31-12-2025, 00:50
Zelenskinin yeni "sağ qolu" kim olacaq?
Ukrayna Prezidenti Volodimir Zelenski sanksiyalar siyasəti üzrə komissar Vladislav Vlasyuku öz ofisinin rəhbəri təyin edəcək.
Bu barədə "Zerkalo Nedeli" nəşri mənbələrə istinadən məlumat yayıb.
Noyabrın 28-də Zelenski Andriy Yermakı Prezident Administrasiyasının rəhbəri vəzifəsindən azad edib. O, korrupsiyaya qarşı mübarizə aparan məmurlar tərəfindən mənzilində axtarış aparıldıqdan sonra işdən çıxarılıb.
31-12-2025, 00:38
MDB liderləri bu ölkədə görüşəcək
MDB Dövlət Başçıları Şurasının iclası 2026-cı il oktyabrın 9-da Türkmənistanda keçiriləcək
Bu barədə Türkmənistan lideri Qurbanqulu Berdiməhəmmədov məlumat verib.
O qeyd edib ki, sammit Türkmənbaşıdakı Avaza Milli Turizm Zonasında keçiriləcək.
31-12-2025, 00:16
ABŞ iki od arasında
Birləşmiş Ərəb Əmirlikləri (BƏƏ) və Səudiyyə Ərəbistanı arasında Yəməndəki vəziyyətlə bağlı gərginliyin artması ABŞ diplomatiyası üçün yeni problem yaradır.
Bu barədə “The Wall Street Journal” (WSJ) qəzetində dərc olunan məqalədə bildirilib.
Qeyd edilib ki, iki Yaxın Şərq dövləti arasındakı münasibətlərdə yaranmış çat ABŞ üçün diplomatik çətinlik və arzuolunmaz fəsad hesab olunur. Halbuki Vaşinqton hazırda İranı cilovlamağa və Tehranı nüvə proqramından imtina etməyə razı salmağa çalışır.
Nəşrin qeyd etdiyinə görə, iki Fars körfəzi ölkəsi arasında qarşıdurma onsuz da münaqişələrlə əhatə olunmuş bölgədə hərbi əməliyyatların daha da genişlənməsinə səbəb ola bilər.
31-12-2025, 00:02
Hər zaman həmrəy olaq!
Bu gün Dünya Azərbaycanlılarının Həmrəyliyi Günüdür.
Dünya Azərbaycanlılarının Həmrəyliyi Gününün əsası 1989-cu il dekabrın sonlarında Azərbaycan Xalq Cəbhəsinin təşkilatçılığı ilə Naxçıvanda SSRİ-İran sərhədlərinin dağıdılması zamanı qoyulub.
1991-ci il dekabrın 16-da Naxçıvan Muxtar Respublikası Ali Məclisinin Heydər Əliyevin sədrliyi ilə keçən iclasında 31 dekabrın dünya azərbaycanlılarının həmrəylik bayramı kimi qeyd olunması barədə qərar qəbul edilib. Ali Məclis bununla bağlı qanunvericilik aktının qəbul olunması üçün ölkə parlamentinə - Ali Sovetə müraciət edib. Dekabrın 25-də Azərbaycan Respublikası Ali Sovetinin Milli Şurası müraciəti nəzərə alaraq, dekabrın 31-nin Dünya Azərbaycanlılarının Həmrəyliyi Günü elan olunması barədə qanun qəbul edib.
2001-ci il noyabrın 9-10-da Bakıda Dünya Azərbaycanlılarının I Qurultayı keçirilib. Qurultay soydaşlarımızın milli mənlik şüurunun güclənməsinə, müxtəlif ölkələrdə azərbaycanlı icmalarının mütəşəkkilliyinin və fəallığının artmasına təsir göstərib. Bu, ölkənin ictimai-siyasi həyatında yeni bir hərəkat, dövlət siyasətinin yeni bir istiqaməti idi. Həmin qurultayda Ulu Öndərin böyük iftixarla söylədiyi “Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamı isə dillər əzbərinə çevrilib.
Qurultaydan sonra Ümummilli Lider Heydər Əliyevin 2002-ci il 5 iyul tarixli Fərmanı ilə xaricdəki soydaşlarımızla əlaqələrin genişləndirilməsi və inkişaf etdirilməsi məqsədilə Xarici Ölkələrdə Yaşayan Azərbaycanlılarla İş üzrə Dövlət Komitəsinin (hazırda Diasporla İş üzrə Dövlət Komitəsi) yaradılması, həmin il dekabrın 27-də isə soydaşlarımızla bağlı dövlət siyasəti haqqında Qanunun qəbul edilməsi dünya azərbaycanlılarının milli birliyi və təşkilatlanması prosesini daha da gücləndirib.
Yorulmaz fəaliyyəti ilə Heydər Əliyev siyasi fəlsəfəsinə, onun liderlik məktəbinə söykənən Prezident İlham Əliyev Ulu Öndərin bu sahədəki xidmətlərini uğurla davam etdirir. Dövlətimizin başçısının “Dünya azərbaycanlılarının II Qurultayının keçirilməsi haqqında” 2006-cı il 8 fevral tarixli Sərəncamına uyğun olaraq, həmin il martın 16-da Bakıda keçirilən növbəti mötəbər toplantı xaricdə yaşayan azərbaycanlıların diaspordan lobbiyə çevrilməsi istiqamətində yeni addım olub, ölkəmizlə bağlı həqiqətlərin dünya ictimaiyyətinə çatdırılması işində əhəmiyyətli rol oynayıb.
Diasporumuzun təşkilatlanması prosesi bu gün daha sürətlə gedir. Dünya Azərbaycanlılarının I Qurultayında yaradılmış Əlaqələndirmə Şurasının 2008-ci il dekabrın 18-də Bakıda keçirilmiş iclası, toplantıda “Dünya Azərbaycanlılarının Xartiyası”nın qəbulu birlik və mütəşəkkilliyinin artması, tarixi Vətənlə əlaqələrinin möhkəmlənməsi, diaspor potensialının möhkəm amilə çevrilməsini göstərməklə yanaşı, müstəqil Azərbaycanın bütün dünya azərbaycanlıları üçün cazibə mərkəzi olduğunu da bir daha təsdiqləyib.
Həmrəylik günü milli birlik, Azərbaycana məhəbbət, milli-mənəvi dəyərlərimizə hörmət, Vətənə bağlılıq hisslərini özündə təcəssüm etdirir. Bu birliyi Vətən müharibəsində bir daha gördük. 2020-ci ildə Ermənistan silahlı qüvvələri dəfələrlə hərbi təxribatlar törətdi və hər dəfə Azərbaycan Ordusu bu hücumların qarşısını qətiyyətlə aldı. 2020-ci ilin 27 sentyabr tarixində Ermənistan silahlı qüvvələrinin Azərbaycan ərazilərini raket atəşinə tutması 44 günlük İkinci Qarabağ müharibəsinin başlamasına səbəb oldu. Xalqımız müharibənin ilk günündən dövlət başçısı, Silahlı Qüvvələrin Ali Baş Komandanı İlham Əliyevin uğurlu siyasəti nəticəsində torpaqlarımızın işğaldan azad ediləcəyinə əmin idi. İkinci Qarabağ müharibəsi bu əminliyi bir daha təsdiqlədi. Öz Liderinin ətrafında dəmir yumruq tək birləşən xalqımız Ordumuza arxa-dayaq oldu, düşmən bu gücün qarşısında cəmi 44 gün dayana bildi. 30 il işğal altında inləyən torpaqlarımız düşmən tapdağından azad edildi. Sıldırım qayalarla əhatələnən qədim yurd yerimizin – Şuşanın noyabrın 8-də azad olunması isə bu qəhrəmanlığın zirvəsi idi. Azərbaycan əsgərinin şücaətinə, bacarığına dünyanın hərbi mütəxəssisləri də heyran qaldı. İndi azad olunan torpaqlarımız yenidən qurulur, o yerlərə yenidən həyat qayıdır.
2023-cu ilin sentyabr ayında keçirilmiş antiterror əməliyyatı isə cəmi bir gün, ondan da az çəkdi. Azərbaycan Ordusu peşəkarlıq və qəhrəmanlıq göstərərək, bütün strateji yerlərə çıxaraq, qısa müddət ərzində o əməliyyatın taleyini həll etdi və düşmən ordusu təslim olmağa məcbur oldu. Daha sonra Azərbaycan Respublikasının Prezidenti İlham Əliyev oktyabrın 15-də Xankəndi şəhərində Azərbaycan Respublikasının Dövlət Bayrağını ucaldıb.
44 günlük Vətən müharibəsi dövründə olduğu kimi sentyabr ayında keçirilmiş antiterror əməliyyatı zamanı da dünya azərbaycanlılarının həmrəylik nümayiş etdirməsi, Azərbaycan Prezidentinin ətrafında sıx birləşməsi xalqımız və millətimiz arasında sarsılmaz bağların mövcudluğunun göstəricisidir. Məhz bu qırılmaz bağlar bütün dünya gücləri qarşısında azərbaycanlıların hansı qüdrətə sahib olduğunu nümayiş etdirdi. Bu birliyin və birlikdə əldə edilmiş gücün sayəsində bu gün azərbaycanlılar dünyanın hər yerində başıuca gəzirlər.
Hər dəfə Bakıda toplaşan dünya azərbaycanlıları 2022-ci ildə V qurultayını – Zəfər qurultayını Şuşada keçirdi. Prezident, Müzəffər Ali Baş Komandan İlham Əliyev 65 ölkədən 400-dən çox diaspor nümayəndəsi və qonağın qatıldığı qurultaydakı nitqində deyib: “Buraya gələrkən 2001-ci ildə keçirilmiş ilk qurultayı xatırlayırdım. Bildiyiniz kimi, Ulu Öndər Heydər Əliyevin təşəbbüsü ilə ilk qurultay 2001-ci ildə keçirilmişdir. Ulu Öndər dərin məzmunlu çıxışında, eyni zamanda, təbii ki, Qarabağ problemi ilə bağlı öz fikirlərini bildirmişdir və demişdir ki, Azərbaycan öz ərazi bütövlüyünü bərpa edəcək, işğal altında olan torpaqlar işğaldan azad ediləcək və Azərbaycan xalqı öz dədə-baba torpaqlarına qayıdacaqdır. Biz - Ulu Öndərin davamçıları bu sözləri gerçəyə çevirdik və V qurultaya hazırlıq işləri başlayarkən mənə məruzə edildi və mən dedim ki, bu qurultay mütləq Şuşada keçirilməlidir. Əminəm ki, qurultay iştirakçıları da buna çox müsbət yanaşıblar və böyük həvəslə Şuşaya, qədim Şuşaya, bizim mədəniyyətimizin paytaxtı olan Şuşaya gəlmişlər. Şuşa da öz doğmalarını bax, belə günəşli hava ilə qarşılayır və bu, bir daha onu göstərir ki, bura bizim tarixi torpağımızdır. Hətta təbiət, günəş də bizimlə həmrəydir”.
Dövlətimizin diaspor siyasəti, həmvətənlərimizin birlik və həmrəyliyinin möhkəmləndirilməsi, onların daha mütəşəkkil formada təşkilatlanması prosesi özünün yeni mərhələsinə qədəm qoyub. Artıq dünya azərbaycanlıları yaşadıqları ölkələrin sosial-iqtisadi, ictimai-siyasi və mədəni həyatında daha fəal rol oynayır, respublikamızla qarşılıqlı əlaqələrin genişlənməsinə böyük töhfə verir, Azərbaycan həqiqətlərinin dünya ictimaiyyətinə çatdırılmasında, zəngin mədəni irsimizin təbliğində, təcavüzkar erməni dairələrinin ideoloji təxribatlarının qarşısının alınmasında qətiyyət nümayiş etdirirlər.
Dünya Azərbaycanlıları Həmrəyliyi Gününüz mübarək!
30-12-2025, 23:44
İranda etirazlar - minlərlə insan ayağa qalxdı
İranda milli valyutanın (rial) rekord səviyyədə dəyər itirməsindən sonra başlayan etiraz aksiyaları üç gündür davam edir.
Etirazlar paytaxt Tehrandan ölkənin bir çox şəhərinə yayılıb.
Yüksək inflyasiya və milli valyutanın sürətlə dəyərdən düşməsi fonunda başlanan etirazlar ilk olaraq dekabrın 29-da Tehranın qapalı bazarında alqı-satqı ilə məşğul olanların tətilə çıxması ilə gündəmə gəlib.
Etiraz aksiyaları Kərac, Həmədan, Keşm, Malard, İsfahan, Kirmanşah, Şiraz və Yezd şəhərlərində də keçirilib. Görüntülərdə təhlükəsizlik qüvvələrinin nümayişçiləri dağıtmaq üçün gözyaşardıcı qazdan istifadə etdiyi əks olunub.
İran hökuməti etirazlardan xəbərdar olduğunu açıqlayıb, etirazçıları səbrlə dinləyəcəyini bildirib. İran Prezidenti Məsud Pezeşkian dekabrın 29-u axşam saatlarında X sosial şəbəkəsində paylaşım edərək, daxili işlər nazirinə etirazçıların “nümayəndələri” ilə görüşlər keçirməyi, problemlərin həlli və məsuliyyətli davranış üçün addımlar atmağı tapşırdığını bəyan edib.
Eyni gün Pezeşkian İran Mərkəzi Bankının sədri Məhəmmədreza Farzinin istefasını qəbul edib. Onun yerinə keçmiş iqtisadiyyat və maliyyə naziri Əbdülnasir Hemmati təyin olunub.
Etirazlara universitet tələbələrinin də qoşulduğu bildirilir. Aksiyalar zamanı ölkədə ali hakimiyyətə sahib olan dini lider Ayətullah Əli Xameneiyə istinadla “Diktatora ölüm” kimi hökumət əleyhinə şüarların səsləndirildiyi qeyd olunur. Bəzi nümayişçilərin isə 1979-cu il İslam İnqilabı zamanı devrilmiş şah Məhəmməd Rza Pəhləvinin oğlu Rza Pəhləvini dəstəkləyən “Şah yaşasın” şüarları səsləndirdiyi deyilir.
ABŞ-da yaşayan Rza Pəhləvi X hesabında paylaşım edərək etirazçılara dəstək ifadə edib və rejim hakimiyyətdə qaldığı müddətdə İranın iqtisadi vəziyyətinin daha da pisləşəcəyini bildirib.
ABŞ Dövlət Departamenti də Fars dilindəki rəsmi X hesabı vasitəsilə etirazlara dəstək mesajı yayımlayıb. Açıqlamada illərlə davam edən uğursuz siyasət və zəif iqtisadi idarəçilik səbəbindən “ləyaqətli həyat və daha yaxşı gələcək” axtaran insanların yanında olduqları vurğulanıb və etirazçıların cəsarəti yüksək qiymətləndirilib.
Dekabrın 29-da Florida ştatında ABŞ Prezidenti Donald Tramp ilə İsrailin Baş naziri Benyamin Netanyahu arasında keçirilən görüşdə də İrandakı son hadisələrin əsas müzakirə mövzularından biri olduğu bildirilir. Tramp mətbuat konfransında İranda rejim dəyişikliyini dəstəkləyib-dəstəkləmədiyi barədə açıqlama verməkdən yayınıb, lakin ölkədə yüksək inflyasiya və ağır iqtisadi vəziyyətin mövcud olduğunu bildirib. O, həmçinin İranın ballistik raket və ya nüvə proqramını yenidən genişləndirməsi halında İsrailin hava zərbələrinə dəstək verə biləcəyini deyib.
Xatırladaq ki, bu ilin iyununda İsrail və İran arasında 12 gün davam edən münaqişə zamanı ABŞ İranın əsas uranın zənginləşdirilməsi obyektlərinə hava zərbələri endirmişdi. İran isə nüvə proqramının tamamilə dinc məqsədlər daşıdığını israrla bəyan edir.
30-12-2025, 22:42
Zəngəzur dəhlizi dünyanın ən yüksək tutumlu ticarət yolu olacaq
"Dünyada artıq heç bir ölkə xammal baxımından özünü tam təmin edə bilmir. Buna görə də hər kəsin bir-birinə ehtiyacı var, hər kəsin əlçatan olması lazımdır. Bu baxımdan Türkiyə tarixi İpək Yolundan müasir İpək Yoluna qədər Şərq-Qərb dəhlizində körpü rolunu oynayır".
Bunu "Haber Global"a açıqlamasında Türkiyənin nəqliyyat və infrastruktur naziri Abdulkadir Uraloğlu bildirib.
O, Orta Dəhliz və onun bir parçası olan Zəngəzur dəhlizinin əhəmiyyətinə toxunub.
"Həm yük tutumu baxımından, həm də fövqəladə hallar baxımından alternativlərə ehtiyacımız var. Bakı-Tbilisi-Qars xətti təmir işləri səbəbindən 1,5 il bağlı qalıb. Bu mənada Orta Dəhlizi dəstəkləməyə davam edəcəyik. Zəngəzur dəhlizi sayəsində türk dünyası və türk dövlətlərinə birbaşa çıxış yolu təqdim olunacaq. Bu, dünyanın ən yüksəktutumlu ticarət yolu olacaq", - deyə nazir qeyd edib.
30-12-2025, 22:27
ABŞ Ukraynaya qoşun yeridəcək? - Zelenskidən cavab
ABŞ-ın təklif etdiyi təhlükəsizlik zəmanətlərinin bir hissəsi olaraq Amerika qoşunlarının Ukraynada olması ehtimalı müzakirə edilir.
Ukrayna Prezidenti Volodimir Zelenski həmkarı Donald Trampla bu məsələni müzakirə etdiyini bildirib.
“Əlbəttə ki, biz bunu Prezident Tramp və [həlledici] koalisiyanın nümayəndələri ilə müzakirə edirik; biz bunu istərdik. Bu, təhlükəsizlik zəmanətləri baxımından güclü bir mövqe olardı”, - o deyib.
Zelenski jurnalistlərlə onlayn söhbəti zamanı Kiyevin müharibəyə son qoymaq üçün danışıqları davam etdirməyə sadiq olduğunu bildirib və əlavə edib ki, Rusiya Prezidenti Vladimir Putinlə istənilən formatda görüşməyə hazırdır.
30-12-2025, 22:06
Ərəb ölkəsi Yəməndə əməliyyatı dayandırır
Birləşmiş Ərəb Əmirlikləri (BƏƏ) 2015-ci ildən bəri Yəməndə legitimliyi dəstəkləmək, terror təşkilatları ilə mübarizədə beynəlxalq səylərə yardım etmək, eləcə də qardaş Yəməndə təhlükəsizlik və sabitliyə nail olmaq üçün Ərəb Koalisiyasında iştirak edir. BƏƏ bu məqsədlərə çatmaq üçün böyük qurbanlar verib.
Bu, BƏƏ Müdafiə Nazirliyinin bəyanatında əks olunub.
Bəyanatda vurğulanır ki, BƏƏ Silahlı Qüvvələri razılaşdırılmış rəsmi çərçivələrdə verilən tapşırıqları yerinə yetirdikdən sonra 2019-cu ildə Yəmən Respublikasındakı hərbi iştirakını yekunlaşdırıb. BƏƏ ordusu Yəməndə terrorizmə qarşı mübarizədə iştirakını müvafiq beynəlxalq tərəfdaşlarla əlaqələndirilməklə fəaliyyət göstərən ixtisaslaşmış qruplarla məhdudlaşdırıb.
BƏƏ Müdafiə Nazirliyi son hadisələr və onların antiterror əməliyyatlarının təhlükəsizliyinə və effektivliyinə potensial təsirini nəzərə alaraq, Yəməndə antiterror qruplarının fəaliyyətinin dayandırıldığını bildirib. Bu addımın qrupların şəxsi heyətinin təhlükəsizliyinin təmin edilməsinə yönəldiyini qeyd edib və bunun müvafiq tərəfdaşlarla koordinasiyada həyata keçiriləcəyini vurğulayıb.
Bəyanatda qeyd olunur ki, bu tədbir mövcud şəraitin hərtərəfli qiymətləndirilməsi nəticəsində baş tutur, eləcə də BƏƏ-nin öhdəliklərinə və regionun təhlükəsizliyini və sabitliyini dəstəkləməkdə roluna uyğundur.
30-12-2025, 21:48
Bəşər Əsədin fotosu silindi
Suriyada milli pul əsginaslarından 2024-cü ilin dekabr ayından devrilmiş prezident Bəşər Əsədin ailəsinin təsviri yığışdırılıb.
Bunun əvəzində Suriya funtunun yeni əsginaslarında ölkənin kənd təsərrüfatını tərənnüm edən - zeytun, qızıl gül, portağal və buğda təsvirləri əksini tapır.
Yeni dizaynlı əsginasın təqdimatında Suriya Mərkəzi Bankının rəhbəri Əbd Əl Kadr Husriyə qeyd edib ki, ölkədə hazırda pul islahatı aparılır. İslahatda başlıca olaraq hazırkı 100 funta bərabər olan yeni valyuta vahidinin tətbiqi nəzərdə tutulur.
10-dan 500-ə qədər nominalda olan yeni funtlar yanvarın 1-dən etibarən tədavülə buraxılacaq.
30-12-2025, 21:08
İlham Əliyevdən bayram paylaşımı
Prezident İlham Əliyev 31 dekabr – Dünya Azərbaycanlılarının Həmrəyliyi Günü və Yeni illə bağlı paylaşım edib.
Butov.az həmin paylaşımı təqdim edir:
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!