17-08-2025, 13:19
Zelenskidən Rusiyaya yeni sanksiyalar - SİYAHI
Ukrayna Prezidenti Volodimir Zelenski Rusiyanın süni intellekt (Sİ) elementləri ilə təchiz olunmuş zərbə dronlarının inkişafını məhdudlaşdırmaq məqsədilə yeni sanksiyalar tətbiq edib.
Dövlət başçısının Ofisi prezidentin 599/2025 saylı fərmanını açıqlayıb. Bu fərmanla Ukrayna Təhlükəsizlik və Müdafiə Şurasının 16 avqust 2025-ci il tarixli “Fərdi xüsusi iqtisadi və digər məhdudlaşdırıcı tədbirlərin (sanksiyaların) tətbiqi haqqında” qərarı qüvvəyə minir.
Sənədə əsasən, sanksiyalar siyahısına Rusiyadan və Çindən olan 39 fiziki şəxs və 55 hüquqi şəxs daxil edilib. Fərman dərc olunduğu gündən qüvvəyə minir.
Prezidentin sanksiya siyasəti üzrə müşaviri Vladislav Vlasuk jurnalistlərə açıqlamasında qeyd edib ki, Rusiya süni intellektdən istifadə etməklə pilotsuz uçuş aparatlarının istehsalına böyük sərmayələr yatırır və bu proses ciddi qəbul edilməlidir. O bildirib ki, Sİ tətbiq edilən dronlar daha yüksək muxtariyyət, dəqiqlik və radioelektron mübarizə vasitələrinə qarşı dayanıqlılıq nümayiş etdirir, hədəfləri operatorun iştirakı olmadan müəyyənləşdirib izləyə bilir.
Vlasukun sözlərinə görə, belə dronların istehsalı üçün müasir elektron komponent bazası və böyük hesablama resursları həyati əhəmiyyət daşıyır. Hazırlanmış sanksiya paketi də məhz bu imkanları təmin edən şirkətləri hədəfə alır. Xüsusilə, sanksiyalar siyahısına daxil edilənlər:
“Proqmatik” – elektron avtopilot və süni intellekt əsasında avtomatik hədəf izləmə sistemi ilə təchiz olunmuş “Mikrob 10” tipli FPV-kamikadze dron istehsalçısı.
“Ağıllı quşlar” – döyüş yükü 3,5 kq-a qədər olan, optik hədəf izləmə sistemi ilə təchiz edilmiş və REM maneələrini avtomatik dəf edə bilən “Soroka” FPV-kamikadze dron istehsalçısı.
Çin şirkətləri: Dongguan Standard Trading Co., Zhejiang Lianxing Machinery Co., Guangzhou Benquan Import & Export, Shenzhen Sky Bow Navigation Technology, Harbin Bin-Au Technology Development, Topscom Precision Industry – “Şahed” və digər dronlar üçün əsas komponentlərin (naviqasiya qəbulediciləri, mühərriklər, marşrutlaşdırıcılar, kameralar, mikrosxemlər, tranzistorlar, rezistorlar və rezonatorlar) təchizatçıları.
“Neyrolab” Sİ Texnologiyaları Mərkəzi – dronlar üçün avtonom naviqasiya, hədəf tanıma və sensor məlumatlarının emalını təmin edən süni intellekt modellərini hazırlayan və təlim etdirən təşkilat.
Pilotsuz Sistemlər və Texnologiyalar Mərkəzi – Rusiyada pilotsuz sistemlər və texnologiyalar sahəsində innovasiyaları tətbiq etmək üçün yaradılmış təşkilat.
Vlasuk vurğulayıb: “Bu şirkət və təşkilatlara qarşı tətbiq edilən sanksiyalar strateji əhəmiyyət daşıyır. Çünki onlar Rusiyanın süni intellektlə təchiz edilmiş zərbə dronlarının inkişafında əsas zəncirləri məhdudlaşdırmağa yönəlib. Ukrayna tərəfdaşlarımızla birlikdə bu və digər sanksiyaları sinxronlaşdıraraq Rusiyanın hərbi istehsalatındakı kritik elementlərə təzyiqi artırmaq üçün ardıcıl çalışır.”
17-08-2025, 12:50
İndoneziyada zəlzələ: 30-a yaxın insan yaralandı
İndoneziyanın mərkəzi Sulavesi adasında bazar günü səhər saatlarında baş verən 6,0 bal gücündə zəlzələ nəticəsində onlarla insan xəsarət alıb.
Bu barədə ölkənin Təbii Fəlakətlərin Nəticələrinin Azaldılması Agentliyi bildirib.
Agentliyin açıqlamasında 29 nəfərin yaralandığı, ikisinin vəziyyətinin ağır olduğu bildirilib.
Qeyd edək ki, İndoneziya Yer qabığının müxtəlif təbəqələrinin bir-birinə toxunduğu və çoxlu sayda zəlzələlərə səbəb olduğu yüksək seysmik aktivlik zonası olan Sakit Okean Halqası adlanan ərazidə yerləşir.
16-08-2025, 21:16
Zelenski Trampa qarşı çıxdı
"Ukrayna prezidenti Volodimir Zelenski amerikalı həmkarı Donald Tramp və Qərb liderləri ilə söhbətində Ukrayna Silahlı Qüvvələrinin Donbassdan çıxarılmasını istisna edib".
Bu barədə “Reuters” agentliyi məlumat dərc edib.
"Zelenski sülh razılaşması müqabilində Donbası Rusiyaya verməkdən imtina etdi", - məlumatda qeyd olunub.
Bundan əvvəl ABŞ prezidenti Donald Tramp Avropa liderləri ilə söhbətində bildirmişdi ki, bütün Donbasın Rusiya ərazisi kimi tanınması sülh sazişinin tezliklə əldə olunmasına kömək edəcək.
16-08-2025, 20:48
Ərdoğandan Alyaska görüşünə reaksiya
Türkiyə Prezidenti Rəcəb Tayyib Ərdoğan Ağ Ev rəhbəri Donald Tramp və Rusiya lideri Vladimir Putin arasında avqustun 16-da Alyaskada baş tutan görüşü müsbət qiymətləndirib.
Türkiyə lideri bu barədə “X” hesabında paylaşım edib.
“ABŞ Prezidenti Tramp və Rusiya Prezidenti Putin arasında Alyaskada keçirilən danışıqlar Rusiya-Ukrayna müharibəsinə son qoymaq axtarışlarına yeni təkan verib. Biz Alyaska Sammitini alqışlayır və ümid edirik ki, Ukrayna Prezidenti Zelenskinin iştirakı ilə bu yeni proses davamlı sülhün əsasını qoyacaq. Türkiyə sülhün bərqərar olması üçün hər cür töhfə verməyə hazırdır”, - deyə Ərdoğan yazıb.
16-08-2025, 19:52
Tramp Avropa liderləri və Zelenskini Vaşinqtona çağırdı
ABŞ prezidenti Donald Tramp Avropa liderlərini avqustun 18-də Vaşinqtonda Ukrayna prezidenti Volodimir Zelenski ilə danışıqlara qoşulmağa dəvət edib.
Bu barədə "The New York Times" mənbələrə istinadən yazıb.
Siyasətçilər Ukraynadakı müharibənin həlli yollarını müzakirə edəcəklər.
Qəzet yazır ki, bazar ertəsi Donbassın Rusiya ərazisi kimi tanınması təklifi müzakirə olunacaq. Nəşrin mənbələrinin məlumatına görə, bu variantın Alyaskada atəşkəs müqabilində Rusiya prezidenti Vladimir Putin tərəfindən təqdim edildiyi iddia edilir. Rusiya rəsmiləri məlumatı təsdiqləməyib.
NYT yazır ki, Zelenski və Avropa liderləri qəti şəkildə ərazi güzəştlərinin əleyhinədirlər. Ukrayna rəsmiləri bildiriblər ki, ərazilərin verilməsini nəzərdə tutan istənilən razılaşma Ukrayna konstitusiyasını pozur və qəbul edilə bilməz.
16-08-2025, 19:03
Putin Trampdan nə istəyib?
Rusiya Prezidenti Vladimir Putin amerikalı həmkarı Donald Trampla görüşündə atəşkəsin əldə olunması üçün Ukrayna qoşunlarının Donbası tamamilə tərk etməsini tələb edib.
Bu barədə anonim mənbələrə istinadən “Bloomberg“ məlumat yayıb.
Məlumata görə, ABŞ prezidenti Donald Tramp bu barədə Ukrayna prezidenti və Avropa liderlərinə bildirib.
16-08-2025, 18:55
Pakistanda güclü daşqın - 300 nəfər öldü
Pakistanın şimal-qərbində iki gündür davam edən güclü yağış və daşqınlar nəticəsində 300-dən çox insan həlak olub.
Xilasetmə işləri və bağlanmış yolların təmizlənməsi davam edir, təcili yardım məqsədilə vəsait ayrılır. Meteoroloqların məlumatına görə, güclü yağışlar avqustun 21-dək davam edəcək.
Cari musson mövsümündə həmişəkindən daha çox yağan yağışlar yolları və binaları yuyub aparıb.
Şənbə günü səhərə qədər Hayber-Paxtunxva əyalətinin dağlarında 307 nəfərin öldüyü, daha çox insanın isə itkin düşdüyü təsdiqlənib. Bu barədə əyalətin müvafiq idarəsi məlumat verib.
Son bir həftə ərzində təkcə Pakistan deyil, həm də qonşu Hindistan və Nepalın bir hissəsi güclü yağışlar, daşqınlardan ciddi zərər çəkib. Yerli rəsmilər bildiriblər ki, Pakistanın paytaxtı İslamabadın şimalında avtomobillə üç saat yarımlıq məsafədə yerləşən Buner rayonu 184 nəfərin öldüyü, infrastruktur və əkin sahələrinə ciddi ziyan dəydiyi üçün ölkədə ən çox zərər çəkmiş bölgələrdən biri olub.
Daşqınlardan zərər çəkənlər üçün tibbi şəhərciklər salınır, məcburi köçkün ailələri isti yeməklə təmin olunur.
16-08-2025, 17:51
SEPAH generalı Pezeşkianın oğlunu hədəf aldı: “Pantürkist kimi hərəkət edir”
İslam İnqilabı Keşikçiləri Korpusunun (SEPAH) generalı, keçmiş deputat Mənsur Həqiqətpur İran prezident Məsud Pezeşkianın oğlu Yusif Pezeşkianı hədəf alıb.
“Sepah Pasdaran” Telegram kanalının məlumatına görə, general Mənsur Həqiqətpur “İran 24” telekanalına müsahibəsində deyib ki, Azərbaycan məsələsinə qohumluq münasibətləri prizmasından baxmaq səhv və sadəlövhlükdür.
“Gələcəkdə İranın ya Zəngəzurda öz iştirakı olmalıdır, ya da olmasa, alternativ plan hazırlamaq lazımdır.
Prezidentin Zəngəzur məsələsinə münasibəti sadəlövhdür.
Cənab Pezeşkian ekspertlərin rəylərinə əsaslanacağına söz verib.
Azərbaycan və Ermənistan məsələlərində ekspertlərin təcrübəsindən istifadə etməlidirlər, təbii ki, öz oğlu istisna olmaqla.
Biz prezidentin oğlunun Zəngəzur məsələsi ilə bağlı fikirlərini qəbul etmirik.
Pezeşkiyanın oğlu pantürkist hərəkata uyğun hərəkət edir”, - Mənsur Həqiqətpur deyib.
16-08-2025, 14:04
Putindən jurnalistlərə qeyri-adi REAKSİYA
Rusiyalı həmkarı Putinlə Alyaskada görüşən ABŞ Prezidenti Donald Tramp deyib ki, danışıqlarda "böyük irəliləyiş"ə baxmayaraq, heç bir razılaşma əldə olunmayıb.
Tramp-ın Putinlə görüşməkdə məqsədi Ukraynadakı müharibəyə son vermək idi.
Alyaskadakı üç saatlıq görüşdən sonra mətbuata açıqlamasında Tramp "Biz ora çata bilmədik" deyib.
Trampın üzündəki narazı ifadələr də bu uğursuzluğun vizual təsdiqi idi.
Putin isə kameralar qarşısında daha rahat, hətta qələbə qazanmış kimi sevincli görünürdü.
Putin Alyaskada jurnalistlərin “sual yağışı”na tuş gəlib:
- Cənab Putin, atəşkəsə razılaşırsınız?
- Cənab Putin, bundan sonra dinc əhalini öldürməməyə söz verirsiniz?
- Prezident Putin, niyə prezident Tramp sizin sözlərinizə inanmalıdır?
Vladimir Putin jurnalistlərin suallarına maraqlı təpki göstərib. O, üzündəki ifadələrlə bu suallara əvvəlcə təəccübləndiyini nümayiş etdirib, sonra isə onları vecinə almadığını göstərib...
Qərb jurnalistlərinin təkrar suallarına cavab olaraq qeyri-adi üz ifadələri və hərəkətlər nümayiş etdirən Putinin bu görüntülərini kameramanlar qaçırmayıblar.
Putinin qəribə hərəkətləri Qərb mediasında geniş müzakirələrə səbəb olub.
16-08-2025, 12:09
Orbandan Tramp-Putin görüşünə REAKSİYA
Rusiya prezidenti Vladimir Putinlə ABŞ lideri Donald Trampın Alyaskadakı görüşü iki ölkə arasında əməkdaşlığın bərpasına və beynəlxalq təhlükəsizliyin möhkəmlənməsinə gətirib çıxaracaq.
Bu fikirləri Macarıstan baş naziri Viktor Orban sosial şəbəkə hesabında paylaşıb.
"İllərdir ki, biz iki ən böyük nüvə dövlətinin əməkdaşlıq çərçivəsini məhv etdiyini və təhdidləri mübadilə etdiyini gördük. İndi bu bitdi. Bu gün dünya dünənkindən daha təhlükəsiz yerdir", - Orban Facebook-da yazıb.
Xatırladaq ki, dünən Ukrayna müharibəsindən sonra ilk dəfə ABŞ və Rusiya liderləri görüşüblər. Görüş vaxtilə rusların ABŞ-yə satdığı Alyaskanın Ankoriç şəhərində keçirilib. 3 saat çəkən görüş barədə Rusiya Prezidenti Vladimir Putin "Danışıqlarımız qarşılıqlı hörmət və konstruktiv atmosferdə keçdi. Onlar çox əsaslı və faydalı oldu", deyə bəhs edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!