“Bu ilki prezident seçkisində çox aydın bir perspektiv var. Prezidentliyə namizədlər sırasında İlham Əliyev favoritdir. Onun böyük səs çoxluğu ilə qalib gələcəyinə heç bir şübhə yoxdur”. Bunu Modern.az-a açıqlamasında Vəhdət Partiyasının sədri Tahir Kərimli deyib. O seçki proseslərini şərh edərkən bildirib ki, hakim partiya daha üstün mövqelərə malikdir. “YAP 3 mindən artıq seçki məntəqəsinə müşahidəçi göndərib. Ancaq məndə olan məlumata görə bütün müxalifət hələ seçki məntəqələrini 10 faiz müşahidəçi ilə təmin edə bilməyib
Sadəcə olaraq digərləri, o cümlədən Milli Şura nümayəndələri qarşıya qoyduqları platformaları çatdırmaq üçün hərəkətə keçiblər”. O, seçki debatlarını şərh edərkən deyib: “Debatların dəyirmi masa şəklində qurulması məqsədəuyğun deyil. Namizədlər bir-birini qeyri-etik sözlərlə təhqir edirlər. Bu da seçkinin əhəmiyyətini və qiymətini azaldır. İki nəfərlik debatlar təşkil etmək olar. Bəzi namizədlər öz platforması haqqında danışarkən taftalogiyaya yol verirlər. Çox nadir hallarda kimsə, səhiyyə, təhsil və Qarabağ münaqişəsinin həlli ilə bağlı öz fikirlərini bildirir. Ancaq ümumilikdə bu uğur gətirmir.
Demək olar ki, namizədlərin şəxsiyyəti, gördükləri iş o dərəcədə bəllidir ki, xalq aktivliyə ehtiyac duymur. Az qala alternativsiz namizəd İlham Əliyevdir. Başqa namizədlər isə güc nümayiş etdirə bilmirlər, zəifdirlər. İkinci bir məsələ isə ondan ibarətdir ki, Azərbaycan xalqının seçkiyə marağı azalıb. Çünki kəskin debatlar yoxdur. Namizədlər arasındakı qızğın mübarizə yalnız qeyri-etik çərçivədədir. Ən böyük problemimiz Qarabağ məsələsi ilə bağlı heç kim fərqli bir yanaşma ortaya qoymur. Azərbaycan seçicisi də ideya və fikir müxtəlifliyi görmür, ancaq söyüşlər eşidir.”