16-03-2026, 22:26
Kabil bombalandı
Pakistan Kabildəki Siyah Sang hərbi sektoruna hava hücumu həyata keçirib.
Geolokasiya təhlili zərbələrin hərbi bazaya dəydiyini göstərir.
Pakistan Hərbi Hava Qüvvələri Kabilin mərkəzindəki Taliban hərbi bazasına, eləcə də Nəngərhar əyalətindəki hədəflərə zərbələr endirib.
Pakistan Hərbi Hava Qüvvələrinə (HHQ) məxsus təyyarələr bunker partlayıcılarından və AZB-83 idarə olunan partlayıcı bombalardan istifadə edib. Zərbələrdən sonra Əfqanıstan paytaxtında yanğınlar baş verib.
16-03-2026, 21:51
Ayətullahlar onu təzyiq altında rəhbər seçib - ŞOK DETALLAR
Dünyanın gözü İranda baş verənlərə dikilib.
New York Times qəzetinin əldə etdiyi eksklüziv məlumatlar, Müctəba Xameneinin atasının varisi olaraq Ali Lider kürsüsünə gətirilməsinin heç də hamar keçmədiyini üzə çıxarıb. Xəbərlərə görə, seçim prosesi Vatikandakı Papa seçkilərini (konklav) xatırladan qapalı və gərgin bir prosedurla həyata keçirilib.
Hər şey martın 7-də Prezident Pezeşkianın bəyanatı ilə sürətlənib. Pezeşkian, körfəzdəki ərəb ölkələrinə hücumların dayandırılacağını elan edərək qonşulardan üzr istəyib. O, gərginliyə səbəb olan qərarların Ali Liderin yoxluğunda fəaliyyət göstərən üç nəfərlik keçid şurası tərəfindən verildiyini bildirib. Bu "yumşalma" siyasəti isə İnqilab Keşikçilərinin (SEPAH) qəzəbinə səbəb olub.
Generalların ultimatumu: "Dərhal Müctəbanı seçin!"
Məlumata görə, müharibə tərəfdarı olan generallar — Vahidi və Əziz Cəfəri, Ekspertlər Assambleyasından dərhal Müctəba Xameneini lider elan etməyi tələb ediblər. Keçmiş kəşfiyyat rəisi cənab Taeb isə 88 üzvün hər birinə təzyiq edərək, Ayətullahın oğluna səs verməyin "mənəvi və dini vəzifə" olduğunu vurğulayıb.
8 mart səsverməsi
8 martda Assambleya virtual olaraq toplansa da, müzakirələr kifayət qədər kəskin keçib. Mühafizəkarlar Ali Liderin sağlığındakı iradəsinə (oğlunun varis olmasına qarşı çıxmasına) hörmət edilməsini istəsələr də, konstitusiyanın onlara müstəqil seçim hüququ verdiyini deyənlər üstünlük təşkil edib.
Prosedurun detalları:
- Hər bir Ayətullah öz seçimini kağıza yazıb, mumla möhürləyib.
- Xüsusi kuryerlər bu zərfləri gizli şəkildə sayım komitəsinə çatdırıb.
- Müctəba Xamenei 88 səsdən 59-nu alaraq (üçdə iki səs çoxluğu) qalib gəlib.
Gecə yarısına az qalmış dövlət mediası Müctəba Xameneini İranın yeni Ali Lideri elan etdi. Baxmayaraq ki, səsvermə yekdil olmayıb, hətta ona qarşı çıxanlar belə "sədaqət andı" içməyə məcbur qalıblar. Hazırda İran elitası ictimaiyyət qarşısına hələ çıxmayan yeni liderin ətrafında "sıx birləşmiş" görüntüsü verməyə çalışsa da, pərdəarxası mübarizənin daha da kəskinləşəcəyi gözlənilir.
16-03-2026, 17:26
Rusiyaya 11 milyon mərmi satan ölkə
Müharibə başladıqdan sonra Şimali Koreya Rusiyaya 11 milyona qədər mərmi ötürüb.
Təchizat 2023-cü ilin yayında başlayıb. O vaxtdan bəri 4 Rusiya gəmisi Şimali Koreyaya ən azı 112 səfər edərək Rusiya ordusuna 8-11 milyon mərmi çatdırıb.
Orta hesabla Şimali Koreya Rusiyaya ayda təxminən 350.000 mərmi tədarük edib. Bu miqdar Rusiya ordusunun təxminən bir aylıq hücum əməliyyatlarını davam etdirməsi üçün kifayət edərdi.
Zaman keçdikcə Şimali Koreyanın sursat təchizatı donanmasının həcmi azalıb. 2026-cı ilin əvvəlindən bəri yeni tədarük faktı aşkar edilməyib. Bu, Rusiyanın öz mərmi istehsalını artırması və ya Şimali Koreyanın ehtiyatlarının tükənməsi ilə izah edilə bilər.
16-03-2026, 17:16
ABŞ İrana güzəştə getdi
ABŞ hakimiyyəti İran neft tankerlərinin Hörmüz boğazından keçməsinə mane olmur.
Bu barədə ABŞ-nin maliyyə naziri Skott Bessent CNBC-yə verdiyi müsahibədə bildirib.
"İran gəmiləri artıq yola düşür və biz dünyanın qalan hissəsini təchiz etmək üçün buna icazə vermişik. İnanırıq ki, iranlıların gəmilərini geri çəkəcəyi təbii bir boşluq olacaq və hələlik bu, bizim üçün normaldır. Biz istəyirik ki, dünya [neftlə] yaxşı təchiz olunsun."
Cənab Bessent həmçinin qeyd edib ki, bəzi Çin gəmiləri də körfəzindən keçməyə müvəffəq olur.
16-03-2026, 16:47
“Hörmüz boğazı düşmənlərimiz üçün bağlıdır” - Əraqçi
“Hörmüz boğazı düşmənlərimiz üçün bağlıdır”.
Bunu İranın ranın xarici işlər naziri Abbas Əraqçi bazar ertəsi günü Tehranda keçirilən həftəlik mətbuat konfransında deyib.
"15 günlük müharibədən sonra onlar dünənə qədər düşmən hesab etdikləri ölkələrə müraciət edərək, Hörmüz boğazının təhlükəsizliyini təmin etməyi istəyirlər", - Əraqçi ABŞ və İsraili nəzərdə tutaraq vurğulayıb.
O, daha sonra əlavə edib:
"Onlar digər ölkələrdən gəlib boğazı açıq saxlamağa kömək etmələrini xahiş edirlər. Bizim baxışımızdan boğaz açıqdır, lakin düşmənlərimiz üçün - bizə və müttəfiqlərinə qarşı bu qorxaq təcavüzü törədənlər üçün bağlıdır".
A.Əraqçi bildirib ki, bu müharibə elə başa çatmalıdır ki, artıq davam etməsin və düşmənlər bir daha təcavüz haqqında düşünməsinlər. "Onlar indiyə qədər yaxşı dərs alıblar", - nazir deyib.
16-03-2026, 16:14
Türkiyə XİN-dən Rusiyanı qəzəbləndirəcək BƏYANAT
Türkiyə Xarici İşlər Nazirliyi Krımın Rusiya tərəfindən qanunsuz ilhaqının 12-ci ildönümü ilə bağlı bəyanat yayıb.
Bəyanata görə, Rusiya tərəfindən qeyri-legitim referendum nəticəsində həyata keçirilmiş Krımın qanunsuz ilhaqının 12-ci ildönümündə Türkiyə bu faktı bir daha tanımadığını bəyan edir.
“Beynəlxalq hüquqa zidd olan bu faktı tanımadığımızı bir daha təsdiqləyirik”, - deyə açıqlamada vurğulanıb.
Qeyd olunub ki, Ukraynanın müstəqilliyini, suverenliyini və ərazi bütövlüyünü ardıcıl şəkildə dəstəkləyən Türkiyə yarımadada baş verən hadisələri, ilk növbədə Krım tatarlarının vəziyyətini diqqətlə izləməyə davam edəcək və bu məsələni gündəmdə saxlayacaq.
16-03-2026, 16:12
Xamenei komadadır: ayağını itirib, qaraciyəri zədələnib
İranın yeni lideri süni tənəffüs aparatına qoşulub və təkbaşına nəfəs ala bilmir.
Bu barədə Böyük Britaniyanın "The Sun" nəşri yazıb.
Bildirilir ki, 56 yaşlı Müctəba Xamenei komadadır. Onun fevralın 28-də İsrail aviasiyasının Tehrana endirdiyi hava zərbəsi zamanı ayağını itirdiyi bildirilir.
Bundan başqa, Xameneinin qaraciyər və mədəsində zədələr aşkarlandığı da vurğulanır.
16-03-2026, 15:59
İranda Səfəvilər dövrünə aid abidə dağılıb - FOTO
ABŞ-İsrail hücumları nəticəsində İranın İsfahan şəhərindəki bir neçə tarixi məkan ciddi şəkildə zədələnib.
İran KİV-nin məlumatına görə, İsfahan qubernatorluğunun binası, Rəqib Xanə malikanəsi, Çehel Sotun Bağ Muzeyindəki Əşrəf Zalı və Səfəvilər dövrü hökumət kompleksinin bir hissəsi olan digər tikililər zərər görüb.
Qeyd olunur ki, bu məkanlardan bir neçəsi UNESCO-nun Ümumdünya İrs Siyahısına daxil edilib. Dağıntıların miqyası və mədəni irsə dəyən mümkün ziyan barədə məlumatlar dəqiqləşdirilir.
16-03-2026, 15:56
Konstitusiyalarını dəyişdilər: vitse-prezident postu təsis edildi
Qazaxıstanda seçicilər yeni Konstitusiyaya dəyişiklikləri 87% səslə təsdiq edib.
Əsas Konstitusiya dəyişikliklər ikipalatalı parlamentin birpalatalı parlamentlə əvəz edilməsi, prezidentin vaxtından əvvəl istefa verməsi halında onu əvəz edəcək vitse-prezident vəzifəsinin yaradılması və parlamentin Konstitusiyanı dəyişdirmək hüququndan məhrum edilməsi və bu hüququn yalnız referendumlar üçün saxlanılması barədə dəyişiklik edib.
Qarşıdan gələn dəyişikliklər ölkəni yeni parlament seçkilərinə hazırlayacaq, çünki mövcud qanunverici orqan 1 iyul tarixinə qədər işini dayandıracaq.
15-03-2026, 19:40
Sinaqoqa hücum edən şəxs "Hizbullah" komandirinin qardaşı imiş
ABŞ-ın Miçiqan ştatında sinaqoqa hücum edən şəxsin qardaşının Livanda “Hizbullah”ın komandiri olduğu iddia edilir.
Bu barədə məlumatı “The New York Times” qəzeti yayıb.
İsrail hərbçilərinin açıqlamasına görə, hücum edən Ayman Mohammad Qəzalinin qardaşı Ibrahim Mohammad Qəzali “Hizbullah”ın bir bölməsinə rəhbərlik edib. Bildirilir ki, o, martın 5-də Livanda silah anbarı və silahlıların yerləşdiyi obyektə endirilən İsrail aviazərbəsi nəticəsində öldürülüb.
Məlumata görə, hücumu həyata keçirən Ayman Qəzali Livan əsilli olsa da, sonradan ABŞ vətəndaşlığını alıb. Livan rəsmiləri və Miçiqandakı müsəlman icmasının nümayəndələri bildiriblər ki, İsrail zərbəsi nəticəsində onun ailəsindən dörd nəfər – iki qardaşı və qardaşlarından birinin iki övladı həlak olub, İbrahimin həyat yoldaşı isə ağır yaralanıb.
“Israel Defense Forces” kəşfiyyat araşdırmasından sonra İbrahim Qəzalinin öldürüldüyünü təsdiqləyib, lakin əməliyyatın detalları açıqlanmayıb. “Hizbullah”ın nümayəndəsi isə onun təşkilat üzvü olub-olmadığını təsdiq və ya təkzib etməyib, lakin Miçiqandakı hücumun ailə üzvlərinin ölümünə görə qisas olduğunu bildirib.
İsrail tərəfinin iddiasına görə, İbrahimin rəhbərlik etdiyi “Bədr” adlı bölmə İsrail ərazisinə yüzlərlə raketin buraxılmasında iştirak edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!