6-05-2026, 18:03
Azərbaycan və İtaliya
münasibətləri yeni
mərhələyə qədəm qoyur
Azərbaycan Respublikasının Prezidenti İlham Əliyev İtaliya Nazirlər Şurasının sədri Giorgia Meloninin 2026-cı il mayın 4-də Azərbaycana səfəri zamanı verdiyi bəyanatda iki ölkə arasında münasibətlərin strateji tərəfdaşlıq səviyyəsində uğurla inkişaf etdiyini bildirib.
Dövlət başçısı qeyd edib ki, 2014 və 2020-ci illərdə imzalanmış strateji tərəfdaşlığa dair bəyannamələr Azərbaycan ilə İtaliya arasında əlaqələrin əsasını təşkil edir və bu sənədlərdə əksini tapan müddəalar artıq praktik müstəvidə öz təsdiqini tapıb. Prezident İlham Əliyev vurğulayıb ki, Giorgia Meloninin Ermənistan səfərindən sonra Azərbaycana gəlməsi xüsusi rəmzi əhəmiyyət daşıyır və bu, ölkəmizə göstərilən hörmətin bariz nümunəsidir. O, bu səfərin regionda formalaşan yeni əməkdaşlıq mühitinə də müsbət təsir göstərəcəyini qeyd edib.
Prezident bildirib ki, Azərbaycan ilə İtaliya arasında siyasi əlaqələr ən yüksək səviyyədədir və iqtisadi əməkdaşlıq da dinamik inkişaf edir. Onun sözlərinə görə, İtaliya Azərbaycanın bir nömrəli ticarət tərəfdaşıdır və ötən il iki ölkə arasında ticarət dövriyyəsi təxminən 12 milyard dollar təşkil edib. Energetika sahəsində əməkdaşlığın xüsusi yer tutduğunu deyən dövlət başçısı qeyd edib ki, Azərbaycan İtaliyanın həm neft, həm də qaz təchizatında ikinci yerdə qərarlaşıb.
İlham Əliyev diqqətə çatdırıb ki, İtaliya bazarı Azərbaycan üçün strateji əhəmiyyət kəsb edir. Ötən il ixrac edilən 25 milyard kubmetr təbii qazın 9,5 milyard kubmetri məhz İtaliyaya göndərilib. Bu həcmin artırılması məqsədilə tərəflər arasında müzakirələr aparılıb və bu istiqamətdə Trans Adriatic Pipeline layihəsinin genişləndirilməsinin vacibliyi vurğulanıb. Prezident əlavə edib ki, enerji sahəsində əməkdaşlıq Avropanın enerji təhlükəsizliyinin təmin olunmasına da mühüm töhfə verir.
Prezident həmçinin yeni əməkdaşlıq istiqamətlərindən biri kimi hərbi-texniki sahədə tərəfdaşlığın perspektivli olduğunu bildirib. Bu çərçivədə birgə istehsalın təşkili və İtaliya texnologiyalarının Azərbaycan investisiyaları ilə birləşdirilməsi imkanlarının müzakirə olunduğu qeyd edilib. Bununla yanaşı, yüksək texnologiyalar, sənaye və innovasiya sahələrində də əməkdaşlığın genişləndirilməsi üçün potensialın mövcud olduğu vurğulanıb.
Dövlət başçısı bildirib ki, Azərbaycan Dövlət Neft Fondu tərəfindən son illərdə İtaliya iqtisadiyyatına təxminən 3 milyard dollar sərmayə yatırılıb və bu investisiyaların yeni layihələrə yönəldilməsi məsələsi də gündəmdədir. Bu addımların iki ölkə arasında iqtisadi tərəfdaşlığın daha da dərinləşməsinə xidmət etdiyi qeyd olunub.
İlham Əliyev vurğulayıb ki, İtaliya şirkətləri Azərbaycanda uzun illərdir uğurla fəaliyyət göstərir və hazırda onların sayı 130-a yaxındır. Xüsusilə işğaldan azad edilmiş Qarabağ və Şərqi Zəngəzur iqtisadi rayonlarında İtaliya şirkətləri tərəfindən 23 layihə icra olunur və bu göstərici üzrə İtaliya qabaqcıl mövqedədir. Prezident bu bölgələrdə həyata keçirilən layihələrin bərpa və yenidənqurma prosesinə mühüm töhfə verdiyini diqqətə çatdırıb.
Dövlət başçısı iki ölkə arasında əməkdaşlıqda təhsil sahəsinin də mühüm yer tutduğunu qeyd edib. O bildirib ki, ötən il Bakıda İtaliya-Azərbaycan Universiteti fəaliyyətə başlayıb və artıq 500-dən çox tələbə burada təhsil alır. Prezidentin sözlərinə görə, bu ali təhsil ocağı gələcəkdə iki ölkə arasında əlaqələrin daha da möhkəmlənməsinə töhfə verəcək, eyni zamanda yeni nəsil peşəkar kadrların yetişməsində mühüm rol oynayacaq.
Sonda Prezident İlham Əliyev Azərbaycan ilə İtaliya arasında dostluq və strateji tərəfdaşlıq münasibətlərinin gələcəkdə daha da genişlənəcəyinə əminliyini ifadə edib və bu səfərin ikitərəfli əlaqələrin inkişafında yeni mərhələnin başlanğıcı olacağını vurğulayıb.
Lamiyə Həsənzadə
Azim Müzəffərov adına Saray qəsəbə 2 nömrəli tam orta məktəbin direktoru
6-05-2026, 06:51
Belarus Ermənistana nota verdi
Ermənistanın Belarusdakı müvəqqəti işlər vəkili Artur Sərkisyan Belarus Xarici İşlər Nazirliyinə çağırılıb.
Bu barədə Belarus XİN məlumat yayıb.
“Ermənistan tərəfinin son qeyri-dost hərəkətləri ilə əlaqədar olaraq erməni diplomata sərt etiraz bildirilib və müvafiq nota təqdim edilib”, - məlumatda bildirilib.
Xatırladaq ki, Ermənistan parlamentinin sədri Alen Simonyan Belarusu Rusiyanın əyaləti adlandırmış və Ermənistanın bu cür əyalət kimi idarə olunmayacağını bəyan etmişdi. Belarus hakimiyyəti buna öz etirazını bildirmişdi.
5-05-2026, 20:59
Hökumət istefaya göndərilib
Rumıniyada hökumət etimadsızlıq nəticəsində istefaya göndərilib.
Parlamentdə keçirilən səsvermədə Baş nazir İlİe Bolojanın rəhbərlik etdiyi hökumətə qarşı irəli sürülən etimadsızlıq təşəbbüsü deputatların əksəriyyəti tərəfindən dəstəklənib. Belə ki, səsvermədə iştirak edən 402 deputatdan 281-i hökumətə etimadsızlıq votumunun lehinə səs verib. Nəticədə Nazirlər Kabineti istefaya göndərilib.
Qeyd olunur ki, təşəbbüs ölkənin ən böyük siyasi qüvvəsi olan Sosial-Demokrat Partiyası, həmçinin “Rumınların Birləşməsi Alyansı” və “Rumıniya üçün Prioritet” (PACE) partiyası tərəfindən irəli sürülüb.
Məlumata görə, səsvermə zamanı Baş nazir İlİe Bolojan parlament zalını tərk edib.
Etimadsızlıq votumu “Bolojan planını dayandırın” şüarı ilə hazırlanıb və sənəddə hökumətin iqtisadi siyasəti tənqid olunub.
Rumıniya Prezidenti Nikuşor Dan səsvermədən əvvəl çıxışında nəticədən asılı olmayaraq ölkənin “Qərb vektoru”nun qorunacağını bildirib.
Xatırladaq ki, İlİe Bolojanın rəhbərlik etdiyi hökumət 2025-ci ilin iyun ayında parlamentdən etimad votumu alaraq fəaliyyətə başlamışdı.
5-05-2026, 18:39
Sülh prosesi və yeni regional
reallıqlar müzakirə olunub
Azərbaycan Respublikasının Prezidenti İlham Əliyev 2026-cı il 4 may tarixində “Avropa Siyasi Birliyi”nin 8-ci Zirvə toplantısında videobağlantı formatında çıxış edərək Ermənistanla sülh prosesi, regional əməkdaşlıq və Avropa institutlarının mövqeyi ilə bağlı mühüm mesajlar səsləndirib.
Dövlət başçısı bildirib ki, Ermənistan “Avropa Siyasi Birliyi”nin Zirvə görüşünün 2028-ci ildə Azərbaycanda keçirilməsini dəstəkləyib. Cənab Prezident İlham Əliyev həmçinin qeyd edib ki, bir il əvvəl Tirana səfəri zamanı Avropa Komissiyasının sədri Ursula von der Leyen və Antonio Costa tərəfindən Ermənistan və Azərbaycanda Zirvə görüşlərinin təşkili ideyası irəli sürülüb və bu təkliflərə müsbət yanaşma sərgilənib. O, tarazlı yanaşma çərçivəsində 2028-ci ildə Zirvə toplantısının Azərbaycanda keçirilməsi təşəbbüsünü də irəli sürdüyünü və bunun qəbul olunduğunu bildirib. Prezident Ermənistanın da bu namizədliyi dəstəklədiyini vurğulayaraq bunu iki ölkə arasında sülhün real nəticəsi kimi qiymətləndirib.
Dövlət başçısı çıxışında Ermənistanla sülhün artıq faktiki reallığa çevrildiyini, son aylarda Azərbaycan ərazisi vasitəsilə Ermənistana 28 min ton yükün çatdırıldığını, həmçinin ilk dəfə olaraq neft məhsullarının – benzin və dizelin bu ölkəyə ixracına başlanıldığını qeyd edib. Onun sözlərinə görə, bu addımlar regionda iqtisadi əlaqələrin bərpasına və qarşılıqlı etimadın güclənməsinə xidmət edir.
Prezident İlham Əliyev ötən ilin avqustunda Vaşinqtonda imzalanmış Birgə Bəyannaməni xatırladaraq, sülh sazişi üzrə irəliləyişlərin artıq praktik nəticələr verdiyini bildirib. O, Azərbaycanın tranzit məhdudiyyətlərini aradan qaldırmasını və bunun regionda yeni əməkdaşlıq imkanları yaratdığını vurğulayıb.
Dövlət başçısı çıxışında bəzi Avropa təsisatlarının – xüsusilə Avropa Parlamenti və Avropa Şurası Parlament Assambleyasının Ermənistan–Azərbaycan sülh prosesinə münasibətdə qeyri-konstruktiv mövqe sərgilədiyini və ikili standartlara yol verdiyini bildirib. Onun sözlərinə görə, Azərbaycan uzun illər Avropa Şurasının üzvü olsa da, 2023-cü ildən sonra AŞPA tərəfindən nümayəndə heyətinə qarşı məhdudiyyətlər tətbiq olunub.
Prezident həmçinin Avropa Parlamentini ksenofobiya, islamofobiya, miqrasiya və digər qlobal problemləri həll etmək əvəzinə, Azərbaycan əleyhinə qətnamələr qəbul etməkdə ittiham edib. O qeyd edib ki, son beş il ərzində bu qurum tərəfindən Azərbaycanla bağlı 14 qətnamə qəbul olunub və bunun sülh prosesinə zərər vurduğu bildirilib.
Cənab Prezident İlham Əliyev çıxışında Azərbaycan parlamentinin Avropa Parlamenti ilə əməkdaşlığın dayandırılması və parlamentlərarası əlaqələrin məhdudlaşdırılması barədə qərar qəbul etdiyini də diqqətə çatdırıb.
Yekunda Prezident İlham Əliyev bütün çətinliklərə baxmayaraq Azərbaycanın sülh gündəliyinə sadiq qaldığını vurğulayıb və Baş nazir Paşinyanı “Avropa Siyasi Birliyi”nin Zirgə görüşünün Ermənistanda keçirilməsi münasibəti ilə təbrik edib. O, regionda sülhün möhkəmlənməsi istiqamətində əldə olunan nəticələrin davamlı olacağına ümidini ifadə edib.
Ceyhun Ələsgərov
Məmmədli Bələdiyyəsinin sədri
5-05-2026, 15:34
Bayramov Kallası qarşılayıb
Azərbaycan xarici işlər naziri Ceyhun Bayramov Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi, Avropa Komissiyasının vitse-prezidenti Kaya Kallası qarşılayıb. Bu barədə XİN-in “X” hesabında bildirilib. Qeyd edilib ki, səfər dəyişən regional və qlobal dinamika fonunda Azərbaycan–Aİ əlaqələrinin və dialoqunun əhəmiyyətini vurğulayır. “Bu, qarşılıqlı hörmət və ortaq maraqlar əsasında əməkdaşlığın genişləndirilməsi üçün bir fürsət yaradır”, - paylaşımda vurğulanıb.
2-05-2026, 15:48
Azərbaycanla bağlı açıqlama
Ölkələrimiz arasında münasibətlər müxtəlif sahələr üzrə inkişaf edir və yaxın perspektivdə daha yüksək səviyyəyə çatdırılması mümkündür. Bunu Azərtac-a açıqlamasında İsrailin Azərbaycandakı səfiri Ronen Kraus deyib. Diplomat qeyd edib ki, Azərbaycanla İsrail arasında əməkdaşlıq kibertəhlükəsizlik, süni intellekt, turizm, aqrar və su texnologiyaları kimi istiqamətləri əhatə edir. “Kibertəhlükəsizlik əsas prioritetlərdən biridir. Süni intellekt isə münasibətlərə yeni əlavə olunan sahədir.” Ronen Kraus turizm sahəsində də müsbət dinamikanı diqqətə çatdırıb. Onun sözlərinə görə, 2025-ci ildə Azərbaycana səfər edən israilli turistlərin sayı təxminən 70 min nəfər olub və bu göstəricinin artacağı gözlənilir.
Səfir, həmçinin su resurslarının səmərəli idarə olunmasının xüsusi əhəmiyyət daşıdığını bildirərək, bu sahədə əməkdaşlığın genişləndirilməsi üçün potensialın yüksək olduğunu qeyd edib.
2-05-2026, 09:04
ABŞ Qəzza missiyası bitir
ABŞ İsraildəki Mülki-Hərbi Koordinasiya Mərkəzini (CMCC) bağlayır. Bu barədə "Reuters" agentliyi mənbələrə istinadən məlumat yayıb.
Mərkəz İsrail və HƏMAS arasında atəşkəsə nəzarət etməli, həmçinin Qəzzaya humanitar yardımın çatdırılmasını koordinasiya etməli idi.
Bu qərar ABŞ Prezidenti Donald Trampın Yaxın Şərq nizamlanması planının dalana dirənməsi ilə əlaqələndirilir. Səbəblər arasında atəşkəsdən sonra İsrailin davam edən hücumları və HƏMAS-ın silahı yerə qoymaqdan imtina etməsi göstərilir.
CMCC-nin funksiyaları ABŞ komandanlığı altındakı Beynəlxalq Stabilləşdirmə Qrupuna veriləcək. ABŞ hərbi personalının sayı 190-dan 40-a endiriləcək, hərbçiləri isə digər ölkələrin mülki mütəxəssisləri əvəz edəcək. Qurumun gələcəkdə Beynəlxalq Qəzzaya Dəstək Mərkəzi adlandırılması ehtimal olunur.
30-04-2026, 18:21
Merzdən Hörmüz açıqlaması:
Almaniya dəniz yollarının azadlığını təmin etmək üçün lazım gələrsə, hərbi güc tətbiq etməyə hazırdır.
Bunu bunu Almaniya kansleri Fridrix Merz deyib.
“İranın Hörmüz boğazını blokadaya almasını ən qısa zamanda dayandırmaqda qərarlıyıq. Lazımi şərtlər yerinə yetirilərsə, Almaniya gəmiçiliyin sərbəst fəaliyyətini təmin etmək üçün hərbi əməliyyatlara hazırdır.”
29-04-2026, 18:14
Dövlət Komissiyası
Katibliyinin məlumatı
Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının Katibliyi məlumat yayıb.
Aprelin 29-da Ermənistan Respublikasında, Ağverəndə Azərbaycan Respublikasının Baş nazirinin müavini Şahin Mustafayevin və Ermənistan Respublikasının Baş nazirinin müavini Mher Qriqoryanın sədrliyi ilə Azərbaycan Respublikası ilə Ermənistan Respublikası arasında dövlət sərhədinin delimitasiyası üzrə Dövlət Komissiyasının və Ermənistan Respublikası ilə Azərbaycan Respublikası arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın on üçüncü iclası keçirilib.
Məmnunluqla qeyd olunub ki, komissiyaların 13-cü iclası növbəti dəfə tərəflərdən birinin ərazisində - Ermənistan Respublikasında, Ağverəndə baş tutub.
Görüş zamanı tərəflər delimitasiya tədbirlərinin həyata keçirilməsi ilə bağlı təşkilati və texniki məsələlər üzrə ətraflı fikir mübadiləsi aparıblar.
Tərəflər delimitasiya işlərinin həyata keçirilməsi qaydasına dair aşağıdakı təlimat layihələrinin mətnlərini razılaşdırıb və mübadilə ediblər:
• “Azərbaycan Respublikası ilə Ermənistan Respublikası arasında dövlət sərhədinin delimitasiyası zamanı delimitasiya üzrə ekspert qruplarının iş qaydası haqqında Təlimat”;
• “Azərbaycan Respublikası ilə Ermənistan Respublikası arasında dövlət sərhədinin delimitasiya xəritəsinin hazırlanması haqqında Təlimat”;
• “Azərbaycan Respublikası ilə Ermənistan Respublikası arasında dövlət sərhədinin delimitasiya sənədlərinin tərtibatı və nəşri qaydası haqqında Təlimat”.
Tərəflər bu təlimatların müvafiq qaydada təsdiq edilməsi üçün öz hökumətlərinə müraciət etmək barədə razılığa gəliblər.
Azərbaycan Respublikasının Baş nazirinin müavini Şahin Mustafayev və Ermənistan Respublikasının Baş nazirinin müavini Mher Qriqoryan qarşılıqlı maraq doğuran məsələlər üzrə ayrıca fikir mübadiləsi aparıblar.
Qeyd olunub ki, Azərbaycan Respublikasının ərazisi ilə Ermənistan Respublikasına yüklərin tranziti uğurla həyata keçirilir və hazırda da davam edir.
Məmnunluqla vurğulanıb ki, Azərbaycanın Ermənistana neft məhsulları tədarük etməsi iki ölkə arasında iqtisadi-ticari əlaqələrin formalaşmasının göstəricisidir.
Həmçinin tərəflərin işgüzar dairələrinin nümayəndələrinin iştirakı ilə iqtisadi-ticari əməkdaşlığın inkişafı, malların və xidmətlərin qarşılıqlı tədarükü, həmçinin tranzit daşımaları məsələləri müzakirə olunub.
Xüsusi olaraq qeyd edilib ki, əldə olunan nəticələr Azərbaycan Respublikasının Prezidenti İlham Əliyevin və Ermənistan Respublikasının Baş naziri Nikol Paşinyanın siyasi iradəsi sayəsində mümkün olub.
Komissiyaların görüşünün yekunlarına dair müvafiq Protokol imzalanıb.
Tərəflər komissiyaların Azərbaycan Respublikasında növbəti iclasının tarixinin işçi qaydada müəyyən edilməsi barədə razılığa gəliblər.
28-04-2026, 23:56
Bakı görüşü Azərbaycan Çexiya
münasibətlərində yeni imkanlar açır
İlham Əliyev 2026-cı il aprelin 27-də Andrey Babiş ilə Bakıda keçirdiyi görüşdən sonra mətbuata bəyanatla çıxış edib. Dövlət başçısı bildirib ki, bu görüş iki ölkə arasında artan siyasi dialoqun mühüm göstəricisidir və ilk görüş olmasına baxmayaraq, olduqca məhsuldar keçib. Onun sözlərinə görə, tərəflər arasında qarşılıqlı etimad və açıq dialoq mühiti mövcuddur ki, bu da əməkdaşlığın gələcək inkişafı üçün möhkəm zəmin yaradır. Görüş zamanı regional təhlükəsizlik, beynəlxalq əməkdaşlıq, eləcə də ikitərəfli münasibətlərin genişləndirilməsi istiqamətində fikir mübadiləsi aparılıb.
Prezident İlham Əliyev qeyd edib ki, Çexiya Baş nazirinin Azərbaycana səfəri və onu müşayiət edən geniş iş adamları heyəti iqtisadi əlaqələrin inkişafına əlavə təkan verəcək. O bildirib ki, keçiriləcək biznes forum çərçivəsində yeni tərəfdaşlıqların qurulması, investisiya imkanlarının müzakirəsi və mövcud layihələrin genişləndirilməsi üçün əlverişli şərait yaranacaq. Dövlət başçısı vurğulayıb ki, hazırda iki ölkə arasında ticarət dövriyyəsi 800 milyon ABŞ dollarını ötür və bu, son illər ərzində əhəmiyyətli artımın göstəricisidir. Bununla yanaşı, ticarət dövriyyəsinin strukturunda əsas payın enerji sektoruna məxsus olduğunu deyən Prezident, qeyri-neft sahələrində də əməkdaşlığın genişləndirilməsinin vacibliyini diqqətə çatdırıb. Bu məqsədlə sənaye, kənd təsərrüfatı, nəqliyyat və yüksək texnologiyalar sahəsində konkret layihələrin həyata keçirilməsi perspektivləri müzakirə olunub.
Energetika sahəsinin Azərbaycan-Çexiya münasibətlərində əsas istiqamətlərdən biri olduğunu vurğulayan dövlət başçısı qeyd edib ki, Azərbaycan uzun illərdir Çexiya üçün etibarlı enerji tərəfdaşıdır. Azərbaycan neftinin Çexiyaya ixracı bu ölkənin enerji təhlükəsizliyində mühüm rol oynayır. Prezident əlavə edib ki, Azərbaycanın enerji siyasəti şaxələndirilmiş ixrac marşrutlarına əsaslanır və ölkə dünya bazarlarında sabit və etibarlı təchizatçı kimi tanınır. Bu amil, o cümlədən Avropa İttifaqı tərəfindən də yüksək qiymətləndirilir.
Dövlət başçısı bildirib ki, hazırda Azərbaycan qazı 16 ölkəyə ixrac olunur və onlardan 10-u Avropa İttifaqının üzvüdür. Bu kontekstdə Azərbaycan regionun enerji xəritəsində mühüm rol oynayır və Avropanın enerji təhlükəsizliyinə töhfə verir. Prezident qeyd edib ki, Azərbaycan Çexiyaya qonşu olan ölkələrə də təbii qaz ixrac edir və bu, dolayısı ilə Çexiyanın enerji təminatına da müsbət təsir göstərir. Görüş zamanı tərəflər bu sahədə əməkdaşlığın daha da genişləndirilməsi, yeni enerji layihələrinin həyata keçirilməsi və uzunmüddətli tərəfdaşlığın möhkəmləndirilməsi məsələlərini də müzakirə ediblər.
Prezident İlham Əliyev müdafiə sənayesi sahəsində əməkdaşlığın da önəmli istiqamətlərdən biri olduğunu bildirib. Onun sözlərinə görə, Azərbaycan Çexiyadan müxtəlif hərbi təyinatlı məhsullar idxal edir və bu əməkdaşlıq uzun illərdir uğurla davam edir. Hazırda isə tərəflər birgə istehsal layihələrinin həyata keçirilməsi imkanlarını araşdırır. Dövlət başçısı vurğulayıb ki, Azərbaycanın müdafiə sənayesinin inkişafı dövlət siyasətinin prioritet istiqamətlərindən biridir və bu sahədə qabaqcıl təcrübəyə malik ölkələrlə əməkdaşlıq xüsusi əhəmiyyət daşıyır. Bu baxımdan Çexiya ilə birgə layihələrin həyata keçirilməsi perspektivləri yüksək qiymətləndirilir.
Bəyanatda humanitar və digər sahələrdə əməkdaşlıq məsələlərinə də toxunulub. Təhsil, elm, mədəniyyət və turizm istiqamətlərində əlaqələrin genişləndirilməsi üçün böyük potensialın mövcud olduğu bildirilib. Həmçinin hökumətlərarası komissiyanın fəaliyyətinin aktivləşdirilməsi, növbəti iclasın yaxın vaxtlarda keçirilməsi və konkret nəticələrə yönəlmiş qərarların qəbul olunması ilə bağlı razılıq əldə edildiyi qeyd olunub.
Sonda Prezident İlham Əliyev vurğulayıb ki, bu səfər Azərbaycan ilə Çexiya arasında dostluq və tərəfdaşlıq münasibətlərinin daha da möhkəmlənməsinə xidmət edir. Onun sözlərinə görə, aparılan danışıqlar və əldə olunan razılaşmalar iki ölkə arasında əməkdaşlığın yeni mərhələyə yüksəlməsi üçün geniş imkanlar açır və qarşıdakı dövrdə bu münasibətlərin daha da inkişaf edəcəyinə əminlik yaradır.
Güləhməd Xəlilov
Abşeron RİH başçısının Masazır kənd inzibati ərazi dairəsi üzrə nümayəndəsi
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!