29-12-2025, 17:04
Mədəniyyət Nazirliyi 2025-ci ilin hesabatını verdi
2025-ci ildə Mədəniyyət Nazirliyinin fəaliyyəti mədəni siyasətin müasirləşdirilməsi, yaradıcı sənayelərin institusional gücləndirilməsi, mədəni irsin qorunması və mədəni diplomatiyanın genişləndirilməsi istiqamətində ardıcıl islahatlarla yadda qaldı. İl ərzində mədəniyyət təkcə milli kimliyin ifadəsi kimi deyil, sosial inkişaf və beynəlxalq dialoq aləti kimi təqdim olundu.
Bu barədə cari il ərzində Mədəniyyət Nazirliyi tərəfindən görülən işlər, qarşıya qoyulan və nail olunan hədəflərlə bağlı sorğusuna cavab olaraq nazirlikdən məlumat verilib.
Bildirilib ki, əsas dönüş nöqtələrindən biri mədəniyyət sahəsində idarəetmənin çağdaş tələblərə uyğunlaşdırılması olub:
“Kino sənayesində hüquqi və institusional mexanizmlər yeniləndi, müəllif hüquqları və qonorar sistemi təkmilləşdirildi, audiovizual istehsal xərclərinin qismən geri ödənilməsi mexanizmi tətbiq edildi. Paralel olaraq incəsənət təhsili sahəsində müxtəlif prosedurlar rəqəmsallaşdırıldı, müəllimlərin işə qəbulu və attestasiyası şəffaf meyarlar əsasında həyata keçirildi.
İl ərzində Azərbaycan mədəniyyətinin beynəlxalq aləmdə təmsil olunması əhəmiyyətli dərəcədə artdı. Azərbaycanın sənət, kino,musiqi və s. sahələrinin təmsilçiləri nüfuzlu beynəlxalq platformalarda təmsil olundu, gənc sənətçilərin beynəlxalq şəbəkələrə çıxışı dövlət dəstəyi proqramları vasitəsilə genişləndirildi. Mədəni sahibkarlıq iqtisadi və sosial inkişafın real komponenti kimi möhkəmləndi”.
Nazirlikdən verilən məlumata görə, mədəni irsin qorunması istiqamətində işğaldan azad edilmiş ərazilərdə abidələrin inventarlaşdırılması aparılıb, yeni obyektlər dövlət mühafizəsinə götürülüb, Ağdam Muğam Mərkəzi və “İmarət” Tarix-Memarlıq Muzey Kompleksi istifadəyə verilib:
“Eyni zamanda bir sıra tarixi-mədəni komplekslərin UNESCO-nun Dünya İrsinin İlkin Siyahısına daxil edilməsi beynəlxalq tanınmanın göstəricisi oldu.
2025-ci ildə incəsənət təhsili üzrə proqramlar yeniləndi, fortepiano ixtisası üzrə ilk milli dərsliklərin hazırlanmasına başlanıldı, müəllimlərin peşə səriştələrinin ölçülməsi sistemli xarakter aldı. Gənclər üçün beynəlxalq təhsil və təqaüd imkanları genişləndirildi”.
Qeyd edilib ki, media və kommunikasiya sahəsində vahid yanaşma formalaşdırıldı, rəsmi informasiya dili sadələşdirilib, ictimaiyyətlə əlaqələr gücləndirilib:
“Rəqəmsal təşəbbüslər, o cümlədən “Novruz 2025” onlayn festivalı mədəniyyətin geniş auditoriyalara çatdırılmasının effektiv nümunəsinə çevrildi.
Ümumilikdə, 2025-ci il mədəniyyət sahəsində daha açıq, çevik idarəetmə modelinin formalaşdığı il oldu. Mədəniyyət yalnız həyata keçirilən fəaliyyət deyil, eyni zamanda cəmiyyətlə paylaşılabilən və beynəlxalq dialoqa açıq ictimai dəyər kimi mövqeləndirildi”, - Nazirlikdən bildirilib.
29-12-2025, 16:50
Baş Prokurorluqdan Vüqar Ələkbərovla bağlı açıqlama
Plastik cərrah Vüqar Ələkbərovun icra etdiyi əməliyyatdan verilən şikayət üzrə araşdırma aparılır.
Baş Prokurorluğun Mətbuat xidmətindən bildirilib ki, plastik cərrah Vüqar Ələkbərov tərəfindən icra olunan əməliyyatlar nəticəsində səhhətlərində problemlər yaranmasına dair 2 nəfərin müraciəti üzrə Bakı şəhəri Nəsimi və Binəqədi rayon prokurorluqlarında araşdırma aparılır.
“Hər iki müraciət üzrə tam, hərtərəfli və obyektiv araşdırma aparılmaqla nəticəsi barədə müvafiq qərarın qəbul edilməsi təmin olunacaq”, - qeyd olunub.
Xatırladaq ki, sosial şəbəkədə plastik cərrah Vüqar Ələkbərovun icra etdiyi əməliyyatdan sonra pasiyentin bədəninin çürüməsi ilə bağlı məlumatlar yayılıb.
29-12-2025, 16:45
Emin Əmrullayev özünə yeni müşavir təyin etdi
Elm və təhsil naziri Emin Əmrullayevin müvafiq Əmri ilə Nizami Yusifli nazirin müşaviri vəzifəsinə təyin edilib.
Bu barədə Elm və Təhsil Nazirliyi məlumat yayıb.
Qeyd edək ki, Nizami Yusifli bakalavr təhsilini Azərbaycan Dövlət İqtisad Universitetində (UNEC) maliyyə ixtisası üzrə alıb, magistratura təhsilini isə maliyyə bazarları ixtisası üzrə fərqlənmə diplomu ilə bitirib.
Əmək fəaliyyətinə “EY Azerbaijan” (Ernst & Young) şirkətində başlayan Nizami Yusifli 2020-ci ildən etibarən Azərbaycan İnvestisiya Holdinqində (AİH) müxtəlif rəhbər vəzifələrdə çalışıb.
Peşəkar fəaliyyəti dövründə maliyyə nəzarəti, audit, dövlət aktivlərinin idarə olunması, strateji planlaşdırma, korporativ idarəetmə və investisiya sahələrində geniş təcrübə qazanıb.
Nizami Yusifli eyni zamanda bir sıra özəl müəssisələrdə rəhbər vəzifələrdə çalışıb. Azərbaycan Dövlət İqtisad Universitetinin SABAH qruplarında maliyyə uçotu və korporativ maliyyə fənləri üzrə dərs deyib.
29-12-2025, 16:43
Bakıda və bölgələrdə külək güclənəcək - XƏBƏRDARLIQ
Bakıda və Abşeron yarımadasında, eyni zamanda əksər bölgələrdə dekabrın 30-31-də gözlənilən küləkli hava şəraiti ilə bağlı sarı və narıncı xəbərdarlıq verib.
Bu barədə Milli Hidrometeorologiya Xidməti məlumat yayıb.
Salyan, Neftçala, Hacıqabul, Qobustan, Şəki, Oğuz, Qəbələ, Göyçay, Xızı, İsmayıllı, Kəlbəcər, Goranboy, Daşkəsəndə narıncı xəbərdarlığa uyğun olaraq şimal-qərb küləyi əsəcək, küləyin sürəti 20.8-28.4 m/san-dək güclənəcək.
Bakıda və Abşeron yarımadasında, Şabran, Xaçmaz, Quba, Qusar, Siyəzən, Qazax, Ağstafa, Tovuz, Şəmkir, Samux, Balakən, Zaqatala, Qax, Yevlax, Bərdə, Tərtər, Sabirabad, Şirvan, Füzuli, Zəngilan, Laçın, Biləsuvar, Lerik, Yardımlı, Lənkəran, Masallı, Astara, Cəlilabad, Mingəçevir, Ağdaş, Cəbrayıl, Ucar, Zərdab, Ağcabədi, Xocavənd, Ağsu, Şamaxı, Gəncə, Gədəbəy, Göygöldə isə sarı xəbərdarlığa uyğun olaraq qərb küləyi əsəcək, küləyin sürəti 13.9-20.7 m/san təşkil edəcək.
29-12-2025, 10:35
Qalib xalqın qalib idmançıları
Prezident İlham Əliyevin 2025-ci ilin idman yekunlarına həsr olunan mərasimdə səsləndirdiyi fikirlər bir daha göstərdi ki, idmanın inkişafı Azərbaycanda ardıcıl və məqsədyönlü dövlət siyasətinin mühüm istiqamətlərindən biridir. Dövlət başçısı çıxışında vurğuladı ki, 2025-ci il idman sahəsi üçün əlamətdar olub və bu il idmançılarımız beynəlxalq yarışlarda rekord nəticələrə imza atıblar. İl ərzində 2000-dən çox medal, o cümlədən 600-dən artıq qızıl medalın qazanılması idmana göstərilən diqqətin və aparılan siyasətin real nəticəsidir. Medalların sayının ötən illə müqayisədə artması isə bu sahədə görülən işlərin davamlılığını və sistemli xarakter daşıdığını təsdiqləyir.
Prezident İlham Əliyev qeyd etdi ki, Azərbaycanda idmanın inkişafı dövlət siyasətidir və bu siyasət çərçivəsində ölkə üzrə müasir idman infrastrukturu demək olar ki, sıfırdan qurulub. Bu gün həm paytaxtda, həm də bölgələrdə idmanla məşğul olmaq üçün geniş imkanlar yaradılıb. Cari ildə Gəncə və Yevlax şəhərlərində Olimpiya İdman Komplekslərinin istifadəyə verilməsi ilə bölgələrdə bu cür komplekslərin sayı 46-ya çatdırılıb. Bu fakt bir daha göstərir ki, regionlarda yaşayan gənclərin idmana cəlb olunması dövlət üçün prioritet məsələdir.
Dövlət başçısı çıxışında sağlam gənc nəslin formalaşdırılmasının ölkənin gələcək inkişafı baxımından mühüm əhəmiyyət daşıdığını xüsusi vurğuladı. Gənclərin uşaqlıqdan idmana marağının artırılması həm yüksək idman nailiyyətlərinə, həm də sağlam və fiziki cəhətdən güclü cəmiyyətin formalaşmasına zəmin yaradır. Bu istiqamətdə həyata keçirilən tədbirlər gəncləri idmanla daha fəal məşğul olmağa həvəsləndirir.
Prezident İlham Əliyev bildirdi ki, dövlət siyasətinin əsas məqsədlərindən biri gənclərin sağlam ruhda və vətənpərvərlik ruhunda tərbiyə edilməsidir. Gənclərin fiziki hazırlığı ilə mənəvi saflığı vəhdət təşkil etməli, bu amillər bir-birini tamamlamalıdır. Xalqımızın nümayiş etdirdiyi həmrəylik və vətənpərvərlik, xüsusilə son illərin hadisələri fonunda, bu siyasətin nə qədər doğru olduğunu sübut edir. İdman isə gənc nəslin vətənpərvərlik ruhunda yetişməsində mühüm rol oynayır. Son beş ildə bayrağımızın qalib ölkənin bayrağı kimi qaldırılması idmançılarımızın məsuliyyətini daha da artırır. Onlar artıq müzəffər xalqın nümayəndələri kimi yarışlara qatılır və bu amil onların çıxışlarına xüsusi ruh verir.
Bu il ölkəmizdə keçirilən əsas idman hadisələrindən biri kimi MDB ölkələrinin üçüncü Oyunlarınının yüksək səviyyədə təşkil olunması, Gəncə şəhərinin mərkəz seçilməsi, yarışların bir hissəsinin Xankəndidə keçirilməsi xüsusi əhəmiyyət daşıdı. Xarici qonaqlar ölkəmizin qonaqpərvərliyini, bölgələrimizin gözəlliyini və yaradılan şəraiti yüksək qiymətləndirdilər. İdmançılarımızın bu Oyunlarda komanda hesabında ikinci yerə layiq görülməsi də mühüm nailiyyət kimi dəyərləndirildi.
Dövlət başçısı çıxışında ölkəmizdə ilk dəfə olaraq UFC üzrə beynəlxalq turnirin keçirilməsini də xüsusi vurğuladı: “Dünyanın ən populyar idman yarışlarından birinin Bakıda təşkil olunması Azərbaycanın artan nüfuzunun və imkanlarının göstəricisidir. Turnirin dünya mediasında geniş işıqlandırılması ölkəmizin beynəlxalq arenada təqdimatına mühüm töhfə verdi.”
Prezident İlham Əliyev Formula 1 yarışlarının ölkəmizin tanıdılmasında xüsusi rol oynadığını qeyd edərək bildirdi ki, ilk Formula 1 yarışından sonra Azərbaycana gələn xarici turistlərin sayı 20 faiz artıb. Bu il keçirilən yarışa marağın böyük olması, bütün biletlərin əvvəlcədən satılması və yarışın yarım milyardlıq auditoriyaya malik olması Bakının dünya miqyasında tanınmasına xidmət edib. Şəhər yarışlarının unikallığı artıq digər ölkələrin də diqqətini cəlb edir.
Çıxışda gələcək planlardan da bəhs olunaraq bildirildi ki, ölkəmizdə yüzlərlə beynəlxalq idman yarışı keçirilib və bu ənənə davam etdiriləcək. İlk dəfə olaraq Qusarda, Şahdağ Xizək Kurortunda Xizək üzrə Dünya Kubokunun keçirilməsi Azərbaycanın qış idmanı xəritəsində də öz yerini tutduğunu göstərir. Şahdağ Turizm Xizək Mərkəzinin inkişafı bölgədə turizmin canlanmasına, minlərlə yeni iş yerinin yaradılmasına səbəb olub.
Prezident İlham Əliyev həmçinin Bakı şəhərinin “Dünyanın İdman Paytaxtı” seçilməsini tarixi hadisə kimi qiymətləndirərək bunun ölkəmizdə idmana göstərilən diqqətin beynəlxalq səviyyədə tanınmasının bariz nümunəsi olduğunu bildirdi. Dövlət başçısı vurğuladı ki, idmançıların və idman mütəxəssislərinin mükafatlandırılması artıq uzun illərdir davam edən gözəl ənənədir və Azərbaycanın idman şöhrətini ucaldan hər bir şəxs dövlət tərəfindən layiqincə qiymətləndirilməlidir.
Xannənə Həsənova
Abşeron-Xızı Regional Gənclər və İdman İdarəsinin
Abşeron rayonu üzrə gənclər və idman sektorunun müdiri
28-12-2025, 21:23
Tramp Putinlə danışıqlar apardı
ABŞ Prezidenti Donald Tramp ukraynalı həmkarı Volodimir Zelenski ilə görüşdən əvvəl Rusiya Prezidenti Vladimir Putinlə telefon danışığı apardığını bildirib.
Bu barədə Ağ Ev rəhbəri özünün "Truth Social" səhifəsində yazıb.
"Bu gün saat 13:00-da Ukrayna Prezidenti Zelenski ilə görüşdən əvvəl Rusiya prezidenti Putinlə yaxşı və çox məhsuldar telefon danışığım oldu. Görüş Mar-a-Laqoda baş tutacaq", - Tramp qeyd edib.
O əlavə edib ki, görüşə mətbuat nümayəndələri də dəvət olunub.
Qeyd edək ki, Zelenski Trampla görüşdən əvvəl Böyük Britaniyanın Baş naziri Kir Starmerlə telefon danışığı apardığını bildirib.
28-12-2025, 21:12
“Zəngəzur”da bayram
-bayrama qarışıb
Zəngəzur mahalının Kurud- Kirs icmasının və “Hərbi Mövzular üzrə İxtisaslaşmış Jurnalistlər” İctimai Birliyinin birgə təşkilatçlığı ilə “31 Dekabr- Dünya Azərbaycanlılarının Həmrəyliyi Günü” münasibəti ilə həmyerlilərin görüşü keçirilib. İcma rəhbəri Səxavət Hacıyev icmanın bütün üzvlərini və ümumilikdə xalqımızı qarşıdan gələn bayramlar münasibəti ilə təbrik etdikdən sonra 20 dekabrda Qərbi Azərbaycan İcmasında və dekabrın 26-da Qafan Rayon İcma rəhbərlərinin hesabat yığıncaqlarında qarşıya qoyulan məsələlər barədə görüş iştirakçılarına ətraflı məlumat verib.
Hərbi jurnalistlər Birliyinin sədri Tamxil Ziyəddinoğlu “31 Dekabr- Dünya Azərbaycanlılarının Həmrəyliyi” günü münasibəti ilə təltif olunan Birinci Qarabağ Müharibəsinin qazisi Xanəli Bayram oğlu Qocayevi və 44 günlük Vətən Müharibəsi qazisi Xıdırlı İsmayıl Nəsrəddin oğlunun Fəxri diplomlarını təqdim etmək üçün icmanın fəallarından Sucəddin Məmişovu və Xanlar Qocayevi dəvət edib. Hər ikisi mükafatları sahiblərinə təqdim edərək onlara sağlamlıq, dinclik, əmin-amanlıq və mülki həyatda da müvəffəqiyyətlər arzulayıblar.
Qazi Hafiz Tahirov keçdikləri ağır və şərəfli döyüş yolundan, 90-cı illərin ac-yalavac günlərində Azərbaycan könüllülərinin silah-sursatsız, az qala əliyalın, necə cəsarətlə, ruh yüksəkliyi ilə döyüşdüklərindən danışıb.
Fürsətdən istifadə edən icma rəhbərliyi Xanlar Qocayevi doğum günü, bu günlərdə 60 illiyi olacaq Sucəddin Məmişovu isə yubileyi münasibəti ilə təbrik edib, hər ikisinə xoş arzularını bildirib. Sucəddin Məmişov yubileyini təbrik edən ellilərinə minnətdarlığını bildirib, həm də ömrünün 60 ilini aparan illərin etibarına həsr elədiyi "Bilmədim" şeirini səsləndirib.
Bilmədim
Altmış ili yola saldım, ötürdüm,
Bu dünyada haqq, ədalət görmədim.
İllər sanki quşa dönüb, uçdular,
Altmış yaşa necə çatdım, bilmədim.
Bir də gördüm ağarıbdı saçlarım,
Gücdən düşüb əlim, qolum, qıçlarım,
Uşaqlığım, gözəl gənclik çağlarım,
Necə gəldi, necə getdi bilmədim.
Xəyal uçur ötüb, keçən illərə,
Yada düşür doğma ellər, dağ, dərə,
Düşünürdüm vaxt var, cavanam hələ,
İllər necə ötüb, getdi bilmədim.
Yaddan çıxmır çubuqdan at mindiyim,
Qar üstündə, qışda xizək sürdüyüm,
Sanki dünən idi, ilk qız sevdiyim,
Bu altmış il necə keçdi, bilmədim,
Əvvəlki tək yoxdur taqətim, heyim,
Əynimə yaraşmır geydiyim, geyim,
Qocalıq təbilin çalır taleyim,
Qocalığa necə çatdım, bilmədim.
Yaxşı haldır qocalmağın, özü də,
Zaman yetdi yaxaladı, bizi də,
Zəiflətdi vuran qəlbi, gözü də,
Bütün bunlar nə vaxt oldu, bilmədim.
Sucəddinəm doğma eldən ayrıldim,
Qərib eldə qaçqın, köçkün sayıldım,
Elə bil ki, yuxudaydım, ayıldım,
Altmış yaşa necə çatdım, bilmədim.
Görüşün rəsmi hissəsindən sonra Xanlar Qocayev Qazilərin şərəfinə bayram süfrəsi açıb. Süfrə arxasında xatirələr çözələnib. Ellilər Zəngəzur dağlarında keçən uşaqlıq çağlarından, Çimənyurdda, Musayurdunda, Meşəbaşında qurulan binələrdən, Kirs, Kurud kəndlərinin gözəl günlərindən, pozulan növrağımızdan danışıblar. Amma heç kim o yerlərə qayıdacağımıza inamını itirməyib.
Qafan Rayon İcmasının mətbuat xidməti
28-12-2025, 20:44
ABŞ əsl BMT-yə çevrilib - TRAMP
Birləşmiş Millətlər Təşkilatı (BMT) dünyada sülhün təmin olunmasında fəal iştirak etməyə başlamalıdır.
Bu barədə Amerika Birləşmiş Ştatları (ABŞ) Prezidenti Tramp “Truth” sosial şəbəkəsində yazıb.
O bildirib ki, ABŞ son 8 ayda əsl BMT-yə çevrilib, bu təşkilat Rusiya ilə Ukrayna arasında baş verən müharibə də daxil olmaqla, münaqişələrin həllinə çox az yardım göstərib.
Tramp, həmçinin Tailand və Kamboca arasındakı döyüşlərin müvəqqəti olaraq dayanacağını və bu yaxınlarda razılaşdırılmış ilkin müqaviləyə uyğun olaraq, tərəflərin sülh şəraitində yaşamağa qayıdacaqlarını elan edib.
28-12-2025, 20:30
3 min uçuş ləğv edildi
ABŞ-ın şimal-şərqində yağan güclü qar səbəbilə 3 mindən çox uçuş təxirə salınıb və təxminən 700 uçuş ləğv edilib.
Nyu-York metropoliten ərazisində yerləşən üç əsas hava limanı ən çox zərər çəkənlər arasındadır. Ötən gün isə 8500-dən çox uçuş gecikib və 1700 reys ləğv edilib.
Federal Aviasiya Administrasiyasının məlumatına görə, Con Kennedi Beynəlxalq Hava Limanına uçuşlar şənbə səhəri orta hesabla təxminən iki saat təxirə salınıb.
28-12-2025, 19:40
Polşada bomba sığınacağı tikilir
Polşa hökuməti ölkə əraizində bomba sığınacaqları tikməyə başlayıb.
Bu barədə "Financial Times" məlumat yayıb.
Milli Təhlükəsizlik Bürosunun rəhbəri Slavomir Tsenkeviç bildirib ki, ölkə Rusiya tərəfindən artan təhlükə fonunda vətəndaşları qorumağa çalışır.
O bildirib ki, bomba sığınacaqlarının tikintisi üçün 16 milyard zlotı (3.8 milyard avro) ayrılıb. Sığınacaqlar çarpayı, su və yorğanlarla təchiz olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!