8-08-2025, 15:38
Həbsxanaya kartofun içərisində telefon keçirmək istədi
Ədliyyə Nazirliyinin Penitensiar xidmətinin əməliyyat aparatının əməliyyat-axtarış tədbirləri nəticəsində Bakı istintaq təcridxanasına mobil telefon keçirilməsinin qarşısı alınıb.
Bu barədə Penitensiar Xidmətdən məlumat verilib.
Bildirilib ki, həbs olunmuş şəxs Ramil Mərdan oğlu Talıblıya qohumu tərəfindən gətirilmiş sovqata baxış keçirilən zaman 2 ədəd kartofun içərisində xüsusi üsulla gizlədilmiş 1 ədəd mobil telefon aparatı və 1 ədəd elektrik qidalandırıcısı aşkar olunub.
Faktla bağlı araşdırma aparılır.
Cəzaçəkmə müəssisələrində və ya istintaq təcridxanalarında saxlanılan şəxslərə qadağan olunmuş əşyaların verilməsi və ya ötürülməsinin cinayət məsuliyyətinə səbəb olduğu bir daha vətəndaşların diqqətinə çatdırılır.
8-08-2025, 15:18
Putin Çin lideri ilə danışıqlar apardı
Rusiya Prezidenti Vladimir Putin və Çin Xalq Respublikasının Sədri Si Cinpin arasında telefon danışığı olub.
Bu barədə Çin mediası məlumat yayıb.
Telefon danışığının təfərrüatı hələlik məlum deyil.
8-08-2025, 15:03
Azərbaycan Zəngəzura fərqli formada qayıdışı təmin edir
"...Və yağış yağdı, sel oldu, şiddətli külək əsdi, evin üstünə gəldi. Ev uçub darmadağın oldu".
İsa Məsih. İncil. Matta:7:1-29
Gözlər Vaşinqtonda, diqqət Cənubi Qafqazda, zəfər qapısı isə Azərbaycandadır. Cəmi bir neçə saat sonra Çar Rusiyası süquta uğradığı tarixdən bəri ilk dəfə olaraq Ermənistan Azərbaycana qarşı ərazi iddialarından imtina etməsini rəsmiləşdirən sülh sazişini ilkin formada təsdiq edəcək. Bu, siyasi miqyas və əhəmiyyət etibarilə misilsiz hadisədir.
Bir neçə on il ərzində Azərbaycanı torpaqlarının işğalı faktı ilə dolayısı ilə ağır güzəştlərə çağıran "ümumi dövlət", "Aland modeli", "paket həll", "mərhələli həll" və s. kimi təkliflərin həmmüəlliflərindən olan ABŞ bu gün rəsmi İrəvanın 10 noyabr 2020-ci ildəki kapitulyasıyasının məntiqi davamına ev sahibliyi etməyi şərəf sayır.
Bütün hallarda Ermənistanın regionda oynadığı 30 illik radikal dərəcəli destruktiv mövqeyinə son qoyan, Türküstan coğrafiyası ilə Xəzərin qərbindəki türk arealını quru yolla birləşdirən güc Azərbaycan dövlətidir. Zaman keçdikcə ikinci Qarabağ savaşında Ali Baş Komandan İlham Əliyevin rəhbərliyi ilə qazandığımız böyük qələbənin əhəmiyyəti daha çox hiss olunmaqdadır.
Bəli, ermənilər hər şeyin bitdiyini düşünərkən və bizi Bakını belə işğal edəcəkləri ilə təhdid edərkən "şiddətli külək əsdi, evin üstünə gəldi, ev uçub darmadağın oldu".
44 günlük müharibə və 2023-cü ildəki sonuncu antiterror əməliyyatları nəticəsində Azərbaycan XX əsrin sonlarında itirdiyi torpaqlara nəzarəti bərpa etdi, minlərlə mülki vətəndaşını, əsgər və zabitini qətlə yetirən düşməndən qisasını aldı. İndi isə Azərbaycan diplomatiyası zəfərin yaratdığı yeni siyasi reallığı masada da uğurla davam etdirərək XX əsrin əvvəlində itirdiyi Zəngəzura fərqli formada qayıdışı təmin edir. Yolumuzu açıq edən şəhidlərimizin ruhu şad, Prezident İlham Əliyevin canı sağ, ömrü uzun olsun!
D.Trampın iştirakı ilə imzalanması gözlənilən sənədlər:
- Birgə Bəyanatın imzalanması;
- Sülh sazişinin paraflanması;
- ATƏT-in Minsk qrupundan çıxışla bağlı birgə məktubun imzalanması;
- ABŞ-Azərbaycan və ABŞ-Ermənistan arasında ikitərəfli memorandumların imzalanması.
8-08-2025, 14:55
Bakıda yeni velosiped zolağı
Bakı şəhərində kəsintisiz mikromobillik zolağının təşkili üçün mərhələli qaydada velosiped yolları əlaqələndirilir.
Bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) xəbər verir.
Bildirilir ki, hazırda bu istiqamətdə işlər metronun “Elmlər Akademiyası” stansiyası ətrafında və əlaqəli küçə-prospektlərdə aparılır.
Belə ki, daha öncə Hüseyn Cavid prospektində təşkil edilən və Məmməd Rahim, Bəxtiyar Vahabzadə küçələri, eləcə də Mətbuat prospekti ilə əlaqələndirilən mikromobillik şəbəkəsi Bəxtiyar Vahabzadə küçəsi ilə kəsişmədən Əbdürrəhim bəy Haqverdiyev küçəsinə qədər uzadılıb.
Görülən işlər çərçivəsində müvafiq nişanlanma işləri aparılıb. Yaxın günlərdə yol nişanlarının və təhlükəsizlik sədlərinin quraşdırılmasına başlanılacaq.
8-08-2025, 14:17
Zəngəzur dəhlizi artıq qlobal xarakterli məsələdir
“Zəngəzur dəhlizinin açılması post-münaqişə dövründə Ermənistan-Azərbaycan dövlətlərarası normallaşma gündəliyinin vacib tərkib hissəsidir”.
Bunu Milli Məclisin deputatı Rizvan Nəbiyev deyib.
O bildirib ki, hələ torpaqlarımız işğal altında olduğu dövrdə belə, BMT Təhlükəsizlik Şurasının qətnamələri, xüsusilə 874 saylı Qətnamə regionda blokadanın aradan qaldırılmasını, dövlətlərarası və kommunikasiya əlaqələrinin bərpasını tələb edirdi:
“Azərbaycanın ərazi bütövlüyü və suverenliyi bərpa edildikdən sonra isə Zəngəzur dəhlizinin açılması prosesi daha da aktuallaşdı və bu məsələ uzunmüddətli sülh və sabitliyin təmin olunması baxımından mühüm əhəmiyyət kəsb etməyə başladı.
Bu mənada, Zəngəzur dəhlizinin ikitərəfli - Ermənistan-Azərbaycan çərçivəsində və ya ABŞ kimi beynəlxalq aktorların vasitəçiliyi ilə keçirilən görüşlərdə müzakirə olunması və bu istiqamətdə konkret addımların atılması tamamilə təbii və zəruri bir prosesdir. Çünki sülh müqaviləsinin imzalanması hələ regionda de-fakto sülhün real və davamlı sülhə çevrildiyi anlamına gəlmir. Bu bir prosesdir və bu prosesin davamlı və etibarlı olması üçün qarşılıqlı etimad tədbirləri həyata keçirilməlidir”.
Millət vəkili qeyd edib ki, etimad tədbirlərinə iqtisadi, tranzit və logistika layihələri də daxildir:
“Belə layihələr təkcə iqtisadi fayda verməklə kifayətlənmir, həm də tərəflər arasında qarşılıqlı inamın formalaşmasına ciddi töhfə verə bilər.
Bununla yanaşı, Zəngəzur dəhlizi artıq Ermənistan-Azərbaycan sülh gündəliyini aşaraq regional, hətta qlobal xarakterli məsələ səviyyəsinə yüksəlib. Bu dəhlizin istifadəyə verilməsi ilə yalnız Azərbaycanın qərb rayonlarının Naxçıvanla maneəsiz və təhlükəsiz şəkildə birləşməsi deyil, eyni zamanda Azərbaycanın Türkiyə və oradan Avropaya alternativ çıxış imkanları da gündəmə gəlir. Bu isə bir sıra regional və qlobal aktorlar üçün strateji əhəmiyyət daşıyır və bu da öz növbəsində dəhlizin açılmasını şərtləndirən əsas amillərdən hesab olunub”.
O eyni zamanda əlavə edib ki, hazırda regionda formalaşmış yeni siyasi reallıqlar Zəngəzur dəhlizinin açılmasını zəruri edən əsas faktorlardandır.
“Bu reallıq göstərir ki, dəhliz təkcə region ölkələrinin deyil, eyni zamanda daha geniş coğrafiyada yerləşən dövlətlərin əməkdaşlığı üçün strateji əhəmiyyətə malik uzunmüddətli bir platforma rolunu oynayacaq.
Zəngəzur dəhlizinin daha bir əhəmiyyətli tərəfi isə Prezident İlham Əliyevin III Şuşa Qlobal Media Forumunda vurğuladığı kimi, onun yalnız Şərq-Qərb nəqliyyat dəhlizinin vacib bir seqmenti deyil, eyni zamanda Şimal-Cənub dəhlizinin şaxələndirilmiş qolu kimi çıxış etməsidir. Gələcəkdə bu dəhliz vasitəsilə İran üzərindən Fars körfəzinə, Türkiyə vasitəsilə isə Aralıq dənizinə çıxış imkanları formalaşacaq. Bu, təkcə Azərbaycan üçün deyil, eyni zamanda Mərkəzi Asiya ölkələrinin də dünya bazarlarına alternativ çıxışına şərait yaradacaq”.
R.Nəbiyev həmçinin vurğulayıb ki, dəhlizin təhlükəsizliyinə gəlincə, Prezident İlham Əliyevin də qeyd etdiyi kimi, bu məsələ Azərbaycan Respublikasının suveren hüquqları çərçivəsində aidiyyəti dövlət qurumları tərəfindən təmin ediləcək. Azərbaycanın əsas və haqlı tələbi isə ondan ibarətdir ki, Azərbaycanın qərb rayonlarından Naxçıvana maneəsiz və təhlükəsiz şəkildə gediş-gəliş təmin edilsin.
8-08-2025, 14:11
"Sərxoş olub, narkotik maddələr qəbul edib bizə işgəncə verirdilər" - Azərbaycanlı əsir
Avqustun 8-də Bakı Hərbi Məhkəməsində məhkəmə prosesində ifadə verən zərərçəkmiş şəxs İdris Mirzəyev 1994-cü ilin aprel ayında Tərtər rayonunda Ermənistan silahlı qüvvələri tərəfindən əsir götürüldüyünü bildirib.
İdris Mirzəyev əsirlik zamanı Şuşa həbsxanasında, Ağdərədə, Xankəndidə saxlanıldığını deyib. Azərbaycanın həmin vaxt Ermənistan silahlı qüvvələrinin işğalı altında olan Ağbulaq kəndində (Xocavənd rayonu – red.) donuz və toyuq fermaları tikintisi işlərinə məcburi şəkildə cəlb olunub. Əsirlik zamanı döyülüb, işgəncələrə məruz qalıb, cümlədən başında butulka sındırılıb. Aldığı xəsarətlər nəticəsində onurğa sütunu zədələnib, bu səbəbdən axsayır. “Sərxoş olub, narkotik maddələr qəbul edib bizə işgəncə verirdilər”, - deyə o bildirib.
Həbib Əliyev 1992-ci ildə Laçında həqiqi hərbi xidmətdə olarkən, döyüşlər zamanı yaralanması nəticəsində əsir götürüldüyünü söyləyib. Yaralı vəziyyətdə döyülüb, işgəncələrə məruz qalıb. Əsir əsgər yoldaşı gözləri qarşısında yandırılıb. Həbib Əliyev Əsirliyinin 1 il 8 ayını zirzəmidə saxlanılıb. 1995-ci il mayın 8-də əsirlikdən azad olunub.
Qeyd edək ki, Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir.
8-08-2025, 13:50
Putin Mirziyoyevlə Tokayevə zəng etdi
Rusiya prezidenti Vladimir Putin Özbəkistan prezidenti Şavkat Mirziyoyev ilə telefon danışığı aparıb.
Bu barədə Kreml məlumat yayıb.
"Liderlər Rusiya-Özbəkistan əməkdaşlığı mövzusunu, ilk növbədə, ticarət-iqtisadi, enerji və mədəni-humanitar sahələrdə də müzakirə ediblər", - məlumatda qeyd olunub.
Putin, həmçinin Qazaxıstan prezidenti Kasım-Jomart Tokayevə də zəng edib. Rusiya lideri ona Ukrayna ilə münaqişənin həlli üzrə ABŞ ilə dialoqun gedişi, o cümlədən ABŞ prezidentinin xüsusi nümayəndəsi Stiven Uitkoff ilə görüşünün nəticələri barədə məlumat verib.
8-08-2025, 13:45
Xankəndidə diaspor gəncləri idmançılarla görüşdü - FOTO
Xankəndidə keçirilən Diaspor Gənclərinin VI Yay Düşərgəsində növbəti görüş təşkil olunub. Bu dəfə düşərgə iştirakçıları Azərbaycanın tanınmış idmançıları və idman jurnalistləri ilə bir araya gəliblər.
Diasporla İş üzrə Dövlət Komitəsindən bildirilib ki, tanınmış idman jurnalistləri Gündüz Abbaszadə və İlkin Xəlilovun moderatorluğu ilə keçirilən görüşdə paraatlet Lamiyə Vəliyeva, güləşçilər Rafiq Hüseynov və Mariya Stadnik iştirak ediblər.
İdmançılar görüş zamanı şəxsi təcrübələrini bölüşüb, gənclərin suallarını cavablandırıblar. Onlar əldə etdikləri nailiyyətlərdən danışaraq, uğur qazanmaq üçün intizamlı çalışma və məqsədyönlü inkişafın vacibliyini vurğulayıblar. İdmançıların tövsiyələri düşərgə iştirakçıları tərəfindən maraqla qarşılanıb və panel müzakirələrlə davam edib.
Qeyd edək ki, avqustun 3-dən 9-dək Xankəndidə keçirilən Diaspor Gənclərinin VI Yay Düşərgəsi Diasporla İş üzrə Dövlət Komitəsi və Heydər Əliyev Fondunun birgə təşkilatçılığı ilə təşkil olunub. Düşərgədə 61 ölkədən 128 gənc iştirak edir. Əvvəlki düşərgələr Şəki, Şamaxı, Şuşa, Naxçıvan və Laçında təşkil olunub, indiyədək 60-dan çox ölkədən 700-dən artıq gənc bu layihəyə qatılıb.
8-08-2025, 13:29
Qarabağ Universitetində yenilik
“Qarabağ Universitetinin özünün mütləq Ailə Sağlamlıq Mərkəzi (ASM) olacaq və burada həm ilkin, həm də ikinci, üçüncü səviyyəli səhiyyə xidmətləri göstəriləcək”.
Bunu “Azərbaycan müəllimi”nə müsahibəsində klinikanın baş direktoru Samir Babayev deyib.
Onun sözlərinə görə, universitetin tələbələri ASM təcrübəsini, sadəcə klinikanın Ailə Sağlamlıq Mərkəzində deyil, Qarabağ regionundakı bütün ASM-lərdə keçəcəklər: “ASM təcrübəsi qazanmaq, ilkin səhiyyə xidmətinin parçası olmaq tələbələrimizin praktik imkanını artıracaq. Təbii ki, bizim fərqli bölümləri olan öz xəstəxanamız var, orada onlar kifayət qədər təcrübə qazanacaqlar. Amma ASM təcrübəsi, ilkin səhiyyə xidmətinin parçası olmaq tələbələrimizin praktik imkanını artıracaq.
Qarabağda – Bərdə, Ağdam, Laçın, Zəngilanda, Xankəndi və onun ətrafındakı ərazidə tibbi xidmət göstərən bütün ASM-ləri də tələbələrimizin təcrübə keçəcəyi yer kimi görürük. Bu yolla həm icmaya töhfə verəcəklər, həm də əla öyrənmək imkanlarından istifadə edəcəklər. Biz onları həmin mərkəzlərə tam hazırlıqlı göndərəcəyik. Simulyasiya mərkəzində öyrənəcək, öz xəstəxanamızda mütəxəssislərimizin nəzarəti altında öyrəndiklərini tətbiq etdikdən sonra ASM-lərdə işləyib orada həkimlərə kömək edəcəklər. Beləliklə, tələbələrimiz təcrübəsini ASM-lərdə icma ilə bərabər keçəcəklər. Bu, tələbələrimizin müstəqil həkim kimi yetişməsinə imkan yaradacaq. Onlar ASM-lərdə təcrübəli həkimin nəzarəti altında müstəqil işləyəcəklər”.
8-08-2025, 13:24
Putinlə Tramp harada görüşəcək?
Rusiya və ABŞ prezidentləri Vladimir Putin və Donald Tramp arasında danışıqlar ərəb ölkələrindən birində baş tuta bilər.
Bu barədə TASS məlumat yayıb.
Bundan əvvəlPutin amerikalı həmkarı ilə görüş üçün uyğun məkanlardan biri kimi BƏƏ-nin adını çəkib.
Rusiya prezidentinin köməkçisi Yuri Uşakovun sözlərinə görə, gələn həftə Vladimir Putinlə Donald Tramp arasında görüş gözlənilir. Yer artıq razılaşdırılıb, lakin sonra elan olunacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!