17-01-2023, 17:02
Enerji sahəsində qərarlı addımlarla irəliləyirik - Türkiyəli nazir
Türkiyənin sənaye və texnologiya naziri Mustafa Varank ölkəsinin enerji siyasətindəki yeniliklər barədə açıqlama verib. Nazir bu barədə Macarıstana səfəri çərçivəsində keçirilən birgə iqtisadi komissiyanın iclasında danışıb. ''Türkiyə enerji sahəsində mərkəz olmaq yolunda qərarlı addımlarla irəliləyir. Bilirsiniz, Azərbaycandan gələn xəttin gücünü gələcəkdə iki qat artıracağıq. Trakyada yeni terminalın hazırlıqları bitmək üzrədir. Buradan da ölkəmizə qaz gəlməyə başlayacaq. Son zamanlarda Qara dənizdə təbii qaz kəşf etmişik", - deyə Varank qeyd edib.
17-01-2023, 16:51
Keçmiş iqtisadiyyat naziri vəfat etdi
Azərbaycan Respublikasının keçmiş iqtisadiyyat naziri, Hesablama Palatasının ilk sədri, tanınmış dövlət xadimi Namiq Nəsrullayev vəfat edib. Sabiq nazir bu gün dəfn olunacaq. Namiq Nəsrullayev 1995-ci ildə iqtisadiyyat nazirinin birinci müavini təyin edilib. 1996-cı ildə iqtisadiyyat naziri postuna yüksəlib və 2001-ci ilin aprel ayına qədər bu vəzifədə işləyib. 2001-ci ildə Hesablama Palatasının sədri təyin edilib və 2007-ci ilə qədər bu vəzifədə çalışıb. Allah rəhmət eləsin.
17-01-2023, 00:01
Britaniyadan Ukraynaya yeni hərbi dəstək planı
Böyük Britaniya Ukraynaya "Bulldog" zirehli personal daşıyıcıları göndərəcək. Bu barədə Britaniya müdafiə naziri Ben Uolles parlamentdə çıxışı zamanı bildirib. Zirehli maşınların sayı açıqlanmayıb. London, həmçinin Kiyevə onlarla pilotsuz uçuş aparatı və “Startstreak” zenit-raket kompleksləri göndərməyə hazırlaşır. Yeni yardım paketinə "Challanger 2” tankları, 8 AS90 silahı daxil olacaq və onların sayı daha da artırılacaq. Bundan əlavə, siyahıya 100.000 artilleriya mərmisi daxildir. Müdafiə naziri onu da bildirib ki, hərbi yardım Ukraynadakı müharibənin gedişatını dəyişdirə və Rusiya qoşunlarını sıxışdırıb çıxara bilər.
16-01-2023, 23:57
Yaponiya Hindistanla ilk dəfə birgə hərbi təlimlərə imza atıb
Yaponiya və Hindistan ilk dəfə birgə hərbi təlimlər keçirir. Bu barədə Yaponiya Müdafiə Nazirliyi məlumat yayıb. Təlimlərin məqsədi Çinin Hind-Sakit okean regionunda artan hərbi təhdidinə cavab verməkdir. Manevrlərdə Hindistan Hərbi Hava Qüvvələrinin (HHQ) dörd Su-30MKI qırıcısı, iki C-17 nəqliyyat təyyarəsi və bir İl-78 yanacaq dolduran təyyarə, Yaponiyadan isə dörd F-2 qırıcısı və dörd F-15 qırıcısı iştirak edir.
16-01-2023, 23:50
Çavuşoğlundan Suriyaya dəstək mesajı
Türkiyənin xarici işlər naziri Mövlud Çavuşoğlu BMT Baş katibinin Suriya üzrə xüsusi nümayəndəsi Geir Pedersenlə görüşüb. Bu barədə Çavuşoğlu özünün “Twitter” hesabında məlumat yayıb. Nazir BMT Təhlükəsizlik Şurasının 2254 saylı qətnaməsini, siyasi prosesləri və Suriya Konstitusiya Komitəsini dəstəklədiklərini bir daha diqqətə çatdırdığını bildirib.
16-01-2023, 23:47
Putin Ərdoğanla iqtisadi məsələləri müzakirə etdi
Rusiya prezidenti Vladimir Putin və Türkiyə lideri Rəcəb Tayyib Ərdoğan arasında telefon danışığı olub. Bu barədə Kremlin mətbuat xidməti məlumat yayıb. Liderlər Rusiya qazının tədarükü və Türkiyədə regional qaz qovşağının yaradılması sahəsində əməkdaşlığa hazır olduqlarını bildiriblər. “Hər iki tərəf Rusiya-Türkiyə əməkdaşlığını daha da hərtərəfli inkişaf etdirmək niyyətini təsdiqləyib. Prioritetlər arasında enerji sektorunda əməkdaşlıq, o cümlədən Rusiya təbii qazının tədarükü və Türkiyədə regional qaz qovşağının yaradılması var” , - Kremlin saytında qeyd olunub. Bundan əlavə, telefon danışığı zamanı Ukrayna ətrafında vəziyyətlə bağlı fikir mübadiləsi aparılıb. Ukrayna taxılının Qara dəniz limanlarından ixracı, Rusiyadan qida və gübrə tədarükünün bərpası ilə bağlı 22 iyul 2022-ci il tarixli İstanbul sazişinin icrası nəzərdən keçirilib. Dövlət başçıları eyni zamandan Rusiya, Türkiyə və İranın Suriya nizamlanmasına yardım üzrə Astana prosesi çərçivəsində birgə işinin praktiki əhəmiyyətini vurğulayıblar.
16-01-2023, 22:15
Serbiya prezidentindən BMT-yə çağırış
Serbiya prezidenti Aleksandr Vuçiç Birləşmiş Millətlər Təşkilatına (BMT) çağırış edib. O, Kosovadakı serb azlığın hüquqlarının müdafiəsinə qalxıb. Vuçiç albanların serblərə hücum etdiyini iddia edib. "Bu, qəbuledilməzdir. BMT adekvat reaksiya verməlidir", - deyə Serbiya prezidenti bildirib. Qeyd edək ki, son vaxtlar Kosova və Serbiya arasında gərginlik artıb. 2008-ci ildə Serbiyadan müstəqilliyini elan edən Kosova ABŞ, Türkiyə və Avropa ölkələrinin əksəriyyəti tərəfindən tanınır. Azərbaycan isə bu ölkəni Serbiyanın Kosova və Metoxiya regionunun tərkib hissəsi kimi qəbul edir.
16-01-2023, 22:11
İsveçin NATO-ya üzvlüyü müzakirə edildi
Avropa İttifaqı Şurasının prezidenti Şarl Mişel İsveçin baş naziri Ulf Kristersonla görüşüb. Tərəflər İsveçin NATO-ya üzvlük prosesini müzakirə ediblər. Daha sonra birgə mətbuat konfransı keçirilib. İsveç baş naziri ölkəsinin NATO üzvü olmasının vacibliyindən danışıb. Onun sözlərinə görə, İsveçin NATO-ya üzv olması bütün Avropanın təhlükəsizliyi deməkdir. Qeyd edək ki, İsveç və Finlandiya Rusiyanın Ukraynaya hücumundan sonra NATO-ya üzv olmaq istəyini elan etsə də, yeni üzvlərinin qəbulunun konsensus yolu ilə baş tutduğu hərbi alyansın üzvlərindən biri olan Türkiyə terrorla mübarizədə əməkdaşlıqdan yayındıqları üçün bu ölkələrin üzvlüyünə veto qoyacağını açıqlamışdı. Daha sonra əldə olunan razılığa əsasən, İsveç və Finlandiya müəyyən öhdəlikləri yerinə yetirəcəyi təqdirdə rəsmi Ankara buna etiraz etməyəcək.
16-01-2023, 22:05
162 nəfər həmyerlimiz Ukrayna vətəndaşlığını alıb
2022-ci ildə Ukrayna vətəndaşlığını alan Azərbaycan vətəndaşlarının sayı məlum olub. Ukrayna Dövlət Miqrasiya Xidmətindən bildirilib ki, il ərzində ümumilikdə 162 nəfər Azərbaycan vətəndaşı Ukrayna vətəndaşlığını alıb. Bunlardan 14 nəfər Ukrayna prezidenti fərmanı ilə vətəndaşlıq alıb. Vətəndaşlıq alanlardan 2-si uşaqdır. Qeyd edək ki, 2022-ci ilin əvvəlindən Rusiyanın geniş miqyaslı hücumu nəticəsində Ukraynada müharibə gedir.
16-01-2023, 17:58
Bu gün Rusiyanın yeganə taktikası terrordur - Zelenski
Ukrayna prezidenti Volodimir Zelenski Rusiyanın müharibədəki taktikasının terror olduğunu bildirib. Zelenski bu barədə "Telegram" kanalında yazıb. "Bu gün Rusiyanın yeganə taktikası terrordur. Bu cür taktikaların yeganə mümkün nəticəsi məğlubiyyət olacaq. Terror onların zəifliyinin sübutu və bizim dayanıqlılığımız üçün bir sınaq oldu. Bizim üçün ən qaranlıq vaxtlar işıqsız olan vaxtlar deyil, azadlıq olmayan zamandır", - deyə Ukrayna prezidenti qeyd edib. Xatırladaq ki, ötən həftə Rusiya Ukraynanın bir sıra şəhərlərini raket atəşinə tutub. Son olaraq Dneprə raket hücumu zamanı 40 nəfər ölüb, 70-dən çox insan yaralanıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!