14-08-2025, 20:20
Növbəti görüş İrəvan və ya Bakıda baş tutmalıdır - Kostanyan
"3+3" formatında növbəti görüş ya İrəvanda, ya da Bakıda baş tutmalıdır".
Bunu İranın İRNA agentliyinə müsahibəsində Ermənistan xarici işlər nazirinin müavini Vahan Kostanyan deyib.
"Hesab edirəm ki, biz indi Ermənistan və Azərbaycan arasında münasibətlərdə yeni bir dövrə qədəm qoyuruq. Azərbaycanla əsas razılaşmalarımızdan biri ölkələrin suverenliyinə, yurisdiksiyasına və ərazi bütövlüyünə tam qarşılıqlı hörmətlə regionda nəqliyyat marşrutlarının açılmasıdır. Praktikada bu, Ermənistan və İran arasında dəmir yolu əməkdaşlığı, o cümlədən Naxçıvan-Culfa xətti üçün yeni imkanlar açacaq ki, bu da İranın Ermənistana və son nəticədə Qara dənizə çıxışını təmin edəcək".
Xarici işlər nazirinin müavini Ermənistanın "3+3" formatı kimi regional mexanizmlərin gələcək roluna münasibəti ilə bağlı sualı da cavablandırıb.
"Biz inanırıq ki, 3+3 formatı regional layihələrin müzakirəsi üçün uyğun platforma yarada bilər. Nazirlərin son bəyanatına görə, növbəti görüş ya İrəvanda, ya da Bakıda baş tutmalıdır və biz Azərbaycan tərəfi ilə də ikitərəfli məsləhətləşmələr planlaşdırırıq", - Vahan Kostanyan bildirib.
14-08-2025, 19:49
Balıkesir yenidən silkələndi
Türkiyənin Balıkesir şəhərində 4 maqnitudada zəlzələ baş verib.
Bu barədə ölkənin Fəlakət və Fövqəladə Halların İdarə Olunması İdarəsi (AFAD) məlumat yayıb.
Yeraltı təkanlar Sındırğı rayonunda qeydə alınıb. Zəlzələnin dərinliyi 10.97 kilometr olub.
Təbii fəlakətin nəticələri barədə məlumat yoxdur.
Xatırladaq ki, avqustun 11 və 12-də Sındırğıda zəlzələlər olub.
14-08-2025, 19:31
Azərbaycanda bu taksi şirkəti ləğv edilir
"TESLATАXI" Məhdud Məsuliyyətli Cəmiyyəti (MMC) ləğv edilir.
Bu barədə şirkət özü elan edib.
Qeyd edilib ki, kreditorlar iki ay ərzində tələblərini AZ4100 Laçın şəhəri, Laçın rayonu, Taxta-Körpü küçəsi ünvanına bildirə bilərlər.
Sözügedən taksi şirkəti 2020-ci ildə dövlət qeydiyyatına alınıb. Nizamnamə kapitalı 30 manat olan MMC-nin qanuni təmsilçisi Asim Akif oğlu Allahverdiyevdir.
14-08-2025, 19:11
Ərdoğandan terrorla bağlı mühüm mesaj
Bu gün biz “Terrorsuz Türkiyə” prosesində yeni səhifə açırıq və ölkəmizə qarşı terror təhlükəsi ehtimalını sıfra endirməyi hədəfləyirik.
Bu barədə Türkiyə Prezidenti Rəcəb Tayyib Ərdoğan Ankarada hakim Ədalət və İnkişaf Partiyasının (AKP) yaranmasının 24-cü ildönümünə həsr olunmuş təntənəli tədbirin iştirakçıları qarşısında çıxış edərkən bildirib.
Dövlət başçısının sözlərinə görə, konstruktivlik mühitinin qorunub saxlanılması və terrorizmə qarşı mübarizə üçün bütün məsələlərin həll edilməsi çox vacibdir.
“Türkiyədə siyasi qüvvələrin müxtəlif mövzularda mövqeləri üst-üstə düşməyə bilər və bu, normaldır. Lakin “Terrorsuz Türkiyə” məsələsində fikir ayrılığı olmamalıdır. “Xroniki terror problemi”nin aradan qaldırılmasına töhfə verən hər bir siyasətçi öz adını Türkiyə tarixinə yazacaq”, - deyə o qeyd edib.
Türkiyə lideri terrorla mübarizədə populizmin yolverilməz olduğunu vurğulayıb və əlavə edib ki, “nə millət, nə də gələcək nəsillər bunu bağışlamayacaq”.
14-08-2025, 18:23
Metrodan istifadə edənlərin diqqətinə! - İnterval artırılır
AZCON Holding şirkətlərindən olan “Bakı Metropoliteni” QSC tərəfindən Bakı şəhərinin nəqliyyat sistemində mühüm yer tutan metropoliten şəbəkəsinin daha da təkmilləşdirilməsi məqsədilə kompleks inşaat layihələrinin icrasına hazırlıq işlərinə start verilib.
Bu barədə QSC-dən məlumat verilib.
Bu işlər Prezident İlham Əliyevin 2025-ci il 30 yanvar tarixli Sərəncamı ilə təsdiqlənmiş “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində genişmiqyaslı tədbirlər planına uyğun olaraq həyata keçirilir.
Layihənin ilkin mərhələsində “Cəfər Cabbarlı–Nizami” mənzilini birləşdirəcək 200 metrə yaxın tunelin inşası üçün hazırlıq işlərinə başlanılır.
Belə ki, hazırlıq işləri çərçivəsində “28 May” stansiyası ətrafında iki ərazidə şaxta qazılacaq. Tikinti meydançalarından biri stansiyanın yuxarı hissəsində – Süleyman Rəhimov və Mirəli Qaşqay küçələrinin kəsişməsindəki avtomobil parklanma sahəsində, digəri isə stansiyanın qarşısında yerləşir. Şaxtalar qazıldıqdan sonra əsas tunellərə keçid təmin edən əlavə yanaşma yolları inşa olunacaq. Ərazinin ağır geoloji mühitə malik olması səbəbindən sahədə ən optimal qazma üsulu ilə inşaatın texniki təhlükəsizliyi təmin ediləcək.
Tikinti prosesi ərazidə avtobusların, Bakı Dəmiryol Vağzalının, eləcə də “28 May” metro stansiyasının fəaliyyətinə maneə yaratmayacaq. Bu müddət ərzində yeraltı və yerüstü nəqliyyatın hərəkəti ənənəvi qaydada davam etdiriləcək.
Xatırladaq ki, xətlərin ayrılması layihəsi üzrə nəzərdə tutulan işlərin mərhələli icrası paytaxtın nəqliyyat infrastrukturunun inkişafına, tıxacların azaldılmasına və ictimai nəqliyyatın səmərəli fəaliyyətinə təkan verəcək. Eyni zamanda, fərdi avtomobillərdən istifadənin azalmasına, şəhərin hərəkət dinamizminin artmasına və mobillik planlarının optimal tətbiqinə imkan yaradacaq.
Yaşıl və Qırmızı xətlərin müstəqil fəaliyyəti nəticəsində həm təhlükəsizlik, həm də hərəkət dayanıqlılığı əhəmiyyətli dərəcədə artırılacaq. “28 May” stansiyasına qədər sahələrdə (“Dərnəgül-28 May” və “İçərişəhər-28 May”) mövcud olan 4 dəqiqə və daha yuxarı intervallar mümkün ən minimum həddə çatdırılacaq.
14-08-2025, 18:20
Tramp Putinlə görüşə onları aparır
ABŞ prezidenti Donald Trampı Ankoricdə vitse-prezident C.D.Vens, dövlət katibi Marko Rubio, xüsusi elçi Stiv Uitkoff və maliyyə naziri Skott Bessent müşayiət edəcək.
Amerika və Rusiya prezidentləri avqustun 15-də Alyaskadakı Elmendorf-Riçardson hərbi bazasında görüşəcəklər. Danışıqlar yerli vaxtla saat 11:30-da başlayacaq.
Prezidentlərin əvvəlcə təkbətək görüşü (yalnız tərcüməçilər iştirak edəcək), daha sonra qalan nümayəndə heyətləri işgüzar səhər yeməyinə qoşulacaqlar.
Qeyd edək ki, Alyaska sammitində Rusiya nümayəndə heyətinə xarici işlər naziri Sergey Lavrov, prezidentin köməkçisi Yuri Uşakov, müdafiə naziri Andrey Belousov, maliyyə naziri Anton Siluanov və RDIF-in baş direktoru Kirill Dmitriyev daxildir.
14-08-2025, 17:55
İran Zəngəzur dəhlizinə xüsusi həssaslıqla yanaşır - Nazir
İranın xarici işlər naziri Abbas Arakçi deyib ki, İran qonşuları arasında sülh və sabitliyi dəstəkləsə də, regional geosiyasi sabitliyin və milli maraqlarının qorunmasına xüsusi diqqət yetirir.
Arakçi Araqçi cümə axşamı İnstagram səhifəsində yazıb: “Çərşənbə günü mən Ermənistan xarici işlər nazirinin müavinini və Rusiya Xarici İşlər Nazirliyinin Qafqaz üzrə xüsusi nümayəndəsini qəbul etdim. Biz Qafqaz regionunda baş verən siyasi proseslərə xüsusi diqqət yetirərək, beynəlxalq məsələləri müzakirə etdik”.
O, bir daha vurğulayıb ki, İran İslam Respublikası qonşuları arasında sülh və sabitliyin bərqərar olmasına dəstək verməklə yanaşı, regional geosiyasi sabitliyin və milli maraqlarının qorunmasına da xüsusi diqqət yetirir. Xarici işlər naziri əlavə edib ki, İran onun nəqliyyata çıxışını və ya ölkənin maraqlarını məhdudlaşdıra biləcək hər hansı plan və ya layihəyə xüsusi həssaslıqla yanaşır.
14-08-2025, 17:48
Üç ildə azad olunmuş ərazilərə 106 min sərnişin daşınıb
İşğaldan azad olunmuş ərazilərə ilk müntəzəm avtobus marşrutları 2022-ci il yanvarın 24-də istifadəyə verilib. Bu günədək ümumilikdə 6578 reyslə 106 minə yaxın sərnişin daşınıb.
Bu barədə Azərbaycan Yerüstü Nəqliyyat Agentliyindən (AYNA) məlumat verilib.
Bildirilib ki, hazırda müntəzəm avtobus reysləri ilə vətəndaşlarımız Bakıdan Şuşa, Laçın, Xankəndi, Ağdam və Xocalıya səfər edə bilərlər. Gəncə, Mingəçevir və Bərdədən də reyslər mövcuddur. Gəncədən Şuşa, Xankəndi və Xocalıya, Mingəçevirdən isə bu istiqamətlərlə yanaşı, Laçına da getmək mümkündür.
Qurumdan verilən məlumata görə, Bərdədən vətəndaşlar Xocalı və Xankəndiyə səfərlər reallaşdıra bilərlər.
“Müntəzəm avtobus reysləri ilə biletlər onlayn qaydada //biletim.az/ portalı üzərindən əldə edilir.
“Biletim.az” portalı və ya mobil tətbiqi üzərindən işğaldan azad edilmiş ərazilərə bilet əldə edərkən Azərbaycan vətəndaşlarına buraxılış üçün icazələr avtomatik qaydada təqdim olunur”,- AYNA-dan bildirilib.
14-08-2025, 17:31
Rusiyada yaşayan azərbaycanlıların nəzərinə! - Sentyabrın 1-dən yeni QAYDALAR
Rusiyada miqrasiya qaydalarında ciddi dəyişikliklər edilir. 2025-ci il sentyabrın 1-dən Moskva şəhəri və Moskva vilayətində miqrantlar üçün yeni qaydalar tətbiq ediləcək. Yeni qaydalar əcnəbilərin Rusiyaya girişi, qeydiyyatı, viza və yaşayış icazəsinin alınması, vətəndaşlığa qəbulu və imtahanlarla bağlıdır.
Sentyabrın 1-dən Rusiyaya vizasız daxil olmuş bütün xarici vətəndaşlar məcburi qeydiyyatdan keçəcəklər. Əcnəbilər Moskva "Miqrasiya Mərkəzində" qeydiyyatdan keçməli, proqram quraşdırmalı, biometrik məlumatlara çıxışı təmin etməli və Geolokasiya izlənməsinə icazə verməli olacaq (Qeydiyyat üçün 90 gün; ünvan dəyişdirildikdə: 3 iş günü müddətində Daxili İşlər Nazirliyinə məlumat verilir).
Miqrantlar pozuntulara görə, müəyyən məsuliyyətlər daşıyacaq. Belə ki, birinci pozuntu zamanı onlar nəzarət edilən şəxslərin reyestrinə daxil ediləcəklər, təkrar pozuntu halı baş verdikdə isə deport olunacaqlar.
Digər yandan Rusiyanın bir neçə bölgəsində bir patent altında işləmək imkanı təqdim olunur. Sentyabr ayından Rusiyaya hər hansı keçid məntəqəsindən vizasız daxil olmaq üçün əcnəbilər ruID mobil tətbiqi vasitəsilə özləri və səfərlərinin məqsədi haqqında məlumatı əks etdirən ərizə təqdim etməli olacaqlar. Tətbiqdən istifadə edənlər giriş məhdudiyyətlərini yoxlaya və digər xidmətləri ala biləcəklər.
Qeyd edək ki, 1 sentyabr 2025-ci il tarixindən etibarən Moskva və Moskva vilayətində xarici vətəndaşlar olduqları yer üzrə deyil, səlahiyyətli təşkilatın ünvanında qeydiyyata alınacaqlar.
Xarici uşaqların məktəblərə qəbulu qaydalarında da müəyyən dəyişikliklər sentyabrın 1-dən qüvvəyə minəcək.
Belə ki, əcnəbi uşaqlar rus dili biliyi üzrə şifahi və yazılı testlərdən keçəcəklər (birinci sinif şagirdləri yalnız şifahi hissədən keçəcək). Məktəbə qəbul olmaq üçün uşaqlar ən azı 3 bal toplamalıdır. İkinci cəhd 3 ay ərzində mümkündür.
Rusiyada işləmək və yaşamaq istəyən əcnəbilərin keçməli olduqları xarici dil, tarix və Rusiya qanunvericiliyinin əsasları kimi rus dilindən imtahanlar üzrə tapşırıqların yerinə yetirilməsi üçün də tələblər dəyişib.
Moskva Azərbaycanlıları Milli-Mədəni Muxtariyyətinin sədri Bəxtiyar Həsənov bildirib ki, miqrantların sayının kəskin artması və ölkəyə giriş, qeydiyyatın pozulması, bəzi miqrantlar tərəfindən pozuntuların artması və köhnəlmiş qanunvericilik nəticəsində hökumət son vaxtlar Rusiya Federasiyasında miqrasiya problemlərini sadələşdirmək və həll etmək üçün yeni qanunlar və qaydalar tətbiq edir.
O qeyd edib ki, Rusiyada, xüsusən də paytaxtda yaşayan azərbaycanlılar üzərlərində təzyiq hiss etmirlər:
"Rusiyada yaşayan, xüsusən də paytaxtda yaşayan azərbaycanlılar olaraq üzərimizdə heç bir təzyiq hiss etmirik. Həyat öz axarı ilə davam edir. Rusiya dövləti digər dövlətlər kimi hər il öz miqrasiya qanunlarını təkmilləşdirir. Mən buna sərtləşmə yox, təkmilləşmə deyərdim. Qanuna tabe olan vətəndaşlar sənədlərini vaxtlı-vaxtında qaydasına salırlar və öz əmək, yaxud digər fəaliyyətləri ilə sakit şəkildə məşğul olurlar. Həmçinin biz böyük satış mərkəzlərində, bazarlarda mütəmadi olaraq həm yerlilərimizlə əlaqədə oluruq və onlara konsltativ yardımlar göstəririk. Bu barədə bizə heç bir şikayət daxil olmayıb".
B.Həsənov vurğulayıb ki, yalnız 1-ci sinfə qəbul məsələsində müəyyən problemlər yaşanır: "Bizim Moskva Şəhəri Təhsil Departmenti ilə sıx əlaqələrimiz var. Bu istiqamətdə biz imkan daxilində vaxtaşırı olaraq həmyerlilərimizə yardımlar göstəririk".
14-08-2025, 16:50
Bu universitetdə təhsil haqqı iki min manat artırılıb - Rəsmi AÇIQLAMA
2025–2026-cı tədris ili üçün Azərbaycan Tibb Universitetində “Tibb” ixtisasının illik təhsil haqqı 2000 manat artırılıb.
Ötən il bu ixtisas üzrə ödəniş 4500 manat olduğu halda, bu il məbləğ 6500 manata yüksəlib.
Həmçinin Stomatologiya ixtisasının da məbləği eyni miqdarda artıb.
Tibb Universitetindən Teleqraf-a bildirilib ki, Nazirlər Kabinetinin qərarına əsasən ölkəmizdə ali təhsil müəssisələrində təhsil xərcləri artırılıb. Bütün universitetlərdə olduğu kimi Azərbaycan Tibb Universitetində də təhsil haqqı ixtisaslara müvafiq olaraq artıb.
Qeyd olunub ki, "Tibb" ixtisası üzrə 6500 AZN, "Stomatologiya" 6000 AZN, "Əczaçılıq", "Fizioterapiya", "İctimai səhiyyə" və "Tibb bacısı" ixtisasları üzrə isə təhsil haqqı 5000 AZN olaraq dəyişdirilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!