19-04-2024, 15:50
Bakı Fransız Liseyinin bağlanma səbəbi açıqlandı
Bakı Fransız Liseyi təhsil müəssisəsinin bağlanması barədə məlumat yayıb.
Liseydən verilən məlumata görə, Azərbaycan Beynəlxalq Təhsil Mərkəzi İctimai Birliyinin (ABTM) təsisçisi olduğu Bakı Fransız Liseyi Təhsil Kompleksinin (BFL) ləğv olunması haqqında qərar qəbul edib.
"Qərarın qəbul edilməsində əsas səbəblər 10 illik fəaliyyəti ərzində BFL-in şagird sayının fəaliyyət planında nəzərdə tutulan saydan əsaslı şəkildə aşağı olması, saxlanma xərcləri ilə bağlı çətinliklər, habelə fəaliyyətin iqtisadi cəhətdən səmərəli olmamasıdır.
Belə ki, 320 şagird üçün nəzərdə tutulan məktəb, bu illər ərzində təsisçi tərəfindən təyin edilən hədəfə çatmamayıb, 200 nəfərlik baryeri (60%) keçə bilməmiş, bu isə öz növbəsində məktəbin rentabelliyinə ciddi şəkildə təsir göstərmiş və təsisçi öz büdcəsindən hər il BFL-in fəaliyyətinin davam etdirməsi üçün əlavə xərcləri qarşılamaq məcburiyyətində qalıb.
Qeyd olunanları nəzərə alaraq cari vəziyyətdə BFL-in bundan sonrakı fəaliyyətini davam etdirməsi təsisçi tərəfindən mümkünsüz hesab edilib.
BFL-də tədris ilinin 01.07.2024-cü il tarixində başa çatacağını nəzərə alaraq şagirdlər təhsil proqramının sonuna qədər təhsillərini davam etdirəcək və ləğv olunma haqqında qərar yalnız 01.07.2024-cü il tarixindən qüvvəyə minəcəkdir", - açıqlamada deyilir.
19-04-2024, 15:30
Bağlanan liseyin şagirdləri bu məktəblərə köçürüləcək - RƏSMİ
Bakı Şəhəri üzrə Təhsil İdarəsi (BŞTİ) fəaliyyəti dayandırılacaq Bakı Fransız Liseyində təhsil alan şagirdlərin valideynlərinə müraciət edib.
İdarədən verilən məlumata görə, özəl təhsil müəssisəsi olan Bakı Fransız Liseyi təsisçinin qərarı ilə fəaliyyətini dayandırır.
Bildirilib ki, ancaq cari tədris ilinin sonuna qədər liseydə tədris prosesi davam etdiriləcək:
"Valideynlərin müraciəti olduğu halda liseydə təhsil alan uşaqların dövlət təhsil müəssisələrinə köçürülməsi (//sy.edu.az/login) təmin edilə bilər. Əlavə sualı olan valideynlər BŞTİ-nin Çağrı Mərkəzinə (146-1) zəng etməklə dövlət ümumi təhsil müəssisələri (//bakimektebleri.edu.az/) haqqında məlumat ala bilərlər. Bununla yanaşı, şagirdlər digər özəl məktəblərdə də təhsillərini davam etdirə bilərlər".
19-04-2024, 15:26
G7 ölkələrindən İrəvan və Bakıya çağırış
“Böyük Yeddilik” (G7) ölkələrinin xarici işlər nazirləri Ermənistan və Azərbaycanı gücdən istifadə etməməyə və sərhədlərin toxunulmazlığı prinsiplərinə əsaslanan sülh prosesinə riayət etməyə çağırıblar.
Bu barədə G7-nin bəyanatında deyilir.
“Biz Ermənistan və Azərbaycanı gücdən istifadə etməmək, suverenliyə hörmət, sərhədlərin toxunulmazlığı və ərazi bütövlüyü prinsipləri əsasında ləyaqətli və davamlı sülh əldə etmək üçün sülh prosesinə tam sadiq qalmağa çağırırıq”, - sənədin mətnində deyilir.
G7 ölkələri münaqişənin daha da genişlənməsinin qəbuledilməz olacağını vurğulayıblar.
G7 üzvləri bütün səviyyələrdə, xüsusən də Avropa İttifaqı və ABŞ tərəfindən müəyyən edilmiş danışıqlar çərçivəsində gələcək konstruktiv təmasları təşviq etməyə hazır olduqlarını bildiriblər.
Xatırladaq ki, G7-yə Kanada, Fransa, Almaniya, İtaliya, Yaponiya, Böyük Britaniya, ABŞ liderləri, eləcə də Avropa İttifaqı daxildir.
19-04-2024, 15:08
Tovuzda qadın tanışı tərəfindən yandırıldı
Tovuzda 34 yaşlı qadın tanışı tərəfindən yandırılıb.
Hadisə rayonun Aşağı Quşçu kəndi ərazisində baş verib.
Belə ki, rayon sakini 2002-ci il təvəllüdlü Röyal Tağıyev tanışı, Şəmkir rayon sakini 1990-cı il təvəllüdlü Türkanə Məmmədovanın üzərinə benzin tökərək od vurub. Qadın yaxınlıqdakı şəxslərin köməyi ilə xəstəxanaya çatdırılıb.
DİN-in Mətbuat Xidmətinin Gəncə regional qrupunun baş inspektoru Eşqin Qasımov sorğumuza cavab olaraq bildirib ki, hadisə nəticəsində T. Məmmədovanın bədəninin 70-80 faizi 3A dərəcəli yanıq xəsarəti aldığından o, Bakı şəhərindəki ixtisaslaşdırılmış xəstəxanaya aparılıb.
Faktla bağlı Tovuz Rayon Polis Şöbəsində cinayət işi başlanılıb. Röyal Tağıyev polis əməkdaşları tərəfindən şübhəli şəxs qismində saxlanılıb.
19-04-2024, 14:38
Bakı Fransız Liseyi fəaliyyətini dayandırır
Bakı Fransız Liseyi fəaliyyətini dayandırır.
Məlumat təhsil müəsissəsindən təsdiq edilib.
Liseyin bağlanmasının kommersiya problemləri ilə əlaqəli olduğu bildirilir.
Yeni tədris ilindən məktəbdə təhsil alan şagirdlərin digər təhsil müəssisələrinə yerləşdiriləcəyi qeyd olunur.
19-04-2024, 13:25
Uşaqlara peyvənd vurulacaq - Nazir əmr imzaladı
Azərbaycanın səhiyyə naziri Teymur Musayev 2024-cü il 21–27 aprel tarixlərində respublikanın bütün şəhər və rayonlarında “İmmunlaşdırma həftəsi”nin keçirilməsi ilə bağlı əmr imzalayıb.
Əmr Ümumdünya Səhiyyə Təşkilatının təşəbbüsü ilə 2006-cı ildən etibarən Avropa regionunda keçirilən “İmmunlaşdırma həftəsi”nin ölkəmizdə də yüksək səviyyədə təşkili məqsədini daşıyır.
Sənədə əsasən, Azərbaycanın bütün şəhər və rayonlarında “İmmunlaşdırma həftəsi”nin keçirilməsi təşkilatı-hüquqi formasından asılı olmayaraq, respublikanın bütün tibb idarə və müəssisələrinin rəhbərlərinə tapşırılıb.
Respublikanın bütün şəhər və rayonlarında hər hansı səbəbə görə vaksinasiyadan kənarda qalan uşaqların “İmmunlaşdırma həftəsi” ərzində peyvəndlərə cəlb edilməsi, peyvəndlərlə əhatə səviyyəsi xüsusilə aşağı olan regionlarda monitorinqlərin keçirilməsi sənəddə öz əksini tapıb.
Eyni zamanda, uşaqların vaksinasiyasını həyata keçirən tibb müəssisələrinə immunlaşdırma tədbirlərinin təşkilində metodiki köməkliyin göstərilməsi, əhalinin bu barədə maarifləndirilməsi kimi məsələlərin təşkili də nəzərdə tutulub.
19-04-2024, 12:51
Qanunsuz taksilər kütləvi şəkildə cərimə meydançasına aparılır? - RƏSMİ
Bakıda qanunsuz fəaliyyət göstərən taksilərin kütləvi şəkildə cərimə meydançasına aparılması ilə bağlı iddialar yayılıb.
Sosial şəbəkələrdə yayılan görüntülərdə taksi avtomobillərinin kütləvi şəkoldə yol polisi tərəfindən cərimə meydançasına aparılması ilə bağlı video paylaşılıb.
Videoda üzərində reklam olan avtomobillərin müvafiq sənədinin olmadığı üçün Yasamal rayonu Salamzadə küçəsində yerləşən DYP-nin duracağına yerləşdirildiyi deyilir.
Mövzu ilə bağlı Bakı Şəhər DYP İdarəsi də məlumat yayıb. Qurumda saytımıza verilən açıqlamada deyilir ki, sözügedən videonu çəkən şəxsin avtomobilinin üzərində ötən ilə aid ödənilməmiş cərimə borcları olduğu üçün mühafizə olunan duracağa yerləşdirilib.
“Bununla yanaşı, inzibati icraat zamanı sürücü müvafiq icra hakimiyyəti orqanının razılığı olmadan nəqliyyat vasitəsində reklamın yayılması və qeyri-qanuni sərnişindaşıma fəaliyyəti ilə məşğul olduğu üçün də inzibati məsuliyyətə cəlb edilib”, - qurumdan bildirilib.
19-04-2024, 12:32
Sabahın hava proqnozu
Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Mülayim şimal-qərb küləyi əsəcək.
Bununla bağlı Milli Hidrometeorologiya Xidmətindən məlumat verilib.
Havanın temperaturu gecə 13-18° isti, gündüz 24-29° isti olacaq. Atmosfer təzyiqi normadan aşağı 758 mm civə sütunu olacaq. Nisbi rütubət gecə 65-70 %, gündüz 40-45 % olacaq.
Azərbaycanın rayonlarında havanın əsasən yağmursuz keçəcəyi, lakin gündüz bəzi dağlıq və dağətəyi ərazilərdə qısamüddətli yağıntılı olacağı gözlənilir. Ayrı-ayrı yerlərdə intensivləşəcəyi, şimşək çaxacağı, dolu düşəcəyi ehtimalı var. Gecə və səhər arabir duman olacaq. Mülayim şərq küləyi əsəcək.
Havanın temperaturu gecə 12-17° isti, gündüz 25-30° isti, dağlarda gecə 5-10° isti, gündüz 15-20° isti olacaq.
18-04-2024, 23:36
İsmayıllıda torpaq qatı uçdu - Evlər təhlükə altındadır - VİDEO
İsmayıllının Kürdmaşı kəndində kanalın ətrafındakı torpaq qatı uçub. Nəticədə evlər üçün təhlüklə yaranıb.
Ərazidəki təsərrüfat təyinatlı gölün suyu artdığı zaman kanal vasitəsi ilə boşaldılır.
Kəndin ortasından keçən kanalda suyun axını zamanı kənardakı torpaq qatı yuyulur. Bu da ətrafdakı evlərə təhlükə yaradıb.
Sakinlərin sözlərinə görə, belə vəziyyət bir neçə ildir ki, baş versə də, son 10 gündə torpaq axını sürətlənib.
Problem daha çox kəndin aşağı hissədə yaşanır.
Məsələ ilə əlaqədar aidiyyəti qurumlar məlumatlandırılıb.
Hazırda kanala buraxılan su məhdudlaşdırılıb. Torpaq uçqununun qarşısını almaq üçün tədbirlər görülür.
Mövzu ilə bağlı daha ətraflı videomaterialda:
18-04-2024, 22:23
ABŞ səfiri Ağdamın işğaldan azad edilmiş ərazilərinə səfər etdi - FOTO
Aprelin 18-də ABŞ-ın Azərbaycandakı səfiri Mark Libbi və səfirliyin nümayəndələri Ağdamın işğaldan azad edilmiş ərazilərində səfərdə olub, rayonda fəaliyyət göstərən minaaxtaranları ziyarət ediblər.
Səfər zamanı səfir Mark Libbi ABŞ Dövlət Departamenti tərəfindən maliyyələşdirilən ANAMA, Minalar üzrə Məsləhət Qrupu (MAG) və Beynəlxalq Avrasiya Mətbuat Fondu (BAMF) ilə birgə tərəfdaşlıqla həyata keçirilən “Məcburi köçkünlərin müharibədən zərər çəkmiş bölgələrə təhlükəsiz qayıdışına dəstək məqsədilə Azərbaycanın humanitar mina aksiyaları tədbirlərinə dəstək” layihəsinin heyəti, onların fəaliyyətləri və iş prosesləri ilə yaxından tanış olub. M. Libbi çıxışında mina qurbanlarının yaxınlarına, ailə üzvlərinə başsağlığı verib, mina hadisəsi zamanı xəsarət alanlara ilşəfa arzulayıb.
ABŞ səfiri Azərbaycanda qadın və kişilərdən ibarət ilk qarışıq minatəmizləmə qrupları ilə görüşü zamanı onların gördüyü işlərin əhəmiyyətindən danışıb. O deyib: “Çox sevinirəm ki, belə bir vacib işdə Azərbaycan qadınları da iştirak edirlər. Azərbaycanda mina ilə çirklənmiş ərazilərin tez bir zamanda təmizlənməsini arzu edirəm. ABŞ hökuməti də dünyada minaların təmizlənməsi prosesində yaxından iştirak edir. Dövlətimiz bu məqsədlər üçün böyük vəsait xərcləyib. 1999-cu ildən bəri ABŞ Azərbaycana minalarla mübarizə humanitar proqramlarını dəstəkləmək üçün təxminən 38 milyon dollar ayırıb. Bundan sonra da Azərbaycanda mina təmizlənməsi işində ABŞ dövləti niyyətinə sadiq qalacaq və Qarabağın işğaldan azad edilmiş ərazilərindin minalatdan təmizlənməsi işinə yaxından dəstək olacaq".
Sonra Azərbaycan Respublikası Minatəmizləmə Agentliyinin (ANAMA) İdarə Heyəti sədrinin müavini Samir Poladov ölkəmizin mina problemindən, minaların insanlara və təbiətə mənfi təsirindən danışıb. O, ölkənin ən vacib məsələlərindən olan mina probleminin həlli istiqamətində ANAMA-ın gördüyü işləri, qurumun QHT-lərin və beynəlxalq təşkilatların fəaliyyətinə dəstəyini və uğurlu nəticələri qonaqların diqqətinə çatdırıb. O, həmçinin BAMF-ın mina aksiyası çərçivəsində indiyədək həyata keçirdiyi önəmli layihələri, təhlükəsiz və sağlam mühitin yaradılmasına töhfəsini və QHT kimi xüsusi rolunu vurğulayıb.
BAMF-ın prezidenti Umud Mirzəyev çıxışında ABŞ səfirinə və dövlətinə Azərbaycanda mina aksiyasına verdikləri dəstəyə görə təşəkkürünü bildirib.
“Azərbaycan bu gün çox ciddi bir problemlə üz-üzədir. Qarabağ başdan-başa minalarla çirkləndirilib, Azərbaycan xalqı hər an mina və partlayıcı sursatların təhlükəsi ilə yaşayır”, - deyə o əlavə edib.
Umud Mirzəyev, eyni zamanda, BAMF-ın tarixi, təşkilatın çoxillik fəaliyyəti və ABŞ dövlətinin dəstəyi ilə fondun həyata keçirdiyi layihələr haqqında məlumat verib.
Minalar üzra Məsləhət Qrupunun (MAG) ölkə direktoru Cenet Dikstra MAG, BAMF və APOPO əməkdaşlığından, təşkilatın fəaliyyətindən söz açıb.
Sonra səfir Mark Libbinin, ANAMA-nın İdarə heyəti sədrinin müavini Samir Poladovun, BAMF prezidenti Umud Mirzəyevin, MAG-ın ölkə direktoru Cenet Dikstra və Texniki Sahə Meneceri Bobbi be Dirin iştirakı ilə qadın minaaxtaranlara sertifikatları təqdim olunub.
Qonaqlara minaaxtaran itlərlə və siçovullarla apardığı mina təmizləmə fəaliyyəti ilə seçilən APOPO təşkilatının fəaliyyəti haqqında da məlumat verilib. Səfir heyvanların minatəmizləmə fəaliyyətini izləyib və onların nəticələri ilə tanış olub.
Sonda ABŞ səfiri bu cür səfərlərin davamlı olacağını qeyd edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!