3-02-2025, 23:47
Paşinyan ABŞ-də etirazla qarşılandı
Ermənistanın Baş naziri Nikol Paşinyan ABŞ-də
səfərdədir.
O, Vaşinqtona səfəri çərçivəsində ABŞ-dəki həmyerliləri etiraz aksiyası keçirib.
Fəallar Ermənistan səfirliyinin divarına “Paşinyan erməniləri uğursuzluğa düçar etdi” yazılı plakat asıblar.
Bundan əlavə, Vaşinqtondakı erməni icmasının əksər nümayəndələri onunla fevralın 3-nə planlaşdırılan görüşdən imtina ediblər.
3-02-2025, 23:23
ABŞ təşkilatı tərk etsə... - ÜST-dən XƏBƏRDARLIQ
Ümumdünya Səhiyyə Təşkilatına (ÜST) üzv ölkələr təşkilatın büdcəsinin 400 milyon dollar azaldılması məsələsini nəzərdən keçirəcək.
Bu barədə bazar ertəsi dərc olunan sənəddə qeyd olunub.
Büdcənin azaldılmasının səbəbi ABŞ Prezidenti Donald Trampın ölkəsinin ÜST-dən çıxarılma proseduruna başlaması ilə bağlı qərarıdır. ABŞ təşkilatın ən böyük donorudur.
Təşkilatın Baş direktoru Tedros Adanom Qebreyesus aparılmış islahatlardan danışıb, ABŞ hökumətini qərarına yenidən baxmağa və mümkün dəyişiklikləri müzakirə etməyə çağırıb.
Üzv ölkələrin nümayəndələri fevralın 3-dən 11-nə kimi Cenevrədə keçiriləcək iclasda büdcənin azaldılması məsələsini, 2026-2027-ci illər üçün təşkilatın maliyyələşməsini və fəaliyyətini müzakirə edəcəklər.
Bazar ertəsi dərc olunan sənədə əsasən ÜST İcra Komitəsi əsas proqramların büdcəsini 5,3 milyard dollardan 4,9 milyard dollara azaltmağı təklif edir.
“Ən böyük maliyyə donoru təşkilatdan çıxdıqdan sonra büdcəyə dəyişiklik edilməsi labüddür”, - deyə sənəddə qeyd olunub.
Qeyd edək ki, ÜST-nin ümumi büdcəsinin 18 faizi ABŞ-ın payına düşür.
3-02-2025, 22:10
Ukraynada daha bir rus general öldü
Rusiyanın daha bir generalı Ukraynada ölüb.
Bu barədə "Mediazona" nəşri yazıb.
General-mayor Andrey Qolovatskinin Ukrayna ərazisində öldüyü bildirilir. Onun ölümü 30 iyun 2024-cü ildə baş verib və bu gün açıqlanıb.
Qolovatski 2019-cu ildə səkkiz il yarım müddətinə azadlıqdan məhrum edilib. Onun müharibəyə getməsi ilə bağlı heç bir açıqlama verilməyib.
2015-ci ilə qədər Daxili İşlər Nazirliyinin Daxili Qoşunlarının Şimali Qafqaz regional komandanlığı qərargah rəisinin birinci müavini vəzifəsində çalışmış Qolovatski tabeliyində olanlardan rüşvət alma işi üzrə mühakimə olunub. Müstəntiqlərin fikrincə, hərbçilər ona müqavilələrin uzadılması və ya xidmət yerini dəyişməsi üçün pul ödəyiblər.
3-02-2025, 21:05
Gürcüstan AŞPA-dakı nümayəndələri geri çağırır
Gürcüstanda hakim komanda parlamentin Avropa Şurasındakı nümayəndə heyətinin üzvlərini geri çağırıb. Eyni zamanda, “Gürcü Arzusu-Demokratik Gürcüstan” və “Xalqın Gücü” partiyalarının üzvləri səlahiyyətlərinin dayandırılması ilə bağlı Assambleya sədrinə fərdi qaydada müraciət ediblər.
Gürcüstan Parlamentinin Bürosu nümayəndə heyətinin üzvlərinin geri çəkilməsini dəstəkləyib.
Parlamentin xarici əlaqələr komitəsinin sədri Nikoloz Samxaradze büro iclasında bildirib ki, üzvlərin geri çağırılmasına baxmayaraq, nümayəndə heyəti ləğv edilmir, nümayəndə heyəti qalır.
Parlamentin Avropa Şurasındakı nümayəndə heyətində kvotaları “Gürcü Arzusu”nun üzvləri, müxalifət adından isə “Xalqın Gücü”nün üzvləri tutublar.
Parlamentin sədri Şalva Papuaşvili büro iclasında deyib ki, biz AŞPA-nın demokratiyaya və suverenliyə hörmət əsasında öz orijinal dəyərlərinə qayıtmasını gözləyirik.
3-02-2025, 18:50
Vuçiç etirazçıları dialoqa çağırdı
Serbiya Prezidenti Aleksandar Vuçiç bir neçə vaxtdır ölkədə keçirilən aksiyaların iştirakçılarını danışıqlara dəvət edib.
Aleksandar Vuçiç Belqrad Universitetinin rektorlar kollegiyasını fevralın 5-də görüş keçirməyə dəvət edib. O, mövcud vəziyyətlə bağlı həll yolu tapmağın, təkcə gənclərin deyil, bütün cəmiyyətin mənafeyi naminə dialoqun vacibliyin vurğulayıb.
“Tələbələr və professorlar bəzi tələblərin yerinə yetirilmədiyi və ya tam təmin edilmədiyi qənaətindədirlərsə mövcud vəziyyətdən çıxmaq üçün əhəmiyyət kəsb edə biləcək bütün digər məsələlər kimi, bununla bağlı da dialoq zəruridir”, - deyə Serbiya Prezidenti bildirib.
Qeyd edək ki, ötən il noyabrın 1-də Novı Sad şəhərindəki dəmiryolu vağzalında 15 nəfərin ölümü, 2 nəfərin ağır yaralanması ilə nəticələnən qəza Serbiyada gündəmi formalaşdırmaqda davam edir. Son bir neçə gündür minlərlə insan həm paytaxt Belqradda, həm də ölkənin ikinci böyük şəhəri olan Novı Sadda etiraz aksiyası keçirib. Əsasən tələbələrdən ibarət olan nümayişçilər şəhərdən keçən Dunay çayı üzərindəki körpüləri bağlayıb, şəhər meydanına toplaşıblar.
Hadisədən ötən müddət ərzində, eləcə də etiraz aksiyaları başlayandan bəri tikinti, nəqliyyat və infrastruktur naziri Qoran Vesiç, daxili və xarici ticarət naziri Tomislav Momiroviç, Baş nazir Milos Vuçeviç, eləcə də Novi Sad şəhərinin bələdiyyə sədri Milan Dyuriç tutduqları vəzifələrdən istefa veriblər. Serbiya Prezidenti Aleksandar Vuçiç hökumətin yenidən formalaşdırılacağını bildirib.
Aleksandar Vuçiç ötən günlərdə etirazçıların bütün tələbələrini yerinə yetirib, o cümlədən Belqraddakı aksiya zamanı saxlanılan 13 nəfərin əfv olunması barədə qərar qəbul edib. Yaxın günlərdə ölkədə seçkilər keçirmək və ya yeni hökumətin formalaşdırılması barədə qərar qəbul olunacaq.
3-02-2025, 17:59
Lavrov MDB ölkələrinin səfirləri ilə görüşdü - FOTO
Bu gün Moskvada Rusiya xarici işlər naziri Sergey Lavrovun ölkədə akkreditə olunmuş MDB iştirakçı dövlətlərinin səfirləri ilə ənənəvi görüşü keçirilib.
Görüş zamanı Rusiyanın sədrliyi ilə 2024-cü ildə MDB formatında əməkdaşlığın nəticələrinə yekun vurulub. Xarici siyasət koordinasiyasının daha da gücləndirilməsi, ticarət sahəsində, iqtisadi, mədəni və humanitar sahələrdə, eləcə də təhlükəsizlik sahəsində əməkdaşlığın genişləndirilməsi müzakirə olunub, 2025-ci il - Böyük Vətən Müharibəsində Qələbənin 80 illiyi ili - Nasizmə qarşı mübarizədə sülh və birlik ili üçün əsas vəzifələr müəyyən edilib.
Görüş iştirakçıları cari qlobal və regional problemlər, o cümlədən Rusiya Federasiyasının Prezidenti Vladimir Putinin Avrasiyada bərabər və bölünməz təhlükəsizliyin yeni arxitekturasının formalaşdırılması təşəbbüsünün həyata keçirilməsi kontekstində fikir mübadiləsi aparıblar.
Qeyd edək ki, görüşdə Azərbaycanın Rusiyadakı səfiri Rəhman Mustafayev də iştirak edib.
3-02-2025, 16:57
Gürcüstanda onlarla etirazçı saxlanıldı
Ötən gün (02 fevral 2025) Gürcüstanın paytaxtı Tbilisinin girişində keçirilən etiraz aksiyasında 31 nəfər inzibati qaydada saxlanılıb.
Bu haqda Gürcüstan DİN məlumat yayıb.
Məlumata görə, saxlanılanların hamısı xırda xuliqanlıqda və polisin əmrinə tabe olmamaqda ittiham olunurlar. İnzibati qaydada saxlanılanların bir hissəsi, o cümlədən müxalifət partiyası olan “Axali”nin lideri Nika Meliya yaşadıqları şəhəri tərk etməmələrinə dair iltizamnamənin alınmasından sonra sərbəst buraxılıblar.
Xatırladaq ki, fevralın 2-də Gürcüstanın müxalifət partiyalarının nümyəndələri, o cümlədən ictimai fəallar “Tbilisi Moll” ticarət mərkəzinin qarşısında etiraz aksiyası keçirərək, paytaxta şimaldan girişi təmin edən avtomagistralı bağlamağa çalışıblar. Polis əməkdaşları aksiya iştirakçılarının nəqliyyatın hərəkətini dayandırmaq cəhdlərinə əngəl olduğundan tərəflər arasında kiçik toqquşmalar meydana gəlmişdi. Aksiyanın dağıdılmasından sonra etirazçılar parlamentin binasına doğru yürüş edərək, mərkəzdə toplaşmışdılar.
Qeyd edək ki, Tbilisidə etiraz aksiyaları noyabrın 28-dən bəri keçirilir. Buna baş nazir İrakli Kobaxidzenin Avropa İttifaqına üzvlüklə bağlı danışıqlar prosesini donduracağını elan etməsi səbəb olub. Etirazların birinci həftəsi daha gərgin olsada, növbəti aksiyalar əsasən dinc xarakter daşıyıb.
3-02-2025, 16:29
Gənclər Gününə həsr olunmuş tədbirlər keçirilib
Azərbaycan Respublikası Gənclər Fondunun dəstəyi ilə Azərbaycanlı Tələbələr və Məzunlar Platforması (ASAP) 2 fevral - Azərbaycan Gəncləri Günü ilə əlaqədar silsilə tədbirlər həyata keçirib.
Azərbaycan Respublikasının Almaniyadakı Səfirliyinin dəstəyi, Almaniya Azərbaycan Mədəniyyət Mərkəzi və ASAP-ın birgə təşkilatçılığı ilə Almaniyada yaşayan azərbaycanlı tələbə və məzunların şəbəkələşmə görüşü keçirilib. Görüş zamanı gənclər il ərzində göstərdikləri fəaliyyət və gələcək prioritetlər barədə danışıblar. Azərbaycanın Almaniyadakı səfiri Nəsimi Ağayev çıxış edərək Azərbaycan Gəncləri Gününün yaranma tarixi və ölkəmizdə əsası Ulu Öndər Heydər Əliyev tərəfindən qoyulan gənclər siyasətinin uğurları haqqında məlumat verib. Eyni zamanda, Almaniyada yaşayan azərbaycanlı gənclərin ölkəmizin mədəni irsinin təbliğində fəal iştirakı və gələcəkdə bu istiqamətdə icrası nəzərdə tutulan fəaliyyətlərlə bağlı müzakirələr aparıldı.
Azərbaycan Respublikası Gənclər Fondunun dəstəyi, ASAP-ın təşkilatçılığı ilə Azərbaycan Gəncləri Gününə həsr olunmuş şəbəkələşmə tədbiri baş tutub. ASAP-ın İdarə Heyəti, məzun birlikləri və xarici nümayəndəliklərin üzvlərinin iştirakı ilə baş tutan tədbir zamanı gənclər müxtəlif şəbəkələşmə fəaliyyətləri vasitəsilə bir-birlərini yaxından tanımaq, xaricdə təhsil zamanı qazandıqları təcrübələri bölüşmək imkanı əldə ediblər. Tədbirdə açılış nitqi ilə çıxış edən ASAP-ın İdarə Heyətinin sədri Milana Mir Feyzullazadə, ASAP-ın icraçı direktoru Sevda Mansurova və Azərbaycan Respublikası Gənclər Fondunun Gənclər təşkilatları ilə iş şöbəsinin müdiri Orduxan Qəhrəmanzadə azərbaycanlı gənclərin beynəlxalq arenada layiqli təmsilçiliyi, dövlətin gənclərə olan qayğısı və bu istiqamətdə həyata keçirilən uğurlu layihələr barədə danışıblar. Qeyd olunub ki, təməli Ulu Öndər Heydər Əliyev tərəfindən qoyulan dövlət gənclər siyasətinin Prezident cənab İlham Əliyev tərəfindən uğurla davam etdirilməsi nəticəsində bu gün Azərbaycan gəncləri cəmiyyətin bütün sahələrində, eləcə də beynəlxalq arenada özlərini doğruldurlar.
Azərbaycan Gəncləri Günü ilə əlaqədar fəal ASAP nümayəndəliklərinin onlayn görüşü baş tutub. 15 fərqli ölkədə fəaliyyət göstərən ASAP nümayəndəliklərinin üzvlərinin iştirak etdiyi tədbirdə gənclər təhsil aldıqları ölkələrdəki sosial fəaliyyətləri haqqında danışıb, bilik və təcrübə mübadiləsi aparıblar. Qeyd olunub ki, bu cür görüşlərin mütəmadi olaraq keçirilməsi nümayəndəlik üzvləri arasındakı əlaqələrin gücləndirilməsi və birgə əməkdaşlıq imkanlarının genişləndirilməsi baxımından mühüm əhəmiyyət kəsb edir.
İcbari Tibbi Sığorta üzrə Dövlət Agentliyi, Azərbaycan Respublikası Gənclər Təşkilatları Milli Şurası (ARGTMŞ) və Azərbaycanlı Tələbələr və Məzunlar Platformasının (ASAP) birgə təşkilatçılığı ilə 2 fevral - Azərbaycan Gəncləri Gününə həsr olunmuş icbari tibbi sığorta ilə bağlı maarifləndirici təlim keçirilib. Təlim zamanı gənclər icbari tibbi sığortanın əhatə dairəsi, faydaları və müraciət prosedurları barədə məlumat əldə ediblər. Agentliyin nümayəndəsi icbari tibbi sığorta və ondan istifadə qaydaları, eləcə də düzgün qidalanma, fiziki fəaliyyət, stresslə mübarizə və psixoloji sağlamlığın əhəmiyyətindən danışıb. Tədbirin sonunda gənclərin mövzu ətrafında sualları cavablandırılıb.
Əlavə olaraq, Azərbaycan Gəncləri Gününə həsr olunmuş video layihə hazırlanıb. Videoda müxtəlif ölkələrdə fəaliyyət göstərən ASAP nümayəndəliklərinin üzvləri iştirak ediblər. Layihə çərçivəsində gənclər bu əlamətdar günə dair fikirlərini və təbrik mesajlarını bölüşüblər.
3-02-2025, 16:14
Sarkisyanın partiyası müxalifəti Paşinyana qarşı birliyə çağırdı
“Nikol Paşinyana ictimai etimad minimum həddə çatıb”.
Bunu Respublika Partiyasının İcraiyyə Komitəsinin üzvü Eduard Şarmazanov jurnalistlərlə görüşündə bildirib.
“Demək olar ki, bütün siyasi xadimlər arasında belə bir fikir var ki, Nikol Paşinyan uğursuz idarəçidir və artıq Ermənistanın hər bir vətəndaşı üçün təhlükə doğurur”.
Şarmazanov Ermənistanın bütün müxalif siyasətçilərinə müraciət edərək, birləşməyə çağırıb.
“Gəlin, bütün fikir ayrılıqlarını kənara qoyub, Ermənistanı xilas edək”, - deyə o vurğulayıb.
Şarmazanov əmin edib ki, Respublika Partiyası Nikol Paşinyanın hakimiyyətdən uzaqlaşdırılması üçün bütün səylərini göstərəcək.
Xatırladaq ki, Ermənistanda Respublika Partiyasının lideri eks-prezident Serj Sarkisyandır.
3-02-2025, 14:59
Lukaşenko hökuməti istefaya göndərdi
Belarus hökuməti istefa verib.
Bu barədə ölkənin Baş naziri Roman Qolovçenko sərəncam imzalayıb.
Sənəddə bu qərar ölkədə yeni Prezidentin seçilməsi ilə əsaslandırılıb.
Qeyd edək ki, hazırkı dövlət başçısı Aleksandr Lukaşenko yanvarın 26-da keçirilən Prezident seçkisində qalib gəlib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!