12-03-2026, 10:57
Prezident neftin qiymətinin sürətli artımından danışdı
Prezident İlham Əliyev XIII Qlobal Bakı Forumunun açılış mərasimindəki çıxışında dünyada neft və qazın qiymətlərindəki artıma toxunub.
Dövlətimizin başçısı bununla bağlı deyib: “Biz neft və qaza olan qiymətlərin görünməmiş dərəcədə artımını müşahidə edirik. Bu da istehlakçılara bir zərbədir. Nəinki istehlakçılara, əgər kimsə düşünürsə ki, qeyri-tarazlı bu qiymətlər yalnız neft hasil və ixrac edən ölkələrin xeyrinədir, yox, bu, belə deyil”. Prezident qeyd edib ki, biz daha tarazlaşdırılmış, proqnozlaşdırılmış neft qiymətlərinin tərəfdarıyıq.
11-03-2026, 00:54
Azərbaycanla bağlı proqnoz dəyişmədi
ABŞ Energetika Nazirliyinin Enerji İnformasiya Administrasiyası (EIA) 2026-2027-ci illər üçün Azərbaycanda neft və digər maye karbohidrogenlərin orta gündəlik hasilatı ilə bağlı proqnozunu yeniləyib.
EIA-nın aylıq hesabatına görə, 2027-ci ildə Azərbaycanda neft və digər maye karbohidrogenlərin orta gündəlik hasilatı 540 min barel olacaq (proqnoz dəyişməyib).
EIA-nın hesablamalarına görə, 2026-cı ildə Azərbaycanda orta gündəlik neft və digər maye karbohidrogen hasilatı da 540 min barel təşkil edəcək (proqnoz dəyişməyib).
Hesabata görə, 2025-ci ildə Azərbaycanda bu rəqəm gündə 570 min barel, 2024-cü ildə isə gündə 600 min barel olacaq.
9-03-2026, 13:14
Qazın qiyməti 30% bahalaşdı
Avropada qaz qiymətləri təxminən 30% artaraq 2023-cü ilin yanvar ayı səviyyəsinə çatıb.
Yaxın Şərqdəki vəziyyət təkcə neft qiymətlərində deyil, həm də qaz qiymətlərində artıma səbəb oldu. Brent markalı neftin qiyməti bir gecədə barrel üçün 119,5 dollara çatdıqdan sonra, qaz bazarı aprel fyuçers müqaviləsinin təxminən 30% artması ilə açılıb.
Niderlanddakı TTF mərkəzində təbii qaz müqaviləsinin qiyməti 29,4% artaraq MVt/saat üçün 69,5 avroya və ya 1000 kubmetr üçün 842,7 dollara çatdı. Bu səviyyədə qaz ticarəti sonuncu dəfə üç ildən çox əvvəl, 13 yanvar 2023-cü ildə baş tutmuşdu.
Daha sonra qaz qiymətlərinin hərəkəti yavaşladı. Son məlumata görə, müqavilə qiyməti əvvəlki ticarət sessiyasının bağlanışından 17,02% artaraq 1000 kubmetr üçün 758,2 dollara çatıb.
9-03-2026, 12:38
İrandakı qarşıdurmadan ən çox bu ölkə itirir
ABŞ-İsrail müharibəsi səbəbindən neft qiymətləri bir həftə ərzində 30% artıb. Analitiklər xəbərdarlıq edirlər ki, bu, son hədd deyil.
Yaxın Şərqdəki müharibə səbəbindən neft bazarındakı xaos hər gün daha da güclənir. Analitiklər İranda istehsalın tamamilə dayandırılmasını, Hörmüz boğazının blokadasının davam etdirilməsini və iki tərəf arasında qarşılıqlı hücumların miqyasının artmasını gözləyirlər. Bu, region ölkələrindən neft tədarükünün kəsilməsini uzadacaq və çox güman ki, xam neftin qiymətini 1 barel üçün 200 dollardan yuxarı qaldıracaq.
İranın hücumlarından zərər çəkən bir sıra ölkələr artıq neft hasilatını azaltmağa başlayıblar: ilk olaraq İraq, ardınca Birləşmiş Ərəb Əmirlikləri (BƏƏ) və Küveyt bu addımı atıb. Zəncirvari reaksiya isə davam edə bilər: tankerlər Hörmüz boğazına girməkdən ehtiyat edir və bu da yükləmək üçün mövcud olan boş gəmilərin sayını azaldır. Bloomberg xəbər verir ki, tanker çənləri tükəndikdən sonra regionun quru əsaslı anbarlarındakı qalan tutum daha da sürətlə dolacaq.
Böhran tez bir zamanda həll olunacağına dair heç bir əlamət göstərmir. Sülh dövründə dünya dəniz neftinin beşdə birinə qədəri Hörmüz boğazından keçir və doğaz bağlı qaldığı müddətcə xaos davam edəcək. Son günlərdə boğazda yalnız İranla əlaqəli tankerlər və iki Çin yük daşıyıcı gəmisi müşahidə olunub.
Nəzəri olaraq belə, regionun istehsalının yalnız üçdə biri boğazdan keçə bilər. Səudiyyə Ərəbistanı bundan xüsusilə istifadə etməyə can atır və bu həftə artıq böyük həcmdə nefti daha çox ixrac üçün Qırmızı dəniz sahillərinə yönəldib.
İran güzəştə getməyə hazır olmadığını göstərən tək ölkə deyil: 7 martda Donald Tramp İslam Respublikasına qarşı daha güclü bombardman kampaniyaları elan etdi. Analitiklər və neft treyderləri üçün bu, müharibənin xam neftin qiymətini Brent markalı xam neftin bir barel üçün 100 dollar psixoloji həddə çatdıracağına dair açıq bir siqnaldır.
Bəzi bazarlarda «neft 100 dollara» ssenarisi artıq gerçəkləşib. Məsələn, Əbu-Dabi Murban xam neftinin fyuçersləri 6 mart cümə günü barel üçün 103 dollara çatıb. Oman xam nefti 107 dollara yüksəlib. Şanxay Enerji Birjasında Çin xam neftinin fyuçersləri 109 dollardan bağlanıb.
Keçmiş treyder Stefano Qrassonun Bloomberg şərhində qeyd etdiyi kimi, hər bir fasilə günü bazarlara təzyiqi artırır: «Bu ssenaridə qısa müddətdə qiymətlər üçün heç bir tavan yoxdur.»
Bir tərəfdən, zərbələrdən neft infrastrukturuna təhlükə qalmaqdadır. Məhz bu həftə sonu Səudiyyə Ərəbistanı gündəlik istehsal gücü bir milyon barel olan bir yatağa yaxınlaşan İran dronlarını ələ keçirib; zərbələr Bəhreyn və Qətərə də zərbələr endirib.
Digər tərəfdən, ixracatçılar Hörmüz boğazına girməkdən ehtiyat edirlər. ABŞ ixracatçılara maliyyə müdafiəsi və təkrarsığorta vəd edir, lakin daha təsirli bir zəmanət tankerlərin hərbi gəmilərlə müşayiət olunması olardı və ideal olaraq, hərbi əməliyyatların dayandırılması arzulanır.
Donald Tramp hazırda ABŞ-da benzin qiymətlərinin kəskin artmasına baxmayaraq, inflyasiya və digər risklərlə bağlı narahatlıqları rədd edir. «Biz neft qiymətlərinin artacağını güman edirdik, bu da baş verdi; amma onlar da düşəcək və çox tez düşəcək», — deyə ABŞ prezidenti bildirib.
Dünyanın ən böyük idxalçılarından biri olan Hindistan bu həftə Rusiya neftinin alışını bərpa etmək üçün ABŞ-dan müvəqqəti icazə alıb. Vaşinqton həmçinin öz strateji neft ehtiyatından istifadə etməyi düşünürdü. Lakin bu cür addımlar hələ atılmayıb.
Neftinin 90%-dən çoxunu müharibədən zərər çəkmiş bölgədən əldə edən Yaponiyada neft emalı zavodları artıq milli ehtiyatdan xam neftin istifadəsini istəyiblər. Çin də daxil olmaqla, digər ölkələr təchizatı qorumaq və daxili qiymətləri nəzarətdə saxlamaq üçün yanacaq ixracını azaldıblar.
Cənubi Koreya 30 ildən sonra ilk dəfə neft qiymətinə məhdudiyyət qoymağı düşünür.
Çin İrandan çoxlu ucuz neft alıb. Lakin müharibə səbəbindən Venesueladan sərfəli tədarükləri itirdiyi kimi, onu da itirmək riski ilə üzləşir.
ABŞ və İsrail arasında İranla müharibə sürətlə şiddətlənir və onun gedişatını proqnozlaşdırmaq çətindir. Lakin artıq döyüşlərdən əsas uduzanlardan birini müəyyən etmək mümkündür: Çin. 2025-ci ildə Çinin neft idxalının təxminən beşdə biri İran və bu yaxınlarda Amerikanın müdaxiləsinə məruz qalan Venesueladan gəlirdi. İndi isə bu tədarüklər ən yaxşı halda şübhəlidir və bu, ilk növbədə Çinə neft ixracını artırmağa hazır olan Rusiyaya fayda verir, deyə məqalədə yazılır.
6-03-2026, 15:02
Ramiz Mehdiyevin ailə bankı ilə bağlı qərar
Azərbaycan Respublikası Mərkəzi Bankının İdarə Heyətinin 05 mart 2026-cı il tarixli Qərarı ilə, qanunvericiliyə müvafiq olaraq, Bank “BTB” ASC-nin müraciəti əsasında onun bank olmayan kredit təşkilatına (BOKT) çevrilməsi formasında yenidən təşkilinə qabaqcadan razılıq verilib.
Bu barədə Mərkəzi Bankdan bildirilib.
"Qeyd olunan razılıq əsasında, Bank “BTB” ASC tərəfindən BOKT-yə çevrilmə istiqamətində zəruri tədbirlər “Bankların yenidən təşkili haqqında Qaydalar” ilə müəyyən edilmiş prosesə uyğun olaraq Mərkəzi Bankın nəzarəti altında həyata keçiriləcəkdir.
Bu çərçivədə, Bank “BTB” ASC ilə aktivlərinin həcminə görə ölkənin ən iri bankı olan “Azərbaycan Beynəlxalq Bankı” ASC (ABB) arasında “Aktivlərin və passivlərin ötürülməsi haqqında müqavilə” imzalanıb. Bu müqaviləyə uyğun olaraq Bank “BTB” ASC-də müddətli və tələbli depozitləri olan fiziki və hüquqi şəxslərin razılığı ilə onların depozitlərinə qüvvədə olan şərtlər dəyişdirilmədən ABB-də xidmətin davam etdirilməsi, yaxud ABB tərəfindən onların depozitlərinin geri qaytarılması təmin olunacaqdır. Həmçinin, Bank “BTB” ASC-yə kredit borcu və ya digər öhdəlikləri olan müştərilərə qarşı tələb hüquqları ABB-yə ötürüləcək və ödənişlərin qəbulu ABB tərəfindən həyata keçiriləcəkdir. Sözügedən məsələlərlə bağlı müştərilərə məlumatlar ABB və Bank “BTB” ASC tərəfindən müvafiq kommunikasiya kanalları vasitəsilə çatdırılacaqdır.
Beləliklə, Bank “BTB” ASC-nin yenidən təşkili bankın kreditorları, o cümlədən əmanətçiləri üçün heç bir təhdid yaratmır.
Bank “BTB” ASC-nin ölkənin bank sisteminin aktivlərində xüsusi çəkisi cəmi 0.6%, kredit portfelində 0.9%, sektorun öhdəliklərində isə 0.6% təşkil edir", - açıqlamada deyilir.
2-03-2026, 17:12
İran Qətəri vurdu, Avropada qaz bahalaşdı
Avropa bazarında qazın qiyməti bahalaşıb.
Buna səbəb Qətərin maye qaz istehsalını dayandırmasıdır.
Nəticədə Avropa bazarında min kubmetr qazın qiyməti 500 dolları keçib.
Hazırda Niderland bazarında 1 min kubmetr maye qaz, təxminən, 515 dollardır.
27-02-2026, 18:00
Nazirlik 2,5 milyona eşitmə aparatları alacaq
Eşitmə aparatlarının satın alınması üzrə 2,5 milyon manatlıq tender elan edilib.
Azərbaycan Respublikası Əmək və Əhalinin Sosial Müdafiəsi Nazirliyi tabeliyindəki "Protez-Ortopedik İstehsalat və Reabilitasiya Mərkəzi" Publik Hüquqi Şəxsi genişmiqyaslı satınalma müsabiqəsi elan edib.
Müsabiqə çərçivəsində ölkə üzrə eşitmə qabiliyyəti məhdud olan şəxslərin reabilitasiyası üçün zəruri olan eşitmə aparatlarının satın alınması nəzərdə tutulur.
Tenderin qiyməti 2 570 630,00 azn-dir.
Qeyd edək ki, bu satınalma dövlət büdcəsi vəsaitləri hesabına həyata keçirilir.
24-02-2026, 16:54
Azərbaycanda faizsiz kredit verən banklar yaradılacaq - YENİLİK
Azərbaycanda İslam bankçılığı sistemi 2026-cı ildən maliyyə sektorunda yenidən tətbiq olunmağa başlanıb. Hazırda iki bankda – Azərbaycan Beynəlxalq Bankı və Rabitəbankda İslam bankçılığı guşəsi var. Bu istiqamətdə hüquqi və tənzimləyici bazanın formalaşdırılması üçün işlər davam edir.
Məqsəd ənənəvi banklar vasitəsilə “İslam pəncərəsi” modeli çərçivəsində şəriətə uyğun maliyyə məhsullarını təqdim etməklə bazarda tələbatı müəyyənləşdirmək və daha geniş həcmdə tətbiq üçün zəmin yaratmaqdır.
Azərbaycan Mərkəzi Bankı bildirib ki, ölkədə İslam bankçılığının tətbiqi məqsədilə Mülki Məcəlləyə, Vergi Məcəlləsinə, “Banklar haqqında”, “Bank olmayan kredit təşkilatları haqqında", “Dövlət rüsumu haqqında”, “Kredit Büroları haqqında” və “Dövlət əmlakının özəlləşdirilməsi haqqında” Azərbaycan Respublikasının Qanunlarına dəyişikliklər layihəsi hazırlanmış və aidiyyəti dövlət qurumlarına təqdim edilmişdir:
“İslam bankçılığının təşkili prosesində beynəlxalq təcrübəyə əsaslanma əsas prioritetlərdəndir. Belə ki, İslam bankçılığının həyata keçirilməsi ilə bağlı qanunvericiliyə dəyişikliklər layihəsi hazırlanarkən Türkiyə, Pakistan, Malayziya, Qazaxıstan və Qırğızıstan kimi ölkələrin təcrübəsi və beynəlxalq standartlar təhlil edilmiş və nəzərə alınmışdır. Tətbiq ediləcək İslam bankçılığı fəaliyyətinin İslam bankçılığının fundamental prinsiplərinə uyğunluğunun təmin edilməsi nəzərə alınmışdır.
Dəyişikliklər layihəsi beynəlxalq təcrübə nəzərə alınmaqla hazırlanmış və yerli qanunvericiliyə uyğunlaşdırılmışdır. Məqsəd beynəlxalq standartları yerli hüquqi mühitlə uzlaşdırılmış və dayanıqlı şəkildə tətbiq etməkdir.
Layihənin hazırlanması prosesində müvafiq ölkələrin İslam bankçılığı sahəsində tənzimləyici və nəzarət orqanları ilə təcrübə mübadiləsi və qabaqcıl praktikanın öyrənilməsi məqsədilə görüşlər keçirilmişdir. Qanunvericiliyə dəyişikliklər layihəsi isə Mərkəzi Bank tərəfindən hazırlanmışdır.
Yaxın perspektivdə İslam bankçılığının tətbiqi “İslam pəncərələri” modeli çərçivəsində nəzərdə tutulur. İslam banklarının yaradılması məsələsinə isə növbəti mərhələdə, ölkədə İslam maliyyə məhsullarının tətbiqinin praktiki nəticələri və bazarın inkişaf dinamikası nəzərə alınaraq baxıla bilər”.
23-02-2026, 17:49
Nazirlik avtomobil parkına 2,4 milyon ayırdı
Azərbaycan Ordusunun avtomobil parkına xidmət üçün 2,4 milyon manatlıq tender elan edildi
Azərbaycan Respublikası Müdafiə Nazirliyi avtomobil texnikalarına texniki xidmət göstərilməsi məqsədilə genişmiqyaslı satınalma start verib.
Tenderdə orduya məxsus avtomobil texnikalara mütəmadi servis xidmətlərinin göstərilməsini nəzərdə tutulur.
Bu satınalma prosesinin yekununda qalib tərəflə uzunmüddətli əməkdaşlığı təmin edən çərçivə sazişinin imzalanması planlaşdırılır.
Satınalma üçün 2 478 612,55 (iki milyon dörd yüz yetmiş səkkiz min altı yüz on iki manat əlli beş qəpik) azn müəyyən edilib.
20-02-2026, 20:07
Dövlət standartlarını ehtiva
edən Analitik Mərkəz
Biz bu yazıda Azərbaycan Elm və Təhsil Nazirliyi Geologiya və Geofizika İnstitutunun “Analitik cihaz və avadanlıqlardan istifadə mərkəzi”nin fəaliyyəti, iş prinsipi və başlıca vəzifələri haqqında söhbət açmaq istəyirik. Əgər desək ki, bu mərkəz xüsusi əhəmiyyətə malik, geniş spektrli, ölkəmizdə tayı-bərabəri olmayan mühüm dövlət əhəmiyyətli bir laboratoriya funksiyasını yerinə yetirir, yəqin ki, yanılmarıq. Belə sanballı, dünya standartlarına cavab verəcək bir mərkəzin varlığı ölkəmiz üçün olduqca vacib və zərurətdən doğan bir hal kimi qiymətləndirilir. Məhz bu səbəbdən də institutun direktoru akademik Akif Əlizadə bu mərkəzin yaradılması, ərsəyə gəlməsi üçün əlindən gələni əsirgəməmişdir. Nəticə göz qabağındadır. Təsadüfi deyil ki, bu mərkəzi institutun “döyünən ürəyi” adlandırırlar.
Respublikamızın görkəmli elm xadimlərindən biri, respublika dövlət mükafatı laureatı akademik A.Əlizadə mərkəzdə öz işinin incəliklərinə dərindən bələd olan savadlı və bilikli elmi kadrlardan ibarət yaradıcı bir kollektiv formalaşdırmağa nail ola bilmişdir. Mərkəzə əməkdar mühəndis Nazim Sadıqov rəhbərlik edir. Bizimlə söhbət zamanı öyrəndik ki, bu mərkəz 1977-ci ildə yaradılıb, formalaşdırılıb, ölkəmizin qabaqcıl mərkəzlərindən biri kimi tanınmaqdadır. Kollektiv bir çox şirkət və təşkilatlarla əməkdaşlıq şəraitində fəaliyyət göstərməkdədir.
Respublikamızın mineral xammal bazasının inkişafı və geoloji-xidmət işlərinin effektliyi dağ süxurlarının, filizlərin, mineralların və texnoloji işlənmə məhsullarının kimyəvi tərkibinin öyrənilməsinin keyfiyyətindən çox asılıdır. Xüsusən də son illər fiziki və fiziki-kimyəvi üsullarla yanaşı tətbiqi geokimyaya da böyük təlabat olması səbəbindən analitik laboratoriyalara olunan ekspers analiz üsullarının sayının artırılmasına böyük ehtiyac duyulmaqdadır. Fiziki və fiziki-kimyəvi analitik cihazların tətbiqi isə öz növbəsində çətin analitik işlərin avtomatlaşdırılması və mexanikləşdirilməsi üçün münbit imkanlar yaradır. Təbii ki, bütün bunlar eyni zamanda istiqamətlənmiş laboratoriya sisteminin yaranmasına, geokimyəvi parametrlərin riyazi işləmələrinin keçirilməsinə imkan verən və onların avtoımatlaşdırılmış bank hesablarının bazasında saxlanmasına perspektivlər açır.
N.Sadıqov onu da xüsusi qeyd etdi ki, analitiklər mineral-xammal barəsində kifayət qədər dəqiq məlumata sahib olmalı və geokimyəvi məsələnin həllini tam aydınlığı ilə başa düşməlidirlər. Bununla yanaşı tətbiqi geokimya sahəsində çalışan geoloqlar analitik üsullar sahəsində, laboratoriya xidmətinin tələblərindən və analiz olunan mineral maddə ilə əlaqədar digər məlumatlar barəsində lazımi professional biliyə malik olmalıdırlar.
Mərkəzin rəhbəri ilə söhbətdən o da məlum oldu ki, elmin effektliyini, rəqabətliyini artırmaq və onu real iqtisadiyyata yaxınlaşdırmaq bu günümüzün ən vacib problemlərindən biridir. Və təsadüfi deyil ki, institutda elmin istehsalatla əlaqəsinə xüsusi önəm verilməkdədir. Məhz bu səbəbdən də mineral xammalın xassələrinə, texnoloji prosesə və istehsal olunan məhsulun keyfiyyəti və surətini artırmaq məqsədilə bütün əsas analitik cihazlar və köməkçi avadanlıqlar bir mərkəzdə cəmləşdirilmişdir.
Qabaqcıl ölkələrin təcrübəsi göstərir ki, belə mərkəzin yaradılması yeni analitik cihazlardan kollektiv istifadə, iqtisadi və elmi praktiki baxımdan sərfəlidir və öz müsbət təsirini analizlərin ətraflı və operativ aparılmasında göstərir. Bu məziyyətlərdən çıxış edərək institutda yaranmış sertifikatlı analitik mərkəzdə Almaniya, Rusiya və Yaponiyadan gətirilmiş cihazlardan istifadə edərək beş bölmə yaradılmışdır. Nümunələrin qəbulu və analizə hazırlanması Herzoq kompleksində Sevil Ağayeva, Rentgenspektral S8 TİGER cihazında Bahar Babayeva, İCPMS7700e mass spekrometr cihazında Samirə Qurbanova, AAS200 atom-absorbsiya cihazında Aygün Musayeva, Rentgendifraktometr cihazında Azər Əmirov və İlahə Həmzəyeva tərəfindən həyata keçirilir.
Mərkəzdə mineral xammalların, filizlərin, metal və ərintilərin, torpağın, dib çöküntülərinin, şüşənin, sementin, təbii və süni qiymətli bəzək daşlarının, tikinti sənayesində istifadə olunan, eyni zamanda istənilən qeyri-üzvi (bərk və maye) maddələrin, kimyəvi mineraloji tərkibləri analiz edilir. Beləliklə də Mendeleyev cədvəlində dördüncü berilium elementindən 92-ci uran daxil bütün elementlər, qazlar və təsirsiz qazlardan başqa, qeyd etdiyimiz analitik üsullardan istifadə etməklə dəqiq və qısa bir zamanda təyin olunur.
Rentgenspektral və Rentgenfaza analizinə nümunə hazırlığı Almaniyadan gətirilmiş xüsusi avtomatik “HERZOQ” kompleksində aparılır. Ərzaq mallarının yarımkeçirici materiallarının, tibbi pereparatların, bioloji maddələrin, kimyəvi təmiz birləşmələrin, ətraf mühit obyektlərinin, çətin parçalanan maddələrin dib çöküntülərinin tərkibində Hg, As, Cd, Se, B, P və sairə kimi elementlərin atom absorbsiya üsulu ilə təyini zamanı nümunələr 150-200 S temperaturda müxtəlif mineral turşu qalıqlarında parçalanmalıdır. Eyni zamanda göstərilən elementlərin miqdarının itirilməsinin qarşısını almaqdan ötrü onlar xüsusi analitik avtoklavlarda qısa zamanda və itkisiz analizə hazırlanır.
Analizlərin aparılması zamanı Beynəlxalq Standartlaşma Cəmiyyətinin, Rusiya Elmi Tədqiqat Mineral Xammal Ehtiyatlar İnstitutunun analitik üsullar üzrə elmi şurasının təsdiq etdiyi metodik göstəricilər və təlimatlardan, neft və neft məhsullarında metalların, fosfor və kükürd təyini zamanı isə ASTM-lərdən və ya sifarişçinin tələb etdiyi vasitələrdən istifadə olunur. Analizlərin nəticələrinin düzgünlüyü xüsusi dövlət standartları ilə yoxlanılır. Analitik mərkəz 2025-ci ildə Azərbaycan Akkreditasiya Mərkəzi tərəfindən aparılan qiymətləndirmədən uğurla keçmiş və akkreditasiya sertifikatını almışdır. Bundan başqa qeyd olunan analitik üsullardan istifadə etməklə mərkəzdə Ekoloji problemləri də həll etmək olur. Beləliklə də mineral xammalın, torpağın kimyəvi tərkibinin öyrənilməsi və paylanma qanuna uyğunluqlarının, bitkilər, canlılar üçün və zərərli komponentlərinə, mikroelementlərin, kənd təsərrüfatının və dağ-mədən sənayesi istehsalının tullantılarının kimyəvi və faza tərkiblərinin təyini, ətraf mühitin qorunması, metalların və onların birləşmələrinin anomal toplanmasının geokimyəvi paylanması öz həllini tapır.
Mərkəz müqavilə əsasında kənar təşkilatlar üçün də müxtəlif təyinatlı laborator işləri həyata keçirməkdədir. İş adamlarının tələblərinə uyğun olaraq mərkəzdə Azərbaycan Respublikası ərazisində yerləşən hər növ qeyri-filiz yataqları haqqında hər cür ixtisaslaşmış arayış və məsləhətlərin verilməsini təmin edən xüsusiləşmiş geoloji xidmət qrupu fəaliyyət göstərməkdədir. Geologiya və Geofizika İnstitutu geologiya elminin müxtəlif sahələrində genezis problemlərinin həlli istiqamətində izotop geokimyəvi üsullardan istifadə etmək üçün Azərbaycan Elm və Təhsil Nazirliyinin dəstəyi ilə “İsoPrime 100 elementar izotop nisbətləri kütlə spektrometri, vario PURO cube Element analizatoru və SHİMADZU GS-2030qaz xromotoqrafı” avadanlıqlarını əldə etmişdir. Bu avadanlıqlardan istifadə etmək məqsədilə “İzotopgeokimyəvi tədqiqatlar” laboratoruyası da yaradılmışdır.
“Azərbaycan neftləri” adlı pilot layihənin icrası çərçivəsində 2012-2013-cü illərdə ELM FONDU tərəfindən Geologiya və Geofizika İnstitutu üçün bir sıra analitik cihazlar satın alınmışdır. Neftin geokimyası laboratoriyası Perkin Elmer GC-MS Clarus 680, ICP-MS NexION 300D, STA 6000, FTIR Spectrometer Frontier, UV/VISLambda 35, Shimadzu Nexis GC-2030 kimi müasir avadanlıqlarla təchiz olunmuşdur. Bunun sayəsində 2013-cü ildə Geologiya və Geofizika İnstitutunda yaradılmış “Neftin geokimyası” laboratoriyasında neft və neft məhsullarının müasir səviyyədə tədqiqi mümkün olmuşdur. Laboratoriyada Naftalan müalicəvi neftinin müasir geokimyəvi metodlar vasitəsilə müasir cihazlarda mikroelement, fraksiya və karbohidrogen tərkibi təyin olunmuş, həmçinin nümunələrdə biomarkerlərin təyini analizi aparılmışdır. İlk dəfə olaraq Naftalan neftinin müalicə effektində triterpan, hopan və adamantan kimi biomarkerlərin iştirakı qeydə alınmışdır. Bundan əlavə laboratoriyada dünyanın müxtəlif yerlərindən əldə olunmuş müalicəvi xüsusiyyətlərə malik olan neftlərin müasir geokimyəvi tədqiqatları aparılmışdır.
Tahir ULUQAYA (Abdulov),
şair-publisist
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!