4-02-2023, 20:19
Üzü Zəngəzura, yolumuz açıq olsun!
Fevralın 4-də Qərbi Azərbaycan İcmasının inzibati binasında bir coşqu, bir sevinc abı-havası vardı. Bir qərinəlik yurd həsrəti hopmuş üzlərə bir ümidin işığında gülüş qonmuşdu. Erməni faşizminin zülmü altında uşaqlıq, gənclik çağlarından ata ocağını tərk etməyə məcbur olmuş qafanlılar öz icmalarının təsisini elan etmək və Qafan Rayon İcmasına sədr seçmək üçün bir araya gəlmişdilər.
Professor Eldar Abasov 24 dekabrda Prezident İlham Əliyevin Qərbi Azərbaycandan olan bir qrup ziyalı ilə görüşü zamanı verdiyi mesajlar və toplantının məramı barədə ümumi məlumat verdikdən sonra iclasa sədrliyi Zülfüqar Kazımova həvalə etdi.
Tədbirə qatılan Qərbi Azərbaycan İcmasının sədri, millət vəkili Əziz Ələkbərli İcmanın bugünə qədərki fəaliyyəti və qarşıda duran vəzifələr barədə danışdı. Yaxınlarda qəbul olunmuş “Qərbi Azərbaycana qayıdış konsepsiyası”ndan, Qərbi Azərbaycan İcmasının problemlərinin beynəlxalq təşkilatların gündəminə gəlməsindən söhbət açdı.
Fizika-riyaziyyat üzrə fəlsəfə doktoru Rauf Tağıyev təklif etdi ki, təkcə qafanlılar arasında deyil, ümumiyyətlə respublikamızda böyük nüfuz sahibi olan professor Eldar Abasov Qafan Rayon İcmasının sədri seçilsin. Təklif gurultulu alqışlandığından nə alternativə, nə də səsverməyə ehiyac qaldı.
Beləliklə çıxışçılara söz verildi. Hər kəs bir gün dogma yurda qayıdacağına inamla, bu məqsədə çatmaqdan ötrü icma üçün görəcəyi işlərdən danışdı, öz təkliflərini səsləndirdi. Estafeti gənc nəslə ötürmək, onları tarixi torpaqlarımıza, milli-mənəvi dəyərlərimizə sahibləndirmək üçün icmanın fəaliyyətinə qoşmağın zəruriliyi xüsusi vurğulandı.
Müsəlləm kəndinin təmsilçisi Əkrəm Mustafayev İcmanın fəaliyyətində, əlaqələrin, informasiya mübadiləsinin operativliyini təmin etmək üçün elektron ünvanının yaradılmasının vacibliyini bildirdi. Qeyd etdi ki, İcmanın gənclər təşkilatının formalaşmasını sürətləndirmək üçün də whatsApp-da gənclər qrupu yaradılsın.
Rəssam, AMİTA ictimai birliyinin təsisçisi Səməni Şahsuvar Qasımovanın Zəngəzur elinə aid butun maddi mənəvi dəyərlərimizi qorumaq məqsədilə, o torpaqların kimə məxsusluğunu butun dunyaya göstərmək üçün muzey yaratmaq təklifi də təqdir edildi.
Tamxil Ziyəddinoğlu İcmanın mətbu orqanı yaranıncaya qədər də, ondan sonra da “Bütöv Azərbaycan” qəzetinin səhifələrində, “Ordum.az” və “Butov.az” informasiya portallarında icmanın fəaliyyətinə informasiya dəstəyi verəcəyini bildirdi.
Professor Eldar Abasov ona edimad göstərib Qafan Rayon İcmasının sədri seçənlərə təşəkkür edərək bildirdi ki, ümumi işimizin, dövlətimizin, millətimizin gələcəyi naminə hamımız əl-ələ, çiyin-çiyinə verib çalışmalıyıq. Məkrli düşmənlərə yalnız güc birliyilə qalib gələcəyik. Necəki 44 günlük müharibədə qalib gəldik.
Üzü Zəngəzura, yolumuz açıq olsun!
Butov.az
Fotolar Ramin Abdullayevindir
4-02-2023, 19:44
Ərdoğan müxalifətə bəzi mesajlar ünvanladı
Prezident Rəcəb Tayyib Ərdoğan fevralın 4-də Türkiyənin Aydın bölgəsində keçirilən kütləvi açılış mərasimində çıxış edib. Ərdoğanın çıxışı bir sıra diqqət çəkən məqamlarla yadda qalıb. Prezident müxalifətə bəzi mesajlar ünvanlayıb. O, müxalifətin birləşdiyi “6-lı masa”nı nəzərdə tutaraq deyib ki, “hazırladıqları proqrama görə “Avropa bizə afərin söyləyəcək” deyə öyünənlər, iplərinin imperialist müstəmləkəçilərin əlində olduğunu etiraf edirlər”. “Millətə proqram kimi təqdim etdikləri mətndə yer alan vədlərin çoxu ya bizim tərəfimizdən son 20 ildə verilib, ya da artıq icra olunur”, - Ərdoğan deyib. O bildirib ki, “6-lı masa”nın ortaq siyasətçiləri ağalarından təşəkkür almaq üçün Türkiyəni qarışdırmaq və köhnə dövrlərə qaytarmaq istəyirlər. “Sizə meydan oxuyuram, 2023-cü il hədəflərinə mane ola bilməyəcəyiniz kimi, Türkiyənin ayağına da qandal vura və “Türk əsri”nin qurulmasının qarşısını ala bilməyəcəksiniz”. Ərdoğan müxalifəti Adnan Menderesin xatirəsini ləkələməyə çalışmaqda suçlayıb. O, əsas rəqibi olan Cümhuriyyət Xalq Partiyasının lideri Kamal Kılıçdaroğluna da söz atıb: “Mayın 14-ü bay Kamalın bay-bay Kamal olacağı gündür”.
4-02-2023, 19:40
Azərbaycanla Monteneqro arasında Saziş bağlandı
Azərbaycan Hökuməti ilə Monteneqro Hökuməti arasında hava əlaqəsi haqqında Saziş imzalanıb. Sazişi Azərbaycan tərəfindən rəqəmsal inkişaf və nəqliyyat naziri Rəşad Nəbiyev, Monteneqro tərəfindən hökumətin vitse-prezidenti, kapital investisiyalar naziri Ervin İbrahimoviç imzalayıb. Sənəd iki ölkə arasında hava əlaqələrinin yaradılması və yerinə yetirilməsi məqsədi daşıyır. Bu Saziş Azərbaycan və Monteneqro vətəndaşlarının qarşılıqlı səfərlərini asanlaşdıracaq və ölkələrimiz arasında turizm və mədəni əlaqələrin inkişafına öz müsbət təsirini göstərəcək.
4-02-2023, 19:01
Soydaşlarımızdan SEPAH komandirinə şikayət
İran İslam İnqilabı Keşikçiləri Korpusunun (SEPAH) komandanı, general-mayor Hüseyn Səlami bu gün səhər saatlarında zəlzələdən zərər çəkmiş sakinləri ziyarət etmək üçün Qərbi Azərbaycan vilayətinin Xoy şəhərinə gəlib. Hüseyn Səlami Xoyda dəymiş ziyanın miqdarı və SEPAH qüvvələrinin zəlzələdən zərər çəkmiş insanlara necə yardım göstərdiyi barədə məlumatlandırılıb. SEPAH komandiri zəlzələ qurbanları ilə üzbəüz görüşdə deyib ki, şərait tam sabitləşənə və insanların problemləri həll olunana qədər SEPAH yardım səylərini davam etdirəcək. Zəlzələ qurbanlarının SEPAH komandirindən kömək istədiyi bildirilir. Belə ki, bölgənin bir sıra sakinləri bəzi çatışmazlıqlardan şikayətlənərək, zəlzələdən zərər çəkmiş insanlara SEPAH-ın xüsusi diqqət yetirməsini tələb ediblər. “General-mayor Səlami xalqı sakitləşməyə çağırıb və əmr verib ki, SEPAH-ın bölgədəki qüvvələrinin komandirləri dərhal problemləri təqib etsinlər”, - deyə agentliyin xəbərində bildirilib. Yanvarın 28-də İranın Qərbi Azərbaycan vilayətinin Xoy şəhərində 5,9 bal gücündə zəlzələ baş verib. Zəlzələnin episentri 175 min əhalisi olan Xoy şəhərindən 23 kilometr cənub-şərqdə yerləşib. Güclü zəlzələ nəticəsində azı 3 nəfər ölüb, 900-dən çox insan yaralanıb. Qərbi Azərbaycan vilayətinin qubernatorunun sözlərinə görə, zəlzələ 70 kənddə binalara 20-50 faiz ziyan vurub. Zəlzələ nəticəsində şəhər və kənd yerlərində 12 minə yaxın yaşayış binasının dağıldığını deyən qubernator əlavə edib ki, indiyədək əhali arasında 25 mindən çox çadır paylanıb. Zəlzələ qurbanları olan azərbaycanlıların mətbuata söylədiklərinə görə, İran hökuməti onların problemlərinə ciddi diqqət yetirmir.
4-02-2023, 18:53
Makron Zelenskinin xahişi ilə Putinə zəng edib - Fransa XİN
Fransa prezidenti Emmanuel Makron adətən başqasının xahişi ilə Rusiya prezidenti Vladimir Putinə zəng edir. Bunu Fransa Xarici İşlər Nazirliyinin sözçüsü Ann-Kler Legendr RTVI kanalına müsahibəsində deyib. Onun sözlərinə görə, fransız siyasətçi Ukrayna prezidenti Vladimir Zelenskinin xahişi ilə Putinə zəng edib. Xüsusilə Zaporojye AES-dəki vəziyyətin müzakirəsindən sonra Makron Zelenskinin xahişilə Putinə zəng edib. Ann-Kler Legendr əlavə edib ki, məhz bu zənglər sayəsində MAQATE missiyası Zaporojye AES göndərilib.
4-02-2023, 18:49
Niderlanddakı diasporumuz Beynəlxalq Ədalət məhkəməsində
Niderlandın Haaqa şəhərində yerləşən Beynəlxalq Ədalət Məhkəməsində Azərbaycanın Ermənistana qarşı hüquqi təqib təşəbbüsləri üzrə ictimai dinləmələr keçirilib. Coan Donoqyunun hakimliyi ilə iki gün davam edən dinləmələr zamanı Niderland Krallığındakı Azərbaycan diaspor təşkilatlarının təmsilçiləri ölkəmizin haqlı mövqeyini dəstəkləmək üçün Haaqa Ədalət Sarayının qarşısına toplaşıblar. Diaspor fəalları “Harada yaşamağımızdan asılı olmayaraq, biz həmişə Azərbaycan dövlətinin yanındayıq!”, Biz çoxsaylı hərbi cinayətlərə görə məsuliyyət daşıyan Ermənistan silahlı qüvvələrinin qanun qarşısında məsuliyyətə cəlb olunmasını tələb edirik!”, “Erməni separatçılarının qeyri-qanuni fəaliyyətini dayandırın!”, “Azərbaycan ərazilərində törədilən ekoloji terroru dayandırın!”, “Ermənistanın ekoterroruna son qoyulsun!”, “Azərbaycanlı ekoloqlara yol verin!”, “Ermənistan, hücumları dayandır!”, “Ermənistan tərəfindən Azərbaycanın təbii sərvətlərinin talanmasına son qoyulsun!”, “Azərbaycanın təbii sərvətləri Azərbaycana məxsusdur!” şüarlarının əks olunduğu plakatları nümayiş etdiriblər. Diqqəti erməni təcavüzünə yönəldən diaspor fəalları hakimləri ədalətli olmağa dəvət edib, eyni zamanda Laçın-Xankəndi yolunda Azərbaycanın təbii sərvətlərinin erməni separatçıları və Ermənistan tərəfindən qeyri-qanuni istismar olunmasına etiraz məqsədilə fasiləsiz dinc aksiya keçirən azərbaycanlı ekofəallarla həmrəy olduqlarını göstəriblər. Dinlmələrdən sonra məhkəmədə Azərbaycanı təmsil edən nümayəndə heyətinin rəhbəri diaspor fəallarımızla görüşüb və onlara təşəkkürünü bildirib.
4-02-2023, 18:23
Azərbaycan icmasından Avstraliya ictimaiyyətinə çağırış
Azərbaycan icması Avstraliya ictimaiyyətini Rusiya sülhməramlılarının müvəqqəti nəzarəti altındakı Azərbaycan ərazilərində qanunsuz fəaliyyət göstərən erməni separatçılarının yalanlarına inanmamağa çağırıb. Avstraliya Azərbaycan Assosiasiyasının, Azərbaycan-Avstraliya-Türkiyə Dostluq Assosiasiyasının, Avstraliya-Azərbaycan Mədəniyyət Assosiasiyası və Kvinslend Azərbaycanlıları Cəmiyyətinin yaydıqları müraciətdə bildirilib ki, təcavüzkar imicə malik olan Ermənistan və erməni separatçıları bütün dünyanı aldatmaq məqsədilə istənilən fürsətdən həyasızcasına istifadə etməyə çalışır, hətta idman yarışı zamanı siyasi çağırışlar etməkdən çəkinmir. “Australian Open–2023” tennis yarışı zamanı Karen Kaçanovun çəkiliş kamerasının ekranına erməni separatçılarını möhkəm olmağa səsləyən yazı yazması bunun bariz nümunəsidir. “Bu, yolverilməzdir!”, - deyə müraciətdə vurğulanıb. Müraciətdə ermənilərin Azərbaycan torpaqlarında məskunlaşması tarixi, Azərbaycan ərazisində “Artsax” adlanan “dövlət”in mövcud olmadığı, erməni separatçılarının qondarma rejiminin beynəlxalq səviyyədə tanınmadığı, Ermənistanın Azərbaycana qarşı işğalçı siyasəti barədə ətraflı məlumat verilib. Beynəlxalq hüquq normalarına məhəl qoymayan və havadarlarına arxalanan Ermənistanın saysız-hesabsız təxribatlarının 2020-ci ilin payızında İkinci Qarabağ müharibəsinin başlanması ilə nəticələndiyi, Azərbaycan dövlətinin təkbaşına BMT qətnamələrini icra edərək öz əzəli torpaqlarını erməni işğalından azad etdiyi nəzərə çatdırılıb. “Lakin Azərbaycan torpaqları işğaldan azad olunduqdan sonra da Ermənistan yenə işğal dövründəki siyasətini davam etdirir. Rusiya sülhməramlılarının müvəqqəti nəzarəti altındakı Azərbaycan ərazilərində ekoloji terror törədir, təbiətə böyük ziyan vurur. İşğal dövründə basdırılmış minaların xəritəsini verməyərək, Azərbaycanın dinc əhalisinə qarşı mina terroru həyata keçirir. Beləki, müharibə bitdikdən sonra 45 nəfər dinc azərbaycanlı həmin ərazilərdə həlak olub, 231 nəfər isə müxtəlif dərəcəli xəsarətlər alıb”. Ötən həftə baş vermiş bu hadisəyə dərhal reaksiya verən soydaşlarımız Avstraliya ictimaiyyətini Azərbaycanın haqlı mövqeyini dəstəkləməyə və Ermənistanın əməllərini pisləməyə dəvət ediblər. Qeyd edək ki, Avstraliyanın müxtəlif şəhərlərində yaşayan diaspor fəalları da fərdi olaraq “Australian Open–2023”nın rəsmi internet səhifəsinə, Avstraliyanın Tennis Federasiyasına və nüfuzlu telekanallara çoxsaylı məktublar ünvanlayaraq, bu yolverilməz olaya sərt etirazlarını bildiriblər.
4-02-2023, 16:43
İlham Əliyev türk hökumətləriylə bağlanmış sazişi təsdiqlədi
Prezident İlham Əliyev Azərbaycan, Türkiyə və Türkmənistan hökumətləri arasındakı sazişin təsdiq edilməsi barədə Fərman imzalayıb. Fərmanla 2022-ci il avqustun 14-də Türkmənbaşı şəhərində imzalanmış “Azərbaycan Respublikası Hökuməti, Türkiyə Respublikası Hökuməti və Türkmənistan Hökuməti arasında ticarət və iqtisadi əməkdaşlıq haqqında Saziş” təsdiq edilib. Bu Fərmanla Saziş qüvvəyə mindikdən sonra Azərbaycan Respublikasının İqtisadiyyat Nazirliyi onun müddəalarının həyata keçirilməsini təmin edəcək. Azərbaycan Respublikasının Xarici İşlər Nazirliyi Sazişin qüvvəyə minməsi üçün zəruri olan dövlətdaxili prosedurların yerinə yetirildiyi barədə Türkiyə Respublikası Hökumətinə və Türkmənistan Hökumətinə bildiriş göndərəcək.
4-02-2023, 16:38
Gürcüstandan Ukraynaya kəskin cavab
Gürcüstanın hakim partiyasının (“Gürcü arzusu”) sədri İrakli Kobaxidze Ukrayna tərəfinin eks-prezident Mixail Saakaşvilini tələb edən son bəyanatlarına kəskin cavab verib. “Gürcü arzusu”nun lideri deyib: “Ukrayna hakimiyyətinin nümayəndələri nə isə danışmazdan əvvəl keçmiş günahlarından tövbə etməli, indiki cinayətlərini islah etməli və yalnız bundan sonra başqa işlərə keçməlidirlər”. İrakli Kobaxidze izah edib ki, Ukraynada vaxtilə “cinayətkar Saakaşvili və digərləri” üçün yaşamaq və işləmək imkanı yaradılıb. “Ukrayna və gürcü xalqları arasında tarixi dostluq münasibətlərimizə baxmayaraq, təəssüf ki, Ukrayna hakimiyyəti cinayətkar Saakaşvilini illərdir öz ölkəsində saxlayıb və hələ də orada onlarla tanınmış cinayətkar var. Onların arasında işgəncə və bu kimi cinayətlərdə iştirak edən şəxslər də var. Bu cinayətkarlar Gürcüstanda mühakimə olunmalarına baxmayaraq, hələ də Ukraynadadırlar. Üstəlik, bu cinayətkarların bəziləri Ukrayna hökumətində çox yüksək vəzifələr tutur və onlar Mixail Saakaşvilini bizə göndəriblər”, - deyə İrakli Kobaxidze bildirib. Ukrayna Xarici İşlər Nazirliyi bir müddət əvvəl Gürcüstan hakimiyyətini qeyri-insani rəftar iddiası ilə həbsdə olan keçmiş prezident Mixail Saakaşvilini dərhal Kiyevə təhvil verməyə çağırmışdı.
4-02-2023, 15:45
Sabahın havası - Dəyişkən buludlu, yağmursuz olacaq
Fevralın 5-nə gözlənilən hava proqnozu açıqlanıb. ETSN Milli Hidrometeorologiya Xidmətindən verilən məlumata görə, sabah Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gündüz bəzi yerlərdə arabir yağış yağacağı ehtimalı var. Gecə və səhər duman olacaq. Cənub-şərq küləyi axşam şimal-qərb küləyi ilə əvəz olunacaq. Havanın temperaturu gecə 3-5° isti, gündüz 7-9° isti olacaq. Atmosfer təzyiqi 762 mm civə sütunu olacaq. Nisbi rütubət 65-75 % olacaq. Azərbaycanın rayonlarında hava əsasən yağmursuz keçəcək. Lakin gecə və səhər bəzi dağlıq ərazilərdə arabir yağıntılı olacağı, qar yağacağı gözlənilir. Arabir duman. Qərb küləyi əsəcək. Havanın temperaturu gecə 3° şaxtadan 2°-dək isti, gündüz 6-10° isti, dağlarda gecə 12-17° şaxta, gündüz 0-5° şaxta olacaq. Gecə və səhər dağlıq və dağətəyi rayonlarda yollar buz bağlayacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!