28-12-2025, 12:40
Sabahın havası
Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Bu barədə Milli Hidrometeorologiya Xidmətindən məlumat verilib.
Məlumata əsasən mülayim cənub-qərb küləyi əsəcək.
Havanın temperaturu gecə 1-3° isti, gündüz 6-9° isti olacaq. Atmosfer təzyiqi 750 mm civə sütununu təşkil edəcək. Nisbi rütubət gecə 80-85 %, gündüz 60-65 % olacaq.
Azərbaycanın rayonlarında hava şəraiti əsasən yağmursuz olacaq. Lakin gündüz dağlıq ərazilərdən başlayaraq arabir yağıntılı olacağı, qar yağacağı gözlənilir. Ayrı-ayrı yerlərdə intensiv olacağı ehtimalı var. Bəzi yerlərdə arabir duman olacaq. Qərb küləyi bəzi yerlərdə arabir güclənəcək.
Havanın temperaturu gecə 2° şaxtadan 3°-dək isti, gündüz 5-9° isti, dağlarda gecə 5-10° şaxta, yüksək dağlıq ərazilərdə 10-15° şaxta, gündüz 1-6° şaxta olacaq.
Gecə və səhər bəzi dağlıq ərazilərdə yolların buz bağlaması ehtimalı var.
28-12-2025, 12:09
Milli Məclisdə kadr və struktur dəyişikliyi
Milli Məclisdə kadr və struktur dəyişikliyi olub.
Milli Məclis sədrinin köməkçisi Elmar Hüseynov vəzifəsindən azad edilərək Beynəlxalq münasibətlər şöbəsinə müdir təyin edilib.
Həmin şöbənin müdiri İlkin Məmmədov isə yeni yaradılan Protokol xidmətinə rəhbər təyin edilib.
28-12-2025, 11:46
Ermənistandan da Azərbaycana ixrac mümkündür - Papoyan
Gələcəkdə təkcə Bakıdan yeni idxalın deyil, həm də erməni məhsullarının Azərbaycana ixracının mümkün ola biləcəyi bildirilib.
Bu barədə Ermənistanın iqtisadiyyat naziri Gevork Papoyan açıqlama verib.
“Hazırda biz “Georgian Railways” şirkətindən tranzit üçün kifayət qədər qabiliyyətli qiymət əldə etmişik. Düşünürəm ki, həm Gürcüstan, həm də Azərbaycan növbəti uğurlu razılaşma barədə məlumat verəcək”, – deyə Papoyan jurnalistlərlə Qarni kəndində söhbəti zamanı bildirib.
Nazirin sözlərinə görə, Ermənistan Azərbaycana alüminium, folqa, meyvə və tərəvəz, bəzi növ içkilər, eləcə də müxtəlif növ tekstil məhsulları ixrac edə bilər. Papoyan əlavə edib ki, aparılmış araşdırma nəticəsində Ermənistanın ixrac etdiyi, Azərbaycanın isə idxal etdiyi məhsulların mövcud olduğu müəyyən edilib.
28-12-2025, 11:28
Prezidentin dəmir iradəsi: Heç kim qanundan üstün deyil!
Azərbaycanın müasir dövlətçilik tarixində korrupsiyaya, nepotizmə qarşı mübarizə və qanunun aliliyinin təmin edilməsi sadəcə hüquqi proses deyil, həm də köklü bir sosial transformasiya mərhələsinə qədəm qoyub.
Bu gün ölkədə həyata keçirilən islahatların mərkəzində "Heç kəs toxunulmaz deyil" prinsipi dayanır. Həmin prinsip dövlət idarəçiliyində bəzi hallarda formalaşmış bir sıra mənfi stereotipləri — imtiyazlı şəxslər qrupu, toxunulmaz qohumlar və vəzifə statusundan doğan hüquqi immunitet xülyasını darmadağın edir.
Son dövrlərdə Dövlət Gömrük Komitəsində (DGK) həyata keçirilən irimiqyaslı əməliyyatlar dövlətin bu sahədəki qətiyyətini bir daha nümayiş etdirdi. Belə ki, Baş Prokuror yanında Korrupsiyaya Qarşı Mübarizə Baş İdarəsi tərəfindən keçirilən əməliyyatlar nəticəsində külli miqdarda siqaret qaçaqmalçılığı və vəzifə səlahiyyətlərindən sui-istifadə halları ifşa olunub.
Bu əməliyyatların ən diqqətçəkən məqamı həbs olunan şəxslərin statusu və onların yüksək vəzifəli şəxslərlə olan qohumluq əlaqələridir. Əməliyyatda Dövlət Gömrük Komitəsinin vəzifəli şəxsi Fərid Usubov, iş adamı Ruslan Eyyubov və Bakı-Hövsan Beynəlxalq Ticarət Dəniz Limanının rəisi Rəşad Daşdəmirov kimi şəxslərin həbsi cəmiyyətə verilən aydın bir mesajdır: Qanun qarşısında hər kəs bərabərdir. Yüksək rütbəli generalların və ya nüfuzlu dövlət xadimlərinin yaxın qohumu olmaq heç kimə qanunsuzluq etmək və ya məsuliyyətdən qaçmaq imtiyazı vermir.
Azərbaycan cəmiyyətində bəzi şəxslərin özlərini qanundan üstün tutması, "mən filankəsəm" və ya "filan şəxsin qohumuyam" deyərək özünə toxunulmazlıq statusu qazanmaq istəyi dövlətin sərt reaksiyası ilə qarşılaşır. Müasir dövlət modelində artıq "nüfuzlu qohum" faktoru hüquqi qalxan rolunu oynamır. Əksinə, yüksək vəzifəli şəxslərin qohumlarının törətdiyi qanunsuzluqlar daha böyük ictimai məsuliyyət doğurur və qanun çərçivəsində ən sərt şəkildə cəzalandırılır.
Dövlət başçısı İlham Əliyev bu mövzuya dəfələrlə toxunmuş, məmur aparatına dəfələrlə xəbərdarlıqlar etmişdir. 2020-ci il martın 5-də dövlət başçısının İsmayıllı və Neftçala rayonlarına təyin etdiyi yeni icra başçıları ilə qəbulda dediyi sözlər bu gün də aktualdır.
“Heç bir şəxs qanundan üstün ola bilməz. Əgər kimsə özünü cəmiyyətdən yuxarıda görürsə, öz təkəbbürü və qanunsuz hərəkətləri ilə dövlətin siyasətinə ləkə vurursa, o, mütləq qanun qarşısında cavab verəcəkdir.
Xalqının və dövlətinin mənafeyini fəaliyyətinin prioriteti sayan dövlət başçısı 2025-ci il noyabrın 12-də Naxçıvanda prezidentin səlahiyyətli nümayəndəsini və bir sıra rayonların icra hakimiyyətlərinə təyin olunan başçıları qəbul edərkən bu mövzuda bir daha mühüm mesaj verib.
“Rəhbər vəzifədə çalışan hər bir şəxs, hər bir məmur təvazökar olmalıdır. İlk növbədə, xalqa xidmət etmək, xalqla bir yerdə olmaq onun əsas iş prinsipi olmalıdır."
Prezident İlham Əliyev daha bir çıxışında himayədarlıq hallarına toxunmuşdu.
"Əgər kimsə hansısa tanışlara, qohumlara, yaxud da vəzifədə olan dostlara arxalanırsa, səhv yoldadır. Özü də cəzalandırılacaq, ona himayədarlıq edən də cəzalandırılacaq. Heç kimə güzəşt yoxdur."
Bu sitatlar göstərir ki, dövlət səviyyəsində təkəbbürlülük, vətəndaşa yuxarıdan aşağı baxmaq və imtiyazlılıq mənəvi baxımdan qəbulolunmaz, hüquqi baxımdan isə təhlükəli bir yoldur.
Gömrükdə keçirilən son əməliyyatlar və yüksək rütbəli şəxslərin yaxınlarının həbsi Azərbaycanın hüquqi inkişafında yeni bir mərhələdir. Bu, "imunnutet sahibi" olduqlarını düşünən, qanunu öz maraqlarına uyğunlaşdırmağa çalışan hər kəs üçün bir dərsdir. Ölkədə qanun hər şeydən üstündür və hər bir şəxs öz əməlinə görə qanun qarşısında fərdi məsuliyyət daşıyır.
Cəmiyyətin dövlətə olan inamı məhz belə ədalətli və qətiyyətli addımlarla möhkəmlənir. "Heç kəs toxunulmaz deyil" prinsipi Azərbaycanın gələcək inkişafının, sosial ədalətin və dövlət-vətəndaş münasibətlərinin sarsılmaz təməlidir.
28-12-2025, 11:11
Xankəndiyə ilk qar yağdı
Dekabrın 28-də Xankəndi şəhərinə mövsümün ilk qarı yağıb.
Axşam saatlarından yağan qar şəhərə qış ab-havası gətirib, küçə və parklar ağ örpəyə bürünüb.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən məlumata görə, hava şəraitinin dəyişməsi ilə əlaqədar kommunal xidmətlər gücləndirilmiş iş rejiminə keçib. Nəqliyyatın maneəsiz hərəkəti üçün yolların təmizlənməsi istiqamətində tədbirlər görülür.
28-12-2025, 10:54
Külli miqdarda qanunsuz siqaret ƏLƏ KEÇİRİLDİ
Ölkəyə qanunsuz yollarla gətirilən külli miqdarda - 1 milyon 180 min ədəd siqaretin Dövlət Gömrük Komitəsi tərəfindən realizə edilməsinin qarşısı alınıb.
Bu barədə Dövlət Gömrük Komitəsinə istinadən xəbər verir.
Məlumata görə, Komitənin Əməliyyat-İstintaq Baş İdarəsi və Bakı Baş Gömrük İdarəsinin əməkdaşları tərəfindən Abşeron rayonu, Xırdalan şəhəri ərazisində həyata keçirilən əməliyyat-axtarış tədbirləri nəticəsində 1 yük və 1 minik nəqliyyat vasitəsindən Azərbaycan Respublikasına məxsus məcburi nişanlanma ilə nişanlanmayan külli miqdarda, dəyəri 150 min manata yaxın olan 1 milyon 180 min ədəd “Platinium Seven” markalı siqaret aşkar edilib.
28-12-2025, 00:33
Qərb bölgəsində güclü qar yağır
Azərbaycanın qərb bölgəsində güclü qar yağıb.
Dağlıq rayonlarda avtomobillərin hərəkətində çətinliklər yaranıb.
Əlverişsiz hava şəraiti səbəbindən Gəncə-Daşkəsən, Şəmkir-Gədəbəy və Göygöl-Toğanalı-Kəlbəcər yolunun bəzi hissələrində nəqliyyat vasitələrinin hərəkəti qismən çətinləşib.
27-12-2025, 21:55
“Arsenal” liderliyini qorudu
İngiltərə Premyer Liqasında XVIII turun oyunları keçirilir.
“Mançester Siti” “Nottingem Forest”ə 2:1 hesabı ilə qalib gəlib.
“Arsenal” “Brayton”u (2:1),”Liverpul” isə “Vulverhempton”u (2:1) üstələyib.
“Arsenal” 42 xalla turnir cədvəlinə başçılıq edir. “Mançester Siti” 40 xalla ikinci pillədə qərarlaşıb.
27-12-2025, 21:04
"Mançester Siti" səfərdə qələbə qazandı
İngiltərə Premyer Liqasının 18-ci turunda "Mançester Siti" səfərdə "Nottinqem Forest"in qonağı olub.
Qarşılaşma "şəhərlilər"in 2:1 hesablı qələbəsi ilə yekunlaşıb.
"Nottinqem Forest" - "Mançester Siti" - 1:2
Qollar: O.Hatçinson, 54 – T.Reynders, 48, R.Şerki, 83
Bu qələbədən sonra xallarını 40-a çatdıran Xosep Qvardiolanın komandası turnir cədvəlində liderliyə yüksəlib. "Nottinqem Forest" isə 18 xalla 17-ci pillədə qərarlaşıb.
27-12-2025, 20:35
Səməd Seyidovun adından saxtakarlıq
Bəzi sosial şəbəkə hesablarında Azərbaycan Respublikasının Milli Məclisinin Beynəlxalq münasibətlər və parlamentlərarası əlaqələr komitəsinin sədri Səməd Seyidovun adından “deep fake” texnologiyası ilə hazırlanmış, reallığı əks etdirməyən açıqlama yayılıb
Bu barədə Medianın İnkişafı Agentliyi məlumat yayıb.
"Süni intellektin köməyi ilə hazırlanan bu saxta videogörüntü ictimai rəyi çaşdırmağa yönələn kobud manipulyasiya nümunəsidir. Cəmiyyəti yalnız rəsmi mənbələrin verdiyi informasiyaya inanmağa, dövlətin rəsmi mövqeyini ifadə edən məlumatları ölkənin informasiya agentlikləri və digər peşəkar media subyektlərindən əldə etməyə çağırırıq. Azərbaycan vətəndaşlarını, jurnalistləri, ictimai fəalları bu kimi hallara qarşı hər zaman prinsipiallıq nümayiş etdirməyə, saxta və yalan məlumat əsaslı kampaniyaların, “deep fake” texnologiyaları ilə məzmunyaratma tendensiyasının vüsət aldığı bir şəraitdə sayıq olmağa səsləyirik", - məlumatda deyilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!