18-06-2025, 21:33
Ərdoğanla Paşinyan birgə bəyanat verəcək
Türkiyə Prezident Rəcəb Tayyib Ərdoğan Ermənistanın baş naziri Nikol Paşinyanı İstanbulda qəbul edəcək.
Bu barədə Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Fəxrəddin Altun “X”dəki səhifəsində yazıb.
O, Ermənistanın baş nazirinin iyunun 20-də Türkiyəyə işgüzar səfər edəcəyini açıqlayıb.
Daha əvvəl Paşinyan Ərdoğanla danışıqların gündəliyini açıqlamayıb. "Səfərin gündəliyi ilə bağlı ictimaiyyət üçün birgə bəyanat planlaşdırılır. Razılaşmalara əsasən, bəyanatın bəndlərini vaxtından əvvəl açıqlamaq olmaz", - o bildirib.
18-06-2025, 21:20
İran yenidən İsraili vurdu
İran Silahlı Qüvvələri İsrail ərazisinə yeni raket zərbəsi endirib.
Bu barədə İranın "Mehr" agentliyi məlumat yayıb.
Ordunun hansı obyektləri hədəfə aldığı ilə bağlı hələlik məlumat verilmir.
18-06-2025, 18:56
Putinə dedim ki, öz problemlərini həll et - Tramp
ABŞ Prezidenti Donald Tramp Rusiya Prezidenti Vladimir Putinin İranla bağlı vasitəçilik təklifinə münasibət bildirib.
Bu barədə o, jurnalistlərə açıqlamasında danışıb.
"Onunla dünən danışdım", - deyə ABŞ Prezidenti bildirib.
"Putin mənə vasitəçi rolunu oynamağı təklif etdi. Mən də dedim: "Mənə bir yaxşılıq edin: əvvəlcə öz problemlərini həll et. Vladimir, gəlin əvvəlcə Rusiyanın məsələlərini yoluna qoyaq. Ondan sonra İranla məşğul ola bilərsiniz'", - Tramp qeyd edib.
18-06-2025, 18:30
Solovyovun təxribatçı açıqlamasına rəsmi reaksiya
Televiziya aparıcısı Vladimir Solovyov Rusiyanın dövlət televiziya kanalı “Rossiya 1”də yayımlanan müəllif proqramında özünəməxsus qərəz və isterik davranışla Azərbaycana qarşı növbəti dəfə hörmətsizlik nümayiş etdirib.
Bu barədə Medianın İnkişafı Agentliyindən (MEDİA) məlumat verilib.
Bildirilib ki, Ermənistanda hüquq-mühafizə orqanları tərəfindən saxlanılan yaxın dostu, erməniəsilli rusiyalı iş adamı Samvel Karapetyanın müdafiəsinə qalxan aparıcı bir neçə dəfə “Artsax” ifadəsini işlətmiş, Ermənistan hakimiyyətini “Artsaxı hədiyyə etməkdə” günahlandırmış, canlı yayımda birbaşa erməni xalqına müraciət edərək onu da gələcəkdə “Artsaxın taleyi gözlədiyini” demişdir.
Real tarixi faktları təhrif edən, yaxın keçmişdə baş vermiş proseslərə qərəzlə yanaşan Vladimir Solovyov hər zaman Azərbaycana kin və nifrət bəsləmiş, bu münasibət onun çıxışlarında açıq şəkildə özünü büruzə vermişdir. V.Solovyovun Ermənistan-Azərbaycan münaqişəsi, 44 günlük Vətən müharibəsi, Azərbaycanın ərazi bütövlüyünü və suverenliyini tam bərpa etməsi ilə bağlı müxtəlif vaxtlarda etdiyi çıxışlar həmişə qeyri-obyektiv olmuş, ziddiyyətli mahiyyət daşımış və Azərbaycanda adekvat reaksiyalara səbəb olmuşdur.
Rusiyanın dövlət televiziya kanalının efirində belə destruktiv iddiaların yer alması narahatlıq doğurur, xalqımıza qarşı qəbuledilməz hesab edilir, ölkələrimiz arasında dostluq münasibətlərinin ruhuna və məsələ ilə əlaqədar Rusiyanın rəsmi mövqeyinə tamamilə ziddir.
Jurnalist etikası və əxlaqi dəyərlərlə bir araya sığmayan bu nifrət nitqini yolverilməz hesab edir, qəti şəkildə pisləyir və qarşı tərəfin üzrxahlıq etməsini gözləyirik.
18-06-2025, 17:20
İsrail Xameneinin yerləşdiyi bunkeri hədəfə aldı
İsrail silahlı qüvvələri İranın paytaxtında hərbi obyektlərə hücumları bərpa edib.
Bu barədə İsrail Müdafiə Qüvvələrinin mətbuat xidməti məlumat yayıb.
"İsrail Hərbi Hava Qüvvələri hazırda Tehranda İran rejiminə məxsus hərbi obyektləri hədəfə alır", - deyə İsrail Müdafiə Nazirliyinin rəsmi teleqram kanalında dərc olunan bəyanatda deyilir.
İsrailin "9-cu Kanal"ı isə iddia edir ki, hazırda İsrail təyyarələri Tehranda ali lider Əli Xameneinin bunkeri yerləşən məhəlləni bombalayır.
İran "NourNews" agentliyi İsrail aviasiyasının Tehranın şərq hissəsini də intensiv bombardman etdiyini xəbər verir.
Xatırladaq ki, iki ölkə arasında toqquşma iyunun 13-də başlayıb. İsrail İranın zərbələri nəticəsində 20-dən çox adamın öldüyünü, 600-dən çox insanın yaralandığını bildirib. İran 220-dən çox ölü və 1200-dən çox yaralı olduğunu bildirib.
17-06-2025, 21:52
Tel-Əviv və Hayfanı tərk edin! - İrandan ÇAĞIRIŞ
İran hələlik İsrailə qarşı ciddi hərbi əməliyyat həyata keçirməyib və yalnız xəbərdaredici xarakterli zərbələrlə kifayətlənib.
Bunu İran Silahlı Qüvvələrinin Baş Qərargah rəisi Əbdülrəhim Musəvi bəyan edib.
“İndiyədək həyata keçirilən əməliyyatlar sadəcə qarşı tərəfi çəkindirmək məqsədi daşıyan bir növ xəbərdarlıq idi”, – deyə Musəvi "Al Alam" telekanalına açıqlamasında bildirib.
Musəvi həmçinin Tel-Əviv və Hayfa sakinlərini şəhərləri tərk etməyə çağırıb.
17-06-2025, 21:06
Mahmud Əhmədinejad öldürüldü - İDDİA
İranın keçmiş Prezidenti Mahmud Əhmədinejad öldürülüb.
İddiaya görə, sabiq dövlət başçısı Tehranda küçədə gəzdiyi zaman qətlə yetirilib. Xəbər portalı hadisə ilə bağlı məlumatın rəsmi qurumlar tərəfindən hələlik təsdiq və ya təkzib olunmadığını bildirir.
Xatırladaq ki, Mahmud Əhmədinejad 2005-2013-cü illərdə İran İslam Respublikasının Prezidenti olub.
17-06-2025, 20:50
Trampdan sərt paylaşım: Xameneinin yerini bilirik!
ABŞ Prezidenti Donald Tramp İranın ali lideri Əli Xamenei ilə bağlı paylaşım edib.
Tramp Xameneinin yerini dəqiq bildiklərini, onu hədəf ala biləcəklərini, lakin hələlik bu addımı atmayacaqlarını qeyd edib.
"Biz "Ali Lider" adlandırılan şəxsin harada gizləndiyini dəqiq bilirik. O, asan hədəfdir, amma orada təhlükəsizdir. Biz onu hələlik sıradan çıxarmayacağıq (öldürməyəcəyik). Amma mülki şəxslərə və Amerika əsgərlərinə raket atılmasını istəmirik. Səbrimiz tükənir. Bu məsələyə diqqət ayırdığınız üçün təşəkkür edirik!"
Trampın digər paylaşımında isə ABŞ-ın İran üzərində tam hava üstünlüyünə malik olduğunu vurğulayıb:
"Hazırda İran üzərində tam və qəti hava nəzarəti bizdədir. İranın yaxşı hava izləmə sistemləri və müdafiə avadanlıqları var idi, həm də xeyli miqdarda, amma bu, ABŞ istehsalı olan texnologiyalarla müqayisə oluna bilməz. Heç kim ABŞ qədər bu işi bacarmır".
17-06-2025, 20:23
Xameneinin yaxın ətrafı “YOXA ÇIXIR”
İsrail-İran toqquşmasının beşinci günündə ölkənin ali lideri Əli Xameneinin yaxın adamlarından hesab edilən Əli Şadmaninin öldürüldüyü barədə xəbərlər yayılıb. Tehran məlumatı rəsmi olaraq təsdiqləməsə də, xəbəri təkzib də etməyib.
Rəsmi vəzifəsi İran Silahlı Qüvvələrinin “Hatam-al-Anbiya” mərkəzi qərargahının rəisi olan general bir neçə gün əvvəl, iyunun 13-də təyin edilib.
Şadmani Xameneinin öldürülən ilk yaxın adamı deyil.
Belə ki, İsrailin hücuma başlamasından bu yana ali liderin yaxın ətrafında olan bir neçə yüksək vəzifəli şəxs hədəfə alınıb. Onların arasında SEPAH komandanı Hüseyn Səlami, İranın ballistik raket proqramının rəhbəri və eyni zamanda SEPAH-ın aerokosmik bölməsinin başçısı Əmir Əli Hacızadə, həmçinin SEPAH-ın kəşfiyyat xidmətinin rəhbəri Məhəmməd Kazimi də var.
"Reuters" agentliyi yazır ki, bu şəxslər Xameneinin ən yaxın adamları hesab edilir, onlar ali liderin daxili müşavir dairəsinə daxil olub və qərarların qəbul edilməsində xüsusi rol oynayıblar. Agentliyə danışan mənbələr qeyd edir ki, onlar 86 yaşlı Xameneinin qeyri-rəsmi müşavirləri olub.
Bildirilir ki, müşavirlərin öldürülməsi İran rəhbərliyində ciddi boşluqlar yaradıb və qərar qəbuletmə prosesində potensial səhvlərin riskini artırıb. “Daxili sabitlik və müdafiə məsələlərində yanlış hesablamalar üçün risk son dərəcə təhlükəlidir”, - Xameneinin toplantılarında mütəmadi iştirak edən bir şəxs, vəziyyəti belə qiymətləndirib:
Mənbələrin bildirdiyinə görə, Xameneinin ətrafındakı 15-20 nəfərlik müşavir heyəti rəsmi orqan kimi deyil, qeyri-rəsmi və sadiq fiqurların daxil olduğu çevrə kimi fəaliyyət göstərir. Bu çevrəyə SEPAH komandirləri, ali rütbəli ruhanilər və mühafizəkar siyasətçilər daxildir. Onlar yalnız vacib məsələlər müzakirəyə çıxarıldıqda Xameneinin Tehrandakı iqamətgahında toplaşırlar.
İranın teokratik quruluşuna görə, ali dini lider ölkənin silahlı qüvvələrinin baş komandanıdır, müharibə elan etmək, yüksək çinli hərbçiləri və hakimləri təyin etmək vəzifəsi də məhz onun əlində cəmlənib. Mənbələr deyir ki, Xamenei qərarları şəxsən qəbul etsə də, müxtəlif baxış bucaqlarını dinləməyə, əlavə məlumat almağa və müşavirlərinin tövsiyələrinə açıqdır.
Ən yaxın müşavirlərinin itirilməsi həm hərbi komandanlıqda, həm də qərar qəbuletmədə ciddi boşluqlar yaradıb. Bu da İranın gələcəkdə İsraillə və ya regionda başqa aktorlarla potensial qarşıdurmalarında yanlış qərarlar vermə ehtimalını artırır. Müşahidəçilər və ekspertlər bu vəziyyəti təkcə İranın daxili sabitliyi narahatedici hesab edirlər.
17-06-2025, 19:52
Məşhur iş adamı İrəvanda saxlanıldı
Rusiyalı iş adamı Samvel Karapetyan İrəvanda saxlanılıb.
Məlumata görə, hazırda Ermənistan Daxili İşlər Nazirliyinin xüsusi təyinatlı bölmələri müvafiq tədbirlər həyata keçirir.
Deputat Artur Hovannisyan Ermənistan Milli Assambleyasında bildirib: “Samvel Karapetyan, biz sizin məsələ ilə məşğul olacağıq".
Bu ifadədən sonra hüquq-mühafizə orqanlarının əməkdaşları Karapetyanın evinə daxil olaraq onu saxlayıblar. Qeyd olunur ki, hazırda iş adamının Ulnetsi küçəsində yerləşən mənzilində axtarış aparılır.
Qeyd edək ki, buna səbəb Samvel Karapetyanın kilsənin müdafiəsi barədə səsləndirdiyi fikirlər olub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!