16-07-2022, 21:46
ABŞ Rusiyanı İrəvandan çıxarır
ABŞ Rusiyanı Cənubi Qafqazdan çıxarmaq üzərində işləyir.
Bu sözləri erməni ekspert Suren Sərkisyan FTX rəhbəri Uilyam Bernsin İrəvana səfərini şərh edərkən qeyd edib.
O bildirib ki, ABŞ-ın regionda siyasəti dəyişməyib. Ermənistan-Türkiyə və Ermənistan-Azərbaycan münasibətlərinin tam bərpasına yönəlib.
Sərkisyanın fikrincə, məhz buna görə Berns baş nazirdən əlavə Ermənistan MTX-nin deyil, Təhlükəsizlik Şurasının katibi ilə görüşdü, çünki Ermənistan-Azərbaycan münasibətlərinin tənzimlənməsi istiqamətində prosesə İrəvan tərəfdən Armen Qriqoryan rəhbərlik edir, Azərbaycan Prezidentinin köməkçisi Hikmət Hacıyevlə görüşən də odur.
“FTX-nin regionda hədəfi Rusiya və İran olaraq qalır. Ancaq hazırda əsas diqqət Rusiyanın Cənubi Qafqazdan çıxarılmasıdır, buna görə də Tehran hələlik sakitliyini qoruyur.
ABŞ Rusiyanın Ermənistanda hərbi bazasının və Qarabağda sülhməramlılarının olmasını Ermənistan-Türkiyə və Ermənistan-Azərbaycan münasibətlərinin normallaşması prosesinə ən ciddi maneə sayır. Buna görə də anlamaq lazımdır ki, Berns İrəvana hardan gəlib və buradan hara gedəcək”, - Sərkisyan vurğulayıb.
Qeyd edək ki, FTX rəhbərinin İrəvana səfəri ciddi reaksiyalara səbəb olub. Belə ki, bu, son 28 ildə ilk dəfədir.
Bernsin İrəvana səfəri haqda məlumatlar qapalı saxlanılırdı, yalnız ötən gün axşam saatlarında onun Paşinyan və Qriqoryanla görüşü təsdiqləndi.
12-07-2022, 16:03
Ermənistanda təlimə çağırış birmənalı qarşılanmadı
Avqustun 1-dən oktyabrın 30-dək Ermənistanda hərbi vəzifəlilərin təlimi keçiriləcək. Hökumətin ehtiyatda olan hərbçiləri üç aylıq təlimlərə çağırması ölkədə birmənalı qarşılanmayıb. Ehtiyatda olan polkovnik Artaşes Mxitaryan deyib ki, 2017-ci ilin noyabrında qəbul edilmiş “Hərbi xidmət haqqında” qanuna əsasən, təlim-məşq toplanışları qısa müddətə keçirilməlidir. Amma indi 3 aylıq müddətdən söhbət gedir:
“Adətən 7-10 günlük müddətlərdə bacarıqların təkmilləşdirilmə məşqləri, yeni silahlarla tanışlıq təlimləri keçirilirdi. Artıq rüblük təlimlər nəzərdə tutulub. Əvvəllər yeni batalyonların formalaşdırılması əməliyyatlarının hazırlanması üçün üç aylıq toplantılar keçirilirdi”.
Polkovnik belə qənaətə gəlib ki, üç aylıq hərbi təlimlər ehtiyatda olanları döyüş növbətçiliyinə cəlb etmək üçün keçirilir.
“Kadr problemi var, Ermənistan Respublikasının cəbhə xətti artıq bir neçə dəfə uzundur. Mövcud qüvvələrlə döyüş növbətçiliyi apara bilmirik, ona görə də bu üç aylıq təlim-məşq toplanışları keçirilir. Avqustun 1-dən etibarən 1400-ə yaxın adam təlimə cəlb ediləcək ki, onların əksəriyyəti motoatıcı bölmələrdə xidmət keçəcək”.
Hökumətin 23 iyun qərarında toplanışa ehtiyatda olan 1444 nəfərin çağırılması nəzərdə tutulur. Onların 1249-u əsgər və praporşik, 65-i böyük praporşik, 130-u zabitdir. Hərbi toplanış Motoatıcı Qoşunları, Mühəndis Qoşunları, Raket-Artilleriya Qoşunları, Kəşfiyyat Qoşunları və Rabitə Qoşunlarını əhatə edəcək.
5-07-2022, 14:55
Əgər Nikol Zəngəzur dəhlizinə imkan verməsə...
Ermənistan müxalifəti vitse-spiker postuna yeni namizədini irəli sürməyəcək və deputatlarının Ermənistan parlamentində postlardan və mandatlardan imtina edəcəyini elan edəcək. Bu, Paşinyanın müxalifət üzərində növbəti qələbəsidir. Çox güman ki, onunla bu məsələlərdə siyasi texnoloqlar çalışır.
Bu fikirləri Siyasi Tədqiqatlar İnstitutunun direktoru Sergey Markov bölüşüb.
“Bütün bunları Paşinyan erməni xalqının dəstəyi hesabına edə bilir. İnsanlar anlayırlar ki, revanşist qüvvələr hakimiyyətə gəlsə, Ermənistan yeni məğlubiyyətə düçar olacaq. Bundan başqa, əhali təxminən 20 il hakimiyyətdə olmuş Qarabağ klanı, Robert Köçəryan, Serj Sərkisyandan yorulub. Bu, Ermənistanın Baş nazirinin siyasi dominantlığını rəsmiləşdirməsinə imkan verən əsas səbəblərdir”, - deyə rusiyalı ekspert bildirib.
Zəngəzur dəhlizindən danışan politoloq qeyd edib ki, Azərbaycan ondan imtina etmək niyyətində deyil, üstəlik, Rusiya, Azərbaycan və Ermənistan liderlərinin üçtərəfli razılaşması hələ də qüvvədədir.
“Lakin Azərbaycan ilə Naxçıvan Muxtar Respublikası arasında İran ərazisindən keçən yola gəldikdə, əgər bu yol tikilsə, Zəngəzur dəhlizinə real alternativ olacaq. Əslində, Bakı Zəngəzur dəhlizilə Ermənistana əməkdaşlıq təklif edir. Bakının Tehranla alternativ yolun tikintisi ilə bağlı razılaşmasında da bir siqnal var – əgər Ermənistan bundan sonra da ikili oyunu davam edəcəksə və Zəngəzur dəhlizinin inşasına tam dəstək olmayacaqsa, onu, sadəcə, İran ərazisindən tikəcəklər. Mənim fikrimcə, bu yol tamamilə tamdəyərli alternativ ola bilər. Əgər Ermənistan Zəngəzur dəhlizinin reallaşmasına yenə də maneə olacaqsa, bundan ən çox zərəri elə özü görəcək. Bakı və Tehran alternativ tikəcək, İrəvan isə yenə ofsaytda qalacaq, yenə uduzacaq, məğlub olacaq”, - Markov bildirib.
28-06-2022, 14:15
Ermənistan sərhədə muzdluları yerləşdirir
Ermənistanda çağırışçılar mərhələli şəkildə ön xətdə döyüş növbətçiliyindən azad ediləcək, onları müqaviləli hərbçilər əvəz edəcək. Bunu Ermənistan Baş Qərargahının Səfərbərlik və Təşkilat İdarəsinin rəis müavini Saak Saakyan deyib.
Onun sözlərinə görə, ordu korpuslarından birində ön xəttin mühafizəsi indi demək olar ki, tamamilə müqaviləli əsgərlərə həvalə olunub.
“Müdafiə naziri və Baş Qərargah rəisinin vəzifələrindən biri də çağırışçıların cəbhə xəttində xidmətdən mümkün qədər azad edilməsini təmin etməkdir. Çağırışçılar yalnız döyüş hazırlığı ilə məşğul olacaqlar və zəruri hallarda döyüş növbətçiliyinə cəlb olunacaqlar”, - Saakyan bildirib.
28-06-2022, 09:28
Paşinyan: Azərbaycan müharibəyə hazırlaşır
Ermənistanın öz öhdəliklərini yerinə yetirməməsi haqda rəy yaratmaqla Azərbaycan yeni müharibəyə legitimlik qazandırmağa çalışır. Belə bir iddianı Ermənistan Baş naziri Nikol Paşinyan dünənki onlayn mətbuat konfransında səsləndirib.
Baş nazir delimitasiya və demarkasiya komissiyasının iclasının keçirilməsi ilə bağlı ilkin razılığın əldə edildiyi iki halı qeyd edib. Hər iki halda Bakı ya imtina edib, ya da təxirə salınmasını tələb edib:
“Eyni hal nəqliyyat kommunikasiyası ilə bağlıdır: Azərbaycan elə bir görüntü yaradır ki, Ermənistan üştərəfli bəyanatı pozur və nəqliyyat kommunikasiyalarının açılmasına qarşı gedir”.
Paşinyan iddia edib ki, əslində reallıq başqadır: Bakı 30 ildir Ermənistanın blokada siyasətini aparıb və bunu hazırda effektli hesab edir, ona görə də kommunikasiyaların açılmasını ləngidir.
O bildirib ki, İrəvan kommunikasiyaların açılmasında maraqlıdır, çünki bu halda İran və Rusiya ilə dəmiryol əlaqəsi qurulacaq, həmçinin, Mehri-Arazdəyən istiqamətində Ermənistan alternativ yol əldə edəcək.
Qeyd edək ki, Paşinyan tamamilə yalan danışır. Məsələ budur ki, delimitasiya və demarkasiyanın hansı xəritələrlə aparılması barədə Ermənistan mövqeyini tez-tez dəyişir: gah anklavların “hər iki ölkədə” qalmasını istəyir, gah isə 1986-87-ci illərdə otlaq sahəsi kimi Ermənistana icarəyə verilən torpaqları geri qaytarılmamasına çalışır.
Digər tərəfdən, Ermənistan Azərbaycanın ərazi bütövlüyü məsələsində də manipulyasiya edir. Nikol Paşinyan “Azərbaycanın ərazi bütövlüyünün Qarabağa dəxli yoxdur” kimi absurd, riyakar və həyasız bəyanat verməkdən çəkinmir.
Üstəlik, Azərbaycan Prezidenti İlham Əliyev rəsmən elan etdi ki, 10 noyabr 2020-ci il bəyanatı ərəfəsində şifahi razılıq əldə olunub və Ermənistan “dqr”, “status” adı çəkməyəcəyinə söz verib.
Ancaq N.Paşinyan məhz bu müsahibəsində belə “Azərbaycan Ermənistana və Qarabağa qarşı müharibəyə hazırlaşır” kimi ifadə ilə həyasızcasına yenə də Qarabağdakı rus sülhməramlılarının nəzarəti altında olan ərazilərdən “ayrıca qurum” kimi danışmağa səy göstərir.
Onun Lavrovun əleyhinə çıxması isə onu göstərir ki, Paşinyan yeni oyunu yenə Avropanın bəzi dövlətlərinin sifarişi ilə oynamaq istəyir.
27-06-2022, 16:51
50 KİV Paşinyanın bugünkü brifinqindən imtina etdi
Baş nazir Nikol Paşinyanın bugünkü mətbuat konfransına sual göndərməkdən imtina edən erməni media redaktorlarının sayı 50-ni keçib. Ermənistan KİV xəbər verir ki, bu günə kimi 30-dan çox KİV rəhbəri sual göndərməkdən imtina etdiklərini bildirmişdi.
Mətbuat konfransından imtina edən erməni redaktorlar bildiriblər ki, belə “onlayn brifinq”lər əvvəldən hazırlanmış ssenari üzrə keçirilir, suallar əsasən hökumətyönlü media tərəfindən verilir.
Xatırladaq ki, bu gün yerli vaxtla saat 20:00-da Paşinyan onlayn qaydada KİV və QHT-lərin suallarını cavablandıracaq. Mətbuat konfransı Facebook üzərindən yayımlanacaq. Hər media orqanından və ya QHT-dən bir sual qəbul ediləcək.
Sualları İctimai Televiziyanın şərhçisi Tatev Danielyan canlı yayımda səsləndirəcək.
25-04-2022, 12:58
Südabə İrəvanlının 60 illik “Kədərinin dili”
“Mirvarid Dilbazi Poeziya Məclisi” İctimai Birliyinin təşkilatçılığı ilə şair Südabə İrəvanlının 60 illik yubileyi və “Kədərin dili” kitabının təqdimatı keçirilib.
24 Aprel Lütfi Zadə Texnologiyalar Mərkəzində, “Mirvarid Dilbazi Poeziya Məclisi” İctimai Birliyinin təşkilatçılığı ilə Azərbaycan Yazıçılar Birliyinin fəxri üzvü, şair Südabə İrəvanlının 60 illik yubileyi və “Kədərin dili” kitabının təqdimatı keçirilib.
Tədbiri giriş sözü ilə ictimai birliyin sədri şair-publisist Güllü Eldar Tomarlı açaraq bildirdi ki, Südabə İrəvanlı 1962-ci ildə Azərbaycanın əzəli torpağı olan Dağ Borçalının Soyuqbulaq kəndində anadan olub. 1984 -cü ildən Rusiyanın Taymır mahalının Norilsk şəhərində otuz iki il yaşamış və orda Azərbaycan Diasporasının nəzdində "Qadınlar şura"sının sədri vəzifəsində uzun müddət çalışmışdır. Rusiya Taymır Yazıçılar Birliyinin "Yanan Ürəklər", "Aysberq", "Vətən həsrət olanda" və.s kimi almanaxlarında şeirləri çap edilmiş və iki dəfə poeziya müsabiqələrinin qalibi olmuşdur. Bir çox şeirləri rus dilinə çap olunmuşdur. Azərbaycanda "Palitra", "Azərbaycan", "Sahibkarlıq" kimi qəzetlərdə və "Elm və Həyat", “Mişov dağı” kimi jurnallarda şeirləri çap edilmişdir. Südabə İrəvanlı hazırda "Mirvarid Dilbazi Poeziya" Məclisi İctimai Birliyinin "Poeziya" şöbəsinin rəhbəridir.
"Dədə Ələsgər Ocağı" İctimai Birliyinin sədri Xətai Ələsgərli Südabə İrəvanlının yaradıcılığını qiymətləndirərək İctimai Birliyin ali mükafatı olan "Aşıq Ələsgər 200" yubiley medalı ilə təltif etdi.
Tədbirdə çıxış edən şair-publisist, sosioloq Əhməd Qəşəmoğlu, şair Səadət Buta, şair Salman Qazi, Aşıq Pəri Məclisinin sədri, şair Pərvanə Zəngəzurlu və Aşıq Pəri qızları, şair-publisist Aqşin Ağkəmərli, şair Qəzənfər Məsimoğlu, şair-bəstəkar Aysel Kərim, QHT- rəhbərləri - qazi Taleh Əliyev, Dünyaxanım Əliyeva, Aynur Zülfüqarova və saz-söz adamları Südabə İrəvanlını 60 illik yubileyi və yeni "Kədərin dili" kitabının işıq üzü görməsi münasibətilə təbrik ediblər. Tədbirdə Xətai rayon Tahir Bağırov adına 59 nömrəli tam orta məktəbin təşkilatı işlər üzrə direktor mavini Fəxriyə Babayeva, 8 ci sinif şagirdi Təhminə Hüseynova, 5 ci sinif şagirdi Əsmər Aslanlı, 4 cü sinif şagirdi Ülkər Allahverdili, 8 ci sinif şagirdi Zemfira Ərəstünova da İştirak ediblər. Suraxanı rayonu Rəsul Ənnağıyev adına 141 nömrəli tam orta məktəbin 6 ci sinif şagirdi Roman Kazımov, Xətai rayonu, Heydər Əliyev adına litseyin 6 cı sinif şagirdi Mətin Abbaslı, Qaradağ rayonu Əliheydər Kazımov adına tam orta məktəbin 4-cü sinif şagirdi Məryəm Əliyeva çıxış edib.
Aşıq Gözəl Kəlbəcərli, Dərya Mərdanzadə sazda Südabə İrəvanlının sözlərinə ifalar səsləndirdilər.
23-03-2022, 09:19
Paşinyana sadiq deputatlar müxalifətin Qarabağ bəyanatını RƏDD ETDİ
Martın 22-də hakim “Vətəndaş Müqaviləsi” partiyasından olan deputatlar Ermənistan parlamentinin iclasında Azərbaycanın əleyhinə yönəlmiş Qarabağla bağlı bəyanat layihəsinin qəbulu zamanı müxalifətin təşəbbüsünü dəstəkləməyiblər.
Ermənistan KİV xəbər verir ki, parlament çoxluğu səsvermədə bitərəf qalıb. Yalnız “Ermənistan” və “Mənim şərəfim var” bloklarını təmsil edən parlament müxalifəti (107 deputatdan 30 nəfəri) layihəni dəstəkləyib.
Xatırladaq ki, Ermənistan parlamentinin qapalı iclasında Qarabağdakı vəziyyət müzakirə olunub. Təşəbbüs parlament müxalifəti tərəfindən irəli sürülüb. Müzakirə mövzusu “Qarabağda humanitar vəziyyət, təhlükələr və təxirəsalınmaz tədbirlər” adlandırılıb.
22-03-2022, 10:17
Cəmaləddin Quliyev
Ermənistanın müharibə xərclərinin yarısı beynəlxalq ianələr hesabına ödənilib
Ermənilər arasında “Himnadram” kimi tanınan Hayastan Ümumerməni Fondu 1992-ci ildə Ermənistanın iqtisadi inkişafına dəstək olmaq üçün pul toplamaq naminə diasporu "ana ölkə" ilə əlaqələndirmək məqsədi ilə yardılıb. Mövcud olduğu müddət ərzində təxminən bir milyon Ermənistan vətəndaşı toplanmış 400 milyon dollara yaxın vəsaitdən müəyyən mənada faydalanıb.
“Himnadram” 2020-ci ilin payızında Azərbaycanla münaqişəyə girmiş Ermənistanın dadına yetişdi. Fond 200 milyon dollara qədər vəsait toplamaqla tarix rekorda imza atdı. ABŞ, Avropa, Avstraliya və digər ölkələrdə 750.000-ə yaxın şəxs Azərbaycana qarşı müharibədə ermənilərə yardım etmək üçün fonda töhfə verdi. Fondun nizamnaməsində Ermənistan hökumətinin birbaşa vəsait alıcısı ola bilməyəcəyi açıq-aydın göstərilsə də, toplanan məbləğin təxminən 60 faizi “təcililik” səbəbindən birbaşa dövlət büdcəsinə köçürülüb.
Müharibə bitəndə isə yüksək emosionallıq öz yerini rasionallığa verdi və donorlar 200 milyon dolların necə və hansı formada xərcləndiyini bilməyə çalışdılar. Ermənistanın hazırkı hökuməti siyasi rəqibləri, xüsusən də keçmiş prezident və “Himnadram” idarə heyətinin üzvü Robert Köçəryan tərəfindən maliyyəni israf etməkdə və mənimsəməkdə ittiham olunur.
Mübahisəyə son qoymaq üçün Ermənistanın keçmiş prezidenti Armen Sarkisyan “Himnadram”dan müstəqil audit tələb edib və yoxlama zamanı pozuntu aşkar edilərsə, bütün ianələri geri qaytarmağı təklif edib. Fondun icraçı direktoru Haykak Arşamyan bu qətnamə ilə razılaşıb. Bununla belə, yekun auditin məzmunu hələ ictimaiyyətə açıqlanmayıb…
"Himnadram"ın siyasətlə heç bir əlaqəsi olmadığını iddia etməsinə baxmayaraq, yarandığı gündən siyasətlə məşğul olub. Fondun ilk rəhbəri ovaxtkı prezident Levon Ter-Petrosyanın çoxdankı dostu və müttəfiqi Manuşak Petrosyan olmuşdu. Fonda rəhbərlik etdiyi altı il ərzində birtəhər topladığı sərvət, dəbdəbəli evlərin, mağazaların və restoranların çeşidi ilə yadda qalmışdı. Fonddan ayrıldıqdan sonra o, "Spektrum" adlı tikinti şirkətini qurdu..
Milliyətçi Daşnak Partiyasının Kaliforniyadakı gənclər federasiyasına rəhbərlik edən diaspor ermənisi Raffi Ovannisyan fondun yeni icraçı direktoru təyin olunanda ona Ter-Petrosyanın dövründə diaspor daşnakları ilə Ermənistan hökuməti arasında pisləşmiş münasibətləri düzəltmək tapşırılmışdı. 1999-cu ildə "Azg Daily"-yə verdiyi müsahibədə Hovanissian "Himnadram"ın siyasiləşməsini etiraf edirdi...
"Himnadram" daim hakimiyyətdə olanlara xüsusi xidmətləri ilə diqqət çəkirdi. Məsələn, 2007-ci ildə Göycə gölünün çimərliklərində yerləşən Kaputak Sevan kurort kompleksində külək sörfü mərkəzinin tikintisini maliyyələşdirib. Kurort “təsadüfən” keçmiş prezident Robert Köçəryanın həyat yoldaşı Bella Köçəryana məxsusdur. Obyekt üçün tələb olunan avadanlıqların alınmasını da fond ödəyib.
… Fondun 2013-cü ildə keçirdiyi illik telemarafondan sonra məlum olub ki, Qarabağda Ermənistanın dəstəklədiyi separatçı rejim üçün dəbdəbəli xidməti avtomobillər alınıb, bu rejimə bağlı şəxslərin şəxsi bank kreditləri ödənilib. "Himnadram"-ın digər icraçı direktoru Ara Vardanyan 2018-ci ildə Ermənistan Milli Təhlükəsizlik Xidməti tərəfindən maliyyə mənimsəmələrində şübhəli bilinərək həbs edilib. Vardanyan onlayn qumar oyunları üçün 20 milyon dram limiti olan Himnadram kredit kartından istifadə etdiyini etiraf etmişdi..
Fond daim çirkli pulların yuyulması ilə də gündəmə gəlir. İllik qara bazarı təxminən 300 milyon dollar olan Ermənistan və onilliklər ərzində beynəlxalq yoxlamanın qeyri-mümkün olduğu boz zona olan Qarabağ uzun müddət “Himnadram”-ın genişmiqyaslı əməliyyatları üçün təhlükəsiz sığınacaq olub. “Himnadram”-ın on altı ölkədəki filialları xeyriyyə təşkilatının bir hissəsi olduğuna görə vergidən azaddır. Uzun illərdir ki, bəzi erməni oliqarxları bu vergidən azad statusdan geniş şəkildə istifadə ediblər.
….”Himnadram” Ermənistan və Qarabağı birləşdirən iki magistral yolun tikintisini maliyyələşdirib: biri azərbaycanlıların sıxışdırılıb çıxarıldığı Şuşa və Laçın rayonlarından, digəri isə Kəlbəcərdən keçir. Qarabağda bir sıra digər yollar da asfaltlanıb, o cümlədən Araz çayının ən cənub sahillərini Ermənistan Respublikası ilə birləşdirən Şimal-Cənub yolu və əvvəllər əsasən narkotik və silah ticarəti üçün istifadə olunub.
Bu yollar həm də Ermənistan və Qarabağın faktiki olaraq vahid iqtisadi məkanda birləşməsini təmin etmək üçün nəzərdə tutulmuşdu.
…1994-cü ildə Ermənistanın birinci Dağlıq Qarabağ müharibəsində qələbəsindən sonra müharibə zamanı çoxsaylı maddi-texniki çətinliklərlə üzləşən Ermənistan silahlı qüvvələri nəzarəti altında olan ərazilərdə ilk növbədə hərbi təyinatlı yolların tikintisinə başladılar. Həmin yolların əksəriyyətini məhz Himnadram maliyyələşdirdi: fondun ikinci, üçüncü, beşinci, altıncı, yeddinci, on altıncı və on yeddinci telemarafonlarının hamısı yol tikintisi üçün vəsait toplamağa həsr olunmuşdu..
Himnadramın Qarabağdakı fəaliyyəti təkcə yol tikintisi ilə məhdudlaşmır. “Artsax kəndlərinin yenidən məskunlaşdırılmasi” layihəsi çərçivəsində Qarabağa qanunsuz köçürülməyə sponsorluq edib.
“Himnadram”ın Qarabağda onilliklər ərzində göstərdiyi səyləri - faktiki olaraq Ermənistanın hərbi işğalını gücləndirmək və beynəlxalq səviyyədə dəstəklənən sülh təkliflərinin həyata keçirilməsinə mane olmaq məqsədi daşıyan - fondun 2020-ci il Qarabağ müharibəsi zamanı toplanmış ianələrinin məhz necə xərcləndiyini soruşmaq ağlabatandır. Ermənistanın baş naziri Nikol Paşinyanın sözlərinə görə, Himnadramın Ermənistan hökumətinə etdiyi ianələr hökumətin müharibə xərclərinin təqribən yarısını ödəyib – yenə də şübhəli fəaliyyətdir, bu, birbaşa fondun nizamnaməsinə ziddir.
…. Əgər Ermənistanın müharibə xərclərinin “təxminən yarısı” beynəlxalq ianələr hesabına ödənilibsə, o zaman bunun bir hissəsi çox güman ki, təkcə hərbi texnikanın alınmasını deyil, həm də müharibə zamanı Azərbaycan şəhərlərini hədəfə almış erməni artilleriyasının saxlanmasını əhatə edirdi….
Xeyriyyə pullarının hərbi fəaliyyətləri maliyyələşdirmək üçün istifadə edildiyi sübut olunarsa, “Himnadram”ın vergidən azad statusu sual altına düşə bilər. İllərlə aparılan araşdırmalar ABŞ-da yerləşən xeyriyyə təşkilatlarının fərdləri necə aldatdığını və hətta terror təşkilatları üçün ianə topladığını ortaya çıxarıb. Ermənistan Fondunun vergidən azad statusunun müxtəlif maraq qruplarına müxtəlif ölkələrdə, ilk növbədə ABŞ-da yaşayan insanlardan yoxlanılmadan pul almasına və son nəticədə həm də oliqarxiyanı dəstəkləmək üçün istifadə edilməsinə imkan verdiyini söyləmək heç də yanlış olmazdı (tərcümə edilmiş mətn)..
14-03-2022, 15:11
Ermənistan Azərbaycanın sülh təkliflərinə CAVAB VERDİ
Ermənistan Xarici İşlər Nazirliyi Azərbaycan Respublikasının təqdim etdiyi sülh təkliflərinə cavab verib.
Bu barədə Ermənistan XİN-in bəyanatında qeyd edilib.
XİN bildirib ki, rəsmi İrəvan BMT Nizamnaməsinə, Mülki və Siyasi Hüquqlar haqqında Beynəlxalq Pakt və Helsinki Yekun Aktına uyğun olaraq, Ermənistan və Azərbaycan arasında sülh sazişinin imzalanması üçün danışıqların təşkili ilə bağlı ATƏT-in Minsk Qrupunun həmsədrliyinə müraciət edib.
Xatırladaq ki, Azərbaycanın xarici işlər naziri Ceyhun Bayramov bir neçə gün öncə Bakının İrəvana münasibətlərin normallaşdırılması ilə bağlı beş bəndlik yeni təkliflər paketi təqdim etdiyini və cavab gözlədiyini bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!