25-10-2025, 13:57
Bəylər Eyyubovun təyinatı barədə xəbər TƏSDİQLƏNDİ
İyun ayında Prezidentin Təhlükəsizlik Xidmətinin rəisi vəzifəsindən azad edilən general-polkovnik Bəylər Eyyubovun daha sonra Prezident Katibliyinin rəisi təyin olunması barədə xəbərlər yayılmışdı. Ancaq həmin vaxt bu barədə heç bir rəsmi açıqlama verilməmişdi.
Artıq Azərbaycan Prezidentinin rəsmi saytında bu barədə məlumat yer alıb.
Bəylər Eyyubov orada Azərbaycan Respublikası Prezidenti Katibliyinin rəisi vəzifəsini daşıdığı qeyd olunub.
General Bəylər Eyyubov 2003-2020-ci illərdə Prezidentin Təhlükəsizlik Xidmətinin rəisi - Azərbaycan Respublikası Xüsusi Dövlət Mühafizə Xidməti rəisinin birinci müavini vəzifəsini tutub.
16 mart 2020-ci ildə Prezident İlham Əliyev tərəfindən Azərbaycan Respublikası Prezidentinin Təhlükəsizlik Xidmətinin rəisi təyin edilib. Bu ilin martında onun 74 yaşı tamam olub.
Prezidenti Katibliyinin rəisinin hansı vəzifələr daşıdığı hələlik məlum deyil.
Qeyd edək ki, bu vəzifə əvvəllər də Prezident Administrasiyasının sturuktunda mövcud olub.
1998-1999-cu illərdə Prezident Katibliyinin rəisi — Prezidentin köməkçisi vəzifəsini Eldar Namazov tutub. Daha sonra onun yerinə Dilarə Seyidzadə təyin edilib. 2019-cu ildə o, azad edilib və Prezident Katibliyinin rəisi — Prezidentin köməkçisi vəzifəsi ləğv edilib.
25-10-2025, 12:29
Zabil Qəhrəmanov bu hadisəyə görə saxlanılıb
Tanınmış vəkil Zabil Qəhrəmanovun saxlanılmasına səbəb olan hadisənin görüntüləri yayılıb.
Videoda vəkilin Göygöl rayonundakı avtoyuma məntəqəsində bir nəfərə təpiklə xəsarət yetirdiyi əks olunur.
Məlumata görə, tərəflər arasında yaranan mübahisə davaya çevrilib və Qəhrəmanov qarşı tərəfə fiziki güc tətbiq edib.
Hadisə ilə bağlı vəkil polis tərəfindən saxlanılıb və ona Cinayət Məcəlləsinin 221-ci (xuliqanlıq) maddəsi ilə ittiham irəli sürülüb. O, bu gün məhkəməyə çıxarılacaq.
Qeyd edək ki, Zabil Qəhrəmanov Tovuzda 10 yaşlı Nərmin Quliyevanın qətlində təqsirləndirilən İlkin Süleymanovun müdafiəçisi kimi tanınıb. Bir neçə gün əvvəl isə onun vəkillik fəaliyyəti müvəqqəti dayandırılmışdı.
25-10-2025, 12:20
Rasim Balayev Nazirlikdən NARAZIDIR
“Azərbaycanfilm” yeni direktorun təyin edilməsiylə kino sahəsindəki problemlər yenidən gündəmə gəlib. Son illər Kinostudiyanın rəhbər heyətində baş verən dəyişikliklər müzakirələrə səbəb olub.
Təkcə ötən il Kinostudiyanın direktoru Nazim Hüseynov və onun müavini Aydın Hüseynov öz ərizələri ilə işdən çıxmışdılar. “Azərbaycanfilm”in əvvəlki direktoru, rejissor Cəmil Quliyev 2019-cu ilin sonlarında vəzifəyə təyin olunsa da, bir il tamam olmamış istefa vermişdi. Sonra kinostudiyaya Fariz Əhmədov direktor gətirildi, lakin o da çox qısa müddətdən sonra rəhbərlikdən ayrıldı.
Yeni rəhbər Qurban Pirimov bundan əvvəl Azərbaycan Kino Agentliyində direktor müavini vəzifəsini icra edib. O, Azərbaycanın tanınmış tarzəni Qurban Primovun nəvəsidir.
Mövzu ilə bağlı “Yeni Müsavat”a danışan Xalq artisti Rasim Balayev yeni təyinatdan heç bir gözləntisinin olmadığını deyib.
“Bu təyinatların yerini dəyişməklə heç nə dəyişməyəcək. Vəlinin yerinə Əlini qoysunlar, yenə də nəticə eyni olacaq. Əgər təyin olunan direktorun əlində real səlahiyyət, yetərli güc yoxdursa, o nə edə bilər ki? Kinomuzu dirçəltmək istəyiriksə, bu işə kompleks şəkildə yanaşmaq lazımdır. Ora kifayət qədər maliyyə ayrılmalıdır.
Mədəniyyət Nazirliyinə böyük məbləğdə vəsait verilib, amma hələ də Kinostudiyaya bir film belə sifariş edilməyib. Neçə ildir ki, Kinostudiyanın rəhbərliyini tez-tez dəyişirlər, amma nəticə yoxdur, heç bir real dəyişiklik müşahidə olunmur. Ora kim təyin olunsa da, fərq etmir. Elə bir idarəetmə strukturu yaradılmalıdır ki, ora rəhbərlik edən şəxs həmin qurumu işlədə, inkişaf etdirə bilsin. Təəssüf ki, hazırda belə bir struktur mövcud deyil”.
25-10-2025, 11:58
“Tayfun” hədəfini dəqiqliklə məhv etdi
Türkiyənin milli müdafiə sənayesində daha bir uğurlu sınaq həyata keçirilib.
"Roketsan" tərəfindən yerli imkanlarla hazırlanmış "Tayfun" ballistik raketi növbəti test atışında hədəfini tam dəqiqliklə vurub.
Görüntülərdə raketin qurudan dənizə buraxıldığı və müəyyən edilmiş hədəfi tam isabətlə məhv etdiyi əks olunub.
“Gözəl bir gün, daha bir uğurlu sınaq. Qətiyyətli addımlarla məsafə artır, dəqiqlik mükəmməlləşir”, - Türkiyə Müdafiə Sənayesi Komitəsinin rəhbəri Haluk Görgün bildirib
"Tayfun" Türkiyənin öz imkanları ilə inkişaf etdirdiyi ən uzun mənzilli ballistik raket hesab olunur. Mütəxəssislər bu sınağın Türkiyənin müdafiə texnologiyalarında yeni mərhələ olduğunu bildirirlər.
25-10-2025, 11:51
Qubadlı – Qarabağın
dirçələn incisi
25 oktyabr 2020-ci il tarixi Azərbaycan xalqının yaddaşına Qubadlının azad edildiyi, torpaqlarımızın bütövlüyünə bir addım da yaxınlaşdığımız gün kimi həkk olunub.
Qubadlı rayonu Azərbaycanın cənub-qərbində, Qarabağ yaylasının cənub-şərqində yerləşir. Ümumi sahəsi 802 kvadrat kilometr olan bu ərazi təbiəti, coğrafiyası və torpaq ehtiyatları ilə zəngin diyardır. Rayon qərbdən Ermənistanla sərhəddə yerləşir, şimalda Laçın, şərqdə Cəbrayıl, cənubda isə Zəngilanla həmsərhəddir. Qubadlının kəndlərinin çoxu Həkəri və Bərgüşad çaylarının sərin vadilərində yerləşir, bu da bölgəni kənd təsərrüfatı üçün əlverişli edir.
İşğala qədər Qubadlı rayonunun 79 min hektardan artıq torpaq fondu mövcud idi. Bu torpaqların böyük hissəsi əkin, örüş, bağçılıq və meşə sahələrindən ibarət idi. “Yazı düzü”, “Gəyən” və “Məzrə” kimi məhsuldar düzənliklərdə taxıl, üzüm, tütün, bostan və tərəvəz məhsulları becərilirdi. Qubadlı həm də heyvandarlığın, arıçılığın, bağçılığın inkişaf etdiyi bir bölgə idi. Ərazidəki təbii sərvətlər – mərmərləşmiş əhəng daşı, əqiq, mişar daşı və digər yataqlar rayonun sənaye potensialını da artırırdı.
Lakin bu təbii gözəlliklər və zənginliklər 1993-cü ildə işğal nəticəsində məhv edildi. Ermənistanın 1988-ci ildən başlayan təcavüzü nəticəsində Qubadlı rayonu 31 avqust 1993-cü ildə tamamilə işğal olundu. Min illərlə azərbaycanlıların yaşadığı bu diyar xarabalığa çevrildi. 29997 nəfər Qubadlı sakini öz doğma torpaqlarından didərgin düşdü, 94 yaşayış məntəqəsi, 7278 fərdi ev, 64 inzibati bina, yüzlərlə sosial və mədəniyyət obyekti dağıdıldı. Məscidlər yerlə yeksan edildi, 16 körpü, 1080 kənd təsərrüfatı obyekti, 650 km avtomobil yolu, 4830 km elektrik xətləri və digər infrastruktur tamamilə məhv edildi. Rəsmi İrəvan burada qanunsuz məskunlaşma siyasəti həyata keçirərək, xaricdən gətirdiyi erməniləri yerləşdirməklə beynəlxalq hüququ kobud şəkildə pozdu.
Ancaq 2020-ci il payızında Azərbaycan Ordusunun qəhrəmanlığı, xalqın birliyi və Prezident İlham Əliyevin rəhbərliyi ilə bu zülm dolu tarix sona çatdı. Qubadlının azad edilməsi uğrunda gedən döyüşlər xüsusi hərbi peşəkarlıq və fədakarlıq nümunəsi oldu. Şəhər ətrafında düşmən tərəfindən güclü istehkamlar qurulmuşdu, yüksəkliklərdə erməni silahlı birləşmələri yerləşdirilmişdi. Azərbaycan əsgəri bu sədləri bir-bir aşaraq, strateji yüksəklikləri ələ keçirdi, Xanlıq, Padar, Sarıyataq kimi kəndlər azad olundu. Nəhayət, 25 oktyabr 2020-ci ildə Qubadlı şəhəri düşməndən təmizləndi. Bu, Vətən müharibəsinin taleyini dəyişən dönüş nöqtələrindən biri idi.
Prezident İlham Əliyevin 26 noyabr 2020-ci il tarixli Sərəncamı ilə “Qubadlının azad olunmasına görə” medalı təsis edildi. Bu medalla 15 mindən çox Azərbaycan hərbi qulluqçusu təltif olundu.
Prezidentin 31 iyul 2023-cü il tarixli Sərəncamı ilə isə 25 oktyabr – Qubadlı şəhəri günü kimi təsis edildi. Bu qərar Qubadlının azadlıq tarixinin, xalqın mübarizə ruhunun və əbədi Zəfərin simvoluna çevrildi.
İşğaldan azad edilmiş torpaqlarda bərpa və quruculuq işləri geniş miqyasda aparılır. 2021-ci ilin oktyabrında istifadəyə verilən 110/35/10 kV-luq “Qubadlı” yarımstansiyası rayonun enerji təminatını tam bərpa etdi. 76 kilometr uzunluğunda çəkilmiş “Qubadlı-1” və “Qubadlı-2” elektrik verilişi xətləri təkcə enerji deyil, həm də yüksək sürətli internetlə Qubadlını ölkənin ümumi sisteminə bağladı.
Eyni zamanda Qubadlıda yeni yaşayış məntəqələrinin tikintisinə başlanıb. Mahruzlu və Zilanlı kəndlərinin layihələndirilməsi və tikintisi artıq davam edir. Bu kəndlərdə ilkin mərhələdə yüzlərlə ailənin məskunlaşdırılması planlaşdırılıb. Qubadlı rayonunun Baş planı təsdiqlənib və 2040-cı ilədək rayonun tam bərpası, 47 mindən artıq sakinin daimi yaşayışının təmin edilməsi nəzərdə tutulur.
Qubadlıda mühüm infrastruktur layihələri həyata keçirilir. Qubadlı-Eyvazlı və Qubadlı-Laçın avtomobil yollarının tikintisi bölgənin strateji əhəmiyyətini artırır, eyni zamanda iqtisadi canlanmanı təmin edir. Dövlət başçısının 2023-cü il sərəncamı ilə bu layihələr üçün 20 milyon manat vəsait ayrılıb.
2021 və 2022-ci illərdə enerji, yol və hərbi infrastrukturun təməlqoyma və açılış mərasimlərində iştirak edən dövlət başçısı 2023-cü ilin mayında Qubadlı şəhərinin, eləcə də Xanlıq, Mahruzlu və Zilanlı kəndlərinin təməlqoyma mərasimlərində iştirak etdi. Həmin gün Qubadlıda məktəb, xəstəxana və inzibati bina layihələrinin təməli qoyuldu.
Bu gün Qubadlıda yenidənqurma və inkişaf prosesi ardıcıl şəkildə davam edir. Yeni evlər, yollar, məktəblər, sosial obyektlər inşa edilir, kəndlərə həyat qayıdır. Qubadlı artıq dağıdılmış torpaq deyil – dirçələn, müasir və qüdrətli Azərbaycanın simvoluna çevrilib. 25 oktyabr – Qubadlı şəhəri günü isə bu dirçəlişin, qəhrəmanlığın və tarixi ədalətin təntənəsidir.
Nənəxanım Ağayeva,
Vətən Müharibəsi Qəhrəmanı, şəhid Vüqar Ağayevin anası
25-10-2025, 11:50
Bu ölkədə 1 illik matəm elan olundu
Tailand Krallığı sabiq kraliça Sirikitin vəfatı ilə əlaqədar bir illik
matəm elan edib.
Bu barədə krallıq sarayının bəyanatında qeyd olunub.
Qeyd edək ki, ötən gün 93 yaşında vəfat edən Sirikit uzun müddət xəstəliklərlə mübarizə aparıb və 2019-cu ildən xəstəxanada müalicə alırdı. Sirikit mərhum kral Bhumibol Adulyadejin həyat yoldaşı idi. Onun oğlu Maha Vajiralongkorn isə hazırkı Tailand kralıdır.
25-10-2025, 11:44
Azərbaycan qışda Ukraynanı XİLAS EDƏCƏK
Son həftələr Rusiya Ukraynada həm elektrik stansiyalarına, həm də qaz infrastrukturuna hücumları artırıb. Ukrayna Rusiyanın enerji sisteminə qarşı hücumlarının intensivləşməsi fonunda yeraltı qaz anbarlarından qaz çıxarmağa başlayıb.
Hücumlara görə Kiyev qaz idxalını 30 faiz artırmağı planlaşdırır. Ukrayna Mərkəzi Bankının rəhbəri ölkənin daxili qaz hasilatının 55 faizini itirdiyini açıqlayıb.
Hazırda Ukrayna Avropanın ən iri qaz anbarlarına malik olsa da (30 milyard kubmetr tutumla), onlar cəmi 28 faiz doludur. Bu vəziyyət qış ərəfəsində ölkənin enerji təhlükəsizliyi üçün ciddi təhdid yaradır.
Prezident Volodimir Zelenski bildirib ki, Ukrayna Avropa, ABŞ və Azərbaycanla ümumi dəyəri təxminən 2 milyard dollarlıq qaz idxalı barədə razılaşma əldə edib. Onun sözlərinə görə, söhbət ehtiyac yarandığı halda Azərbaycandan və digər tərəfdaşlardan qaz tədarükünün təmin edilməsindən gedir:
“Baş nazir Yuliya Sviridenko Slovakiya ilə müsbət razılaşmalara nail olub. ABŞ-da da enerji şirkətləri ilə danışıqlar aparılıb. Biz haradan təxminən 2 milyard dollarlıq qaz ala biləcəyimizi bilirik, əgər buna ehtiyac yaranarsa”, - Zelenski deyib.
Sözügedən razılaşma Azərbaycanın Avropanın enerji təhlükəsizliyində artan rolunun növbəti nümunəsidir. Norveçin 100 milyon dollarlıq qrant ayırması və digər ölkələrin də maliyyə dəstəyinə hazırlaşması fonunda, Azərbaycanın qaz ixracı bu qış Ukraynanın enerji böhranını yüngülləşdirən əsas faktorlardan biri kimi qiymətləndirilir.
Neft Araşdırmalar Mərkəzinin sədri İlham Şaban bildirib ki, Azərbaycanın Ukraynaya yenidən qaz satması imkanları daxilində mümkündür:
“Ukraynanın Azərbaycandan kiçik partiya qaz alması iyul ayının sonlarında baş tutdu. Ukrayna energetika naziri məlumat yaymışdı ki, biz sonra da Azərbaycandan qaz almaq niyyətimiz var. Zelenskinin bu açıqlaması da zamanı yetəndə belə bir addımın atılmasına yönəlib. Təbii ki, belə məslələri həyata keçirə bilər. Yəni nə zaman qaz olacaq kimi məsələlər önəmli faktorlardır. Sırf bir-birlərinə kommersiya ilə bağlıdır”.
İ.Şaban söyləyib ki, qaz satışı qazanclı olacaq: “Azərbaycan qazı satır. Bu humanitar yardım deyil. Qiyməti də özü müəyyən edəcək. Ukraynaya Avropa Birliyi tərəfindən pul ayrılır. Təkcə Norveç 150 milyon verir ki, Ukrayna qış üçün qaz alsın”.
25-10-2025, 11:33
Ağstafada müəllim dərs zamanı vəfat etdi
Ağstafa şəhər Musiqi və İncəsənət Mərkəzinin musiqi müəllimi işdə ölüb.
1984-cü il təvəllüdlü Günel Hüseynova işdə olarkən qəfil səhhəti pisləşib.
O, xəsətxanaya çatdırılsa da, onuin həyatını xilas etmək mümkün olmayıb.
Faktla bağlı araşdırma aparılır.
25-10-2025, 11:27
Orada hər həftə təxminən 7 min nəfər həlak olur - FACİƏ
ABŞ Prezidenti Donald Tramp Çin lideri Si Cinpinlə yaxın günlərdə keçiriləcək görüşdə Rusiya-Ukrayna müharibəsinin başa çatdırılması məsələsini müzakirə edəcəyini bildirib.
Ağ Evdə jurnalistlərin suallarını cavablandıran Tramp qeyd edib ki, Pekinin Moskvanın mövqeyinə təsir göstərməsi vacib ola bilər.
“Mən çox istərdim ki, Çin bizə Rusiya ilə bağlı məsələdə kömək etsin. Biz Rusiyaya qarşı çox ciddi sanksiyalar tətbiq etmişik. Güclü sanksiyalardır, amma istəyirəm ki, Çin də bu məsələdə bizə yardım göstərsin. Mənim Si Cinpinlə münasibətlərim yaxşıdır. Yaxın zamanda görüşəcəyik və bir neçə yaxşı razılaşma əldə edəcəyimizi düşünürəm. Müzakirə olunacaq əsas məsələlərdən biri də Rusiya-Ukrayna münasibətləridir”, * o qeyd edib.
ABŞ lideri əlavə edib ki, müharibədə hər həftə təxminən 7 min nəfər həlak olur və bu faciənin dayandırılması mövzusu danışıqların əsas gündəmində olacaq.
“Si Cinpin də istəyir ki, bu müharibə bitsin”, – deyə Tramp vurğulayıb.
Ondan, həmçinin ABŞ-ın Rusiyaya qarşı sanksiyalarının çox sərt olması və bunun Vladimir Putini “küncə sıxışdırıb-sıxışdırmadığı” soruşulub. Tramp cavabında bildirib: “Xeyr, belə düşünmürəm. Görək nə baş verir. Məncə, o da müharibənin sonunu istəyir”.
Ağ Evin məlumatına görə, Tramp və Si Cinpin arasında görüş 30 oktyabrda keçiriləcək və bu danışıqlar Vaşinqton-Pekin münasibətləri ilə yanaşı, Ukrayna böhranı baxımından da əhəmiyyətli olacaq.
25-10-2025, 11:21
Bu cihazları uzadıcı ilə qoşmaq olmaz! - XƏBƏRDARLIQ
Müasir evlərdə uzadıcılar elektrik cihazlarını enerji ilə təmin etmək üçün geniş istifadə olunur. Lakin onların yanlış istifadəsi ciddi fəsadlara səbəb ola bilər.
Professor, fizika-riyaziyyat elmləri doktoru Aleksey Yurasov xəbərdarlıq edib ki, bir çox yanğın halları məhz uzadıcıların düzgün işlədilməməsi nəticəsində baş verir.
Ekspertin sözlərinə görə, qızdırıcı elementləri və mühərrikləri olan cihazlar (məsələn, tozsoranlar, elektrik radiatorları, konvektorlar, istilik ventilyatorları və mikrodalğalı sobalar) uzadıcı vasitəsilə işlədildikdə kabellərin qızmasına, izolyasiyanın əriməsinə və qısaqapanmaya səbəb ola bilər. Bu cihazların gücü 1000–3000 vatt arasında dəyişdiyindən uzunmüddətli işləmə zamanı elektrik şəbəkəsinə həddindən artıq yük düşür.
Yurasov həmçinin soyuducu və dondurucuların, eləcə də paltaryuyan və qabyuyan maşınların uzadıcı ilə qoşulmasının yolverilməz olduğunu bildirib: “Bu avadanlıqlar yalnız güclü və ayrıca elektrik rozetkalarına birbaşa qoşulmalıdır”.
Mütəxəssis əlavə edib ki, uzadıcı seçərkən onun texniki göstəricilərinə, güc tutumuna, naqil qalınlığına, torpaqlama və sertifikatlaşdırma səviyyəsinə diqqət yetirmək vacibdir. Cihazın gövdəsindəki qızarma, çat və ya qoxu dəyişiklikləri onun dərhal dəyişdirilməli olduğunun göstəricisidir.
Yurasovun fikrincə, təhlükəsizlik hər şeydən önəmlidir: “Düzgün elektrik bağlantısına qənaət etməyə çalışmaq, nəticədə çox bahalı texnikanı sıradan çıxara və insan həyatı üçün təhlükə yarada bilər.”
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!