9-11-2023, 14:42
“Zəngəzur” tankerində bayrağımız qaldırıldı
“Azərbaycan Xəzər Dəniz Gəmiçiliyi” QSC (ASCO) və Azərbaycan Dövlət Neft Şirkəti (SOCAR) tərəfindən yaradılmış “SA Maritime AFEZCO” Birgə Müəssisəsinə məxsus “Aframax” tipli sayca üçüncü gəmidə Dövlət Himninin sədaları altında üçrəngli Azərbaycan Bayrağı qaldırılıb.
ASCO-dan bildirilib ki, digər "Aframax" tipli tankerlər kimi, bu gəmi də Prezident İlham Əliyevin tapşırığı ilə xalqımız üçün mühüm olan tarixi torpağımızın şərəfinə adlandırılıb. Belə ki, yeni istismara verilən gəmiyə “Zəngəzur” adı verilib.
“Zəngəzur”un dedveyti də (ümumi yükgötürmə qabiliyyəti) bundan öncə istismara verilən “Şuşa” və “Qarabağ” “Aframax” tipli tankerlər kimi təxminən 115 min tondur.
“ASCO Ship Management AFEZCO” tərəfindən idarə olunacaq “Aframax” tipli bu tanker də Xəzərdənkənar sularda istismar ediləcək.
Qeyd edək ki, Prezident İlham Əliyevin dəstəyi ilə alınan bu nəhəng gəmilər ölkəmiz üçün strateji əhəmiyyətə malik olmaqla, milli gəmiçiliyin yükdaşıma potensialının artırılmasına xidmət edəcək, neft sənayemizin beynəlxalq dəyər zəncirinə töhfə verəcək.
Onu da əlavə edək ki, “Aframax” tipli tankerlərin alınması layihəsi üzrə ASCO-nun payı bir müddət əvvəl yerli bazarda uğurla buraxılan “ASCO istiqrazları”ndan cəlb olunan vəsait hesabına maliyyələşdirilib.
9-11-2023, 13:03
Ərdoğan İrəvana çağırış etdi
Özbəkistanın paytaxtı Daşkənddə keçirilən İqtisadi Əməkdaşlıq Təşkilatının (ECO) 16-cı Zirvə toplantısında çıxış edən Türkiyə Prezidenti Rəcəb Tayyib Ərdoğan Qarabağ mövzusuna da toxunub.
Ərdoğan çıxışı zamanı "Qarabağda 30 ildən artıq davam edən işğala tam son qoyulması ilə bölgəmizdə daimi sülhə bir addım daha yaxınlaşdığımızı görürük" deyib
Ərdoğan rəmi İrəvana çağırış edərək “Ermənistan öhdəliklərini yerinə yetirsə, sülh prosesi daha da asanlaşacaq” söyləyib.
Türkiyə lideri bildirib ki, Azərbaycanın Qərb bölgələri ilə Naxçıvanı birləşdirəcək nəqliyyat xətlərinin ən yaxın zamanda həyata keçirilməsi son dərəcə vacibdir.
9-11-2023, 12:31
Sabahın havası
ETSN Milli Hidrometeorologiya Xidməti sabahın hava proqnozunu açıqlayıb.
Noyabrın 10-da Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin axşam bəzi yerlərdə qısamüddətli yağış yağacağı ehtimalı var. Arabir güclənən cənub-qərb küləyi səhər güclü şimal-qərb küləyi ilə əvəz olunacaq.
Havanın temperaturu gecə 12-16° isti, gündüz 16-19° isti olacaq. Atmosfer təzyiqi 757 mm civə sütunundan 771 mm civə sütununa yüksələcək. Nisbi rütubət gecə 70-80 %, gündüz 50-60 % olacaq.
Azərbaycanın rayonlarında havanın əsasən yağmursuz keçəcəyi, lakin səhər dağlıq ərazilərdən başlayaraq bəzi yerlərdə arabir yağış yağacağı gözlənilir. Ayrı-ayrı yerlərdə qısamüddətli leysan xarakterli olacağı, şimşək çaxacağı, dolu düşəcəyi, dağlıq ərazilərdə qar yağacağı ehtimalı var. Gecə və səhər bəzi rayonlarda duman olacaq. Arabir güclənən qərb küləyi əsəcək.
Havanın temperaturu 7-12° isti, gündüz 15-20° isti, dağlarda gecə 0-5° isti, gündüz 5-10° isti olacaq.
9-11-2023, 11:52
Mehriban Əliyeva Bayraq Günü münasibətilə paylaşım etdi
Azərbaycan Respublikasının Birinci vitse-prezidenti Mehriban Əliyeva rəsmi "İnstagram" səhifəsində 9 Noyabr - Bayraq Günü münasibətilə paylaşım edib. Paylaşımda deyilir:
"Qoy qəlbimiz hər zaman Vətənimizə, bayrağımıza və xalqımıza görə qürur hissi ilə dolsun!".
9-11-2023, 11:27
İlham Əliyev Pakistanın Baş naziriylə görüşdü[/size]
Azərbaycan Respublikasının Prezidenti İlham Əliyevin noyabrın 9-da Daşkənddə Pakistan İslam Respublikasının Keçid Hökumətinin Baş naziri Ənvər-ul-Xak Kakar ilə görüşü olub.
Bu barədə Prezidentin Mətbuat Xidməti məlumat yayıb.
Görüşdə Azərbaycan ilə Pakistan arasında əlaqələrin mövcud vəziyyətindən məmnunluq ifadə olunub.
Pakistanın Baş naziri Azərbaycanı antiterror tədbirlərinin uğurla başa çatması və Azərbaycanın suverenliyinin tam şəkildə təmin olunması münasibətilə təbriklərini çatdırıb. Pakistanın həmişə Azərbaycanın haqlı və ədalətli mövqeyini dəstəklədiyini vurğulayıb.
Dövlətimizin başçısı təbriklərə görə təşəkkürünü bildirib, Ermənistanın Azərbaycana qarşı 30 ilə yaxın davam edən işğalı dövründə, həmçinin 44 günlük Vətən müharibəsində Pakistanın ölkəmizə göstərdiyi siyasi-diplomatik dəstəyini və Ermənistanın işğalçı dövlət kimi tanımasını yüksək qiymətləndirib.
Prezident İlham Əliyev Azərbaycanın Cəmmu və Kəşmir məsələsində BMT Təhlükəsizlik Şurasının müvafiq qərarlarını rəhbər tutaraq haqq-ədalətin tərəfdarı olduğunu diqqətə çatdırıb.
Görüşdə ölkələrimiz arasında iqtisadi-ticari münasibətlərin, biznes dairələri arasında əlaqələrin genişləndirilməsi məsələlərinə toxunulub. Hökumətlərarası Komissiyanın fəaliyyətinin vacibliyi qeyd edilib. Həmçinin enerji və nəqliyyat bağlantıları sahələrində əməkdaşlıq məsələlərinə dair fikir mübadiləsi aparılıb.
İmtiyazlı ticarət münasibətlərinin ölkələrimiz arasındakı ticarət dövriyyəsinin həcminin artırılmasına müsbət təsir göstərəcəyi qeyd edilib. İnformasiya-kommunikasiya texnologiyaları, turizm sahələrində əməkdaşlığın, iki ölkənin şəhərləri arasında bu yaxınlarda birbaşa hava əlaqəsinin yaradılmasının müsbət addım olduğu bildirilib, bunun turizm sahəsində əməkdaşlığa və insanlar arasındakı təmaslara müsbət təsir göstərəcəyi vurğulanıb. İki ölkə arasında beynəlxalq təşkilatlar çərçivəsində uğurlu əməkdaşlığın davam etdirilməsinin vacibliyi qeyd olunub.
Söhbət zamanı dünyada islamofobiya meyillərinin artmasından narahatlıq ifadə edilib.
9-11-2023, 10:14
İlham Əliyev Dövlət Bayrağı Günüylə bağlı paylaşım etdi
Prezident İlham Əliyev 9 Noyabr - Dövlət Bayrağı Günü münasibətilə sosial şəbəkə hesablarında paylaşım edib.
Butov.az Prezidentin paylaşımını təqdim edir:
9-11-2023, 08:33
Çoxəsrlik tariximizin ən şanlı və qürurlu səhifələrindən olan 8 Noyabr - Zəfər Günü və 9 noyabr - Azərbaycan Respublikasının Dövlət Bayrağı Günü münasibətilə “Böyük Qayıdış” Gənclər Təşkilatı tərəfindən silsilə tədbirlər həyata keçirilib.
Azərbaycan Respublikasının Gənclər Fondunun dəstəyi ilə silsilə tədbirlər çərçivəsində təşkilat tərəfindən işğaldan azad olunmuş və yenidən qurulan Zəngilan rayonunun Ağalı kəndində “Kod Qarabağ” məntiqi-intellektual komanda oyunu, Azərbaycan Dövlət Pedaqoji Universitetində Zəfər Gününə həsr olunmuş tədbir, şəhid övladları üçün master-klasslar, “Qarabağa qayıdış və dirçəliş” mövzusunda gənclərin iştirakı ilə müzakirələr, Vətən müharibəsində iştirak edən döyüşçü şairlərlə “Mən Vətənəm” adlı görüş, Hərbi Qənimətlər Parkına ekskursiya, “Müharibə Fotoqrafiyası” mövzusunda görüş, Birinci Fəxri xiyaban və İkinci Şəhidlər xiyabanına ziyarət təşkil olunub.
Tədbirlər planına əsasən Qarabağ gənclərinin iştirakı ilə Zəngilan rayonunun Ağalı kəndində “Kod Qarabağ” məntiqi-intellektual komanda oyunu keçirilib. İntellektual oyunun keçirilməsində əsas məqsəd Qarabağı, işğaldan azad olunmuş əraziləri gənclərə daha yaxından tanıtmaq, şanlı Zəfər tariximizi onlar arasında təbliğ etmək və Ağalı kəndində məskunlaşan yeniyetmə və gənclərin asudə vaxtlarının səmərəli təşkil edilməsi olub. 60 nəfər yeniyetmə və gəncin iştirakı ilə baş tutan intellektual oyunda qalib komandalar mükafatlandırılıb.
Silsilə tədbirlər çərçivəsində Azərbaycan Dövlət Pedaqoji Universitetində Vətən müharibəsi qaziləri və tələbə gənclərin iştirakı ilə görüş keçirilib. Görüşdə qəhrəman qazilərimiz 44 günlük Vətən müharibəsində müzəffər Azərbaycan Ordusunun döyüş meydanında rəşadətindən, xalq-ordu birliyindən, müharibə ilə bağlı xatirələrindən, şəhid olmuş döyüşçü yoldaşlarının qəhrəmanlıqlarından və göstərdikləri igidliklərdən bəhs ediblər. Sonda gəncləri maraqlandıran suallar cavablandırılıb.
Tədbirlər planına uyğun olaraq şəhid övladları üçün keçirilən master-klasslar zamanı uşaqlar fincan, kətan çanta və kağızlar üzərinə rəsm çəkərək əyləncəli vaxt keçiriblər. Sonda iştirak edən hər bir şəhid övladına müxtəlif hədiyyələr təqdim olunub.
Tədbirlərin davamı olaraq Azərbaycan Respublikası Gənclər Təşkilatları Milli Şurasının (NAYORA) tərəfdaşlığı ilə “Qayıdış prosesinə gənclər təşkilatlarının töhfəsi və gələcək addımlar” mövzusunda görüş keçirilib. Həmçinin Azərbaycanlı Tələbələr və Məzunlar Platforması (ASAP) ilə birlikdə Azərbaycan Dövlət Neft və Sənaye Universitetində “Qarabağın yenidən qurulması” mövzusunda panel müzakirə təşkil olunub. Müzakirələrdə Qarabağ bölgəsinin dirçəldilməsində gənclər təşkilatlarının və gənclərin rolundan bəhs edilib, eləcə də bölgənin yenidən qurulması prosesində effektiv yollardan danışılıb.
Zəfər Günü və Bayraq Günü ilə əlaqədar keçirilən silsilə tədbirlər çərçivəsində təşkilat nümayəndələri, qazilər, üzv və könüllü gənclər Fəxri xiyabanda ulu öndər Heydər Əliyevin xatirəsinə ehtiramlarını bildirib, daha sonra İkinci Şəhidlər Xiyabanında Azərbaycanın suverenliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini yad ediblər. Həmçinin rəşadətli Azərbaycan Ordusunun şanlı Qələbəsinin canlı muzeyi olan Hərbi Qənimətlər Parkı ziyarət olunub.
Tədbirlərin həyata keçirilməsində əsas məqsəd Müzəffər Ali Baş Komandanın rəhbərliyi ilə rəşadətli Azərbaycan Ordusunun qazandığı şanlı qələbəni, ölkəmizin ərazi bütövlüyünün tam təmin olunmasının tarixi əhəmiyyətini, qalib Azərbaycan xalqının qələbədəki rolunu, igid hərbçilərimizin döyüşlərdə göstərdikləri qəhrəmanlıq nümunələrini gənc nəslə ətraflı şəkildə çatdırmaqdan ibarət olub.
8-11-2023, 22:38
Zəfər Günüylə bağlı Şuşada möhtəşəm atəşfəşanlıq oldu
8 Noyabr - Zəfər Günü münasibətilə Şuşa şəhərində möhtəşəm atəşfəşanlıq olub.
Bayram atəşfəşanlığı Qarabağın, qədim Şuşanın səmasını al-əlvan rənglərə boyayıb.
8-11-2023, 21:55
Təbrizdə Zəfər Günü ilə əlaqədar təbdir keçirildi
Azərbaycan Respublikasının Təbriz şəhərindəki Baş konsulluğu tərəfindən 8 Noyabr – Zəfər Günü ilə əlaqədar təbdir keçirilib.
Tədbirdə Zəfər Gününə həsr edilmiş tarixi-sənədli film nümayiş etdirilib və fotosərgi təşkil olunub.
Tədbirdə Azərbaycanın azadlığı və ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Baş konsul Əliyənnağı Hüseynov çıxış edərək 8 Noyabr - Zəfər Gününün müstəqil Azərbaycanın tarixində ən şərəfli günlər sırasında özünə layiqli yer tutduğunu əbədiyyətə qədər müstəqilliyimizə qızıl hərflərlə yazılmış tarixi gün olduğunu qeyd edib. Baş konsul "Şəhidlər ölməz, Vətən bölünməz" şüarı ilə öz azadlığı, ərazi bütövlüyü və suverenliyi uğrunda mübarizəsini əzmlə davam etdirən Azərbaycan xalqının 2020-ci ilin payızında növbəti dəfə bir yumruq kimi birləşərək öz torpaqlarını düşməndən azad etdiyini, Azərbaycanın regionda yeni geosiyasi reallıq yaratdığını qeyd edib. O vurğulayıb ki, Müzəffər Ali Baş Komandan, Prezident İlham Əliyevin liderliyi ilə qəhrəman Azərbaycan Ordusu öz şücaəti ilə bütün dünyaya onilliklər boyu xalqımızı təslimçiliyə məcbur etmək cəhdlərinin əbəs olduğunu nümayiş etdirdi. Azərbaycan xalqı heç bir halda Ana Vətən torpağından kimsəyə güzəşt etməz. Vətən müharibəsinin tarixi nəticələri, eyni zamanda, iki yüz illik erməni təcavüzkarlığının ifşası üçün tarixi şans yaratdı. Azərbaycan bu tarixi Zəfəri ilə həm də öz döyüşkənliyi ilə bərabər, humanistliyini və insansevərliyini ortaya qoydu. Bütün dünya aydın şəkildə gördü ki, təcavüzkar Ermənistan 30 illik işğal dövründə Azərbaycan xalqına qarşı törətdiyi soyqırımı kimi ağır cinayətlərlə sakitləşməyərək, zəbt etdiyi ərazilərdə ağır vandalizmlər törədib. Ermənistanın işğal olunmuş ərazilərdə mədəni-tarixi abidələrimizi məhv etməsi erməni vandalizminin və barbarlığının ən bariz göstəricisidir. İşğaldan azad edilmiş ərazilərimizdə məscidlərin, tarixi və mədəni abidələrin tamamilə məhv edilməsi faktlarının Vətən müharibəsindən sonra üzə çıxması bu ölkənin əsl simasını bütün dünyaya göstərdi.
Baş konsul vurğulayıb ki, 2023-cü ilin sentyabrında təxminən 24 saat davam edən lokal xarakterli antiterror tədbirləri nəticəsində Qarabağda qanunsuz erməni silahlı birləşmələri tam olaraq diz çökdürüldü. Uzun illər separatçı fəaliyyəti ilə beynəlxalq hüququn bütün aspektlərinə qarşı həqarət edən qanunsuz rejimin terrorçu başbilənləri ağ bayraq qaldıraraq təslim oldular. Prezident İlham Əliyev oktyabrın 15-də Xankəndidə Azərbaycan Bayrağını ucaldaraq növbəti dəfə regionda hamı üçün əhəmiyyətli olan sülh, sabitlik və ortaq inkişaf mesajı verdi.
Ə.Hüseynov, həmçinin azad olunmuş ərazilərdə uğurla davam edən quruculuq işlərindən, Ermənistanın mina terrorundan bəhs edib. O, sonda vurğulayıb: "Bu gün iftixarla deyə bilərik ki, bu tarixi Zəfər ömrünü Azərbaycan xalqına həsr etmiş və ölkəmizin ərazi bütövlüyünün bərpasını ən böyük arzusu və həyat amalı kimi qəbul edən Ümummilli Lider Heydər Əliyevin ruhunu şad edən milli şərafət səltənətidir. Ulu Öndər Heydər Əliyevin müəyyən etdiyi dövlətçilik strategiyasının bütün elementləri 44 günlük Vətən müharibəsində özünü bir daha təsdiqlədi. Prezident İlham Əliyevin liderliyində dövlət-xalq vəhdəti Azərbaycanın gücünü və qüdrətini bütün dünyaya nümayiş etdirdi. Ona görə də Zəfər Günü Azərbaycanın dövlət müstəqilliyinin, suverenliyinin, gücünün və qüdrətinin rəmzidir. Bu Qələbə hər bir Azərbaycanlı üçün sonsuz qürur mənbəyidir və tariximizdə əbədi qalacaq".
8-11-2023, 21:17
Naxçıvanda Zəfər Gününə həsr olunan konsert təşkil olundu
Naxçıvan şəhərinin mərkəzi meydanında Zəfər Gününə həsr olunan konsert təşkil edilib.
Konsertdə Naxçıvan Qarnizonu Hərbi Orkestrinin və Naxçıvan Dövlət Filarmoniyasının təqdimatında vətənpərvərlik ruhunda musiqi nömrələri və ifalar səsləndirilib. Gecəyə rəng qatan ifalar muxtar respublika sakinlərində xoş ovqat yaradıb.
Sonda Zəfər Günü münasibətilə atəşfəşanlıq olub.
Qeyd edək ki, bu gün, həmçinin Naxçıvanda Ulu Öndərin 100 illiyinə və Zəfər Gününə həsr olunan genişmiqyaslı ağacəkmə aksiyası da keçirilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!