30-09-2022, 16:17
Yaşa görə əmək pensiyası yeni qaydada hesablanacaq
Qulluq stajına görə əmək pensiyasına əlavə almaq hüququ olan şəxsin yaşa görə əmək pensiyası yeni qaydada hesablanacaq. Bununla bağlı Milli Məclisin payız sessiyasının bu gün keçirilən ilk plenar iclasında “Əmək pensiyaları haqqında” qanuna təklif edilən dəyişikliklər müzakirəyə çıxarılıb. Dəyişikliyə əsasən, gözlənilən pensiya ödənişi müddəti müvafiq icra hakimiyyəti orqanı tərəfindən müəyyən edilir. Təklif olunan dəyişikliyə əsasən, qulluq stajına görə əmək pensiyasına əlavə almaq hüququ olan şəxsin yaşa görə əmək pensiyasının yenidən hesablanması zamanı sığorta və yığım hissələrinin hesablanmasında gözlənilən pensiya ödənişi müddəti aylarının sayı həmin şəxsin pensiyasının yenidən hesablanması tarixinə yaşı ilə “Əmək pensiyaları haqqında” qanunun 7-ci maddəsi ilə müəyyən edilmiş pensiya yaşı (bu yaşa çatdığı hallar istisna olmaqla) arasındakı ayların sayı qədər artırılacaq. Dəyişikliklər müzakirələrdən sonra səsə qoyularaq birinci oxunuşda qəbul edilib. Qeyd edək ki, qanun qəbul ediləcəyi təqdirdə 2023-cü il yanvarın 1-dən qüvvəyə minəcək.
30-09-2022, 16:15
Putin “ilhaq təklifi”ni Dumaya göndərdi
Prezident Vladimir Putin qondarma “Donetsk və Luqansk xalq respublikaları”nın, Zaporojye və Xerson vilayətlərinin Rusiya Federasiyasının tərkibinə daxil etmək üçün müvafiq təklifləri Dövlət Dumasına təqdim edib. Bu barədə Rusiya KİV-ləri məlumat yayıb. Sentyabrın 23-dən 27-dək qondarma “Donetsk və Luqansk xalq respublikaları”nda, həmçinin Xerson və Zaporojye vilayətlərində (Rkraynanın zəbt olunmuş torpaqları-red.) Rusiyaya birləşmək məsələsi üzrə referendum keçirilib. Guya bu bölgələrdə əhalinin 90%-dən çoxu Rusiyaya birləşmək üçün səs verib.
Rusiya prezidenti Vladimir Putin ötən həftə bəyan edib ki, Rusiya həmin vilayətlərin sakinlərinin qəbul edəcəyi qərarı dəstəkləyəcək.
30-09-2022, 16:13
Britaniyanın baş naziri Rusiyanı hədələdi
Böyük Britaniyanın baş naziri Liz Trass bildirib ki, London Rusiya Federasiyasına birləşməklə bağlı qondarma “LPR”, “DXR”, Zaporojye və Xerson vilayətlərində keçirilən referendumlar fonunda rəsmi Moskvaya qarşı yeni tədbirlər görəcək. Butov.az xəbər verir ki, xanım baş nazir bu barədə tvitter səhifəsində yazıb.“Biz tərəddüd etmədən növbəti tədbirləri, o cümlədən Rusiya prezidenti Vladimir Putinin hərbi maşınını iflic etmək üçün yeni sanksiyalar tətbiq edəcəyik”. Bundan əlavə, L.Trass qeyd edir ki, Böyük Britaniya heç vaxt “Donetsk və Luqansk xalq respublikaları”nı, eləcə də Xerson və Zaporojye vilayətlərini Rusiyanın bir hissəsi kimi tanımayacaq.
30-09-2022, 16:11
Bu vasitələr gömrük rüsumundan azad ediləcək
Milli Məclisin bu gün keçirilən iclasında “Gömrük tarifi haqqında” qanuna dəyişiklik edilib. Butov.az xəbər verir ki, dəyişikliklə təhsil fəaliyyəti ilə bağlı bir sıra vasitələr gömrük rüsumundan azad edilir. Layihədə təhsil fəaliyyəti ilə bağlı idxal edilən bir sıra avadanlıqların, cihazların, qurğuların və digər vasitələrin gömrük rüsumundan azad edilməsi nəzərdə tutulub. Gömrük rüsumlarından azad edilən avadanlığın, cihazların, qurğuların və təhsil fəaliyyəti ilə bağlı olan digər vasitələrin siyahısı müvafiq dövlət orqanı tərəfindən təsdiq ediləcək. Qanuna təklif olunan dəyişikliklər 2023-cü il yanvarın 1-də qüvvəyə minəcək və 2 il ərzində tətbiq olunacaq. Dəyişikliklər ümumi təhsil müəssisələrinin maddi-texniki bazasının gücləndirilməsinə, bu müəssisələrdə təhsil alanların daha keyfiyyətli praktiki biliklər əldə etməsinə, bütövlükdə təhsilin mühüm pilləsi olan ümumi təhsilin keyfiyyətinin yüksəlməsinə xidmət edir. Məsələ səsverməyə çıxarılaraq I oxunuşda qəbul olunub.
30-09-2022, 16:08
Gürcüstan sərhədini keçən rusların sayı açıqlanıb
29 sentyabr saat 10:00-dan 30 sentyabr saat 10:00-a qədər 6109 nəfər Rusiya vətəndaşı Gürcüstana daxil olub, 5186 nəfər isə tərk edib. Bu barədə Gürcüstan DİN məlumat yayıb. Qeyd olunub ki, Daryal sərhəd-keçid məntəqəsindən sərnişinlərin axını nəzərəçarpacaq dərəcədə azalıb və o cümlədən Gürcüstanın digər keçid məntəqələrində də Rusiya vətəndaşlarının gediş-gəliş sayı azalıb. Bununla belə, 28 sentyabrdan 29 sentyabra kimi Gürcüstan ərazisinə 9642 nəfər Rusiya vətəndaşı keçib, 5448 nəfər isə ölkə ərazisini tərk edib.
30-09-2022, 16:07
Rəhim Rəhimli sonuncu "şou"sunu göstərdi
Gecə saatlarında həyata gözlərini əbədi yuman tanınmış müğənni Rəhim Rəhimli son mənzilə yola salınıb. Butov.az xəbər verir ki, mərhumla vida mərasimində ailə üzvləri, sənət dostları, ictimaiyyət nümayəndələri iştirak ediblər. Daha sonra mərhumun cənazəsi dəfn olunmaq üçün Suraxanı rayonu, Bülbülə qəsəbəsinə aparılıb..Qeyd edək ki, Azərbaycan şou-biznesinin tanınmış siması, müğənni, bəstəkar Rəhim Rəhimli ürək tutmasından vəfat edib.
30-09-2022, 16:05
Belaruslu nazir Nensi Pelosinin səfərinə etiraz etdi - Ermənistanı qəzəbləndirdi
Belarusun xarici işlər naziri Vladimir Makeyin ABŞ Konqresi Nümayəndələr Palatasının spikeri Nensi Pelosinin İrəvana səfərinə etirazı Ermənstanda narazılıq doğurub. Butov.az xəbər verir ki, Belarusun İrəvandakı səfiri Ermənistanın Xarici İşlər Nazirliyinə çağırılıb. Bu barədə Ermənistan Xarici İşlər Nazirliyi məlumat yayıb. Daha əvvəl Vladimir Makey ABŞ Nümayəndələr Palatasının spikeri Nensi Pelosinin Ermənistana səfərinin mövcud münaqişələri daha da gərginləşdirdiyini bildirib.
Bununla əlaqədar Belarusun Ermənistanda səfiri Aleksandr Konyuku Xarici İşlər Nazirliyinə dəvət esən rəsmi İrəvan nazirin yuxarıda qeyd olunan bəyanatı ilə bağlı erməni tərəfinin narahatlığı və şərhlərini ona çatdırıb. Xatırladaq ki, Nensi Pelosi sentyabrın 17-dən 19-dək Ermənistanda olub.
30-09-2022, 16:02
Apteklərdə yod qıtlığının səbəbi açıqlandı
Son günlər Azərbaycan ərazisində apteklərdə yodun çatışmazlığı barədə media və sosial şəbəkələrdə xəbərlər yayılır. Vətəndaşlar bir aya yaxındır ki, bu dərmanı əldə etməkdə çətinlik çəkdiklərini bildirirlər. Analitik Ekspertiza Mərkəzi (AEM) dərman vasitələrinin niyə yoxa çıxmasına aydınlıq gətirib. Mərkəzin İdxal-İxrac şöbəsindən bildirilib ki, son dəfə ölkəyə yod gətirilməsi üçün müraciət bu ilin aprel ayında edilib:“O vaxtdan yod idxalı ilə bağlı yeni müraciət olmayıb. Hazırda yeni idxal müraciəti qəbul edilib və bu da onu deməyə əsas verir ki, yaxın zamanlarda apteklərdə yod çatışmazlığı aradan qaldırılacaq. Qeyd edək ki, AEM-də olan məlumata görə, əsasən Rusiya (Yaroslavl farm fabrik), Ukrayna (Fitofarm) və Türkmənistanda (Sağlık Ezcaciliq Muessesi) istehsal edilən yod məhlulu Azərbaycan Respublikasında qeydiyyatdan keçib. Xatırladaq ki, nə Səhiyyə Nazirliyi və onun qurumları, həmçinin Analitik Ekspertiza Mərkəzi dərman təminatı ilə məşğul deyil. Bu fəaliyyət özəl şirkətlər tərəfindən həyata keçirilir”.
30-09-2022, 16:00
Ukraynanın bu əraziləri Rusiyanın xəritəsinə daxil ediləcək - Peskov
“Donets və Luqansk xalq respublikaları”, Xerson və Zaporojye vilayətləri Rusiya Federasiyasının suveren ərazisinə çevriləcək. Bunu Rusiya prezidentinin mətbuat katibi Dmitri Peskov jurnalistlərə bildirib."Əlbəttə, onlar Rusiya Federasiyasının ayrılmaz hissəsi və suveren ərazisinə çevriləcəklər", - Peskov jurnalistlərin sualına cavab olaraq deyib."Müraciət olacaq, Rusiya Federasiyası Prezidentinin çıxışı - bir daha deyirəm, həcmli çıxış - sonra sənədlərin imzalanması mərasimi olacaq. İmzalanma mərasimində “DXR” rəhbəri Denis Puşilin, “LPR” rəhbəri Leonid Paseçnik, Zaporojye vilayətinin başçısı Yevgeni Balitski, Xerson vilayətinin başçısı Vladimir Saldo iştirak edəcək. Yeni subyektlərin Rusiya Federasiyasına qəbulu ilə bağlı dörd saziş imzalanacaq”, - deyə Peskov bildirib. Onun sözlərinə görə, iki prezidentin bu yaxınlarda Soçidə baş tutan danışıqlarının gündəmində referendumlar mövzusu olub. Bazar ertəsi Rusiya Federasiyası və Belarus liderləri Soçidə danışıqlar aparıb, Qərbin sanksiyaları və onlara qarşı müqavimət mövzusuna toxunublar.
30-09-2022, 15:58
Mədəsindən 63 qaşıq çıxdı
Hindistanın Şimalında yerləşən Müzəffərnəqar bölgəsində qeyri-adi hadisə baş verib. Butov.az-ın verdiyi məlumata görə, şiddətli mədə ağrısı ilə xəstəxanaya üz tutan şəxs tibb işçiləri tərəfindən dərhal tibbi müayinə olunub. Nə yemək yeyə, nədə ki su içə bilən 32 yaşlı xəstənin mədə ağrısının səbəbini müəyyən etmək üçün rentgen və tomoqrafiya edilib. İlkin olaraq həkimlər şişdən şübhələniblər. Lakin müayinə zamanı aydın olub ki, kişinin mədəsində yad maddə mövcuddur. İki saatdan çox keçən əməliyyatdan sonra həkim baş verənin 35 illik peşə həyatının ən nadir tibbi hadisələrindən biri olduğunu qeyd edərək bunları əlavə edib: “Əməliyyat zamanı xəstənin mədəsində materialı poladdan olan 63 ədəd qaşıq olduğunu aşkar etdik. O, qaşıqların baş hissələrini qıraraq, tutacaqlarını udub.”
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!