15-10-2024, 17:48
Dövlət qulluğu imtahanından keçən namizədlərə sertifikatlar verilir
Dövlət İmtahan Mərkəzi (DİM) tərəfindən sentyabrın 22-də dövlət qulluğuna qəbul üzrə keçirilən test imtahanından (A növü) müvəffəqiyyətlə keçən namizədlərin sertifikatlarının verilməsinə başlanılıb.
DİM-dən bildirilib ki, bu, test imtahanında uğur qazanaraq sertifikat almaq üçün müraciət etmiş və müraciətinə DİM tərəfindən razılıq verilmiş namizədlərə aiddir. Onlar sertifikatlarını şəxsiyyəti təsdiq edən sənədi təqdim etməklə mərkəzin Bakı şəhəri, Binəqədi rayonu, Süleyman Sani Axundov küçəsi, 50 ünvanında yerləşən elektron imtahanlar korpusundan götürə bilərlər.
Sertifikatı DİM-in Naxçıvan, Gəncə, Şəki, Lənkəran, Şirvan, Göyçay, Bərdə, Xaçmaz, Şəmkir regional bölmələrindən əldə etmək üçün info@dim.gov.az elektron poçt ünvanına müraciət olunmalıdır. Ərizəyə şəxsiyyəti təsdiq edən sənədin surəti də əlavə olunmalıdır.
15-10-2024, 17:40
Leyla Əliyeva Mərakeşdə - FOTO
Mərakeşə səfəri zamanı Heydər Əliyev Fondunun vitse-prezidenti Leyla Əliyeva Uşaq Hüquqları üzrə Milli Observatoriyanın (ONDE) vitse-prezidenti Qizlan Benjelun ilə görüşüb.
Görüşdə uşaqların sosial dəstəklə əhatə olunması ilə bağlı məsələlər, Heydər Əliyev Fondunun sosial sahədə fəaliyyəti, uşaqlara qayğı üzrə həyata keçirilən layihələr müzakirə edilib.
Heydər Əliyev Fondunun nümayəndələri 2025-ci ildə Uşaq Hüquqları üzrə Milli Observatoriyanın yaranmasının 13-ci ildönümü ilə bağlı tədbirə dəvət olunub.
15-10-2024, 17:30
Paşinyan Əliyevə görüş təklif edib? - İrəvandan açıqlama
Oktyabrın 7-8-də Moskvada keçirilən MDB sammiti çərçivəsində Ermənistan və Azərbaycan liderlərinin qeyri-rəsmi ünsiyyətinin bəzi təfərrüatları məlum olub.
Ermənistan parlamentin xarici əlaqələr üzrə daimi komissiyasının rəhbəri Sarkis Xandanyan “Armenpress”ə bildirib ki, baş nazir Nikol Paşinyan Azərbaycan prezidenti İlham Əliyevə xarici işlər nazirlərinin ikigünlük iclasının keçirilməsini təklif edib. Onun iddiasına görə, təklif sülh müqaviləsinin müzakirəsi üçün irəli sürülüb.
“Bildiyim qədər, oktyabrın 7-8-də Moskvada keçirilən qeyri-rəsmi təmaslar zamanı Paşinyan Əliyevə ikitərəfli görüş keçirməyi təklif edib”, - komissiya rəhbəri qeyd edib.
Eyni zamanda, o əlavə edib ki, Bakının Ermənistan baş nazirinin təklifinə necə cavab verdiyini bilməsə də, görüşün keçirilməsinin mümkünlüyünə ümid edir.
Xandanyan xatırladıb ki, Bakı martın əvvəlində və apreldə Brüsseldə görüş keçirməkdən imtina edib.
Jurnalistin rəsmi Bakının İrəvanı iyulda Böyük Britaniyada keçirilən görüşdə iştirakdan imtina etməkdə ittiham etməsi ilə bağlı sözlərinə cavab olaraq Xandanyan vurğulayıb ki, erməni tərəfi həmin görüşdən imtina etməyib, lakin ikitərəfli formatda deyil, başqa formatda görüşü məqsədəuyğun sayıb.
Bundan əvvəl baş nazir Nikol Paşinyan mübahisəli məqamları sonrakı müzakirəyə buraxaraq, sülh müqaviləsinin artıq razılaşdırılmış maddələrinin imzalanmasını təklif edib. O, sülh müqaviləsi layihəsində 16 maddədən 13-nün razılaşdırıldığını bildirib.
Rəsmi İrəvan noyabrda Bakıda keçiriləcək COP-29 tədbirindən əvvəl sülh müqaviləsinı imza atmağı təklif edir.
Rəsmi Bakı isə öz şərtlərini dəfələrlə bəyan edib. Azərbaycan tərəfi bildirib ki, Ermənistanın Konstitusiyasında və digər normativ hüquqi sənədlərində Azərbaycana qarşı ərazi iddialarına tam şəkildə son qoyulmalı, yalnız ondan sonra sülh müqaviləsi imzalanmalıdır.
15-10-2024, 17:06
Nərimanovda 3 nəfərdən 8 kiloqram narkotik götürüldü - VİDEO
Nəsimi Rayon Polis İdarəsinin əməkdaşları tərəfindən həyata keçirilən əməliyyatlar nəticəsində narkotik vasitələrin qanunsuz dövriyyəsi ilə məşğul olan əvvəllər məhkum olunmuş Ramin Quliyev, tanışı İlqar Quliyev və Xədicə Ağayeva saxlanılıblar.
Daxili İşlər Nazirliyinin (DİN) Mətbuat xidmətindən bildirilib ki, saxlanılan şəxslərdən 8 kiloqramdan artıq heroin, marixuana, metamfetamin, 2 ədəd elektron tərəzi və 50 ədəd psixotrop tərkibli metadon həbi aşkarlanıb. Onların narkotikləri şəxsiyyəti istintaqla araşdırılan İran vətəndaşlarından satış məqsədilə əldə etdikləri məlum olub.
Faktlarla bağlı Cinayət Məcəlləsinin müvafiq maddələri ilə cinayət işləri başlanılıb, araşdırmalar davam etdirilir.
Qeyd edək ki, Nəsimi rayonunda narkotiklərlə əlaqəli cari ilin əvvəlindən keçirilən tədbirlər zamanı 63 kiloqram narkotik vasitə qanunsuz dövriyyədən çıxarılıb.
15-10-2024, 17:00
Ermənistanda hakimiyyət dəyişsə, razılıqlar ləğv oluna bilər
"Ermənistanın daxili qanunvericiliyində və Konstitusiyasında Azərbaycan və Türkiyənin beynəlxalq səviyyədə, həmçinin Ermənistanın özü tərəfindən də rəsmi olaraq tanınmış suveren ərazilərinə iddiaların mövcud olması bugünkü gündə Azərbaycan və Ermənistan arasında sülh müqaviləsinin imzalanmasına maneə olaraq qalmağa davam edir".
Bu barədə Beynəlxalq Münasibətlərin Təhlili Mərkəzinin məsləhətçisi Fuad Abdullayevin təhlilində bildirilib.
O qeyd edib ki, Azərbaycanın haqlı və əsaslı tələbləri qarşısında çarəsiz qalan Ermənistan hakimiyyəti isə hər dəfə qeyri-ciddi və əsassız maneələr yaradaraq sülh müqaviləsinin imzalanmasını uzatmağa çalışır.
"26 sentyabr 2024-cü il tarixində ölkənin Konstitusiya Məhkəməsinin Konstitusiyaya zidd olan qərarını da məhz bu rakursdan qiymətləndirmək lazımdır. Qeyd etmək lazımdır ki, Ermənistan növbəti dəfə beynəlxalq ictimaiyyəti aldatmağa yönəlmiş addım atmağa çalışıb. Heç şübhəsiz, qərarın əsas amalı Ermənistanı sülhsevər, Azərbaycanı isə qeyri-konstruktiv mövqedə olduğunu göstərməkdir. Lakin qeyd etmək lazımdır ki, qərar silahlanmaq üçün vaxt qazanmağa hesablanmışdır. Belə ki, Ermənistanın özünü müdafiə bəhanəsi adı altında mütəmadi olaraq silahlanması və son zamanlar tamamilə hücum xarakteri daşıyan silah və hərbi texnikaya maraq göstərməsi, həmçinin hərbi xərclərini artırması onun sülh müqaviləsini bağlamaq niyyətini əks etdirmir", - ekspert vurğulayıb.
Onun sözlərinə görə, Ermənistanda hakimiyyətin dəyişəcəyi təqdirdə əldə olunan şərhlər qanunsuz hesab edilərək ləğv oluna bilər:
"Nəticə olaraq belə qənaətə gəlmək olar ki, Ermənistanın Konstitusiya Məhkəməsinin 26 sentyabr qərarı Konstitusiyanın 205-ci maddəsi ilə müəyyən ziddiyyətlilik təşkil edir. Erməni mütəxəssislərin bu qərarı qeyri-qanuni adlandırdıqları zaman əsas arqumentinin məhz bu fakt olması isə təsadüfi deyil. Müstəqillik Bəyannaməsinin Konstitusiyaya uyğunluğu və bununla bağlı verilən şərhlər isə səthi aparılıb və burada sual doğuran bir çox məqam müşahidə olunub. Bu səbəbdən dövlət sərhədlərinin delimitasiya və demarkasiyası üzrə birgə Komissiyaların gələcək fəaliyyətinin, eyni zamanda bu şərtlərdə bağlanacaq sülh müqaviləsinin nəticəsinin gələcəkdə Ermənistanın daxili qanunvericiliyinə və Konsitusiyasına zidd qəbul olunma ehtimalı yüksəkdir. Belə ki, Ermənistanda hakimiyyətin dəyişəcəyi təqdirdə dövlət sərhədlərinin delimitasiyası prosesi nəticəsində əldə edilən və ediləcək nailiyyətlər, eyni zamanda Bəyannamə ilə bağlı verilən şərhlər qanuna zidd hesab edilərək ləğv oluna bilər".
15-10-2024, 16:29
Baş Qərvənddə "Ağıllı kənd"’ salınacaq
Ağdam şəhərində yaşayış məhəllələrinin tikintisinə bu ilin iyununda başlanılıb. Hazırda 2 - ci yaşayış məhəlləsi üzrə 11 kvartalda tikinti işləri davam edir.
Bunu Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin İcraçı direktorun müavini Səbuhi Abdullayev Xəzər İnşaat Həftəsi çərçivəsində keçirilən panel müzakirəsində deyib.
O qeyd edib ki, məhəllələrlə yanaşı 3 kənd -Sarıcalı, Kəngərli və Xıdırlıda da inşaat prosesi davam etdirilir: “Ağdamın Sarıcalı kəndində 203, Kəngərli kəndində 292, Xıdırlı kəndində isə 719 fərdi yaşayış evininin inşası davam edir. Qeyd edilən hər 3 kənddə fərdi yaşayış evləri ilə yanaşı məktəblər, uşaq bağçaları, Klub icma mərkəzləri, Bayraq meydanı, Bazar kompleksləri, Məişət xidməti obyektləri, Ailə Sağlamlıq Mərkəzləri, Qəbirstanlıqlar, Emalatxanalar, inzibati binalar və digər iaşə obyektlərinin də tikintisi gedir”.
S.Abdullayevin sözlərinə görə, Baş Qərvənd kəndində söküntü şaquli planlaşdırma işləri yekunlaşmaq üzrədir: “Ağdamın ən böyük kəndlərindən biri olan Baş Qərvənd kəndində ‘’Ağıllı kənd’’ layihəsi icra ediləcək. Burada tətbiq ediləcək “ağıllı həllər” Slovakiyanın mütəxəssisləri və mühəndisləri tərəfindən reallaşdırılacaq. Layihə çərçivəsində ümumilikdə ərazisi 476 hektar olan kəndin tamamilə yenidən qurulması, “ağıllı kənd” kimi bərpası nəzərdə tutulur. Birinci fazada burada 275 hektar ərazidə 851 ədəd fərdi evin tikintisi planlaşdırılır. ‘’Ağıllı kənd’’də tətbiq ediləcək yeniliklərdən söz açmaq istəyirəm. İlkin olaraq qeyd edim ki, burada ağıllı texnologiyalardan istifadə ediləcək.Tullantıların utilizasiyası, yaşıl enerjidən istifadə və kanalizasiya təmizləmə qurğusu quraşdırılacaq. Bütün növ qəanətli texnologiyalar ‘’Ağıllı kənd’’ konsepsiyası çərçivəsində tətbiq ediləcək. Təbii materiallardan olan evlərin inşası,həmçinin evlər üçün smart texnologiyaların istifadəsi də nəzərdə tutulur. Bütün bunlarla paralel alternativ enerji ilə çalışan daha müasir bəzi innovativ texnologiyaların da gələcəkdə tətbiq edilməsi nəzərdən keçirilə bilər. Misal üçün günəş enerjisi ilə çalışanistilik nasoslarının tətbiqi,elektormobillər üçün elektrikdoldurma məntəqələri, günəş kollektorları, günəş əsaslı avtomobil parkı və digərlərini göstərmək olar”.
15-10-2024, 16:15
Füzulinin Pirəhmədli kəndinin bərpasına başlanılır
Füzuli şəhərinin mərkəzində Zəfər yolunun kənarında salınan çoxmənzilli binalarda 822 ailə məskunlaşıb. Bu isə 3132 nəfər sakin deməkdir.
Bunu Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin İcraçı direktorun müavini Səbuhi Abdullayev Xəzər İnşaat Həftəsi çərçivəsində keçirilən panel müzakirəsində deyib.
Onun sözlərinə görə, şəhərdə 38 çoxmərtəbəli bina, eləcə də 846 mənzildən ibarət 4, 5 , 6 və 7 mərtəbədən ibarət evlər inşa edilib:
“Baş plana uyğun olaraq şəhərdaxili yolların uzunluğunun 87 kilometrdən çox olması nəzərdə tutulub. Həmçinin Füzulidə Özbəkistan Respublikası tərəfindən inşa olunan 960 şagird yerlik Mirzə Uluqbəy adına 1 saylı məktəb, Qazaxıstan Respublikası tərəfindən inşa olunmuş ‘’ Kurmqanqazı Uşaq yaradıcılıq Mərkəzi ‘’ də fəaliyyət göstərir. Kəndlərdə də quruculuq işləri davam etdirilir. Pirəhmədli kəndində bərpa işlərinə başlanılır”.
Səbuhi Abdullayev həmçinin bildirib ki, Füzulinin Dövlətyarlı kəndində hazırlıq işləri tamamlanıb: "Bu kənd "Ağıllı kənd’’ layihəsi kimi sistemləşdiriləcək və kənddə alternativ enerji mənbələrindən, yaşıl enerjidən istifadə ediləcək. Tikintinin 1-ci mərhələsində Dövlətyarlı kəndində 450 fərdi evin tikintisi nəzərdə tutulur. Eləcə də burada məktəb, uşaq bağçası, kənd meydanı, bazar və digər infrastruktur obyektləri də formalaşdırılacaq. Cuvarlı , Qarğabazar, Qoçəhmədli və Dədəli kəndlərində isə layihələndirmə işləri davam etdirilir”.
15-10-2024, 15:46
Ağdərədə 190 ev tikiləcək
Ağdərə şəhərində 190 evin tikintisi nəzərdə tutulur.
Bunu Xəzər İnşaat Həftəsi çərçivəsində keçirilən panel müzakirəsi zamanı Xankəndi şəhərində, Ağdərə və Xocalı rayonlarında Bərpa, Tikinti və İdarəetmə xidmətinin İcraçı direktorun köməkçisi Həmid Mehdiyev deyib.
O bildirib ki, Xocalıda 56, Malbəyli və digər kəndlərdə 120 yaşayış binasının tikintisi nəzərdə tutulur: "Suqovuşanda 5 ədəd 5 mərtəbəli binanın tikintisi yekunlaşmaq mərhələsindədir".
H. Mehdiyev qeyd edib ki, Xankəndi şəhərinə məcburi köçkünlərin qayıdışı hələ başlamayıb: “Lakin 5 mindən çox dövlət və qeyri-dövlət strukturlarının nümayəndələri, əməkdaşlar orda yaşayır. Qarabağ Universitetinin fəaliyyətə başlaması ilə Xankəndidə 1200 tələbə məskunlaşıb".
15-10-2024, 15:38
Laçında daha 3 kəndin tikintisinə başlanılır
Gələn il Laçın rayonunun 3 qəsəbə və kəndində tikinti işlərinə başlanılacaq.
Bunu Laçın rayonunda Bərpa, Tikinti və İdarəetmə Xidmətinin icraçı direktorunun vəzifələrini icra edən Tofiq İslamov Xəzər İnşaat Həftəsi çərçivəsində keçirilən panel müzakirəsində bildirib.
"Xidmət layihələndirmə işləri üzrə 7 müqavilə üzərində işləri davam etdirir. Artıq 3 müqavilə imzalanıb. Gələn il Laçın rayonunun infrastrukturunun bərpası istiqamətində səylərimizi davam etdirəcəyik. Qorçu qəsəbəsində, Pircahan və Şəlvə kəndlərində tikinti işlərinin başlanması planlaşdırılır”, - deyə o qeyd edib.
15-10-2024, 15:26
Bayramovla Mirzoyan İstanbula gedəcək - Tarix açıqlandı
"3+3" regional platformasının növbəti iclasının tarixi açıqlanıb.
Bu barədə Türkiyə xarici işlər naziri Hakan Fidan bildirib.
O qeyd edib ki, növbəti iclas oktyabrın 18-də İstanbulda keçiriləcək.
Nazir iordaniyalı həmkarı ilə mətbuat konfransında bildirib ki, görüşdə Azərbaycan, Ermənistan, Rusiya və İranın xarici işlər nazirləri iştirak edəcək.
"Türkiyə bütün regional məsələlərin bilavasitə region ölkələri tərəfindən həll edilməsi mövqeyindən çıxış edir. Biz regional əməkdaşlıq platforması “3+3” vasitəsilə Cənubi Qafqaz ölkələri ilə məsləhətləşmələri davam etdiririk", - Fidan qeyd edib.
Xatırladaq ki, “3+3” formatının ilk görüşü 2022-ci ildə Moskvada, 2023-cü ildə isə Tehranda baş tutub. Platformaya Gürcüstan daxil edilsə də, Tbilisi görüşlərdə iştirak etməyib.
Sonuncu görüşdə Ceyhun Bayramov, Hakan Fidan, Sergey Lavrov, Hüseyn Əmir Abdullahian və Ararat Mirzoyan iştirak edib. Bir neçə gün əvvəl İranın xarici işlər naziri Abbas Əraqçinin İstanbul görüşündə iştirak edəcəyi açıqlanıb.
Qeyd edək ki, "3+3" formatı İkinci Qarabağ müharibəsindən sonra irəli sürülüb, platformanın təşəbbüskarı Azərbaycandır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!