15-02-2023, 22:48
Ermənistanın Azərbaycanla sərhədinə alman polisləri gəlir
Ermənistanın Azərbaycanla sərhədinə göndəriləcək Avropa İttifaqı (Aİ) missiyasında Almaniyadan 15 polis əməkdaşı iştirak edəcək. Bu barədə Almaniya hökumətinin sözçüsü Şteffen Hebestreit bildirib. Silahsız hüquq-mühafizə orqanlarının əməkdaşları Ermənistan tərəfində sərhəddə patrul edəcək. "Federal Nazirlər Kabineti Almaniyanın Avropa İttifaqının Ermənistandakı yeni missiyasında (EUMA) Azərbaycanla beynəlxalq sərhəddə iştirak etməsi barədə qərar qəbul edib", - deyə o qeyd edib.
15-02-2023, 22:38
Ermənistan tərəfi sülhə maraqlı olmadığını bir daha sübut etdi - XİN
Xarici İşlər Nazirliyinin Mətbuat xidməti idarəsinin rəhbəri Ayxan Hacızadə fevralın 14-də Ermənistan Təhlükəsizlik Şurasının katibi Armen Qriqoryan “Armenpress” xəbər agentliyinə müsahibəsi zamanı Azərbaycanla sülh sazişi layihəsinə “Qarabağda yaşayan ermənilərin hüquq və təhlükəsizliyinin müzakirəsi məqsədilə beynəlxalq mexanizm yaradılması” barədə müddəanın daxil edildiyini vurğulamasına münasibət bildirib. Nazirliyin Mətbuat xidməti idarəsindən verilən məlumata görə, A.Hacızadə bununla bağlı qeyd edib: “Ermənistan tərəfinin sülh sazişi üzrə danışıqlar prosesinə maneçilik yaradan bu kimi manipulyasiyaları Ermənistanın bölgədə sülhdə maraqlı olmadığını bir daha nümayiş etdirir. Sülh sazişi üzrə danışıqlar prosesində Ermənistanın Azərbaycanın Qarabağ bölgəsində yaşayan erməni sakinlərin hüquq və təhlükəsizliyi üzrə beynəlxalq mexanizm yaradılması təşəbbüsü və bu barədə müddəanın Azərbaycan-Ermənistan arasında ikitərəfli sülh sazişi layihəsinə daxil edilməsi səyləri tamamilə əsassızdır və bu kimi cəhdlərin heç bir nəticəsi olmayacaq. Bu səylər, Ermənistanın beynəlxalq hüququn norma və prinsiplərinə, habelə ölkələrin qarşılıqlı şəkildə bir-birinin ərazi bütövlüyü və suverenliyini tanıdıqları Praqa və Soçi razılaşmalarına zidd olaraq, Azərbaycana qarşı ərazi iddialarından hələ də əl çəkmədiyini nümayiş etdirir. Bir daha xatırlatmaq istərdik ki, Qarabağ Azərbaycanın ayrılmaz tərkib hissəsidir və bu bölgədə yaşayan erməni əsilli əhalinin hüquqları və təhlükəsizliyi Azərbaycan Respublikası Konstitusiyasına uyğun olaraq təmin ediləcək. Ermənistanın Azərbaycanın daxili məsələsi olan erməni sakinlərin reinteqrasiya prosesinə müdaxilə etməsi qəbuledilməzdir”.
15-02-2023, 22:29
Türkiyənin Elazığ vilayətində fövqəladə vəziyyət elan edilib
Türkiyənin daha bir vilayətində fövqəladə vəziyyət elan edilib. Bu barədə hakim Ədalət və İnkişaf Partiyasının (AKP) sözçüsü Ömür Çelik özünün "Twitter" hesabında məlumat yayıb. AKP rəsmisi qeyd edib ki, Elazığ vilayətində zəlzələ ilə bağlı fövqəladə vəziyyət tətbiq olunub. Bununla da, Türkiyədə fövqəladə vəziyyət elan olunan vilayətlərin sayı 11-ə çatıb. Qeyd edək ki, bundan öncə Türkiyənin Qaziantep, Hatay, Kilis, Adıyaman, Diyarbakır, Adana, Osmaniye, Şanlıurfa və Malatya bölgəsində 3 aylıq fövqəladə vəziyyət tətbiq edilib.
15-02-2023, 22:26
Zəlzələ bölgəsinə ezam olunan xilasedicilərimiz xəsarət alıb
Türkiyəyə zəlzələ bölgəsinə ezam olunan azərbaycanlı xilasedicilərdən biri xəsarət alıb. Hadisə axtarış-xilasetmə əməliyyatı zamanı baş verib. Belə ki, azərbaycanlı xilasedicinin ayağı texnikanın ehtiyatsız idarə edilməsinə görə betona sıxışıb və nəticədə sınıb. Hazırda Kahramanmaraşda FHN-in səhra hospitalında müalicə olunan xilasedicinin durumunun yaxşı olduğu bildirilir. Onu da əlavə edək ki, “CNN Türk” kanalı səhra hospitalından süjet hazırlayıb. Süjetdə həmin xilasedicidən də bəhs edilir.
15-02-2023, 22:22
Avropa Parlamenti Saakaşviliylə bağlı qətnamə qəbul edib
Avropa Parlamenti Gürcüstanın keçmiş prezidenti Mixail Saakaşvili ilə bağlı qətnamə qəbul edib. AP eks-prezidentin səhhətinin pisləşməsindən narahatlığını ifadə edib. Qətnamədə Gürcüstan hakimiyyətinə çağırış edilib ki, Saakaşvilinin azadlığa buraxılaraq, xaricdə müalicə almasına şərait yaradılsın. Avropa Parlamenti, həmçinin Gürcüstan Prezidenti Salome Zurabişvilini konstitusion hüququndan istifadə edərək Saakaşvilini əfv etməyə çağırıb.
15-02-2023, 22:19
Avropadan Ukraynaya 226 milyon avroluq yardım
Böyük Britaniya və digər Avropa ölkələri Ukraynaya 226 milyon avro yardım göstərilməsi barədə razılığa gəliblər. Bu barədə Britaniya Müdafiə Nazirliyi məlumat yayıb. Bildirilir ki, yardım Ukrayna Beynəlxalq Fondu (IFU) vasitəsilə veriləcək. Yardım paketi Britaniya, Niderland, Norveç, İsveç və Danimarka tərəfindən razılaşdırılıb. Ümumi dəyəri 226 milyon avrodan çox olan yardıma artilleriya sursatları, dəniz kəşfiyyat sistemləri, müşahidə və kəşfiyyat avadanlıqları, o cümlədən Ukrayna tankları üçün nəzərdə tutulmuş avadanlıqların ehtiyat hissələri daxil olacaq.
15-02-2023, 22:16
Ermənistan və Türkiyə sərhədlərin açılması işində razılığa gəlib
Ermənistan və Türkiyə üçüncü ölkə vətəndaşları üçün sərhədlərin açılması işinə təkan vermək barədə razılığa gəliblər. Bunu Türkiyənin Ermənistanla münasibətlərin normallaşması üzrə xüsusi nümayəndəsi Serdar Kılıç deyib. Onun sözlərinə görə, Ermənistan və Türkiyənin sərhədində yerləşən Marqara körpüsünün tezliklə istismara verilməsi planlaşdırılır. “Ermənistan və Türkiyə sərhəddəki Marqara körpüsünün tez bir zamanda istismara verilməsi üçün mümkün olan hər şeyi edəcəklər. Tərəflərin son zamanlar atdığı addımlar münasibətlərin normallaşması prosesinə müsbət təsir göstərəcək”, - deyə Serdar Kılıç qeyd edib.
15-02-2023, 22:11
Reznikov Ukraynanın hücuma keçməsiylə bağlı danışdı
"Ukrayna bir neçə aydan sonra hücuma keçməyə hazır olacaq". Bunu Ukraynanın müdafiə naziri Oleksiy Reznikov deyib. "Texnologiya baxımından bütün ehtiyacları səsləndirmişəm. Onların Ukraynaya çatdırılması, ilk növbədə, təlim dövrü ilə bağlıdır. Bu, vaxt tələb edir. Söhbət bir neçə aydan gedir ki, bundan sonra biz tam hazır olacağıq”, - Reznikov bildirib. O, Ukrayna prezidenti Volodimir Zelenskinin qərarı ilə nazir olaraq qalacağını söyləyib. Reznikov yaxın aylarda müdafiə naziri postunda qalıb-qalmayacağı ilə bağlı sualı cavablandırıb: “Bəli, bu, mənim prezidentimin qərarı idi”. Qeyd edək ki, bundan əvvəl onun istefaya göndəriləcəyi ilə bağlı məlumatlar yayılmışdı.
15-02-2023, 21:53
Çinlə ticarət dövriyyəmizin ümumi həcmi artıb
Bu ilin yanvar ayında Azərbaycanın Çinlə ticarət dövriyyəsinin ümumi həcmi 44 570,98 min ABŞ dolları və ya 30,2 faiz artaraq 192 242,13 min dollar təşkil edib. Cari ilin ilk ayında Azərbaycandan Çinə 9 867,07 min dollar dəyərində məhsul ixrac edilib ki, bu da 2022-ci ilin eyni göstəricisini 3 301,93 min dollar və ya 50,3 faiz üstələyir. Çindən Azərbaycana idxal edilən məhsulların dəyəri isə 29,2 faiz və ya 41 269,05 min dollar artaraq 182 375,06 min dollara çatıb. Son bir ayda ölkənin ümumi ticarət dövriyyəsində Çin ilə ticarətin payı 5,84 faiz təşkil edib ki, bu da bir il əvvəlki eyni göstəricidən 2,2 faiz bəndi çoxdur.
15-02-2023, 16:47
Türkiyədə zəlzələdən sonra seçkilərin keçirilməsi müzakirə olunur
Türkiyədə baş verən dağıdıcı zəlzələdən sonra siyasi dairələrdə bu ilin iyun ayında keçirilməsi planlaşdırılan parlament və prezident seçkilərinin aqibəti müzakirə mövzusuna çevrilib. Türkiyə Böyük Millət Məclisinin (TBMM) keçmiş sədri Bülent Arınç seçkilərin təxirə salınmasını təklif edib. O, seçki tarixi ilə bağlı üç təklif irəli sürüb. Sabiq spikerin üstünlük verdiyi ilk təklif parlament və prezident seçkilərinin 2024-cü ildə keçiriləcək yerli seçkilərlə birləşdirilməsidir. Arınçın növbəti təklifi seçkilərin 2023-cü ilin noyabrına təxirə salınmasıdır. Üçüncüsü, o, seçkilərin bütün siyasi partiyaların razılaşdığı tarixdə keçirilməsini təklif edib. Zəlzələdən əvvəl Türkiyə Prezidenti Rəcəb Tayyib Ərdoğan seçkilərin mayın 14-ə çəkilməsini istədiyini söyləyib. Ancaq təklif barədə rəsmi qərar verilməyib. Zəlzələdən sonra seçkilərin təxirə salınması məsələsi gündəmə gətirilib. Lakik Türkiyə müxalifəti buna qarşı çıxıb. Cümhuriyyət Xalq Partiyasının (CHP) sədri Kemal Kılıçdaroğlu bu gün açıqlamasında bildirib ki, seçkiləri təxirə salmağa çalışırlar. "Mən xalqıma aydın və birmənalı şəkildə deyirəm ki, seçkilər vaxtında keçiriləcək. Seçki müharibədən başqa səbəbə görə təxirə salına bilməz. Buna da parlament qərar verir", - deyə CHP lideri qeyd edib. Sabiq baş nazir, Gələcək Partiyasının sədri Əhməd Davudoğlu da seçkilərin təxirə salmasını istəmir. O, bugünkü çıxışı zamanı deyib ki, belə bir acı gündə seçkilər barədə düşünmək olmaz, zamanı gələndə seçki keçiriləcək. O, hakimiyyəti seçkilərin təxirə salınmasını gündəmə gətirməkdə ittiham edib və buna qarşı olduğunu bəyan edib. Keçmiş maliyyət naziri Ali Babacanın rəhbərlik etdiyi DEVA partiyasının sözçüsü İdris Şahin də seçkilərin təxirə salınmasına münasibət bildirib. O deyib ki, seçkiləri təxirə salmaq mümkün deyil. Bir neçə gün əvvəl İYİ Partiya sədri Meral Akşener jurnalistlərə açıqlamasında bildirib ki, seçkini təxirə salmaq mümkün deyil. "Amma seçki mayın 14-də olmayacaq, vaxtında, iyunun 18-də keçirilməlidir", - deyə o qeyd edib. Hakim partiya isə susqunluğunu qoruyur. Ədalət və İnkişaf Partiyasının sözçüsü Ömər Çelik deyib ki, seçkilərlə bağlı nəsə danışmağı çox yanlış hesab edir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!