27-02-2026, 19:44
Azərbaycanlı tələbə necə saxlanılıb?
ABŞ-da Kolumbiya Universitetinin azərbaycanlı tələbəsi Elmina Ağayevanın İmmiqrasiya və Gömrük Mühafizəsi Xidməti (ICE) tərəfindən saxlanılması ölkədə geniş rezonans doğurub.
Hadisə ilə bağlı bir sıra yeni detallar açıqlanıb.
Məlumata görə, Elmina Ağayeva səhər saat 6 radələrində universitet kampusunun yaşayış binasında saxlanılıb. ABŞ mətbuatının yazdığına görə, ICE əməkdaşları binaya daxil olarkən özlərini “itkin düşmüş beş yaşlı qızı axtaran polis əməkdaşları” kimi təqdim ediblər. Onların müşahidə kameralarında həmin uşağın fotosu ilə göründüyü bildirilir. Daha sonra eyni bəhanə ilə tələbənin otağına yönəldikləri iddia olunur.
Kolumbiya Universitetinin prezidenti Kler Şipman bildirib ki, agentlər binaya məhkəmə orderi olmadan daxil olublar. Universitetin ictimai təhlükəsizlik xidməti əməkdaşlarının onlardan order tələb etdiyi, lakin sənəd təqdim olunmadığı və rəhbərliklə əlaqə yaratmaq üçün vaxt istənildiyi halda buna imkan verilmədiyi vurğulanıb. Şipman qeyd edib ki, başqa qurumun əməkdaşı kimi təqdim olunaraq binaya daxil olmaq protokol pozuntusudur və qəbuledilməzdir. Onun sözlərinə görə, universitet ərazisindəki binalara giriş üçün mütləq məhkəmə qərarı və ya rəsmi çağırış sənədi tələb olunur.
Hadisə Nyu-Yorkda demokrat siyasətçilərin və yerli rəsmilərin sərt reaksiyasına səbəb olub. Manhetten dairəsinin nümayəndəsi Bred Hoylman-Siqal bildirib ki, ICE əməkdaşları qəsdən kampus təhlükəsizlik xidmətini çaşdıraraq tələbənin mənzilinə daxil olublar və bu, ciddi vətəndaş hüquqları pozuntusudur. Nyu-York Şəhər Şurasının sədri Culi Menin isə ICE-in məktəb və universitetlərdə əməliyyat keçirməsinin cəmiyyətdə qorxu və etimadsızlıq yaratdığını deyib.
Ştatın qubernatoru Keti Hokul saxlanmanı kəskin tənqid edərək ICE-in məktəblər, universitetlər və yataqxanalar kimi “həssas məkanlarda” əməliyyat keçirməsini qadağan edən qanun layihəsi təklif etdiyini açıqlayıb və sənədin təcili qəbuluna çağırıb. Senatda demokratların lideri Çak Şumer də həbsi “qəbuledilməz” adlandırıb.
Məsələ fevralın 26-da Nyu-York meri Zöhran Məmdaninin Ağ Evdə ABŞ Prezidenti Donald Trampla keçirdiyi görüşdə qaldırılıb. Mer mənzil əlçatanlığı proqramının müzakirəsi üçün nəzərdə tutulan görüşdə dörd saxlanılan miqrantın, o cümlədən Elmina Ağayevanın işini gündəmə gətirib. Məlumata görə, Tramp müraciəti qəbul edib və həmin şəxslərin azadlığa buraxılması barədə göstəriş verib.
Rəsmi qurumlar Elmina Ağayevanın saxlanma səbəbi və immiqrasiya statusu barədə detallı açıqlama verməyib. Universitet rəhbərliyi məxfilik prinsiplərinə istinad edərək bu məsələyə münasibət bildirməkdən imtina edib.
Qeyd edək ki, Elmina Ağayeva sosial şəbəkələrdə aktiv fəaliyyəti ilə tanınır. O, tələbə həyatı və ABŞ-da təhsil təcrübəsi ilə bağlı videolar paylaşır və TikTok platformasında 113 mindən, instaqramda isə 107 mindən çox izləyiciyə malikdir. Saxlanılarkən onun sosial şəbəkədə “ICE məni qanunsuz saxladı, xahiş edirəm kömək edin” məzmunlu paylaşım etdiyi bildirilir.
27-02-2026, 19:06
Ucarda açıq ərazidə yanğın olub
Ucarda 3 hektara yaxın sahədə quru ot, kol-kos və ağaclar yanıb.
Hadisə axşam saatlarında rayonun Qarabörk kəndi ərazisində baş verib. Boş ərazidə başlayan yanğın ağaclıq əraziyə keçib. Nəticədə kol-kos, bir neçə ağac yanıb.
Hadisə yerinə FHN-nin Ucar rayon Yanğından mühafizə hissəsinin canlı qüvvəsi və texnikası cəlb olunub. Yanğınsöndürənlərin çevik müdaxiləsi nəticəsində yanğın söndürülüb və alovun əhatə dairəsinin genişlənməsinin qarşısı alınıb.
27-02-2026, 18:50
Ceyhun Bayramov Ahmet Qurbanov ilə görüşüb
27 fevral 2026-cı il tarixində Azərbaycan Respublikasının xarici işlər naziri Ceyhun Bayramov Türkmənistanın xarici işlər nazirinin müavini Ahmet Qurbanovun rəhbərlik etdiyi nümayəndə heyətini qəbul edib.
Bu barədə Xarici İşlər Nazirliyi məlumat yayıb.
Görüş zamanı, iki ölkə arasında dostluq və qardaşlıq münasibətlərinin daha da möhkəmləndirilməsi istiqamətində siyasi dialoqun dinamik inkişafı məmnunluqla qeyd olunub, ali və yüksək səviyyəli səfərlərin və təmasların əhəmiyyəti vurğulanıb. Bu çərçivədə, ötən il ölkəmizin Prezidentinin Türkmənistana, Türkmənistan Xalq Məsləhətinin sədri Qurbanqulu Berdiməhəmmədovun Azərbaycana səfərləri və əldə olunmuş nəticələr məmnunluqla xatırlanıb.
Görüş zamanı, Azərbaycan və Türkmənistan arasında mövcud olan strateji tərəfdaşlıq münasibətlərinin xarakterinə uyğun olaraq, ticarət-iqtisadiyyat, enerji, nəqliyyat və logistika, o cümlədən Xəzər dənizində əməkdaşlıq, humanitar və mədəniyyət sahələrində əməkdaşlığın genişləndirilməsi imkanları nəzərdən keçirilib və perspektivləri müzakirə edilib.
Bu çərçivədə, Azərbaycan və Türkmənistan arasında iqtisadi və humanitar sahələrdə əməkdaşlıq üzrə Birgə Hökumətlərarası Komissiyanın əlaqələrin inkişafında mühüm rol oynadığı vurğulanıb. Ötən il Türkmənistanın Azərbaycanda, bu il isə Azərbaycanın Türkmənistanda mədəniyyət günlərinin təşkilinin əhəmiyyəti qeyd olunub, bununla yanaşı, xalçaçılıq və atçılıq kimi ortaq dəyərlərimizin təbliğatının vacibliyi diqqətə çatdırılıb.
Eyni zamanda, regional və beynəlxalq gündəliyin aktual məsələləri üzrə fikir mübadiləsi aparılıb, çoxtərəfli platformalar çərçivəsində əməkdaşlığın daha da inkişaf etdirilməsinin əhəmiyyəti vurğulanıb.
Xalqlarımız arasında tarixən mövcud olan ənənəvi dostluq və qardaşlıq əlaqələrinin bundan sonra Azərbaycan ilə Türkmənistan arasında tərəfdaşlıq münasibətləri zəminində daha da inkişaf edəcəyinə dair həmfikirlik ifadə olunub.
Görüş zamanı, habelə qarşılıqlı maraq doğuran digər ikitərəfli və çoxtərəfli məsələlər ətrafında fikir mübadiləsi aparılıb.
Eyni gündə, Azərbaycan Respublikası və Türkmənistan Xarici İşlər Nazirlikləri arasında növbəti siyasi məsləhətləşmələr keçirilib.
Siyasi məsləhətləşmələrə Azərbaycan tərəfindən xarici işlər nazirinin müavini Samir Şərifov, Türkmənistan tərəfindən isə xarici işlər nazirinin müavini Ahmet Qurbanov başçılıq edib.
27-02-2026, 18:33
Qanunsuz ağackəsmə faktları aşkarlanıb
Bakı və Sumqayıt şəhərlərində, həmçini Qax rayonunda yaşıllıqların qanunsuz kəsilməsi faktları aşkar edilib.
Bu barədə Dövlət Ekoloji Təhlükəsizlik Xidmətindən məlumat verilib.
Qeyd olunub ki, Xidmətin əməkdaşları tərəfindən son bir həftə ərzində keçirilən nəzarət tədbirləri zamanı Bakı, Sumqayıt şəhərləri və Qax rayonu ərazisində yaşıllıqların qanunsuz kəsilməsi faktları aşkarlanıb.
Araşdırma zamanı Bakı şəhəri Xətai rayonu Kazımağa Kərimov küçəsi 18 ünvanında 1 ağac, Yasamal rayonu Şərifzadə küçəsi bina 134 ünvanında 2 ağac, Binəqədi rayonu Biləcəri qəsəbəsi Sumqayıt şosesi 10A ünvanında 30 ağac, Binəqədi rayonu Biləcəri qəsəbəsi 53E ünvanında 42 ağac, Qaradağ rayonu Bakı-Ələt avtomobil yolunun 50-ci kilometrliyində 13 ağac, 12 kol, Sumqayıt şəhəri 21-ci məhəllə ərazisində 6 ağac, 4 kol, dənizkənarı bulvar ərazisində 17 ağac, Sumqayıt şəhəri Heydər Əliyev prospekti ilə 20 Yanvar küçələrinin kəsişməsində 21 ağac, Qax rayonu Zərnə kəndi ərazisində isə 9 ağacın qanunsuz kəsildiyi müəyyən edilib.
Hər bir faktüzrə yaşıllıqlara dəymiş ziyanın məbləği cinayət tərkibi yaratdığından məsələyə hüquqi qiymət verilməsi üçün toplanmış materiallar hüquq-mühafizə orqanlarına göndərilib.
27-02-2026, 18:00
Nazirlik 2,5 milyona eşitmə aparatları alacaq
Eşitmə aparatlarının satın alınması üzrə 2,5 milyon manatlıq tender elan edilib.
Azərbaycan Respublikası Əmək və Əhalinin Sosial Müdafiəsi Nazirliyi tabeliyindəki "Protez-Ortopedik İstehsalat və Reabilitasiya Mərkəzi" Publik Hüquqi Şəxsi genişmiqyaslı satınalma müsabiqəsi elan edib.
Müsabiqə çərçivəsində ölkə üzrə eşitmə qabiliyyəti məhdud olan şəxslərin reabilitasiyası üçün zəruri olan eşitmə aparatlarının satın alınması nəzərdə tutulur.
Tenderin qiyməti 2 570 630,00 azn-dir.
Qeyd edək ki, bu satınalma dövlət büdcəsi vəsaitləri hesabına həyata keçirilir.
27-02-2026, 00:07
Cəlilabad sakinini avtomobil vuraraq öldürüb
Bakıda piyadanın ölümü ilə nəticələnən yol-nəqliyyat hadisəsi baş verib.
Hadisə Bakı şəhərində qeydə alınıb.
Belə ki, Cəlilabad rayon sakini olan Cavid Qəniyev yolu qarşı tərəfə keçmək istəyərkən onu avtomobil vurub.
Yaralı xəstəxanaya çatdırılsa da, onun həyatını xilas etmək mümkün olmayıb.
Faktla bağlı araşdırma aparılır.
26-02-2026, 23:02
Ramazanın 9-cu gününün duası - İmsak və iftar vaxtları
Sabah Ramazan ayının doqquzuncu günüdür.
İmsak vaxtı 05:53-ə, iftar isə 18:43-ə təyin olunub.
Doqquzuncu günün imsak duası:
“Allahumməc-əl li fihi nəsibən min rəhmətikəl-vasiə. Vəhdini fihi libərahinikəs-satiə. Və xuz binasiyəti ila mərzatikəl-camiə. Biməhəbbətikə ya əmələl- müştaqin”.
Tərcüməsi:
“İlahi, bu gün öz bol rəhmətini mənə nəsib et. Məni öz parlaq dəlillərinlə istiqamətləndir. Məni sənin razılığına bais olan və hər cür xeyri özündə cəm edən əməllərə doğru çək. Məhəbbətinə and verirəm, ey şövqlülərin istəyi!”
İftar duası:
“Allahummə ləkə sumtu və əla rizqikə əftərtu və əleykə təvəkkəltu. Bismillahir-Rəhmanir-Rəhim. Ya vasiəl-məğfirəti iğfirli”.
Tərcüməsi:
“İlahi, səndən ötrü oruc tutdum, sənin verdiyin ruzi ilə iftar açdım və sənə təvəkkül etdim. Bağışlayan və mehriban Allahın adı ilə. Ey hüdudsuz bağışlama sahibi, mənim günahlarımı bağışla!”
Allah orucunuzu qəbul etsin!
26-02-2026, 22:26
Direktorların işə qəbulu üzrə elektron qeydiyyat başlayır
27 fevral 2026-cı il saat 11:00-dan etibarən direktor vəzifəsi vakant olan 69 dövlət ümumi təhsil müəssisələrinə direktorların işə qəbulu prosesinin elektron sənəd qəbulu mərhələsinə start veriləcək. Namizədlər 6 mart 2026-cı il saat 17:00-dək //miq.edu.az/direktor linkinə daxil olaraq elektron qeydiyyatdan keçə bilərlər.
Bu barədə Məktəbəqədər və Ümumi Təhsil üzrə Dövlət Agentliyi məlumat yayıb.
Bildirilib ki, proses Elm və Təhsil Nazirliyi tərəfindən mərkəzləşdirilmiş qaydada proqram təminatı vasitəsilə müsabiqə yolu ilə həyata keçirilir. Müsabiqə seçim və müsahibə mərhələsindən ibarət olacaq.
Seçim mərhələsində namizədlərin təqdim etdiyi məlumatlar və sənədlərin düzgünlüyü yoxlanıldıqdan sonra namizədlər müsabiqənin müsahibə mərhələsinə buraxılacaqlar. Sistem üzərindən təqdim edilən vakant yerlər 20.02.2026-cı il tarixinə olan məlumatlara istinad edir.
Namizədlər müsahibə mərhələsinə qaydalara müvafiq olaraq ardıcıllıq əsasında dəvət olunacaqlar.
Müsahibə mərhələsi Elm və Təhsil Nazirliyi tərəfindən yaradılmış müvafiq komissiyalar tərəfindən keçiriləcək.
Namizədlər müsahibədə liderlik və strateji idarəetmə, pedaqoji və tədris, idarəçilik və təşkilatçılıq, ünsiyyət və əlaqə, problemlərin həlli və qərarvermə, rəqəmsal və texnoloji, eləcə də sosial və emosional bacarıqları üzrə qiymətləndiriləcəklər.
Hər bir namizəd nəticələrlə “Şəxsi səhifə” vasitəsilə tanış ola biləcək.
Müsabiqədən müvəffəqiyyətlə keçmiş namizədlərlə əmək münasibətləri qanunvericilikdə müəyyən olunmuş qaydada rəsmiləşdiriləcək.
26-02-2026, 21:32
Tələbələrin şəkillərini yayan şəxs SAXLANILIB
Tələbələrin fotolarını yayan şəxsi Kibercinayətkarlıqla Mübarizə Baş İdarəsinin saxladı.
Bu barədə Daxili İşlər Nazirliyinin Mətbuat Xidməti məlumat yayıb.
Bildirilib ki, BDU-nun hüquq fakültəsinin tələbələrinin görüntülərindən istifadə edilərək hazırlanmış təhqiramiz foto və videomaterialları sosial şəbəkələrdə yayan şəxs DİN-in Kibercinayətkarlıqla Mübarizə Baş İdarəsinin (KMBİ) əməkdaşları tərəfindən keçirilən tədbirlərlə müəyyən edilərək saxlanılıb.
26-02-2026, 21:12
Cəriməsi olana kredit verilməyəcək?
Son dövrlərdə maliyyə intizamı ilə yanaşı, vətəndaşların ümumi davranış göstəricilərinin də kredit riskinin qiymətləndirilməsində nəzərə alınması məsələsi gündəmə gəlir. Xüsusilə yol hərəkəti qaydalarını davamlı şəkildə pozan sürücülərin bank xidmətlərinə çıxışının məhdudlaşdırılması ideyası müzakirə mövzusudur.
Bu barədə iqtisadçı Natiq Cəfərli təşəbbüsün tamamilə əsassız yanaşma olduğunu deyib.
“Yol hərəkəti qaydalarının pozulmasının kredit almaqla nə əlaqəsi var? Bunlar tamamilə fərqli sahələrdir. Dünyanın heç bir ölkəsində bank-maliyyə münasibətləri inzibati xətalarla bu formada əlaqələndirilmir. Kredit verilməsi maliyyə intizamı və öhdəliklərin icrası ilə bağlı məsələdir. Bankdan kredit götürməyin əsas və yeganə meyarı kredit tarixçəsidir. Əgər şəxsin əvvəlki öhdəlikləri vaxtında yerinə yetirilibsə, gecikmələr yoxdursa və maliyyə intizamı yüksəkdirsə, ona kredit verilməsi üçün əsas var. Əksinə, kredit tarixçəsi zəif olan şəxslər üçün risk dərəcəsi artır və banklar bunu nəzərə alır. Bir çox xarici ölkələrdə yaxşı kredit tarixçəsinə malik şəxslərə daha aşağı faiz dərəcələri, daha uzunmüddətli ödəniş imkanları və əlavə güzəştlər təqdim olunur. Yəni maliyyə bazarında fərqləndirici amil yol hərəkəti qaydaları deyil, məhz maliyyə davranışıdır”.
İqtisadçı Natiq Cəfərli yol hərəkəti qaydalarını pozan sürücülərə kredit verilməməsi təklifinə sərt reaksiya verib. O bildirib ki, sürücünün intizamı ilə bank öhdəlikləri arasında heç bir məntiqi əlaqə yoxdur. Ekspertin fikrincə bankların əsas meyarı vətəndaşın maliyyə tarixçəsi olmalıdır.
Dünya təcrübəsində də belə bir yanaşmanın olmadığını deyən Natiq Cəfərli vurğulayıb ki, inzibati xətalarla maliyyə münasibətlərini qarışdırmaq yanlışdır. O qeyd edib ki, əsas meyar vətəndaşın əvvəlki borclarını necə ödəməsidir və bu qayda beynəlxalq praktikaya uyğun olaraq saxlanılmalıdır.
“Əgər məqsəd vətəndaşların məsuliyyətini artırmaqdırsa, bunun üçün ayrıca hüquqi mexanizmlər mövcuddur. Kredit sistemini digər sahələrlə qarışdırmaq düzgün deyil. Hesab edirəm ki, ölkəmizdə də beynəlxalq praktikaya uyğun olaraq kredit tarixçəsi əsas meyar kimi qalmalıdır”, – deyə o əlavə edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!