12-09-2022, 19:44
Xüsusi təyinatlılarımız Türkiyədə təlimdə
Azərbaycan Ordusunun hərbi qulluqçuları Türkiyə Respublikasının Ankara şəhərində keçirilən “Sonsuz qardaşlıq-1” xüsusi təyinatlı qüvvələr təlimində iştirak edir. Bu barədə Müdafiə Nazirliyindən bildirilib. Qeyd edək ki, müxtəlif ölkələrdən hərbi qulluqçuların cəlb olunduğu təlim cari ilin sentyabr ayının 22-dək davam edəcək.
12-09-2022, 19:42
“Whatsapp”da onlayn lotereya - Mindən çox adam "tor"a düşüb
Son aylar “Whatsapp” ani mesajlaşma mübadilə sistemində onlayn lotoreyaların təşkil olunduğu, qoyulan pulun 5 qatının əldə ediləcəyi barədə şirnikləndirici vədlər verilərək orada iştirak edən şəxslərin aldadıldığı barədə Daxili İşlər Nazirliyinə çoxsaylı müraciətlər daxil olub. Nazirlikdən verilən məlumata görə, bu işlə bağlı zərərçəkən şəxslərin, eləcə də onlayn lotoreya keçirmək adı altında insanları aldadan şəxslərin əhatə dairəsi müəyyənləşdirilib. Baş Mütəşəkkil Cinayətkarlıqla Mübarizə İdarəsinin əməkdaşları tərəfindən həyata keçirilən əməliyyat-texniki tədbirlər nəticəsində “Whatsapp” qrupları yaradaraq guya onlayn lotoreya təşkil etməkdə təqsirli bilinən Aida Əliyeva və tanışı Pavlov Qennadiy saxlanılaraq Baş İdarəyə gətiriliblər. Araşdırmalar zamanı müəyyən edilib ki, bu şəxslərin kişi və qadın istifadəçiləri üçün ayrı-ayrılıqda lotoreya təşkil etdikləri 2 “Whatsapp” qrupu olub. Kişilərin qrupunda adminlik Pavlov Qennadiy, qadınların qrupunda isə Aida Əliyeva tərəfindən həyata keçirilib. Hər iki qrupun isə birlikdə 1000-dən artıq üzvü olub. Saxlanılan şəxslər insanlarda inam yaratmaq məqsədi ilə hər gün qruplarda guya müxtəlif şəxslərə ödənişlər etdiklərini bildiriblər və bunun üçün saxta ödəniş qəbzləri hazırlayaraq paylaşıblar. Həmçinin Aida Əliyeva qrup üzvlərinə səsli mesajlar göndərərək bu işdə ona guya cəmiyyətdə xüsusi nüfuzu olan şəxslərin dəstək olduğunu və ödənilən pulların 5 qat qazanc formasında onlara geri qaytarılacağına vəd edib. Faktlarla bağlı Cinayət Məcəlləsinin dələduzluq maddəsinin bir neçə bəndi ilə cinayət işi başlanılıb. Aida Əliyeva və Pavlov Qennadiy təqsirləndirilən şəxs qismində cəlb edilməklə barələrində məhkəmənin qərarı ilə həbs qətimkan tədbiri seçilib. Bu şəxslərin qanunsuz əməllərindən zərərçəkən digər vətəndaşlar varsa Baş Mütəşəkkil Cinayətkarlıqla Mübarizə İdarəsinə müraciət edə bilərlər. Sonda bir daha vətəndaşları onalyn platformalarda yayılan və heç bir iqtisadi əsası olmayan piramida dələduzluq sxemləri rəşkil edən şəxslərə, həmçinin lotoreya adı altında şişirdilmiş qazanclar vəd edən “işbazlara” inanmamağa çağırır.
12-09-2022, 19:30
Türkiyə seçkiləri - Ərdoğana rəqib görünmür
Türkiyə gələn ilin yayında keçiriləcək növbəti prezident seçkilərinə hazırlaşır. Seçki prosesi təkcə qardaş ölkədə deyil, həm də regionda və dünyada diqqətlə izlənilir. Rusiya-Ukrayna müharibəsində tərəflər arasında barışcıl missiyanı öz üzərinə götürən, qlobal taxıl probleminin həlli istiqamətində ciddi səylər göstərən Türkiyənin yeni liderinin kim olacağı maraq doğurur. Bəzi xarici ekspertlər indiki dövlət başçısı Rəcəb Tayyib Ərdoğanın hakimiyyətə gəlişindən sonra Türkiyənin dünyanın lider ölkələrdən birinə çevrildiyini, bu baxımdan növbəti dönəmdə də onun iqtidarda qalacağını bildirirlər. Ərdoğan yenidən qalib gələ biləcəkmi? Bu barədə danışan AKP deputatı, Türkiyə-Azərbaycan parlamentlərarası dostluq qrupunun sədri Şamil Ayrım iqtidar partiyasının seçkidə qələbə qazanacağına inandığını deyib. O, müxalifət partiyalarının hələ də namizədini müəyyən edə bilmədiyini diqqətə çatdırıb. “Türkiyədə prezident seçkiləri gələn ilin iyun ayında keçiriləcək. Müxalifət böyük ehtimalla cənab Ərdoğanın qarşısına yanvar ayından tez namizəd çıxara bilməyəcək. Altı partiyanın bir araya gəldiyi düşərgədən Ərdoğanın qarşısına keçəcək rəqibin kimliyi hələ məlum deyil. Müxalifətə FETÖ və digərləri dəstək verir. Onlar namizəd tapa bilmirlər, bu gedişlə normal namizəd ortaya çıxara bilməyəcəklər. Biz isə öz komandamıza güvənirik və prezidentimiz Ərdoğanın yenidən seçilməsi üçün əlimizdən gələni edəcəyik. Xalqla birlikdə işləyirik. Yeganə sıxıntımız odur ki, hazırda bütün dünyada olduğu kimi Türkiyədə də iqtisadi böhran yaşanır. Bütün bunlara baxmayaraq, hakimiyyət vətəndaşın yanında olmağa davam edir və edəcək. Gələn il təkrar iqtidara gəlmək üçün hazırlığımız davam edir. Xalq arasında keçirilən sorğular göstərir ki, vətəndaşlar bizim yanımızdadır. Xalq güclü liderin, partiyanın kim olduğunu bilir”. Şamil Ayrım seçki ərəfəsindənTürkiyənin xarici siyəsətini də toxunub: “Türkiyədə seçkilər yaxınlaşarkən Yunanıstan münasibətləri daha da pisləşdirməyə çalışır. Yunanıstan iddia edir ki, Türkiyə ona qarşı müharibə elan edəcək. Bunların hamısı uydurmadır. Amma təbii ki, Yunanıstan bunları tək başına demir. Onu da bu sözləri deməyə vadar edən qüvvələr var. Türkiyənin torpaqları özünə yetər. Amma Yunanıstanın Türkiyəyə yaxın adaları silahlandırması qəbuledilməzdir. Türkiyənin dünyada nüfuzu artmaqdadır. Rusiya və Ukrayna arasında münaqişədə vasitəçi dövlət məhz Türkiyədir. Türkiyənin bölgədə istədiyi sülhdür. İsrail, Misir, Ermənistan və Suriya ilə danışıqlar aparılır, normallaşma prosesi davam edir. Ermənistanla əlaqələrimizə xüsusi diqqət edirik. Danışıqlar masasında Azərbaycanın mövqeyindən çıxış edirik. Nə vaxt ki, Ermənistan Zəngəzur dəhlizinin açılamasına razılıq verəcək, o zaman Türkiyə və Ermənistan arasında əlaqələr normallaşacaq”.
Qeyd edək ki, seçki ərəfəsində Türkiyədə vətəndaşların mövqeyini öyrənmək üçün bir sıra rəy sorğuları keçirilir. “Areda Survey”in 2023-cü il seçkiləri üçün keçirdiyi son sorğuda Türkiyə Prezidenti Rəcəb Tayyib Ərdoğan səsvermənin ikinci turuna keçəcəyi təqdirdə 4 namizədi (Kamal Kılıçdaroğlu, Maral Akşənər, Əkrəm İmamoğlu, Mənsur Yavaş) xeyli qabaqlayır. Türkiyədə keçirilən son sorğu maraqlı nəticələr ortaya qoyub. 3872 nəfər arasında aparılan sorğunun nəticələrinə görə, Ərdoğan öz rəqiblərini böyük fərqlə geridə qoyur. “Areda Survey”in ünvanladığı “Bu gün prezident seçkiləri olsa və aşağıdakı namizədlər ikinci tura getsə, hansı namizədə səs verərdiniz” sualının cavabları belədir:
Ərdoğan - Kılıçdaroğlu
İkinci tura Prezident Rəcəb Tayyib Ərdoğan və CHP lideri Kamal Kılıçdaroğlu qalarsa, Ərdoğan 47.9, Kılıçdaroğlu isə 42.4 faiz alar, hər ikisinə səs verməyəcəyini deyənlərin nisbəti 9.7 faizdir.
Ərdoğan - Akşənər
Ərdoğan və İyi partiya sədri Akşənər ikinci tura vəsiqə qazanarsa, Ərdoğan 48.3, Akşənər isə 40 faiz səs toplayar. hər ikisinə səs verməyəcəyini deyənlərin nisbəti 11.7 faizdir.
Ərdoğan - Yavaş
Rəcəb Tayyib Ərdoğan və Ankara bələdiyyəsinin sədri Mənsur Yavaş prezident seçkilərinin ikinci turuna qalarsa, Ərdoğan 47.2, Yavaş isə 42.9 faiz səs ala bilər.
Ərdoğan - İmamoğlu
Türkiyə lideri və İstanbul bələdiyyəsinin sədri Əkrəm İmamoğlu ikinci tura qalarsa, Ərdoğan 47.8, İmamoğlu isə 40.5 faiz səs toplayar.
12-09-2022, 19:20
Ukrayna ordusu bəzi yerlərdə Rusiya sərhədinə çatıb
Cəbhənin Xarkov vilayətindəki bəzi hissələrində Ukrayna döyüşçüləri Rusiya ilə dövlət sərhədinə çatıblar. Bu barədə Xarkov vilayəti hərbi idarəsinin rəhbəri Oleq Sinegubov Telegram-da bildirib. "Hərbçilərimiz Xarkov vilayətinin rus işğalçılarından azad edilməsi əməliyyatını davam etdirir. Düşmən mövqelərini tələsik tərk edərək əvvəllər işğal olunmuş ərazilərin dərinliklərinə və ya dərhal Rusiya Federasiyası ərazisinə doğru qaçır", - o yazıb. Sinegubovun sözlərinə görə, ruslar Velikiy Burluk yaşayış məntəqəsini və Kupyanski rayonunu tərk ediblər. "Cəbhənin bəzi bölmələrində müdafiəçilərimiz Rusiya Federasiyası ilə dövlət sərhədinə çatıblar", - vilayət hərbi idarəsinin rəhbəri qeyd edib. Oleq Sinegubovun dediyinə görə, 11 sentyabr 2022-ci il tarixinə Ukrayna Silahlı Qüvvələri Xarkov vilayətində 40-a yaxın yaşayış məntəqəsini düşməndən azad edib.
12-09-2022, 19:18
Türkiyədə güllələnən azərbaycanlıların adları
İstanbulun Sarıyer rayonunda yerləşən Vadi İstanbul ticarət mərkəzində 11 sentyabr 2022-ci ildə axşam saat 8 radələrində naməlum qruplar arasında yaranmış silahlı münaqişədə dördü azərbaycanlı olmaqla 6 nəfər yaralanıb. Bu barədə Azərbaycanın İstanbuldakı Baş konsulluğundan məlumat verilib. Rəsmi məlumata görə, hadisə nəticəsində Rakif Əliyev, Mahrec Kərimov, Azər Amanov və Qulam İbrahimov xəsarət alıblar. “Yaralılar Seyrantepe Hamidiye Etfal Eğitim ve Araştırma Xəstəxanasında müalicə olunurlar. Hadisənin yaranma səbəbləri aidiyyəti polis şöbəsi tərəfindən araşdırılır. Nəticəsi barədə əlavə məlumat veriləcək”, - Baş konsulluqdan bildirilib.
12-09-2022, 19:15
Müdafiə Nazirliyindən Qırmızı Bazar açıqlaması
Bəzi erməni kütləvi informasiya vasitələrində Azərbaycan Ordusunun bölmələri tərəfindən Xocavənd rayonunun Qırmızı Bazar yaşayış məntəqəsi istiqamətində guya atəşin açılması və nəticədə mülki infrastruktura ziyan dəyməsi barədə yayılan məlumat yalandır, heç bir real əsası yoxdur və həqiqəti əks etdirmir. Bu barədə Müdafiə Nazirliyindən bildirilib. "Bu məlumatı qəti surətdə təkzib edirik", - rəsmi açıqlamada qeyd olunub.
12-09-2022, 19:13
Peşə məktəblərində oxuyanlara təhsil krediti veriləcək
“Texniki peşə məktəblərində təhsil alanlara təhsil tələbə kreditlərinin verilməsi məsələsi müzakirə olunur”. Bunu Təhsil Tələbə Krediti Fondunun icraçı direktoru Araz Paşayev deyib. Onun sözlərinə görə, hazırda yüksək texniki peşə təhsili müəssisələrində təhsil alanlara növbəti ilin sentyabrından texniki peşə təhsili üzrə təhsil alanlara da təhsil tələbə kreditlərinin verilməsinə başlanıla bilər.
12-09-2022, 19:10
Ərdoğan Zəngilana gəlir
Türkiyə Prezidenti Rəcəb Tayyib Ərdoğanın bu ay Azərbaycana səfəri gözlənilir. Butov.az-ın əldə etdiyi məlumata görə, qardaş ölkə lideri Azərbaycan Prezidenti ilə birlikdə Zəngilan Beynəlxalq Hava Limanının açılış mərasimində iştirak edəcək. Türkiyə Prezidentini səfərdə geniştərkibli nümayəndə heyətinin müşayiət edəcəyi bildirilir. Qeyd edək ki, Ərdoğan budan öncə mətbuata açıqlamalarında Zəngilan hava limanının açılışında iştirak edəcəyini bildirmişdi. Xatırladaq ki, Zəngilan Beynəlxalq Hava Limanının tikintisi artıq yekunlaşmaq üzrədir. Yeni aeroportun yaxın günlərdə təhvil verilməsi planlaşdırılır. Uçuş-enmə zolağının uzunluğu 3 min metr olan hava limanında tikinti işlərinə 2021-ci ilin may ayında başlanılıb. Zəngilan Hava Limanı bütün növ təyyarələri, o cümlədən ağır yük təyyarələrini qəbul etmək imkanına malik olacaq. Rayonun coğrafi yerləşməsi və burada olan imkanlar Zəngilanı beynəlxalq nəqliyyat-logistika mərkəzinə çevirmək üçün əlverişli şərait yaradır. Bundan əlavə, bu hava limanı Zəngilanın gələcək uğurlu sosial-iqtisadi inkişafında böyük rol oynayacaq.
12-09-2022, 19:03
Ermənistanda parlament işə başladı - Müxalifət boykot etdi
Bu gün, sentyabrın 12-də Ermənistanın parlamenti yeni sessiyasına başlayıb. Butov.az xəbər verir ki, sessiyanın iclasları dörd gün davam edəcək və 45 məsələyə baxılacaq. Parlament müxalifəti sessiyanı boykot edib.
12-09-2022, 18:56
Ərdoğan Putinə Zelenski ilə görüşməyi təklif edəcək
Türkiyə prezidenti Rəcəb Tayyib Ərdoğan rusiyalı həmkarı Vladimir Putinlə Səmərqənddə planlaşdırılan görüşdə yenidən Ukrayna məsələsini gündəmə gətirəcək. “Hürriyet”in məlumatına görə, Ərdoğan Putinə Ukrayna prezidenti Vladimir Zelenski ilə görüş keçirməyi təklif edəcək. "Ərdoğan və Putin arasında keçiriləcək görüşün ən mühüm mövzusu Ukraynadakı vəziyyət olacaq. Ərdoğan rusiyalı həmkarına Türkiyənin vasitəçilik təşəbbüsləri ilə müharibəni bitirmək və davamlı atəşkəsə nail olmaq üçün bütün səylərini davam etdirəcəyi mesajını verəcək. Prezident liderlərin Türkiyədə görüşü ilə bağlı təklifini Putinə təkrarlayacaq Ərdoğan məsələnin diplomatik yolla həllini vurğulayacaq. İki liderin görüşündə Suriyaya qarşı mümkün hərbi əməliyyatın da gündəmdə olması gözlənilir”, - “Hürriyet” yazıb. Həmçinin bildirilir ki, Türkiyə və Rusiya Federasiyası liderlərinin qarşıdan gələn şəxsi görüşündə əsas müzakirələrdən biri də “taxıl dəhlizi”nin fəaliyyətinə dair olacaq. “Putinin “təəssüf ki, taxıl varlı ölkələrə gedir” bəyanatından sonra Ərdoğan Rusiya mallarının Türkiyənin koordinasiya etdiyi gəmilərlə dəhliz boyu göndərilməsini xahiş edəcək”, - nəşr yazır. Rusiya prezidenti Vladimir Putin Şərq İqtisadi Forumunun (WEF) plenar iclasında Ukrayna taxılının ixracı ilə bağlı vəziyyəti şərh edərkən bildirib ki, Avropa dövlətləri inkişaf etməkdə olan ölkələri növbəti dəfə aldadaraq, müstəmləkəçi kimi çıxış etməkdə davam edir. Putin bildirib ki, Ukrayna ərazisindən ixrac edilən taxılın demək olar ki, hamısı inkişaf etməkdə olan ölkələrə deyil, Avropa İttifaqına göndərilib. Onun sözlərinə görə, BMT-nin Ümumdünya Ərzaq Proqramı çərçivəsində 87 gəmidən yalnız 2-si ehtiyacı olan ölkələrə göndərilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!