Azərbaycanın işğal edilmiş ərazilərinə Livan, Suriya və s. ölkələrdən ermənilərin köçürülməsi ölkəmizdə rəsmilər səviyyəsində də etiraf olunmaqdadır. Maraqlıdır, Qarabağda məskunlaşdırılan “gəlmələr” anti-terror əməliyyatları zamanı Azərbaycan ordusu üçün əlavə problemə çevrilə bilərmi?
Bununla bağlı Moderator.az-a açıqlama verən politoloq Qabil Hüseynli hesab edir ki, işğaldakı torpaqlara köçürülən ermənilərin hərbi əməliyyatlar zamanı Azərbaycan ordusuna müqavimət göstərib-göstərməyəcəyi Sərkisyan hökumətinin mövqeyindən asılı olacaq. Ekspert, gəlmələrin müharibə və münaqişələrdən kifayət qədər yorğun düşdüyünü vurğulasa da, rəsmi Bakının köçürülmə prosesini əngəlləmək üçün ciddi addımlar atmasının vacibliyini vurğuladı:
“Hər şey Ermənistan hökumətinin, Sərkisyan hakimiyyətinin mövqeyindən asılı olacaq. Bir də ki, bu insanlar müharibədən yorulmuş insanlardır. Sadəcə olaraq, Azərbaycan Dağlıq Qarabağ ərazisində məskunlaşan gəlmə ermənilərə bəyanat verərək bildirməlidir ki, sizin hərəkətlər sizin özünüz üçün çox böyük fəlakətə səbəb ola bilər. Çünki sizin məskunlaşdığınız bu ərazi Azərbaycan torpaqlarıdır. Biz bu torpaqları gec-tez, hətta qanımız bahasına da olsa azad edəcəyik. Mənə elə gəlir ki, bu məsələdə həm beynəlxalq təşkilatlara müraciət eləmək, həm də digər vasitələrdən yararlanmaq lazımdır. Cəbhədə atəşkəs rejiminin yoxlanılması və işğal edilən ərazilərdəki vəziyyətlə bağlı hesabat aparan beynəlxalq təşkilatlara, onların yetkililərinə də bildirmək lazımdır ki, əgər işğaldakı torpaqlarda məskumlaşma prosesi sürətlə getsə, biz torpaqlarımızı azad etmək üçün hərbi əməliyyatlara başlayacayıq. Hərbi əməliyyatlar nəticəsində işğaldakı ərazilərdə məskunlaşan ermənilər də ciddi problemlə üzləşəcəklər. Onları indidən xəbərdar etmək lazımdır”.