29-08-2024, 16:26
Seçkilərin nəticələrinin açıqlanacağı vaxt məlum oldu
Növbədənkənar parlament seçkilərinin nəticələrinin nə zaman açıqlanacağına aydınlıq gətirilib.
Bu barədə Mərkəzi Seçki Komissiyasının (MSK) sədri Məzahir Pənahov qurumun bu gün keçirilən iclasında deyib.
“Sentyabrın 1-i səsvermə günü ilkin nəticələr operativ çatdırılacaq. Bu seçkilərdə də çalışacağıq ilkin nəticələri həmin gecə çatdıraq. İki gün ərzində isə dairələrdən protokollar bizə veriləcək. O zaman tam aydın olacaq”.
29-08-2024, 16:19
İlk dəfə səs verəcək seçicilər üçün yenilik
Sentyabrın 1-də ilk dəfə səs verəcək seçicilər üçün xüsusi seçici kartları hazırlanıb.
Bunu Mərkəzi Seçki Komissiyasının bu gün keçirilən iclasında MSK sədrinin müavini Rövzət Qasımov bildirib.
“Növbədənkənar parlament seçkiləri ilə əlaqədar ilk dəfə səs verəcək 374 seçici var. Həmin günü doğum günlərini qeyd edəcəklər. Onlara da xüsusi doğum günü kartları veriləcək",- deyə o bildirib.
29-08-2024, 16:15
Xankəndinin su təsərrüfatı mexanizmi belə qurulub - VİDEO
Regional Su Meliorasiya Xidmətinin Qarabağ Regional Sukanal İdarəsi peşəkar içşi heyəti ilə bütün Qarabağ üzrə su və kanalizasiya xidmətinin təşkili və idarəolunmasının təminatçısıdır. Azərbaycan Dövlət Su Ehtiyatları Agentliyi Qarabağa qayıdış istiqamətində yerli sakinlərin işlə təmin olunmasına da töhfə verib. İdarənin əməkdaşları yerli sakinlər arasından müsabiqə yolu ilə seçilib.
Azərbaycan Dövlət Su Ehtiyatları Agentliyinin mətbuat xidmətindən verilən məlumata görə, Xankəndi şəhəri işğaldan azad olunandan sonra düşmənin viran qoyduğu sukanal sahələrində bərpa işləri aparılıb.
Xankəndidə 2 Sutəmizləyici Qurğular Kompleksi fəaliyyətdədir. 1 Nömrəli Kompleksin içməli su mənbəyini Xəlfəli çayı, 2 Nömrəli Kompleksin su təchizatını Cəmilli və Ballıca kəndlərindən keçən çaylar təşkil edir. Şəhərdə 10 ədəd subartezian quyusu mövcuddur.
Su təmizləyici qurğular vasitəsilə suyun təmizlənərək şəhər şəbəkəsinə nəqli həyatə keçirilir.
Şəhər ərazisində su təsərrüfatı sahəsində təmir-bərpa işlərini sukanal sahəsinin peşəkar mühəndisləri və ustaları icra edirlər.
Xankəndi əhalisinin su təminatı sakinlərin rifahının yaxşılaşdırılmasına göstərilən yüksək xidmətin əsas tərkib hissəsidir.
29-08-2024, 16:07
MSK Ağ Partiyanın nümayəndələrini qeydə aldı
2024-cü il sentyabrın 1-nə təyin edilmiş Milli Məclisə növbədənkənar seçkilərdə Ağ Partiyanın səlahiyyətli nümayəndələri qeydə alınıb.
Bu barədə Mərkəzi Seçki Komissiyasının (MSK) bu gün keçirilən iclasında məsələ müzakirə olunub.
MSK katibi Arifə Muxtarova bildirib ki, Ağ Partiyanın 13 nəfər səlahiyyətli nümayəndəsi qeydə alınmaq üçün müraciət edib.
29-08-2024, 15:54
Zəngəzur dəhlizi uğrunda mübarizə qızışır
Rusiya prezidenti Vladimir Putinin Azərbaycana səfərindən sonra kommunikasiyaların açılması ilə bağlı bu ölkənin rəsmi şəxsləri tərəfindən bir neçə çıxışlar olub. Elə Putin Bakıda olarkən Rusiya xarici işlər naziri Sergey Lavrov Ermənistanı kommunikasiyaların açılması məsələsini sabotaj etməkdə ittiham edib. Ötən gün isə Zəngəzur dəhlizi məsələsi ilə bağlı Rusiya Xarici İşlər Nazirliyinin sözçüsü Mariya Zaxarova çıxış edib.
“Azərbaycanın əsas ərazisini Ermənistan ərazisindən keçməklə Naxçıvan muxtariyyəti ilə birləşdirə biləcək marşrut kommunikasiyalarının bloklanması üzrə məsələ üçtərəfli işçi qrupu çərçivəsində digər marşrutlarla yanaşı müzakirə edilir”, - o deyib.
Məsələ ilə bağlı danışan VI çağırış Milli Məclisin deputatı Elşad Mirbəşiroğlu bildirib ki, Ermənistan Baş naziri Nikol Paşinyan Zəngəzur dəhlizinin açılmasını yubatmaqla öz imzasına hörmət etmədiyini göstərir:
"Üçtərəfli bəyantın 9-cu maddəsinə əsasən, Ermənistan Azərbaycanın Qərb rayonları ilə Naxçıvan arasında sərnişinlərin, yüklərin manesiz hərəkətinə zəmanət verməlidir. Nəqliyyat dəhlizi üzərində də nəzarəti Rusiya Federal Təhlükəsiz Xidməti həyata keçirməlidir. Ermənistan Baş naziri Nikol Paşinyan bu sənədə imza atıb. Daha sonra Qərbdən gələn tapşırıqla Zəngəzur dəhlizinin açılmasının qarşısı hər vasitə və yolla Ermənistan tərəfindən alınıb. Nəzərə almaq lazımdır ki, Ermənistan tərəfi birgə bəyanatda olan müddəaların heç birini yerinə yetirməyib. İndiyə qədər birgə bəyanatın müddəaları Azərbaycanın gücü ilə həyata keçirilib. Bununla da Ermənistan rəhbəri bir daha öz imzasına etinasız yanaşdığını nümayiş etdirir. Ona görə də, ümumiyyətlə, Ermənistana etimad etmək düzgün deyil".
E.Mirbəşiroğlunun fikrincə, son günlər Ermənistanın bölmələrimizi atəşə tutması Rusiyanın kommunikasiya xətlərinin açılması məsələsini intensivləşdirməsi ilə bağlıdır:
"Belə bir vaxtda bölmələrimizi atəşə tutmaqla Ermənistan Qərbin yenə də hər vasitə ilə Zəngəzur dəhlizinin açılmasının qarşısını almağa çalışdığını göstərir. Düzdür, ABŞ Zəngəzur dəhlizinin açılmasında maraqlı olduğunu bildirib. Amma ABŞ özünün nəzarəti altında nəqliyyat kommunikasiyasının açılmasını istəyir. Bu, heç kimdə şübhə yaratmır. Başqa coğrafiyalarda da ABŞ istər enerji daşıyıcılarının ötürülməsi xətti, istərsə də nəqliyyat kommunikasiya infratrukturlarını öz nəzarətində saxlamağa çalışır. Ermənistan ərazisindən Naxçıvanla kommunikasiya yaradılacaqsa, ABŞ, eləcə də Qərb dairələri bu kommunikasiyanı öz nəzarəti altında saxlamağa çalışırlar. Çünki Ermənistan Baş naziri beynəlxalq nəzarət mexanizminin olması məsələsini irəli sürdükdə elə ABŞ-nin və ya onun Fransa ilə birgə nəzarətini nəzərdə tutub. Bu baxımdan düşünürəm ki, yenə də Ermənistan tərəfi təxribatlar törətməklə vəziyyəti gərginləşdirməyə, diqqəti nəqliyyat dəhlizinin açılmasından yayındırmağa çalışır. Lakin zamanla da olsa, regionda planlaşdırılan bütün nəqliyyat kommunikasiya dəhlizləri açılacaq".
Politoloq Elxan Şahinoğlu isə vurğulayıb ki, Kremlin yeganə yapışmaq istədiyi məsələ Zəngəzur dəhlizidir:
"Rusiya Prezidenti Vladimir Putin Bakıya səfərinin ardınca, əvvəlcə Ermənistanın baş naziri Nikol Paşinyanla, bir neçə gün sonra isə Azərbaycan Prezidenti İlham Əliyevlə telefonla danışıb. Putin anlayır ki, Ukrayna ilə müharibə fonunda və Rusiya üçün indiki ağır vəziyyətdə Cənubi Qafqazdakı maraqlarını qorumaq çətindir. Kreml Bakı ilə İrəvan arasında vasitəçi ola bilmir, sülh sazişinin mətninin hazırlanmasında və sərhəd danışıqlarında iştirak imkanlarını itirib. Kremlin yeganə yapışmaq istədiyi mövzu Zəngəzur dəhlizidir. Rusiya həm bu dəhlizdən istifadə, həm də dəhlizə nəzarət etmək istəyir və bu zaman 2020-ci il 10 noyabr üçtərəfli bəyanatına istinad edir. Bakı və İrəvan Rusiyanın dəhlizdən istifadəsinə müsbət yanaşır, ancaq dəhlizə nəzarət Azərbaycanla Ermənistanın maraqlarına ziddir və Putinin telefon zəngləri durumu dəyişə bilmir".
29-08-2024, 15:27
MİQ-də II tur başlayır - Müddətli müqavilə ilə vakansiya
Müddətli müqavilə ilə vakansiya seçiminə start verilir.
30 avqust saat 11:00-dan etibarən müddətli müqavilə ilə müəllimlərin işə qəbulu (MİQ) üzrə müsabiqənin vakansiya seçimi mərhələsinə start veriləcək.
Bu barədə Təhsil İnstitutu nəzdində İnsan Resursları Mərkəzindən bildirilib.
Vakansiya seçimi test imtahanında ümumtəhsil proqramı üzrə minimun 34 bal və tədris metodikası üzrə minimum 6 bal olmaqla, ümumi 40 bal və daha yüksək nəticə göstərən namizədlər vakant yerlərin seçiminə buraxılır.
Qeyd edək ki, müddətli müqavilə ilə vakansiya seçimi zamanı namizədlər 4 vakant yer seçə bilərlər. Namizədlər 2 sentyabr saat 11:00-dək şəxsi səhifələrinə daxil olaraq vakant yer seçməli və elektron ərizələrini təsdiq etməlidirlər.
29-08-2024, 14:50
Mirzoyan erməni diplomatları Azərbaycanla sərhədə gətirdi
Ermənistanın xarici işlər naziri Ararat Mirzoyan erməni diplomatlarına Tavuş vilayətinin Kirants kəndində Azərbaycanla yeni sərhədin necə olduğunu göstərib.
Bu barədə "Sputnik Armenia" məlumat yayıb.
Qeyd olunub ki, Ermənistanın digər ölkələrdə akkreditə olunmuş səfirləri Dilcandakı iki günlük toplantıdan sonra delimitasiyanın nəticələri ilə tanış olmaq üçün sərhədə aparılıb.
29-08-2024, 14:31
Azərbaycan xaricə daha qoyun əti satmır
2023-cü ildə Azərbaycandan xaricə qoyun və keçi ətinin ixracı qeydə alınmayıb.
Dövlət Statistika Komitəsinə xəbər verir ki, 2019-cu illə müqayisədə 2022-ci ildə qoyun və keçi ətinin ixracı 171 dəfə azalaraq 1 tona düşüb. 2023-cü ildə isə ümumiyyətdə ixrac olmayıb.
Ötən il 89 min ton qoyun və keçi əti istehsal edilib, 4,8 min ton məhsul da idxal olunub.
2023-cü ildə qoyun əti ixracı qeydə alınmasa da 605 ton ət itkiyə gedib.
29-08-2024, 13:59
"Formula 1"ə görə bu küçələr bağlanacaq
Bakıda keçiriləcək "Formula 1" üzrə Azərbaycan Qran-prisi ilə əlaqədar logistik əməliyyatların həyata keçirilməsi məqsədilə sentyabrın 7-də, gecə saat 01:00-dan etibarən Puşkin küçəsinin Üzeyir Hacıbəyov küçəsi və Neftçilər prospekti ilə kəsişməsindən olan hissəsi nəqliyyatın hərəkəti üçün məhdudlaşacaq.
Bu barədə Bakı Şəhər Halqası Əməliyyat Şirkətindən məlumat verilib.
Məhdudiyyət tədbirin sonunadək davam edəcək.
Nəqliyyatın İdarəetmə Planına əsasən, Bakı Şəhər Halqasının keçdiyi küçələr və trekin əhatə etdiyi ərazilər sentyabrın 9-da, gecə saat 01:00-dən etibarən nəqliyyatın hərəkəti üçün bağlı olacaq. Hərəkət 17 sentyabr, səhər saat 8:00-dan etibarən bərpa olunacaq.
Nəqliyyatın hərəkət məhdudiyyəti 3 zonada tətbiq ediləcək. Birinci zona yarış halqasının əhatə etdiyi İçərişəhər ərazisi, ikinci Azadlıq meydanı və onun yaxınlığında yerləşən digər küçələr, üçüncü zona isə BMT-nin 50 illiyi küçəsinini keçdiyi ərazidir. Yarışın keçirildiyi müddətdə qeyd olunan ərazilərə nəqliyyatın giriş-çıxışı üçün “Yaşayış Yerinə Giriş İcazəsi” veriləcək. Qeyd olunan sənədi paylanma məntəqələrinə yaxınlaşaraq, həftənin bazar ertəsindən, cümə gününə kimi, saat 10:00-dan 17:00-dək əldə etmək mümkündür. Bunun üçün vətəndaşlar zonalar üzrə aşağıdakı müvafiq idarələrə müraciət etməlidirlər:
Zona 1 – İçərişəhər Dövlət Tarix-Memarlıq Qoruğu İdarəsi
Böyük Qala küçəsi 41, keçmiş ensiklopediya binası, 4-cü mərtəbə
Tel: (012) 497-35-89
Zona 2 – Mənzil-Kommunal və İstismar İdarəsi № 4
Xəqani küçəsi 26/32
Tel: (012) 498 88 06
Zona 3 – Mənzil-Kommunal və İstismar İdarəsi № 58
İstiqlaliyyət küçəsi 5
Qeyd edək ki, “Yaşayış Yerinə Giriş İcazəsi”nin paylanması 29 avqust tarixindən başlayıb 13 sentyabradək davam edəcək.
Hər il olduğu kimi, bu il də yarış müddətində piyadaların hərəkətinə heç bir məhdudiyyət qoyulmayacaq.
Qeyd edək ki, Azərbaycan Qran-prisi sentyabrın 13-15-i aralığında baş tutacaq.
29-08-2024, 13:02
"Kəpəz"in baş məşqçi istefa verdi
Azərbaycan Premyer Liqasının 2024-2025-ci illər mövsümündə ilk baş məşqçi istefası reallaşıb.
"Kəpəz" klubunun çalışdırıcısı Adil Şükürov vəzifəsini tərk edib.
Gəncə təmsilçisi 47 yaşlı mütəxəssislə müqaviləyə qarşılıqlı razılıq əsasında xitam verib.
Qeyd edək ki, "Kəpəz" bu mövsüm Premyer Liqada keçirdiyi 4 oyunun hamısında uduzub və qol vura bilməyib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!