat 18 radələrində Dövlət Sərhəd Xidmətinin Sərhəd Qoşunlarının “Qubadlı” əlahiddə sərhəd diviziyasının xidməti ərazisində üç nəfər hərbi qulluqçunun öldürülməsi ilə bağlı məlumat daxil olub.

Bu barədə Bütöv.az-a Baş Prokurorluqdan məlumat verilib.

Bildirilib ki, daxil olmuş məlumat əsasında Hərbi Prokurorluğun və Dövlət Sərhəd Xidmətinin əməkdaşları tərə­findən hadisə yerinə baxış keçirilib, o cümlədən digər zəruri prosessual istintaq hərəkətləri həyata keçirilib.

İlkin araşdırmalarla müəyyən edilib ki, müddətdən artıq həqiqi hərbi xidmət hərbi qulluqçusu kiçik çavuş Əvəzli Elxan Məhəmməd oğlu naməlum səbəbdən öz xidməti silahından atəş açmaqla xidmət etdiyi sərhəd zastavasının hərbi qulluqçuları baş leytenant İsmayılov Yusif İsmayıl oğlunu, kiçik gizir Cəlilzadə Amil Fuar oğlunu və kiçik gizir İbrahimov Rəfail Natiq oğlunu qəsdən öldürmüş, daha sonra silahını ataraq hadisə yerindən qaçıb.

Hazırda E.Əvəzlinin axtarışı üzrə tədbirlər davam etdirilir.

Faktla bağlı Qubadlı Hərbi Prokurorluğunda Cinayət Məcəlləsinin müvafiq maddələri ilə cinayət işi başlanıb. İstintaqın gedişatı barədə əlavə məlumat veriləcək.

“Bütün bu işlərə nail olmaq üçün iqtisadiyyatımız uğurla inkişaf etməlidir. Həm Azərbaycanda, həm dünyada hər kəs yaxşı bilir ki, Azərbaycan təkbaşına, heç kimdən bir manat, bir dollar yardım almadan bu işləri görür”.

Bu barədə Prezident İlham Əliyev Dünya Azərbaycanlılarının Həmrəylik Günü və Yeni il münasibətilə müraciətində bildirib.

Prezident bildirib ki, azad edilmiş bütün torpaqlarda görülmüş işlər Azərbaycanın dövlət büdcəsi hesabına aparılır:

“Heç bir yardım almamışıq, heç bir kredit almamışıq, bu işləri öz gücümüz hesabına görürük. Əlbəttə, əgər iqtisadi inkişaf sürətlə getməsə, bu işləri bu sürətlə aparmaq mümkün olmayacaq. Görülmüş işlər nəticəsində demək olar ki, biz artıq postböhran dövrünə qədəm qoyduq. Azərbaycan iqtisadiyyatı bu ilin 11 ayında 5,3 faiz, qeyri-neft iqtisadiyyatı isə 6,4 faiz artıb.

Sənaye istehsalı 5,5 faiz, qeyri-neft sektorunda sənaye 20,7 faiz artıb. Valyuta ehtiyatlarımız 2,2 milyard dollar artıb. Ticarət əlaqələrimizin müsbət saldosu 9,4 milyard dollardır. Xarici dövlət borcumuz ümumi daxili məhsulumuzun cəmi 17 faizini təşkil edir və bu il ərzində həm mütləq rəqəmlərdə, həm ümumi daxili məhsula nisbətdə xarici dövlət borcu azalıb.

Yəni, bu göstəricilərlə hər bir ölkə öyünə bilər. Amma bizim üçün bu, təbiidir. Çünki Azərbaycan xalqı görür ki, uzunmüddətli, düzgün strategiyanın həyata keçirilməsi nəticəsində iqtisadi inkişaf göz önündədir. Eyni zamanda, iqtisadi sahədə aparılan islahatlar, şəffaflıq, korrupsiya və rüşvətxorluqla mübarizə öz nəticələrini verməkdədir”.



Bütöv.az

Əziz bacılar və qardaşlar, dəyərli soydaşlarım!
Vətən müharibəsindəki qələbəmizdən sonra yaşadığımız gərgin, mürəkkəb, ümid və qürurla dolu bir ili başa vururuq. İlin əvvəlindən axırına hamımız 44 günlük müharıbədəki parlaq qələbəmizin xoş ovqatı ilə yaşamışıq. Eyni zamanda, erməni vandalizmi nəticəsiində viran qoyulmuş torpaqlarmızın ağrısı, şəhidlərimizin dərdi içimizdədir. 30 il ərzində dağıdılmış yurdlarımızın bərpası yolunda atılan addımlar nə qədər çətin olsa da, bir sıra dünya dövlətləri Azərbaycanın qələbəsi faktına nə qədər qıcqanclıqla yanaşsalar da, Cənubi Qsfqazda münaqişələrin səngiməsində maraqlı olmayan qüvvələr çeşidli sorunlar yaratmağa çalışsalar da 2021-ci il də tarıxımızdə şərəfli bir il kimi qalacaq. Buna görə də yeni ili başıucalıqla, inamla, quruculuq əzmi ilə qarşılayırıq. İndi dünya azərbaycanlıları həmrəylik ideyası ətrafında həmişə olduğundan daha sıx birləşiblər və 31 Dekabr əsl milli birlik bayramına çevrilib. 2021 -ci il həm də Türk Dövlətlərinin tarixində yeni bir eranın başlanqıcı oldu, düşmənlərimiz bizi kiçiltməyə çalışdıqca biz böyüdük və böyüyəcyik!..
Yer üzündə yaşayan, səsimizi eşidən bütün həmvətənlərimizi Dünya Azərbaycanlılarının Həmrəylik bayramı və Yeni il münasibəti ilə ürəkdən təbrik edir, hamıya can sağlığı və həyatında, işlərində uğurlar arzulayıram.
Sabir Rüstəmxanlı
Millət vəkili.
Dünya Azərbaycanlıları Konqresinin eşbaşqan
31.12. 2021

Ömrün hər anı gözəldir. Bəzən insan ömrünü təbiətin fəsilləri ilə müqayisə edirlər və deyirlər ki, fəsillərin hər birinin özünəməxsus özəllikləri və gözəllikləri olduğu kimi insan ömrünün də hər anı, hər dövrü gözəldir.
Həyat kredosu milli maraqlar və ümumbəşəri dəyərlərə sədaqət ruhunda qurulan insanların mənəvi dünyasının zənginliyindən irəli gələn həyat fəlsəfəsini anlamaq, onları bir şəxsiyyət olaraq təsvir etmək elə də asan iş deyil. Lakin inkaredilməz bir həqiqət də vardır. Gərəkli, parlaq və layiqli ömür yaşayan insanlar cəmiyyətdə hər zaman yüksək dəyərləndirilirlər.
Bu gün əziz dostumuzun – 75 illik mənalı ömrünü Vətəninə, dövlətinə, xalqına həsr edən Rafiq Yəhya oğlu Əliyevin yubileyi ərəfəsində onun haqqında ürəyimizdən keçənləri yazmaq istədik. Rafiq müəllim çox mənalı və səmərəli bir həyat yolu keçmişdir. Tələbə vaxtlarından elmlərin şahı olan fəlsəfəyə meyl göstərmiş və bu istək onu sonralar bu sahənin görkəmli biliciləri sırasına gətirib çıxarmışdır. Fəlsəfə elmləri doktoru, professordur. 18 kitabın və 250-dən artıq elmi məqalənin müəllifidir. “Səmimi söhbət”, “Varlığın sirləri”, “Yoxsulluq, Diktatura, Ədalətsizlik”, “Romantizm körpəsi”, “İslamda ailə-nikah münasibətləri” və bir sıra digər kitabları cəmiyyətdə böyük maraqla qarşılanmışdır. Onun hərəsi 1200 səhifəlik 124 min söz və ifadədən ibarət “Ərəbcə-Azərbaycanca” və “Azərbaycanca-ərəbcə” lüğətləri Azərbaycan ərəbşünaslığında ilk hadisədir və çox dəyərli bir tərcümə vəsaitidir...
Bu əsərlər müəllifin klassik və çağdaş fəlsəfə elminin dərinliklərinə nüfuz edən akademik araşdırmalarının nəticələri olaraq ərsəyə gəlib. Burada qaldırılan məsələlər təkcə müəllifin irəli sürdüyü fərdi məhdud fikirlər deyil, ümumən cəmiyyətin əksər hissəsini düşündürən, maraqlandıran problemlərdir. Onun ədəbi yaradıcılığı üç dildə (azərbaycan, rus,ingilis) nəşr olunan əsərlərindəki təbii təsvirlər insanlar arasındakı səmimi pıçıltıya, söhbətə bənzəyir. Düşünən və düşündürən, həyatın axarını, fəlsəfəsini dərk etməyə kömək edən bu əsərlər sadəcə oxunmur, su kimi içilir. Onun adi söhbətlərdə istifadə etdiyi aforizmlər, müdrik kəlamlar bircə anda insan beyninə həkk olunur. Məhz bu cür yüksək zövqlü məziyyətlərinə görə onun əsərləri fəlsəfi fikir dünyasında müəllifinə özünəməxsus mövqe qazanıb. Bu da əlamətdar faktdır ki, onun kitablarının xeyli hissəsi (səkkiz ədəd) ingilis dilinə tərcümə olunub, ABŞ-ın “Trafford Publishing” (www.Trafford.com) nəşriyyat evində çap edilərək geniş internet şəbəkəsində satışa çıxarılıb və kifayət qədər auditoriya toplayıb. “Hakimiyyət, cəmiyyət və din” kitabı isə ABŞ-da 2013-cü ildə nəşr olunan kitablar müsabiqəsində ən yaxşılar sırasında yer alıb və “Qızıl möhür” medalına layiq görülüb.
Elmi fəaliyyəti ilə yanaşı, o, bir sıra məsul vəzifələrdə də çalışıb, etimad göstərilən bütün sahələrdə ləyaqətli və səmərəli fəaliyyəti ilə fərqlənib. Azərbaycan Milli Elmler Akademiyasının Şərqşünaslıq İnstitutunda beynəlxalq əlaqələr üzrə direktor müavini qismində işləyib. Son vəzifəsi Azerbaycan Milli Elmler Akademiyası Rəyasət Heyətinin qərarı ilə təsis olunmuş Qafqazda İslam Araşdırmaları mərkəzinin direktorudur. 2001-2006-cı illərdə Azərbaycan Respublikasının Dini Qurumlarla İş üzrə Dövlət Komitəsinə rəhbərlik edib. 2006-cı il iyunun 27-dən “İrşad” İslam Araşdırmalar Mərkəzinin direktorudur. “Dünyada sülh uğrunda” Professorlar Akademiyasının və Beynəlxalq Dinlərarası Dialoq Komitəsinin üzvüdür.
Bu məlumatlar Rafiq Əliyevin həyatının hamıya bəlli olan səhifələridir. Lakin biz düşünürük ki, Rafiq müəllimin onu daha çox xarakterizə edən insani keyfiyyətlərindən söhbət açmaq da oxucular üçün maraqlı olardı. Çünki Rafiq müəllimin daxili mənəvi zənginliyi, böyük mədəniyyəti, etikası, milli dəyərlərə sadiqliyi, yüksək erudisiyası, nəcib davranış tərzi hər zaman diqqəti cəlb edir. Rafiq müəllimin tanıdığı hər bir insanın, hər bir dostunun qəlbində özünəməxsus hörməti, izzəti, dəyəri və məhəbbəti vardır. Onunla hər bir söhbət, hətta adi telefon zəngi belə sənə nəsə öyrədir, səndə ancaq müsbət emosiya, müsbət enerji yaradır. Ən başlıcası isə səni ən çətin anlarda belə ruhdan düşməyə qoymur, daxilində bir ümüd çırağı yandırır və sən şüuraltı olaraq həyatın nə qədər gözəl və mənalı olduğunu bir daha dərk edir və istər-istəməz bu hissləri keçirirsən: “Hələ yaşamağa dəyər dünyada!”
Yeri gələndə o, saatlarla söhbət etməyi bacarır, amma həm söhbətlərində, həm elmi məqalələrində və kitablarında fəlsəfi düşüncələrində və bunları ifadə tərzində konkretliyi, yığcamlığı sevir, az sözlə dərin fikirlər aşılaya bilir.
Rafiq müəllim sadəcə dərin və əhatəli biliklərə malik alim deyil, həm də ziyalı sözünə, ziyalı məfhumuna yaraşıq verən bir insandır. Onun fəlsəfəsi, həyata, hadisələrə, insanlara baxışları tanıdığımız dostların, insanların hamısından fərqlidir. Hər hansı məsələ ilə bağlı müzakirələrdə zaman və məkandan anlayışlarından asılı olmayaraq əksər hallarda onun daha məntiqli fikirlərinə görə əksəriyyət onunla hesablaşır və razılaşır. Onun savadı və gözəl nitq mədəniyyəti, təmiz diksiyası insanı ahəngruba kimi özünə çəkir. Bir neçə dili, o cümlədən ərəb və rus dillərini mükəmməl bilən bu insanın heç vaxt bildikləri ilə öyündüyünü görmək və ya hiss etmək mümkün deyildir. Əksinə, onun ətrafındakılarda sıxıntı yox, rahatlıq, sərbəstlik, ürəyindəkiləri səmimiyyətlə açıb söyləmək tərzi ancaq qibtə doğurur. Hərdən düşünürsən ki, bu həssas insan görəsən Qarabağ sənətkarları kimi muğam ustası olsaydı muğamın çalarlarını, daha doğrusu fəlsəfəsini onu dinləyənlərə nə qədər incəliklə çatdırardı. Görünür, bu da onun doğulub boya-başa çatdığı gözəl Qarabağın abu-havasından doğur. Moll Pənah Vaqif demişkən: “Külli Qarabağın abu-həyatı, nərminazik bayatıdır, bayatı”.
Rafiq Əliyev Vətən, yurd sevgisinin də özünəməxsus ifadə tərzi var. Hər dəfə onun çalışdığı, hətta yaşadığı, ən azından Roma Papasının Bakıya səfər edərkən özünə iqamətgah kimi seçməsi ilə yadda qalan “İrşad” otelinin qarşısından keçərkən il boyu gül açan, onun özünün üstündə əsərək körpə uşaqlar kimi bəslədiyi Qarabağ qızılgüllərini seyr edəndə göz oxşayan bu gözəlliyə görə ona əhsən demək istəyirsən.
Neçə illərdir Rafiq müəllim Qarabağın yurd ətrini bu qızılgüllərdən alır desək, yanılmarıq. Bu güllərin payızda da, qışda da solmadığının və təzə-tər qalmağının səbəbini ondan soruşanda zarafatla deyir: yəgin mənim məhəbbətim qoymur bu gülü solub-saralmağa. Gülü, çiçəyi sevən insanların qəlbində heç vaxt kin küdurət, naqislik olmaz. Onu tanıyandan, onunla ünsiyyətdə olandan sonra bunun həqiqət olduğuna bir daha inanırsan. Rafiq Əliyevin qəlbində, ruhunda həmişə bahar həvəsi, bahar nəfəsi var. Uzun illər belə enerjili, cavan qAalmağının səbəbi də bəlkə elə bundadır.
Sözsüz ki, Rafiq müəllimin bu uzun ömürlülüyünün və sağlamlığının bir sirri də ömür-gün yoldaşı Nüşabə xanımın qayğıkeşliyi və gözəl övladlarının onlara bəxş etdikləri sevincdir.
Bu ömür, gün zirvəsində, ömrün müdriklik çağında, daha doğrusu, pilləsində onu tanıyan, sevən insanların bir istəyi, bir arzusu ola bilər, o da hamımızın sevimli dostu olan Rafiq müəllimin ömrünün daim çiçəkli olması, gözəl alim kimi bizi yeni əsərləri ilə sevindirməsi, nəzərdə tutduğu bütün işləri tamamlaması ola bilər. Buna inanırıq və bir də deyirik: Rafiq Əliyev ömrünü yaşamağa dəyər dünyada.

Ad günün və yubileyin mübarək, Rafiq müəllim!

Natiq İsayev,
İsrafil Qurbanov,
Rövşən Ağayev

Azərbaycan Dövlət Pedaqoji Universitetinin 100 illik yubileyi münasibətilə və pedaqoji kadrların hazırlığı sahəsində səmərəli elmi-pedaqoji fəaliyyətinə görə Müasir Azərbaycan dili kafedrasının dosenti, filologiya üzrə fəlsəfə doktoru Yeganə Qürbət qızı Qəhrəmanova Azərbaycan Respublikasının Təhsil nazirinin əmri ilə "Azərbaycan Respublikası Təhsil Nazirliyinin Fəxri Fərmanı" ilə təltif edilib.
"Bütöv Azərbaycan" qəzeti ilə əməkdaşlığını nəzərə alaraq, redaksiyamızın kollektivi də Yeganə xanımın uğuruna sevinir, ona pedaqoji fəaliyyətində və yaradıcılıq sahəsində uğurlar diləyir.
Hər yeni ili xoş xəbərlərlə qarşılamasını arzulayır.

Milli Məclisin iclasında deputat Siyavuş Novruzov Azərbaycandan qaçaraq Avropaya köçmüş bəzi şəxslərə çağırış edib.

Bütöv.az-ın məlumatına əsasən, deputat bildirib ki, törətdiyi əməllərə və səhvlərə görə ölkədən qaçıb Avropada yaşayanlar hamısı gəlib Prezident İlham Əliyevdən üzr istəyəcəklər, kömək diləyəcəklər.

“Tövbə qapıları hər zaman açıqdır. Onlar gəlib tövbə edə bilərlər”, - deyə Siyavuş Novruzov əlavə edib.

Millət vəkilləri deyirlər ki, Komando Briqadalarının yaradılması əhalinin təhlükəsizliyinin təmini, torpaqlarımızın etibarlı müdafiəsi üçün vacib addımdır. Bütün bunlar Azərbaycana qarşı ola biləcək hər hansı təhdidin qarşısını almağa hesablanıb.

Azərbaycan dövləti işğaldan azad olunan ərazilərdə yaşayacaq vətəndaşların qorunması, torpaqlarımızın etibarlı müdafiəsi, həmçinin sərhədlərimizin təhlükəsizliyinin təmin edilməsi istiqamətində ciddi addımlar atır. Təkcə 2021-ci il ərzində Şuşa, Laçın, Kəlbəcər, Xocavənd, Füzuli, Ağdam, Cəbrayıl, Zəngilan, Qubadlı rayonlarında Müdafiə Nazirliyinin, Dövlət Sərhəd Xidmətinin yeni hərbi hissələri açılıb. Dekabrın 24-də Müzəffər Ali Baş Komandan, Prezident İlham Əliyevin iştirakı ilə Xocavənd rayonunun Hadrut qəsəbəsində Komando Briqadasının xidmət keçəcəyi yeni hərbi hissənin açılışı olub.

Ordu quruculuğu prosesi dayanmayacaq

Öz ənənəsinə sadiq qalaraq ad gününü – 60 illik yubileyini əsgərlərlə birlikdə keçirən Prezident İlham Əliyev hərbçilər qarşısında çıxış edib. O, Hadrut döyüşlərini, bu yaşayış məntəqəsinin strateji əhəmiyyətini xüsusilə vurğulayıb. Bildirib ki, 44 günlük İkinci Qarabağ müharibəsi Ermənistan ordusunun tamamilə darmadağın edilməsinə gətirib çıxarıb. Ali Baş Komandan bir daha bəyan edib ki, əgər Ermənistan yenidən Azərbaycan üçün təhlükə mənbəyi olmağa cəhd edərsə, onun axırı İkinci Qarabağ müharibəsindəki kimi olacaq. Prezident vurğulayıb ki, xalqımıza, dövlətimizə, ərazi bütövlüyümüzə hər hansı bir təhdid yaradılmasına imkan verilməyəcək: “Hadrutda yeni hərbi hissənin açılması çox əlamətdar hadisədir. Ona görə ki, bu bölgə strateji əhəmiyyət daşıyır. Hadrutda bizim güclü silahlı birləşməmiz təhlükəsizliyimizi qoruyacaq. Digər tərəfdən Hadrut azad edilmiş keçmiş Dağlıq Qarabağ Muxtar Vilayətinə aid olmuş yerdə yerləşir. Eyni zamanda, bu hərbi hissənin ən böyük əhəmiyyəti ondan ibarətdir ki, biz müharibədən sonra ordu quruculuğu prosesini dayandırmamışıq və orduya ayrılan xərcləri azaltmamışıq, əksinə, artırmışıq. Müharibədən sonra imzalanmış yeni kontraktlar icra edilir. Yeni kontraktlar əsasında artıq Azərbaycana ordumuzun təchizatı üçün ən müasir silahlar, texnikalar gətirilir. Hərbi texnikanın alınması, hərbi xərclərin, eyni zamanda, hərbçilərin maaşlarının artırılması onu göstərir ki, müharibə başa çatsa da, ordu quruculuğu prosesi dayanmayacaq”.



Ərazi bütövlüyünün qorunması

Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev bildirib ki, Azərbaycanın daxili və xarici siyasətində ölkənin müstəqilliyinin gücləndirilməsi, ərazi bütövlüyünün qorunması, vətəndaşların təhlükəsizliyinin təmin edilməsi, sabitlik şəraitində yaşaması, rifahı prioritetdir. Deputatın sözlərinə görə, xüsusi təlim keçmiş, istənilən hərbi vəzifəni yerinə yetirməyə qadir Komando Briqadalarının yaradılması da məhz bu məqsədə xidmət edir: “Əldə olunmuş nailiyyətlərin qorunması, əhalinin təhlükəsizliyinin təmini, torpaqlarımızın etibarlı müdafiəsi üçün Komando Briqadaları yaradılır. Cənab Prezidentin vurğuladığı kimi, Ordu quruculuğunda yeni mərhələ sayılan bu briqadalar Azərbaycanın strateji əhəmiyyət kəsb edən bütün ərazilərində mövcud olacaq, yeni hərbi hissələr yaradılacaq, zəruri hərbi texnika, silah-sursatla təmin ediləcək. Bütün bunlar ölkəmizə qarşı ola biləcək hər hansı təhlükənin, təhdidin qarşısını almağa hesablanıb”.

Ermənistan reallıqla barışmalıdır

Millət vəkili söyləyib ki, Müzəffər Ali Baş Komandanın öz ad gününü Hadrutdakı Komando briqadasının açılışında qeyd etməsi həm Ermənistandakı revanşistlərə, həm də dünyaya mühüm mesajdır: “Cənab Prezident bir daha bəyan etdi ki, Azərbaycana qarşı hər hansı təhdid, təhlükə olarsa, onun qarşısı dərhal alınacaq. Ölkə başçısının Hadrutda səsləndirdiyi fikirlər Xankəndi və ətraf ərazilərdə yaşayan ermənilər üçün də ciddi mesajdır. Onlar anlamalıdırlar ki, gələcəkdə normal həyat yaşamaq istəyirlərsə, bu, yalnız Azərbaycanın tərkib hissəsində, ölkəmizin Konstitusiyasının tələblərinə riayət etməklə mümkündür. Dünya Xankəndini və ətraf əraziləri Azərbaycanın tərkib hissəsi kimi tanıyır, Ermənistanın yox. Bu reallıqla barışmalıdırlar. Sərhədlər müəyyənləşəndən, kommunikasiyalar açılandan sonra Azərbaycan öz daxilində də müəyyən addımlar atacaq. Bizim üçün ərazi bütövlüyü başlıca şərtdir”.


Bölgə separatçı-terrorçu tör-töküntülərdən təmizlənəcək

Milli Məclisə Şuşa-Ağdam-Xocalı-Xocavənd seçki dairəsindən deputat seçilən Elman Məmmədov qeyd edib ki, ilk Komando Briqadasının məhz Hadrut qəsəbəsində yaradılması mühüm əhəmiyyət kəsb edir. Millət vəkilinin fikrincə, Ermənistanda bəzi siyasətçilər, revanşist qüvvələr hələ də Hadrut xülyası ilə yaşayır, nə vaxtsa ora qayıdacaqlarına ümid edirdilər. Lakin Hadrutda Azərbaycan Ordusunun yeni tipli birləşməsinin yerləşdirilməsi ermənilərin bu ümidlərini növbəti dəfə puça çıxarıb: “Hadrut qəsəbəsi keçmiş muxtar vilayətin tərkibində ayrıca bir rayon idi, ermənilər üçün strateji və mənəvi əhəmiyyət kəsb edirdi. Ona görə də şanlı Ordumuz Hadrutu azad edəndə Ermənistan rəhbərliyi böyük sarsıntı keçirdi. Cəmiyyətin də bu sarsıntını yaşamaması üçün məğlubiyyətlərini gizlətməyə çalışdılar. Yalandan elan etdilər ki, taktiki gediş edib geri çəkiliblər və yeni hücumla Hadruta nəzarəti bərpa edəcəklər. Amma onların bu istəyi və yalanı həyata keçmədi. Vətən Müharibəsinin gedişində 10 mindən çox fərarisi olan Ermənistan ordusu darmadağın edildi. Hazırda Hadrut Xocavənd rayonunun tərkib hissəsində çox mühüm, hərbi-strateji bir qəsəbədir. Burada üçrəngli Azərbaycan bayrağı dalğalanır, Azərbaycanın Komando Briqadası keşik çəkir. Xankəndi, Xocalı, Xocavəndin digər əraziləri, keçmiş Ağdərə rayonunun yaşayış məntəqələri də yaxın gələcəkdə separatçı-terrorçu tör-töküntülərdən təmizlənəcək, o torpaqların əsl sahibləri öz dədə-baba yurdlarına geri dönəcəklər”.

Bütöv.az

"Sadiq Xan dəbdəbəli evlər tikib" deyən xarici aksentli adam kameraya baxaraq danışır: "Kam əlverişli evlər tikəcək".

Videoçarxda Kam Balayev bu il keçirilən London bələdiyyə seçkilərində təşviqat aparır. Balayev seçki kampaniyasında tələbəlik illərində Azərbaycandan Londona gəldikdən sonra şəhərə aşiq olduğunu deyib.

Ancaq Balayev arzuları olan hər hansı bir mühacirdən fərqlənir və Londonda dəbdəbəli daşınmaz əmlak mövzusu özü və köhnə qohumları üçün olduqca vacib məsələdir.

Balayevin on ilə yaxın evli qaldığı Nərminə Əsədova, vətəni Azərbaycanda ən nüfuzlu siyasətçilərdən biri, keçmiş parlament sədri Oqtay Əsədovun kiçik qızıdır.

OCCRP-nin araşdırması nəticəsində məlum olub ki, Əsədovun ailəsi London, Dubay və Moskvada dəbdəbəli daşınmaz əmlaklar satın alıblar.

Oqtay Əsədov parlamentə rəhbərlik etdiyi 14 il ərzində rəsmi olaraq 30 min dollardan az maaş alıb. Onun gəliri ailənin həyata keçirdiyi alqı -satqıları izah etməyə kifayət deyil.

Hələ Əsədovun spikerliyinin ikinci ilində bağça müdiri olan həyat yoldaşı Zemfira Əsədova Mosvkada qiyməti milyon dollarla ölçülən mənzil alıb.

Sonrakı il o Moskvanın cənubundakı böyük ticarət obyektlərinə sahib olan “Arizarum Group” adlı şirkət satın alıb.

Azərbaycanda bəzi idman federasiyaları dövlət rəsmiləri tərəfindən idarə olunur, lakin özəl fondlar hesabına maliyyələşdirilir və onlardan maliyyə barədə açıqlama tələb olunmur. 66 yaşlı keçmiş spiker Oktay Əsədov da bundan geri qalmır. O, 2004 -cü ildən bəri Azərbaycan Tennis Federasiyasına rəhbərlik edir.

Növbədə ailənin kiçik üzvləri – qızlar və kürəkənlər gəlir. Oqtay Əsədovun qızları Nərminə ilə Nigar Bakıda özəl uşaq bağçası yaradıb və Nigar dövlətə məxsus doğum evində həkim kimi çalışır.

Əsədovun qızı Nigar və kürəkəni Mehman Qocayev Dubayda, Londonda dəbdəbəli daşınmaz əmlak sahibidirlər.

Sözügedən Mehman Qocayev ötən ilədək Bakı şəhər prokurorunun iki müavinindən biri idi.

Azərbaycanda Korrupsiyaya Qarşı Mübarizə Qanunu dövlət rəsmilərinin birbaşa və ya dolayı yolla, bizneslə məşğul olmasına qadağa qoyur. Buna rəğmən Qocayev vəzifədə olduğu illərdə iki türk şirkətinin ortağı, şirkətlərdən birinin direktoru olub.

Əsədovun digər qızı Nərmin və kürəkəni Kamran Balayev Britanyanın Vircin Adalarında “NNM Investment” adlı şirkətə məxsus olub. Cütlük doldurduqları sorğularda siyasi əlaqələri olmadığını qeyd ediblər.

Əsədova boşanma zamanı Balayevdən həm şirkəti, həm də sahibi olduğu mənzili geri alıb.

Boşandıqdan sonra Londonda qalan Balayev bələdiyyə sədrliyinə namizədliyini irəli sürüb. Lakin o, siyasi karyerasında da uğursuzluğa düçar olub. (pravda.az)



Bütöv.az

Dekabrın 27-də Azərbaycan parlamenti “Telekommunikasiya haqqında” Qanuna düzəlişi qəbul edib. Düzəliş virtual məkanda lotereya və idman mərc saytlarına girişi qadağan edir. Qanuna edilən düzəlişə əsasən, internet provayderləri və rabitə operatorları telekommunikasiya xidmətləri vasitəsilə azart oyunların təşkilinin və keçirilməsinin qarşısını almalıdırlar. Buraya azart oyunların təşkili və ya bilet satışı, azart oyunlarda iştirak, o cümlədən xarici lotereya təşkilatçılarına və idman mərc oyunlarının operatorlarına ölkədə virtual mühitə çıxış daxildir.

Ölkə əhalisinin böyük əksəriyyətinin heç bir məlumatı olmadığı virtual qumar oyunlarına girişin qadağan edilməsinin ciddi səbəbləri var. Belə ki, son illər bəzi məmurlar və varlı övladlarının ciddi maraq göstərdiyi bu oyunlarda xeyli pul uduzanlar var.

İddialara görə, bu gün də bəzi tanınan vəzifə sahibləri qumar və mərc oyunlarına ciddi maraq göstərirlər. Onların külli miqdarda pul uduzduqları hakimiyyətə də bəlli olub. Eləcə də varlı övladları internet üzərindəki qumar oyunlarında xeyli pul uduzublar. Sosial şəbəkələrdə və müxtəlif internet portallarında qanunsuz mərc oyunlarının geniş təbliğatı gedir.

Bəxt çarxını fırlatmaq tələsinə internetdəki “Milyonçu olmaq istəyirsən?” “İndi qeydiyyatdan keç, varlan”, “Oyna və qazan” kimi təşviqedici reklamlar üzərindən düşmək su içmək qədər asandır. İnternetdə “1xBet”, “MotsBet”, “Vulkanbet”, “22bet”, “PinUpbet” oyunlarının reklamları yetərincədir. İstifadəçi bu platformalara pul köçürərək, mərc etməyə başlayır. Qalanı isə texniki məsələdir. Pullar xaricdəki hesablara gedir və azart həvəskarı çox vaxt da udmuş olsa belə, hesabında olan pula sahib çıxa bilmir. Təhlükəsizlik məsələləri ilə əlaqəli hesabdan pul çıxarılması bloklanır. Belə saytların internetdə geniş yayılmasının da səbəbi sadədir. Dünyanın dörd bir tərəfindən axan pullar hesabına geniş reklam kampaniyası aparılır, aylıq reklam müqabilində səhifələrə müəyyən məbləğdə pul ödənilir.

Azərbaycanda qumarxana-kazino biznesi 1998-ci ildən rəsmi şəkildə qadağan olunub. O zamandan sonra ölkədə ara-sıra kazinoların “səsi” eşidilirdi, hüquq-mühafizə orqanları əməliyyat keçirib belə oyunları təşkil edənləri ifşa edirdilər. 2011-ci ildə isə ölkədə ilk və yeganə qanuni idman mərc oyunu “ToPaz” fəaliyyətə başlayıb. “Caspian Tech” QSC-nin ticarət nişanı olan “ToPaz” portalı dövlət təminatlıdır və qanuni hesab olunur. Digər bütün mərc və onlayn platformalardakı oyunlar isə qanundankənardır. Bu gün Azərbaycanda qumar oyunlarında külli miqdarda pul itirənlərin sayı kifayət qədərdir.

Bir neçə gün əvvəl Milli Məclisdə “Turizm haqqında” yeni hazırlanan qanun layihəsinin müzakirəsi zamanı parlamentin Hüquq siyasəti və dövlət quruculuğu komitəsinin sədr müavini Qüdrət Həsənquliyev təklif edib ki, kazinoların Azərbaycanda açılmasına icazə verilsin. Sitat: “Rusiyada bu, müəyyən əraziləri əhatə edir. Azərbaycanda da belə edə bilərik. Məsələn, Qarabağda, Zəngəzurda kazinoların açılmasına icazə verə, bununla da turist cəlb edə bilərik. Digər tərəfdən, Nargin adasında buna icazə verə bilərik. Turist axınını cəlb etmək üçün xidmət sahəsində fəaliyyətlər təkmilləşdirilməlidir”.

Qüdrət Həsənquliyevin bu təklifini süngü ilə qarşılayanlar çoxluqdadır. Deputatın bu təklifindən 1 həftə sonra Azərbaycan parlamentində “Telekommunikasiya haqqında” Qanuna düzəliş edildi. Bəs bu düzəliş nəyi dəyişəcək?

Ümumiyyətlə, qumarxanalar ləğv edilməlidir, yoxsa müəyyən şərtlər daxilində belə oyunlara icazə verilməlidir?

Azərbaycan İnternet Formunun prezidenti Osman Gündüz bu barədə mətbuata açıqlamasında bildirib ki, qanunvericiliyə görə, ölkədə bu tip fəaliyyətlər qadağandır: “Kimlərsə onlayn mühitdə qumar, mərc, müxtəlif kazino oyunları ilə bağlı reklam yayır və təbliğat aparır. İstər onlayn, istərsə də oflayn mühitdə belə hərəkətlər qanunvericiliyə ziddir. Burada cinayət məsuliyyəti yaradan məqamlar var. Xüsusən internet azyaşlılar üçün əlçatan olduğuna görə belə oyunların reklamı daha ciddi məsuliyyət yaradır”.

Osman Gündüz qeyd edib ki, bu məsələ Azərbaycanda bir sıra aidiyyəti qurumlar tərəfindən nəzarətə götürülməlidir: “Azərbaycan Reklamçılar İttifaqı, Daxili İşlər Nazirliyi, Rəqəmsal İnkişaf və Nəqliyyat Nazirliyi, Dövlət Təhlükəsizliyi Xidməti, eləcə də Ailə, Qadın və Uşaq Problemləri üzrə Dövlət Komitəsi monitorinqlər aparmalıdırlar. Xüsusilə Rəqəmsal İnkişaf və Nəqliyyat Nazirliyi monitorinq aparıb nəticəni bəlli qurumlara təqdim etməlidir ki, Azərbaycan qanunvericiliyi ilə belə fəaliyyətlərin qarşısı alınsın. Bu fəaliyyət gizli deyil və aşkar formada aparılır. Hesab edirəm ki, aidiyyəti orqanlar bu cür onlayn oyunların, eləcə də reklamların fərqindədirlər”.

DİA.AZ-ın məlumatına görə, “Bakı” Hüquq Şirkətinin rəhbəri Natiq Ələsgərov “Yeni Müsavat”a deyib ki, Prezidentin 25 oktyabr 2016-cı il tarixli, 1086 saylı fərmanının icrası ilə bağlı mütəmadi olaraq monitorinqlər aparılır: “Bildiyim qədər bu monitorinqləri Daxili İşlər Nazirliyi aparır və Azərbaycanda akkreditasiya olunmadan idman mərc oyunlarını təşkil edən şəxslər ətrafında tədbirlər həyata keçirilir. İnternet şəbəkəsində akkreditasiya olunmadan idman mərc oyunlarını təşkil edən şəxslər müəyyən edildikdə barələrində Cinayət Məcəlləsinin Lotereyaların və idman mərc oyunlarının təşkili və ya keçirilməsi qaydalarının pozulması maddəsi ilə cinayət işi başlanır. Bu maddənin 1.2-ci bəndinə əsasən, qanunla müəyyən edilmiş qaydada akkreditasiya olunmadan idman mərc oyunlarının təşkili və ya keçirilməsi fiziki və ya hüquqi şəxslərə, yaxud dövlətə xeyli miqdarda ziyan vurduqda, habelə xeyli miqdarda gəlir əldə etməklə törədilirsə, məsuliyyətə cəlb olunmuş şəxs cinayət nəticəsində vurulmuş ziyanın (əldə edilmiş gəlirin) 3 misli miqdarında cərimə və ya 1 ildən 5 ilədək müddətə azadlıqdan məhrum etmə ilə cəzalandırılır”.

Hüquqşünas deyir ki, internet üzərindən kazino oyunları təşkil edən saytların serverləri xarici ölkələrdə yerləşir və internet üzərindən idarə olunur. Bu baxımdan həmin oyunları təşkil edənlərin cəzalandırılması çətin məsələdir: “Qanuna edilən düzəlişlərdən sonra ”Lotereyaların və idman mərc oyunlarının təşkili və ya keçirilməsi qaydalarının pozulması" maddəsində cərimələrin miqdarı kəskin şəkildə artırılıb. Qumar oyunlarının təşkilinə və keçirilməsinə görə inzibati xətanın törədilməsinə alət olmuş predmet, habelə qumar oyunlarına qoyulmuş pul vəsaitləri və ya digər əmlak, uduş fondu, həmçinin qumar oyunu nəticəsində əldə edilmiş gəlir müsadirə edilməklə fiziki şəxslər 5 min manat məbləğdə, vəzifəli şəxslər 10 min manat məbləğdə, hüquqi şəxslər 50 min manat məbləğdə cərimə ediləcək. Azərbaycan Respublikasının ərazisindən qumar oyunlarında iştirak üçün imkanın yaradılması, o cümlədən qumar oyunlarının oynanıldığı virtual mühitə çıxışın təmin edilməsinə görə fiziki şəxslər 5 min manat, vəzifəli şəxslər 10 min manat, hüquqi şəxslər 50 min manat məbləğdə cərimə ediləcək. Qumar oyunlarında iştirak üçün biletlərin (və ya biletə bərabər tutulan digər iştirak hüququnun) satışının təşkili və (ya) satışına görə fiziki şəxslər 5 min manat məbləğdə, vəzifəli şəxslər 10 min manat məbləğdə, hüquqi şəxslər 50 min manat məbləğdə cərimə ediləcək. Qumar oyunlarında iştirak üçün mərclərin qəbul edilməsi, pul vəsaitlərinin, əşyaların və qeyri-maddi əmlak nemətlərinin qəbulu, köçürülməsi, ödənilməsi, uduşların, mükafatların və ya digər gəlirin verilməsi, bunların təşkili və bunlarla əlaqədar xidmətlərin göstərilməsinə görə fiziki şəxslər 5 min manat məbləğdə, vəzifəli şəxslər 10 min manat məbləğdə, hüquqi şəxslər 50 min manat məbləğdə cərimə ediləcək. Qumar oyunlarının təşkili, keçirilməsi, iştirak üçün biletlərin (və ya biletlə bərabər tutulan digər iştirak hüququnun) satışı, qumar oyunlarında iştirakla bağlı müştərinin ödəniş tapşırıqlarının və ya bank hesabı üzrə digər əməliyyatlarının bank əməliyyatları aparan şəxslər tərəfindən icrasına (aparılmasına) görə fiziki şəxslər 5 min manat məbləğdə, vəzifəli şəxslər 10 min manat məbləğdə, hüquqi şəxslər 50 min manat məbləğdə cərimə ediləcək".

Hüquqşünas deyir ki, cərimələrin artırılması belə oyunlara marağı azaltmır: “Deputat Qüdrət Həsənquliyevin kazinoların müəyyən məkanlarda açılması təklifinə neqativ yanaşılması cəmiyyətin buna hazır olmaması ilə əlaqəlidir. Dünyada bir çox turizm sahələri olduğu kimi qumar turizmi də var. Yəni varlı insanlar var ki, dünyanın gəzməli-görməli yerlərini görmək arzusu ilə azartlı oyunlara maraqlarını bir arada həyata keçirmək istəyirlər. Qonşu Gürcüstanda bu istəklər nəzərə alınır və müəyyən şərtlər daxilində kazinolara icazə verilir. Əgər ölkədən bu istiqamətdə pul axınının qarşısını almaq istəyiriksə, bu məsələyə bir qədər fərqli yanaşma ortaya qoyulmalı idi. Cərimələr, qadağalar vəziyyətdən çıxış yolu deyil, üstəlik, müəyyən mənada ziyanlı tərəfləri də var. Məmurlar, onların övladları qumar oynamaq istəyirlərsə, niyə Gürcüstana getməli və orada uduzmalıdırlar? Bu baxımdan məsələyə bir daha baxılması zərurəti var”.

Qeyd edək ki, ölkədə bəzi mərc saytları bloklansa da, hazırda “MostBet” və “1xBet” kimi geniş istifadəçi kütləsi olan saytların girişinə heç bir məhdudiyyət yoxdur.

Bütöv.az