15-12-2025, 21:15
Məktəbli çantalarını yükləyən Nazirlik deyil - Emin Əmrullayev
Məktəbli çantalarının ağırlıq problemi var, dərs vəsaitlərindən kənar əşyalar da çantaya qoyulanda belə hallar yaranır.
Bunu elm və təhsil naziri Emin Əmrullayev "Real TV"yə müsahibəsində deyib.
Onun fikrincə, çantanın ağırlıq probleminin necə aradan qaldırılması ilə bağlı sual da yalnız Elm və Təhsil nazirliyinə ünvanlanmalı deyil. Çünki həmin çantanı yükləyən tərəf nazirlik deyil:
"Bizim edəcə biləcəyimiz o olub ki, əvvəl dərsliklər birillik hazırlanırdısa, hazırda yarımillikdir. İbtidai sinif səviyyəsində bir dərsliyin çəkisi 270-300 qram arasında dəyişir. Bu problem hər birimizin problemidirsə, hər birimiz həll etməliyik".
15-12-2025, 18:18
Bu məhkumlar azadlığa çıxa bilər - Novella Cəfəroğlu ADLAR ÇƏKDİ
Prezident İlham Əliyev “Konstitusiya və Suverenlik İli” münasibətilə amnistiya elan olunması təşəbbüsü irəli sürüb. Aministiya aktı 20 min nəfəri əhatə edəcək.
Amnistiya aktının layihəsinə əsasən, Azərbaycan Respublikasının suverenliyinin və ərazi bütövlüyünün qorunması uğrunda aparılan döyüş əməliyyatlarında, o cümlədən Vətən müharibəsində və 2023-cü il sentyabrın 19–20-də keçirilmiş antiterror əməliyyatında iştirak etmiş şəxslərin, eləcə də bu əməliyyatlarda həlak olmuş və ya xəbərsiz itkin düşmüş şəxslərin yaxın qohumlarının, Ermənistan Respublikasının mülki əhaliyə qarşı hərbi təxribatı nəticəsində əlil olmuş şəxslərin, habelə qadınların, 60 yaşına çatmış şəxslərin, cinayət törədərkən yetkinlik yaşına çatmayanların və digər şəxslərin cəzadan və ya cinayət məsuliyyətindən azad edilmələri nəzərdə tutulur.
Tanınmış hüquq müdafiəçisi, Dilarə Əliyeva adına Qadın Hüquqlarını Müdafiə Cəmiyyətinin sədri Novella Cəfəroğlu deyib ki, hazırladıqları siyahıda olan şəxslərin hamısının azad ediləcəyini düşünür:
“Hər dəfə cənab Prezidentə məktub ünvanlananda siyasilərin, din adamlarının, "ömürlük"də olub cəzasının 20 ilini çəkənlərin, jurnalistlərin, blogerlərin də maddələrinin aministiyaya düşməsinə çalışırıq. Aministiyanı Milli Məclis təsdiq edəcək. Bu il Konstitusiya ili və Zəfərimizin 5-ci ildönümüdür. Qoy, həmrəylik bayramımızda ailələrimizdə də bayram olsun. Ailələr də qovuşsun. Bütün tərəflərdən bizi sevməyən var. Hesab edirəm ki, biz özümüzə güvənməli, millətimiz arasında sülh və həmrəylik nümayiş etdirməliyik. Birinci özümüz-özümüzə sülh gətirməliyik. Şübhəsiz ki, Prezident də bunu çox yaxşı başa düşür və çox gözəl də addımlar atır. İnşallah, jurnalistləri, blogerləri, siyasi motivlə tutulanları, həbs müddəti az qalanları azadlığa buraxarlar".
N.Cəfəroğlu qeyd edib ki, aministiya aktı layihəsinin şərtini ödəyən xeyli məhkumun adı onların tərtib etdiyi siyahıda mövcuddur:
"Məsələn, ömürlük həbs cəzası almış "OMON"çu Elçin Əmiraslanov, Qarabağda döyüşmək üçün partizan dəstəsi yaratmış "Qaranquşlar". Eləcə də Tofiq Yaqublu - o, həm də Qarabağ müharibəsi veteranıdır. Elə şərtlərə görə, ən birinci onu buraxa bilərlər.
Yenə deyirəm barışıq, Konstitusiya ilidir. Hər bir insanın ailəsinə dəyər vermək lazımdır. Çoxlu insan buraxlsa, onların qohum-əqrəbası, oğlu-qızı vətən sevgisi ilə coşub-daşacaqlar. Hamımız bir yerdə olacağıq".
15-12-2025, 17:30
Biləsuvarda qadın boğularaq öldürülübmüş - Gəlini və onun qardaşı saxlanıldı
Biləsuvar rayon sakininin qəsdən öldürülməsi müəyyən olunub.
Bu barədə Baş Prokurorluq və Daxili İşlər Nazirliyinin yaydığı birgə məlumatda deyilir.
Biləsuvar rayon prokurorluğu və rayon polis şöbəsi əməkdaşlarının birgə fəaliyyəti nəticəsində Biləsuvar rayon İsmətli kənd sakini, 1955-ci il təvəllüdlü Almaz Cəfərovanın qəsdən öldürülməsi müəyyən edilib.
Həyata keçirilmiş çoxsaylı istintaq və əməliyyat-axtarış tədbirləri nəticəsində 2000-ci il təvəllüdlü Qasım Həsənov və bacısı 1995-ci il təvəllüdlü Gülbəniz Həsənzadənin qabaqcadan əlbir olaraq cari il noyabrın 3-də Almaz Cəfərovanı yaşadığı evdə yastıqla boğaraq qəsdən öldürmələrinə əsaslı şübhələr müəyyən edilib.
Faktla bağlı Biləsuvar rayon prokurorluğunda Cinayət Məcəlləsinin 120.2.1-ci (qabaqcadan əlbir olan bir qrup şəxs tərəfindən adam öldürmə) maddəsilə cinayət işi başlanıb, Qasım Həsənov və Gülbəniz Həsənzadə polis əməkdaşları tərəfindən saxlanılaraq istintaqa təhvil verilib və rayon prokurorluğu tərəfindən şübhəli şəxs qismində tutulub.
15-12-2025, 17:20
Avropa İttifaqından 2 Azərbaycan vətəndaşına SANKSİYA
Avropa İttifaqı 2 Azərbaycan vətəndaşına qarşı sanskiya tətbiq edib.
Bu barədə Aİ Şurasının Avropa İttifaqının Rəsmi Jurnalında məlumat dərc olunmuş qətnaməsində bildirilir.
Məlumatlara görə, Tələt Səfərov və Etibar Əyyub sanksiya siyahısına əlavə ediliblər. Onların sahibi olduqları Coral Energy Group (əvvəllər 2Rivers Group) vasitəsilə Rusiya neftinin daşınması zamanı sanksiyalardan yayınmağa kömək etdiyi iddia olunur. Ümumilikdə, Coral Energy Group 100-dən çox tankerdən ibarət donanmasının olduğu qeyd edilir.
Xatırladaq ki, may ayında Birləşmiş Krallıq da onları sanksiya siyahısına əlavə edib.
15-12-2025, 17:12
Bakıda bəzi sexlərin fəaliyyəti dayandırıldı - VİDEO
Fövqəladə Hallar Nazirliyinin Dövlət Yanğın Nəzarəti Xidməti səlahiyyətləri daxilində ölkə ərazisində yanğın təhlükəsizliyinin təmin edilməsi məqsədilə zəruri tədbirlərin görülməsini davam etdirir.
Nazirliyin Mətbuat xidmətindən verilən məlumata görə, Dövlət Yanğın Nəzarəti Xidməti tərəfindən Bakı şəhəri, Binəqədi rayonu, 9-cu mikrorayon, Mir Cəlal küçəsi, 63A ünvanında yerləşən Məmmədov Ülvi Çingiz oğluna və Əlişzadə İlkin Əlipənah oğluna məxsus avtomobil təmiri sexlərində keçirilən yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib. Belə ki:
- obyektlərdə ilkin yanğınxəbərverici siqnalizasiya qurğusu tam quraşdırılmayıb, mövcud olan qurğu isə nasazdır;
- obyektlərin elektrik təsərrüfatı “Elektrik Qurğularının Quraşdırılması Qaydaları”nın tələblərinə uyğun quraşdırılmayıb;
- elektrik təsərrüfatına profilaktik baxış keçirilməyib və müvafiq akt tərtib edilməyib;
- obyektlər odsöndürən balonlarla tam təmin olunmayıb və mövcud odsöndürən balonlara texniki qulluq göstərilməyib;
- obyektlərdə tezalışan sürtgü yağlarının saxlanması və istifadəsi həyata keçirilir;
- obyektlərdə layihə dəyişiklikləri ilə əlaqədar sənədlər təqdim edilməyib;
- sahibkar fəaliyyətini tikinti norma və qaydalarının müvafiq tələblərinə zidd olaraq çoxmərtəbəli yaşayış binasının qeyri-yaşayış sahəsində təşkil edib.
Beləliklə, mövcud vəziyyət onu göstərir ki, obyektlərin istismarının davam etdirilməsi nəticəsində orada hər an baş verə biləcək yanğın qısa müddətdə genişlənərək faciəni qaçılmaz edəcək.
Qeyd olunanları nəzərə alaraq, yanğın təhlükəsizliyi norma və qaydalarının tələblərinin kobud pozulması faktları aşkar edilmiş sexlərin fəaliyyətinin dayandırılması barədə qərar qəbul olunub.
15-12-2025, 17:08
Xüsusi Təyinatlıların buraxılış mərasimi keçirilib
Hərbi Dəniz Qüvvələrinin (HDQ) "N" hərbi hissəsində "Sualtı Hücum Dəniz Xüsusi Təyinatlısı" kursunun növbəti buraxılış mərasimi keçirilib.
Müdafiə Nazirliyindən verilən xəbərə görə, əvvəlcə hərbi hissənin ərazisindəki şəhidlərin memorial kompleksi ziyarət edilib, önünə gül dəstələri düzülərək xatirələrinə ehtiram nümayiş etdirilib.
Buraxılış mərasimində Ümummilli Lider Heydər Əliyevin və Vətən uğrunda həlak olan şəhidlərimizin xatirəsi bir dəqiqəlik sükutla yad edilib. Hərbi orkestrin müşayiəti ilə Azərbaycan Respublikasının Dövlət Himni səsləndirilib.
Daha sonra tədbirdə çıxış edən HDQ komandanı kontr-admiral Şahin Məmmədov kursu müvəffəqiyyətlə bitirən hərbçiləri təbrik edib, Azərbaycan və Türkiyə ordularının peşəkar təlimatçılarının da cəlb edildiyi kursların yüksək səviyyədə təşkilinə və keçirilməsinə görə heyətə təşəkkürünü bildirib.
Daha sonra Azərbaycan və Türkiyədən olan təlimatçılara, kursu müvəffəqiyyətlə bitirən məzunlara fəxri fərmanlar, sertifikatlar, fərqlənmə döş nişanları və qiymətli hədiyyələr təqdim olunub.
Kurs birincisi tərəfindən yaş kötüyünə rəmzi emblem vurulub.
15-12-2025, 16:46
Ərdoğanın oğlundan atasına dəstək çağırışı
Türkiyə prezidenti Rəcəb Tayyib Ərdoğanın oğlu Bilal Ərdoğan İstanbulda Ərzincanlı iş adamları ilə keçirilən görüşdə çıxış edib və iştirakçıları prezidentin ətrafında birləşməyə çağırıb.
O bildirib ki, Türkiyənin dünyanın ən böyük beş iqtisadiyyatından birinə çevrilmək potensialı var və bunun üçün əsas şərt birlik və həmrəylikdir.
Bilal Ərdoğanın sözlərinə görə, Türkiyə böyük enerji və imkanlara malikdir, lakin bu potensialın tam reallaşması üçün daha geniş düşünmək, ümumi məqsədlər ətrafında toparlanmaq lazımdır. O, atasının beynəlxalq arenada Türkiyəni təmsil etdiyini vurğulayaraq, prezident haqqında mənfi danışılmasına yol verilməməsinin vacibliyini qeyd edib.
“Ölkəni dünyada təmsil edən prezidentin arxasında durmağın nəyi pisdir? Nə itirərik ki? Bu ölkə üçün bu qədər iş görmüş, Türkiyəni yeni mərhələyə çıxarmış və dünyada hörmət qazanan bir liderin ətrafında birləşmək lazımdır”, - deyə Bilal Ərdoğan bildirib.
O əlavə edib ki, prezident Ərdoğanın gördüyü işlərin dəyəri gec-tez mütləq şəkildə qəbul ediləcək, lakin bunun daha tez baş verməsi daha yaxşı olardı. Bilal Ərdoğanın fikrincə, əgər son 23 il ərzində dəstək daha güclü olsaydı, Türkiyə bu gün daha da qüdrətli ola bilərdi. Onun sözlərinə görə, daxili çəkişmələr və “xainlər” prezidentin enerjisinin boşa xərclənməsinə səbəb olub və bu da ölkənin mövqelərini zəiflədib.
15-12-2025, 16:43
Azərbaycanda bu heyvan növləri yoxa çıxıb
Azərbaycanda fauna müxtəlifliyi son illər diqqətçəkən dəyişikliklərlə üz-üzə qalıb. Belə ki, aparılan müşahidələr göstərir ki, həm ev təsərrüfatlarında saxlanılan heyvanların sayı, eləcə də vəhşi təbiətdə yaşayan növlərin populyasiyası tədricən azalır. Sözügedən prosesin təkcə ekoloji deyil, eyni zamanda sosial və iqtisadi amillərlə də sıx bağlı olduğu bildirilir.
Elm və Təhsil Nazirliyi Zoologiya İnstitutunun Quru onurğalıları laboratoriyasının müdiri Təvəkkül İsgəndərov qeyd edib ki, bu fauna müxtəlifliyi həmin ərazinin zəngin heyvanat aləminə malik olması ilə izah olunur. Onun sözlərinə görə, həmin ərazidə müxtəlif heyvan növləri sürünənlərdən tutmuş quşlara və yırtıcı məməlilərə qədər geniş fauna nümayəndələri yaşayır.
“Bu ərazi ekosistem baxımından da çoxşaxəlidir. Burada yarımsəhra ekosistemi, bozqır-çöllük ərazilər, meşəlik sahələr, çay və su hövzələri ekosistemləri, həmçinin alp və subalp çəmənlikləri mövcuddur. Yəni hər bir ekosistemin özünə uyğun fauna müxtəlifliyi vardır.
Fauna müxtəlifliyi üçün ən böyük təhlükə və əsas mənfi amil insan faktorudur. İnsan təbiətə müdaxilə etdikcə, heyvanların təbii yaşayış mühitləri pozulur. Hər bir heyvan növü özünə xas biotoplarda yaşayır. Məsələn, meşə heyvanları meşəlik əraziləri seçir, düzənlik, yarımsəhra və bozqır-çöllük ərazilərinin isə özünəməxsus fauna növləri var və bunlar onlar üçün təbii yaşayış yerləridir”.
O, həmçinin vurğulayıb ki, insan məskunlaşması əsasən düzənliklərdə, yarımsəhra zonalarında və tarixi ərazilərdə daha sıxdır:
“Məhz bu səbəbdən insan müdaxiləsinin çox olduğu yerlərdə təbii yaşayış mühitləri daha çox pozulur. Çöllük ərazilər əkin sahələrinə çevrilir, bağlar salınır, suvarma sistemləri qurulur, bəzən ərazilər qazılaraq su hövzələri yaradılır. Bu cür dəyişikliklər ekosistemin təbii tarazlığını pozur.
Hansı ərazi pozulub sıradan çıxarılırsa, həmin əraziyə uyğun olan heyvan növləri ya azalır, ya da tamamilə yox olur. Bu, populyasiyanın zəifləməsinə və bəzən sıradan çıxmasına səbəb olur.
Məsələn, Abşeron yarımadasını götürək. Təxminən 50 il əvvəl burada indiki qədər sıx məskunlaşma yox idi və boş ərazilər çox idi. Həmin ərazilərdə yarımsəhra faunasına xas olan müxtəlif heyvan növləri - kiçik məməlilərdən tutmuş quşlara, çaqqala, tülkülərə qədər, sərbəst şəkildə yaşayırdı və insanlar onlarla nadir hallarda rastlaşırdı”.
Təvəkkül İsgəndərov onu da əlavə edib ki, son 50 ildə, xüsusən də son 15 ildə demoqrafik dəyişikliklər o qədər sürətlə baş verib ki, Abşeron yarımadasında heyvanların təbii yaşayış mühiti demək olar ki, tamamilə yox olub:
“Yarımsəhra ərazilərində evlər, villalar, bağlar, kəndlər salınıb, yollar çəkilib, sənaye obyektləri inşa edilib. Bu isə heyvanların yaşaması üçün əlverişli şəraiti tamamilə aradan qaldırıb.
Yaşayış mühitinin pozulması həmin ərazilərdə populyasiyaların sıradan çıxmasına gətirib çıxarır. Buna görə də insan fəaliyyəti sıx olan yerlərdə fauna müxtəlifliyi kəskin şəkildə azalır. Heyvanlar sıxışdırılır, daha əlverişsiz ərazilərə çəkilməyə məcbur olur və nəticədə həmin ərazilərdə bəzi növlər tamamilə yox olur”.
T.İsgəndərov nəzərə çatdırıb ki, xüsusilə nadir və sayı az olan növlər üçün bu təhlükə daha böyükdür:
“Bu baxımdan onların nəsli kəsilmə riski də daha yüksəkdir. Məhz buna görə də nadir və təhlükə altında olan növlər “Qırmızı Kitab”a daxil edilir. Azərbaycanda da, eləcə də dünya üzrə növlərin qorunması üçün beynəlxalq “Qırmızı Siyahılar” mövcuddur.
Siyahılara daxil edilən heyvan növlərinin saxlanması, qorunması üçün xüsusi tədbirlər görülür. Növ müxtəlifliyinin azalması ekosistem üçün çox təhlükəlidir. Çünki bir növün sıradan çıxması digər növlərin də tədricən azalmasına və ekoloji tarazlığın pozulmasına səbəb olur”.
Həmsöhbətimiz eyni zamanda bildirib ki, bu səbəbdən növlərin qorunması üçün dövlət səviyyəsində xüsusi tədbirlər həyata keçirilir:
“Azərbaycanda bütün fauna qruplarına aid olan nadir növlər həşəratlardan tutmuş iri yırtıcılara qədər daim monitorinq edilir, onların ekoloji vəziyyəti qiymətləndirilir və mühafizə tədbirləri görülür. Bu növlərin hamısı Qırmızı Kitaba daxil edilib və onların ovlanması qanunla qadağandır.
Azərbaycanda Qırmızı Kitaba düşən bütün heyvan növlərinin sayı azalmaqda olan növlərdir. Məsələn, məməlilər üzrə 43 növ, sürünənlərdən 22 növ, bu növlərin sayı ildən-ilə azalır. Onlar məhz saylarının azalmasına görə bu siyahıya daxil edilib. Quşlarda isə sadaladıqlarımızla müqayisədə daha çox, təxminən 70-dən çox 80-ə yaxın növdür ki, nəsli kəsilmək təhlükəsi ilə üz-üzədir. Hazırda ölkəmizdə tamamilə nəsli kəsilmiş və artıq müşahidə olunmayan çox sayda növ yoxdur. Lakin keçmişdə belə hallar olub”,- deyə o, söyləyib.
Yekun olaraq Təvəkkül İsgəndərov qeyd edib ki, XX əsrin əvvəllərinə qədər Azərbaycan ərazisində Salyanda yaşayan pələng (Qafqaz bəbiri) artıq nəsli kəsilib:
“Hazırda isə bəzi yırtıcı növlər var ki, onlar çox nadir hallarda rast gəlinir və nəsli kəsilmə təhlükəsi altındadır. Əgər bu növlər haqqında vaxtında və effektiv qoruma tədbirləri görülməsə, onların da tamamilə yox olması mümkündür”,- deyə o fikrini tamamlayıb.
15-12-2025, 16:37
Qara dənizdə təhlükə artır - Ekspertdən XƏBƏRDARLIQ
“Ukrayna–Rusiya müharibəsinin dərinləşməsi ilə hərbi əməliyyatların coğrafiyası da genişlənib. Dəniz hərbi əməliyyatları gedişində digər ölkələrin gəmilərinin vurulması ehtimal olunan haldır”.
Bu sözləri Ukrayna-Rusiya müharibəsi fonunda qonşu ölkələrin, o cümlədən Türkiyəyə məxsus gəmilərin hədəf alınmasını şərh edən politoloq Aydın Quliyev deyib.
Aydın Quliyev hər hadisənin dəqiq analiz edilməsinin zəruri olduğunu vurğulayaraq, bəzi gəmilərin formal olaraq başqa ölkələrə məxsus görünsə də, faktiki olaraq Rusiya neftini və ya mallarını daşıya biləcəyinə diqqət çəkib.
Politoloq əlavə edib ki, məhz bu səbəbdən Ukrayna həmin gəmiləri Rusiyanın müharibə infrastrukturunun bir hissəsi kimi qiymətləndirir və onları hədəf alır.
Şərhçi Türkiyə ilə əlaqəli gəmilərin zərər görməsi məsələsinə də toxunub və iki mühüm məqamı xüsusi qeyd edib:
"Türkiyə bayrağı altında üzən rəsmi Türkiyə gəmilərinin məqsədli şəkildə hədəf alınmasını Ukraynaya aid etmək məntiqli deyil. Türkiyə müharibədə birbaşa tərəf deyil və belə bir addım ciddi diplomatik və hüquqi nəticələr doğura bilər.
Türkiyə gəmiləri ilə bağlı hadisələr məqsədli hücum kimi yox, daha çox təsadüfi və ya dolayı nəticə kimi qiymətləndirilir”.
Aydın Quliyevin fikrinə görə, ABŞ və Qərb isə kompromis adı altında Ukraynanı güzəştlərə məcbur etmək istəyir. O, tarixi nümunə kimi 1990-cı illərdə Ukraynanın nüvə silahlarından imtina etməyə məcbur edilməsi, indi isə ərazi güzəştlərinə təzyiq göstərilməsini xatırladıb.
15-12-2025, 16:33
Tramp Belarusdakı ABŞ səfirliyini yenidən açır
Belarus və ABŞ arasında münasibətlər tədricən yaxınlaşır.
Bu barədə "Nyu-York Tayms" qəzeti analitik məqaləsində yazıb.
Nəşrin məlumatına görə, bunu Amerika-Belarus danışıqları zamanı Belarus həbsxanalarında cəza çəkən 100-dən çox siyasi məhbusun azadlığa buraxılması faktı da sübut edir.
Məqalədə bildirilib ki, münasibətlərin yaxınlaşması bir neçə aydır ki, müşahidə olunur və məhbusların azadlığa buraxılması Belarus prezidenti Aleksandr Lukaşenko ilə ABŞ prezidentinin xüsusi nümayəndəsi Con Koul arasında şənbə günü Minskdə keçirilən danışıqlarla mümkün olub. Siyasi məhbuslardan biri olan Mariya Kolesnikova azadlığa buraxılaraq Belarus-Ukrayna sərhədinə köçüb. 2012-ci il Nobel Sülh Mükafatı laureatı, insan haqları fəalı Ales Belyatski də Vilnüsə gedib.
Bütün bunlar göstərir ki, Vaşinqton tədricən, lakin davamlı olaraq Minsklə münasibətlərin yenidən nəzərdən keçirilməsi kursunu qəbul edib və bu, Tramp administrasiyasının avtoritar rejimlərlə münasibətləri yenidən nəzərdən keçirmək üçün ümumi siyasi xətt kontekstində nəzərdən keçirilməlidir.
Məhz bu yaxınlaşma çərçivəsində ABŞ Minskə qarşı sanksiya məhdudiyyətlərini yumşaltmağa başlayıb. Xüsusilə, Vaşinqton Belarus kaliumunun tədarükünə qoyulan məhdudiyyəti aradan qaldırıb.
Vaşinqton həmçinin Belavia şirkətinə qoyulan məhdudiyyətləri aradan qaldırmağa və Minskdəki Amerika səfirliyinin fəaliyyətini bərpa etmək məsələsini nəzərdən keçirməyə hazır olduğunu bildirib.
Məqalədə qeyd olunur ki, bu il Con Koul Belarusa ən azı dörd dəfə səfər edib ki, bu da Vaşinqtonla Minsk arasında diplomatik əlaqələrin intensivləşdiyini göstərir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!