8-10-2025, 13:47
FHN əməkdaşı həbs edildi - İş yoldaşını aldadıb 66 min manatını alıb
Fövqəladə Hallar Nazirliyinin “Azərinşaatlayihə” institutunun sabiq mühəndisi iş yoldaşını aldatmaqda ittiham olunur.
İnstitutun Ofelya adlı əməkdaşı Cinayət Məcəlləsinin 178.3.2-ci maddəsi (külli miqdarda dələduzluq) ilə təqsirli bilinib.
Məlumata görə, Ofelya 2021-ci ildə iş yoldaşı Fəridi çoxmərtəbəli binadan mənzil alacağına inandırıb. O, Fəridə binadan biri 42,5 kv.m-lik, digəri isə 69,5 kv.m-lik iki mənzilin satılacağı və yaxın vaxtlarda təhvil veriləcəyi barədə yalan vəd verib.
Fərid bu təklifə inanaraq müxtəlif tarixlərdə Ofelyaya ümumilikdə 66 min 100 manat məbləğində vəsait verib. Lakin nə mənzil alınıb, nə də pul qaytarılıb.
Sonradan təqsirləndirilən şəxs istintaq zamanı 30 min manat hissəni geri qaytarıb, qalan məbləği ödəməkdən boyun qaçırıb.
FHN əməkdaşı məhkəmədə özünü təqsirli bilməyib. O, pulu “borc kimi” aldığını, heç kimə mənzil vəd etmədiyini bildirib. Lakin iş materiallarında olan səs yazıları, WhatsApp yazışmaları və şahid ifadələri bu versiyanı təkzib edib.
Məhkəmədə dindirilən şahidlər də təsdiqləyiblər ki, pullar mənzil almaq adı ilə verilib, söhbət borcdan getməyib.
İş materiallarında təqdim olunan səs yazısında Ofelyanın zərərçəkmişə evləri təhvil verəcəyi barədə danışdığı müəyyən olunub. Yazışmalarda da aldığı məbləğlər və vədlər açıq şəkildə qeyd edilib.
Məhkəmə hesab edib ki, Ofelya Abbasova tamah niyyəti ilə etibardan sui-istifadə edərək özgə əmlakını ələ keçirib və bu əməl Cinayət Məcəlləsinin 178.3.2-ci maddəsinə tam uyğundur.
Məhkəmənin hökmü ilə Ofelya Abbasova 5 il müddətinə azadlıqdan məhrum edilib.
Həmçinin təqsirləndirilən şəxs zərərçəkmişə 36 min 100 manat maddi zərər, 3 min manat mənəvi zərər və 208 manat dövlət rüsumu olmaqla ümumilikdə 39 min 308 manat tutulmasına qərar verilib.
8-10-2025, 13:39
Kimya üzrə Nobel mükafatı bu şəxslərə verildi
2025-ci ildə kimya üzrə Nobel mükafatı laureatları kimlərdir?
Kimya üzrə Nobel mükafatı laureatları məlum olub.
Susumu Kitavaga, Richad Robson və Omar M. Yaghi sözügedən sahə üzrə 2025-ci ilin laureatları elan edilib.
2024-cü ildə kimya üzrə Nobel mükafatına kimlər layiq görülmüşdü?
Xatırladaq ki, ötən il kimya üzrə Nobelə David Beyker, Demis Hassabis və Con M. Camper layiq görülüblər.
8-10-2025, 13:22
Azərbaycanla Xorvatiya arasında qarşılıqlı ticarət göstəriciləri yüksəkdir
Azərbaycanla Xorvatiya arasında qarşılıqlı ticarət göstəriciləri yüksəkdir.
Bunu Milli Məclisin sədri Sahibə Qafarova xorvatiyalı həmkarı Qordan Yandrokoviçlə birlikdə keçirdiyi brifinqdə deyib.
S.Qafarova diqqətə çatdırıb ki, son 11 ildə Azərbaycan və Xorvatiya parlament sədrləri arasında ilk səfər və görüş həyata keçirilir:
"İki ölkə arasında əməkdaşlığın müxtəlif istiqamətlərinə nəzər yetirdikdə, qarşılıqlı ticarət göstəricilərinin yüksək səviyyədə olduğunu müşahidə edilir. Enerji sahəsi iqtisadi əlaqələrimizdə mühüm yerə malikdir. Bildiyiniz kimi, bu gün Azərbaycan 10 Avropa, o cümlədən 8 Avropa İttifaqı ölkəsinə qaz ixrac edir ki, Xorvatiya da bu ölkələrdən biridir. Müxtəlif sahələrdə əməkdaşlığın daha da genişləndirilməsi üçün müntəzəm müzakirələr aparılır. Bu mənada, "İqtisadi əməkdaşlığı təşviq etmək məqsədi ilə Birgə Komissiya"nın fəaliyyəti xüsusi aktuallıq kəsb edir".
İki ölkə parlamentləri arasındakı əlaqələrin daha da genişləndirmək üçün yaxşı imkanların mövcud olduğunu deyən sədr əlavə edib ki, Yandrokoviçin səfəri bu imkanlardan istifadə etmək niyyətini təsdiq edir:
"Bu gün dostluq qruplarımızı daha fəal əməkdaşlığa dəvət etdik. Parlament üzvlərimzin qarşılıqlı səfərlərinin sayının artırılması arzuolunandır. Digər tərəfdən, beynəlxalq parlament təşkilatlarındakı nümayəndə heyətlərimizin daha da sıx təması, qarşılıqlı maraq doğuran məsələlərdə qarşılıqlı dəstəyi də əhəmiyyətlidir".
8-10-2025, 13:16
Yollarda görünüş məsafəsi məhdudlaşacaq
Oktyabrın 8-i gecə və səhər bəzi yerlərdə dumanlı hava şəraiti müşahidə olunacaq.
Bu barədə Milli Hirometeorologiya Xidmətindən məlumat verilib.
Bildirilib ki, dumanlı hava şəraiti ilə əlaqədar olaraq gecə və səhər avtomobil magistral yollarında görünüş məsafəsinin 500-1000 metrədək məhdudlaşacağı gözlənilir.
8-10-2025, 13:09
Keçmiş arvadını məktəbin qarşısında öldürmək istədi - 15 il HƏBS
Keçmiş həyat yoldaşını öldürməyə cəhd edən 1969-cu il təvəllüdlü Əfqan Səfərova (ad şərtidir) hökm oxunub.
Hadisə 10 fevral 2025-ci il tarixdə, Suraxanı rayonunun Hövsan qəsəbəsində yerləşən 270 nömrəli tam orta məktəbin qarşısında baş verib.
Araşdırma zamanı müəyyən edilib ki, təqsirləndirilən şəxs həmin məktəbdə xadimə işləyən keçmiş həyat yoldaşı Gülsadətlə (ad şərtidir) görüşərək birgə yaşadıqları illərdə xərclədiyi vəsaitin geri qaytarılmasını tələb edib. Qadının bu tələbi rədd etməsindən sonra o, evinə gedərək "rezak" (kəsici alət) götürüb və günün ikinci yarısında yenidən məktəbin qarşısına qayıdıb.
Saat 15 radələrində qadın işdən çıxarkən arxadan yaxınlaşaraq onun boğaz və əl nahiyələrinə zərbələr endirib. Hadisə zamanı ərazidə şagirdlər də olub.
Zərərçəkmişin qışqırığını eşidən taksi sürücüsü Cavid adlı şəxs hadisəyə müdaxilə edərək hücum edən şəxsi dayandırıb və rezakı onun əlindən alıb. Yaralı qadın xəstəxanaya çatdırılıb və vaxtında göstərilən tibbi yardım nəticəsində həyatı xilas edilib.
Məhkəmədə ifadə verən təqsirləndirilən şəxs cinayəti törətdiyini qismən etiraf etsə də, qadını öldürmək niyyətində olmadığını bildirib. Lakin şahidlərin ifadələri, ekspertiza rəyləri və toplanmış digər sübutlar onun qəsdən öldürməyə cəhd etdiyini təsdiqləyib.
Zərərçəkmiş qadın məhkəmədə ifadə verərək keçmiş ərinin davamlı şəkildə onu döydüyünü, hədələdiyini və təqib etdiyini, hadisə günü də “səni öldürəcəyəm” deyə təhdid etdiyini bildirib.
Hökmə əsasən, təqsirləndirilən şəxs Azərbaycan Respublikasının Cinayət Məcəlləsinin 29, 120.2.2 (qəsdən adam öldürməyə cəhd - xüsusi amansızlıqla törədildikdə) və 221.3 (xuliqanlıq - silah qismində istifadə olunan əşya ilə törədildikdə) maddələri ilə təqsirli bilinib.
Məhkəmə onu 15 il 3 ay müddətinə azadlıqdan məhrum edib.
8-10-2025, 13:00
Xocalının bu kəndinə növbəti köç oldu - FOTO
Oktyabrın 8-də Xocalının Xanyurdu kəndinə növbəti köç həyata keçirilib.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən xəbərə görə, ölkəmizin müxtəlif şəhər və rayonlarında müvəqqəti məskunlaşmış 69 nəfərdən ibarət 18 ailə bu gün Xanyurdu kəndinə qayıdıb.
Rəsmilər, sakinləri doğma kəndlərinə dönüş münasibətilə təbrik edib, yeni tikilmiş fərdi yaşayış evlərinin açarlarını onlara təqdim ediblər.
Qeyd edək ki, Xanyurdu kəndində sakinlər üçün müasir standartlara uyğun fərdi evlər inşa olunub, elektrik, qaz, su təchizatı, rabitə və internet infrastrukturu tam şəkildə təmin edilib.
Xatırladaq ki, bugünədək Xocalı rayonunun Xanyurdu kəndinə 69 ailədən ibarət 237 nəfər keçmiş məcburi köçkün köçürülüb.
8-10-2025, 12:55
Bakıda avtoxuliqanlıq edən sürücü həbs edildi
Bakıda avtoxuliqanlıq edən sürücü həbs edilib.
Bu barədə Bakı şəhər Dövlət Yol Polisi İdarəsi məlumat yayıb.
Bildirilib ki, DYP əməkdaşları tərəfindən yol hərəkəti qaydalarını kobud şəkildə pozub avtoxuliqanlıq edərək digər hərəkət iştirakçılarının həyat və sağlamlığına real təhlükə yaradan "BYD" markalı 77-SH-182 dövlət qeydiyyat nişanlı nəqliyyat vasitəsinin sürücüsü Vəzirov İbrahim saxlanılıb.
Sürücü barəsində Azərbaycan Respublikasının İnzibati Xətalar Məcəlləsinin müvafiq maddələrinə əsasən protokol tərtib edilərək baxılması üçün aidiyyəti məhkəməyə göndərilib. Məhkəmənin qərarı ilə sürücü İ.Vəzirovun idarəetmə hüququ 1 il müddətinə məhdudlaşdırılıb və o, 1 ay müddətinə inzibati qaydada həbs edilib.
8-10-2025, 12:54
İlham Əliyev Xorvatiya parlamentinin sədrini qəbul edib
Azərbaycan Respublikasının Prezidenti İlham Əliyev oktyabrın 8-də Xorvatiya parlamentinin sədri Qordan Yandrokoviçin başçılıq etdiyi nümayəndə heyətini qəbul edib.
Xorvatiya parlamentinin sədri Azərbaycana ilk dəfə səfər etdiyini deyərək, paytaxt Bakının gözəlliyinin onda dərin təəssürat hissi yaratdığını bildirdi.
Qordan Yandrokoviç Prezident İlham Əliyevi Azərbaycan dövləti və xalqı naminə gördüyü işlərə və xidmətlərinə görə təbrik etdi. Qonaq, həmçinin Vaşinqtonda Azərbaycan ilə Ermənistan arasında sülh gündəliyinin irəliyə aparılması istiqamətində əldə edilmiş nəticələr münasibətilə də təbriklərini çatdırdı.
Azərbaycan ilə Xorvatiya arasında əlaqələrin yaxşı səviyyədə olduğunu deyən Qordan Yandrokoviç parlamentlərarası münasibətlərin daha da genişləndirilməsi üçün imkanların mövcud olduğunu vurğuladı. Hər iki ölkədə parlamentlərarası dostluq qruplarının fəaliyyət göstərdiyini qeyd edən qonaq dostluq qrupları ilə yanaşı, müxtəlif parlament komitələri arasında da əməkdaşlığın vacibliyinə toxundu.
Təbriklərə görə təşəkkürünü bildirən Prezident İlham Əliyev Azərbaycanla Ermənistan arasında əldə olunmuş razılaşmaların tarixi əhəmiyyət kəsb etdiyini vurğuladı.
Dövlətimizin başçısı Azərbaycan ilə Xorvatiya arasında əlaqələrin inkişafından məmnunluğunu ifadə etdi.
Xorvatiyanın Azərbaycanın Avropa İttifaqı və NATO ilə əlaqələrinin inkişafını daim dəstəkləməsi vurğulandı.
Görüşdə ikitərəfli münasibətlərin dostluq və tərəfdaşlıq prinsipləri əsasında inkişaf etdiyi bildirildi, enerji, sərmayələr, turizm və digər sahələrdə əməkdaşlıq üçün geniş imkanların olduğu diqqətə çatdırıldı, ölkələrimizin beynəlxalq parlamentlərarası təsisatlar çərçivəsində əlaqələrinin inkişaf perspektivləri müzakirə olundu.
8-10-2025, 12:23
Türk liderləri növbəti dəfə bu ölkədə toplaşacaq
Türkiyə Prezidenti Rəcəb Tayyib Ərdoğan Azərbaycan səfərini başa vurduqdan sonra ölkəsinə dönüş zamanı təyyarədə jurnalistlərin suallarını cavablandırıb.
Ərdoğan bildirib ki, Azərbaycan Prezidenti İlham Əliyevin ev sahibliyi ilə keçirilən Türk Dövlətləri Təşkilatının (TDT) 12-ci Zirvə Toplantısı uğurla başa çatıb. O, təşkilatın son illərdə ciddi inkişaf yolu keçdiyini vurğulayıb:
“3 oktyabrda Türk Dövlətləri Əməkdaşlıq Gününü qeyd etdik. Beləliklə, təşkilatımızın təməlini qoyan Naxçıvan Sazişinin 16-cı ildönümünü geridə qoyduq. Qısa müddətdə bu qurum ailə məclisimizə çevrildi və türk dünyasının ortaq vizyonunu qlobal miqyasda daha görünən etdi”.
Ərdoğan qeyd edib ki, Qəbələdə keçirilən zirvə toplantısında xarici siyasət, iqtisadiyyat, mədəniyyət və humanitar sahələrdə əməkdaşlıq məsələləri müzakirə olunub:
“Türk dünyasının institusional birliyinin dərinləşdirilməsi ilə yanaşı, digər dövlətlər və beynəlxalq təşkilatlarla əməkdaşlığın gücləndirilməsi istiqamətində addımlar atmağı qərara aldıq. Həmçinin "Türk Dövlətləri Təşkilatı Plus" adlı yeni formatın yaradılmasına dair razılıq əldə olundu.”
Ərdoğanın sözlərinə görə, Qəbələ Bəyannaməsində müdafiə sənayesi, enerji, nəqliyyat və strateji minerallar sahəsində əməkdaşlığın genişləndirilməsi xüsusi yer alıb. Zirvənin əsas mövzusu isə regional sülh və təhlükəsizlik olub.
“Qəzza, Suriya və Cənubi Qafqazda sabitlik məsələləri də birgə bəyanatda öz əksini tapdı. Xarici işlər nazirlərimizin bu istiqamətdə daha sıx toplanması üçün göstəriş verdik”, - o bildirib.
Prezident, həmçinin Türkmənistan və Azərbaycanın birgə təşəbbüsü ilə Füzulidə inşa ediləcək məscidin təməlqoyma mərasiminə canlı bağlantı ilə qatıldıqlarını xatırladıb.
Türkmənistanın Türk Akademiyası və Türk Mədəniyyəti və İrsi Fonduna müşahidəçi üzv qismində qəbulunu “türk ailəsinin tamlanması istiqamətində mühüm mərhələ” adlandırıb.
Ərdoğan Şimali Kipr Türk Respublikasının təşkilatda daha yüksək səviyyədə təmsil olunmasının vacibliyini vurğulayıb: “2022-ci ildən etibarən Şimali Kiprin təşkilatla birbaşa əlaqələri artıb. Qəbələ Zirvəsində də Kipr türklərinin haqlarının qorunması ilə bağlı dayanışma ifadələri birgə bəyanatda öz əksini tapdı. Şimali Kiprin Türk Akademiyasına müşahidəçi üzv qismində qəbuluna dair qərar da qüvvəyə mindi.”
Ərdoğan çıxışında təşkilatın artıq yalnız mədəni deyil, strateji bir birlik olduğunu qeyd edib:
“Türk Dövlətləri Təşkilatı artıq təkcə mədəni bir birləşmə deyil, strateji dayanışma platformasıdır. Qlobal gərginliklər bizi də yaxından təsir edir. Təhlükə olan yerdə təbii ki, tədbir də olacaq. Biz istihbarat, sərhəd təhlükəsizliyi və kibermüdafiə sahələrində çoxşaxəli əməkdaşlıq aparırıq. Dünya miqyasında təhlükəsizlik xərcləri artır, biz də bu istiqamətdə lazımi addımları atırıq.”
Türkiyə Prezidenti sonda bildirib ki, təşkilatın beynəlxalq nüfuzu sürətlə artır və qarşıdakı dövrdə bu əməkdaşlıq daha da dərinləşəcək:
“Türk Dövlətləri Təşkilatı artan nüfuzu və genişlənən təsir dairəsi ilə qlobal aktora çevrilir. Biz bu yolu davam etdirəcəyik, əməkdaşlığımızı daha da gücləndirəcəyik. Növbəti zirvə gələn il Türkiyədə keçiriləcək.”
8-10-2025, 12:11
Çiskin, duman, 28 dərəcə isti... - Sabahın havası
Oktyabrın 9-da gözlənilən hava proqnozu açıqlanıb.
Milli Hidrometeorologiya Xidmətindən verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin səhər bəzi yerlərdə zəif duman, az çiskinli olacağı ehtimalı var. Mülayim cənub-şərq küləyi əsəcək.
Havanın temperaturu gecə 17-19° isti, gündüz 21-26° isti olacaq. Atmosfer təzyiqi 758 mm civə sütunu təşkil edəcək. Nisbi rütubət gecə 80-85 %, gündüz 55-60 % olacaq.
Azərbaycanın rayonlarında hava şəraiti əsasən yağmursuz keçəcək. Lakin gündüz bəzi şərq rayonlarında az çiskinli olacağı ehtimalı var. Bəzi yerlərdə arabir duman. Şərq küləyi əsəcək.
Havanın temperaturu gecə 15-19° isti, gündüz 23-28° isti, dağlarda gecə 8-13° isti, gündüz 15-20° isti olacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!