3-04-2026, 22:54
“Zirə” Azərbaycan çempionu oldu
Minifutbol üzrə Azərbaycan çempionatının qalibi bəlli olub.
Bakı Tennis Akademiyasında təşkil olunan həlledici görüşdə "Zirə" "Birbaşa Bakı" ilə üz-üzə gəlib. 4:1 hesabı ilə qalib gələn “Zirə” ölkə çempionu olub.
Bürünc medal uğrunda oyunda isə “Aznur” “Sumqayıt”la üz-üzə gəlib. 6:4 hesablı qələbə qazanan “Aznur” üçüncü yerin sahibi olub.
3-04-2026, 22:27
Bakının mərkəzindəki bu yol BAĞLANACAQ
Bakının mərkəzində hərəkət məhdudlaşdırılacaq.
Bu barədə Azərbaycan Avtomobil Yolları Dövlət Agentliyindən (AAYDA) məlumat verilib.
Qeyd olunub ki, 3 aprel saat 22:00-dan 4 aprel saat 07:00-dək Heydər Əliyev prospektindən (tunelin girişindən Xətai prospekti istiqamətində) Fəzail Bayramov küçəsinə qədər olan hissədə təmir işləri icra olunacaq. Bu səbəbdən ərazidə hərəkət məhdudlaşdırılacaq.
"Sürücülərdən aparılan işlərə anlayışla yanaşmaları və əvvəlcədən hərəkət istiqamətlərinə uyğun alternativ yollardan istifadə etmələri xahiş olunur", - məlumatda bildirilib.
3-04-2026, 22:00
"Qarabağ" ilk oyunda "Sabah"la heç-heçə edib
Futbol üzrə Azərbaycan Kubokunda yarımfinal mərhələsinin ilk matçları başa çatıb.
Günün ikinci oyununda "Qarabağ" Tofiq Bəhramov adına Respublika Stadionunda "Sabah"ı qəbul edib. Görüş 2:2 hesablı heç-heçə ilə yekunlaşıb. Ağdam təmsilçisinin heyətində Kadi Borges, qonaqlarda isə Umarali Raxmonaliyev dubl ediblər.
Günün ilk matçında "Zirə" "Turan Tovuz"a 2:0 hesablı qalib gəlib.
Xatırladaq ki, yarımfinal mərhələsinin cavab oyunları aprelin 21-22-də keçiriləcək.
3-04-2026, 20:18
Balaca adamın
yekə buketi
Bu ilin Mart ayı da geridə qaldı. Amma geridə qalan təkcə aylar, günlər deyil, həm də hər ayın, hər günün hər kəsin yaddaşında iz buraxdığı bir xatirə də qalır. Bu ilin 8 martı yadımda bir böyük adamla eyni gül dükanında buket bağlatmağımla qalıb.
Səhər-səhər paytaxtımızın Binəqədi rayonunda yaşayan əzizlərimdən birinin bayramını təbrik etməyə gedirdim. 6-cı mikrorayon dairəsindəki gül dükanına yaxınlaşdım. Müştəri çox olduğundan növbə gözləməli oldum. Gözləsəm də darıxmırdım. Çünki hamı bayram ovqatında idi. Mehribanlıqla danışıb gülüşürdülər, hərdən zarafatlaşanlar da olurdu. Məndən qabaqkı müştərinin növbəsi çatdı. Gül satan ona xüsusi zövqlə bir buket bağladı. Buket çox xoşuma gəldi, qiyməti də məni lap sevindirdi. Büdcəmə uyğun, hətta nəzərdə tutduğum qiymətdən də ucuz...
Cavan oğlan 100 manatlığı uzadıb buketi götürdü. Gülçü 30 manat çıxıb müştəriyə 70 manat qaytardı. Mənim daha fikirləşməyimə, seçim etməyimə ehtiyac qalmamışdı. Xoşhallıqla salam verib, əleyk alandan sonra dedim,- bacıoğlu, zəhmət olmasa, elə mənə də indicə bağladığın buketin eynisini bağla. Qoçaq baş üstə,- deyib, işə girişdi. Buket hazır olunca mən də cibimdən 30 manat çıxarıb əlimdə hazır saxladım. Mübadilə vaxtı gül satan ona verdiyim 30 manatı mənə qaytarıb, - təəccüblə, dayı bu nədi?!
-Dedim: Bala pulumuzu tanımadın?!
-Dedi,-tanıdım e, ancaq sən az vermisən axı. 40 mant da verməlisən. Belə buketin qiyməti 70 manatdır.
- Dedim,-bəs indicə 30 manata verdin axı, iki dəqiqəyə nə dəyişdi ki?!
Balaca tacir xəfifcə gülümsündü, dayıcan,-dedi- sən onlarla bəhs etmə, onlar böyük adamlardı. Buketi alırsansa 40 manat da ver, almırsansa, vaxtımı alma!
40 manat da əlavə edib buketimi aldım. Əvəzində satıcının adını soruşdum. Müşfiq, dedi. Müşfiqin “hörmət” etdiyi böyük adam isə polis serjantı idi...
Bütün xanımlarımıza sayğılarla: Tamxil ZİYƏDDİNOĞLU
3-04-2026, 18:24
Minatəmizləmə zamanı həlak olanların ailə üzvlərinə Prezident təqaüdü veriləcək
Azərbaycan Respublikası Prezidentinin 31 mart 2026-cı il tarixli Fərmanının icrası olaraq Əmək və Əhalinin Sosial Müdafiəsi Nazirliyi minatəmizləmə fəaliyyəti zamanı partlayıcı sursatların işə düşməsi nəticəsində baş verən bədbəxt hadisə ilə əlaqədar həlak olan minatəmizləyənlərin –Seymur Rəşid oğlu Namazov və Raqif Deputat oğlu İsayevin 4 nəfər ailə üzvlərinə Prezidentin aylıq təqaüdünü təyin edib.
Nazirliyin İctimaiyyətlə əlaqələr şöbəsindən verilən məlumata görə, təqaüdün aylıq məbləği 700 manatdır. Fərmanla həmin məbləğin onların ailə üzvlərinin sayına uyğun bərabər hissələrə bölünməklə ödənilməsi nəzərdə tutulub.
Qeyd edək ki, Fərmana əsasən ailə üzvlərinin sırasına dul arvadı (əri), valideynləri, 18 yaşına çatmamış (peşə təhsili, orta ixtisas təhsili və ali təhsil müəssisələrində təhsil alanlara münasibətdə isə həmin təhsil müəssisələrini bitirənədək, lakin ən çoxu 23 yaşına çatanadək) övladları, 18 yaşına çatanadək əlilliyi müəyyən edilmiş 18 yaşından yuxarı əlilliyi olan övladları, uşaq evlərində tərbiyə olunan qardaş və bacıları, birinci növbədən digər qohumları olmayan baba və nənələri aiddir.
3-04-2026, 17:51
KTMT qatardır, qabağında Rusiyadır - Elmar Məmmədyarovdan Ermənistanla bağlı ŞOK AÇIQLAMA
Moldova parlamenti Müstəqil Dövlətlər Birliyinin (MDB) yaradılması sazişini və onun protokolunun ləğvini yekun oxunuşda qəbul edib. Moldova Xarici İşlər Nazirliyindən isə bildirilib ki, bu ölkənin MDB-dən rəsmi şəkildə çıxması üçün 1 il lazım olacaq.
Xatırlatmaq yerinə düşər ki, Moldovadan əvvəl Gürcüstan və Ukrayna da MDB-dən çıxıblar.
Analitiklərin fikrincə, Moldovanın MDB ilə bağlı qərarı bu təşkilatın sonrakı taleyi barədə suallar yaradır.
Məsələ ilə əlaqədar danışan sabiq xarici işlər naziri Elmar Məmmədyarov Azərbaycanın da eyni yolu getməsinə ehtiyac olmadığını bildirib:
"MDB Azərbaycan üçün pislik etməyib. Bu təşkilat elə bir məkandır ki, müxtəlif yerlərdə görüşlər olur, çıxışlar edilir. Bundan sonra öz evinə gedib işini görürsən. Bu baxımdan düşünmürəm ki, MDB-dən çıxmaq Azərbaycan üçün faydalı olar. İndi bilmirəm, sabah hansı hadisə olacaq...
Gürcüstan Cənubi Osetiya və Abxaziya məsələsinə görə, Ukrayna isə müharibəyə görə MDB-dən çıxdı. Moldova da müəyyən narahatlıqlara görə qorxur. Ancaq Azərbaycanın onların yolu ilə getməsinə ehtiyac olduğunu düşünmürəm.
MDB-nin taleyi necə olacaq məsələsinə gəldikdə, deyə bilərəm ki, hər şey elə belə də qalacaq. MDB-də böyük bir qatardır. Onun qabağında Rusiya gedir. Rusiya böyük ölkədir, yavaş-yavaş qurumun fəaliyyətini Orta Asiya ölkələri və Azərbaycanla birlikdə aparacaq. Ancaq yenə deyirəm, sabah böyük nəsə faciə olsa, bəlkə durum dəyişər. Misal üçün deyirdilər ki, Rusiya Ukrayna müharibəsi tezliklə qurtaracaq. Amma bu gün müharibənin dayana biləcəyinə ehtimal görmürəm. Heç atəşkəs əldə edə bilmirlər".
Sabiq nazir Ermənistanın KTMT-dən çıxması ilə bağlı suala isə belə cavab verib: "Məsələni dərindən analiz etsək, Ermənistanın KTMT-dən tam şəkildə çıxmaq istəmədiyi qənaətinə gələ bilərik. Çünki ortada təhlükəsizlik məsələsi var. Ermənistan KTMT-dən çıxsa, təhlükəsizliyini necə qoruyacaq? Paşinyan təhlükəsizlik üçün Azərbaycanla sülh imzalamlı olduqlarını deyir. Bu işləyən formuladır, yoxsa yox, məsələ dərindən təhlil olunmalıdır.
Ermənistan KTMT üzvlüyü üçün ödəniş etməsə də, onun tədbirlərinə qatılmasa da, kağız üzərində üzvdür. İndi Ermənistanda "bu təşkilatın yerinə Ermənistanı kim qoruyacaq" sualına cavab axtarırlar. Tam əminəm ki, heç Ermənistanın özündə necə edəcəklərini bilmirlər".
Elmar Məmmədyarov bu ilin iyununda Ermənistanda keçiriləcək parlament seçkiləri ilə bağlı da fikirlərini bölüşüb: “Maraqlı məqamlardan biri də Paşinyanla görüş zamanı Vladimir Putinin Samvel Karepetyanın seçkilərdə iştirakına eyham vurması idi. Bu, doğru yanaşma deyildi. Ermənistanın qanunları var. Yalnız Ermənistan vətəndaşı baş nazir seçilə bilər. Samvel Karepetyan Rusiya vətəndaşı olduğundan onun baş nazir olması mümkün deyil. Çox güman ki, Rusiya Ermənistandakı seçkilərə müdaxilə edəcək. Ermənistan Rusiya üçün yaxın və önəmli ölkədir. Paşinyan elə-belə demir ki, Ermənistan həmişə Rusiyanın yanında olacaq. Paşinyanın bu fikri tostdur, yoxsa doğrudan belə fikirləşir, bilmirəm. Amma Rusiya öz sözünü deyir.
Mənim fikrimcə, Paşinyan və onun partiyası 7 iyun seçkilərində qalib gələ bilər. Ermənistan əhalisinin əksəriyyəti Paşinyana səs verəcək. Neçə faizlə qalib gələcək, onu deyə bilmərəm. Yeri gəlmişkən, Paşinyanın koalisiyaya getməli olacağı ilə bağlı iddialar da var. Mən bu iddiaları doğru saymıram. Müxalif namizədlər Robert Köçəryan və Samvel Karepetyandır. Paşinyan onlarla necə koalisya qura bilər? Bu baxımdan onun təkbaşına iqtidar olacağını düşünürəm".
3-04-2026, 17:45
Abşeronda Aprel döyüşlərində şəhidlik zirvəsinə ucalan qəhrəmanlarımızın ailələri ilə görüş keçirilib
Abşeron Rayon İcra Hakimiyyətində Aprel döyüşlərində şəhidlik zirvəsinə yüksələn qəhrəman igidlərimizin ailələri ilə görüş keçirilib. Görüşdə Abşeron Rayon İcra Hakimiyyətinin başçısı Abdin Fərzəliyev, Abşeron RİH yanında İctimai Şuranın sədri, şəhid Elçin Həsənlinin anası Xatirə İsmayılova, Rayon Ağsaqqallar Şurasının sədri, şəhid Rauf İbadovun atası Məhərrəm İbadov, Abşeron-Xızı Regional Mədəniyyət İdarəsinin baş məsləhətçisi, Abşeron rayonu üzrə nümayəndə, şəhid Əbdülməcid Axundovun anası Ceyran Həsənova, RİH-in rəhbər şəxsləri iştirak etmişlər.
Görüşdə Abdin Fərzəliyev bildirib ki, Vətən Müharibəsindən əvvəl Ermənistan tərəfi dəfələrlə atəşkəsi pozmuş və müxtəlif vaxtlarda hərbi təxribatlar törədiblər, lakin bu təxribatların qarşısı ordumuz tərəfindən hər zaman qarşısı layiqincə alınmışdır. Növbəti belə təxribatlardan birininin də 2016-cı il aprelin əvvəllərində müşahidə olunduğunu, lakin Azərbaycan Ordusunun layiqli cavabı və əks-həmləsi ilə düşmənin darmadağın edildiyini vurğulayan RİH başçısının sözlərinə görə, bu döyüş Qarabağ müharibəsində dönüş nöqtəsi olmuş və beləliklə də ordumuzun gücünü nəinki qarşı tərəf, eyni zamanda bütün dünya görüb.
Qeyd edilib ki, tarixə “Aprel döyüşləri” kimi düşən və Azərbaycan Ordusunun mütləq qələbəsi ilə nəticələnən döyüşün sonunda Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi və Tərtər rayonunun Madagiz kəndi istiqamətində bəzi mövqelər düşməndən azad olunub. Əsgərlərimiz bu döyüşlə cinayətkar erməni rəhbərlərinin keçilməz erməni səngərləri haqqında yaratdıqları mifləri və uydurmaları alt-üst etməyi bacarıb və bununla da Qarabağa böyük qayıdışın əsası qoyulub.
RİH başçısı qeyd edib ki, Müzəffər Ali Baş Komandan, Azərbaycan Respublikasının Prezidenti cənab İlham Əliyevin uzaqgörənliyi, siyasi iradəsi və düşünülmüş qərarları ilə, o cümlədən “Dəmir yumruq” ətrafında birləşən ordumuzun şücaəti və qəhrəmanlığı ilə 44 gün davam edən Vətən Müharibəsində xalqımız qalib gələrək işğal altında olan torpaqlarımızı tamamilə azad edib. Bununla da Qarabağa yenidən həyatın və yaşamın qayıtdığını vurğulayan A.Fərzəliyev əlavə edib ki, bundan sonra da vətənimizə qarşı hər hansı bir silahlı təxribat baş verəcəyi təqdirdə ordumuz bütün hərbi müdaxilələri yerindəcə məhv etməyə qadir və hazırdır.
Respublikamızın bütün ərazilərində olduğu kimi, Abşeron rayonunda da yaşayan şəhid ailələrinin Azərbaycan Respublikasının Prezidenti cənab İlham Əliyevin və Birinci Vitse-prezident Mehriban xanım Əliyevanın diqqət və qayğısını daim hiss etdiklərini vurğulayan RİH başçısı şəhid ailələrinin qayğıları ilə maraqlanıb.
3-04-2026, 17:44
"Nizami"nin divarlarını yazanlar məlum oldu
Nizami Kino Mərkəzinin divarlarına qraffiti çəkən şəxslərin kimliyi məlum olub.
Bunlar 2009-cu ildə Bakı şəhərində anadan olmuş, “Landau School”un 11-ci sinif şagirdi Bərxudayeva Münəvvər Taleh qızı, 2010-cu ildə Bakı şəhərində anadan olmuş, “Landau School”un 10-cu sinif şagirdi Muradi Layla Samir qızı, 2010-cu ildə Bakı şəhərində anadan olmuş, 10 nömrəli məktəbin 9-cu sinif şagirdi Qaraşlı Şəfiqə Farid qızı və 2006-cı ildə İranda anadan olmuş, 01.09.2024-cü ildən Azərbaycanda yaşayan Belarus vətəndaşı, ADA Universitetinin II kurs tələbəsi Ardeshir Seyfpour Saad Abadidir.
Ardeshir Seyfpour Saad Abadi qraffiti dizaynerdir və “İnstagram”da “temacreworiginal” adlı hesabda öz qraffiti nümunələrini paylaşıb.
Ardeshir Seyfpour Saad Abadinin atası Omid Seyfpour Saad Abadi 2024-cü ildən Azərbaycanda yaşayır, “Denizkala” şirkətində menecer işləyir.
Layla Muradinin atası Muradi Samir “Best Events” MMC şirkətinin baş direktorudur.
Şəfiqə Qaraşlının atası Qaraşov Farid taksi fəaliyyəti ilə məşğul olur.
Münəvvər Bərxudayevanın atası Bərxudayev Taleh isə “Hallibörton Yeureyja Limited” şirkətinin filialında xidmət operatorudur.
Qeyd edək ki, aprelin 1-dən 2-nə keçən gecə Bakı şəhəri, Bülbül prospekti 20 ünvanında yerləşən ölkə əhəmiyyətli memarlıq abidəsi (123 inventar nömrəli) olan Nizami Kino Mərkəzinin binası müdaxiləyə məruz qalıb.
Adları qeyd olunan şəxslər binanın fasadına boya vasitəsilə cızma-qara edib, müxtəlif söz və ifadələr yazıblar.
Binaya edilmiş müdaxilə qısa müddət ərzində aradan qaldırılıb, ilkin görünüş bərpa olunub.
Nizami Kino Mərkəzinin divarına qraffiti çəkilməsi faktı üzrə cinayət işi açılıb.
Vurğulayaq ki, hadisə ictimai rəydə müzakirələrə və qınağa səbəb olub. Bakının mərkəzində tarixi-mədəni abidənin divarının zədələnməsi vandallıq aktı kimi qiymətləndirilir.
3-04-2026, 17:16
Əli Kərimlinin mühafizəçisinə hökm oxundu
AXCP sədri Əli Kərimlinin mühafizəçisi olmuş Novruz Tağıyevin cinayət işi üzrə məhkəmə prosesi yekunlaşıb.
Bu barədə AXCP-nin sosial media hesabında məlumat paylaşılıb.
Bildirilir ki, Bakı Ağır Cinayətlər Məhkəməsinin hökmünə əsasən, o, Cinayət Məcəlləsinin 178.3.2, 320.1 və 320.2-ci maddələri ilə təqsirli bilinib.
Məhkəmənin qərarı ilə N.Tağıyev 6 il müddətinə azadlıqdan məhrum edilib.
Qeyd edək ki, o, ev alqı-satqısı sahəsində vasitəçilik fəaliyyəti ilə məşğul olub. N.Tağıyev vətəndaşın 71 min manatını dələduzluq yolu ilə ələ keçirməkdə ittiham olunub.
3-04-2026, 16:27
Mina axtararkən həlak olan ANAMA əməkdaşı təltif edildi
Xəbər verdiyimiz kimi, Prezident İlham Əliyevin Sərəncamı ilə, ərazilərin minalardan təmizlənməsi sahəsində fərqlənən şəxslər “Minatəmizləmə sahəsində xidmətlərə görə” medalı ilə təltif ediliblər.
Təltif olunanlar arasında ANAMA-nın həlak olan əməkdaşı İsayev Raqif Deputat oğlu da var.
Xatırladaq ki, 2024-cü il 21 iyun tarixində işğaldan azad edilmiş Cəbrayıl rayonu ərazisində sursat partlayışı hadisəsi baş verib. Ərazidə icra edilən minatəmizləmə prosesi zamanı baş verən partlayış nəticəsində Agentliyin əməkdaşı 1980-ci il təvəllüdlü İsayev Raqif Deputat oğlu həyatını itirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!