5-03-2023, 16:13
Ağrılı günlərdə ölkələrin göstərdiyi həmrəylik ürəklərimizi isitdi - Çavuşoğlu
Türkiyənin arici işlər naziri Mövlud Çavuşoğlu Qətərin paytaxtı Dohada keçirilən Birləşmiş Millətlər Təşkilatının EAGU-V konfransında iştirak edib. Konfransın açılış hissəsində çıxış edən Çavuşoğlu Türkiyə prezidenti Rəcəb Tayyib Ərdoğanın salamlarını çatdırıb. Ərdoğanın hər zaman ən az inkişaf etmiş ölkələrin davamlı inkişafını prioritet hesab etdiyini deyən Çavuşoğlu onun bu konfransın yeni qlobal tərəfdaşlığın inkişafında özəl mərhələ olacağına inandığını vurğulayıb. “Biz ən az inkişaf etmiş ölkələrin sosial, iqtisadi və ekoloji inkişafdan faydalanmasına imkan yaradacaq tərəfdaşlıqdan, qlobal iqtisadi və maliyyə sisteminin bərabərsizliyin daha da dərinləşməsinə mane olacaq əməkdaşlığından ötrü çalışırıq. Fevralın 6-da Türkiyənin iki böyük zəlzələ ilə sarsıldığını və türk xalqının dərin hüzn içində olduğunu qeyd etməliyəm. Bu ağrılı günlərdə beynəlxalq ictimaiyyətin göstərdiyi səmimi həmrəylik ürəklərimizi isitdi, bizə güc verdi", - deyə o söyləyib. Ən az inkişaf etmiş ölkələrin çətin anlarda Türkiyəyə dəstək verən və həmrəylik göstərən ilk ölkələr arasında olduğunu bildirən Çavuşoğlu türk millətinin bunu heç vaxt unutmayacağını əlavə edib.
5-03-2023, 16:08
Silahlı insidentdə həyatını itirən şəxs dəfn olundu
Martın 4-də Bakının Xətai rayonu ərazisində yerləşən hipermarketlərin birindəki bankomatların olduğu ərazidə inkassasiya xidmətinə olan silahlı basqın nəticəsində həyatını itirmiş Həşimov Rüfət Rahib oğlu dəfn olunub. Mərhum Bibiheybət qəbiristanlığında torpağa tapşırılıb. Qeyd edək ki, martın 4-də polis əməkdaşları tərəfindən həyata keçirilən əməliyyat axtarış tədbirləri nəticəsində cinayəti törətməkdə şübhəli bilinən şəxslərdən biri - 2001-ci il təvəllüdlü Ruhlan İsmayılovun paytaxtın Səbail rayonu H.Z.Tağıyev küçəsindəki binaların birində gizlənməsi müəyyən edilib. O, saxlanılarkən avtomat silahdan polis əməkdaşlarına qarşı müqavimət göstərib. Cinayətkar görülən tədbirlərlə zərərsizləşdirilib. Xatırladaq ki, insident nəticəsində bir nəfər ölüb və iki nəfər yaralanıb. Mərhum Həşimov Rüfət Rahib oğlu Rəqəmsal İnkişaf və Nəqliyyat Nazirliyinin tabeli qurumu Hərbiləşdirilmiş Mühafizə İdarəsinin əməkdaşı olmaqla yanaşı, həm də İkinci Qarabağ müharibəsi iştirakçısı olub.
5-03-2023, 15:41
Sabahın hava proqnozu
Azərbaycanda martın 6-na gözlənilən hava proqnozu açıqlanıb. Milli Hidrometeorologiya Xidmətindən verilən məlumata görə, sabah Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Şimal-qərb küləyi gündüz mülayim cənub küləyi ilə əvəz olunacaq. Havanın temperaturu gecə 4-6° isti, gündüz 10-15° isti olacaq. Atmosfer təzyiqi 764 mm civə sütunundan 760 mm civə sütununa enəcək. Nisbi rütubət 60-70 % olacaq. Azərbaycanın rayonlarında əsasən yağmursuz hava şəraiti hökm sürəcək. Lakin gecə bəzi şimal və qərb rayonlarında yağıntılı olacağı, dağlıq ərazilərdə qar yağacağı ehtimalı var. Bəzi yerlərdə duman olacaq. Mülayim qərb küləyi əsəcək. Havanın temperaturu gecə 3-7° isti, gündüz 15-20° isti, dağlarda gecə 0-5° şaxta, gündüz 5-10° isti olacaq.
5-03-2023, 15:38
Bakıda tank mərmisi aşkarlandı
Bakıda döyüşə yararlı tank mərmisi aşkarlanıb. Bu barədə Fövqəladə Hallar Nazirliyindən bildirilib. “112” qaynar telefon xəttinə Bakı şəhəri, Binəqədi rayonu ərazisində hərbi sursat aşkar edilməsi barədə məlumat daxil olub. Məlumatla əlaqədar dərhal FHN-in Xüsusi Riskli Xilasetmə Xidmətinin (XRXX) minalardan təmizləmə üzrə çevik qrupu hadisə yerinə cəlb edilib. Hüquq-mühafizə orqanı əməkdaşları ilə birgə ərazidə müvafiq təhlükəsizlik tədbirləri görüldükdən sonra hadisə yerinə baxış zamanı aşkar edilmiş sursatın döyüş tətbiqinə yararlı 1 ədəd 125 mm-lik ZBM-29 tank mərmisi olduğu müəyyən edilib. Sursat XRXX-nin çevik qrupunun mütəxəssisləri tərəfindən zərərsizləşdirilməsi üçün ərazidən götürülərək kənarlaşdırılıb. Hadisə yerində və ona yaxın ətraf ərazidə əlavə axtarış zamanı başqa hər hansı təhlükəli və ya şübhəli əşya aşkar edilməyib.
5-03-2023, 15:36
Ukraynalı pilotlar ABŞ-a səfər edib
2 ukraynalı pilot ilk dəfə F-16-lar da daxil olmaqla, döyüş təyyarələrində bacarıqlarını qiymətləndirmək üçün ABŞ-a səfər edib. Bu barədə NBC məlumat yayıb. Bildirilib ki, pilotlar Arizona ştatının Tukson şəhərində təlim keçirlər və bu ay onlara daha 10 həmkarı qoşula bilər. Rəsmilər deyirlər ki, təlim proqramının məqsədi pilotların bacarıqlarını artırmaq, eləcə də daha geniş təlim proqramlarının nə qədər vaxt apara biləcəyini hesablamaqdır. Qeyd edək ki, bunun tezliklə baş verəcəyi ilə bağlı müxtəlif açıqlamalar olsa da, hələlik Ukraynaya qırıcıların tədarükü barədə rəsmi məlumat yoxdur.
5-03-2023, 15:31
Saakaşvili səhhəti ilə bağlı açıqlama verdi
Gürcüstanın keçmiş prezidenti Mixail Saakaşvili səhhəti ilə bağlı yeni açıqlama verib. Saakaşvili həbs müddətində çəkisinin 55 kiloqram azaldığını deyib. Beyninin zədələndiyini söyləyən eks-prezident vəziyyətinin ağır olduğunu diqqətə çatdırıb. O, səbəbin zəhərlənmə olduğunu və özünü çox pis hiss etdiyini əlavə edib. "İndi tam yataq xəstəsiyəm, hərdən bayılıram", - deyə Saakaşvili bildirib. Qeyd edək ki, Saakaşvili Ukraynadan Gürcüstüna qayıtdığı 2021-ci ilin oktyabr ayından bəri həbsdədir. O, dəfələrlə aclıq aksiyası keçirib. Səhhətində ağır problemlər yaranan eks-prezident bir müddət əvvəl müalicə müəssisəsinə köçürülüb.
5-03-2023, 14:22
İranda məktəbli qızların zəhərlənməsiylə bağlı aksiyalar başlayıb
İranda qızların kütləvi şəkildə zəhərlənməsi ilə bağlı aksiyalara start verilib. Paytaxtda yerləşən Təhsil Nazirliyinin binası qarşısında, habelə digər şəhərlərdəki əsas yerlərdə etiraz nümayişləri başlayıb. Məlumata görə, zəhərlənmə faktları İranın əksər regionlarında baş verib. Bilinməyən səbəbdən zəhərlənən qızların sayı yüzlərlədir. Qeyd edək ki, İranın 31 vilayətinin 10-da 30-dan çox məktəb və universitetdə qızların zəhərlənməsi halları baş verib.
5-03-2023, 11:34
Əntiqə Rəşid Aslan
Söyüş qəbul edənlərindir...
Əvvəllər Dənizkənarı Milli Parkda Hərbi Qənimətlər Parkı vardı - 2021 -ci il 12 apreldə açılışı oldu. (İndi bilmirəm var ya yoxdu... heç maraqlanmadım da, getmədim də. Varlığı-yoxluğu artıq məni maraqlandırmır).
Bilirsiniz yəqin, Ermənistan ordusuna məxsus Rusiya istehsallı ümumilikdə 300-dən çox eksponat, o cümlədən 150-dək ağır texnika, tanklar, döyüş maşınları, artilleriya qurğuları, zenit-raket kompleksləri, atıcı silahlar, hərbi nəqliyyat sərgilənirdi orda.
Məlum, o qənimətləri qanını qaşığa qoyan, canını heçə sayan Azərbaycan xalqının cəsur oğulları tarixdə görünməmiş igidlik, qəhrəmanlıqları sayəsində gətirmişdilər. Eşidəndə 30 il yanan ürəyimə su səpilmişdi! Gündə 40 dəfə deyirdim ki, Qazilərim yaralarınıza qurban olum, şəhidlərim torpağınıza, cavan, nakam canınıza, ruhunuza qurban olum...
Döyüş bölgəsindən dönəndən sonra planlaşdırırdım ki, o parka gedim, reportaj hazırlayım. Qəlbimdə qürur, gözlərimdə sevinc... Erməniləri dəli eliyən o park məni elə xoşbəxt edirdi kii...
2 gün sonra məlum oldu ki, ziyarət pulludur, biletin qiyməti də cəmi 2 manatdır. İrad bildirə bilərsiniz ki, "nə böyük puldur ki, buna danışırsan?" Bəli böyük pul deyil, amma ürəyimizdəki qüruru, gözümüzdəki sevinci qırmaq üçün kifayət edəcək məbləğdi. Bu xalq neftə, qaza, ikraya, balığa, işığa, suya, bütün təbii sərvətlərə artıqlaması ilə pul ödəyir. Vergi də verir.
Azərbaycanın bu başından, o başına qədər hansı köşəsində bir yay günü altına döşək qoyub oturub dincəlmək istəyirsən, bir dəstə qoçu başının üstünü kəsdirir, pul istəyir... adi çəmənliyi deyirəm eee, adi çəmənlik.
Yadıma düşdü. Vətən müharibəsindən əvvəlki illər idi.Toğanada pulsuz yer tapmadıq ki, oturaq. Həyat yoldaşım qoçunun birinə dedi ki, mənim bu torpaq üçün döyüşmüşəm qanım tökülüb, 2 gün morqda qalmışam, indi şikəstəm, mənim heç haqqım çatmır ki, bu cayın kənarında ailəmlə elə o torpağın üstündə oturum? Qoçu bir az mehribancasına dedi ki, Qardaş biz də yuxarı "haqq-hesab veririk də, sən də bizi başa düş də".
O quruca torpağın üstündə oturmaq üçün də o vaxt 2 manat ödədik! Dedilər, samovar istəyirsinizsə 2 manat ödəyin onu da təşkil edək.
Aydındı, bütün təbii sərvətlər hamısı sizindir, sizin olsun!
Amma nolardı ki, heç olmasa, mənəvi sərvətlərimizə əl uzatmayaydınız? Şuşaya "turpaket" nədir? Oğullarını Şuşa üçün qurban vermiş, şikəstliyini qəbul etmiş Azərbaycan xalqına 2 günlük tur üçün 215 manat, 3 günlük üçün 370 manat pul qoparmaq hansı düşmənçiliyin təzahürüdür? Bu kimin ağıllı məsləhəti" ilədir?
Bilmirəm kim necə düşünür, amma məncə, bu ürəyi Şuşanı görmək eşqi ilə çarpan bir azərbaycanlıya söyüşdən başqa bir şey deyil...
Söyüşü qəbul edənlərə də içi özüm qarışıq ayıb olsun!..
4-03-2023, 22:38
ABŞ Ukraynaya zirehli döyüş maşınları göndərir
ABŞ Ukraynaya vəd etdiyi "Stryker" zirehli döyüş maşınlarını göndərməyə başlayıb. Bu barədə “Military Agenda” nəşri məlumat yayıb. Zirehli maşınlar Almaniyaya göndərilib, oradan Ukraynaya yola düşəcəklər. “ABŞ 90 “Stryker” döyüş maşını göndərib, onlar artıq Almaniyaya çatıblar, oradan da Ukraynaya gedəcəklər”, - məlumatda deyilir.
4-03-2023, 22:10
Silahlı hücumu törədən şəxslərdən biri saxlanılıb, digəri öldürülüb
Bakının Xətai rayonunda cinayət əməli törətməkdə şübhəli bilinənlərdən bir nəfər saxlanılıb, polisə silahlı müqavimət göstərən bir nəfər məhv edilib. Bu barədə Daxili İşlər Nazirliyinin (DİN) Mətbuat Xidmətinin şöbə rəisi, polis polkovnik-leytenantı Elşad Hacıyev bildirib. Onun sözlərinə görə, əməliyyat tədbirləri davam edir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!