10-11-2023, 14:40
XİN Başçısı Səudiyyə Ərəbistanına səfərə getdi
Ceyhun Bayramov Səudiyyə Ərəbistanına işgüzar səfərə yola düşüb.
Bu barədə Xarici İşlər Nazirliyindən məlumat verilib.
Nazir səfər çərçivəsində İslam Əməkdaşlıq Təşkilatının Xarici İşlər Nazirləri Şurasında iştirak edəcək.
10-11-2023, 14:31
Hərbi Prokurorluqda hərbiçilərin maarifləndirmə tədbiri keçirildi
Hərbi Prokurorluq hərbçilərin hüquqi maarifləndirilməsi işini davam etdirir. Bu istiqamətdə növbəti tədbir Daxili İşlər Nazirliyinin Daxili Qoşunlarının N saylı hərbi hissəsində keçirilib.
Hərbi Prokurorluğun mətbuat xidmətindən Modern.az-a bildiriblər ki, tədbirdə əvvəlcə Ulu Öndər Heydər Əliyevin, şəhidlərin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Prezident İlham Əliyevin 2022-ci il 29 sentyabr tarixli Sərəncamına əsasən, cari ilin ölkəmizdə "Heydər Əliyev İli" elan edildiyini vurğulayan hərbi prokurorun böyük köməkçisi-Hərbi Prokurorluğun mətbuat xidmətinin rəhbəri Firad Əliyev əvvəlcə Ümummilli Lider Heydər Əliyevin Vətən və xalq qarşısındakı misilsiz xidmətlərindən, dövlətçilik tariximizdəki müstəsna rolundan, dünya siyasətinə verdiyi töhfələrdən danışıb.
F.Əliyev Prezident, Müzəffər Ali Baş Komandan İlham Əliyevin rəhbərliyi ilə ölkəmizin son 20 ildə əldə etdiyi möhtəşəm uğurlardan, o cümlədən Vətən müharibəsində qazanılmış tarixi Qələbədən, antiterror tədbirlərindən, işğaldan azad edilmiş ərazilərdə həyata keçirilən sürətli bərpa-quruculuq işlərindən, dövlətimizin bütün sahələrdə sürətli inkişafından və bu uğurların qazanılmasında Azərbaycanın Birinci vitse-prezidenti Mehriban xanım Əliyevanın töhfələrindən, xalqımızın əzmkarlığından və Silahlı Qüvvələrin qüdrətindən bəhs edib.
Polkovnik Vurğun Abbasov, ədliyyə kapitanı Həsən Baxşəliyev, hüquq müdafiəçisi-hüquq üzrə magistr Ceyhun İbrahimov çıxışlarında Azərbaycanın qazandığı uğurlardan söz açıblar.
Tədbirdə hərbçilərin hüquqi biliklərinin artırılması məqsədilə maarifləndirici söhbət aparılıb, onları maraqlandıran suallar cavablandırılıb.
10-11-2023, 13:44
“Beşiktaş” klubu Burak Yılmazla yolları ayırdı
Türkiyənin “Beşiktaş” klubu Burak Yılmazla yolları ayırıb.
Klub rəhbərliyi “Beşiktaş”ın baş məşqçisi postunu müvəqqəti icra edən Burak Yılmazı istefaya göndərib.
Komandanın baş məşqçisi Şenol Günəşin istefasından sonra bu vəzifə onun köməkçisi Burak Yılmaza həvalə edilmişdi.
Lakin Yılmazın rəhbərliyi altında komanda uğursuz çıxış etdiyinə görə onun da istefaya göndərilməsinə qərar verilib.
10-11-2023, 13:33
Şuşa 2024-cü il üzrə Gənclər Paytaxtı seçildi
Qarabağın incisi olan Şuşa şəhəri İslam Əməkdaşlığı Təşkilatının 2024-cü il üzrə Gənclər Paytaxtı seçilib.
Bu barədə Gənclər və İdman Nazirliyindən məlumat verilib.
Bildirilib ki, İslam Əməkdaşlığı Təşkilatı (İƏT) Gənclər Forumunun həyata keçirdiyi “Gənclər Paytaxtı 2024” beynəlxalq proqramının seçim komissiyası tərəfindən 2024-cü il üzrə namizədliyi irəli sürülən Şuşa şəhərinin “İƏT Gənclər Paytaxtı” seçilməsi ilə bağlı yekdilliklə qərar qəbul edilib.
İƏT Gənclər Forumunun İcraiyyə Şurasının 11-ci iclasında gənclər və idman nazirinin müavini Fərhad Hacıyev və nazirliyin gənclərlə iş şöbəsinin müdir müavini Ülviyyə Axundova iştirak ediblər.
10-11-2023, 12:17
Sabahın hava proqnozu
Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Bu barədə Milli Hidrometeorologiya Xidmətindən bildirilib.
Bildirilib ki, gecə və axşam bəzi yerlərdə qısamüddətli yağış yağacağı ehtimalı var. Şimal-qərb küləyi gündüz mülayim cənub-şərq küləyi ilə əvəz olunacaq. Havanın temperaturu gecə 12-15° isti, gündüz 16-20° isti olacaq. Atmosfer təzyiqi 771 mm civə sütunundan 768 mm civə sütununa enəcək. Nisbi rütubət 60-70 % olacaq.
Azərbaycanın rayonlarında bəzi yerlərdə arabir yağış yağacağı gözlənilir. Ayrı-ayrı yerlərdə qısamüddətli leysan xarakterli olacağı, şimşək çaxacağı, dağlıq ərazilərdə qar yağacağı ehtimalı var. Səhər tədricən kəsiləcək, gün ərzində əsasən yağmursuz keçəcək. Gecə və səhər bəzi rayonlarda duman olacaq. Mülayim qərb küləyi əsəcək. Havanın temperaturu gecə 7-11° isti, gündüz 18-23° isti, dağlarda gecə 2° şaxtadan 3°-dək isti, gündüz 4-9° isti olacaq.
9-11-2023, 23:58
“Qarabağ” “Bayer”ə uduzdu
“Qarabağ” UEFA Avropa Liqasının qrup mərhələsində növbəti oyununa çıxıb.
Azərbaycan çempionu H qrupundakı dördüncü matçında Almaniyanın "Bayer" komandası ilə üz-üzə gəlib. Tofiq Bəhramov adına Respublika Stadionunda oynanılan qarşılaşmanı ingiltərəli FIFA referisi Kreyq Pouson idarə edib.
Görüşün taleyini 1 qol həll edib. Əsas vaxta əlavə olunmuş 4-cü dəqiqədə Viktor Bonifeysin penaltidən vurduğu qol qonaqlara qələbə qazandırıb.
85-ci dəqiqədə "köhlən atlar"ın əsas qapıçısı Andrey Lunyov zədələnərək Luka Quqeşaşvili ilə əvəzlənib.
Bu nəticədən sonra xallarını 12-yə çatdıran Leverkuzen təmsilçisi 1/8 finala vəsiqəni təmin edib və qrup liderliyini davam etdirir. Altı xalı olan Ağdam klubu isə ikinci pillədə qərarlaşıb.
Qrupun digər görüşündə isə “Hekken” İsveçdə Norveç “Molde”sini sınağa çəkəcək.
Qeyd edək ki, "Bayer" və "Qarabağ" komandaları arasında Almaniyada keçirilmiş görüş meydan sahiblərinin 5:1 hesablı qələbəsi ilə yekunlaşıb.
9-11-2023, 21:45
Qalata qülləsində bayrağımız və Xarıbülbül rəsmləri işıqlandırıldı
İstanbuldakı tarixi Qalata qülləsi Azərbaycanın üçrəngli Dövlət Bayrağı və Xarıbülbül rəsmləri ilə işıqlandırılıb.
Təşəbbüs Azərbaycanın Zəfər Gününün ildönümü və Dövlət Bayrağı Günü münasibətilə baş tutub. Ərazidə olan yerli əhali və turistlərin diqqətini çəkən lazer işıqlandırması bir neçə dəfə təkrarlanıb.
Xatırladaq ki, noyabrın 8-i və 9-u dünyanın ən böyük meqapolislərindən olan İstanbulun iki qitəsini birləşdirən “Fatih Sultan Mehmet” və “15 İyul Şəhidləri” körpülərində də Azərbaycan Bayrağının rəngləri həkk olunub.
İşıqlandırılma Azərbaycanın İstanbuldakı Baş Konsulluğunun təşəbbüsü və Türkiyənin bir sıra dövlət qurumlarının dəstəyi ilə həyata keçirilir.
9-11-2023, 16:54
Ümumqoşun Orduda gənc əsgərlərin andiçmə mərasimi keçirildi - VİDEO
Azərbaycan Respublikasının Dövlət Bayrağı
Günündə Əlahiddə Ümumqoşun Orduda gənc əsgərlərin andiçmə mərasimi keçirilib.
Bu barədə Müdafiə Nazirliyindən məlumat verilib.
Mərasimdə Ümummilli Lider Heydər Əliyevin və şəhidlərimizin əziz xatirəsi yad edilib, Dövlət Himnimiz səsləndirilib.
Gənc əsgərlər Azərbaycan Respublikasının mənafeyini, ərazi bütövlüyünü və müstəqilliyini canları bahasına qoruyacaqlarına and içiblər.
Tədbirdə çıxış edən zabit, əsgər və valideynlər şəxsi heyətə vətənpərvər, yenilməz, mübariz, Vətənə, dövlətə və öz Ali Baş Komandanına sadiq olmağı, əcdadların hərbi ənənələrini layiqincə davam etdirməyi arzulayıblar.
Əlahiddə Ümumqoşun Ordu komandanının müavini, general-mayor Rəhim Cəfərov Zəfər və Dövlət Bayrağı Günləri, həmçinin andiçmə mərasimi müasibətilə şəxsi heyəti təbrik edib.
Bildirilib ki, Azərbaycan xalqı bu il Dövlət Bayrağı Gününü tamam başqa əhval-ruhiyyədə, böyük sevinc və qürurla qeyd edir. Çünkü xalqımız fəxr edir ki, müstəqilliyimizi təcəssüm etdirən şanlı Dövlət Bayrağımız işğaldan azad edilən torpaqlarımızda, ölkəmizin bütün suveren ərazilərində qürurla dalğalanır.
General-mayor Rəhim Cəfərov çıxışının sonunda hərbi andı qəbul edən əsgərlərə xalqımıza qələbə sevinci yaşadan hərbi qulluqçularımızın davamçıları olaraq şərəfli xidmətlərində uğurlar arzulayıb.
Şəxsi heyətin tribuna önündən təntənəli keçidi ilə mərasim başa çatıb.
9-11-2023, 15:47
İlham Əliyevin Özbəkistan səfəri başa çatdı
Azərbaycan Respublikasının Prezidenti İlham Əliyevin Özbəkistana səfəri noyabrın 9-da başa çatıb.
Daşkənd Beynəlxalq Hava Limanında Prezident İlham Əliyevin şərəfinə fəxri qarovul dəstəsi düzülüb.
Azərbaycan Prezidentini Özbəkistanın Baş naziri Abdulla Aripov və digər rəsmi şəxslər yola salıblar.
9-11-2023, 15:04
Prezident Zirvə toplantısı iştirakçılarının şərəfinə təşkil olunan tədbirdə iştirak etdi
Noyabrın 9-da Daşkənddə İqtisadi Əməkdaşlıq Təşkilatının 16-cı Zirvə toplantısı iştirakçılarının şərəfinə rəsmi qəbul təşkil olunub.
Azərbaycan Respublikasının Prezidenti İlham Əliyev tədbirdə iştirak edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!