29-08-2022, 20:21
Laçın dəhlizinə alternativ yol bu tarixdə açılacaq
Laçın dəhlizinə alternativ yol avqustun 30-u axşam saat 22:00-dan nəqliyyatın hərəkətinə açıq olacaq. Bu barədə Ermənistan Təhlükəsizlik Şurası məlumat yayıb. Bildirilib ki, yolu Gorus-Xankəndi magistralı ilə birləşdirən 4,7 kilometrlik hissənin asfaltlanması işləri başa çatıb. Məlumatda vurğulanıb ki, Laçın dəhlizinə bitişik Laçın şəhəri, Zabux və Sus yaşayış məntəqələrinin sakinləri avqustun 25-dən əvvəl evlərini tərk ediblər. Bu ərazilər dəhlizin marşrutunun dəyişdirilməsi çərçivəsində Azərbaycanın nəzarətinə qaytarılıb. Avqustun 25-də Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov jurnalistlərə açıqlamasında demişdi ki, Laçın şəhərinə daxil olmadan yeni alternativ yoldan istifadə yaxın 1 həftə ərzində mümkün olacaq. Onun sözlərinə görə, Agentlik ölkə başçısının tapşırığına əsasən, verdiyi vədə vaxtından əvvəl əməl edib və alternativ yolun Azərbaycan ərazisindən keçən 22 km-lik hissəsi artıq hazırdır. Xatırladaq ki, Qarabağdakı ermənilər indiyə kimi Ermənistanla Laçın şəhərindən keçən dəhliz vasitəsilə əlaqə saxlayırdılar. Bu səbəbdən Laçın dəhlizi Rusiya sülhməramlılarının müvəqqəti nəzarətində idi. Laçın dəhlizi boyunca yerləşən Laçın şəhəri, Zabux və Sus kəndlərində ermənilər qanunsuz məskunlaşma həyata keçirmişdilər. Laçın dəhlizi 10 noyabr 2020-ci il tarixli üçtərəfli bəyanata əsasən, ötən həftədən etibarən Azərbaycan tərəfinin nəzarətinə keçib. Nəticədə Laçın şəhəri, Zabux və Sus kəndlərində məskunlaşan ermənilər həmin yerləri tərk etmək məcburiyyətində qalıblar.
29-08-2022, 20:04
Növbəti Brüssel görüşü: Rusiya Paşinyandan nəyi tələb edir…
Bu ayın sonunda Avropa İttifaqı Şurasının Prezidenti Şarl Mişelin vasitəçiliyi ilə Brüsseldə Azərbaycan və Ermənistan liderlərinin görüşü olacaq. Görüş barədə mediaya açıqlama verən Prezidentin köməkçi – Prezident Administrasiyasının Xarici siyasət məsələləri üzrə şöbəsinin müdiri Hikmət Hacıyevin sözlərinə görə, Azərbaycan tərəfi ümid edir ki, bu görüşdə sülh sazişinin mətninin hazırlanması ilə bağlı işçi qrupunun təşkili razılaşdırılacaq. Bundan əvvəl Brüsseldə keçirilən görüşdə sərhədlərin delimitasiyası ilə bağlı komissiyanın yaradılması barədə razılıq əldə olunduğunu xatırladan Prezidentin köməkçisi bildirib ki, Azərbaycan və Ermənistanın Baş nazirlərinin müavinləri bu ayın sonunda Moskvada görüşəcəklər. Ölkə rəsmiləri nəqliyyat-kommunikasiya və delimitasiya ilə bağlı məsələləri müzakirə edəcəklər. Brüssel görüşündən gözləntilər nədir? Bakı və İrəvan razılığa gələ biləcəkmi?
Bu barədə danışan politoloq Tofiq Abbasov bildirib ki, görüşün gündəliyində yer alan məsələlər olduqca aktualdır: “Məhz buna görə də, gündəlikdə əks olunmuş məsələlərin hamısının vaxtında öz həllini tapması regiondakı cari vəziyyətin əməli sürətdə dəyişdirilməsi üçün vacibdir. Görüşdən sonrakı dəyişiklik qarşıdurma meyillərinin yavaş-yavaş aradan qalxmasına səbəb olmalıdır. Çünki irəlidə quruculuq işləri, kommunikasiyaların açılıb istifadəyə verilməsi və sülh şəraitinə hazırlıq mərhələsi gəlir”. Politoloqun fikrincə, gündəlikdə əsas mövzu kimi sülh sazişinin mətninin hazırlanması yer alsa da, buna qədər texniki məsələlər öz həllini tapmalıdır: “İlk növbədə delimitasiya və demarkasiya prosesi, kommunikasiyaların açılması məsələsi həll olunmalıdır. Eyni zamanda Ermənistanın üzərinə öhdəlik kimi götürüb, həyata keçirmədiyi vəzifələr həllini tapmalıdır. Ermənistan yenə də əvvəlki kimi gözləmə mövqeyini tutur. Prosesləri ləngitmək və özü üçün əlverişli şərait yaratmaq istəyir. Bunun reallaşmasına ehtimal yoxdur. Çünki Azərbaycan proseslərin nəzarətini, həllini öz üzərinə götürüb və dəqiqlik nümayiş etdirir. Ermənilər dəqiq olmadığı üçün Paşinyanın heç bir şansı yoxdur ki, gündəlikdə olan müddəalarla bağlı bizdən nəsə tələb etsin”.
Bundan əlavə, T.Abbasov vurğulayıb ki, Brüsseldəki görüşdə konkret mövqe ortaya qoyulmalı, Ermənistandan üzərinə götürdüyü öhdəliklərin icrası tələb edilməlidir. “Biz sülh şəraitinin yaranmasını istəyirik. Ermənistan dəqiq mövqe ortaya qoymadığı üçün proses ləngiyir. Prosesi ləngidən digər məqam mina xəritələrinin verilməməsi ilə bağlıdır. Burada tək Ermənistanın yox, beynəlxalq dairələrin, siyasi qurumların həm aventuristliyini, həm də riyakarlığını bir daha görürük". Siyasi şərhçi sonda Brüssel görüşü ilə bağlı proqnozlarını dilə gətirib: "Biz ümid edirik ki, bu görüşdən sonra Ermənistanın mövqeyində müəyyənlik yaranacaq. Həmçinin texniki məsələlərin həll edilməsi gözlənilir. Ümumilikdə isə Ermənistan məcburdur ki, Brüssel görüşü üçün hazırlanmış gündəlikdəki bütün məsələlərin həllinə razılaşaraq işə başlasın. Hazırda yol xəritəsi də hazırdır. Buna görə də, kommunikasiya məsələsi öz həllini tapacaq. Çünki bunu onlardan Avropa və Rusiya da tələb edir. Güman ki, bu dəfə Avropa İttifaqı Ermənistandan boş-boş söz verməyi yox, hərəkətə keçməyi istəyəcək”. Qeyd edək ki, Azərbaycan və Ermənistan liderləri arasında sonuncu görüş mayın 22-də Avropa İttifaqı (Aİ) Şurası Prezidenti Şarl Mişelin təşəbbüsü ilə Brüsseldə baş tutub.
29-08-2022, 19:58
Masallıda yanğın hələ davam edir
Masallı rayonunun Məmmədoba kəndi yaxınlığında mürəkkəb relyefli dağlıq ərazidə baş vermiş yanğının söndürülməsi istiqamətində Fövqəladə Hallar Nazirliyi tərəfindən zəruri və təxirəsalınmaz tədbirlər davam etdirilir. Nazirlikdən verilən məlumata görə, relyefin mürəkkəbliyi, havanın yüksək temperaturu və arabir əsən külək yanğınsöndürmə işlərini çətinləşdirsə də yanğınla mübarizə tədbirləri fasiləsiz olaraq həyata keçirilir. Ümumilikdə yanğının söndürülməsi əməliyyatında FHN-in Dövlət Yanğından Mühafizə Xidməti, Mülki müdafiə qoşunları, Xüsusi Riskli Xilasetmə Xidməti, Cənub Regional Mərkəzinin müvafiq qüvvələri və Aviasiya dəstəsinin iki ədəd helikopteri, eləcə də Ekologiya və Təbii Sərvətlər Nazirliyi Meşə Təsərrüfatı Mərkəzi və yerli icra hakimiyyətinin əməkdaşları, bir qrup kənd sakini iştirak edir.
29-08-2022, 19:55
Əflatun Amaşov Mətbuat Şurasından gedir
Bu gün bəzi xəbər saytlarında Mətbuat Şurasının sədri Əflatun Amaşovun tutduğu vəzifədən gedəcəyi haqda məlumat yayılıb. Bildirilir ki, bununla əlaqədar olaraq Mətbuat Şurasının yaxın müddətdə qurultayı keçiriləcək. Qurultaya qədərki dövrdə sədr vəzifəsini İdarə Heyətinin üzvü, "525-ci" qəzetin baş redaktoru Rəşad Məcidin icra edəcəyi söylənilir. Bu barədə açıqlama verən Əflatun Amaşov xəbəri nə təsdiq, nə də təkzib edib. Bir çox fikirlərin ortaya atıldığını qeyd edən Ə. Amaşov hər şeyin qurultaydan asılı olduğunu vurğulayıb: “Qurultayın vaxtından bir neçə ay keçib. Yaxın günlərdə İdarə Heyətinin iclasını keçirib, qurultayın vaxtını müəyyən edəcəyik. Heç nəyi qabaqlamayaq, seçim jurnalistlərindir. İdarə Heyəti müəyyən edilir, üzvlərini də sədr seçir. Mənim namizəd olub-olmayacağım barədə fikir söyləməyim hələ tezdir. Namizədləri redaksiyalar göndərəcəklər, onların arasında seçim ediləcək”. Mətbuat Şurasının ləğv olunması haqqında fikirlərə gəlincə, Ə.Amaşov bunun real olmadığını söyləyib. Şuranın İdarə Heyətinin üzvü Rəşad Məcid isə bildirib ki, qurultayda yeni sədr seçiləcək. Onun sözlərinə görə, jurnalistlər kimi dəstələyəcəksə, həmin şəxs Mətbuat Şurasının sədri olacaq. Belə ki, sədr seçkisi də qurultayda jurnalistlərin iradəsinə bağlıdır.
29-08-2022, 19:52
Sabahın havası - 39 dərəcə isti
Avqustun 30-da Azərbaycanda gözlənilən hava şəraitilə bağlı proqnoz açıqlanıb. Milli Hidrometeorologiya Xidmətindən verilən məlumata əsasən, Bakıda və Abşeron yarımadasında yağmursuz. Cənub küləyi əsəcək. Havanın temperaturu gecə 19-22° isti, gündüz 33-38° isti olacaq. Bakıda gecə 20-22° isti, gündüz 34-36° isti olacaq. Atmosfer təzyiqi norma daxilində 761 mm civə sütunu təşkil edəcək. Nisbi rütubət gecə 60-65 %, gündüz 25-30 % olacaq. Azərbaycanın rayonlarında hava əsasən yağmursuz olacaq. Mülayim şərq küləyi əsəcək. Havanın temperaturu gecə 18-23° isti, gündüz 34-39° isti, dağlarda gecə 11-16° isti, gündüz 23-28° isti olacaq.
29-08-2022, 19:50
Bu, sürüşmə deyil, uçqundur
Bu gün Bakı şəhəri, Yasamal rayonu Qurban Xəlilov küçəsində yamacdan torpaq tökülməsi sürüşmə deyil. Bu barədə Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin rəisi Əli Əliyev bildirib. Xidmət rəsmisi deyib ki, 2,5 metr hündürlüyü olan yamacın üst hissəsində yerləşən həyət evində suvarma nəticəsində kiçik torpaq çıxıntı sahəsi qopub yola tökülüb: "Bu hadisəyə torpaq sürüşməsi demək düzgün deyil. Sadəcə kiçik bir hissədə torpaq uçqunu baş verib. Artıq müvafiq qurum tərəfindən hadisənin nəticələri aradan qaldırılıb. Həmin ərazidə lokal da olsa kiçik uçma proseslərinin inkişaf dinamikası yoxdur".
29-08-2022, 19:48
Türk Dövlətləri Təşkilatının 30 illiyi bu ölkədə qeyd olunacaq
Türk Dövlətləri Təşkilatının 30 illiyinin harada qeyd ediləcəyi məlum olub. Butov.az-ın əldə etdiyi məlumata görə, yubiley tədbiri Özbəkistanda keçiriləcək. 12 noyabr tarixinə planlaşdırılan toplantıda Türk dövlətləri üçün vacib sənədlərin imzalanacağı gözlənilir. Qeyd edək ki, Türk Dövlətləri Təşkilatının əsası 1992-ci ildə Türkdilli dövlətlərin liderlərinin zirvə toplantısında qoyulub. 3 oktyabr 2009-cu ildə isə beynəlxalq təşkilat kimi Azərbaycan, Qazaxıstan, Qırğızıstan və Türkiyənin iştirakı ilə rəsmən Naxçıvanda elan olunub. 2018-ci ildə Özbəkistan bu təşkilata üzv olub. Türk dünyasında əməkdaşlıq şurasının qurulması ideyası ilk dəfə 2006-cı ildə Qazaxıstanın o zamankı prezidenti Nursultan Nazarbayev tərəfindən irəli sürülüb. Təşkilatda müşahidəçi dövlətlər Macarıstan və Türkmənistandır. Türk Dövlətləri Təşkilatının üç mərkəzi var, bunlar İstanbul, Bakı və Nur-Sultandır. Üzv ölkələrin dövlət rəhbərləri ildə bir dəfə rəsmi, bir dəfə isə qeyri-rəsmi olaraq müxtəlif şəhərlərdə toplanırlar. Bundan əvvəl zirvə toplantısı ötən il Türkiyədə baş tutub. Xatırladaq ki, Türk Dövlətləri Təşkilatı 2021-ci ilədək Türkdilli Dövlətlərin Əməkdaşlıq Şurası adlandırılırdı. Belə ki, ötən ilin noyabrın 12-də İstanbulda keçirilən iclasda Şuranın adı dəyişdirilərək, Türk Dövlətləri Təşkilatı olub.
29-08-2022, 19:45
Toylar başlayır - Ət 15 manat olacaq
Bu ilin iyun ayında hökumət Azərbaycanda ətin qiymətinin ucuzlaşacağı anonsunu versə də, bunun tam əksi müşahidə edilir. Belə ki, bir neçə gün əvvəl ətin qiyməti 12 manata, hazırda isə 13 manata qədər bahalaşıb. Quzu ətinin qiyməti isə dəyişməyib - 15 manat. Bu barədə danışan satıcılar bahalaşmanı yem və otun qiymətinin qalxması ilə əlaqələndirirlər. Əslində qəssablar da bahalaşmadan narazıdılar. Onlar qiymət artımının əhalinin alıcılıq qabiliyyətinə mənfi təsir etdiyini bildirirlər. Bununla belə, ət satışı məntəqələri Məhərrəm və Səfər aylarından sonra ətin yenidən bahalaşacağını istisna etmirlər: “Hazırda toylar yoxdur, ətə tələbat da yoxdur. Amma sentyabrdan toylar başlayanda ətin 15 manata qədər bahalaşacağı gözlənilir. Qiymət artımı bizdən asılı olan məsələ deyil. Burada heç kəndli də günahkar deyil. Yem, ot bahadır. Kəndli də bir danaya çəkilən xərci çıxarmalıdır ki, qazancı olsun”. Xatırladaq ki, Hicri təqviminin ilk iki ayında (Məhərrəm və Səfər ayları) Azərbaycanın əksər bölgələrində toy mərasimləri təxirə salınır. Avqustun 28-i Məhərrəm ayı başa çatıb, ayın 29-dan isə Səfər ayı başlayır və sentyabrın 26-da başa çatacaq. Məhəmməd peyğəmbərin (s) nəvəsi imam Hüseyn (ə), onun ailə üzvləri və tərəfdarları Hicri-qəməri təqvimi ilə 61-ci ildə Kərbəlada şəhid ediliblər.
29-08-2022, 19:43
Qarabağda itkin düşənlərin yaxınlarından bioloji nümunə götürülüb
1990-cı illərdə baş vermiş döyüş əməliyyatlarında itkin düşmüş şəxslərin 303 ailə üzvündən 700 biloji istinad nümunəsi toplanılıb. Bu barədə Beynəlxalq Qızıl Xaç Komitəsinin (BQXK) 2022-ci ilin yanvar – iyun ayları ərzində həyata keçirdiyi fəaliyyətlərə dair hesbatında bildirilib. Qeyd edilib ki, bu nümunələr mümkün ekshumasiya zamanı identikifasiyaya dəstək üçün istifadə edilə bilər. Eyni zamanda, bildirilib ki, proses ərzində 47 ailə üzvünə psixo- sosioloji dəstək göstərilib.
29-08-2022, 19:42
Ukrayna bayrağı Azərbaycanın ən yüksək zirvəsində
“Ukrayna bayrağının sarı və mavi rəngləri Azərbaycanın ən yüksək zirvəsində dalğalandı!” Bu barədə Ukraynanın Azərbaycandakı səfiri Vladislav Kanevski feysbuk səhifəsində yazıb. “Ukraynanın Azərbaycandakı səfirinin köməkçisi Aleksandr Dorofeyev və Azərbaycanda akkreditə olunmuş diplomatik nümayəndəliklərin nümayəndələri, eləcə də Ukraynanın dostları Azərbaycanın ən hündür nöqtəsi Bazardüzü dağına (4466 m) qalxıblar”, - deyə paylaşımda qeyd olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!