10-01-2026, 17:24
Bu rayonlara qar yağır
Ölkə ərazisinin bəzi yerlərində yağıntılı və küləkli hava şəraiti davam edir. Dağlıq ərazilərdə qar yağır.
Bu barədə Milli Hidrometeorologiya Xidmətinin yanvarın 10-u saat 17:00-a olan məlumatında qeyd olunub.
Belə ki, Sədərək, Naftalan, Goranboy, Gəncə, Şəmkir, Tovuz, Balakən, Zaqatala, Oğuz, Qəbələ, İsmayıllı, Xaçmaz, Yevlax, Göyçay, Bərdə, Tərtər, Kürdəmir, Mingəçevir, Lənkəran, Astara, Qobustan, Şamaxıda yağış, Şahbuz, Daşkəsən, Gədəbəy, Göygöl, Qax, Kişçay (Şəki), Qrız (Quba), Laza (Qusar), Şahdağda isə qar yağır.
Bir sıra ərazilərdə şimal-qərb küləyi əsir, küləyin maksimal sürəti Gəncədə 20, Goranboyda 19, Ağstafa, Naftalanda 18, Bakıda və Abşeron yarımadasında 17, Şəmkirdə 16, Kəlbəcərdə 15 m/s-dək güclənir.
10-01-2026, 17:16
Türkiyədə məşhur aktyor saxlanılıb
Türkiyə polisi məşhur aktyor Can Yamanı narkotik istifadəsində şübhəli bilinərək saxlayıb.
Bu barədə “Sabah” qəzeti məlumat yayıb.
Şənbə günü polis İstanbulda 100-dək əyləncə məkanında narkotik əleyhinə reyd keçirib.
“Aktyor Can Yaman Ruby gecə klubunda saxlanılıb", - qəzet yazıb.
Saxlanılanlar tezliklə narkotik testlərindən keçiriləcəklər. Otuz altı yaşlı Yaman bir sıra teleseriallarında baş rolları canlandırıb.
10-01-2026, 17:00
İki gün güclü külək əsəcək - XƏBƏRDARLIQ
Milli Hidrometeorologiya Xidməti yanvarın 11-12-də Bakıda və Abşeron yarımadasında, eyni zamanda, əksər bölgələrdə gözlənilən küləkli hava şəraiti ilə bağlı sarı və narıncı xəbərdarlıq verib.
Məlumata görə, Qobustan, Xızı, Qusar, Daşkəsəndə narıncı xəbərdarlığa uyğun olaraq cənub-qərb küləyi əsəcək, küləyin sürəti saniyədə 20.8-28.4 metrədək güclənəcək.
Bakıda və Abşeron yarımadasında, Salyan, Neftçala, Hacıqabul, Mingəçevir, Balakən, Zaqatala, Qax, Şəki, Oğuz, Qəbələ, Şamaxı, Ağsu, İsmayıllı, Şabran, Xaçmaz, Quba, Siyəzən, Kəlbəcər, Laçın, Füzuli, Zəngilan, Gəncə, Gədəbəy, Göygöl, Naftalan, Samux, Goranboy, Qazax, Ağstafa, Tovuz, Şəmkir, Lerik, Yardımlı, Lənkəran, Masallı, Astara, Cəlilabadda isə sarı xəbərdarlığa uyğun olaraq, cənub-qərb küləyi əsəcək, küləyin sürəti saniyədə 13.9-20.7 metr təşkil edəcək.
10-01-2026, 15:50
Fazil Mustafa teleaparıcının müdafiəsinə qalxdı
Milli Məclisin İctimai birliklər və dini qurumlar komitəsinin sədri Fazil Mustafa "Space TV"də yaymlanan "Gəl, danış" verilişinin aparıcısı Amil Xəlilin müdafiəsinə qalxıb.
Komitə sədri Amil Xəlilin verilişinin bağlanmasına etiraz edib.
"Audiovizual Şura “Space TV”də dekabrın 25-i yayımlanmış “Gəl, danış!” proqramında aparıcının çıxışına görə (“Media haqqında” Qanunun 14.1.4-cü maddəsinin tələbləri pozulduğundan) yanvarın 14-ü saat 12:00-dan saat 15:00-dək yayımının 3 saatlıq dayandırılması barədə qərar verib.
Tamamilə yanlış qərardır. Şəxsən tanımasam da, verilşlərindən istedadını və cəfakeşliyini qiymətləndirdiyim Amil Xəlil ictimai əxlaqın qorunması istəqamətində cəsarətli fikir söyləyib, şəxsən kimisə hədəfə almayıb və tövsiyəsi də sağlam məntiqə dayanır. Cəmiyyətdə baş verən əxlaqi deqradasiyanı jurnalistin dilə gətirməsinə qarşı bu cür addımlar zərərlidir. O halda kim danışacaq bu neqativləri, kim insanlara doğru fikirləri aşılayacaq? Söyüş söyməyib, təhqir etməyib, mədəni üslubda fikir söyləyib, buna görə televiziyanın və jurnalistin hədəfə alınmasını yanlış hesab edirəm",-deyə deputat bildirib.
10-01-2026, 15:30
Tehranda 200-dən çox etirazçı öldürülüb - “Time” jurnalı
İrandakı etiraz aksiyalarında ölənlərin sayı ilə bağlı yeni məlumat yayılıb.
“Time” jurnalı İran paytaxtındakı bir klinikanın həkiminə istinadən təkcə Tehranda 200-dən çox etirazçının öldüyünü iddia edib.
Mənbə bildirib ki, Tehranın yalnız altı klinikasında 217 cəsəd var və qurbanların əksəriyyəti - əsasən gənc kişilərdir - güllə yaralarından ölüb.
“Time”a danışan mənbə bildirib ki, hakimiyyət orqanları cəsədləri 9 yanvar cümə günü xəstəxanalardan çıxarıb.
Lakin digər mənbələr İrandakı etirazlarda ölənlərin sayını fərqli qiymətləndirir.
İnsan Hüquqları Aktivistləri Xəbər Agentliyi (HRANA) ekspertlərinin fikrincə, son 13 gündə İranda ən azı 65 nəfər, o cümlədən 50 etirazçı və 14 təhlükəsizlik qüvvəsi ölüb.
“Time” bildirilən rəqəmlərin heç birini müstəqil şəkildə təsdiqləyə bilmədiyini etiraf edib, lakin HRANA-nın yalnız müəyyən edilmiş ölüm hallarını saydığını qeyd edib.
İranda etirazlar 28 dekabrda Tehranın əsas bazarında başlayıb. Əvvəlcə dükan sahibləri və tələbələr etirazlara qoşularaq milli valyutanın kəskin şəkildə ucuzlaşması və qiymətlərin artması fonunda hökumətin hərəkətlərindən narazılıqlarını bildiriblər. Etirazlar başladıqdan qısa müddət sonra İran Mərkəzi Bankının rəhbəri Məhəmməd Fərzin istefa verib.
Nümayişlər isə digər şəhərlərə də yayılıb.
9 yanvarda Tehran meri Əlirza Zəkani kütləvi etirazçıların İran paytaxtında 26 bankı və 25 məscidi vandalizm yolu ilə dağıtdığını bildirib. İranın Ali Lideri Əli Xamenei 9 yanvarda xalqa müraciətində İrandakı etirazçıların “əlləri iranlıların qanı ilə ləkələnmiş" ABŞ prezidenti Donald Trampı razı salmağa çalışdıqlarını bildirib.
10-01-2026, 14:55
Paşinyan II Qareginin fərmanını rədd etdi
"Mən artıq bildirmişəm ki, Ktriç Nersisyan (II Qaregin) bütün ermənilərin katolikosu deyil və buna görə də onun verdiyi qərarlar bizim üçün heç bir dəyər kəsb etmir və etibarsızdır".
Bunu Ermənistanın baş naziri Nikol Paşinyan bütün ermənilərin katolikosu II Qareginin bu gün imzaladığı fərmanları şərh edərkən haqqında bildirib.
Qeyd edək ki, II Qareginin 10 yanvar tarixli fərmanı ilə yepiskop Gevork Saroyan Masiatsotn yeparxiyasının primatı vəzifəsindən uzaqlaşdırılıb.
Gevork Saroyanın dini postdan çıxarılmanın əsas səbəbi kimi vəzifə səlahiyyətlərindən sui-istifadə, vəzifələrini yerinə yetirməməsi və yeparxiyanın ruhanilərinə qarşı təzyiq və zorakılıq tətbiq etməsi göstərilib.
II Qareginin digər fərmanı ilə yepiskop Ruben Zarqaryan yeparxiyanın rəhbəri təyin edilib.
Nikol Paşinyan isə II Qreginin sözügedən fərmanlarını rədd edərək deyib:
“Yepiskop Gevork Saroyan hələ də Erməni Apostol Müqəddəs Kilsəsinin Masiatsotn yeparxiyasının primatı olaraq qalır", - deyə Baş nazir vurğulayıb.
10-01-2026, 14:43
Elçibəyin qardaşı oğlu: "Ərturquta dedim ki, o kimdi axı, məhkəməyə verirsən?!"
Meydan hərəkatının liderlərindən olmuş Nemət Pənahlı iddia edib ki, o zaman toplanan təxminən 10 milyon manat vəsait AXC lideri, mərhum eks-prezident Əbülfəz Elçibəy tərəfindən mənimsənilib.
Nemət Pənahlının bu iddiası cəmiyyətdə birmənalı qarşılanmayıb. Sosial şəbəkələrdə onu qınayanlar yalan danışmaqda, Elçibəyə şər-böhran atmaqda ittiham ediblər.
Mərhum eks-prezidentin ailə üzvləri də Nemət Pənahlının iddasına səssiz qalmayıb.
Əbülfəz Elçibəyin qardaşı oğlu Hürrü Əliyev Modern.az-a açıqlamasında Nemət Pənahlının cılız iddia səsləndirdiyini və ona geniş cavab verməyi özünə yaraşdırmadığını bildirib:
"İlk növbədə onu qeyd edim ki, indiyədək Bəy (Əbülfəz Elçibəy-red) haqqında çox insanlar müxtəlif fikirlər səsləndirib, onu tənqid edib, hətta təhqirə yol veriblər. Lakin bu günədək mən kimliyindən asılı olmayaraq heç birinə bir kəlmə belə cavab verməmişəm və bunu özümə yaraşdırmıram. Elçibəyin Tanrısı var, Milləti var.
Onun barəsində şər və böhtan danışanların hamısına cavabı Tanrı da, xalq da artıq verib. Mən kiməm ki, Elçibəyi müdafiə edim? Elçibəyin buna ehtiyacı da yoxdur".
Elçibəyin oğlu Ərturqut Əliyev isə Nemət Pənahlınının çıxışından sonra onu məhkəməyə verməyə hazırlaşır.
Hürrü Əliyev əmisoğlunun bu barədə onunla dünən danışdığını və niyyətini açıqladığını deyib:
"Mən qəti bunun əleyhinə oldum. Ümumiyyətlə, həm Elçbəyin oğlu olaraq ona yaraşdırmadım. Həm də qarşındakı adam gərək əhəmiyyətli adam ola, tutarlı söz deyə ki, sən də gedib onu məhkəməyə verəsən, yaxud nəsə tələb edəsən. Söhbət tək Nemət Pənahlıdan getmir. Ümumiyyətlə, Elçibəyin oğlu atası ilə bağlı məsələləri məhkəmə yolu ilə həll etməməlidir. Mən əleyhinə çıxdım, amma o müstəqil adamdır. Qərarı özü verəcək. Mən ona əmioğlu, böyük qardaş kimi məsləhət görmədim. Ötən gün görüşümüz zamanı bir sıra məsələləri danışdıq və ona belə əhəmiyyətsiz məsələlərə görə nəinki məhkəməyə müraciət etməyi, heç rəy verməməyi məsələhət gördüm. O (Nemət Pənahlı-red) kimdir ki, məhkəməyə verilsin. Lakin Ərturqutun artıq məhkəməyə müraciət edib-etmədiyi ilə bağlı məlumatlı deyiləm".
10-01-2026, 13:48
ABŞ İranın cəsur xalqını dəstəkləyir! - Marko Rubio
ABŞ dövlət katibi Marko Rubio İranda hökumət əleyhinə etirazlar fonunda Vaşinqtonun İran xalqını dəstəklədiyini bildirib.
Dövlət katibi bu barədə X hesabı üzərindən paylaşımında bildirib.
"Etirazlar ölkədəki ağır iqtisadi vəziyyətin təsiri ilə alovlanıb. Birləşmiş Ştatlar İranın cəsur xalqını dəstəkləyir”, – deyə Marko Rubio yazıb.
Xatırladaq ki, ABŞ Prezidenti Donald Tramp Tehranı təhlükəsizlik qüvvələrinin etirazçılara güc tətbiq edəcəyi təqdirdə İrana qarşı hücumla hədələyib. İranın ali dini lideri Ayətullah Əli Xamenei isə Trampa “öz ölkəsinə diqqət yetirməyi” tövsiyə edib və etirazların qızışdırılmasında ABŞ-ı günahlandırıb.
10-01-2026, 13:09
İran şahının oğlu etirazçılara səsləndi: Şəhər mərkəzlərini tutun
1979-cu ildə devrilmiş İran şahının ABŞ-da yaşayan oğlu Rza Pəhləvi şənbə günü iranlıları daha məqsədyönlü etiraz aksiyalarına çağırıb.
Bu barədə "Reuters" agentliyi məlumat yayıb.
Qeyd edilib ki, o, şəhər mərkəzlərinin ələ keçirilməsi və nəzarətdə saxlanılmasını əsas hədəf kimi göstərib.
“Bizim məqsədimiz artıq sadəcə küçələrə çıxmaq deyil. Məqsəd şəhər mərkəzlərini ələ keçirməyə və onları saxlamağa hazırlaşmaqdır”,-deyə Rza Pəhləvi sosial şəbəkələrdə yayımladığı videomüraciətdə bildirib.
Şənbə və bazar günləri yeni etiraz aksiyalarının keçirilməsinə çağıran Rza Pəhləvi əlavə edib ki, çox yaxın hesab etdiyi bir gündə vətənə qayıtmağa hazırlaşır.
Xatırladaq ki, Rza Pəhləvinin çağırışından sonra yanvarın 8-də İranda etiraz yürüşləri güclənib. Sosial şəbəkələrdə kütləvi aksiyaları əks etdirən çoxsaylı videolar yayılsa da, İranın Fars agentliyi etirazların “məhdud xarakter daşıdığını” iddia edib. Etirazların fəallaşması fonunda ölkədə internet, mobil və şəhər telefon rabitəsi müvəqqəti olaraq dayandırılıb.
İİğtişaşlar zamanı şəxsi mülkiyyətə və şəhər infrastrukturuna ziyan dəyib. Nəqliyyat vasitələri, o cümlədən təcili yardım avtomobilləri və şəhər avtobusları məhv edilib, metro stansiyalarına, məscidlərə, banklara və mağazalara ziyan vurulub.
İran KİV-ləri iğtişaşlar zamanı ölən və yaralananların olduğu barədə məlumat yayıb.
10-01-2026, 12:54
Sabahın hava proqnozu
Yanvarın 11-də Azərbaycanda havanın əsasən yağmursuz keçəcəyi gözlənilir.
Bu barədə Milli Hidrometeorologiya Xidmətindən məlumat verilib.
Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Gecə və səhər bəzi yerlərdə zəif duman, az çiskin olacaq. Şimal-qərb küləyi səhər arabir güclənən cənub-qərb küləyi ilə əvəz olunacaq.
Havanın temperaturu gecə 3-5, gündüz 11-16 dərəcə isti olacaq. Atmosfer təzyiqi 763 mm civə sütunundan 759 mm civə sütununa enəcək. Nisbi rütubət gecə 80-85 %, gündüz 65-70 % təşkil edəcək.
Azərbaycanın rayonlarında havanın əsasən yağmursuz keçəcəyi gözlənilir. Bəzi yerlərdə arabir duman olacaq. Qərb küləyi ayrı-ayrı yerlərdə arabir güclənəcək.
Havanın temperaturu gecə 0-5, gündüz 12-17 dərəcə isti, dağlarda gecə 0-5 dərəcə şaxta, gündüz 7-12 dərəcə isti olacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!