14-01-2026, 23:23
Ukraynada fövqəladə vəziyyət elan edildi
Prezident Volodimir Zelenskinin iştirakı ilə Ukraynanın enerji sektorundakı fövqəladə vəziyyətlə bağlı iclas keçirilib.
Bu barədə Zelenski “Teleqram” səhifəsində məlumat verib. Dövlət başçısı bildirib ki, Kiyevdəki vəziyyətə xüsusi diqqət yetiriləcək.
"Rusiyanın hava hücumları və pisləşən hava şəraitinin nəticələri ciddidir. Təmir briqadaları, enerji şirkətləri, kommunal xidmətlər və Ukrayna Dövlət Fövqəladə Hallar Xidməti elektrik və istilik təchizatını bərpa etmək üçün gecə-gündüz işləməyə davam edir. Bir çox məsələ təcili həll tələb edir", - deyə Zelenski əlavə edib.
Prezident bildirib ki, vəziyyəti əlaqələndirmək üçün Kiyevdə daimi fəaliyyət göstərən qərargah yaradılacaq. Bütün Ukrayna enerji sektoru üçün fövqəladə vəziyyət elan ediləcək. Baş nazirin birinci müavini - Ukraynanın energetika naziri Denis Şmıqal bu şəraitdə insanları və icmaları dəstəkləmək, eləcə də praktik məsələləri həll etmək üçün komissiyaya rəhbər təyin edilib.
Zelenski qeyd edib ki, digər tərəfdən hökumət üzvləri lazımi avadanlıq və əlavə dəstək almaq üçün tərəfdaşlarla işlərini gücləndirəcəklər. Nazirlər Kabineti bu vəziyyətdə ehtiyat enerji avadanlıqlarının şəbəkəyə qoşulması ilə bağlı bütün proseslərin maksimum dərəcədə tənzimlənməsini təmin edəcək.
Digər tərəfdən hökumətə kəskin soyuq hava şəraiti üçün komendant saatı qaydalarının yenidən nəzərdən keçirilməsi tapşırılıb. Əhalinin dəstək mərkəzlərinə maksimum çıxışı olmalı, müəssisələr elektrik şəbəkəsinin vəziyyətinə əsasən fəaliyyətlərini planlaşdıra bilməlidir. Kiyevdəki sığınacaqların sayı artırılmalı və mövcud olanlar yoxlanılmalıdır. Fövqəladə vəziyyət dövründə təhsil formatları ilə bağlı Təhsil və Elm Nazirliyindən və yerli hakimiyyət orqanlarından təkliflər gözlənilir.
“Dövlət qurumlarının, müəssisələrin və yerli idarəetmənin bütün səviyyələrinin əlaqələndirilmiş şəkildə birgə işləməsi vacibdir", - deyə Zelenski əlavə edib.
14-01-2026, 22:52
İsraillə ABŞ İranı müzakirə etdi
ABŞ dövlət katibi Marko Rubio və İsrailin Baş naziri Binyamin Netanyahu yanvarın 12-də danışıqlar apararaq İrandakı vəziyyəti və Vaşinqtonun mümkün addımlarını müzakirə ediblər.
Bu barədə «Axios» portalı mənbələrə istinadən məlumat yayıb.
Məlumata görə, tərəflər arasında növbəti telefon danışığının yanvarın 14-nə planlaşdırıldığı qeyd olunur.
14-01-2026, 22:15
Britaniya hərbçiləri Qətərdəki hərbi bazanı tərk edir
Böyük Britaniya Qətərdə yerləşən və regionun ən böyük Amerika hərbi bazası olan Əl-Udeyd aviabazasından bəzi hərbçilərini geri çəkməyə başlayıb.
Qərar ABŞ Prezidenti Donald Trampın İranda etirazçılara müraciət edərək yardımın yolda olduğunu deməsindən sonra verilib.
İran dəfələrlə bəyan edib ki, ABŞ regionda hərbi hücuma keçərsə, Amerika hərbi obyektlərinə cavab zərbələri endirəcək. Britaniya da Qətərdə yerləşən və regionun ən böyük Amerika hərbi bazası olan Əl-Udeyd aviabazasından bəzi əməkdaşlarını geri çəkməyə başlayıb.
Böyük Britaniyanın Müdafiə Nazirliyinin nümayəndəsi bildirib ki, əməliyyat təhlükəsizliyi səbəbindən yerləşdirmə və dislokasiya ilə bağlı detallara şərh verilmir. Britaniya hər zaman hərbi personalının təhlükəsizliyini təmin etmək üçün qabaqlayıcı tədbirlər görür və zəruri hallarda personalın geri çəkilməsi də bu tədbirlərə daxildir.
Qətərdəki bazadan bütün britaniyalı hərbçilərin çıxarılıb-çıxarılmayacağı hələlik dəqiqləşdirilməyib.
14-01-2026, 20:17
ABŞ İranda bu əraziləri vuracaq - ŞOK SİYAHI YAYILDI
Donald Tramp administrasiyası İrana mümkün hərbi zərbə variantlarının müzakirə olunduğu bir vaxtda ölkə ərazisindəki prioritet hərbi hədəflərin müəyyənləşdirib.
"Daily Mail" nəşrinin məlumatına görə, Vaşinqtonda fəaliyyət göstərən və nüvə silahlanmasına qarşı mövqe tutan qeyri-hökumət təşkilatı "United Against Nuclear Iran" (UANI) İranda yerləşən 50 obyekti əhatə edən dosye hazırlayaraq bazar ertəsi səhər saatlarında, milli təhlükəsizlik üzrə əsas müşavirələr ərəfəsində Ağ Ev nümayəndələrinə təqdim edib.
Sənəddə iddia edilir ki, hədəflər siyahısına İslam İnqilabı Keşikçiləri Korpusunun Tehranda yerləşən və “Tarallah” qərargahı kimi tanınan mərkəzi komanda məntəqəsinin dəqiq koordinatları daxildir. UANI-nin iddiasına görə, bu qərargah etirazların yatırılmasının əsas əməliyyat mərkəzi hesab olunur və faktiki olaraq polis qüvvələrinin fəaliyyətini koordinasiya edir.
Dosyedə həmçinin Tehranın müxtəlif bölgələrinə nəzarət edən dörd tabeli qərargah da qeyd olunub. “Qüds” qərargahı paytaxtın şimal və şimal-qərb hissələrinə, “Fəth” qərargahı cənub-qərbə, “Nəsr” qərargahı şimal-şərqə, “Qədr” qərargahı isə cənub-şərq və mərkəzi rayonlara cavabdeh göstərilir.
UANI hesab edir ki, bu obyektlərin müəyyənləşdirilməsi Korpusun etirazların yatırılmasına cəlb olunan qüvvələri necə koordinasiya etdiyini anlamağa imkan verir. Təşkilatda İİKK üzrə araşdırmalar direktoru Kasra Aarabinin sözlərinə görə, silahsız etirazçılarla tam silahlanmış repressiv aparat arasındakı güc balansı dəyişmədikcə, etirazlar və zorakılıq dövrü davam edəcək.
Sənəddə Tehranda mövcud olduğu iddia edilən gizli infrastrukturdan da bəhs olunur. Bildirilir ki, bu şəbəkə rejimin ən radikallaşmış strukturlarının - kəşfiyyat, polis və psixoloji əməliyyat bölmələrinin idarə olunmasına xidmət edir.
Hədəflər siyahısına, həmçinin Tehranın 22 bələdiyyə rayonunda yerləşən 23 regional “Basij” bazası da daxil edilib. “Basij” İİKK-nin daxili yarımhərbi birləşməsi kimi tanınır və etirazların yatırılmasında əsas rol oynayan qurumlardan biri hesab olunur.
Ağ Ev nəşrin dosye ilə bağlı şərh sorğusuna cavab verməyib.
UANI sənədində etirazçılara qarşı zorakılıqda əsas rol oynadığı iddia edilən digər bölmələr də sadalanır. Bunlara Tehranın şimal-şərqində yerləşən “Aal-e Mohammad” təhlükəsizlik briqadası və paytaxtın cənub-şərqində fəaliyyət göstərən “Əl-Zəhra” briqadası daxildir.
Məlumat fonunda bildirilir ki, etirazlar zamanı ölənlərin sayı iki mini keçib, minlərlə insan isə edam təhlükəsi ilə üzləşə bilər. Bu vəziyyətdə Tramp administrasiyası diplomatik səbr dövrünün başa çatdığını nümayiş etdirib. Prezident İran rəsmiləri ilə bütün görüşləri ləğv etdiyini, etirazçılara “yardım yoldadır” mesajını verdiyini və onlardan “qatillərin və cəlladların” adlarını yadda saxlamağı xahiş etdiyini açıqlayıb.
14-01-2026, 19:33
İran xalqı Türkiyəyə köç edir
İranda baş verən etirazlar fonunda onlarla iranlı ölkəni tərk edərək Türkiyəyə yollanmağa başlayıb.
Bu barədə “Reuters” agentliyi məlumat yayıb.
Məlumata görə, iranlı ailələr Van vilayətindəki Kapıköy sərhəd-keçid məntəqəsi vasitəsilə Türkiyəyə daxil olub.
Hazırda Kapıköy sərhəd məntəqəsindən keçən iranlılar mediaya danışmaqdan ehtiyat edirlər. Onlar İrana geri döndükləri zaman yarana biləcək təhlükələrdən qorxduqlarını bildirirlər. Türkiyənin təhlükəsizlik rəsmiləri isə sərhəddə vəziyyətin hələlik fövqəladə olmadığını, lakin hər hansı kütləvi qaçqın axınına qarşı bütün inkişafların yaxından izlənildiyini qeyd ediblər.
Xatırladaq ki, insan haqları qruplarının son hesabatına görə, dekabrın 28-dən başlayan iğtişaşlar nəticəsində ölənlərin sayı artıq 2600 nəfərə çatıb, minlərlə insan isə həbs edilib.
14-01-2026, 18:39
ABŞ-dən 75 ölkənin vətəndaşlarına VİZA QADAĞASI
ABŞ Dövlət Departamenti 75 ölkənin vətəndaşları üçün vizaların verilməsini dayandırır.
Bu barədə “Fox News” məlumat yayıb.
Məlumata görə, bu ölkələr sırasında Somali, İran, Əfqanıstan, Braziliya, Nigeriya və Tailand kimi ölkələrlə yanaşı Rusiya da var.
Qərar “müraciət edənlərin daha ciddi yoxlanması” çərçivəsində qəbul olunub və 21 yanvardan qüvvəyə minəcək.
14-01-2026, 17:46
Yuliya Timoşenko korrupsiyada ittiham olunur
Ukraynanın hüquq-mühafizə orqanları parlamentin müxalif fraksiyasının rəhbəri, sabiq Baş nazir Yuliya Timoşenkonun korrupsiyada şübhəli bilindiyini bəyan edib.
Ukrayna Milli Antikorrupsiya Bürosu və Korrupsiyaya Qarşı Mübarizə üzrə İxtisaslaşdırılmış Prokurorluğun birgə bəyanatında bildirilir ki, Timoşenko müəyyən qanun layihələrini dəstəklədiyi və ya əleyhinə çıxdığı üçün fraksiyasına daxil olmayan ayrı-ayrı deputatlara qanunsuz mükafatlar təklif edib. Onun hərəkətləri Ukrayna Cinayət Məcəlləsinin 369-cu maddəsinin 4-cü hissəsi ilə təsnif edilib.
Artıq bununla bağlı "Batkivşina" fraksiyasının rəhbəri Yuliya Timoşenkoya bildiriş də göndərilib. Sabiq Baş nazir isə ittihamları rədd edib və partiyanın Kiyev ofisində aparılan axtarışları təsdiqləyib.
14-01-2026, 15:58
İran səfiri Ermənistanı nankorluqda ittiham etdi
Ermənistan İrana düşmən qüvvələrin mərkəzinə çevrilir.
Bu barədə İranın Ermənistandakı səfiri Xəlil Şirqulami deyib. O, 10 yanvardan bəri İrəvandakı İran səfirliyinin qarşısında keçirilən etiraz aksiyalarını şərh edərkən bunu vurğulayıb. Diplomat xatırladıb ki, Tehran çətin anlarda həmişə İrəvana kömək əli uzadıb.
Şirqolami həmçinin ABŞ-ın İrana qarşı istismar edə biləcəyi TRIPP-nin yaradılması ilə bağlı İranın narahatlığını bir daha təkrarlayıb. və narahatlığın erməni həmkarlarına çatdırıldığını əlavə edib.
14-01-2026, 15:06
Ukraynanın yeni müdafiə naziri təsdiqləndi
Ukrayna Ali Radası ikinci cəhddə Mixaylo Fedorovu müdafiə naziri təyin edib.
Parlamentin 277 üzvü təyinatın lehinə səs verib, minimum tələb olunan say isə 266 nəfər olub. Bir gün əvvəl parlament üzvləri Fedorovun təyinatını rədd etmişdilər.
Fedorov 2019-cu ildən bəri Rəqəmsal Transformasiya Nazirliyinə rəhbərlik edirdi. O, bir gün əvvəl Baş nazirin birinci müavini və Rəqəmsal Transformasiya naziri vəzifələrindən azad edilib. Yanvarın əvvəlində Ukrayna Prezidenti Volodimir Zelenski Fedorovun Müdafiə Nazirliyinə keçirilməsini və hərbi nazirliyə rəhbərlik edən Denis Şmıqalın Baş nazirin birinci müavini və Energetika naziri olmasını təklif edib.
14-01-2026, 00:50
Tehran küçələrində böyük izdiham
İranın paytaxtı Tehranda minlərlə insan küçələrə axışıb.
Şəhərin müxtəlif yerlərində toplaşan böyük insan kütlələrinin görüntüləri sosial şəbəkələrdə yayılıb.
Kadrlarda gecə saatlarında davam edən kütləvi yürüşlər və şüarlar əks olunur.
Bu fonda ABŞ Prezidenti Donald Tramp İranda etiraz edənlərə müraciət edib. O, iranlı etirazçılara aksiyaları davam etdirməyi və zorakılıqda iştirak edən şəxslərin adlarını yadda saxlamağı tövsiyə edib. Tramp bildirib ki, etirazçılar imkan daxilində dövlət institutları üzərində nəzarəti ələ almalı və onlara qarşı zorakılıq törədənlərin kimliyini sənədləşdirməlidirlər.
ABŞ prezidenti qeyd edib ki, İranda həlak olanların sayı ilə bağlı bir-birindən fərqli rəqəmlər eşidib. Onun sözlərinə görə, rəqəmlər nə olursa-olsun, hətta bir nəfərin ölümü belə qəbuledilməzdir. Tramp əlavə edib ki, yayılan məlumatlar doğrudursa, iranlılara qarşı son dərəcə amansız rəftar edilir.
Çıxışında “İranı yenidən böyük edək” ifadəsini işlədən Tramp bildirib ki, İran bir vaxtlar güclü ölkə olub və hazırkı vəziyyətin yaranmasına “rejimi ələ keçirən qüvvələr” səbəb olub. Onun sözlərinə görə, baş verənlər olduqca həssas mərhələdədir və bu proseslər təkcə İran üçün deyil, daha geniş miqyasda təhlükə yarada bilər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!