Millət vəkili Qənirə Paşayeva Türkiyənin Muğla şəhərində vali Amir Çiçək, Sıtkı Koçman Universitetinin rektoru professor Mansur Harmandar və tələbələrlə görüşüb.

Butov.az Axar.az-a istinadən xəbər verir ki, millət vəkili görüşdə Qarabağ həqiqətlərinin daha geniş yayılması, bu dəhşətli olaylardan daha çox insanın xəbər tutması məsələsini müzakirə edib. O, Muğla valisi ilə görüşündə bu bölgədə Azərbaycanla, xüsusən Qarabağ problemi ilə bağlı konfransların artmasını təklif edib və qardaş ölkənin bu problemə diqqətinin xüsusi əhəmiyyət kəsb etdiyini deyib.

Xocalı soyqırımı ilə bağlı keçirilən konfransda iştirak edən millət vəkili vali Amir Çiçəklə müzakirə zamanı qardaş Türkiyədə terrorla mübarizədə şəhid olmuş insanlara Allahdan rəhmət, yaxınlarına səbir diləyib, terroru və arxasında duranları lənətlədiyini bildirib.

Azərbaycanın erməni terrorundan çox əziyyət çəkdiyini vurğulayan Q.Paşayeva “O zaman Azərbaycan türklərinə qarşı terror törədənlər indi də müxtəlif terror təşkilatları içərisində Türkiyəyə qarşı cinayət və çirkin addımlarını davam etdirirlər, amma inşallah, birlikdə bütün terrorçulara layiq olduqları cavabı verəcəyik, qəhrəman şəhidlərimiz onlara məqsədlərinə çatmağa imkan verməyəcək”, - deyib.

“Azərbaycanın sevinci sevincimiz, üzüntünüz üzüntümüzdür”, - deyən vali Amir Çiçək şəhidlərimizə Allahdan rəhmət diləyib.

Millət vəkili Qənirə Paşayeva, Azərbaycanın Türkiyədəki səfirliyinin təhsil müşaviri Dr.Nəcibə Nəsibova və əməkdar artist Nuriyyə Hüseynova Muğla Universiteti rektoruna və universitetin kitabxanasına Azərbaycan mədəniyyəti, tarixinə dair materiallar hədiyyə edib.

Q.Paşayev həmçinin Muğla Sıtkı Koçman Universitetində təhsil alan bəzi azərbaycanlı tələbələrlə də görüşüb. Görüşdə millət vəkili Dağlıq Qarabağ münaqişəsinin dünya ictimaiyyətinə çatdırılmasında xaricdə yaşayan azərbaycanlıların da üzərinə böyük vəzifələr düşdüyünü bildirib.